Desert Cat Search
قطه الصحراء: 5/1/07 - 6/1/07

Thursday, May 31, 2007

تشابه اسماء .. طيب مش تاخدوا بالكو

انتشرت فى الفترة الاخيرة موضوع تشابه الأسماء ده
يعنى فى يوم كنت خارجه مع صحباتى بقا ومقضينها اخر روقان ... وطول الوقت عمال نضحك وناكل ايس كريم ونهرج المهم انا قولت خير اللهم اجعله خير ما هو احنا كدا المصريين دايما مستكترين الفرحة على نفسنا ... المهم رجعت البيت بعد خروجه فله اوى ومش بتيجى غير كل سنتين مرة .. الاقى كل اللى فى البيت مبوزين ... فى ايه يا جماعه ..
اختى : مش وقت وجع الدماغ
طب فى ايه يا ماما : لا اصل ابوكى مطلوب فى القسم
والدى .. ابتااااااااااااااه ... قتلت ولا سرقت ولا نصبت ولا عملت ايه .. اعترف يا بابايا
هو اينعم عصبى اوى واقل حاجه بيعمل منها حكاية ورواية بس مش لدرجة القسم يعنى
بابا : امشى من وشى الساعه دى مش ناقصك
ماشى يا عم الحج ده جزائى يعنى اللى عايزه اساعد
طبعا فى اليوم ده طول الليل البيت كله صاحى والحبايب متجمعين .. وكله عمال يضرب أخماس فى اسداس .. ياترى فى ايه .. وايه اللى حصل .. صبح الصباح واللى جاى احسن من اللى راح .. وراح اخويا ووالدى العزيز القسم علشان يشوفوا ايه الموضوع .. ويكتشفوا هناك ان فى غلطة فى الاسم وسيادة المخبر بدل ما يدور على الاسم التانى استسهل وراح جاى على بيتنا اصل الشخص المطلوب اثباته فى نفس المنطقة بس مش شارعنا خاااااااالص ويتفق مع والدى فى الاسم الاول والتانى التالت ولا نعرفه ... وبعد ما كنا عمال نجهز فى العيش والحلاوة .. رجع اخويا ووالدى البيت وقضيناها عيش وجينة خزين .
موقف )2)
لما رجع ابن خالى من السعودية علشان حيدخل الجامعه خلاص لانه عايش حياته كلها فى السعودية وتعليم وكدا فلازم يدخل جامعه فى ام الدنيا بلده امال ايه واحنا لينا غيرها .. قدم كليه شرطة .. عملوا تحرياتهم اللى بيبقوا يعملوها دى قالوا ده العيله دى قتالين قتله هاتوهم .. واشتبهوا فى اسم ميييييييييين ... اختى الواسطانية .. نفس الاسم الثلاثى بالظبط وابن الست اللى فى تشابه اسماء بينهم قاتل واحد وهربان من 15 سنة .. يا جماعه مش هى دى البونية لسه عندها 32 سنة و ابنها فى كى جى ون حيتقل فين وازاى ... يقولك لاء هى .. المهم الواسطة لازم تلعب دورها وفين وفييييييين وحوارات لحد ما اثبتنا ان مش هى دى ام القاتل المجرم طريد العداله ... وصححوا التحريات ودخل الكلية وحالف انه بعد ما يتخرج يحبس العيله كلها علشان اللى حصل فى التحريات ده
موقف )3)
جارنا الاستاذ ابراهيم جا له جواب يروح القسم
مراته رقعت بالصوت الحيانى طبعا الشارع كله اتلم .. فى ايه يا ام حسن .. اصل سى الاستاذ حيشنقوووووه لالالا حيعدموووه .. ليه يا ست ام حسن .. هو قتل حد وسرق فلوسه .. لالا جاله جواب الاستدعاء ده من القسم وبيقولوا اننا سارقين نور السلم .. سلم مين اذا كان انتوا بيتكو دور واحد ومفيش عندكو سلم للسطوح حتى ...
ام حسن : مش عارفين بس ده اللى الاستاذ المخبر قاله ولازم سى الاستاذ ابراهيم يروح يسلم نفسه علشان يشنقووووه
راح الاستاذ ابراهيم القسم ملقاش اى شبه بين اسمه وبين اسم الراجل التانى غير فى الاسم الاول بس .. يعنى الاتنين اسمهم ابراهيم واما الاب والجد والعم والخال وباقى العيله مختلفني تمام الاختلاف .
طيب مش بدل ما يتلفوا اعصاب الناس واللى مش يجى لهم نوم زينا واللى كان مستقبله حيضيع زى ابن خالى ولا الست اللى توقعت ان جوزها زهق من المدير بتاعه بعد خصم يومين قام قتله وقتل كل الموظفين ونسى ينتحر وقفت ترقع بالصوت الحيانى وقعدت تعيط عياط يكفيها باقى حياتها ياخدوا بالهم ويتاكدوا من العنوان الصح .. ده الواحد لو رايح بنك ولا اى مكان حيسحب 2 جنيه بياخدوا رقم بطاقته واسمه ويتاكدوا مليون فى الميه ان هو ده الشخص المذكور ويمضى ويبصم على سبعتلاف ورقه اشمعنا فى الاقسام مفيش كدا ولا امن الدولة ولا الاماكن الحلوة دى اسحبه من قفاه الاول لما يبان له صحاب بعد كدا نقوله احنا اسفين ده ان قالوها اصلا ولا هو خلاص احاسيس الناس ومشاعرها شئ مالوش لازم
ربنا يصبرنا

