Desert Cat Search
قطه الصحراء: 8/1/07 - 9/1/07

Tuesday, August 21, 2007

تجربة ومش هتعووووووود


صحيت من النوم بدرى على غير عادتى تماما كانت الساعه تقريبا 7 مع انى نايمة الساعه 3 وطول الساعات دى كان نوم قلق ... المهم الساعه وصلت 7 قولت مبدهاش قومت وعملت لنفسى مج الشاى الصباحى اليومى ... قعدت اقلب فى التلفزيون شوية ... زهقت جبت كتاب اقرا فيه شوية ... برضه حاسه بملل .. يالهوى كل ده ولسه الساعه 8 الا ربع ... اتصلت على بنت عمتى ... اتخضت بصراحةها يا نانا خير فى حاجه ...
انا : لاء زهقانة
طيب .. البسى وتعالى انا بعد شوية هنزل السوق وها اخدك معايا يمكن الزهق اللى عندك ده يروحان
انا : سووووووووووق لالالالالالالالالالالالاانا مبرحش اسواق
بنت عمتى : يا بنتى تعالى اهى حاجه جديدة تعمليها بدل ما انتى قرفانا جنبك على الصبح
انا : ومالك بتقوليها وانتى سعيدة كدا محسسانى انك هتاخدينى شرم .. لا يا ستى يعنى علشان اجدد انزل سوق روحى انتى انا مش بروح اسواق ... وبعد ما قفلت معاها الفكرة زنهرت فى دماغى .. ( محدش يقولى يعنى ايه زنهرت بس انا ببقا اسمعها كدا ) اتصلت بيها تانى :::
رحاب : يا فتاح يا عليم هو انا مش ورايا غيرك النهارده عايزه ايه تانى انتى مش رزعتى السماعه فى وشى اولانى ... عايزه ايه تانى
انا : قولت لها اسمعى بس مش تبقى رغاية كدا انا باتاكد انك لسه فى البيت انا جاية لك وهنزل معاكى السوق ولبست ورحت عند بنت عمتى ... وتوجهت معاها الى السوق وعلى مدخل السوق واحنا ماشيين فجأة سمعت الصوت ده ...
مسكت رحاب بنت عمتى من ايديها ووقفت .. مش كنت بتصنت .. لان الصوت كان عالى اصلا
ايه ده يا ست هو انا بشحت منك بين البايع والشارى يفتح الله
الست : وانا مش شاحتاه يا عين امك ده انا مشترياه وتعبانة فيه
وفجأة ترااااااااااااااااااااااااخ قلم محترم على وش البنت اللى بتشترى ويلا من هنا يا بنت الـ ( تييييييييييت ) والبنت واقفه ايديها على وشها ومذبهله لا هى عارفه تعيط ولا هى مستوعبة اصلا ايه اللى بيحصل ده كل اللى بتعمله واقفه حاطه ايدها على وشها مكان القلم واتمسمرت فى مكانها عمال تبص للست اللى ضربتها بس .. والست اصلا مش مبطلة شغالة كلام كله زبالة زبالة زبالة
الناس عمال تتلم ويتفرجوا كالعادة وبس وانا عمال كل شوية اضغط على ايد رحاب لما فعصتها لها ...
انا نفسى مش كنت مصدقه اللى بيحصل كنت حاسه انى جوا فيلم ...
وفجأة رحاب .. انا همشى ...
رحاب : تمشى فين ؟؟؟
.. لا يا ستى ده احنا لسه مدخلناش وحصل كدا امال لما ادخل هيحصل ايييه وما استنيتش لما ترد عليا وسبتها وجريييييييييت
هو احنا بنعمل فى بعض كدا ليه مش مستحملين بعض ليه والناس بتشتكى وبتقول تعذيب فى السجون طب ما اللى حصل ده مكانش فى سجون ده كان فى الشارع ومن مواطنة لمواطنة تانية ومن غير اى حاجه غير انها كانت بتطلب منها تتكلم بطريقة زوق طيب بنعمل فى بعض كدا ليه مع اننا ولاد بلد واحدة ولو فى قانون يحترم كانت الست دى قدرت تعمل كدا فى البنت الضعيفه اللى كانت واقفه قدامها ايه اللى بيجرى لنا .. وبنعمل فى بعض كدا ليه ؟؟؟ بندوس على بعض ليه ... بنهين كرامتنا بادينا علشان ايه ؟؟؟ انا بدل ما كنت زهقانة بس .. دلوقتى جالى اكتئاب ...

Thursday, August 16, 2007

المعاكسات والمشاكسات


كان زمان اللى بيعاكس بيحلقوا له شعره وبتبقا كل الناس عارفه انه كان بيعاكس وكان بيبقا عار زى البنت اللى عامله عاملة سودة .. لكن دلوقتى مع التقدم التكنولوجى .. اصبح اللى بيعاكس بجح ... ولو حد قاله عيب يقف ويرد عليه ويشتمه كمان .... يعنى مخالف لتعاليم دينه من " غض البصر وكف الاذى " لاء وكمان بجح وقليل الادب
ماشية فى حالى ولا بيا ولا عليا وفجأة طلع لى واحد مش عارفه بصراحة من انهى مصيبة تاخده ... هو شكله مش كبير ولا صغير يعنى شاب فى بداية العشرينات او بيتمحك فى العشرين .... ولاقيته ماشى ورايا ومش ماشى ساكت كنت قولت بودى جارد ولا حاجه ... ماشى بيتلفظ بالفاظ اقذر من القذارة بشوية ... مع انى والله بلبس كويس جدا يعنى لبس فضفاض وكمان محجبة .. ومشيتى بالظبط مشية عمو محمد المخبر اللى على اول الشارع ... جاله عمى الوان الواد ده ولا ايه ... فضلت ساكته لحد ما بدأت اوصل المنطقة بتاعتنا .. وهنا بقا قولت اكيد فى حد يعرفنى هنا وهيدافع عنى بدل ما كنت اقف له فى مكان ما اعرفوش الناس تتفرج عليا وخلاص ما انا جربت قبل كدا .. الناس الايام دى بتتفرج وبس اكبر مجهود ممكن يعملوه يسالوك هو فى ايه مع انهم شايفين كل حاجه من الاول بس بيحبو يستعبطوا .. واول ما حسيت انى فى امان وقفت له
انا : ما تحترم نفسك يا حيوان ... ده ايه القرف ده
الحيوان : طب والله ما انا سايبك وهلف وراكى فى كل الشوارع
انا : اصلك قليل الادب وهتترد لك فى امك او اختك .. حسبى الله ونعم الوكيل
ومشيت طوالى
لاقيته كمل المسيرة ورايا ...
شوفت واحد جارنا وهنا قولت دى فرصتى ده مهما كان جارنا يعنى ...
انا : ما تمشى بقا يا مهزئ ده ايه قلة الادب دى
هو : وقف قال كمية الفاظ عمرى ما سمعتها
وهنا تدخل جارنا مالك يانانا
انا : الحيوان ده ماشى ورايا من بدرى وعمال يقول كلام قذر
جارنا : اتقى الله فى بنات الناس ... انت مش عندك اخوات تخاف عليهم
هو : لاء مش عندى وامى ماتت
وانا عايش بمزاجى ومالكشى دعوة يلا امشى من هنا
جارنا : طيب انا هعلمك ازاى تعيش وازاى تحترم الناس غصب عنك .. تعالى بقا على القسم .. وبالفعل وقف توكتوك علشان يوديه القسم
الواد شاف الموضوع بجد مش هزار قعد يعيط ويقوله اسف يابيه
انا اسف يا ابله ... بس قسم لاء
جارنا : انت ساكن فين ياض وبتشتغل ايه : انا ساكن فى ............... ومخلص دبلون زراعة ومش بشتغل
والله ما فى جيبى تمن علبة السجاير
انا فى سرى طبعا: يا حرام قطعت قلبى يا بن الـ؟؟؟؟؟؟
جارنا : ما تروح تتنيل على عينك وتشتغل بدل قلة الادب على الناس
هو : حاضر يابيه هشتغل ان شاء الله
جارنا : عندك اخوات بنات
هو : اه عندى اتنين
جارنا طيب مش تخيلت واحده من اخواتك مكان الاخت اللى انت ماشى وراها دى ليه
لو شوفتها فى المنظر ده هتعمل ايه
هو : انا اسف يا بيه والله ما هعاكس حد تانى
جارنا : طيب انا حفظت شكلك ولو شوفتك بتعاكس حد تانى مش هسيبك
هو : لا والله يابيه خلاص انا حرمت
جارنا : طب يلا غور من هنا وقبل ما تفكر تقل ادبك على حد افتكر محارمك وحطهم فى مكان اللى بتقل ادبك عليها دى
هو : خلاص يابيه انا اسف ..وجرى
خلاص يا نانا معلشى قدر الله وما شاء فعل
انا : اشكرك جدا يافندم ... وانا والله مش هنسى لحضرتك الموقف ده ابدا
جارنا بتشكرينى على ايه يا بنتى ... ده واجب علينا وابقى سلمى لى على الحاج ... ( والدى طبعا ) يلا فى رعاية الله
ومشى جارنا وانا كمان مشيت
بس دماغى فيها الف حاجه
ياترى واحد نايم طول النهار وصاحى طول الليل علشان يعاكس البنات ويقل ادبه على خلق الله .. بيستفاد ايه
ده حتى المعاكسات مش مقتصرة على سن معين علشان نقول البطالة ...
دى اصبحت زى فيرس منتشر فى الجو .. فى اى وقت وفى كل مكان
ده الاطفال بيعاكسوا والشيوخ بيعاكسو والشباب العاطل واللى بيشتغل كمان
ايه وجه الاستفادة لما تأذى واحده ماشية فى حالها بكلمة
طيب ليه فعلا مش بتتخيل اختك او امك فى مكانها وبتتناسى انه " كما تدين تدان "
وايه ضمنك ان مش واحده من اهل بيتك ماشيه فى شارع تانى وواحد بنفس السفالة ماشى بيعمل اللى انت بتعمله فى واحده تانية
" حد هيقولى لبس البنات وعمايلهم "
انا ماليش دعوة باللى بتلبس من غير هدوم
انا ليا دعوة باللى بتلبس كويس ومحجبة تتأذى ليه
واحدة ماشية فى حالها مش عملت لك حاجه تعمل انت كدا ليه
وحد يقولى هو بيستفاد ايه غير اهانته وقلة قيمته

