Posts

Showing posts from October, 2007

عاد الشتاء ليجدد ذكرياتى

Image
عاد الشتاء يطرق الابواب ... عاد الشتاء ويحمل لى بين يديه اجمل هدية .. احلى لحظات حياتى أتمنى لو أعيش عمرى كله فى شتاء .... لذا أعشق لندن عاصمة الضباب .... أسعد لحظات حياتى وانا ارى قطرات المطر من خلف زجاج نافذتى .... البعض من أصدقائى يعلمون مدى سعادتى بهذه اللحظة ... واول ما الدنيا تمطر الاقى كام تليفون ورا بعضهم شايفه الدنيا بتمطر ... اكيد انتى مبسوطة دلوقتى .... اه شايفه الحمد لله ومبسوطة جدا .... الطرف التانى : طيب بما انك مبسوطة بقا ... ممكن طلب .... ايون ... إبتدى الإستغلال ..... يضحك كلانا للأخر ضحكة صفاء وسعادة مبحسهاش كتير .... احياناً ببتسم ابتسامة باهته لتكملة المنظر العام ومن جوايا بيقولى انتى منافقه علشان انتى اصلا مش ليكى نفس تضحكى ... إنما فى الوقت ده بالذات .... الضحكة بتخرج من قلبى ..... وقت سقوط المطر ... اعود بذاكرتى لمدرستى الإبتدائية وافتكر لما السما فجأة أعلنت حرب برق ورعد وكأن القيامة حتقوم ... المدرسين خافوا احسن المدرسة تقع علينا قالوا لنا روحوا .... كنت شايفه الجميع عمال يجرى تحت المية ... ما عدا انا كانى كنت طفل يتعلم المشى وماشية بقمة الهدوء ومش بفكر فى حاجه غ…

ما بين السحر والخيال

Image
حبيبتى كلاكيت تانى وتانى اهدتنى بعض المقطوعات لنصير شمة
كانت بتكلمنى عنه وعن المناسبات اللى عزف فيها المقطوعات دى على العود وكأن هى اللى عاشت الأحداث وهو ترجمهم بعزفه الرائع اسلوب كلامها وحماسها خلانى اسمع المقطوعة الواحده اكتر من 3 مرات وفى كل مرة كنت بحس باحساس مختلف ... احساس وكانى فى عالم غير العالم اللى حواليا اللى كله تعب وارهاق
ومشاكل ... بقولكوا ايه انا هسمعكوا المقطوعات دى معايا

http://www.uploadhut.com/id69851/naseer_shamma_salat_babiliyya-www[1].latef.net.ram http://www.uploadhut.com/id69860/حــدث في العامرية [1]....rm
http://www.uploadhut.com/id69867/naseer-shamma_brightness.rm

ودلوقتى اشكرك جدا جدا يا احلى نرمو فى الدنيا على احساسك العالى وزوقك الراقى


ما ترحمونا بقا

كل يوم الصبح افتح التلفزيون .. عادى يعنى مش حدث ما كل الناس فى بيوتها تلفزيونات وبتفتحها .. بس انا فى حاجه غريبة اوى
كل لما يجى المؤشر على قناة الناس وخصوصا الصبح الاقي اتنين لابسين بدل شيك كدا فاردين لحاف فى النص بينهم وواحد واقف يشرح والتانى اما بيستفسر منه على حاجه او بياكد على كلامه .... عادى يعنى بطنش واقلب على قناة تانية النهارده سمعت كلمة اللحاف الاسلامى .. ومن كام يوم على نفس القناة اعلان عن الموبايل الاسلامى
بس الشهادة لله اعلان الموبايل الاسلامى ده كان بالليل مش بالنهار يعنى اوقات مختلفة
علشان يجى لنا ضغط عصبى وسكر وحرقة دم خلال اليوم بالتدريج
اصل انا بتغطى ببطانية سنتامورا يعنى كافرة
وكمان موبايلى لما بيرن بسمع فيروز بكتب اسمك
برضه موبايل كافر
المفروض ان القناة دى دينية يعنى بتقدم مادة دينية
لكن تجارة باسم الدين ... لحاف اسلامى وموبايل اسلامى
اللى مش قادرة افهمه ليه كل واحد عايز يعمل حاجه لازم يدخل الاسلام فيها
اللى بيعتدى على واحد يقولك اصله كافر ... طيب ما هو الاسلام مش قالك اعتدى على الكافر ولا استحل حرمته وماله
واللى بيتاجر بيتاجر برضه باسم الاسلام
بنوشهه بايدينا ونل…

من بعد الائمة الاربعه بقا الامام طنطاوى ..

معلشى حاجه شوفتها فى المصرى اليوم بس لفتت انتباهى
دى وكمان جبت لى تلبك معوى منهم لله
هو يعنى ايه اعضاء المجلس للازهر يلغوا تدريس كتب المذاهب الاربعة ويدرسوا مكانهم الامام طنطاوى
ده اذا كان الامام طنطاوى بيقولك يجلد الصحفيين 80 جلدة
بتهمة سب وقذف الرئيس ده على اساس انهم كتبوا انه اتمسك فى التواليت مع واحده او فى حتة ضلمة فى الخرابة اللى ورا مجلس الشعب على طول ..
يعنى ما اتقلش انه مريض والله لو المرض بقا سب ووقذف يبقا على كدا محدش يزور مريض يا ددعان اللى هو اصلا زيارتهم صدقة
اصل كدا يقام علينا الحد ونجلد 80 جلدة ...
نرجع لموضوعنا ازاى اساسا كتب المذاهب الاربعة تتلغى وقال ايه تبقا مرجع عند الحاجه ...
وكتاب سيادته هو اللى يدرس طب حا اثق فيه ازاى اساسا بعد الفتاوى اللى كلها نفاق عمال على بطال دى
ايش درانى اصلا ان الكتاب بتاع معاليه اللى ناوى يدرسه بيتكلم عن وجوب الغلاء المبارك ... والبطالة المباركة .. والتعذيب فى السجون المبارك ... والاعتقالات المباركة ... وتوريث جمال مبارك
ويحيا الامام طنطاوى المبارك

http://www.almasry-alyoum.com/article.aspx?ArticleID=80553

يقولون ما لا يفعلون

Image
موضوع تحدثت عنه الاميرة اوسا الاخوان قادمون فى مدونتها
والبوست ده انا كنت هكتبه رد عندها بس لاقيته حيبقا طويل اوى
لان الاحداث حصلت لى شخصيا ....
فى اول ما فكرت اعمل لنفسى مشروع مستقل طبعا المكان بالنسبة لى كان مجهول وعلشان اختار المكان المناسب وفى نفس الوقت يكون حيوى اخدت وقت شوية والمكان اللى اخترته كان محصور بين مطبعة وسوبر ماركت صاحب المطبعة من الناس اللى عندها لحية هو شاب مش كبير ولا حاجه يعنى اخره حوالى 30 سنة ... بدأنا فى تجهيز المكان وكل صحابى ومعارفى جنبى ومحدش يقولى اخواتك فين لان اخواتى البنات كل واحده فى بيت زوجها واخويا الولد الوحيد مشغول باستمرار مش بشوفه الا فى المناسبات ده ان شوفته اصلا ... فكان صحابى معايا قلبا وقالبا ... جه الشخص جارى بتاع المطبعة ده وبصراحة اظهر ود واحترام محصلش وكان كل شوية يجى يقولى لو احتجتى اى حاجه انا تحت امرك وانا بدورى اقوله متشكرة جدا وممنونة لحضرتك جدا .. وخلصنا وبدأ مشروعى يشتغل والحمد لله ... والراجل بصراحة كتر الف خيرة كل شوية يجى يقولى مش محتاجه حاجه ... انا بطبيعتى مبحبش الاختلاط يعنى اللى هو بمعنى انت جارى على عينى وراسى من فوق بس انت …

أشتاتاً ..... أشتوت

Image
موبايلى بيرن الساعه السابعة صباحاً ده ايه القلق ده مش عايزه ارد كل شوية اكنسل ونفس الرقم بيرن رنات كتير ورا بعضها المهم قولت خير اشوف فى ايه ... لاقيت صديقتى الانتيخ اللى موديانى فى داهيه دايما انزلى لى حالا انا بتكلم من الشارع ... شارع ايه ده يابنتى والساعه اصلا لسه سبعه هو السيد الوالد طردك من البيت ولا حاجه ... لاقيتها بتقولى تعالى بس ولما تيجى حتفهمى فى ايه بس والنبى ما تتاخرى عليا انا بقولك فى الشارع ... قولت امرى الى الله ... هو اللى عنده اصحاب امثالكو بيعرف يستريح ... لبست ونزلت وصلت عندها لسه بقولها خير فى ايه ... توكتوك معدى لاقيتها بتشاور له ومدخلانى فيه بسرعه البرق ويلا بينا يا اسطى مش عارفه على مكان فين كدا .. ايه ده يا بنتى انتى خطفانى ولا ايه .. طيب فهمينى بس فى ايه ... لاقيتها بتقولى انها كانت فى زيارة لناس قرايبها بالليل ونسيت عندهم حاجات غالية فمن الاخر خافت تتقلب ولازم تروح بدرى قبل ما اولادهم يصحوا من النوم علشان مش حد ياخد حاجه وينزل ... قولت لها يا حلاوة ما زمانك اتقلبتى اصلا او افتكروكى واخدها لهم هدية ووزعوها على بعض .. قالت لى دى حاجه خاصة اصلا مش ينفع غير كدا…

عيد سعيد على الجميع ان شاء الله

Image
كل سنة وانتوا جميعا بخير وعيد سعيد زى ما رمضان فيه رحمة وحب وود العيد برضه فيه صلة رحم وربنا يجعل كل ايام المسلمين مليانه بالخير ليلة العيد مبتكونش ليلة عادية الكل بيهنى ويبارك اهله واصاحبه واحبابه بالنسبة لى انا وصحابى كان الوضع مختلف شوية اتجمعنا مع بعض بالليل وقضيناها حكايات من ايام زمان على شوية كحك على بسكوتات وبيتيفورات مع مج الشاى وشوية لاقينا الفجر بيأذن .. إيه ده هو الوقت بيجرى كدا ليه ده انا متخيلة ان الساعه مثلا لسه الواحدة بعد منتصف الليل شوية كمان ولاقينا الشارع على آخره ناس .. شومعنا احنا يعنى ... قومنا لبسنا ونزلنا نصلى طبعا مش فى المسجد لان صلاة العيد مستحبة فى الخلاء وعلشان كدا روحنا الساحة اللى جنبنا مباشرة يعنى بينا وبينها دقيقة مشى كدا ... وبما انى كنت رايحة اصلى واتفرج على الناس برضه .. فقولت افرجوا معايا على صلاة العيد فى بلدنا الشارع اول ما بدأ يتملى بالناس اللى رايحه تصلى


طبعا الرجاله واحنا حابسينهم علشان مش يبصوا علينا واحنا بنصلى اصل احنا عارفين الحركات القرعه دى




طبعا الستات لسه بتتجمع والى قاعدين بيستمعوا لتكبيرات العيد هنا اتجمعنا وما زلنا بنستمع للتكبيرات



وه…

تم البدر بدرى

Image
والله لسه بدرى والله يا شهر الصيام
انا حاسه رمضان السنة دى مش زى عوايده معانا كل سنة .... مش عايز يطول معانا .. حاسه انى من يومين بس كنت لسه بكتب بوست بمناسبة قدومة وبوصف فيه يومى بيكون ازاى وبحب الشارع قوى قبل المغرب والناس كل واحد بيجرى على بيته علشان يلحق المدفع فى وسط اهله وعيلته .. لسه شايفه كل قرايبنا وعيلتنا متجمعين عندنا فى العزومة اللى بنعملها كل سنة .. مع انها كانت تانى يوم من رمضان لسه حاسه انى كنت بفطر مع صحباتى امبارح الفطار اللى بنعمله كل يوم جمعه ... لسه مش لحقت افرح بيه بجد .. من يومين كنت بتفق مع صحابى اننا نصلى التراويح سوا فى المسجد والنهارده بنتفق ليله العيد نسهر للصبح علشان نصلى العيد سوا
حاسة من دلوقتى انى مفتقداك جدا يارمضان ..
حرجع افتقد من تانى لمة العيلة ساعه الفطار ... الشارع وبهجة الناس .. الرحمة والود والمحبة اللى مش بشوفها فى عيون الناس غير فى الشهر الكريم ..
ياريت الاخلاقيات ما تتغيرش والروحانيات ما تقلش .. عبادتنا لله سبحانه وتعالى مش رمضان بس عبادتنا طول السنة لا تنقطع
محتاجين لحظة صدق
محتاجين نوعد الله من النهارده حتى رمضان المقبل
يارب لئن أشهدنتي ر…

مصر وإسرائيل .. يا حلولى

Image
مصر واسرائيل توسعان نطاق اتفاقية لزيادة الصادرات الي الولايات المتحدةزغرطى يا ام فاروق .. وحياة ابنك فاروق لتزغرطى اصل مصر واسرائيل خلاص تعاونوا مع بعضيشهم ووقعوا على اتفاقية ان اللى بيع التانى عليه ربنا ومنه لله ..والبنت لابن عمها ولا يمكن غريب يدخل العيله ابدا .. سعودية مين دى اللى نتعاون معاها ولا كويت ايه دول حتى بيشتمونا ..احنا نتعاون مع اشقائنا اللى خلاص وقعو اتفاقية بينهم وبين مصرنا المخروسة لتوسيع نطاق المناطق الصناعية المصرية .. اصل المناطق الصناعية المصرية ضاقت بيها الدنيا كلها والدول كلها ماعدش غير اسرائيل اللى نوقع معاهم الاتفاقيات وقال أيه تتضمن نسبة مكون اسرائيلي من اجل زيادة الصادرات الى الولايات المتحدة احنا من كام يوم كنا عمال نقول 6 اكتوبر على اساس ايه ,, انهم بقوا اصدقائنا ورفقاء دربنا والبزنس ما يحلى الا معاهم .. طيب ما كانوا فضلوا قاعدين عندنا بالمرة .. ولا اتيتم اطفال ولا اترملت نساء ولا انحرقت قلوب امهات على ولادهم اللى ضاعوا طول فترة الاحتلال يعنى امبارح نحتفل بانتصارنا عليهم والنهارده نوقع معاهم عقد بيزنس بصراحة انا ماليش حق ازعل ولا اتضايق ولا اتفرس بالشكل ده…

واللى مرتبه 150 جنيه يعمل ايه

Image
دراسة حكومية: متوسط إنفاق الأسرة المصرية الواحدة 926 جنيه شهرياً اه فعلا ممكن اسرة صغيرة تعيش بالمبلغ ده وهيكون مكفيهم بالعافية صديقتى بتشتغل مدرسة متعينه مش نظام تعاقد من عام 1999 يعنى من 8 سنوات ومرتبها + الحوافز = 300 جنيه .. ولما سالتها بتعملى بيهم ايه دول قالت لى بركب بيهم مواصلات واشرب شاى بين الحصص وباقى الشهر بتاخد مصروفها من جوزها لاء ده واحيانا جوزها بيوصلها الشغل بالعربية يعنى مش طول الشهر مواصلات كمان الصبح بقا اتفاجأ على مصراوى بالدراسة دى مع انى اصلا شاكه فى مدى صحتها http://www.masrawy.com/News/2007/Egypt/Economy/October/8/egyptians.aspx يعنى اسرة هتاكل وتشرب فى الشهر كله بـ 416.4 جنيه على اساس رغيف العيش من اسهل وارخص ما يكون ولا كيلو اللحمة مش بـ 30 جنيه ولا حاجه خالص بلاش ده لوهيعيشوا على الفول والطعمية كيلو البصل وصل فى مرحلة 6 جنية ... اه فعلا المبلغ ده هيكفى لاسرة تاكل وتشرب بيه فى الشهر وممكن الاسرة دى يقل عددها أو يزيد عن 3 افراد .. وهيسكنوا 149.5 جنيه دى بقا نفسى افهمها .. ده فى المنطقة اللى انا عايشه فيها شقة حجرتين وصالة عبارة عن طرقة يعنى تحط فيها كرسى واحد فق…

هكذا يكون التضامن

احتجاب 15 صحيفة مصرية احتجاجا على حبس الصحفيين
http://www.masrawy.com/News/2007/Egypt/Politics/October/7/newspaper.aspx
لازم من وقفه
لازم من كلمة حق فى وجه حاكم جائر
محتاجين شوية امل فى بكره
محتاجين يطلع من قلوبنا ولو ضحكة صافية
أما آن الآوان ؟!

تااااااااج بقمر الدين والمكسرات ..

Image
التاج التانى واوعى اوعى تغمض عينيك
ده مش اعلان لروتانا
لاء خالص
اصل التاج ده من عند محمد سمير مدونة غمض عينيك
وندوس انتر
ونبتدى الاجابات
لو قالولك اختار عصر من عصور مصرعلشان تعيش فيه تختار اى ‏عصر و فى عهد اى حاكم .. واشمعنى؟
انا اختار عهد جمال عبدالناصر اصلى بحس ان العهد ده الناس عندها نخوة وشهامة وكرامتها بتنقح عليها اوى اوى كدا
اول ‏اولويه فى حياتك عيلتك ولا شغلك ولا اصحابك؟
وده سؤال برضه يمه طبعا رحاب
طبعا طبعا عيلتى
ايه اكتر ‏حاجه بتحبها فى رمضان؟
لمتنا كلنا فى وقت واحد وهو وقت الفطار اصلنا فى الايام العادية مش بنشوف بعض الا بالصدفة ولو حد فينا محتاج التانى اوى يبقا يحدد معاد سابق قبلها

اوصف ليا ‏اجمل فطار ممكن تفطره
وانا مع صحباتى .. الاربع جمعات فى ايام الشهر الكريم بيكون كل جمعه واحده عازمة الباقيين الحوار ده بنعمله من زمااااااااان بس بجد بتكون لحظات جميلة جدا ربنا يديم بينا الود ياااارب
لو انت ‏حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم ‏عادل؟
انا حسيب التقييم للشعب بقا اصل انا مش هعرف اقيم نفسى
واللى ممكن اعمله هغير فى الحاشية اللى حواليا باستمرار مش حسيبهم مت…

الوزراء ورجال الاعمال بس يدخلوا .. الفقراء يمتنعو

Image
الراجل ده
قصدى الباشا ده احسن اتسجن ولا حاجه واحنا فى ايام مفترجة
ولاده واحفاده بيتعلموا فى مدارس لغات اصل نظام التعليم فى مصر بقا فاشل
لاء ده مش هو لوحده هو ونخبه على حد قوله
طيب هو مش انتوا الحكومة برضه ياباشا ولا ايه
انتوا ربنا ميدكو وتعلموا ولادكو واحفادكو فى مدارس اجنبية
طيب الغلابة يعملوا ايه .. يروحوا فين فى ظل المستوى التعليمى الفاشل اللى حضرتك تفضلت وذكرته
طيب مش بدل ما تدخل ولادك واحفادك مدارس اجنبية يا باشا انت والنخبة اللى حضرتك بتقول عليها دى تفكروا فى حل جذرى للفشل ده علشان يبقا مستوى التعليم فى مصر ناجح
ودوه دروس خصوصية ياباشا .. ولو الميزانية لا تسمح فى مجموعات تقوية ممكن تساعد شوية
انما لما الحكومة اللى معيشانا ومدلعانا احلى دلع ومظبطانا اعلى تظبيط
ولادهم يتعلموا فى مدارس اجنبية ومش مهم بقا اللى بيتعلموا فى مدارس حكومية .. ويتعلموا ليه اصلا ... الفقرا اصلا ميدخلوش مدارس دول يشتغلوا زبالين
بصراحة حل هايل لمشكلة التعليم فى مصر .. اللى معاه يدخل ولاده مدارس اجنبيه واللى ماعهوش ميلزموش
http://www.almasry-alyoum.com/article.aspx?ArticleID=77934
ده لنك الموضوع
انا مش بحقد عليه ولا على غ…