مين المسئول ؟؟؟

مين المسئول عن قتل الإنسان ده
ده شرطى بيأدى واجبه ... مع إننا مرفوضين ومتاهنين جوا وبره بس برضه بنحبها وفى ناس زى الشرطى ده وغيره كتيييييييير بتسهر على راحتها وحمايتها بس مش معنى اننا بنحبها وبنحميها يقوم نبتهدل فى الشوارع بسبب البطالة ولا الموظفين يترموا فى الشوارع اكتر من 10 ايام ستات ورجالة وكأنهم بيشحتوا مش بيطالبوا بحقوقهم
مين المسؤل عن كل المهازل اللى بتحصل دى
انهى ايدى خفية تعبث بمصائر العباد وتتحكم فى اكل عيشهم
مين المسؤل عن قتل الشرطى ده
وازاى شرطى واحد يقف على الحدود بين مصر واسرائيل
ازااااااااااااااااااااااااااااااااااى
بمنتهى السهولة قتلوه ودخلوا مصر ولا من شاف ولا من درى ليييييييييييه على اساس انهم داخلين حمام عمومى محدش حس بيهم يقتلوا ويدخلوا عادى جدا ....
ده بيان من رويترز
وقال مصدر لرويترز ان "الشرطي ويدعى محمد عبد المحسن الجندي-21 عاما- فوجيء اثناء نوبة حراسة له عند العلامة الدولية رقم 15 جنوبي معبر رفح على الحدود بين مصر واسرائيل بمجموعة من المهربين لا يقل عددهم عن اربعة قرب الاسلاك الشائكة التي تفصل بين مصر واسرائيل يرافقهم عدد من الافارقة يحاولون التسلل الى اسرائيل فتبادل معهم اطلاق النيران ولقي حتفه بعد اصابته بالرصاص."

............................................................

طبعا ده مش اول شاب يحصله كدا
والحوادث من النوع ده مكررة باستمرار
المثير للتساؤل هنا
ليه الحدود متكونش امان اكتر من كدا
ليه كل مرة شرطى بيتقتل والموضوع يروح طى النسيان
ما هو مات بقى وخلاص
هو بيحمى الحدود طيب فين اللى بيحميه .. هو مسؤل عن مصر ... طيب فين اللى مسؤل عنه
ده الجندى رقم كام لحد النهارده مات وبنفس الطريقة
يعنى هربانين من شبح البطالة ماتوا واتقال عليهم طماعين ... جايين يزوروا اهاليهم يا غرقانين يا محروقين واقفين يحرسوكى مقتلوين
طيب ولادك ينولوا رضاكى ازاى يا مصر

تفاصيل الخبر

Comments

اول تعليق
لسه طالع من موضوع العيد فوجئت بالموضوع ده
اولا اسمحيلى حضرتك زعلانه ومتضايقة ليه
الشرطى ده وغالبا هو مجند مش جندى عامل واقف يحرس بلده وهو عمل اللى مفروض يعمله واى واحد مكانه كان هيعمل كده واى عسكرى واقف حراسة معرض للاخطار دى
ودى مش مسئولية الحكومة ولا نحاسبها ولا نعاقبها
اللى قتلوه مهربين يعنى مجرمين
على عكس الحالات التانية اللى بتتكلمى عنها لما بيكون القاتل هو الجيش الاسرائيلى ساعتها ممكن نتكلم ونقول ايه قلة القيمة اللى احنا فيها دى قدام العالم
لكن الحالة دى مختلفه
ده اتقتل بايدى ناس بتهرب افارقه لاسرائيل ..زى العسكرى اللى بيموت وهوبيطارد حرامى او مجرم جوه البلد
ولا كنتى تحبى انه يتركهم يهربوا
اعتقد فى دى معندكيش حق
وده مش مرتزق لانه مش لاقى شغل ومش مفروض نقول على جنودنا كده بل العكس فى الغالب ده مجند هيؤدى فترة تجنيد وخلاص لكن نصيبه كده يموت شهيد وهو بيحمى حدودنا من المهربين
تحياتى وكل سنة وانتى طيبة
Desert cat said…
اهلا بيك فى موضوع العيد وفى الموضوع ده وفى كل المدونة
انا بس عايزه اوضح لك نقطة يا احمد
ده مش اول جندى يموت بنفس الطريقة
السنة اللى فاتت كنت كل شوية اشوف خبر قتل جندى على الحدود
يعنى الموضوع مكرر
يعنى المفروض يكون فى امان على ارواح الناس دى اكتر من كدا
مش اتقتل مش مهم عندنا غيره هيروح يوقف مكانه
ثانيا هما مش محتاجين يدخلوا البلد مهربين ده احنا بلدنا حنينة اوى وبتحب الناس اللى جاية من بره
لكن مش بتحبنا احنا علشان كدا لو عيل سورى يعنى من اى بلد تانية راح سفارته اشتكى مصرى بيجبوا المصرى يبهدلوه
انا قارنت بين الجندى ده وبين الناس اللى ذكرتها فى البوست لاننا مرفوضين الجندى مش متأمن فى مكانه
الشباب ضايع فى البلد حتى الموظفين بيشحتوا مرتباتهم
يبقى فاضل لنا ايه ؟؟؟؟؟؟؟؟؟

