قبـــل الثلاثيـــن انتى اللى بتختارى لكن بعد التلاتين هو اللى بيختارك

ان هنشر موضوع كنت نشرته قبل كدا .... بس هقولكوا مناسبته فى الآخر


كلمات اتوجهت لى علشان اى واحد يخبط على الباب اقبله بسرعه البرق اصلى خلاص كلها كام سنة وابقا ثلاثين سنة وبعد كدا مش حيكون لى حق الاختيار ..... ( مناسبة الكلام ده ايه وليه اتوجه لى ومن مين ) فتاة فى السابعه والثلاثين من عمرها عائلة محترمة ... وضع مادى ما شاء الله اللهم ما لا حسد .... بقالها فترة بتتردد عندى على السيبر تتحدث مع خطيبها كل يومين على الاكثر .... فهو يعمل بالخارج .... نادتنى اظبط لها الكام ... وبالفعل شوفت الكاميرا بتاعته فتحت بؤى على مصراعيه ... قالت لى انا فاهمه قصدك ... لانى حسيت انها بتكلم جدو ... وبعد ما خلصت جت قعدت جنبى ولاقيتها بتقولى انتى عندك كام سنة ... جاوبتها على سؤالها ... لاقيتها بتقولى انتى شكلك اصغر من كدا بكتيييييييير قولت لها اه كلهم بيقولوا لى كدا بس حعمل ايه ... قالت لى اعملى اللى حقولك عليه .... اصل انا فضلت اتبطر على كل اللى يتقدموا لى .... لحد العمر ما جرى بيا ومش فوقت غير وانا بعد الثلاثين ... والبنت بعد السن ده زهرة شبابها بتنطفى وبتكون مرغمة توافق على اى حد زى ما شوفتى كدا ... مش تغلطى غلطتى لأن البنت قبل الثلاثين هى اللى بتختار ... لكن بعد الثلاثين هو اللى بيختارك .... انا اللى بكلمه ده صاحب اخويا فى السعودية واحنا عيلة كبيرة ... وكل بناتها متزوجين زواجات كويسة ومحترمة ... لكن انا اللى اتبطرت فى الاول ... وده متزوج وعنده 4 ولاد اصغرهم اولى ثانوى .... بس بينه وبين زوجته الاولى خلافات ... وانا تخطبت له ... قولت لها وافرضى الخلاف ده زال ورجع لها ... قالت عادى لأنى لازم الحق قطر الجواز حتى لو على ضرة .... مش عرفت ارد عليها انا نفسى مش لاقيه اى كلام اقوله .....معقول علشان البنت تتجوز تضحى حتى لو على حساب اولاد وزوجة تانية مش عارفه انا اسميها انانية ولا اسميها بنت غلبانه محتاجه تهرب من واقع بيفرض نفسه عليها ... حقيقى مش عارفه
........................................
نيجى بقى للأحداث اللى فكرتنى بالموضوع ده وخلتنى اعيد نشره
بنوتة كانت بتتكلم على النت وانا مش كان قصدى ارمى ودانى والله بس هى اللى كان صوتها عالى لانها كانت تقريبا بتشتكى لحد وبتعيط كمان ... وانا قاعدة منهمكة فى كتابة مذكرة الانجليزى ... وفجأة لاقيت صوت زى ميكون صراخ ... طيب انا ذنبى ايه ... انا هروح لاى واحد كدا فى الشارع واقوله تعالى اتجوزنى علشان ترحمنى من لسانها ... كل شوية تفضل تقولى يا عانس ... شوفى اللى اصغر منك عيالهم دخلوا المدرسة وانتى لسه قاعدة كدا فى ارابيز ابوكى .... ورجعت بعد شوية واصلت كلامها ... ده مش هى لوحدها ان بتخنق والله يا شيخة لما واحدة تقابلنى وتقولى ايه ده انتى لسه مش اتجوزتى ولا اتخطبتى ... والاقيها بتمصمص شفايفها وتقولى ربنا يرزقك بابن الحلال .... وقتها انا نطيت فى الكلام ومن غير ما احس والله ... وقلت لها وانتى تعملى للاشكال الزبالة دى قيمة ليه ... ده مجتمع غبى متخلف ... انتى مالك بيه ... قالت لى والله عندك حق ... تعرفى يا اختى ... ألا هو انتى الاول اسمك ايه ... قولت لها اسمى ... بعدها قالت لى اصل الست السافلة دى تبقى مرات بابا ... وكل لما تلاقى نفسها فاضية تيجى تقولى يا عانس ... قولت لها دى واحدة مخها تعبان لان هى نفسها مش ملكت لنفسها شئ ده اولا وثانيا الزواج ده ارزاق وبيكون مكتوب للبنت هى هتتجوز مين وامتا ؟؟؟ سيبك بقى من النظرة المتخلفة بتاعة الناس دى ... قالت لى هخلص كلام مع ماما واجى اقعد معاكى شوية ممكن ؟؟؟ خلصت كلام مع مامتها واللى واضح طبعا من خلال الحوار انها منفصلة عن باباها وعايشة فى بلد عربى تانية خالص ... وفعلا جت قعدت معايا لاقيتها بتحكى لى على حاجات كتير جدا تخلى الاقرع يشد فى شعره .... طيب ليه اساسا المجتمع يبص للبنت النظرة الغبية دى ... واشمعنى يعنى كلمة عانس ... ما هى الكلمة تطلق على البنات والذكور كمان .... عموما انا مبعترفش بالكلمة دى ... لان الموضوع فى النهاية قسمة ونصيب وارزاق متقدرة .... ممكن بقى الناس تخليها فى نفسها شوية ويسيبوا اللى بتتجوز وبتتطلق فى حالها ... ويقتنعوا ان اللى ربنا مقدره هيكون