Tuesday, August 7, 2007

انا بتهدد يا جدعااااااان



أنا عايزه الجماعه بتوع علم النفس يحضرونا حد يجى يقولى اسمه ايه اللى بيحصل ده .. اصله عدى الشيزوفرنيا بمراحل ..

الموضوع ده مش من الخيال ولا هو فيلم خالتى فرنسا بس برؤية مختلفة .. إنما ده حصل بجد وبحق وحقيقى .. لاء ده ولسه حتى الآن يعنى عرض مستمر ...

بداية الأحداث كان أول شهر 4 اللى فات يعنى من حوالى 4 شهور ... بما انى واحدة فاضية هو مش فاضية اوى يعنى لان عندنا سيبر والمفروض انى المسؤله عنه .. بس برضه فاضية .... لاقيت الشيطان عمال يوسوس لى ويقولى انتى مش ينفع كدا طول النهار قاعده على النت قومى شوفى لك حاجه اعمليها ... واستمعت لنزعات الشيطان ومخطرش فى بالى غير الجيم ... مع انى كلى على بعضى طول بعرض 60 كيلو ويمكن اقل شوية .. بس يلا مش مهم ما هى الرياضة للجميع والشيطان ده كان فى شهر 2 والغريب انى فى الجيم حتى الآن .. نخش فى الموضوع على طول .. بقا يا عمى . لا ده مش غبى منه فيه .. نكمل موضوعنا .. فى شهر 4 جت وجه جديد عندنا فى الجيم .. عاتشى مش غريبة يعنى .. بس الغريب ان الاخت الوجه الجديد عمال تبص لى طول الوقت بشكل ملفت جدا .. لدرجة انى شكيت انها فى شهور الوحم الأولى وبتتوحم عليا مع انى مش صوفيا ولا جوليا ... وسالتها .. انتى بتبصى لى كدا ليه .. قالت لى عادى اصلك لذيذة وشخصيتك لفتت نظرى .. قولت ( صلاة النبى ) وخلصنا فى اليوم ده على كدا .... فى المرة اللى بعدها أول ما شافتنى .. قالت لى اسمك أيه .. قولت لها نانا .. قالت لى وانا فلانة واسترسلت فى الكلام وعايشه فى الكويت ولسه جاية من اسبوع وحرجع تانى بعد 15 يوم وخطوبتى بعد اسبوع على رجل اعمال مليونير هو صديق جمال مبارك ... انا قولت جمال مبارك ابن ريسنا وريسنا يا حيلاوة .. انتى متاكدة من الاسم ده يا بنتى ولا واحد عادى اسمه جمال مبارك .. قالت لا جمال ابن ريسنا وريسنا ده مليونير وكل صحابه هاى كلاس .. ده حتى دافع مهرى 6 مليون جنيه ... انا قولت وبتتمرن معانا وفى الجيم ده ايه البونية المتواضعه دى .. اكيد البنت دى فى طيارة مستنياه بره اضعف الايمان يعنى توصلها بيتها .. المهم خلصنا من هنا ولاقيت واحدة متوشحة بالسواد ... لابسه عباية سودة وطرحة سودة ... قولت عادى ما هى كانت عايشه فى الكويت والكواتيه بيلبسوا عبايات سودة مش مهم المظهر بنت متواضعه بقا ... خرجنا من الجيم بقولها ايه ده انتى حتمشى على رجليكى .. قالت لى امال اعمل ايه .. قولت لها يعنى يكون عندك سواق ولا حاجه .. قالت لى لاء اصل انا لسه حشترى عربية .. قولت لها انتى ساكنة فين قالت لى هنا واختارات انضف شارع فى فاجوس انجلوس ... وقالت لى ساكنة فيه وسكنه فى عمارتهم .. قالت لى وانتى رايحه فين دلوقتى قولت لها حروح السيبر سالت فين مكانه قولت لها هناااااااااااك اهوه وشاورت لها عليه لانه خلف الجيم مباشرة ... وتبادلنا ارقام التليفونات ... وتانى يوم الساعه 12 لاقيتها بتتصل وبتقولى انها فى البنك وحتيجى لى السيبر .. قولت طيب تمام بس اوعى حد يسرقك دى انتى فى بنك يا حجه ... وجت لى .. ومش كانت اخر زيارة .. كانت يوميا تيجى لى السيبر وتقولى اصلى كنت فى البنك ... كل يوم فى البنك ده ايه الفشر ده .. وفى مرة من ذات المراير احنا قاعدين بندردش وفجاة دخلت بنت السيبر وسلمت عليها ودخلت قعدت على جهاز بعيد .. ما تقعد وانا مالى ... المهم كانت الدردشات اليومية بتاعتنا بتدور حوالين ان ابوها وكيل وزارة .. وامها دكتورة .. وان واحد كان حينتحر فى المقطم لما عرف انها اتخطبت لدرجة انه قالها حجيب لك عربية همر وشقه تمليك بس ده ماله الاخ ... هو جرى ايه فى الدنيا يا ناس ... طبعا كل يوم احس انى باخد على قفايا مش هاضمه الحوار كله على بعضه ... وبعد ما مشيت صديقة الجيم رحت سالت البنت اللى دخلت وسلمت عليها .. انتى تعرفيها منين ؟؟؟ قالت لى انها جارتها .. قولت لها وهى كانت عايشه فى الكويت قالت لى نعمممممممممم ... ده احنا عايشين فى قرية ........... وعمرى ما شوفتها خرجت منها بصراحة .. اننن ااااااااااااااه ... تشششششششششش .. قولت لها طيب مخطوبة لرجل اعمال وسديك ريسنا المستقبلى ... قالت لى ايييييييييه .. ده مشعارفه يبقا مين وابن مين فى البلد عندنا ... (اه يا قفايا ) ... قولت لها ابوها وكيل وزارة ... قالت لى نعمممممممممم طب مامتها دكتورة ... كل الكلام ده طلع كدببببببببببب ... كفايييييييييييية مش عايزه اسمع اى كلام تانى .... طبعا الشيطان اللى جوايا انتصر عليا وخلانى اتصل بيها واقولها انا عرفت عنك كذا وكذا .. ليه يا بنتى يا حبيبتى تكدبى .. ذنبهم ايه اهلك تتبرى منهم .. دول ناس شرفاء يعنى .. قالت لى انا عارفه مين اللى قالك والبت دى كدابة .. وهى حقودة وبتغير منى اصل مامتها الشغالة بتاعتنا ... قولت يبقا قفايا ملوش حق يوجعنى ... ورحت قايله للبونية جارتها الحوار كذا وكذا ... قالت لى ايييييييه .. طب انا بقا حروح اخلى امى الشغالة اللى عندها دى تعرفها مقامها .... بعد كدا انا من شدة الالم اللى فى قفايا روحت متصلة بيها وقولت لها بصى احنا حنبيع السيبر ومش حكون موجودة هناك ... ياريت مش تورينى طلتك البهيه تانى ... فات يومين ولاقيتها جاية ... ايه ده انتى هنا قولت لها اه وكلمتها بطريقة اقل ما يقال عنها قلة ذوق ... لاقيتها سابتنى وراحت قعدت على جهاز ... طنشتها ولا كانها موجودة .. خلصت وهى جاية تمشى بتقولى عايزه حاجه قولت لها لاء .. قالت بتكلمينى كدا ليه .. خدى فلوس النت بس اتعاملى كويس .. قولت لها انا كدا .. وبعدين خلى فلوسك ليكى تنفعك .. ومشيت على كدا ... ورجعت تانى يوم وبرضه دخلت قعدت على النت وانا زهقانه بشكل وحش جداااااااااا .... برضه طنشتها فى الاخر لاقيتها بتقولى فيكى حاجه غريبة .. وهنا انفجرت وقولت كل اللى فى نفسى .. وفجأة لاقيتها واقفه حاطه لى ايديها فى وسطها واشتغلت ردح .. حسيت وقتها انى واقفه جنب بكابورت مفتوح وعمال يطرطش ... او مقلب زبالة وقلبت فيه بايدى .... ملقتش حل غير انى اقولها بره ... انا افتكرت الموضوع انتهى على كدا ... لكن تقريبا كان كدا بدء .. فى نفس اليوم الساعه 12 بالليل ... لاقيت رسالة من رقمها كلها اهانة .. مش رديت .. بعدها بنص ساعه رسالة .. برضه مش رديت ... فى اليوم ده استلمت حوالى 5 رسائل .. خلصنا الشتيمة .. وتانى يوم بدأنا فى التهديد ... انا حروح أأجر لك واحده تيجى تعمل ( تيييييييييييييييييييت ) برضه مش رديت ... رسالة تانية حأجر لك واحدة تيجى ( تيييييييييت ) بس المرة دى كان التهديد صعب شوية ... مؤخرا وليس اخرا .. لاقيت رقم غريب بيرن رديت .. ولاقيته شخص بيقولى انتى فلانه ... قولت له مين حضرتك قالى مش مهم بس انا عايز اقولك ... نظام لو مش رجعتى حنحط السيخ المحمى فى صرصور ودنك ... طبعا رديت عليه باللى فيه النصيب .... وتتوالى الرسايل والمكالمات والتهديدات .. وشكلى اخرتى قربت ... ابقوا افكرونى بالخير واقروا لى الفاتحة ..

الدروس المستفادة :

لو كنت فى مكان وحد بصلك اوى مش تبص عليه ولا تعبره

لو حد جه يقولك انا البنت الوحيدة ونفسى تكونى اختى قولى لها معطلكيش امى قالت لى ما اصاحبش حد

لو حسيت انك بتاخد على قفاك ما تسكتش

توقيع

واحدة كل يوم تتهدد