تحياتى
أقولك أنا محدش بيحمي العسكري ده ليه
لأن إتفاقية السلام المصرية الإسرائيلية بتمنعنا من وضع قوات حرس الحدود على الحدود و كل اللي مسموح بيه قوات الشرطة العادية اللي في أقسام الشرطة أما الحدود فبتتولاها قوات متعددة الجنسيات غير تابعة للأمم المتحدة و تعدادها 1100 جندي منهم 900 جندي أمريكي
لأن الحدود من رفح و حتى طابا و إمتداداً لشرم الشيخ هي شريحة "د" لا يجوز وضع قوات للجيش المصري فيها طبقاً للإتفاقية
Anonymous said…
بسس بسسس
انا مش جايه اعلق
انا بس جايه اسلم واعيد على سعاتك مع ان العيد خلص خلاص
انا أجزاخانجيه (رحاب)
لو لسه فاكره يعنى هى هى
عامله ايه يا بنوته
وايه اخبار الشغب على حسك كده؟؟
يارب تكونى بخير

سلام
رحاب
Desert cat said…
مهندس مصري
بصراحة معلومة اول مرة اعرفها
اشكرك جدا عليها
بس انا شايفة ان الاتفاقية دى ظالمة يعنى
اصل المفروض ان الناس دى يكون لها اى حقوق على الاقل
يكون وقوفه متأمن مش يبقى ملطشة
تحياتى
Desert cat said…
Anonymous
الدكتورة رحاب
اخبارك اييييييه
وحشانى يا بنتى
فينك من زمان
كل سنة وانتى طيبة يا جميل
وعيد سعيد عليكى ان شاء الله
و الله يا أخت هريرة .. العسكرى سواء كان على الحدود أو جوة البلد ... مرور و لا أمن مركزى ... و لا أى حاجة تانية ...بيبقى عسكرى مالوش تمن

الناس الكبيرة بتتعامل معاه كأنه عسكرى شطرنج ... أو أقل .. يعنى مالوش أى قيمة مطلقا غير قيمة السلاح الميرى اللى شايله دة لو كان شايل سلاح

و الله و مش العسكرى العادى هو اللى مالوش تمن بس... دة المواطن العادى كمان مالوش تمن

و ربنا يرحمنا برحمته
Desert cat said…
ابن حـجـر الـعـسـقـلانـى
تصدق انى بدأت أتلخبط بينك وبين الباحث عن الحقيقة
هو مين فيكو احمد ومين محمد

بص يا احمد
يمكن ردك هو محور كلامى
دلوقتى كلنا مبقلناش اى قيمة وكان سؤالى هو مين المسؤل عن اللى وصلنا له ده
الباشمهندس مصى كتير خيره قالى اتفاقية وطبعا معلومة جديده عليا بشكره كتير عليها
بس احنا حالنا كدا لا يسر عدو ولا حبيب بصراحة
طيب والحل
حنفضل كدا
انا ن نفسى مش عارفه
المفروض بقى بعد كدا كل واحد وهو خارج من بيته يسلم على اهله وكانه بيودعهم ما هو الواحد مش ضامن الظروف ايه
تحياتى
osama said…
يا قطة الصحراء

الاجابة بدون تردد النظام هو المسؤول ...
ذاك النظام المترهل الفاسد الذي لا يحمي الا نفسه ولا يهتم الا بتامين استمرارية امساكه بالسلطة والجلوس على الكرسي...
ولتذهب مصر للجحيم..وليحترق الناس... وليموت الجنود... ولنهادن الأعداء لكن ان يصرخ احد ان يقول احد لا هذا هو الممنوع... الاسلحة موجهه للداخل والهدنه للخارج....

ولك يا مصر السلامة...

لموضوعاتكم مذاق خاص وحرقه
دمت بكل ود...
خالص تحياتي
انا خلاص زهقت من الدنيا دى الى الناس و بالأخص المصريين بقت أخبار قتلهم و هتك عرضهم و فقرهم حاجة عادية كده و المصريين نفسهم عاملين ودن من طين و ودن من عجين

المهم كل سنة و انتى طيبة :)
Desert cat said…
osama
استاذ اسامة فساد النظام بسكوتنا
للاسف احنا متواطؤن مع اللى بيحصل
القطر اتحرق واتعاطفنا معاهم شوية وسكتنا
العبارة غرقت وعيطنا وصوتنا شوية مع اهالى الضحايا وفى الكأس فرحنا وهللنا ونسينا العبارة باللى فيها
الحوادث والكوارث بتحصل اخرنا ايه هنزل شوية
مش مهم ما هو احنا بننسى بسرعه
احنا لو فى بلد محترم كان الوضع اختلف لو طفل هو اللى اتقتل مش الالالالاف المصريين

استاذ اسامه تسعدنى جا تعليقاتك
خالص تحياتى
Desert cat said…
عاليا حليم
ولا تضايقى نفسك يا قلبى لان الوضع ده اصبح العادى
كل سنة وانتى بالف خير
رحمه الله ونحتسبه عند الله شهيدا

اما مين المسؤل
فدا سؤال اجابته تحتاج الى مجلدات

تحياتي
Desert cat said…
اسكندراني اوي
الله يرحمه ويرحمنا معاه
خالص تحياتى
Heart Beat said…
عزيزتي

هو المجند ده راح و مات و اندفن عشان من الغلابة اللي هما 99 % من الشعب يعني

لو كان قريب فلان بيه و لا علان باشا مستحيل كانوا هايحطوه هناك

دول كده جم قالوا له تعالى يا بني مصر امانة بين ايديك فرح و قال طبعا احمي بلدي و فضل واقف في موقعه ماتحركش و يوم مادافع عن مصر اتقتل

تيجي الحكومة بقى تعمل ايه ... تدي قرشيت لاهله على اساس انه مات و هو بيدافع عن وطنه و مع السلامة ده اذا طبعا فعلا القرشين وصلوا لاهل المجند قبل ما يسرقهم حد تاني يعني

الغلابة هما اللي بيموتوا سواء في العبارات او المراكب او مترو الانفاق او القطارات

للاسف لما بتحصل حوادث زي كده تلاقي الناس بتقول منه لله اللي كان السبب حسبي الله و نعم الوكيل ... طيب كويس لكن و بعدين هانفضل كده ندعي على اللي كان السبب

ده احنا حنى مشهورين بالمثل الشهير اللي بنقول فيه ... اسعى يا عبد و انا اسعى معاك

يعني لو عايزين حاجه تحصل او تغيير او اي كان تسميته لان التغيير مش بس بتغيير افراد و نجيب بدالهم حد تاني بنفس المواصفات مع اختلاف الاسماء

المهم لو احنا بجد عايزين الحال يتعدل يبقى لازم احنا اللي نتكلم بصوت عالي و بجد لان خلاص المركب بتغرق و لان الغلابة هما اللي في قاع المركب يبقى هم اللي هايروحوا فيها الاول

افتكرت اغنية محمد نوح كان بيقول فيها

شدي حيلك يا بلد
alaa salim said…
السلام عليكم

أولاً كل سنه وانتي طيبه وعيد سعيد.

بالنسبه لموضوع البوست فهو فعلاً شيئ محزن.
للأسف دا إمتداد للتدني والسقوط اللي في البلد .
السلام عليكم ورحمة الله وبركاته

الله يرحمه.......

ويرحمنا!!!!!!

آمين .
oceaneyes said…
انتى سألتى سؤال مهم اوى

مين المسئول؟؟؟

السؤال ده بجد لو فضلتى من هنا للسنة الجاية مش هاتعرفى اجابته ..لان ببساطة مافيش حد هايعترف بمسئوليته عن اللى حصل ..

بس انا شايفة ان الجندى ده مات فى سبيل الدفاع عن بلده وتأدية وظيفته اللى بيتدرب عشانها

يعنى لو كان سمح لهم انهم يمروا ..كانت اكيد الدنيا هاتتقلب علينا ..ما انتى عارفة ..ما بيصدقوا يمسكوا علينا حاجة عشان يعرفوا يوصلولنا


........


اما المهازل التانية اللى بنسمع عنها واللى بتخلى رقبتنا قد السمسمة ..(ده لو وصلت للسمسمة دى ) فدى بقا اللى بجد لازم الكل يتحاسب عليها ...بس الحساب واضح انه مش هايكون فى الدنيا


فى الاخرة ان شاء الله


والصبر حلو برده


تحياتى

:)
romeo said…
عزيزتى قطة الصحراء
اولا بتهنئتك بالعيد وتمنياتى بدوام الصحة والسعادة
ثانيا الاستئذان فى ان ابدى اعجابى الشديد بكتاباتك
وبأسلوبك الممتع فى الكتابة
وثالثا السماح لى بان اكون زائر نهم ومتابع شديد لكتاباتك المميزة
رابعا
انى اعبر عن أسفى على كل شىء
ليس فقط عن تلك الحادثة البشعة لمهربين المخدرات السفلة
وحزنى على الشهيد البرىء
ولكن أسفى على كل الاوضاع الفوضوية
الموجودة فى بلدنا
كان الله فى عوننا وخلصنا من القلق والمشاكل مع انها امنية وردية
لكن لو بطلنا نحلم نموت
تمنياتى بدوام الابداع
وارجو قبول دعوتى المتواضعة لشخصكم الكريم بزيارة مدونتى البسيطة
تحياتى
romeo
المسئول كتير اتفاقيه سلام بتحدد عدد الى يقفو على حدودنا وتحدد كمان حجات كتير
بس اسالى مين الى ليه الهدف فى دخول ناس كتير من يهود اثيوبيا علان يكترو عدد فى الليمون على ارض فلسطين
ده على الاقل مات شهيد بيادى الواجب الدور والباقى على الى مات مجرد رهان بين اتنين يهود الى يقدر يصيبو بالنار والحكومه البهيه قصدى المصريه لا حياه لمن تنادى
حضرتك لو قارنتى بين مصير الجندى / العسكرى / الممصرى الغلبان و بين مصير الجندى الاسرائييلى اللى اسمه شاليط؟...........

هتوصلك كل الاجابات واضحة و صريحة ومؤلمة

هوا د الفرق و من هنا تلاقى كل الاسباب اللى خلتك كتبتى البوست


عسكرى مصرى سابقاً/ اخيك عمر،
هى دى فيها سؤال مين المسؤل
ماهو واضح وضوح الشمس
لما اكتر من عشرين بنى ادم قاعدين فى الشارع يطالبوا بحقوقهم المهدورة
ويكون الرد عليهم هو الطناااااش
لما جنود تتقتل على الحدود وهى بتادى واجبها يكون الرد هو الطناااااااااش
لما عبارة تغرق والناس تموت غرقانة او محروقة او اسماك القرش واكلاها
وبعد مابعبعنا شوية وبكينا بدل الدموع دم على موتانا ويكون الرد هو الطنااااااااش
لما ولما ولما
هيكون مين يعنى المسؤول عن كل ده غير محمد
محمد مين معرفش
بس اكيد فيه واحد اسمه محمد مسؤول عن اى حاجة من الحاجات اللى بتحصل دى

تحياتى ياقطقوطة
اختك خيخة
Desert cat said…
Heart Beat
حبيبتى المشكلة فينا احنا
احنا اللى الخوف والجبن ملوا قلوبنا كل واحد يقولك انا ورايا عيال عايز اربيها اشمعنا انا اللى هتكلم انا امشى جنب الحيط
لما الناس اصبحت بتمشى جوا الحيط زى الحشرات
عموما
احنا اللى راضيين بالمهانة دى وساكتين الجندى ده واللى قبله واللى هيجوا بعده مسؤليتنا كلنا
دمتى بكل ود
Desert cat said…
alaa salim
وانت طيب يا علاء
للاسف مسلسل التدنى والسقوط اللى بدأ مش عارفين نهايتة ايه بس فى النهاية الغلابة هما الضحية
لنا الله
تحياتى
Desert cat said…
خمسة فضفضة
اللهم أمين
عليكم السلام ورحمة الله وبركاته
Desert cat said…
oceaneyes
انا شايفة ان حياتنا فى البلد دى بقت عبارة عن مجموعة اسئلة مش لاقيه اجابة
اجابتها عند واحد بس وللاسف مش فاضى لنا اصل كل همه الكرسى وتأمين مستقبل العائله
تحياتى
Desert cat said…
romeo
اولا كل سنة وانت طيب
ثانيا انت تنور المدونة فى اى وقت
بالنسبة للمهازل اللى بتحصل لنا
" ان الله لا يغير ما بقوم حتى يغيروا ما بانفسهم "
يعنى احنا محتاجين تغيير من جوانا
علشان نقدر نغير الاوضاع المهينة اللى احنا فيها
وعلشان الحلم الوردى يبقى حقيقة
ونبقى عايشين فى بلد المواطن ليها ليه احترامه ويعامل معاملة آدمية
دمت بود
Desert cat said…
رئيس جمهوريه نفسى
اتفاقية سلام ولا اتفاقية دمار
نحتسبه عند الله شهيد
وربنا يتولى الباقى
تحياتى
Desert cat said…
Omar... خروشات
انا مرة معت نكته بين عسكرى اسرائيلى وعسكرى مصرى بس بصراحة مش فاكراها بالظبط
لكن هى كانت وصف لواقع اكتر منا نكته
وكويس اوى انك كنت سابقا
حمد الله على سلامتك
دمت بود
Desert cat said…
بت خيخة وأى كلام
تعرفى احنا شعب عاطفى اوى
اول لما مصيبة تحصل وهم كثروا
تلاقينا عمال نولول واول ما يتعمل مهرجان ولا الاهلى يكسب تلاقينا بنجرى فى الشوارع بنرقص ونهيص وكأن مفيش حاجه حصلت
شعب تفرقه العصا ويجمعه ناى
طبعا ده مينفيش مسؤلية محمد
دمتى بود
لو حضرتك نسيتى النكتة بين العسكرى المصرى و الاسرائيلى ؟ انا يسعدنى افكرك بيها وهى:


................................
مرة عسكرى مصري وعسكرى اسرائيلي دار بينهم هذا الحوار

الاسرائيلي: الا قوللي يا مصرى انتم بتاكلوا ايه ع الفطار؟؟

المصري: فول بالزيت.

الاسرائيلي: طب بتاكلوا ايه ع الغدا؟؟؟

المصري: فول بالطماطم.

الاسرائيلي: أمال بتاكلوا ايه بقى ع العشا؟؟

المصري: فول بالبيض.

الاسرائيلي (بتريقة): أمال ايه الفرق بينكم وبين والبهايم؟؟


المصري قالوه: سيناء
....................

عرفتى حضرتك الان فايدة سيناء جغرافيا؟؟

وصلت؟

تحياتى عمر،
ايوية said…
لية الجنة ان شاء الله
بس اعتقد ان المفروض تعزيز الحراسة على الحدود اكتر من كدة
Desert cat said…
Omar... خروشات
بالظبط هى دى
بس انا كان قصدى من النكته مش سينا انا كان قصدى البهايم
مع احترامى
يعنى المفروض الناس دى تكون بتتعامل احسن معاملة
ويكون ليهم الافضلية فى كل شئ
لكن للاسف
السيد المسؤل مش بيهتماو باللى بيقوموا بواجبهم فى البلد بيهتم بالحرامية الكبار اللى بياخدوا فلوس الغلابة وبيهربوا بيها بره البلد
خالص تحياتى
Desert cat said…
ايوية
ان شاء الله
احنا كلنا بنتقول المفروض
بس تفتكرى يا ايوية ده راى السادة المسؤلين
تقريبا لاء
اصل لو كان رايهم كانوا عززوا الحراسة مع اول جندى اتقتل
تحياتى
يابنتى بطلى كلام فى السياسة شوية هعيعتقلوكى وتجرجرينا وراكى تعلمى الطبخ احسن وحشتينى جدااااااااااا
Desert cat said…
كلاكيت تانى وتانى
مش قادرة ابطل كلام فى السياسة اعمل ايه بس
وبعدين انتى اية تسيحى لى هنا وتقولى اتعلم الطبخ
مش اتفقنا انك هتدينى كورسات
اوعى تكونى رجعتى فى كلامك
المهم حمد اله على سلامتك
وحشانى جدا
كل سنة وانتى طيبة
shreen said…
لم يكون الاول
ولن يكون الاخير

ما دامت اسرائيل قابعه على حدودنا
كالكابوس
كالسرطان

سيكون هناك تهريب
وموت
ورصاص

سواء على ايدى جنود من الجيش الاسرائيلى
او مهربين

او
او

لا مفر ولا مهرب
الا بانتهاء وجود الكيان الصهيونى على حدودنا
بصى انا بعتبر ان ولادنا الى بتستشهد على حدودنا مع العدو
بعتبر ان استشهدهم دة وكأنه رسالة من ربنا
بيخاطب بيها ضمير كل واحد مصرى بيحب بلده
وبيقوله فيها يابان ادم اصحى وفوق بسبب غلطة فى الماضى عيالكم بتموت
بابن ادم اصحى فوق
صحح الغلطة قبل البلد متموت

انتى عارفة اسرائيل عملت الاتفاقية ليه

اقولك
ليه اولا عشان حاجتين مهمين جدا
اولهم ان مصر ليها موقع استراتيجى فى المنطقة فظيع وفوق الفظاعة كمان
وطبعا محدش حيبس على حدودها المشتركة معاها
يعنى لو حد دخل محدش حيحس
تانى حاجه
لان اسرائيل طبعا عايزة تتوسع
وتكبر وتاخد فلسطين كلها
وعشان تعمل كدة
وتقنع الالعالمك ان دة حقها وان دة امر حتمى ولا بد
وعشان تعمل كدة يبقى لازم تعداد سكانها يزيد
وعشان يزيد لازم ناس كتيرة تدخلها
ومن ةكل حتى
اشتعجال بقى
عايزين يخلصه بسرعه
ولما جتلهم الاتفاقية مصدقه
وعمله الشرط الى عمونا الباش بهندس قال عليه
ودة طبعا
عشان يسهلهم
الامور
لان تقريبا محدش بيحرس الحدود
هو يدوبك واحد او اتنين
يعنى تخيلى
ان تمن ت>>كرة الحدود
60 قرش
تمن رصاصتين
عجبى
Desert cat said…
shreen
طيب يا شيرى الكيان الصهيونى حينتهى ازاى
ده انتى لو نزلتى شرم او دهب او سيناء عموما هتلاقيهم هناك اكتر من المصريين
ده احنا بندهم بالغاز دلوقتى يعنى بقوا اشقائنا خلاص
فلما يقتلوا لهم كام واحد مش مهم اشقاء وبيلعبوا مع بعض بقى
والله ما احنا عارفني نهاية المهزلة دى ايه
تحياتى
Desert cat said…
زعيم كمورا مورا
محدش حيفوق ولا اى حاجه العسكرى مات بس من قبله ماتت كرامتنا
تحياتى
Mohamed_sobhy84 said…
بصراحه حرس الحدود بيتعب جدا
و اعرف ناس اللي قريبين من الحدود مبيناموش
انفاق تكتشف و حدود واسعه
دول شهداء بإذن الله و ربنا يغفر ليهم
العراف said…
انا احيكى يا قطه الصحراء على الشجاعه والصراحه دى بس ده شغلهم وكل شغل وليه اخطاره ومميزاته والمهم فى ده كله الحكومه الباسله بتاعتنا ويا سلام على الحريه والديمقراطيه البلد كلها بتشتغل بعضها ومحتاجه لحد يغسلها باجدع مسحوق
انا اول مره ازور مدونتك وهى جميله بجد وانتى بتكتبى باحساس عالى وده اهم شئ ان الواحد يعرف يعبر عن احساسه
واتمنى انك تزورى مدونتى
ويا رب تعجبك
A long distance said…
الله يرحمه
حرام اللي بيحصل ده
كل سنه بتحصل نفس المشكله
يا اما بننضرب من الاسارئليين
يا اما من المهربين
mrgkiller2020
amro said…
صباح الخير
قطة الصحراء
النظام هو المسئول طبعا
وعلى فكرة اتفاقية كامب ديفيد فيها بنود تعيق عملية انتشار الجيش المصرى فى سينا كلها، وبتحدد كمان عدد الافراد فى الدوريات،
هو مين اللى انتصر فى اكتوبر؟
تحياتى
Desert cat said…
Mohamed_sobhy84
اللهم امين
ربنا يغفر لهم جميعا
مش هما لوحدهم اللى بيتعبوا يا فندم
اى واحد فى البلد مالوش ضهر بيتعب
لهم اللهم
نتحسبهم شهداء
تحياتى
Desert cat said…
العراف
انا متفقه معاك ان كل شغل ليه مخاطره
لكن مش مخاطر مقصودة
يا فندم الجندى ده اتقتل والمهربين دخلوا البلد عادى جدا
ما هو كان العقبة الوحيدة اللى فى طريقهم
تحياتى
Desert cat said…
صالح سعيد
اشكرك جدا
يشرفنى زيارة مدونتك
تحياتى
Desert cat said…
A long distance
احنا كلنا عارفين انه حرام ومينفعش وميصحش بس للاسف مغمضين عنينا
Desert cat said…
amro
انا قرات الاتفاقية يا عمرو مؤخرا للاسف
ومن وقتها حسيت ان هما اللى انتصورا فى اكتوبر مش احنا
تحياتى
fanan fa2eer said…
ياستي وهما من امتي بيخافوا علي روح الانسان في مصر

ده الانسان عندنا مافيش أرخص منه

وهو اشمعنا ع الحدود اللي هيحافظوا فيه علي حياة البشر

ما الناس بتموت جوا البلد كل يوم من الفقر والاهمال

ربنا يلطف
Desert cat said…
fanan fa2eer
انا متفقة معاكى جدا اننا ارخص حاجه فى البلد جوا وبره
طيب مش ياخدوا بالهم شوية من الحدود
ولا على ايه ما هم رايحين جايين براحتهم فى البلد
على راى عمرو مين اللى انتصر فى اكتوبر
تحياتى
أنا المسئـــــــــــــــول
Desert cat said…
الشريف / جمال طة
والله يا فندم لو حضرتك اللى مسؤل يبقى على الاقل ضمنا بلد نضيفة
تحياتى

Popular posts from this blog

قميص دهشور

كل تحرش وانتوا طيبين