Comments

اااااااااااااااه
التدوينه دى جات على الجرح
فرنسا هانم
على قائمه المطلوبين عالميا
قصدى على قائمه العوانس
اصلا مرات ابو الفتاه دى متجوزه رجل متجوز
او مطلق
يعنى
لا تعايرنى ولا اعايرك الهم طايلنى وطايلك
على فكره
الموضوع بتاع الضره ده
اتعرض عليا مرات كتيره جدا فى السنين الاخيره وانا رفضت
تحياتى
وامواااااااااااه
على فكرة بقى انا لسة حالا ناشر بوست جديد هو يعني طريف شوية

و فيه تلميح للحكاية دي

عموما العنوسة مشكلة وليدة عن البطالة و الظروف الاجتماعية الطين اللي احنا عايشين فيها


تحياتي
بصى ياقطتى

انا الاول عايزة ابعتلك بوسة عبر الاثير ممكن

عشان البوست الهايل دة

الحقيقة حكايتين فى الصميم

ودى مش اول ولا اخر بنت تشتكى من الموضوع دة ولو اللى فى البيت كويسين

هيبقى من برة البيت ولو اللى برة البيت محترمين ومش بيقولوا عانس فكفاية البصة
او السؤال هو انتى لسة ماتخطبتيش

وهقولك حاجة بقى الناس ياحبيبتى ماتسكتش

يعنى البنت طول ماهى مش مخطوبة يبقى السؤال كدة انتى لسة قاعدة؟؟
مافيش عرسان هما ايه اتعموا
والا انتى بترفضى ؟؟
معقولة ماحدش عاجبك ؟؟
بعد الخطوبة بقى
هااااا هتجوزى امتى بقى ؟؟

بعد الجواز

ايه مافيش حاجة كدة فى السكة ؟؟

فأيها النسوة ريحوا دماغكوا وكبروا المجتمع دة مش هيمشينا احنا نمشيه على دماغنا الدنيا اتغيرت

تانى حاجة بقى الاخت اللى بتقول مش عارف ايه دى معندهاش مبدأ اصلا
يعنى كان اشرف لها تقعد في بيتهم لغاية ماتموت

يعنى هى كانت في الاساس رفضت عرسان ليه ؟؟

عشان في الاخر تجوز جدو وكمان على ضرة
الهانم دى ماتعرفش فى كام شاب فى بلدنا فوق الاربعين ولم يسبق له الزواج نظرا للظروف المادية
معلش بقى الاخت دى داخلة على طمع
تلاقيه غنى وكدة وهى مستنية الشاب الغني لما ماجاش الغنى قالت تاخد جدو الغنى
احلى تحية
لاحلى قطة
Nigro said…
This comment has been removed by the author.
ابو احمد said…
الحياه ارحب واوسع من الجواز والجواز مش هو اللى بيحقق للانسان ذاته
فيه حاجات كتير فى الدنيا غير الجواز ممكن الانسان يحقق فيها ذاته
النجاح فى العمل اهمها
تحياتى
مجدى
هقولك حاجه حلوه قوى بجد محدش بيطبطب على حد لكن انا لو بنت اتجوز الى بحبه بس مش لازم راجل والسلام فيها ايه انك تقعدى من غير راجل
مش احسن ما تتجوزى واحد بيكرهك وبتكرهيه
صعب الحياه ليها 100 لون
Foxology said…
فعلا .. الجواز نصيب ورزق مكتوب عند ربنا قبل ما يخلقنا اساسا يبقى الناس تفهم كدة ياريت لكن هنعمل ايه ؟؟ كل واحد دماغه مريحاه

بوست جميلة يا قطة الصحراء :)
الربان said…
تحياتي

اسمحي لي ان اقول رايي :

1ـ الزواج قسمة و نصيب ، ورب فتاه لم تتزوج لكن الله القي في قلبها من السعادة..و الرضي الكثير...

2ـ كلمة عانس كلمة سخيفة...و الافضل انسه ...

3ـ ليس كل المتزوجات سعيدات ، و بعضهن
حالتهن بؤس و شقاء.

4ـ لا يعلم أحد ما أخفي الله لتلك التي لم تتزوج في الحياة الدنيا ، اقول ما قدر الله لها من سعادة و نعيم مقيم في الاخرة ، إن هي أحسنت العمل في الحياة الدنيا و رضيت بما قسم الله لها.

5ـ الزوجة الثانية أو التعدد...لا يجب ان نرفضه كله..او نقبله كله، بمعني هناك حالات فعلا قد يكون الافضل للمرأة او الرجل ان يتزوج ثانية و تكون المرأة زوجة ثانية.

6ـ البنت او المرأة هي سيدة قراراها
حتي لو كانت في الستينات...ليس معني انها
اصبحت في الثلاثينات ان ترضي بمن هو ليس
كفء لها ادبيا و ماديا و عمريا....

تحياتي و تقديري ودمت بالف خير.
سلام عليكم وصباح القطط
اولا كل شيء ربنا عز وجل خلقه بقدر وبميعاد معين لا يتقدم ولا يتأخر
والزواج رزق زي ما حضرتك قولتي ولو ايقنا بهذا الكلام مش ايبقى صعب علينا مواجهة الناس ايا كانوا

مع خالص التحيات
اتمنى ان نتواصل دائما
الشاعر بن هلال
قطتى الجميله انا قريت البوست بتاعك وضحكت جدا من الكلام الى انتى كتباه
مش استهزاء والله
لا ابدا
كل الحكايه انى عندى 22 سنه
ومن وانا فى العشرين امى
شوفى امى
بتقولى يا عانس
ومحلتش عن دماغى الا لما اتخطبت
ودلوقتى بتعاير اختى 20 سنه
شكرا على مرورك لمدونتى
وكررى الزياره
والله أكتر حاجة بكطرهها في المجتمع الفاضي ده هي الفضول والتطفل الزائد

هو بصراحة لو كل واحخد يتدخل في اللي ملوش فيه يلاقي اللي يحرجه ويهزأه هيكون رادع ليه ولأمثاله

وبعدين من حسن اسلام المرأ تركه ما لا يعنيه

لكن مجتمع متخلف وفاضي هيعمل ايه غير أنه يقعد يجيب في سيرة ده ودي

حاجة تقرف



سوري ياقطة الصحراء علي الدوشة دي بس حاجة تعصب
اناو لد اه وكل شى قسمة ونصيب انا فعلا اتاثرت بالبوست قوى وصعبت عليه البنت بس مش ملاحظين اننا احنا سبب من ضمن اسباب العنوسة سواء للرجل او البنت وخصوصا اهلينا وطلباتهم ولو فضلنا على الحال ده نسبة العنوسة اتتزايد وتتفاقم واتنتشر ظواهر الزواج العرفى والدعارة والعياذ بالله
المشكلة اخطر واكبر مما نتصور جميعا
واللهم يا لطيف اللطف الطف بنا وارحمنا وتجاوز عن سيائتنا
انا اول مرة ادخل المدونة بتاعتك بس بصراحة لذيذة انا لسه مدون فى كى جى1
مدونتى اسمها همس الاحباب
Desert cat said…
فرنسا هانم
انتى من المطلوبين عالميا على قائمة الأحبة مش قائمة العوانس ... لأن الكلمة دى ملهاش اى مصنف لان الزواج من عدمه رزق من الله ومحدش عارف اللى اتاخر سن زواجها ربنا مقدر لها ايه ..
تحياتى يا جميلة
امواااااااه كبيرة اوى
Desert cat said…
ملك الكبدة
شوفت البوست يا فندم
بالظبط البطالة دى سبب كل المشاكل ... طيب والحل حنفضل نقول البطالة ومنها لله ما هو لازم يكون فى حل
Desert cat said…
اميرة ويلز الجميلة
اكبر بوسه عبر الاثير لعيونك يا جميلة
ما هى بقى المشكلة فى المجتمع ... لو كل واحد بص فى عيوبة اكيد اكيد هينشغل عن عيوب الناس .. ده اذا كان تاخر سن الجواز يعتبر عيب يعنى
لان محدش ليه دخل فيه
او تاخر الانجاب او اى حاجه من اللى ربنا مقدرها والناس بتحشر نفسها فيها دى
محبتى يا قمر
Desert cat said…
Nigro
انا اللى خلانى اتدخل فى الحوار ان منظر البنت صعب عليا وهى بتعيط ... انا عن نفسى لما حد بيسالنى فى حاجه خاصة بحرجه ... واقوله فى حاجه اسمها خصوصيات لو سمحت
تحياتى ليك
وربنا يرحمنا من الافكار دى
مشمش said…
ربنا يرزق البنات كلها بالزوج الصالح يارب
انتى عارفه احنا مشكلتنا ايه فى مصر
كلام الناس
اه والله
يعنى دلوقتى الست بقت بتجوز عشان كلام الناس
ياعينى على الجهل

يعنى الواحدة من دول بتبنى مستقبلها بكلام الناس
ومع ان كلام الناس مبيجبش غير وجع الدماغ
وفى الحالة دى بيجيب الجحيم

الا انها بتقبله
عشان محدش يقول عليها عانس
مع انى مش فاهم اساسا يعنى ايه عانس
طب مهم الستات فى الغرب
بيتجوزه بعد الاربعين مش حقولك التلاتين
وعايشين عادى وسعداء ومبسوطين


