ثلاثـــــــة فـــى واحــــد

ثلاثة فى واحد ده مش إعلان شامبو جديد إنما ده تاج وصلنى من 3 مدونين زى العسل ... ولما تكتب بوست وتلاقى الكومنتات عندك منورة يبقى اكيد شمس اول كومنت ... ولما الموضوع يحتاج لجدعنة اكيد اكيد يبقا هنا اجدع دكتورة ولما تتزنق بقى وتلاقى نفسك فى خانة اليك يبقى مفيش حل غير خالو احمد الصباغ ....

نشوف السؤال الاول بيقول ايه
هل توافق على حزف خانة الديانة من البطاقة الشخصية ؟
أه طبعا أوافق ونص ... علشان ايه اتعامل مع انسان على اساس ديانته

ما رأيك فى المثليين ؟

بنى أدمين وبشر وكل واحد له اتجهات تخصه لوحده

هل هى حرية شخصية ؟

طبعا حرية شخصية

هل توافق على الإعتراف بالمثليين ؟

هى مش حاجة لسه تحت الدراسة علشان افكر اعترف ولا لاء هما واقع وموجود .... ثم انا مين ولانا انا ولا غيرى على الاعتراف بيهم من عدمه

هل لديك أصدقاء من المثليين ؟

يمكن يكون فى وانا ايه عرفنى ...

هل تعتقد بوجود إضطهاد للمسيحين فى مصر ؟

طبعا الاضطهاد موجود ... بالرغم من اننا فى 2008 الا ان لسه فى ناس عقلها حجرى وتقولك ده مسيحى يعنى استبيح ماله وعرضه ولما تتكلم معاه يقولك ياعم نفض .... ده مسيحى

من هو الشخص الذى تختارة لرئاسة مصر ؟

هختار اللى يضمن لى ان مفيش اسرة فى مصر تنام من غير عشا ... واللى يضمن انه يرجع كرامة الشعب ويرحمنا من الفساد المتفشى فى كل مكان

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟

حزب ليبرالى بحت .... والافراد يبقى ناس تفكيرها متوازن

هل توافق على مشاركة كل من : الإخوان المسلمين - الأقباط فى الحكم ؟

امال مش اخوان .... علشان يبقى من فساد لارهاب وتطرف .... ده الواحد منهم طول ما هو قاعد قال الله وقال الرسول وبعد شوية تلاقية فى اوضة نوم جارهم بيعمل لزوجته مساج ... يبقى اخوان لاء ثم لاء ثم لاء ...

الاقباط هما مش مصريين برضه ولا انا هروح انتخب قبطى من بلاد واق الواق

فى رأيك الشخصى .. ما هى أفضل مدونة على بلوجر قمت بزيارتها ؟

والله انا زورت كتير وكل مدونة بحس فيها بفكرة مختلفة ووجهة نظر مختلفة يعنى لو ذكرت بلوج معينة يبقى ظلمت الباقى

اذا تزوجت وأنجبت ولدين وبنتين .. أى الأسماء تحب أن تسمى ؟

4 ليه بس هو انا ارنبة

هما ولد وبنت كويس اوى بس ما علينا القافية حكمت .. قصدى السؤال

البنتين يبقى غزل ونغم .. والولدين آدم وأدهم

هل تعتقد أن توريث الحكم فى مصر . . سيتم فعلا أم لا ؟

والله احنا شعب كداب زفة ... يعنى نفضل نقول لاء ومش هيحصل ومش ينفع ولما الاوامر تيجى من هنااااااااااك نقول آمين اصله بيد عمرو لا بيدى

فى رأيك الشخصى : ماهو أفضل إنجاز لحكومة مبارك ؟

عروستى

وما هو أسوأ عمل قامت به ؟

كتيييييييييير ..... عندك وقت تعد ... تدهور تعليم بطالة وانتشار المخدرات وزيادة نسبة الادمان وبطالة وفساد إدارى وغلاء اسعار وقلة ادب منتشرة فى كل مكان

ثم لمن تمرر هذا التاج ؟

طبعا احمد وشمس والدكتورة قاموا بالواجب ومرروه تقريبا لكل البلوجر
علشان كدا انا مش هذكر حد معين اللى عايزه يتفضله

Comments

اوعى يارب اكون اول رد

بس عندى الاوبجكشنات دى

أه طبعا أوافق ونص ... علشان ايه اتعامل مع انسان على اساس ديانته

مش عارفه ازاى .. بس مش معاكى خالص

هل لديك أصدقاء من المثليين ؟
يمكن يكون فى وانا ايه عرفنى
بتبااان ... بيبانوا جدا
حزب ليبرالى بحت .... والافراد يبقى ناس تفكيرها متوازن
هو ايه اللبرالى ده ياسوسن .. اللبراليه الامبرياليه
امال مش اخوان .... علشان يبقى من فساد لارهاب وتطرف .... ده الواحد منهم طول ما هو قاعد قال الله وقال الرسول وبعد شوية تلاقية فى اوضة نوم جارهم بيعمل لزوجته مساج ... يبقى اخوان لاء ثم لاء ثم لاء


لا متقليش كده .. ف ناس منهم تفكير ودماغ وعقل .. واغلبهم كده
مش معنى ان حد بيتستر ف اللحيه وبيعمل م وراها حجات مشينه
يبقى رمز للاخوان او المسلمين

...................................................

تاج موفق

وعؤبال التاج الجاى
Desert cat said…
الدكتورة الجدعة اوى
انتى اول تعليق يا جميل مبروك كسبتى
طيب ماهو لازم تعرفى ازاى علشان نعرف نتفق ... اصل مش عارفه ازاى ومش معايا خالص طيب انا كدا مش قدامى مساحة للنقاش خالص ...
تانى حاجه بيبانوا ازاى مثلا ... بنكون قاعدين ويقوموا يتحرشوا بيا ولا ايه النظام ... مش عارفه انا بصراحة ...
حزب ليبرالى يعنى حر
مالوش علاقة لا بالمهلبية ولا رز بالتقلية

بالنسبة للإخوان ده هما ابو كدا كلهم عايزين الحرق باوسخ انواع البترول
شرفتى اول كومنت يا جميل
بصراحة إجاباتك يا هريرة ما توقعتهاش بالمرة .. لكن طبعا الجرأة و الاعتداد بالرأى أمر واضح جدا .. أحييكى على هذه الصفات .. أعتقد إن ناس كتير جدا ممكن ما توافقكيش على إجابات كتير

أنا كمان عندى شوية "أوبجكشنز" على رأى الدكتورة

لكن بجد أحييكى على اعتدادك برأيك
مش عارف ليه حسيت انك بتجاوبي التاج ده وانتي متعصبة ومتننرفزة
انتي بتزعقي ليه طيب احنا ذنبنا ايه
:D
Desert cat said…
ابن حـجـر الـعـسـقـلانـى
متوقعتهاش ليه بس
مع ان رائي معروف من ظمااااان
عموما يا محمد شرفت البلوج
Desert cat said…
آلام وآمال
انا بالعكس ده انا كنت بكتب الاجابات وانا بشرب نسكافية وعاملة احلى دماغ
علشان كدا كاتبه ردود صعيبة اوى اوى
إذا كان قصدك بحرية شخصية يبقى عادي وبراحتهم فعذرا أنا بختلف في الحتة دي..المثلية دي إنحراف نفسي له أصل اجتماعي في الغالب..يعني حاجة لازم تتعالج نفسيا و اجتماعيا..و الأمراض عمرها ماكانت حاجة تندرج تحت بند الحرية الشخصية ..مش كده و لا ايه؟
Desert cat said…
أحمد المصري
لو هو سلوك يبقى حرية شخصية وكل واحد حر فى نفسه
انما مرض زى ما حضرتك بتتكلم
يبقى مش المفروض تتكلم عليه بالطريقة دى
لان المفروض صاحب المرض بتقف جنبه وتقومه لما يسترد صحته
مش تنتبذه وتتعامل معاه على انه وباء اصل وقتها المرض هينتشر ويتوغل وممكن يوصل بيتك وانت مش واخد بالك
أنونيمس said…
إجابات قطة ليبراليه جداً
:))
اجاباتك لذيذة ومنطقية
هل لديك أصدقاء من المثليين ؟
يمكن يكون فى وانا ايه عرفنى

حلو برضه
:)
david santos said…
Hello, My friend.
Thanks for your posting and have a good weekend.
هوا أنا قلت نمسكهم نرميهم في المحرقة؟
لا طبعا معنى إنه مرض فده إشارة لحاجة واحدة إنه محتاج مساعدة..مساعدة من الأطباء النفسيين و علماء الإجتماع..مساعدة من المجتمع المحيط حواليه اللي لازم يحسسه بالحب عشان يرجع لفطرته تاني..آسف إن كان في تعليقي السابق تقصير في الشرح ولا حاجة بس هوا ده اللي انا قصدته..المرض معناه مساعدة مجتمع مش نبذ...النبذ أقصر الطرق لجعل الأمراض العرضية وباء منتشر..بتكلم عن الإختلالات النفسية على وجه الخصوص..ارجو تكون وجه النظر وصلت..تحياتي0
Desert cat said…
أنونيمس
ثانكس
:((
Desert cat said…
الحبر ابقى من الحب
شكرا يا جميل
Desert cat said…
david santos
many thank's mr david
Desert cat said…
أحمد المصري
والله يا فندم الموضوع مش تقصير ولا تطويل فى شرح بس المقصود فى رد حضرتك الاولانى غير الشرح فى الرد التانى
عموما برضه كل واحد حر نفسه وحر فى سلوكة ... حضرتك مش قيم على تعديل سلوكيات الناس ولا اتعينت وصى على حالاتهم النفسية
... يحضرنى هنا
يابن آدم لا تنظر لعورة امرئ فللناس السن وعيون
الله عليكى ياقطة
بجد اجابتك هايلة
بس انا مش معاكى فى حكاية الاضطهاد دى
بصراحة انا مشفتش شعب فى العالم
بيحب بعض بجنون برغم اختلاف الاديان بينهم
زى المصرين
وتعاملهم مع بعض
معندهم حاجة اسمها مسلم ومسيحى
ممكن فى الفترة الاخيرة
تكون بتتقال
بس الناس بدئت تقولها لبعض
بعد لما صدقت ماما امريكا لما قالت ان فيه اضطهاد فى مصر
مع اساسا المشكلة كلها كانت فى البداية مجرد خناقات مبين اتنين على حاجه تافهة
وطبعا لان الخناقات فى مصر ماشاء الله
تحطم الرقم القياسى بمراحل
فأكيد الخناقات بين المسلم والمسحى كتير
ومن عادتنا هنا فى مصر
ان لما واحد يتعارك يجيب الشلة بتاعته معاه
بطبعا المسلم بيجيب صحابه المسلمين
والمسيحى يجيب صحابه8 المسيحين
وتبقى خناقة كبيرة
ولاننا فى مصر اكتر شتيمة بنستخدمهما فى الخناق هى سب الدين
فاكيد الخناقة اتحولت من حاجة تافها لحاجة كبيرة
ولان اليهود الى واقفين على الباب مبيصدقوا يلاقوا حاجة زى دى
وبما ان اليهود هما الماسكين امريكا
فالما اليهود يقولوا ان فيه اضطهاد فى مصر امريكا حتقول نفس الكلام
ومدام امريكا هى الماما بتاعت العالم
فأكيد العالم حيقول ان عندنا اضطهاد
وبما اننا بنصدق العالم فصدقنا احنا
كمان وبقينا نتصرف على الاساس دة
عشان كدة
طبعا مش كل المشاكل من النوع دة
بس البداية دايما بتبقى مشتركة على حاجة هايفة
ومشكلة ممكن تحصل للمسلمين مع بعض
بس بجد والله عمرى ماشفت حد بيبح المسيحين زى ما المسلمين المصرين بيبحبوهم
وهما >ات نفسهم بيقولوا كدة
وهما كمان الى بيقولوا ان مافيش اضطهاد فى مصر
يعنى فى اسكندرية الى اكتر الكلام عليها
لو اقولك اننا اكتر من اهل حكون بقلل من الواقع الى موجود

بالنسبة للمثليين
مين قال انهم مرضى ولا محتاجين انهم يتعالجوا
دول ناس اختاروا انهم يبقوا كدة
الحكاية كلها
على كدة بقى قوم لوط هما كمان مرضى
طب مدام مرضى ربنا ليه نزل عليهم لعنته
وليه ارسلهم سيدنا لوط عليه السلام عشان يهيدهم
وحيهديهم من ايه اذا كان مرض
يبقى اكيد دة مش مرض
انا من رئيك فى الحتة دى ياقطة
دى حرية شخصية
ومش المفروض اننا نعاملهم على انهم حيوانات عايشة بينا
بس الاكيد اننا لازم نبعد عنهم
لانهم ناس عليهم لعنة ربنا
واللعنه هنا يعنى الطرد من رحمة ربنا
ومدام الانسان اتطرد من رحمة ربه
يببقى حاجة سهلة لشيطان انه يبرمجه زى مهو عايز
والاكيد طبعا ان المكان الى بيبقى موجود فيه مبيبقاش فيه ملايكة
ولو مكان اكل عيش
مبيبقاش فيه بركة

وزى ماقاله زمان
صباح الخير ياجارى انتا فى حالك وانا حالى

تحياتى ياقطة
ربنا يكملك بعقلك
قطة ذكية
Desert cat said…
زعيم كمورا مورا
اولا نورت المدونة
ثانيا موضوع الفتة الطائفية ده موجود جوا دواخل الناس
يعنى موقف صغنون اد كدا
زمان قبل ما يبقى عندى سيبر انا كنت بشتغل وكان معايا فى الشغل ده زميل مسيحى ... جت بنت تقريبا كانت ثانوية عامة تحجز دورات كمبيوتر ... وزميلى ده هو اللى قابلها واتكلم معاها ... وكنا صيف وشافت الصليب على ايده ... فى المرة التانية جت وقابلتنى لاقيتها بتقولى انا مش عايزه المستر ده يتكلم معايا تانى اصلى لما قولت لماما فى هناك واحد مسيحى قالت لى مش تكلميه ... وكمان ازاى انتوا بتاكلوا معاه وكانه مش بنى ادم ... حاجه تانية ودى من قريب جدا ... انا كان عندى فى السيبر ولد مسيحى ... وكان يوم العيد المجيد بقوله كل سنة وانت طيب ... لاقيت بنت كانت قاعدة فضلت ساكتة لما خلصت وقتها وجاية تدفع الحساب لاقيتها بتقولى المفروض مش تدخليهم هنا ... قولت لها على اساس انهم مش بنى ادمين .. قالت لاء ما يتنيلوا يعملوا لهم سيبرات خاصة بيهم ... دول حتى ريحة بيوتهم وحشة ...مين اللى قالك كدا الا ذا كنتى دخلتى بيوتهم .. قالت لى ولا عمرى عرفتهم حتى طول سنين دراستى كانت ماما تحذرنى انى اصاحبهم ... بصراحة كنت هطردها هى ... بس بالراحة فهمتها انهم بنى ادمين زينا زيهم وكل واحد حر فى دينه ... يبقى الكلام ده تسميه ايه ؟؟؟ بالرغم من ادعاء الناس للتقدم الا ان عقلهم مليان بالجهل .. النا س تناست لكم دينكم ولى دين
نيجى بقى لموضوع المثليين
ليه تبعد عنهم ... وايه عرفك ان ربنا بيلعنه .. اصل علاقة العبد بربه ربنا وحده بس اللى يقدر يحددها احنا منقدرش نعرفها ولا نتدخل فيها
طيب مش يمكن لما تقرب منه وتفهمه امرو الاسلام كويس والصح من الغلط ربنا يهدية على ايدك وتبقى كسبت ثواب وكمان كسبت نموذج صالح فى المجتمع
يمكن ؟؟
معلش بس دول قلة
وانا اساسا مبحسبهمش من الحسبة
لانهم مش فاهمين حاجة
تانى حاجة
بالنسبة للمثلين
على فكرة انا اعرف ناس كتير اوى منهم
وفيه منهم شغال معايا
هما طبعا مش مسحين لنفسهم بس انا عرفت يعنى
ومعملتى ليهم عادى يعنى وتقريبا احنا صحاب
انا الناس هى الى بتحدد تعاملى معاهم حيبقى شكله ايه
يعنى لو واحد عاملنى بحترام مش حبس هو عمل ايه او ذنوبه اد ايه
لانى ديما شايف ان ذنوبى اكتر من ذنوب البشر متجمعه مع بعض
Desert cat said…
زعيم كمورا مورا
بالظبط كدا
وهو ده قصدى يا زعيم
هو مش بيمشى معلق صدره يافطة انه مثلى
ده غير ان معاملة الشخص هى اللى بتحدد معاملتى معاه
ماليش انا دعوة بقى بجنسه ولا لونه ولا اصله ايه
طالما انسان محترم وبيتعامل بذوق يبقى خلاص
ده حتى الاسلام بيقول الدين المعاملة
يبقى واحد يعاملنى كويس وعلشان هو مش مسلم ولا سلوكة مش مريحنى اضربه بالقلم مجرد ما يقولى سلام عليكو
تحياتى يا زعيم
اجابات ممتازه وفى محلها تماما
احييكى من اعماق قلبى
Desert cat said…
صالح سعيد
شكرا يا فندم
موجة said…
أنا باحط تعليقي هنا مش في اخر بوست لاني حليت التاج ده قبل كده و احب اعرف وجهات النظر المختلفة في القضايا اللي طرحها التاج الشنيع المريع الفظيع ده
طبعا بعد التحية
انتي اتكلمتي بشكل جارح عن الاخوان المسلمين ، ممكن اكون مش متفق معاهم كلية في امور كتيرة جدا وش مؤيد ليهم لكن اظل ملتزم بحد ادني من الادب في الحديث عن أي حد
مش ممكن تحطي حكم مطلق عام عن فئة بحالها بالشكل القاسي اللي اطلقتيه
دا كان وجه الخلاف البسيط و الملاحظة الوحيدة اللي حبيت اني اعقب بيها على التاج فغير كده كانت اجابتك جميلة عن أسئلة كتيرة ومفنعة في نفس الوقت
وممكن تعرفي ده من زيارتك ليا وقرايتك لحل نفس التاج ده عندي في مدونتي المتواضعة
احضر الشاي و لا ايه

خالص تحياتي
احمد
Desert cat said…
موجه
بص حضرتك طريقة كلامى عن الاخوان المستسلمين ده اقل القليل مما يستحقوه ... لأنهم مفيش فرق فيهم بين شخص والتانى ... كلهم عبارة عن مجموعة من ذوى المرضى النفسيين اتلموا على بعض وكونوا حزب افعالهم لا تنتمى لاقوالهم .... جماعة منحلة خلقيا وفكريا لصوص متطرفين ارهابيين اصحاتب مصالح ... حقهم جميعا الرمى بالرصاص فى ميدان عام ... اللى ينتمى لهم بالفكر او بالمنطق لا يقل عنهم فى الحمورية والانحلال ... وباقى الاجابات بتاعتى برضه مقتنعة بيها زى ما انا مقتنعة بكلامى عن المذكورين اعلاه ...
الغاليه قطه الصحراء

بصراحه ماقدرتش امسك نفسي ماعلقش و أقولك ان ردودك علي التاج ميه ميه
متوازنه و عقلانيه بعيده عن التطرف في الأراء
و خصوصا في موضوع اضطهاد المسيحيين و حذف خانه الديانه من البطاقه

و معلش لو تسمحيلي اقول حاجه صغيره لاجدع بنوته بخصوص كلامها علي المثليين بيبانوا جدا

معلش حضرتك غلطانه مش بيبانوا جدا و لا حاجه زي ماحضرتك بتفكري

معلش ياقطه لو كنت تطفلت و ردت علي حد عندك سامحيني

تحياتي ليكي ياقمر

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز