هما السادة الوزراء ملخبطينا معاهم ليه ؟؟؟




السيد وزير التضامن الاجتماعى والراجل ده انا احترمته جدا جدا اصله بيتخانق مع السيد وزير الاستثمار اللى محسسنى انه بيصرف على الشعب من جيب الحاج باباه ...
الموضوع بقى ان وزير التضامن الاجتماعى بيقول انه هيضيف سلع اساسية للمواليد الجدد على البطاقة التموينية ... ووزير الاستثمار يقول لا يمكن ابدا الشعب اللى عامل زى الارانب وكل شوية يخلفوا وكل 30 ثانية يتولد نص مليون طفل مياخدوش حاجه على اساس اننا عايشين فى ابعديه باباه وبياكلونا وبيشربونا وبيصرفوا علينا من جيبهم ...
طيب دلوقتى انا مش عارفه ارسى على بر ... هما هيلغوا الدعم ولا هينزلوا دعم للمواليد .. علشان احدد مستقبلى بس .... يعنى لو الاطفال حيتم اضافتهم على البطاقة التموينية واضمن ان ابنى او بنتى بعد ما يجوا الدنيا هياخدوا باكو شاى مدعم .. اتوكل على الله واتجوز ... لو يحرموا ولادى من باكو الشاى اللى هو فى الاساس ملوخية ناشفه يبقى مالوش لزوم اتعب نفسى ...
بصراحة كلام وزير التضامن الاجتماعى حاجه تبشر بالخير لانه كمان بيقول ان السلع لازم تكون عالية الجودة وخاضعه لرقابة سيادته ... طيب ياترى كل ده علشانا ولا الموضوع فيه ان وحتى واخواتهم ... بجد لو كلامه يتنفذ ويكون للصالح العام انا هدعى له كل يوم .. إلهى ينصره على من يعاديه ويثبت أأقدامه فى الوزارة 25 سنة
طيب ده الخبر .... واللى يعرف اى اخبار جديدة يفيدنى

تعليقات

انا مش مصدق نفسى دة اول تعليق
اكيد انا امى دعيالى النهاردة

شوفى يا سيتى لو موضوع بكو الشاى المدعم هو اللى متوقف علية جوازك دة انتى اتجوزى واتكلى على الله وانا يا سيتى هبعتلك باكو شاى كل اسبوع ولو حبيتى شاى ليبتون كمان ولا يهمك
اما كلام الوزير عن الرقابة والكلام اللى بالى بالك فدة كلة فى الطراوة ذى اللى قابلة
سلالالالالالالالالالام
‏قال Unknown
ده لو قال كده بجد يبقى بيخطط لقلب النام نتيجة لكثرة المواليد اللى هتيجى من تحت الحكايه دى
فاكره يا قطه زمان عملها عمر بن الخطاب ولقى ان الام مش عاوزه تفطم ابنها لان للرضيع مال من بيت المال
اهو غالبا هيبقى نفس المنطق
الناس هتقعد تخلف تخلف مهو كل عيل على بطاقة التموين هما تعبانين فى حاجه
هى فكره حلوه بس تطبيقها صعب
يعنى الاولى وفر لبقيت الشعب العايش احتياجته الاساسيه
وبعدين فكر فى اللى لسه مجاش على وش الدنيا
‏قال Alexandrian far away
صباح الخير
أسمحي لي أنا مش فاهم رغبتك في كيس الشاي المدعم الصراحه
يجب إلغاء الدعم تماما ونهائيا
فهذا الشىء الحقير المسمى الدعم
فهو من بقايا عهد المقبور جمال عبد الناصر (من المساؤ عنه كتييييير
بداية من تزوير التاريخ لصالحه
وان الملكية كانت وباء على مصر وثورته هو وشوية الزرابيط اللى كانوا معاه فى ذاك الوقت حتى وقتنا هذا مش عارفين نخلص من تبعات ثورته
قال يعنى هو اللى قضى على الوباء والقذارة والحاجات الوحشة اللى اسمها ملكية واحنا من عهده لحد دلوقتى عايشن فى ترف ورفاهيه وتقدم
بلا نييييييييييله)
وعليه يجب ألغاء الدعم تماما ونهائيا

عاش وزير الإستثمار
يسقط الدعم

تحياتي وصباح الفل
‏قال sahr
ياستي سبيها على الله
يعني هي جت على باكو الشاي
والبطاقه التموينيه دي فيها كلام كتير بس مش وحش يعني اهي حاجة وخلاص
‏قال Empress appy
انتى بتتلككى على الجواز هو اللى مانعك يعنى باكو الشاى هجيبه لكى هههههههه
عموما لو كده وعاوز يمشى فى الصح يبقى مصر بدأ المنحنى بتاعها يعلا قوى ودى بشرة خير ونقول يا رب تبقى دى اول الاصلاحات علشان الناس التانيه تتبط بقى وتقعد وتبطل جعجعه علىالفاضى
‏قال Unknown
انتى للأسف معلوماتك مش دقيقة
كل مولود حايتكتب له باكو شاى وصابونة
باكو الشاى هو اللى محل خلاف
لكن أكيد أكيد..حيدونا الصابونة
‏قال Desert cat
حــدوتـــة
مبروك على حضرتك كسبت معانا جايزة اول تعليق
مصاصة لومبو

الموضوع بقى مش باكو الشاى المدعم الموضوع انى بتلكك
اما كلام الوزير فده اللى خلانى انزل البوست اساسا انى استغربت قولت يمكن يكون فى حد عنده معلومات مؤكده
شكلنا كلنا محتاجين نتاكد
‏قال أحمد جلال
هوا كله ممكن يقول أي حاجة براحته..
انا الراجل ده معرفش عنه كتير لا بحبه و لا بكرهه..بس الكلام المتناقض ده معتقش حيتنفذ..يعني الحكومة تلغي الدعم و هو يحط دعم على الأطفال اللي بيتولودو بالهبل..اعتقد كلام وزير الإستثمار اكثر عقلانية بالنسبة لسياسة الحكومة..اللي عايزه تلغي الدعم و تلغي كل حاجة معاها..هوا الشعب لاقي غير الدعم اللي بياخدو حتة منه اصلا عشان نلغيه و يا عالم الدعم النقدي يحكون قد ايه..ربنا يستر0
‏قال Heart Beat
عزيزتي

شوفي هي الحكومة عندنا عودتنا اننا مانصدقش اي حاجه غير لما تتنفذ

لكن تتنفذ امتى بقى الله اعلم

يبقى انا انصحك انك تتجوزي و ماتستنيش باكو الشاي

اصل لو سيادة الوزير ده فعلا بيخاف علينا و قلبه طيب كده يبقى اكيد اكيد هايتشال قريب و يخترعوا سبب مثلا زي انه عايز يخلص الشاي اللي في البلد على الاطفال و انه بيعلمهم عادات سيئة بشرب الشاي في سن مبكر

تحياتي
‏قال oceaneyes
ازيك يا قطقوطة ؟؟؟


عاملة ايه ؟..يارب تكونى كويسة ..

بجد وحشتينى كتير ووحشتنى بوستاتك اكتر ..

ولو على بوست المرة دى ..فهى يعنى جت على دى ..روقى بالك ..لسة التقيل جاى فى السكة ان شاء الله


تحياتى


:)
‏قال Gihad N. Sohsah
دة يتوقف على رقابة سيادته دي شكلها عامل ازاي.........لو ما بتفرقش بين الملوخية الناشفة والشاي....وبين الرز والحلبة الحصى يبق بناقصها ولا ايه؟؟؟
عموما البوست رهييب
‏قال Zika
انا حاسس انها هانت وكلها كام سنه وهنخلص من الناس دي كلها
ولا وزير التموين يتكلم ولا بتاع الاستثمار يقرفنا ولا جمال مبارك ينطلنا كل شويه
ايام الحكومه معدوده اوي لسبب بسيط اوي ان اخيرا الناس بدات تحس
‏قال Unknown
تحسبهم جميعاً
وقلوبهم شتى
.
.
فعلا ً... صدق الله العظيم
‏قال ملك الكبدة
مساء الخير كات

المفروض انك محاسبة

يعني خريجة تجارة
يعني عارفة ان الدعم من الاساس غلط و بيؤدي لظهور السوق السوداء و زيادة احتمالية الفساد و الاختلاس بالنسبة لكبار موظفي القطاعات المسئولة عن السلع المدعومة و عدم وصول الدعم لمستحقيه و ظهور و اثراء بعض افراد المجتمع بصورة غير شرعية
توقعي الشخصي