بصى عيبنا كامصرين
اننا لما بنلاقى عيب فينا بدل منصلحه
بنداريه بعيوب الى قدامنا
مع اننا بكدة بنزيد عيوبنا احنا اكتر
بصى الاخ اليابانى لما بيجى بيزرع

العشب بتاعه
بيبقى حريص انه يسيب مسافة مابين الواحدة والتانيه
عارفة ليه
عشان الزرعة تاخد راحتها فى النمو
زىنا بالظبط
لازم نخلى فيه مسافة فى تعاملتنا مع بعض
ولازم يبقى الاحترام المتبادل موجود

ولو لقيتى نفسك فى مكان مبيسمحش بالمسافة دى
يبقى وسعى لنفسك بنقسك
يعنى بمعنى اصح
المفروض يبقى عند كل انسان خط احمر فى تعاملاته مع الى حواليه
وميسمحش بحد بانه يعديه

لان دى حياتك انتى انتى الى بتختارى
لانك انتى الى بتعيشى وانتى الى حتتعذبى لو اختيارك مكنش سليم مش هما
وانتى الى حتبقى سعيدة لو اختيارك طلع سليم
وبالنسبة للاختيار والقدر

ربنا لما خلق ادم خلقله حوا بتاعته
وكتبلهم انهم يتقابله
بس فين وامتى وازاى
محدش يعرف
بس بصى العظمة بتاعت ربنا
الى البشر بيمنعوها عن بعض
ربنا عطانا حق الاختيار
يعنى انتى كدة كدة حتقبلى قدرك بكرة بعده بعد مية قرن
كدة كدة حتقابليه
بس ربنا عطالك حق الختيار
عايزه تمشى فى سكته ولا عايزة تلفى وتمشى فى سكة تانية
ودة احلى مافى الدنيا
انك ربنا كتبلك حيحصلك ايه
بس انتى الى بتحددى وبتختارى
وبترسمى طريقك بنفسك
تيجى انتى بقى
وتمنعى عنك الحق دة
عشان كلام الناس

طب بالزمة دة اسمه كلام

وخالى بالك الى بيتجوز بالطريقة دى
بتبقى هابلة
لانها بضيع من اديها مميزات كتيرة اوى
كانت ممكن تحصل عليها لو صبرت على قدرها ومتستعجلش
وعلى فكرة
هى بالطريقة دى ضيعت كرامتها
لان الراجل مش حيتحرمها
زى مكان حيترمها لو كانت صعبت نفسها عليه
وعملت نفسها شئ مستحيل
هو الراجل بيحب كدة الشئ المستحيل
كل ماحتصعبى نفسك عليه كل محيجرى وراكى اكتر
وكل متصعبى الامور كل محتعرفى انتى غالية عنده اد ايه
وكل محيتعب اكتر كل محترامه ليكى حيكبر



تحياتى ياقطة

وسيبك من كلام الناس
دى عالم جهلة ولا تفهم حاجة فى اى حاجة
دنتى حتلاقى اكترهم متجوز تخليص حق

ياله ماعلينا بلاش نجيب فى سيرة الناس
قطتي العزيزة اولا السلام عليكم عشان انا اول مرة ازورك ثانيا هي يا بنتي الدنيا كده ماتخلينيش اقول لك يعني هما اللي اتجوزوا ارتاحوالكن كل واحد في الدنيا عنده حاجة تضايقه ربنا مقسم السعادة و الزعل و ما بيظلمش حد بس نصحيتي لأخواتي الاحرار يردوا علي اللي يكلموهم في الموضوع ده بهزار و ضحك و تعليقات تكبس بس بذوق و لا يظهروا ضيقهم لأن الناس حيقولوا يعني حتي منضايقة مش طايقة الكلام و اللي ما بتعرفش ترد تقولي و انا اكتب لها قائمة ردود تسكتهم و اي خدمة و استمتعوا اخواتي بحريتكم شوية قبل ما ربنا يكرمكم و تتلخموا
ربنا يرزقنا جميعا خير الدارين
و بس بس نو لقطتي اللذيذة ابقي اتفضلي عندي
Desert cat said…
ابو احمد
بالظبط يا فندم احنا مقتنعين بكدا بس اللى يفرسك تبص تلاقى واحدة مقابلاك تقولك هو الشغل هيعملك ايه الواحدة متحسش بانوثتها غير لما يبقى عندها بيت واسرة وراجل تتسند عليه .. على اساس انها هتتجوز شجرة
تحياتى
Desert cat said…
صوت من مصر
تعرف انا بشوف بنات كتير اوى مقتنعين ومبسوطين وراضيين باللى ربنا قسمه ليهم بس الناس ربنا يهديهم بقى
تحياتى
Desert cat said…
Foxology
الحمد لله ان فى ناس بتفكيرنا فى المجتمع والا كان زمان فى ناس اتعقدت وانتحرت كمان
علشان الناس الفاضية تنبسط
تحياتى يا فوكس
Desert cat said…
الربان
استاذى الغالى
يشرفنى رأئيك ودائما يسعدنى تواجدك
طبعا رأي سديد من انسان صاحب عقل كبير وحكمة
للاسف العقول تختلف وبعض الناس مش وراها حاجه غير انها قاعدة تدور على عيوب غيرها
مع انهم لو بصوا لعيوبهم مش هيلاقوا وقت علشان يدوروا على عيوب الناس
الغير متزوجة ... مش اتجوزت ليه اكيد هى وحشة او سمعتها بطالة
واللى اتجوزت واطلقت تصبح فى نظر هؤلاء وكانها فتاة ليل ... واللى ما انجبتش .. اصلها مش عارفه تبقى ايه وكأنهم تدخلوا فى إرادة الله وفى تدبير شئون عباده
ربنا يصلح حال الجميع

