مــبـــــروك لــمـــصــــــــر


مبروك لمصر الفوز ولو انى كنت عايزه الكاميرون هى اللى تكسب ... اصل بابى من الكاميرون فانا عندى انتماء ليهم بصراحة طبعا مش ابناء بلدى ... طبعا انا كدابة فى الكلام اللى فى الاخر ده .... بس اللى بيحصل عندى هنا فى المنطقة شايفة الناس من العصر عمال تستعد واللى سايب شغله وراح اشترى علم مصر ... واول ما الساعه جت 7 لاقيت المحلات اتقفلت والجميع اتجمع فى محل واحد وكان كل شوية الاقى صريخ زى ميكون الحرب قامت ... ووقت الجون الشارع اتكسر ... ولما الماتش خلص الرجالة ... الحلوين اوى اللى بجد كل واحد شال علم مصر وطلع جرى فى الشارع اه والله كانوا بيجروا زى الاطفال .... رجالة كنت بتكسف ابص لهم وانا ماشية ولما اكلم حد فيهم اقوله حضرتك وسيادتك ويا افندم ... الاقيه ماسك علم وطالع يجرى بيه فى الشارع ... طنط اللى فى التالت بتقولى هو فى ايه يا نانا ... قولت لها اصل مصر فازت يا طنط قالت لى قطيعة تقطعهم وتقطع مصر صحونى من النوم مفزوعة ... يعنى محسوش على دمهم وولادهم متلاقحين فى القهاوى مش لاقيين يشتغلوا ولا ولادهم اللى قاعدين فى البيت مش لاقيين ياكلوا وبيعملوا كل ده علشان مصر فازت فى الكورة أنهى فراغة عقل دى يا بنتى .... قولت لها معلشى يا طنط الشعب نفسه يفرح هيفضلوا يكبتوا فى نفسهم كدا ليه .... شوية ولاقيت عربيات انطلقت فى الشارع زى ميكون صواريخ ... وكله عمال يرزع ويقولا مصر وضرب نار للصباح الباكر حلاوتك يا ابو اشرف ... والستات واقفة فى البلكونة واللى تضحك وضحكتها من الودن للودن واللى تزغرط ... واشطة مصر اليوم فى عيد ... لاقيت طنط اللى فى التالت بتقولى والله ما عاجبنى غير دماغك يا نانا ربنا يكملك بعقلك .... قولت لها طبعا يا طنط انا واحدة وقورة عيب اعمل الحاجات دى ... شوية ونهى اتصلت بقولك ايه استعدى انا هعدى عليكى اخدك اصل انا وسحر راسمين علم مصر على عربيا تنا وعمالين نلف ... بس كدا طيب تعالى بسرعة والنبى اصلى هموت والف زى الناس دى ... طبعا انا فى انتظار نهى دلوقتى بس قولت اكتب لكو البوست لحد ما توصل علشان ابقى اول واحدة بتقول لكوا مبروك لمصر
... اسيبكو انا بقى اصل نهى وصلت وهركب معاها عربيتها لان عربية سحر فيها كل الشلة بتاعتها ....
ايون يا نهى جاااااااااااااااهزة ثوانى
دنج دنج
مصصصصصصصصصصصصصصر

تعليقات

‏قال Heart Beat
الف مبروك لمصر يا فندم

و عقبال كأس العالم

لا واسعة دي شوية

و عقبال اما نتأهل لكأس العالم انما ناخد الكاس دي نسيبها شوية دلوقتي لان ان شاء الله سنة 2010 في حدث اهم من الكورة و ربنا يستر

خلينا في دلوقتي بقى و نقول مبروك للمعلم شحاته و مبروك لمصر
‏قال سهر الليالى
والله تصدقى معاكى حق
أصل أنا شفت المنظر قبل الماتش وانا راجعه من شغلى الناس كانت عاملة زى النمل اللى بيجرى على الجحر بتاعه قبل ما الدنيا تمطر

واللى ينقط اكتر كم الفلوس الهائل اللى جه للعيبه هيودو دة كلو فين انا عايزة اعرف

بس سيبك انتى الف مبروك لمصر
والمنظر عندنا فى اسكندرية ع البحر كان يجنن
تيت تيريتيت .... مصر
:)

تحياتى
‏قال Rosa
ههههههههههههههههههههه
سكر يا نانا
هيا الاحداث الي حاصله عندك دي هي الحاصله تقريبا عندنا في الشارع و في مصر كلها
انا بتهيألي لو مصر كانت داخله حرب و فازت فيها الناس مش هتعمل كدا
يمكن الناس فعلا محتاجه اي انتصار من اي نوع ؟؟
مش عارفه بس هيا حاجه مأفوره فعلا مش عارفه فيه ايه
---------------
وتيت تيـــــــــــــت مصصصصصصصصصصصصصصر
:]
ربنا دايما يكملك بعقلك
:D
‏قال oceaneyes
الف الف الف الف مبرووووووووووووك يا جميل

هى الست اللى فى التالت رأيها من رأى خالتى الصراحة

بس بينى وبينك مهما بيحصل فينا الشعب المصرى برده من حقه يفرحله شوية بدل الهم والغم اللى مش بيخلص منه ده

...


