بلدنا غنية بس احنا اللى وش فقر

لما كل وزير يبقى عنده على الاقل 3 مكاتب وجيش من السكرتارية خريجين الجامعة الأمريكية علشان معاليه يقضى فى كل مكتب ساعتين او حسب مزاجه
او حسب المكتب اللى موجود فيه سكرتيره حسناء هيفاء شبه واسم وانتوا عارفين خريجين الجامعة الامريكية ولاد ناس وحاجه تفتح النفس علشان كدا مرتباتهم لازم تكون مرتبات صح الصح يعنى ... بس يا شعب يا فقير محدش يقر عليهم دى ناس بتتعب
وعلشان كدا لازم وزرائنا يعيشوا عيشه اخر روقان
.........................................................................
السيد وزير الاستثمار له 4 مكاتب اولهما فى جاردن سيتى والثانى فى المبنى الجديد لوزارة الاستثمار بشارع صلاح سالم والثالث فى هيئة التمويل العقارى ورابعهم فى المنطقة الصناعية بالتجمع الخامس
والسيد وزير المالية له ثلاثة مكاتب احداهم فى مقر وزارة المالية بلاظوغلى والثانى فى مقر الوزارة الجديد بمدينة نصر والثالث فى مصلحة الضرائب العقارية بمدينة نصر اى ان المقرين لايفصل بينهما سوى امتار قليلة
اما بقى السيد وزير التموين فله مكتب فى شارع القصر العينى واخر فى مقر هيئة المساعدات الاجنبية فى مدينة نصر
وزير النقل لم يكن اقل من الاخرين فخصص له مكتبا فى شارع القصر العينى واخرفى مدينة نصر.
ومثله وزير البيئة الذى اختار مكتبا وزاريا فى مصر القديمة بخلاف المكتب الموجود بالوزارة فى المعادى
وكذلك وزير الطيران المدنى فبخلاف مكتبه فى المطار خصص وزير الطيران لنفسه مكتبا اخر فى فى وزارة الطيران
......................................................
طبعا البهوات من حقهم يرفعوا فى زيادة السلع ومن حقهم يسحلوا المواطن اللى على اد حاله ومن حقهم يشردوا اهالى كفر العلو ويتناسوا سكان العشوائيات ياى ايه الناس البيئة دى دول حتى اسم العشوائيات يتعب الاعصاب فالبشوات رجال الاعمال الوزراء لازم تكون اعصابهم هادية ومرتاحين علشان يعرفوا يخترعوا لنا قرارات ويقلبونا براحتهم يبقى لازم السكرتارية بتاعتهم تكون من الجامعة الامريكية
الجامعات الحكومية مبقاش معترف بيها يبقى مسمعش حد يقول بطالة تانى
ومحدش يقول هى الفلوس اللى الدولة بتاخدها مننا بتروح فين
من ضرايب لالغاء الدعم لكل حاجه بتمص دمنا فيها
الوزراء دول بيتعبوا جدا ولازم يعيشوا فى بذخ وانتخه
وهتبطل تسال اكتر لما تعرف ان
البهوات بيصرفوا 8.4 مليار جنيه سنويا على التهانى والتعازى ومصاريف الضيافة وديكورات مكاتبهم
وبعد كل ده نقول احنا بلد فقيرة .. يبقا احنا اللى وش فقر

اذا كانت التهانى والتعازى بيتصرف عليها مليارات فما بالك باللى بيتحول على بنوك سويسرا
يبقى اى قرار جديد ننفذه من غير ما ننطق واللى السادة الوزراء يطلبوه مننا ندفعه واحنا ساكتين علشان الناس اللى بتتعب ومقطعه نفسها علشان تقلبنا دى تعيش كويس ... ويبقى عندهم بدل المكتب 4 و5 دول مش بيروحوا بيوتهم من التعب علشان كدا بيعملوا مكاتب بالزيادة وبيصرفوا عليها ديكورات بالمليارات
و سلامات يا شعب
الخبر اللى يحرق الدم ده
تبقى دى تفاصيله
تقرير: وزير له 4 مكاتب وآخر لديه 20 سكرتيرا من خريجي الجامعة الامريكية

Comments

osama said…
وكل من زعم الزعامة في البلاد .. يظن الخلود فيأمر ويستبد بعناد
وحاشيته يحنون له الاجساد..
يا معظم
اهدنا الى الرشاد...