احترامى وتقديرى
Desert cat said…
اجري على الله
طبعا الزواج والاولاد رزق من الله
واللى راضية فعلا بالى ربنا رزقه لها اكيد هتقدر تواجه وتواصل حياتها دون الالتفات للقيل والقال
يشرفنى دخول مدونة حضرتك
تحياتى
Desert cat said…
قلوب بتغنى
هههههههههه
ده انا على كدا امى ملاك
هروح ابوس ايديها اول ما اول البيت
معلشى يا حبيبتى
ربنا يتمم لك بخير وعقبال اختك الصغيرة يارب
بس مش تنسى تعزمينى على فرحك يا جميلة
Desert cat said…
القلم السكندري
بالظبط كدا موافقة حضرتك تماما
وده بالفعل اللى انا بعمله لما حد بيسالنى على حاجه خاصة بيا او بحد من اهلى
بالرغم من الناس دى بتزعل منى
بس ناس الشكل ده ميهمنويش اساسا فى حاجه وعلشان كدا اصبحوا بيتلاشوا سؤالى عن اى حاجه حتى لو الساعه معاكى كام ... من تدخل فيما لا يعنيه سمع ما لا يرضيه
تحياتى
Desert cat said…
همس الاحباب
اولا حضرتك شرت المدونة ويالف اهلا وسهلا بيك فى اى وقت
ثانيا : موافقة حضرتك فى ان اسباب العنوسة ... بس اساسا دلوقتى الوضع مش مستحمل اى طلبات الناس كلها بتكح تراب .... وبالتالى اصبح الزواج مشكلة لان محدش لاقى ياكل علشان يتجوز ... ربنا يهدى الجميع الى ما فيه الخير
تحياتى
Desert cat said…
مشمش
اللهم آمين
Desert cat said…
زعيم كمورا مورا
اوك انا معاك يا زعيم فى موضوع الخط الاحمر لكل واحد علشان ميتعداش حدوده بين الناس ... والمفروض ان كل واحد ليه خصوصية ومش من حق حد يتدخل فيها ... بس فى ناس الفضول بيقتلهم يبقى الحل انى ارد عليهم بطريقة تحرجهم علشان مش يعدوش حدودهم تانى ولا ايه ؟؟؟
تحياتى
Desert cat said…
ام احمد الغالية
عليكم السلام ورحمة الله وبركاته
شرفتى المدونة ونوريتيها
انا شايفه ان الناس محتاجة شوية وعى علشان ما تتدخلش فى ارزاق العباد ... ماهو الزواج برضه رزق
من ناحية الردود فى بنات بتتكسف ترد وتلاقى وشها جاب الوان الطيف السبعة وتكبت فى نفسها ... وفى بنات بترد ردود صعبة انا بقى من اصحاب الردود الصعبة لو حد سالنى فى اى حاجة لانى بعتبر حياتى كلها ملكى انا لوحدى مش انا والمجتمع ... علشان كدا لو حد فكر يسالنى فى اى حاجه بينال ما لا يرضيه .... ربنا يهدى الجميع
بجد مبوسطة اوى علشان حضرتك شرفتينى
تحياتى
قطه