Thursday, May 17, 2007

احنا رايحين نقابل .. الدعوة عامة



عذراً : أزيك يا بنى أنت فين بقالك فترة يا حبظلوم مختفى أخبارك ايه
حبظلم : صديقتى وأختى العزيزة الغالية على قبلى أوى أوى اللى أول ما بشوفها بحس بمراوحى بترفرف
عذراً : ربنا وحده اللى يعلم معزتك عندى يا حبظلوم أنت أخويا اللى ماليش فى الدنيا غيره أنا بحبك فى الله أوى أوى أوى خالص يعنى أخويا بقا المهم اخبارك طمنى .
حبظلم : والله مش ولابد قرفان طهقان زهقان متضايق ( فاكر نفسه ريكو الكابتشن ) ماليش نفس لأى حاجه خالص ولا طايق نفسى بتاتا
عذراً : لا الحال ده ما يتسكتش عليه أحنا نلم الشلة كلها ونتقابل ونفرج عنك همك ... ده أنت أخونا برضه ... أنا حنزل موضوع حالا حاير طاير ألم فيه الشلة كلها ونخرج على آخر الاسبوع ده .. أنا ميخلصنيش أشوف أخويا كدا .. نو ... البته .
حبظلم : ربنا يبارك فيكى أنتى ونعم الأخت
عذراً : يا أخواتى الكرام .. تبرعوا ( لا مش دى ) إحنا حنخرج فى آخر الاسبوع ده ( يوم فاضى أهوه محدش ليه حجه ) أصل حبظلم يا عين أمه عنده اكتئاب لاء وياحرام كمان كان بيرجع الصبح ..
قهراً : يا عينى يا ضنايا طب كان بيرجع ليه يا أختى الكريمة وايه سبب الترجيع .. ياترى كان بيحط طيب صباعه فى بؤة ولا ترجيع كدا لوحده .. شكله عينه وقعت على بذرة مانجة قرفته حكم أنا عارفه ان حبظلومه النومة كونمه انسان حساس أوى وزوق اوى اوى وما شاء الله عليه متدين جدا اوى خالص .
عذراً : طبعاً طبعاً دى صفات ميختلفش عليها اتنين بس ليا رجاء حار ناااااااار اللى جنب بيتهم صيدلية تجيب معاها دوا للترجيع والدعوة عامة للجميع اللى عايز يحضر حيشرفنا واللى مش عايز عنه ما جه ... بس مش عايزين الناس المعقدة بتوع الاختلاط دول يدخلوا الموضوع ... اصل اللى حيدخل حيتلغى عضويته فى خلال ثوانى .. ده احنا صحابنا الناس اللى فى ايديها السلطة كلها .. احنا مصاحبين الحكومة .. لاء وأيه الحكومة كمان حتيجى .
قهراً : ختلاط ايه اللى انتى جايه تقولى عليه ... ده احنا رايحين نفرج كربة عن أخ مسلم .. ومن فرج عن أخيه المسلم كربة من كرب الدنيا فرج الله عنه كربة من كرب يوم القيامة ( حتة دين علشان الناس المعقدة مش يفكرونا مش بنعرف فى الدين .. ده احنا كل يوم بنحضر محاضرات دينية ) الجميع طبعاً موافقه ده أخونا فى كربة يا ناس ولا حد يقدر ينطق بحرف .
فضلاً : ياااااااااااه أنا كنت بخاف أحضر اللقاءات دى إنما لما جيت معاكو المرة دى حسيت بفرق كبير اوى شاسع وبندم إنى مش جيت قبل كدا ... ده أنا أول مرة أشوف عذراً اختى الجميلة البسكوتة اللى تتكسر من مجرد اللمسة .. ولا حضنها يالهوى يا لهوى درجة حرارة فرن بوتاجز اشعال ذاتى ... دافى اوى خالص .... ده احن الف مرة من حضن سعاد حسنى ( فى الحب الضائع ) ... انا بعشقها ... انا بدمنها .. انا بموت فيها .. ( ناقص تقول حددى لى معاد مع بابا ) .
عذراً : لالا ما تحرجونيش (آناه) اصل انا بنكسف .. أنا كمان بحبكو جدا اوى خالص مالص بالص .
حبظلم : امسك فى واحده من المعقدين بتقول الاختلاط وبتتكلم كلام كبير اوى هى تبقا مين دى ان شاء الله علشان تحاكمنا ومين فوضها تتكلم اساسا .. اللى عنده كلها يلمها ..
عذراً : ولا يهمكوا هى هورس عليها واحده بس حتلاقى الشلة كلها طالعه تخرسها وتوقفها عند حدها مبقاش غير العقد والكلاكيع كمان يتكلموا ..
فضلاً : بصى يا حلوة احنا مع أخواتنا وهما بيخافوا علينا اوى خالص ثم احنا مش كنا بنتفسح احنا كنا بنفرج كربة على أخ لينا فاهمة يعنة ايه كربة يا اختشى ( يا سلام على اسلوب الحوار الرائع الوصف)
باقى شلة الأنس فى نفس واحد : احنا مش قولنااااااااااااالك تيجى اللى عايز يجى يشرف واللى مش عايز يتكتم ومش ليه دعوة ده ايه الكلكعة دى ( ايون اظهر وبان عليك الامان )
عذراً : مش قولتلكو هى هورس واحدة عليها وهى حتسكت خالص .. احنا علشان نحرجهم ونعرفهم احنا بنات مش اى كلام ننزل بموضوع دينى حالا بالا واى حد يتكلم يبقا نجيب له الحكومة .. ارقامهم معانا .. وبعد كدا نعمل خروجه فله للجميع علشان نعرفهم ان مهما قالوا ومهما عملوا احنا شلة الانس اللى متجمعة باستمرار وحنتقابل رغم عن الناس الحقوديين الوحشيين دول ( وش بيطلع لسانه ) أصل انا مامتشى وباباتشى واخوااااتشى وجوووووزتى قصدى جوزى واثقين فيا انتوا مالكوا بقا ... مجتمع متخلف ياااااااااى .
*******************************************************************************
وتتكرر الحكايات
" الدين النصيحة "
اللى عايزة تقابل تروح محدش منعها .. واللى عايزه تشتغل فى كبارية برضه تتفضل .. ومفيش حد بيحاسب مكان حد ... بس بلاش عبايات الدين اللى كل لما واحده او واحد يتزنق يلبسها اصلها بتكون واسعه عليه اوى ومش بيقدر يملاها لما يتواجه بالحقائق والأدلة الربانية

