حديــــــث الســـــاعه

هو فى غيره الاسعار غالية والدنيا نار .. لاء الجو النهارده برد جداً
وفى عز الجو البرد ده .. ماما جت تصحينى الفجر ما هى الساعه 8 بالنسبة لى الفجر لانى مش بشوفها خالص فى الايام العادية ...
اصلى لازم اتكرم واتعطف واروح الزقازيق اخلص لها اوراق من هناك .. وشوية حنية ودلع منها على شوية رخامة منى ... المهم انتهت المداولات على انى صحيت غصبا واقتدارا علشان اروح اعمل لها اللى هيا عايزاه ... وقد كان
وصلت الموقف وكان ناقص شخص واحد بس الزقازيق ... والشخص ده كان انا على طول كدا بحل أزمات المفروض العالم كله يشكرنى .. قعدت فى الكرسى اللى فى النص ... اللى قدامى فيه جنب الشباك شاب فى اواخر العشرينات تقريبا وفى النص راجل تقريبا برضه فى الاربعينات لابس لبس ظابط فى الجيش اكيد دى شغلته يعنى وجنبه واحده ست عسولة شوية بس مش بطلت رغى من اول ماركبت .. فى الكرسى اللى وراهم كان انا جنبى واحد شكله مخبر لاء هو اكيد مخبر علشان عامل شنب كبير اوى ورجلية متبدلة مكان ايديه باين وكل حاجه فيه كبيرة ... جنبه واحد مش جبته اوى يعنى .. ورانا مش عارفه
بس انا سامعه الناس اللى بتتكلم ورا دى عامله ازعاج شديد وصوتهم عالى وفيهم واحد زى ميكون بيخطب الجمعه ده كله وانا حاسه انى نايمة اصلا ... المهم جه شوية برد من الشباك اللى جنبى فوقونى والاقى كل الميكروباص بيتكلم عن الاسعار الغالية الست اللى قدامى قاعده تقول للظابط انا سمعت إن أنبوبة البوتاجاز حتبقى بـ 30 جنيه رد عليها الظابط قالها بـ 45 جنيه - الراجل اللى بيخطب الجمعه اللى ورايا رد قال كله بايدينا احنا الشعب احنا اللى ساكتين ومطاطيين ليهم حق يعملوا اكتر من كدا الولد اللى جنبه قاله وإحنا هنعمل إيه .. الراجل رد اسمع من واحد عاصر كل الحروب وواصل كلامه قبل الحرب لما الأسعار غليت الشعب كله قال لاء كلنا اتحدنا وقولنا كلمة واحده فى وقت واحد والاسعار رجعت تانى مش زادت ولا ميلم .. الولد قاله واحنا نقول لاء لمين ... الراجل قاله انت بتوضح لى انك مفلس فكريا ولو كل الشباب زيك كدا يبقا عليه العوض .. انت بتشتغل ايه يابنى .. الولد قاله انا طالب .. الراجل قاله يبقا تخليك فى كتبك ودراستك وتسكت ... والولد موصر برضه هنروح نقول لاء لمين ... البعيد عنده غباء الخرفان ... اللهم طولك يا روح خلينى ساكته احسن .. وكل لما الواد يتكلم يعصبنى لانه بصراحة بيسال اسئله ميسالهاش عيل عنده شهرين .... الست والراجل اللى قدامى لسه بيتكلموا على الغلاء برضه ... والظابط يقولها كيلو العدس بقا بـ 6 جنيه وهى تقولوا بياكلوكوا ايه فى الجيش دلوقتى يقولها فوووووول ... والمخبر اللى جنبى يقوله اسكت يا سامح باشا مش تتكلم ... والست تبص له باذدراء ... شوية والولد الغبى اللى ورايا بيسال الراجل لما البلد مفيهاش فلوس امال الموظفين اللى فى الحكومة دول كلهم بيقبضوا مرتباتهم منين ... مش قدرت امسك نفسى المرة دى والتفت له ... بيقبضوا من جيبك وجيبى وجيب الحاج اللى جنبك ... قالى ازاى يعنى .. قولت له مش بتدفع ضرايب ومش بتدفع تامينات ومش كل يومين يخترعوا لك مصاريف شوية رسوم نظافه وشوية مصاريف مش عارفه ايه ... لاقيت الراجل بيقوله اهى الاستاذه قالت لك اهيه ... .. وفضل يجى 10 دقايق يقول الله ينور عليكى يا استاذه كانى عبرت القناة ... لاقيت المخبر اللى جنبى اللى كان بيسكت سامح باشا بيبص لى اوى قولت له بص انا ماليش دعوة انا سكت اهوه .. ضحك وقالى انتى تتكلمى براحتك .... بعدها واصل الراجل اللى ورايا مصر مليانه خير دى بتتسرق من سبعتلاف سنة بس رجاله الحكومة سرقوا البلد وهربوا .. واللى جايين جديد عايزين يسرقوا يعملوا ايه ... يرفعوا سعر الدولار وبعده اسعار السلع ... وفجأة سمعت صوت من ورا خالص بيقوله طيب ده بالنسبة للاسعار وقولنا بايدينا واحنا اللى راضيين كرامتنا تتهان وبيسرقونا