بصي الاول نكون صرحاء مفيش بنت مش بتتمني تجوز وده مش عيب وخصوصا تحت ضغط معايرة الناس وعمرها الانجابي القصير ورغبات الغريزة التي لا تتحقق للبنت تحديدا الا داخل اطار شرعي
طيب لو النصيب مجاش
عادي ...كل بنت لها كيرف معين تلاقي عليها الطلب زياده اوي تقريبا عند 25 او 26 ثم يبأيقل
بعد السن ده لازم معدل طلباتها وموافتها يقل ويكون واقعي
ومتقولش الكلام الغبي بتاع انا مش اقل من فلانه ولا من علانه
اقسم لكي يا قطه لي صديقات انسات رفضن عرسان بيتمنوا ربعهم من سنوات بعد ان كسرن حاجز التلاتين وخصصوصا ان اللي جاي بيكون اسوأ وبتدخل في مرحله المطلق والارمل والكبير وده مش عيب الارمل مش عيب انه ارمل ولا المطلق ولو جالك واحد كويس ذو تجربه سابقه العقل بيقول ومالو ..الجواز دلوقت سوق فيها عرض وطلب ولما سنك يزيد يبقا الطلب اقل
لكن اللي شفته ان البنت لما سنها بيزيد تقعد تبص علي امجادها وتقول بعد المهندس والدكتور اخد صاحب سوبر ماركت ولااخد محامي
وده غباء اللي فات مش بيرجع انا شفت اصحابي رفضت عريس لانه وشه في حب شباب!! رغم انه طبيب جراح وعنده شقه وعياده
اسوأ اختيار لاي بنت هو الزوجه التانيه لانه غالبا بيقول مبررات واهيه ويطلع في مراته القطط الفطسانه عشان يحلل لنفسه انه يجوز ويحتفظ بالبيتين
وغالبا وبرضه من مشاهداتي
لا يكتفي بالتانيه فقط بل تكون هناك تالته وعشيقه وبلاوي سودا واخير الاستخارة مفيش احسن منها
بالتوفيق يارب
Desert cat said…
بنت القمر
حبيبتى انا متفقة معاكى جدا فى الكلام اللى حضرتك بتقوليه
بس فى ناس بيتاخر سن زواجهم ومش بيكون بمزاجهم وببقى كل واحد وظروفه وفى فعلا اللى بتبطر وبعد كدا بترجع تندم
بس ان هنا يهمنى اعرف الناس مالها وبتتدخل فى حياة غر\يرها ليه ده غير نظرات الشفقة والعطف اللى مش مطلوبة منهم اصلا ...
ربنا يوفق الجميع
محبتى يا اجمل بنوتة للقمر
هما الناس الى زى دول بيتحرجه
انا عن نفسى لما حد بيفكر مجرد تفكير انه يعدى الحدود
على بديله ببوز سن الكوتشى الاميجو الى بينور
على دامغه بجبله فقدان ذاكرة دائم



وزى منا قولت فى الاول
احنا ناقصنا الاحترام
لو احترمنا بعض
والمعاملة مابينا بقى ليها حدود
ومحدش يدخل فى شئون التانى
صدقينى حنعيش مرتاحين
والدليل الى بيحصل فى الغرب
شوفى كل البلاوى الى بتحصل هناك
بس شوفى ازاى بيحترمه بعض
ومحدش فيهم قال هو فلان بيعمل ايه ولا علان عمل ايه
لانه عارف انه لو سئل
يبقى بيدى فرصة للسؤال عنه
دة غير انه عارف
ان ربنا عطى لكل واحد فينا حريته
يعمل الى هو عايزه وقت مهو عايز
وبالشكل الى هو عايزه
وفى الاخرة الحساب