فما اشقى مصر وما اشقى قاطنيها...

ولعل شر البلية ما يضحك فماذا اقول وما اكثر من قول قد قيل على راي الزعيم
هههههه اقصد عادل امام


دمت بكل ود
خالص تحياتي
ما هو كل سنة تقرير الجهاز المركزي للمحاسبات بيبقى مليان فضايح بس مين يحاسب
القضاء مش مستقل و مفيش قانون لمحاكمة الوزراء
كان المفروض القانون ده يصدر بعد صدور الدستور سنة 1971 و ما صدرش لغاية دلوقت فمفيش حد يقدر يحاكم الوزير
و مجلس الشعب أغلبيته مع الوطني بالتزوير و انضمام المستقلين و بعد ما الإخوان و المعارضة و المستقلين يتقطع قلبهم كلام
يحصل ايه يتم غلق باب المناقشة في الموضوع و الإنتقال لجدول الأعمال بأغلبية الوطني
يعني و لا كأن حاجة حصلت
مال سايب فعلاً
أنا فاكر السنة اللي فاتت كانت الحكومة مقدمة في الحساب الختامي تحت بند السهو و الخطأ 10 مليار جنيه
يعني نهب عيني عينك كده بكل بجاحة
ربنا ياخدهم
Heart Beat said…
ما هو طبعا لازم سيادة جناب معالي الوزير يبقى عنده 3 مكاتب و لا اكثر اومال يعني الفلوس اللي بتتاخد من الشعب دي يودوها فين

السادة الوزراء لازم يسكتوا على اللي بيحصل من سلب و نهب و تجاوزات في وزارتهم و ده يكون على طريقة اطعم الفم تستحي العين

فعشان العين ماتشوفش او تعمل نفسها مش شايفه حاجه لازم السيد الوزير يتلهي بأي حاجه و اهمها الفشخرة الكدابة

و كمان يضمنوا سكوت السيد الوزير و تعاونه الكامل في سبيل اي حاجه فيها مصلحة الناس اللي فوق
السلام عليكم ورحمة الله وبركاته


حسبنا الله ونعم الوكيل
alaa salim said…
السلام عليكم

مشكلتنا إننا شعب خانع ومستسلم
ودا طبع فينه منذ القدم
هو فيه في الدنيا حد وصل بيه الطغيان لدرجه إنه يقول أنا ربكم الأعظم غير فرعون مصر ؟

تحياتي ليكي ولمواضيعك القيمه دائماً.
لماضة said…
مهم دول اللى ركبوا القطر
واحنا اللى اداس علينا ولا مؤاخذه
انا خايفه عليكى يا قطتى والله
ربنا يجعل كلامك خفيف عليهم
الربان said…
تحياتي

ياستي هذا ما يسموه بترشيد الإنفاق الحكومي... الوزراء الله يجبر بخاطرهم شدوا الاحزمة و رشدوا الإنفاق...يعني كمان يقفلوا مكاتبهم و يعملوا من منازلهم... لابنا يكون في عونهم يارب...
و كفاية انهم مشردين بين المكاتب ...ياولداه.

نسيت اقول لك...ان الباشا الوزير له حراسة خاصة مشعططه وراه حيثما يروح..
و كمان نسيت اقولك ان الباشا الوزير
منفصل تماما عن مشاكل الجماهير و الناس
و ان الباشا الوزير مشغول دايما في اجتماعات و ندوات و مع الصحافة و التليفزيون لشرح خطته الحكيمة لادارة الجماهير اللئيمة...

نسيت اقولك ان معالي الوزراء كتبوا علي ابواب مكاتبهم " يا ناس يا شر كفاية قر " ...و أخرين كتبوا " العين صابتني و رب العرش نجاني "...

تحياتي
appy said…
انتى زعلانه ليه ما هو فى كل مكان لازم يكون له مكتب علشان الرعيه يا ستى افهمى بقى وبعدين اللى مش عجبه يعنى الوزارة يعمل وزارة مع نفسه ونبقى بقى بلد ديمقراطى اشمعنى يعنى عندنا 24 حزب يبقى عندنا 75مليون وزارة وانا هبقى رئيسة الوزرات دى كلها هههههههههههههه
طبعا لازم يكونوا من الجامعة ألأمريكية