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلا تَمُوتُنَّ إِلا وَأَنْتُمْ مُسْلِمُونَ
(صدق الله العظيم )

Friday, May 11, 2007

فى حاجه اسمها خصوصيات لو سمحت



فى فرق بين انى احكى لك على موقف حصل فى حياتى وبين انى الاقى حد بيقحم نفسه فى حياتى

نقول يعنى أيه

يعنى لما انا أتعرض مثلا لموقف مضحك او باكى وحد يشوفنى ويسألنى خير اللهم أجعله خير

يبقا كتر ألف ألف خيره أنه عبرنى وسألنى مالك طيب ممكن نساعد بحاجه طيب أى حاجه

والله فى الحاله دى لو أنا محتاجه أفضفض حتكلم عادى وأحكى

لو أنا ما عنديش نفس للكلام حقول متشكرة جدا وحزاك الله كل خير

انما الغريب اللى شوفته حاجه تانية خالص

طبعا كلنا بنمر بمشاكل فى حياتنا

يعنى الحياة مش كلها ضحك ولعب وهزار وفرفشة انما فيها برضه شوية جد على شوية مشاكل

من فترة مريت بمشكلة وانتهت على خير الحمد لله

صديقتى كلمتنى مش بشوفك ليه

قولت لها اصل انا بصراحة معتزلة الناس

صديقتى : ليه يا حبيبتى فى حاجه

حكيت لها

واحدة تانية من صحابتنا بتسأل صديقتى الاولى عليا مش بنشوف نانا ليه بقالنا فترة فى حاجه طبعا بحكم ان صديقتى الاولى قريبة منى جدا وباستمرار اتصالات وزيارات ... قالت لها اصلها عندها شوية مشاكل وان شاء الله تخلص على خير ... نيجى بقا لصحبتنا التالته مشاكل ايه ... احكى لى .. راحت صديقتى قالت لها مش عارفه لما تشوفيها ابقى اساليها ... مرت الايام تلو الايام وتقابلنا
صحبتنا ... مالك يا نانا سمعت انك فى مشكلة ولاقيتها وبتتكلم بقا بكل فرح وسعادة ...
قولت لها خير ... حاجه وانتهت راحت لحالها الحمد لله ... تقتنع أبدا ما اقتنعتش ... لاقيتها جايبه كرسى وقاعدة جنبى ولازم وحتما ولابد أحكى ايه المشكلة ...
أنا بقا :: يا بنتى يا حبيبتى حاجه عادية ...
صحبتنا :: لا حتحكى يعنى حتحكى ... وفضلت تتحايل عليا يجى ربع ساعه ... اصرارها ده خلانى أشك إن فى حاجه غريبة ... اصل لو انتى مثلا قلقانه عليا أديكى شوفتينى وانا قاعده بكلمك اهوه وطبيعية ... انما لزومه ايه انى اقعد احكى وليه الاصرار ده كله ... افرضى موقف محرج مثلا .. افرضى حاجه خاصة بأهلى ... حاجه خاصة بحد من قرايبى وانا زعلانه علشانهم ...
ومش من حقى إنى أحكى ... طيب لما قولت لها معلشى اصل دى حاجه خاصة ومش ينفع اتكلم فيها انا كنت حاسه انى قليلة الذوق بس انا ايه اللى وصلنى للدرجة دى من قلة الذوق غير الالحاح الغير مبرر .. ما هو انا لو متعودة فعلا باحكى لها على اى حاجه تخصنى يبقا حقها تلح عليا .. انما ده مجرد صباح الخير يا جميل .. صباح الفل يا قمر ... والله عايزه اشترى كذا .. اتفضلى ... سلام يا جميل .. سلامين يا عسل وخلصت الليلة على كدا
هل هو مزاج يعنى معرفة خصوصيات الناس ؟؟؟؟
سؤال يطرح نفسه أرضاً