ان الحكومة بتجهزلنا لحاجة منيلة بستين نيلة و عمالة بتلهينا بالكلام بمناسبة و بدون عن الدعم و رغيف العيش و الدعم عيني ولا نقدي

مكن نخمن

الصيف جاي و عايزين يطبقوا قانون مكافحة الارهاب

الحكومة بتفكر تحاسب المزارعين على مياه الري

عموما في اعتقادي ايضا انه لا يوجد دعم في مصر بالاساس او بمعني ادق هناك دعم ما لشخص ما ابن شخص ما من كل جهات الحكومة ليكون هذا الشخص ما مكان ابوه في مكان ما يحكم بلد ما و شعب ما عمال يتفرج على كل المامات دي
‏قال Rosa
آدي عيب العولمه في غياب المضمون
ههههههههههه
مش عارفه والله يا نونا الاجابه على سؤالك بس كل الي أعرفه و متأكده منه تماما
انه لو الموضوع دا هيكون لمصلحتنا
اكيد اكيد اكيد و من غير نقاش او تفكير مش هيتعمل
:D
تحياتي
‏قال فرنسا هانم
والله الموضوع بتاع الخلاف ده انا اول مره اسمعه
لكن لو كان عمنا بتاع التضامن الاجتماعى عمل كده ووقف الوقفه الرجوليه دى
انا بنحنى له احتراما وتقديرا
اما الوزير بتاع الاستثمار
فعنده حق برضه
هو احنا هننهب
مفروض كيلو الرز نعد فيه كام رزايه
وكل بطاقه تموين تاخد رزايه
وبكده يقدر سيادته بعشر شويله رز او عشرين شوال
يغذى الشعب كله
بت يا قطه
اتكلى على الله واتجوزى
ولو مفيش شاى
مش مشكله
انا هجيب لكى بالعجله شاى فتله
عزيزتى

لوأننا فى بلد تحترم شعبها ولو الحقائق تصل الى رئيس الدولة ويهتم بها رافضا الغلط والاستخفاف بالشعب كان المفروض أن وزير المالية قد تم محاكمته وأن رئيس الجمهورية يرفش أن يكون وزير ماليته ميكانيكى
وهذا ماحدث من وزير المالية مع الاعلامية منى الحسينى فى برنامج نأسف للازعاج بأن قال انه ميكانيكى والميكانيكى ايه فهمه فى الاقتصاد والشئون الماليه لادارة الدولة وعند كلامه على موظف الضرائب قال الولد بتاع الضرائب هب ينزل عليه هب هل هذه ألفاظ تخرج من وزير مالية دولة مثل مصر واخيرا احنا ليس عندنا وزراء احنا عندنا موظفين وسكرتارية عند رئيس الجمهورية عمرك سمعتى عن وزير استقال لفشله فى تنفيذ برنامجه الوزارى والحمد لله عندنا اعلام كداب ويعلم الشعب الكدب وهو ينافق الحكومة
ولكن هل يستضيف واحد زيى حلاتى مواطن لسناه طويل لايخشى لومة لائم فى كلمة حق ولايفرح ولايسعده ظهورة فى التلفزيون مثل مافيا الاعلام اللى من البرنامج ده للبرنامج ده ومن القناة ديه للقناة ديه من ساعة مايصحى الصبح لغاية ماينام والعوض على الله
‏قال Hypatia
قطه الصحراء الجميله

يا توته البلد ديه مبقتش باصدق فيها حد خاصه فئه الوزراء والنواب اكيد الموضوع فيه ان وحتى وفته من ام رز ولحمه

سيبك انتى بس شكله كده فيه عريس فى السكه ياسوسه وناويه توافقي بحجه باكو الشاي قال يعنى قال يعنى البت حتتجوز عشان باكو الشاي