هو احنhttp://gamal51.blogspot.com/

http://anameshm3ahom.blogspot.com/2007/12/blog-post_11.html

http://kalam3eal.blogspot.com/2007/12/blog-post.htmlا عندنا جامعات فى مصر لو عندنا كنا شغلناهم
Desert cat said…
osama
الخلود لله
بس ياريتهم يعرفوا كدا كويس
ويحاولوا يفكوا الغرة اللى لزقوا بيه فى الكرسى او يتقوا الله فى الناس على الاقل
دمت بود
Desert cat said…
مهندس مصري
10 مليار جنيه سهو ولاد الحرامية
امال مش بيسهوا عليا ليه فى الضرايب ومحاضر الاموال العامة اللى مش بعرف عنها حاجه غير وهما جايين يحصلوها
يعنى ياخدوا فلوسى يصرفوها ويقولا سهو
الهى ربنا ياخدهم واحنا ساهيين
تحياتى
Desert cat said…
Heart Beat
والله تحليل منطقى
هما يعملوا بدل المكتب 4 و 5 ويصرفوا مليارات على الديكورات والاعلانات والشعب ياكل الظلط
الا هو اصلا يعنى ايه شعب
هما الدولة كلها ربنا يزيدهم علشان يبقى حسابهم عسير
مودتى
Desert cat said…
خمسة فضفضة
عليكم السلام ورحمة الله وبركاته
وانا معاكى
حسبنا الله ونعم الوكيل
Desert cat said…
alaa salim
ما هى المشكلة يا علاء ان كله خايف على لقمة العيش اللى هما مش لاقيينها اصلا
انا مش عارفه خايفين على ايه تانى
حسبنا الله ونعم الوكيل
تحياتى
Desert cat said…
لماضة
ازيك يا دكتورة
واخبار التدريب ايه
احنا انتطحنا تحت القطر ولسه خرس مش قادرين نتكلم ولا نفتح بؤنا
ما تخافيش يا قمرى عمر الشقى
تحياتى
Desert cat said…
الربان
يا خر ابيض ده حضرتك وضحت لى نقط كتير جدا كانت رايحه عن بالى
اتاريهم بيعبوا جدا
ومن لف بين المكاتب لبرامج تلفزيون لصحف دول ليهم حق يعملوا اكتر من كدا علشان يبقى اسمه لامع وحلو ومتقمع كدا ويولع الشعب بكل فئاته
تحياتى يا فندم
وربنا يرحمنا منهم
Desert cat said…
appy
لاء انا مش زعلانه خالص ولا حاجه
انا مقهورة
وبعدين يا حبيبتى هما بيعملوا مكاتب ويكلفوها مليارات ديكورات وسكرتارية من الجامعة الامريكية لكن الشعب هيعمل مكاتب منين
ده الناس عمال تعيط علشان دعم رغيف العيش اللى مش لاقيينه اصلا
يبقا هيعملوا مكاتب منين
دمتى بود
Desert cat said…
appy
لاء انا مش زعلانه خالص ولا حاجه
انا مقهورة
وبعدين يا حبيبتى هما بيعملوا مكاتب ويكلفوها مليارات ديكورات وسكرتارية من الجامعة الامريكية لكن الشعب هيعمل مكاتب منين
ده الناس عمال تعيط علشان دعم رغيف العيش اللى مش لاقيينه اصلا
يبقا هيعملوا مكاتب منين
دمتى بود
Desert cat said…
الشريف / جمال طة
لا يا فندم احنا عندنا تعليم اصلا
علشان يكون عندنا جامعات
بتوع الجامعة الامريكية اهم
ده حتى اسمهم ينضرب له تعظيم سلام
حتى الواحد لو ركز فى الكلمة جامعة امريكية حيلاقى لها بريق
تحياتى
أنا لى رؤية من زاوية تانية ... أنا بصراحة مش عايز أبقى وزير إلا عشان طقم السكرتارية الجامد دة ... بلا بلد و مصالح الناس بلا بتاع .. سكرتيرة تشيل لى الشنطة .. و واحدة تفتح جهاز الكمبيوتر .. و واحدة تجيب لى القهوة .. و التانية تجيب لى الشاى .. و التاسعة ترد على التليفونات .. و الخامسة عشرة تشيل مفاتيح العربية .. و التلاتين تجيب لى مية أشرب