Thursday, May 3, 2007

جالى عريس من جهة أمنية ..... زغروطة يا حبايب

بجد .... طبعاً بجد .... طبعاً انتوا أخواتى ولازم يا كتاكيت تتعرفوا برضه على العريس إشمعنا أنا يعنى ... ولو أنى انا شخصيا مش أتعرفت ... بصوا أنتوا حتعرفوا من خلال كلامى أنا مش أتعرفت ليه .... طبعاً كلنا سمعنا عن جواز الصالونات ... ( بالراحة بس محدش يزق ) من حوالى 4 ايام كدا اتصلت واحد قريبتنا بمامتى وقالت لها إن فى راجل كدا كوبارة وله هيبه وشنة ورنه وعنده شقه وعربية معدلللللللللله عايز عروسة وانا بصراحة قولت العروسة اللى تستاهله موجودة .... عروسة كومل وزى الفل ..... ماما قالت لها طيب هو مين ؟ منين ؟ ابن مين فى مصر ؟ وكل اللى على لسان الست قريبتنا دى ده راجل قيمة وسيمة ووظيفة ميرى ... ده هيبه ولما يجى حتعرفوا كل حاجه ... ماما .. طب يا ستى نعرف منك علشان لما أكلم ابوها و اخواتها ابقا اقولهم هو مين .... قالت لها قريبتنا .. هو بيشتغل ظابط فى الجيش ... ومش حقدر اقول حاجه تانية غير كدا لما يجى بقا ابقوا اعرفوا منه كل اللى انتوا عايزينه ..... طبعا انا رجعت البيت وماما بلغتنى الخبر ... وان الراجل الهيبة والقيمة والسيمة ده خلاص جاى لنا بعد بكره ... وانا بقا عريسسسسس ومن جهة أمنية وااااااو ولا وباضت لك فى القفص يا نانا وجه اليوم الموعود ... وكان حاضر والدى العزيز واخويا واختى الوحيدة اللى موجودة من الثلاثة الباقيين فى مصر وجوزها .... وانا بقا عمال اتعامل معاهم بمنتهى الاطة .... حناسب الحكومة بقا وانا حبقا مرات الحكومة ... إلى ان جاء العريس ... حاجه طويلللللللللله بطول السنة الكبيسة كدا وأختكوا اصلاً قزعههههههه ..... طبعا نيجى على الرأس ولا شعراية بحمد الله كدا غير داير من الودن للودن لازم اكون امينة فى الوصف يعنى علشان مش اظلمه ... ملامح الوجه ... يختشى كميلة ... برضه علشان مش اظلمه شكله طقم اسنان ومتكسر نصه ..... طبعا كل التفاصيل دى انا جبتها من بصة واحده وهو نازل من العربية اصل انا كنت واقفه ورا الشيش ... اختى جت ايه ده العريس عسسسسسل ...... قولت لها اللى عنده كلمه يلمها ... أول ما ماما دخلت قولت لها بصى انا مش خارجه يعنى مش خارجه ..... قالت لى وانا قولت لك اخرجى .... هو ياخد الواجب بتاعه ويتوكل على الله ..... قال هيبه قال .... والمفاجأة انه بعد ما مشى ... دخل الاستاذ اخويا يقولى ... متجوز مرتين ومطلق وابنه الكبير عندو ثانوية عامة السنة دى .... وانتى الزوجه التالته ... تعرفى يا نانا تنفع قصة فيلم ... قولت وماله برضه شوفلى حد يكتشفنى وانا حطق من الغيظ ...... وطار العريس وااااااا عريستااااااااااااه