وش بيغمز

*:)
‏قال عابد الرحمن
باين انك لسه جديدة في الموال ده
هو انتي جيتي مصر امته
يا بنتي دول بيغنوا على بعض
واحد يقول كلام حلو والتاني يوقفه والعكس
شربنا منه ايام الكادر المعلمين لحد ما في الاخر صفصفت على 70 جنيه
بدل ما اقبض مية105 بقو 175 شوفتي الكادر
شبعنا يا ابنتي من الشغلانة القذرة دي
وبالنسبة لموضوع الجواز عايزك تكتبي بوست هي العنوسة زادت ليه
1- هل لأن الشباب مفلس ومش لاقي شغل
2- ولا في شغل والاسعار نار والمرتبات مش مكفية
3- الشباب فافي ومش قادر يتحمل مسئوليةوالبنت مش لاقية راجل وسط اللي بيتقدموا
4- ولا عدد البنات زاد اوي بجد عن الذكور ودي ظاهرة طبيعية ملهاش حل
5- ولا الولاد اللي مش لاقين ست يثقوا فيها وتربي عيالهم وتبقي زوجة صالحة
الحقي اكتبي قبل ما اكتبه انا
‏قال MerMaid
ازيك يا قطتي ؟
عاملة ايه
اولا انا عاوزة اسفسر منك علي حاجة عند محمد ميهمش وانتي بتقولي للدكتورة ان مروة الزارع وانا بس اللي بنعمل الوش ده؟
والله بجد مفهمتش قصدك ايه بالظبط
-----------------------------
بالنسبة بقي لكلام الوزراء بتوعنا
فتاكدي انهم مش بيعملوا للصالح العام بل هم بيعملوا للصالح الخاص
يعني مش قلبهم علينا
وفري دعواتك بقي و الحقي اتجوزي و خلفي قبل ما الدعم يتشال خالص
تحياتي ليكي
:))
الوش اهو علشان اثبت شخصيتي
سلام يا قمرة
‏قال Unknown
محسسنى انه بيصرف على الشعب من جيب الحاج باباه

هههههههههههههه

ايوة هنا تكمن المشكلة كله كله فاكر انه بيصرف على كله و لنا الله لحد ما نعرف البلد دى بتاعى مين
‏قال Desert cat
لماضة
هو الموضوع من الاخر شكله تثبيت فى الشعب او فرقعه ملهاش اى لزوم
على رايك ده اللى على وش الدنيا مش عارفين يعيشوا هيفكروا فى اللى لسه جاى
‏قال Desert cat
Alexandrian far away
ههههههههههههههههه
على فكرة انا فاكرة الرد ده كويس اوى
ولو الدعم اللى مزعلك خلاص يشيلوه
ما هو المساوئ اكتر من الحسنات
فمساوئ بمساوئ بقى
‏قال Desert cat
sahr
ونعم بالله يا سهر
على رايك مجتش على البطاقة التمونينة يعنى بيعملوا لنا ايه كويس
‏قال Desert cat
appy
بصراحة اه بتلكك
ما انتى فاهمه

لو كلامه صح
ده انا هدبح فرخة واوزعها اصل يبقى كدا بشرة خير
‏قال Desert cat
m5m
ههههههههههههههه
بالظبط كدا احنا اللى هناخد الصابونة
بس ياريت تكون صابونة لوكس او كامى
‏قال Desert cat
أحمد المصري
ما هو ده بقى يا احمد اللى بستغرب له الحكومة اعلنتها صريحة ان الدعم هيتلغى
يقوم ده يجى يقولك دعم انا مش عارفه بقى نصدق ميييييييين
اصل كلهم بيكدبوا على بعض واحنا اللى بنتحمل اخطائهم فى الاخر
‏قال بحبك يامصر
والله حكاية الدعم دى حيرتنا
كأننا بنشحت من الحكومه
وانا سمعت ان عشان تاخد الدعم لازم تعمل شهادة فقر
وطبعا احنا شعب فذلوك ومش ممكن نعمل شهادة فقر برغم ان معظم الشعب فقير وبيعيش تحت خط الفقر يلا بقه عشان فى الاخر الحكومه تقول شوفوا مفيش حد فقير فى الشعب
(وهنيالك يافاعل الخير)
‏قال صالح سعيد
السلام عليكم
اذيك يا قطة الصحراء
البوست ده فكرنى باحلى يوم فى حياتى
وهو اول ظهور ليا فى الدستور
كان موضوع عن السع التموينيه
كتبت عنوانه
شاى الحكومه قادر على تطفيش اى ضيف
والله نفسى اعزم الحكومه على كبايتين منه
وشرحت ماساتى مع الشاى المدعم
اللى كنت بستعمله لتطفيش الضيوف
وقلت نفسى اعزم الحكومه عليه يمكن تطفشبس خفت ليطلع مسئول مكار ويرفض الشاى ويقوللى
مشربش الشاى اشرب ازوزه انا
ايه رايك فى الخطه دى
تسلم ايدك
بوستك ممتاز
تقبلى تحياتى
وعزومتى على واحد شاى بس يكون ليبتون
‏قال Desert cat
Heart Beat
هو اصلا لو بيخاف علينا وقلبه حونين اوى كدا كان عمل حاجه للناس اللى موجودة بالفعل مش اللى لسه هيفكروا يجوا الدنيا
انا بس الخبر دعانى للاستغراب
تحياتى
‏قال Desert cat
oceaneyes
اهلا بالجميل
اخبارك ايه
وحشتينى بجد
‏قال Desert cat
صانعة الأحلام
حبيبتى هما مش يهمهم الشعب يشرب شاى ولا ملوخية ولا حتى بانجو
بس انا من زمان اوى مش سمعت عن اهتمام اى حد من المسؤلين كله بيسعى لرفع الاسعار اول ما شوفت الخبر ده قولت مش معقول يكون الوزير ده فى مصر عموما يارب يطلع كلامه صح
‏قال Desert cat
Zika
كلامك يدعو للتفاؤل
هو الناس فعلا بدأت تحس بس للاسف محدش برضه قادر يتحرك
‏قال Desert cat
أنونيمس
ونعم بالله
‏قال Desert cat
ملك الكبدة
اولا انا مش محاسبة انا يا سيدى المفروض انى مهندسة مش تصدق البروفايل لان معظم اللى فيه تمويه يعنى كلام مش اكتر
ثانيا احنا اجدع ناس ناخد على قفانا ونقول كوماااان
علشان كدا هما بيلعبوا بينا اه والله بيلعبوا بينا شوية يقولوا هنرفع الدعم علشان يشوفوا رد فعل الناس ايه وشوية تانية مش رافعين
والناس ساكته مش بتفتح بؤها يقوم يعملوا ايييييييييه .. يرفعوا الدعم والاسعار واللى يفتح بؤه يرفعوه شخصيا
‏قال Desert cat
Rosa
ههههههههههههههه
عسوووووووووله يا روزا
بالفعل كلامك صح مش هيتعمل
‏قال Desert cat
فرنسا هانم
لاء طالما انتى وعدتينى هتجيبى لى الشاى وفتلة كمان ده انا هتجوز من الصبح المهم انتى تجيى وتجيبى لى الشاى معاكى
انا حاسة ان الناس دى بتستهبلنا اصلا او بيعملوا فرقعه كدابة لهدف ما انا مش عارفاه
‏قال Desert cat
الشريف / جمال طة
للاسف استاذى الفاضل احنا فى بلد بتطبق نظام اللى ليه ضهر مينضربش على بطنه
عندك واسطة تقدر تخترق كل الحواجز وتعدى كل الحدود وتصل الى ابعد مما تتخيل
مش عندك واسطة يبقى يابخت من بات مظلوم وربنا احسن من الكل وفوق الجميع انتظر انتقامه وصدقنى كل من ظلمك هتشوف فيه يوم ده غير حسابه عند ربنا
اما مصر ام الدنيا فهى بقت مرات اب لولادها ... محدش بيساعد حد كله بيقول يلا نفسى ولو حضرتك ظهرت على التلفزيون علشان تقول الحق دون لومة لائم بعدها مشاكلك هتزيد و مش هتعرف تستريح وانت فاهم قصدى
ربنا هو المنتقم الجبار
‏قال Desert cat
Nsreen Bsunee
حبيبتى اصلا انا بتلكك
هو انا اصلا برسم على الوزير بس هو مش واخد باله
قولت انزله الموضوع ده يمكن يحس على دمه
هو عموماانا مش بصدقهم
بس مين عارف
‏قال Desert cat
Nsreen Bsunee
حبيبتى اصلا انا بتلكك
هو انا اصلا برسم على الوزير بس هو مش واخد باله
قولت انزله الموضوع ده يمكن يحس على دمه
هو عموماانا مش بصدقهم
بس مين عارف
‏قال Desert cat
عابد الرحمن
انا جاية مصر من زمان
وعلشان انا عارفه ان الناس دى مش يهمها الا مص دم الشعب فاستغربت من الخبر علشان كدا قولت قبل ما اظلم الناس اعمل بنصيحة الست كريمة مختار واسال استشير وبناء عليه جيت سالتكو
بالنسبة لاسباب العنوسة فهى كتير وزادت عن حدها
انا كنت كاتبة زمان موضوع مشابه فى قهوة كتكوت هبقى اجيبه انزلة فى المدونة
بس برضه يهمنى انى اشوف راى حضرتك فى بوست عندك
‏قال Desert cat
MerMaid
حبيبتى والله العظيم ما قصدى من الكلام اللى عند محمد اى حاجه
يعنى انا مش شاكه فيكى انتى
افهمك قصدى اكتر
الوحيدين اللى بشوفهم بيعلموا الوش ده انتى ومروة
طبعا انتى بره الليلة خالص يبقى مين التانية بقىىىىىىىىىى
اكيد كدا فهمتنيى
المهم مش قولتى لى اخبارك ايه هو انتى ايجى نت ولا ايه ... اصلك لو ايجى نت يبقى النت فاصل عندك انا كمان النت فاصل عندى
اعاااااااااااااا
بس مقلبة اى بى من عند حد AT data
مش تقولى لحد بقى
‏قال Desert cat
عاليا حليم
ما هى حاجه تجنن يا عاليا
عمال يتخانق مع الراجل الكومل اللى عايز ينزل دعم للمواليد وكانه بيقوله اصرف على الغلابة واهى حسنة قليلة
‏قال Desert cat
بحبك يامصر
هما عارفين ان الشعب المصرى فقر وانزحة علشان كدا حددوا الشرط اللى محدش هيعمله يبقى برضه الدعم افاده ليهم هما
تحياتى
‏قال Desert cat
صالح سعيد
انا فرحانة ان البوست ارتبط بذكرى حلوة اوى عندك
بالنسبة لشاى الحكومة وتطفيش الضيوف السادة الوزراء مش بيشربوا الشاى بتاعنا ده احنا عامة الشعب
هما بيشربوا ويسكى
لكن يفضلوا مغيبين عن مصلحة الشعب ومركزين فى مصالحهم هما بس
‏قال mesh2dra
السلام عليكم

لا هى فيها ان وحتى وكان ولماذا وعشان ايه وده ازاى ده وخير اللهم اجعله خير واخواتهم والعيلة الكريمة
(نظرية المؤامرة )

بأمارة الدعم اللي مش حيتلغي
الاسعار وصلت للضعف

نتقابل قريبا في انتفاضة شعبية اخرى

ما تتجوزيش يا بنتي
بلا هم
وماتشربيش شاى اصلا


وعلى رأي أودي
عادي بقى

سلاماتي
‏قال Desert cat
mesh2dra
هو انا مكن مش اتجوز لكن مش اقدر ابطل ادمان الشاى ده الاقيش عندك علاج
عموما طالما انتى موفقانى ان الموضوع فى ان حتى واخواتهم وكل عيلتهم يبقى ظنى فى محله
تحياتى يا جميل
‏قال son's egypt
السلام عليكم
فعلا حاجة تحير الواحد الدعم حيتغلي ولا لا
وفي الاخر ممكن تطلع ان الموضوع اشاعة انهم حيضفوا المواليد لبطاقة
‏قال Desert cat
son's egypt
ما هو اى حاجه حلوة فى البلد بتطلع اشاعه
الحاجة اللى فى مش فاصلحنا بتطبق فى ثوانى
‏قال د/اجدع بنوته
مش عارفه ياقطتى ..

بس انا برده مبستريحش لوزير التضامن بتاع التشرد الاتفالى ده

مع انه كوابرىلا وشرقاوى وشاربين م ميا واحده

بس برده .. احيانا كده بحس انه ممكن يشطح

وان سياسته ممكن تاخد ابعاد اخرى

ولكن ف الاول والاخر

ربنا يصلح الحال

المشاركات الشائعة