عموما الف مبروك تانى


وحشتينى كتتتتتييييييييييييير على فكرة


تحياتى يا جميل


:)
‏قال صوت من مصر
دنج دنج مصر والهى يا نانا انا مصرى وبحب الكوره من ايام ما كانت شرابات واللهى كنت بقلع الجذمه واعملها عارضه للجون والشراب كوره وعجبى عليكى يامصر نهى بتشجع وايمان بترسم علم مصر
مصر فخوره بيكم
بوست ولا اجدع
انا كنت بهزر شويه بقى اصلى اول واحد يعلق هنا
‏قال زعيم كمورا
مبروك لمصر ومبروك لكل المصرين
الى بره قبل الى جوه
لان بامانة اللاعيبة دى
عظمت اسمت مصر فى العالم كله
العالك كله دلوقتى مبقاش ليه سيرة غير المنتخب والى عمله انبارح
انتى عارفه الشعب فرحان ليه
عشان عملنا المستحيل بعينه
لما تلعبى بلاعيبة المحلين بتوعك
قصاد عمالقة اروبا
وغير انك تكسبيهم لا تجيبلهم كمان احباط
وتخليهم يلفوا حولين نفسهم
انتى عارفه الناس كانت فرحانة اوى انبارح ليه
على فكرة حتى لو المنتخب مكنش فاز ابنارح كانوا حيفرحوا بره
كفاية الروح والعزيمة والاصرار
الى كانوا فى اللاعيبة
تحسى فى اللاعيبة كدة
انهم زى مقولتى وكانهم فى حرب
اه والله

ايه الرجولة الى كانت فى اللاعيبة دى
وايه الحماس دة هما دول الفراعنة بجد
وهو دة مكانهم الطبيعى فوق الكل

بس تصدقى المصرين بيبقى شكلهم جميل اوى وهما فرحانين
تلاقى الناس كلها فى الشارع
كله بيحضن كله وكله بيسلم على على كله
وناس كتير كانت متخانقة مع بعض واتصالحت بعد الماتش
وناس لمدة يوم كامل نست همومها ومشاكلها
وبقت بتضحك الضحكة الى نستها
ياريت يبقى كل يوم بطولة افريقيا وكل يوم يطلع لعيبة رجالة زى دول
وكل يوم ناخد البطولة والناس تفرح وتنسى الهم وتعيش فى الفرحة على طول



بس ياريت بقى الاخ دروجبا يعرف
ان ربنا بينصر الى بيسجدله
ومبينصرش الى بيتعظم عليه

الف مبروك لمصر ولشعب مصر
وياريت نفرح نفس الفرحة فى التصفيات
ونتاهل بقى لكاس العالم

مبروك ياقطة
مع انك كاميرونية
بس مش اشكال الكاميرون تباعنا برده
وبتشرفنا فى كاس العالم

تحياتى
‏قال فرنسا هانم
حلوه يانانا
افتكرتك بتتكلمى جد
ومش موافقه على الفرحه
صباح الفرح والهنا والنصر والكاس
ولفى بعلم مصر براحتك
مصر مصر مصر
تحيا مصر
الف مبروك الكاس لمصر والنبى بلاش يا هارت موضوع كاس العالم انا معلق جوازى على مكسب مصر لكاس العالم ولو ده حصل حتجوز
‏قال DantY ElMasrY
نزلنا بعربية أحمد البطراوى الشارع وقلتله هانروح جامعة الدول العربية
الشوارع كانت زحمة من أول أحمد الزمر مرورا بعباس العقاد لكن قدام سكن بنات الأزهر وقفنا واحد ييجى خمسين سنة
ومسك العلم بتاعى وقاللى ماتجيب العلم دا
قلتله ليه فمسك العلم وخبطنى فى كتفى وقاللى مش الأهلى كسب
انت مش فرحان؟
فرحة للأهلى يا أخى
أنا شديت العلم منه وقلتله :لأ
الراجل بص لى باحتقار شديد وأشاح بذراعة وهو يبرطم بكلمات غير مفهومة عن أنانيتى وعدم انتمائى لأهلى
الف مبروك
وشكرا ليكى يا قطقوطة على ردودك عندى
اختك خيخة
‏قال walaa
دى فرحه فرحه يا قطه
الف مبروك لمصر ويارب دايما كده فى فرح وسعاده ويا رب مصر علطول متقدمه
ويارب ندخل كاس العالم
العيال امبارح اتجمعوا وعملوا احلى مهرجان من كتر الفرحه كنت عاوزه انزل الشارع معاهم
ولاء
‏قال Unknown
هههههههه
انا عملت عمايل اليوم ده متتحكيش صراحه
بس من المواقف اللى حصلت كنا بنتفرج فى الصيدليه وجت واحده ست كبيره فى السن معديه بتقول مبروك لمصر
قمت نطيت من مكانى وقلتلها زغروطه يا ام محمد الست وقفت على باب الصيدليه تزغرط
:))
كل ده مخلصتيش لف
ماشي
مصر
مصر
تحيا مصر
تيت ترتت تيت ترتت تيت ترتت تيت
مصر
:D
‏قال غير معرف…
ألف ألف مبروك لمصر الكاس

كان ماتش ايه
تعب اعصاب الواحد لحد اخر لحظه
مع اني ماليش في الكوره بس برضه نشجع اللعبه الحلوه

المشكله بس كانت في اللي كانوا المشجعين بيعملوها في احتفالتهم و علب البيروسول اللي كانوا بيولعوها و دي كانت حاجات خطره اوي
بس مبروك لمصر
تحياتي ياجميله
‏قال نهر الحب
مبرووووووووك الف مبروك لمصر

ةان شاء الله انتصارات اكتر واكتر
‏قال نهر الحب
مبرووووووووك الف مبروك لمصر

ةان شاء الله انتصارات اكتر واكتر
‏قال حواء
الناس مابتصدق تلاقى حاجة تطلع فيها الكبت اللى عندهم وياسلام بقى اما يكون زحمة وكل واحد بيعمل اللى هو عايزه انا نفسى نزلت وعملت هيصة والستات فى الزحمة كانت بتصوت زى مايكونوا فى زار وبيطلعوا الجن اللى ساكنهم ياللة عقبال المرة اللى جاية
مبروووووووووووووووووووك
‏قال Desert cat
Heart Beat
الله يبارك فيكى يا جميل
وان شاء الله فى انتظار 2010 معاكى
‏قال Desert cat
سهر الليالى
بصراحة فى اليوم ده المنظر كان يجنن فى كل مكان
مش مهم بقى الفلوس اللى اخدوها اللعيبة ده الشعب كله فرحته تسوى ملايين الدنيا
‏قال Desert cat
Rosa
ما هى طنط لما قالت لى ربنا يكملك بعقلك مكانتش عارفه انى فى اقل من 10 دقايق هبقى فى وسط الناس دى
مبروك لمصر يا جميل
‏قال Desert cat
oceaneyes
حبيبى
عاملة ايه انتى كمان وحشانى
الناس مبتصدق تلاقى حاجه تخليها تبتسم عايشين الحياة كلها فى كبت هنعمل ايه بس
‏قال Desert cat
oceaneyes
حبيبى
عاملة ايه انتى كمان وحشانى
الناس مبتصدق تلاقى حاجه تخليها تبتسم عايشين الحياة كلها فى كبت هنعمل ايه بس
‏قال Desert cat
صوت من مصر
اه طبعا كنا بنشجع وبنرسم العلم
ده انت كمان ما اخدتش بالك واحنا بنضرب صواريخ فى الجو
‏قال Desert cat
زعيم كمورا مورا
الف مبروك للفراعنة يا زعيم
‏قال Desert cat
فرنسا هانم
انا اتكلم بجد
ده انا مصدقت .... الواحد كان نفسه يطلع الكبت اللى عنده من زمان مصدقت الاقى فرصة
‏قال Desert cat
رئيس جمهوريه نفسى
لا ياباشا انا شايفة انك تبطل تتلكك كتير وتقول اتجوز فى 2010
يلا بقى اعزمنا الشهر اللى جاى
علشان مصر تفرح بيك
‏قال Desert cat
DantY ElMasrY

طيب كنت اديله العلم علشان تعرفه ان عندك انتماء للاهلى
ههههههههههههه
الناس بتجرى كدا وتظأطأ من غير ما تعرف فى ايه ولا مين كسب ولا مين بينضرب حتى والله احنا شعب غلبان
‏قال Desert cat
بت خيخة وأى كلام
تشكرينى على ايه بس يا ام شريف
انتى كنتى بتتكلمى فى حق
وبالتالى كان لازم نرد يعنى
المهم الف مبروك لمصر والللية عيد والعريس هيتجوز
‏قال Desert cat
walaa
من الواضح انه كانم هرجان جماعى فى جميع انحاء المعمورة
الف مبروك الفوز يا لولا
‏قال Desert cat
لماضة
ههههههههه
عسل
انا متخيلة الموقف
وكمان عارفه دماغك
‏قال Desert cat
مهندس مصري
لاء رجعتتتتتت
عدنا والعود احمد
مبروك يا بشمهندس
‏قال Desert cat
اجندا حمرا
النهاس بتكون عارفه انها خطر بس تقريبا مش بيعرفوا يعبروا عن فرحتهم غير بالشكل ده
انا بقى كنت بفرقع صواريخ
ههههههههههههههه
‏قال Desert cat
نهر الحب
ان شاء الله دايما
الله يبارك فيكى
‏قال Desert cat
bocycat
هههههههههههه
والله نفس اللى حصل عندنا ونفس اللى انا عملته
يارب دايما الشعب فرحان
‏قال Desert cat
اسكندرانى فى الغربة
الله يبارك فيك

المشاركات الشائعة