يااااه دة الوزير من دول بيبقى بن محظوظة
Desert cat said…
ابن حـجـر الـعـسـقـلانـى
عايز تروح تشتغل وزير يا محمد
طيب ومين يجمع الجمل اللى على التكاتك والميكروباصات
دى حتى احسن من شغل الوزير
ماهو أنا هاخلى السكرتيرة رقم ستين بعد الألف الخامسة هى اللى تجمع العبارات دى و تجيبهالى لغاية مكتبى التامن و سبعين

هو انا فاتح الوزارة دى ليه .. و كل السكرتيرات دول ليه ؟؟ مش عشان يشتغلوا بلقمة عيشهم ..و لو السكرتيرة بتاعة المايكروباصات دى ماشتغلتش كويس يبقى إهدار للمال العام .. و أنا وزير أعرف ربنا كويس .. و مستحيل أتسبب فى إهدار للمال العام
A long distance said…
كله بيسرق
كله بينهب
كل واحد بتهمه مصلحته
والناس الغلابه هي اللي بضيع في النص
وحسبي الله ونعم الوكيل
mrgkiller2020
مشمش said…
ياصديقتي الي يلاقي دلع وميدلعش يبقي حرام علية يعني تفتكري لو اي حد فينا جاتلة فرصة انة يبقي وزير هيقول لا لازم احس بالشعب ومش عايز سكرتارية ولا مكاتب بس نقول اية العيب فينا ولا فيهم ويارب النق دة ياثر فيهم ويولعوا هما ومكاتبهم قولي امين
Desert cat said…
ابن حـجـر الـعـسـقـلانـى
اه ما هم كل الوزراء بتوعنا بالنزاهه دى
بيحافظوا على المال العام
بيصرفوه على ديكورات المكاتب ومرتبات سكرتارية وبس
بس لما تبقى وزير مش تنسى اللومبو
Desert cat said…
A long distance
يا فندم ده بيسعى بكل جهده وقوته للحصول على كرسى الوزارة
يبقى غلابه مين اللى حيهتم بيهم والناس نايمين
تحياتى
Desert cat said…
مشمش
العيب فى اللى بيشوف المهزلة دى ويغمض عنيه
بس فى رب موجود
تحياتى
Soooo said…
ياقطه انتي مش واخده بالك من نقطة مهمه
اللي هي الوزرا دول عاملين كزا مكتب لنفسهم ليه اصلا؟؟؟
ولو هم فعلا شغالين وحارقين نفسهم في الشغل في كزا مكتب لخدمة مصر .. امال احنا متكحولين على عيننا وعين اللي خلفونا ليه؟؟؟
ولو فعلا شغالين .. هل طبيعة شغلهم مستاهله اكتر من مكتب بطقم سكرتاريه في كل مكتب ليه؟؟؟
وبعدين انا اصلا اصلا شغال بقالي سبع سنين مهندس ديكور ومع ذلك مش عارف اعمل لنفسي مكتب واحد

ليه بس كده ياقطه ترفعي ضغطي زياده ماهو مرفوع
حسبنا الله ونعم الوكيل



سلامووووووووز
Desert cat said…
Soooo
معلشى يا سوووو هون على نفسك يابشمهندس
هما وزرا واحنا لاء
هما بيتعبوا بيطلعوا كل يوم قرار علشان يقلبونا واحنا واجبنا نتقلب واحنا ساكتين وبس
يبقى هما اللى بيتعبوا اكتر منا يبقى لازم يكون عندهم مكاتب واحنا نسرق فى بعض ونموت بعض ونشتغل ليل نهار علشان نقدر نلاحق مصاريف على قرارتهم وبس
شوفت بقى انهم يستاهلوا كل المكاتب دى واكتر
زعلانه ليه لما تعرفى انى الانفاق الحكومى فى السنه 30 مليار جنيه على المكاتب والعربيات ومصاريف الاقلام والورق مش تستغربى انى الوزير ليه 4 مكاتب و20 من خريجى الجامعه الامريكيه
الى محدش خد باله جامعه امريكيه يعنى الكريزه بتاعت المجتمع يعنى بابى ومامى وتيته زالفاتحه على روح المرحوم عبدالحميد شتا
Desert cat said…
رئيس جمهوريه نفسى
انا يا جماعه عارفه ان بلدنا غنية
بس احنا اللى بندعى الفقر
والله حاجهه تخلى المجنون يعقل والعاقل يتجنن
الباشمهندس يقولى 10 مليار جنيه سهو وحضرتك تقولى 30 مليار ورق وحبر

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز