فرنسا هانم حققت لى أمنيتى ودخلتنى مجلس الشعب ... زغروطة يا أهل الدايرة


انا من زمان كان نفسى ادخل مجلس الشعب ولما جيت اقدم فى الدورة الانتخابية اللى فاتت .. قالوا لى متنفعيش اصل انتى لسه نونو .. روحى جيبى لنا حد كبير نكلمه ... قولت وعلى أيه الإهانة ... خلينى مأجلة شوية
قوم فرنسا هانم الله يبارك لها فى المرتب بتاعها ويحرمها من أم دبوة ... قالت لى ولا تزعلى وهدخلك مجلس الشوعب الهوائية من أوسع أبوابه ... وراحت ممسكانى المايك انا رقم ( 2 ) وقالت لى عيشى بقى
ودلوقتى انا معايا المايك و نبتدى الجلسة
دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
الهـــــــلال
كنت تفضل الدخول مستقل او تتبع حزب معين ؟؟؟؟
طبعا مستقل اصلى بحب الاستقلال فى كل حاجه
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
مع ان الحزب الوطنى مش شتيمة ولا حاجه كخة بس مش هوقع
ايه اول حاجه هتعملها لنفسك ولاسرتك ؟؟؟؟؟
ولا حاجه اصلى عاملة لنفسى اللى انا عايزاه اكيد اسرتى برضه عاميلن اللى هما عايزينة يبقى هنعمل ايه تانى
ايه المشروع اللى ناوى تعمله لاهل دايرتك ؟؟؟؟ دون ذكر اسم الدائره
اول حاجه هعملها هلغى الشئ اللى اسمه توكتوك ده .... هطالب بانشاء مشاريع جديدة فى البلد لتشغيل الشباب الى هيبقى عاطل طبعا بعد ما يتلغى التوكتوك + الشباب العواطلية من الاساس وقاعدين فى القهاوى وواقفين على نواصى الشارع بدل ما حدي يلعب فى دماغهم بكورة كفر ... اهم يشتغلوا حاجه تنفعهم
قعدت فى المجلس جنب نائب مميز . من هو النائب ؟؟؟
فكرى زلط نائب بلدنا على الاقل محسش بغربة
قدمت سؤال للحكومه ايه هو السؤال ؟؟؟؟؟
مش بتستغلوا قوى الشباب ليييييييييه ؟؟؟؟؟؟؟
طلب احاطه موضوعه ايه ؟؟؟ وبتقدمه لمين ؟؟؟؟
للست وزيرة القوى العاملة والهجرة
شبابنا فين من اهتمامات سيادتك ... ولا انتى مبسوطة بالسمك اللى بياكلهم فى عرض البحر
استجواب لاتنين من الوزراء موضوعه ايه ؟؟؟؟وبتستجوب مين
البيه زاهى حواس ... والبيه التانى لاء الفنان اصل الراجل ده القابه كتير بصراحة فخليها الوزير وخلاص ... فاروق حسنى
ليه تاريخنا بيضيع مننا ...وليه سايبين راس طنط نفرفر فى المانيا هما احسن مننا فى ايه .. والاقصر كمان ليه سايبينها تتاخد منا .. للدرجة دى احنا اكياس جوافة يا بشوااااااااات
وليه الشباب نسى احسان عبدالقدوس ونجيب محفوظ والعقاد وغيرهم وبقت كل اهتمامتهم العنب العنب العنب
انت مع الخصخصه ؟؟؟؟؟؟
اه بس يبقى لى نسبه مش الكبار ياخدوا كل حاجه فى جيوبهم وانا قاعده اتفرج من الاخر يا فيها يا اخفيها
هل انت مع قطع العلاقه مع اسرائيل ؟؟؟؟؟
طبعا امال احنا كنا بناحربهم ونطلعهم من ارضنا علشان ندخلهم احنا تانى بمزاجنا مع انها مش فارقه كتير هما كدا كدا موجودين فى البلد واكتر من الهم على القلب
هل تؤيد الحرب الحرب على العراق ؟؟؟؟؟؟؟؟
طبعاً لاء
هل تؤيد مرور الامريكان فى القناه ؟؟؟؟؟؟
ايون بس يبقى سيد الموقف هو الجنيه المصرى خليه يبقى قيمة شوية بقى
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟
اقسم بالله العظيم انا اكون مخلصة لبلادى
لاء مش دى
اقسم بالله العظيم ما اعرفها ولا اعرف ابنها دبوه ولا عمرى نزلت السويس عديت منها بس وانا رايحة العين السخنة
بتمرر التاج ده لمين ؟؟؟؟؟؟
السيد رئيس جمهورية نفسه
استاذنا الفاضل الربان
Appy
مروة الزارع
رئيس كمورا مورا
ابن حجر العسقلانى
مهندس مصرى
سولا حبيبتى انا مقدرش على زعلك خدى التاج ليكى يا قمر
بس لو مش جاوبتى عليه
انتى عارفه بقى
واى حد عايزه ميغلاش
تنويه صغنون ..... اللى مش عايز يجاوب التاج ممكن يعتذر ده شئ عادى جدا
بس انا قصدى من التمرير ان اكبر عدد من المدونين يجاوب على الاسئلة للتعرف على الافكار مش اكتر
واى مدون عايزه برضه يتفضله مش لازم اذكر اسماء يا جماعه
التاج فعلا جميل وهيعرفنا على افكار بعض اكتر
دمتم جميعا بكل خير

