الوضــع مــن سـيــئ لأســـوء .... وامعتصماااااااااااه


من يقدر يمد ايده للعبث بالناس وتشويه ملامحهم غير إنسان صاحب بصيرة عمياء وقلب متحجر ... مين يقدر على تدنيس البراءة والطهر وقتل الاطفال غير إنسان معدوم الضمير مجرد من كل المشاعر ... والله اللى بيحصل لهم ده حرام
هما دول مش بنى أدمين ... فين المعارضة واصحاب الكلام فى الفاضى والمليان من الناس دى
حايتهم فى خطر محرموين من الاكل والدفا والامن والامان
فين بتوع حقوق الانسان ولا فى الازمات صوتهم بيوطى ... فين الاخوة المستسلمين .. ولا مبيظهروش غير لمصالحهم الشخصية .... انا بستغرب على الضياع اللى اهل فلسطين فيه والناس ولا حس ولا خبر ... محدش بيتحرك لانقاذ الناس دى ليه ؟؟ الدنيا متقفلة فى وشهم كدا ليه ؟؟ منهم منتفعين ... منهم لله .. لكن اللى مش منتفعين ضايعين ومتبهدلين والاطفال الجعانين والجرحى فين الانسانية من ده كله ... مش مهم موقفنا كعرب .. مش مهم موقفنا كمسلمين ... لكن كبنى أدمين ربنا خلق جوانا الانسانية احنا فيييييييييييين ؟؟؟
فين دور مصرنا المخروسة من احتضار غزة ؟؟؟؟ ... احنا كمواطنين مش المفروض يكون لينا دور .. خلاص الوطن العربى كله مفيهوش جراح ماهر يعيد غزة للحياة من جديد ولو اكلينيكيا .. ولا ما زلنا فى انتظار معتصم .... طيب ممكن تفتحوا اللنك ده علشان بس نقدر نستوعب كلنا مع بعض حجم المعاناه اللى اهل غزة فيها

تعليقات

‏قال ملك الكبدة
يا رب اطلع اول تعليق

انتي بتتكلمي عن مين

دول عاملين زي حملان غلابة في غابة ذئاب بس العيب مش عليهم العيب عالحكام الكلاب

انا رجعت الكومنت تاني في نفس الصفحة تقدري تتحفينا بتعليقاتك

تحياتي
‏قال Rosa
مش عارفه اقلك ايه والله يا نانا
معنديش غير الجزء دا من قصيدة رثاء القيروان الي بتعبر بجد عن الحاله الي وصللنالها دي
والمسلمون مقسمون تنالهم
ايــــدي العصـــاة بذلـــة وهـــوان
ما بين مضطــــر وبين معــذب
ومقــتــل ظــلــما وآخـــر عـــان
يستصرخون فلا يغاث صريخهم
حتى ادا ســـئموا مــن الارنــاب
خرجوا حفاة عائـــدين بربهـم
من خوفــهم ومـصائـــب الالــوان
هربوا بكل وليـــدة وفطـــيمة
وبكــــل ارمــــلــة وكــــل حصـــان
---------
و لا حول و لا قوة الا بالله
‏قال AMRO .O. ABDELHALIM
مسا الخير قطة الصحراء
يعنى فعلا اللى بيحصل فى غزة اكبر من كل الكلمات
انا من يومين وانا عندى احباط
محبط انا من من دور المثقفين المغيب ، والحكومات العميلة اللى بتعمل ضد مصلحة شعوبها ، ومحبط لانى فعلا مش عارف الوم مين
اللى بيحصل دا سبة وعار فى جبين الانسانية، اللى بيحصل دا تكرار للى حصل فى اغسطس الماضى، ايه ممكن يحصل لو سحبنا السفراء العرب من الدولة المسخ دى؟ ايه اللى ممكن يحصل لو فتحنا المعابر فى مصر والاردن، من امبارح وانا محبط وغاضب للغاية
‏قال Marwa Friday
آه يا قطتي ..أنا زهقت ..فاض بيّ ومليت بجد ..يعني كانوا اهل مصر عايشين كويس ؟..كنا دورنا على المصريين لما نزعل انهم مهملين للفلسطينين على الحدود؟
لنا الله
للأسف احنا مش فاضيين لغزة يا قطة الصحراء
احنا ورانا كاس افريقيا
معقول بردو نسيبو ونبص لغزة؟
!!
‏قال ابن رشد
اقول اية غير انه ضعف مننا و هوان ان الواحد العربي يبقى شايف دة كله وساكت
‏قال اسامة يس
قالى تعالى
الذين قال لهم الناس ان الناس قد
جمعوا لكم فاخشوهم فزادهم ايمانا وقالوا حسبنا الله ونعم الوكيل

سورة آل عمران - سورة 3 - آية 173
‏قال Empress appy
فيه مجموعات رايحه يوم الجمعه تودى مساعدات هناك ليهم ربنا يسهل ويقدروا يدخلوا الحاجات دى بس الامن شغال اعتقالات الله ينور وطبعا خوف من اللى حصل من الستات اللى فتحوا المعبر لان بصراحه ده تهديد للامن فى مصر ربنا يستر وتعدى على خير
‏قال Desert cat
ملك الكبدة
فعلا تكسب معانا جايزة اول تعليق
طيب العيب عليهم احنا دورنا فين
طب الحكام خايفين على الكراسى
واحنا خايفين على ايه
بس سيبك
انا فرحت انك رجعت الكومنتات وكمان خلصت امتحانات
مبروك يا ملك
‏قال Desert cat
rosa
حبيبتى تقريبا دى بداية النهاية
يلا ربنا يستر
‏قال Desert cat
amro
اقولك انا يا عمرو اللى ممكن يحصل لو سحبنا السفراء وفتحنا المعابر
امريكا الام حتزعل
واللى يزعل ماما يروح فيييييييييين
لاء مش مارينا ولا شرم وفلوس فى بنوك سويسرا
يروح روا صدام على طول
‏قال Desert cat
مروة جمعة
احنا لو قادرين نل مشاكلنا هنحل مشاكل غيرنا انا معاكى
بس احنا مش بيتقتل اطفالنا وتتعرى نسائنا
وجحى مرمين فى البرد والشوارع
ربنا معاهم ومعانا يااااااااارب
‏قال Desert cat
آلام وآمال
والله عندك حق انا امباح شوفت الناس كانت هتتجنن علشان مصر فازت
الا هى النيجة مش كانت برضه 4-2 لصالح مصر
والله وعملوها الفراعنة
‏قال Desert cat
shams
قول حسبى الله ونعم الوكيل
‏قال Desert cat
osama
صدق الله العظيم
ونعم بالله يا اسامه
‏قال Desert cat
appy
ربنا معاهم ويساعدهم على فعل الخير ويرجعهم بالف سلامة
‏قال فرنسا هانم
اسرائيل اثبتت انها فوق كل الشبهات
وفوق كل الشعارات
وفوق كل المنظمات
وفوق الكل كليله

داتها ستين الف نيله
‏قال حل وسط
انا بيتهيالي انهم سايبينهم كده ومش بيساعدوهم ولا بيدخلوهم عشان لما نشوفهم نحمد ربنا عالنعمة اللي احنا فيها

ربنا عالظالم والمفتري
‏قال Desert cat
فرنسا هانم
جتها مليون نيلة لما تنيلها بس المهم ياثر فيها
‏قال Desert cat
حل وسط
ده لو كدا فعلا يبقى امنا مصر ارحم من مرات بابانا اسرائيل

المشاركات الشائعة