ومعطاش الحق لبشر انه يحرمه من الحق دة


تحياتى
موضوع هايل يا قطة الصحراء كعادة مواضعيك دايما
وفعلا كل اللى انت قولتيه ده بيحصل بالفعل فى اغلب البيوت المصرية
اذا مكنش بالكلام الصريح بس بيكون بالنظرات او بالاحساس بتحسى بالكلام اللى بيتقال جوا اللى قدامك من نظراته شئ مؤلم وسخيف جدا وللاسف محدش سايب حد فى حاله
ومحدش عاجبه حاله
وعلى راى البنت اللى بتقول لما طيب تتخطب البنت شويتين نمسك اسطوانه بقى امتى الجواز يتم ده نشغل الاسطوانه اللى بعديها طب ايه مفيش عيل ولا ايه
طب ليه كدة دده جرح لمشاعر البنى آدم وتكسير لخصوصيته وبعدين ده حاجة مش بايد البنت دية حاجة من عند ربنا وكل واحد يرضى بقضاء ربنا ومحدش عارف الخير فين
للاسف الموضوع ده محتل الصدارة دلوقت لسه فى برد الجمعة اللى فات فى الاهرام بيتكلموا فى نفس المشكلة والمحرر قايل فى الاول مش اول مرة نثير الموضوع ده اللى بجد بيهدد امان المجتمع
وللاسف الاهل بيساهموا احيانا فى زيادة المشكلة دية احيانا بزيادة الطلبات وارهاق الشباب وللاسف عشان كدة الشباب اصلا بيخافوا انهم بفتحوا حتى الموضوع زائد ان المعيشة كل يوم فى الطالع
بجد الموضوع ده بيحزنى جدااااااااااااااا لأنه واقع مرير بنشوفه فى اقاربنا واصحابنا واخواتنا بجد شئ مؤسف
ربنا يسترها ويانا ويحقق لكل بنت كل اللى تتمناه
وربنا يهدى مجتمعنا والناس تعقل بقى وتبطل الكلام اللى مالوش اى لازمه اللى لو متقالش الدنيا مش هتهد يعنى ولا هوا يعنى لازم احراج النسا وخلاص ونعملهم اكتئاب
معلش طولت عليكى بس بجد بضايق من الناس دية جداااااااا
ونفسى ان تبقى كل الناس عايشة فى استقرار وامان وكل بنت ربنا يحقق ليها كل اللى تتمناه ويرزق الجميع بالزوج الصالح والزوجة الصالحة
يا رب
امممممممم
بما انى من المتجوزات يعنى شهادتى هتكون مجروحة
بس برضه هاقولها
بصى يا قطقوطة
للاسف الشديد
احنا مازالنا بنعامل البنت على اساس انها كائن درجة تانية
يعنى تلاقى الراجل من دول عنده اربعين سنة ولسة ماتجوزش ومع ذلك تلاقيه طالع فيها اوى ومحدش بيوصفه بالوصف البشع اللى هو عانس
وكمان لاحظت حاجات تانية
الراجل مهما سنه كبر مازال دايما بيبحث عن البنات الوراور حتى ولو كانوا اصغر منه بعشرين سنة
يعنى اللى عنده اربعين ده
مش هتلاقيه بيبص لواحدة عندها تلاتين
ده عايز واحدة عندها خمسة وعشرين بالكتييير
لانه بيكون فاكر نفسه لقطة خلاص بقى عملهم وحوش القرشينات زمعاه الشقة وجاهزة وممكن يكون معاه عربية
فبيبقى رايح يشوف العروسة وهو حاطط رجل على رجل ولو واحدة عندها تلاتين سنة او ازيد شوية يقول وانا اخد الكبيرة ليه وانا معايا اللى يخلى الصغيرة تجريلى بالمشوار
يعنى بصراحة بيصيبهم الغرور اوى
ودول ناس بيبقوا عايزين الحرق
نيجى لحاجة تانية بقى
البنت اللى انتى بتحكى عنها وبتقولى ان مرات ابوها هى اللى بتقولها يا عانس
دى تحمد ربنا ان مرات ابوها هى اللى بتقولها كدة
أنا يا قطوقطة واحدة صاحبتى عندها ستة وعشرين سنة وعارفة مين اللى بيعايرها بانها لسة ماتجوزتش
امها
تخيلى انتى بقى لما بنت تسمع من امها الكلمة دى
وعمالة تكررها طول اليوم لما البنت خلاص لو جالها زبال هتوافق علشان ترتاح من كلام امها
يعنى ساعات اقرب الناس للبنت هما اللى بيجبولها اكتئاب بسبب كلامهم اللى يسم البدن
انا بصراحة لما بسمع حكايات كدة بقول يارب كل اللى عايز يتجوز يتجوز بقى علشان يرتاحوا
بس مين اللى قال ان الراحة بتيجى بعد الجواز
ممكن جدا يتجوزا وفى الاخر يتمنوا يوم واحد من ايامهم فى بيت ابوهم
عموما بوست هايل يا قطوقطة زى ما عودتينا دايما
وياريت الناس يكون عندها رضا باللى ربنا كاتبوهلها
تحياتى ليكى
اختك خيخة
walaa said…
اولا ازيك يا قطه عامله ايه
ثانيا عندك حق سيبوا اللى تتجوز واللى تتطلق واللى مش تتجوز فى حالها خليكو فى حالكم
يعنى مش كفايه الظروف اللى اتحطت فيها لا كمان الناس عليها
والكلام يشتغل عليها ايه لسه متجوزتش لحد دلوقتى ليه هو فى ايه هى عندها عيب ولا ايه
روحوا اسالوا المجتمع والظروف الصعبه اللى خلت الشباب مش عارف يتجوز ويعش
ويلاقى ابسط حقوقه
بدل ما تلومهم وفروا ليهم الظروف الصح
تحياتى ولاء
لماضة said…
استرها معانا يا رب دنيا واخره
خربش يا قطه كمان
fe3lan mo3zam el nas fe baladna keda
w battefe2 m3 el ra2y elly 2al:

el bent tetkharrag y2ololha hwa enty lessa msh etkhatabty ?

w lamma tetkheteb y2ololha hatetgawwezy emta ?

w lamma tetgawwez y2ololha hatkhallefy emta?

y3ny mn el akher el wa7ed el mafrood ynaffad lelnas dy w kalamha 3shan y3eesh merta7 w yng7 fe shoghlo w y7a2a2 nafso leghayt ma naseebo ygeelo

my greeting for u ya cat :)
الغاليه قطه الصحراء

عارفه اللي بيحصل ده ممكن يتقال عليه ايه؟غباء صدقيني غباء

الجواز قسمه و نصيب و الفكره البنت مش حتروح ترمي نفسها علي اي راجل لما النصيب بيجي خلاص مهما عملت و مهما جريت

لكن فكره عانس دي بتبوظ نفسيه البنت و البنت اللي حكيتي عنها دي و الله صعبت عليا اللي حتعمله في نفسها انها تقبل تتجوز علي ضر عملا بالمثل اللي بيقول ضل راجل و لا ضل حيطه و مافكرتش ان ممكن مراته الاولانيه تطلع عينها و تشغلها خدامه عندها في البيت

حرام بجد اللي بعض الاهالي بيعملوه في ولادهم

بوست مميز ياجميله
:))
Desert cat said…
زعيم كمورا مورا
بالظبط احنا فاقدين احترامنا لبعض واحترام خصوصيات الغير
للاسف احنا مش بنقلد الغرب غير فى الحاجات اللى مش كويسة لكن الحلو بنسيبه ليهم
تحياتى
Desert cat said…
رحيق الحب
ازيك يا لولو اخبارك ايه
بصى با جميل كلامك صح طيب احنا الحمد لله شايفة اننا متفقين كلنا مع بعض ... المفروض بقى يبقى لنا دور ... بمعنى لو حد اتكلم قدامنا فى الحاجات دى نفهمه ونعرفه انه مش من حقه يتعدى على خصوصيات غيره او يتدخل فى شئ بين العبد وربه ... لانه فعلا زى ما قولتى ده فيه تهديد لامان المجتمع ... وربنا يهدى الاهل ويسروا فى طلبات الجواز ويهدى الناس وكل واحد يخليه فى حاله بقى
تحياتى ليكى يا جميلة
Desert cat said…
بت خيخة وأى كلام
شهادتك مش مجروحة ولا حاجه شهاتك عين العقل
فعلا والله بشوف النماذج دى وراجاله اكبر من الاربعين كمان وبيكون متجوز وولاده فى الجامعة ويروح يتقدم لبنت عندها عشرين سنة قال ايه علشان ترجعه تانى شباب ... ولو حد اتجرأ وفكر يقوله ياعم دى ولادك ... يقوله هى هتلاقى زى فين ده انا لقطة محصلتش ولا لما يتجوزها يحسسها انه عمل فيها جميلة وانه لولاه كانت زمانها قاعدة بتقشر بصل فى المطبخ ... برضه المفروض الاهل ييسروا شوية ولو البنت محصلهاش نصيب محدش ليه دعوه بيها على ما اظن يعنى ربنا اللى خالقها هو اللى متكفل برزقها سواء زواج او اولاد او غيره
تحياتى ليكى يا ام شريف يا قمر
Desert cat said…
walaa
انا الحمد لله يا قمر بخير
تعرفى لو كل واحد بيتخيل نفسه مكان الانسان اللى قدامه هيفكر فى الكلام الف مرة قبل ما يطلعه
لكن للاسف كل واحد بيكون متخيل نفسه مميز وانه شاطر وفهلوى
مش عارفه لحد امتا الناس هتفضل مغيبة
ربنا يهدى الجميع
Desert cat said…
لماضة
يارب استرعا معانا جميعا
Desert cat said…
كفايـة طيبـة
ana kman metf2a ma3 elra2 dao
sharft el blog
ta7yaty
Desert cat said…
اجندا حمرا
الجميلة اجندا الجهل المنتشر بين الناس وثقافة الفهلوة نصبت من كل واحد وصى على غيرة وخلت النا سابت مشاكلها واحوالها وقاعدة تبص على غيرها
ربنا يرحمنا
محبتى يا جميل
momken said…
شوفى ياستى
موضوع الجواز ده مشكله قوميه
مش مشكله بنت ولا مشكله شاب

تاخر سن الزواج ده مشروع قومى لتقليل النسل
لو رجعتى بدماغك لورا
هتلاقى من اسباب زياده الانجاب هو الزواج المبكر
طب نعمل ايه
ناخر سن الزواج
ووصلوا لده
لانى ببساطه بشوف بنات زى القمر
وولاد ناس
ومحترمين
ومش متجوزين وسنهم قرب على التلاتين
كمان مش عاوزك تعملى سن التلاتين حاجز ويبقى قبل وبعد التلاتين
محدش عارف السعاده فين
وهتبدا امتى
ممكن بنت تتجوز ستاشر سنه ولحد ماتموت تفضل تعيسه
ووحده تتجوز اخر سنه فى عمرها بس السعاده تنسيها كل العمر الى فات
مع الراجل الى يستحقها ويقدها

كمان عاوز اقولك ان عنوسه البنات
واعتذر عن استخدام اللفظ
هو صوره من صور تدهور الرجوله
ماهو لو كل راجل بيشعر برجولته واحتياجه للانثى مش هيسكوت
وهيقلب الدنيا لحد ما يتجوز
لكن للاسف حتى الرجاله مابقتش رجاله جامده

العيب عيب مجتمع كامل
اصبرى
وربن يقدم الى فيه الخير

تحياتى
Desert cat said…
momken
تصدق انت كلامك صحيح
هو فعلا مشكلة قومية ... وانا لسه صغنونة فى ابتدائى واعدادى كدا كانت الاعلانات مالية التلفاز واوعوا م نالزواج المبكر ... واسال استشير دلوقتى الحاجات دى مبقتش موجودة فعلا نجحو فى مخططهم
طيب البنت مالها بقى او الست مالها المجتمع يحملها نتايج المشروع القومى ده
ويفضلوا يذلوا فيها كل شوية لما بقت بتهرب من الواقع ده باى حاجه مش مهم بقى راجل ولا كوم عضم المهم انه ضل تخلص بيه من لسان الناس
تحياتى

Popular posts from this blog

قميص دهشور

كل تحرش وانتوا طيبين