Comments

حسبي الله و نعم الوكيل
أنا كنت قاعد في أمان الله و لقيت اللي جاني و حط عليا
تقريباً حد دعى عليا و قال الهي يجيك و يحط عليك
:)
طيب يا ستي تاج مقبول
حأرد عليه خلال أيام معدودة
ان شاء الله

نبص على إجاباتك بقى

الحزب الوطني كخة و نص و تلت تربع و كفاية انه حزب الحرامية اللي واكلينها والعه

أما بقية الإجابات فبأهنيكي عليها
بس مرور أمريكا مش حأعدي لها سفن حربية
تجارية ماشي لكن حربية لأ
العالم العربي و الإسلامي مش ناقص
خليهم يتفسحوا لحد رأس الرجاء الصالح
بعد قسم اليمين
وبعد الاطلاع على الماده بتاعه الهندسه الفراغيه
قررت المحكمه براءه
قطه الصحراء من مؤامره ام دبوه
القطه العزيزه
بعد ردك الممتاز ده على التاج
والله بتمنى تدخلى مجلس الشعب بجد
وعهد عليا
ارقصلك بالعصايه زى عبله كامل بالظبط
شكرا على استجابتك
Sola said…
desert cat:
ezayek ya gamiel,taba3a2 rododek zayek kolaha egabat fel sameem bas lely yefham ba2a
ba2a keda bardo ana mesh hatedeny el tag :(
yalla ba2a salam 3ashan ana za3lana 7'alaes
o mafesh domty b 7ob
لماضة said…
هتلغى التوك توك
هههههههههههههههههههههههههههههه
ليه يا قطه بس
والناس تركب رجليها بعد كده يعنى ولا ايه
انت عاوزه تدمرى مظهر جمالى فى بلدكوا
يارتنا احنا عندنا توك توك
ده انا لما بشوف واحد معدى بنزل اتصور جنبه يابنتى ليه كده
اهو ارحم من العربيات اللى عندنااللى لا تصلح للاستعمال الادمى
لماضة said…
هلغى التوك توك
ههههههههههههههه
لا لا كده مينفعش انتى عاوزه تدمرى مظهر حضارى من مظاهر البلد
يا قطه ده انا لما بلاقى واحد معدى بنزل اتصور جنبه
حد يلغى التوك توك
اعظم اختراع فى جمهورية مصر العربيه
ده السواح بينزلوا عندنا عشان يركبوه الا هى اجرة التوك توك بكام دلوقتى؟
appy said…
طيب ليه بقىىىىىىىى
بتلبسينى فى السياسه ما انتى عارفه اللى فيها مليش فيه ومجلس الشوعب الهوائيه كمان كده حررررررررام طيب ابعتى تاج حلو خفيف انما سياسه وجاى من فرنسا كما حراااااااام ماشى مقبول منك
ahmEd_H said…
هاهاها اجباتك تحفة
Desert cat said…
مهندس مصرى
ما هو علشان انت كنت قاعد فى امان حطيت لك التاج ياباشا اصلى بتضايق لما بشوف حد قاعد فى امان
بالنسبة للحزب الوطنى اشمعنا ده تحديدا اللى كل اللى فيه حرامية
هى بلدك فيها الايام دى مكان مفيهوش حرامية
مبروك عليك التاج ياباشا
Desert cat said…
فرنسا هانم
هو انا اقدر ارفض لك طلب يا فرنسا يا قمر
والله انا بريئة يا حبيبتى من موضوع ام دبوه وابو دبوه ده كمان
وبالنسبة بقى لوعدك ترقصى لى لما ادخل المجلس فانا بقى كدا نويت بجد بقى
تحياتى يا جميل
Desert cat said…
Sola
سوووووووولا
هو انا اقدر على زعلك برضه انا خلاص اهديتك التاج
اما انا بقى هقولك دمتى بحب
Desert cat said…
Sola
سوووووووولا
هو انا اقدر على زعلك برضه انا خلاص اهديتك التاج
اما انا بقى هقولك دمتى بحب
Desert cat said…
لماضة
التوك تك ده اختراع غبى يا دكتورة
تبقى ماشية تلاقى اللى خابط فيكى وبيجرى
واللى مقرب منك وقايله كلمة عمرك ما سمعتيها فى حياتك وزاغ بين اخواته التكاتك من الاخر يابخت البلاد اللى مفيهاش توكتوك ايه رايك تبدلى ؟
Desert cat said…
appy
مكنتش اعرف يا آآبى ان ملكيش فيه
عموما ولا يهمك يا جميل
خيرها فى غيرها ان شاء الله
مبروك على المنصب دا
بس اوعى اوعى تنسينا بعد كدا

انا بس مش عايزه اكتر من انى يكون عندى بتع 50 توك توك بس

يعنى التواضع حلو برضه
Desert cat said…
حبة حاجات (ايمان
منمون 50 توكتوك بس قولى 100 قولى 1000
خدى كل اللى فى البلد بتاعتنا وريحينى منهم
الله عليكى ياقطة طيبة طول عمرك
اهو انتى كدة طلعتى احسن منه انتى سامحتى وهو لسة شايل فى قلبه
جدعة ياقطة

نلف ونرجع تانى
وبجد اجابات هايلة
انا كدة حديكى صوتى ياله مش خسارة فيكى


بس حتدفعى كام
بصى هاتى عشرة جنيه وانا اجبلك كمورا مورا كلاه تصوتلك
ياله مع انها جاية بخسارة

بس انا نفسى اعرف انتى متعقدة من التكاتك ليه
دى حتى كائنات اليفة وبتاخد على الواحد بسرعة

تحيات شعب كمورا مورا
Nsreen Bsunee said…
قطه يا جميله
ايه المدونه الحلوه دى


لا بقى الحزب الوطنى زفت وهباب كمان

ومبروك يا سياده النائب

تحياتى
son's egypt said…
السلام عليكم
ردوك جميلة وكلها بصراحة خفة وسرعة في القاء الاجابة التلقلئية
عضونا المنتخب المبجل
انا جيت من كفر الغلابه اسال
عندى 7 عيال والاب لا يعمل
شايل حمل جبال
والحمل عمال يتقل
نفسى يتصلح الحال
واصبح موظف اعمل
واقبض مرتب بالريال
والحلم يوم يكمل
واكل العيال عيش حاف
وانام يوم متغطى بلحاف
ولا ليله من الجوع اخاف
وتقوى عيالى الضعاف
واشرب تمر وخشاف
واشوف ولادى نظاف
ادينى بحلم وخلاص
ومين مننا حقق حلمه
ومين مننا فاكر اسمه
ومين مننا بيجف دمعه
ومين مننا للفرح شاف
عايش عمرى مربوط م الكتاف
قليل الحيله واحلامى محال
عضونا المنتخب المبجل
ضارعت منى العيال
وانحنى ظهرى من حمل الجبال


تصدقى انا اتخيلتك عضو بجد والالهام خدنى قوى ههههههههه يلا اهو بنعبر باى اسلوب
وفى الاخر كلنا همومنا واحده

شرفنى المرور بمدونتك الراقيه
Desert cat said…
زعيم كمورا مورا
معلشى بقى العفو من شيم الكرام
وانا من بلد كلها اهل كرم
انا هدفع لك عشرين جنيه مش عشرة بس خليك عند وعدك
التكاتك مش بحبها اصلا لان مساؤها كتير جدا وزادوا عن حدهم اوى فى البلد
تحياتى
Desert cat said…
Nsreen Bsunee
الله يبارك فيكى يا نسرين هتترشحى طبعا الدورة اللى صح
يا حبيبتى الجهاز الادارى كله فى البلد فاسد وحرامية ومرتشين
احنا بلدنا دى عاملة زى القلب كدا اذا صلح صلح الجسد كله واذا فسد فسد الجسد كله
علشان كدا عايزين نصلح كل حاجه علشان نعرف نصلح حالنا
بس بجد بجد انتى شرفتينى ونورتى البلوج
Desert cat said…
son's egypt
عليكم السلام
اشكرك وسعيدة لان البوست نال اعجابك
Desert cat said…
مفلس افندى الرايق
والله انا اللى حسيت انى فى المجلس بجد
بس صدقنى اوعدك بعد ما ادخل المجلس ابقى انفذ لحضرتك طلباتك
شرفت البلوج يا فندم
تحياتى

Popular posts from this blog

قميص دهشور

كل تحرش وانتوا طيبين