بمزاجنا والمفروض نكون ايد واحده الراجل قاله انا مش بحرض اعملوا اللى انتوا عايزينه .. رد نفس الشخص اللى قاعد فى الكرسى الاخير ولما الحكومة تمنع اقامة صلاة العيد فى الخلاء يبقا ده ذنب مين ... ويعتقلونا ويعتقلوا أى حد لا ليه صلة بالموضوع لا من قريب ولا من بعيد .. ابص على المتكلم والاقيه واحد عامل دقن 3 متر ولابس طاقيه بيضا رد عليه الراجل المتحدث الرسمى وانا قاعدة اسكت يا لسانى لا ما اسكتش وبدن ما اشعر لاقيت نفسى بقوله ولما تضربوا المأمور ورئيس المباحث وتولعوا فى عربية البوكس وكل اللى ايدكوا تطوله من الشرطة .. ده هو اللى اسمه عدل ... قالى هو انا وجهت لك كلام .. وبعدين انتى ايه عرفك .. قولت له مش معنى ان الاحداث حصلت فى الصالحية وانا فى فاقوس ابقا مش عارفه بس للاسف انا متابعه الاحداث كلها وبعدين لما تتكلم تقول اللى ليك واللى عليك مش تقول نص الكلام وتنكر النص التانى والمخبر اللى جنبى عمال يقولى ما تخافيش من حاجه اتكلمى براحتك خالص .. قولت والله شكلك حتودينى فى داهيه .. ما علينا لاقيت الراجل اللى بيتكلم ورا بيقولى طيب لما تحبى تتكلمى مش تستخبى ورا نضارة ... قولت له هى دى حجتك يعنى ولا مش لاقى رد ترده عليا ... ثم ايه علاقة النضارة باللى بنتكلم فيه .. قالى لاء اصل الحجة القوية بتبان من تعبيرات وجه الانسان وانتى كدا بتثبتى انك على باطل ... هو الراجل ده اهبل ولا ايه .. رد عليه الظابط اللى قدامى وقاله طيب انت كدا تفرعت من الموضوع الاصلى الاستاذه بتتكلم فيه للنضارة اللى هى لابساها يبقا مين هنا اللى حجته قوية او ضعيفه ... هى كلامها صح .. لاقيته ساب الراجل وبيقولى انتى استفزازية انتى لو مش بنت انا كان بقالى رد عنيف معاكى ... قولت له ده العادى انتوا اصلا مش بتفرقوا بين بنت وولد ما هو معروف انكو ارهابيين .... وقتها رد عليا رد مش كويس بصراحة بس انا مش زعلت منه لانه اثبت لى مدى جهله وقلة زوقه وانه انسان منساق ومن بتوع سمعا وطاعه يعنى لا ليه راى ولا عمره هيكون له راى ... بس مين ده المخبر اللى جنبى رد عليه رد قاسى جدا .. ده غير الظابط قاله انت قليل الادب ولو مش احترمت نفسك انا ممكن اذيك .. والشاب اللى جنبه ولاول مرة من اول ما الميكروباص اتحرك ينطق وقاله انا ساكت من الصبح اللى شايفه ان الانسة مش غلطت وانت زى ما قال سامح باشا قليل الادب ... وممكن يبقا لنا تصرف تانى معاك .. لاقيت الست اللى قدامى بتضحك لى وبتقولى شوفتى الكل خايف عليكى ازاى .. هو انتى عندك كام سنة يا قمر .. قولت لها ليه فى حاجه ... قالت لاء بنتعرف ... امممممممممم 27 يا طنط .. قالت لى من فاقوس ... قولت لها آه.. رد الظابط قالى بس انت شكلك مش يدى فاقوس يعنى انتى كنتى ضيفه هناك مثلا ... قولت له والله منها لو تحب اطلع لك البطاقة عادى يعنى .. لاقيت الشاب اللى جنبه بيقولى وانا من مشتول ... أوكى وانا مالى يعنى ضحك وقالى عادى مفيش حاجه ... المخبر اللى جنبى حسيت انه بيبص قولت له فى حاجه ... قالى لالالالا اتكلمى وخدى راحتك خالص متخافيش من اى حاجه .. والله كل لما تقول كدا اعصابى تبوظ شكلك فى الاخر عاملى مفاجاة فى الموقف وداخله امن دولة ان شاء الله .. قالى الميكروباص كله ان شاء الله .. وصلنا بالسلامة وانا نزلت وجريت شاورت لاول تاكسى مش خوفت من امن الدولة بس خوفت من الراجل اللى كان بتاع صلاة العيد ده ... خلصت مشوارى فى ساعتين قولوا 3 .. وعدت ادراجى ... ركبت الميكروباص وكل واحد قاعدف ى حاله شوية و عينك ما تشوف الا النور الاسعار بتغلى وكله فتح فى النواح ... قولت وانا عليا بايه من ده انا عارفه انا لو اتكلمت هعمل مشاكل بس لازم اشغل نفسى فى حاجه .. افتكرت ان شنطتى فيها شكولاته قعدت اكل فيها واحسس نفسى انى مش فى وسط الناس اللى عمال تعيد وتزيد فى الاسعار دى لحد ماوصلت الحمد لله من غير اى اصابات ....

تعليقات

حمد الله على السلامة يا ستي

تعرفي الراجل المخبر اللي جنبك كل ما يقولك لا عادي تكلمي براحتك اقول اسكتي ده شكله ح يوديكي في داهية
للاسف الحال زي هنا زي عندكم كله زيادة في الاسعار وقرارات تتعمل وتتلغى تاني يوم والمواطن لاحول ولاقوة الا بالله
جاتهم القرف

بوست من الحوارات اليومية اللي بنسمعها وبتتردد كتير

سلاموووز
بصي انا باحييكي على موقفك وعدم السلبيه والتعبير عن الرأي وعدم الخوف
لكن انا شايف ان انتي اتجاهك العام انك متخذه موقف من اي حد مطلق لحيته او بيلبس جلباب قصير
حاسس ان الموقف عدائي اكتر من اللازم
انا معاكي ان فيه كتير من النماذج اللي بتتخفى ورا الدين لمكاسب شخصيه او بعدم فهم او تطرف لكن دول برضه مش لازم يخلونا نعمم الانطباع علشان ده فيه ظلم لناس كتير جدا من العلماء فعلاوناس قدوه ومثل يحتذى لكتير مننا
ولا الشرقيه هي اللي مليانه ناس خارجهم غير باطنهم
اصل ابويا عايز يستقر هناك وانا عمال اقوله لا
تحياتي
‏قال stranger
ازيك ياقمر
اول كومنت اول مرة اعملها في حياتي
حكايه الاسعار دي بسمعها 3 مرة في اليوم زي الانتي بيوتيك
وحكاية المخبريين مرة وانا ماشية خبطت واحد اتكعبل وقع منه لاسلكي
شكله كان وحش اوي
عموما شكلها كانت رحلة لذيذة اوي مترحهاش تاني هههههههههههههه
خلي طنط تخلص الورق هيا اءمن
تحياتي
و الله تدوينة رائعة .. الله ينور عليكى

بالفعل فيه حاجة غريبة .. غالبية الناس فاهمة مشكلات البلد .. و عارفة إن الحل بإيديهم .. لكن فى نفس الوقت ما بيتحركوش .. يمكن هى دى شخصية "المصرى" ؟؟ .. دايما محتاج حد يحركه ؟؟


لكن أنا بصراحة مع الراجل أبو دقن تلاتة متر فى إنك المفروض ما كنتيش تلبسى نضارة .. المفروض هو اللى كان يلبسها بس مش على عنيه .. لأ .. على عقله.. يمكن كانت تحسن له بصيرته شوية

بس ما قلتيليش ... هانقول "لأ" لمين ؟؟
مش حتسكتي و تبطلي مناكفة في الملتحين غير لما تقابلي واحد إرهابي بجد
بس الراجل ده غلس و حجته ضعيفة و ما بيعرفش يتكلم
ربنا يكرمك يا قطة بعيد عن رخامة الناس الوحشين و ما ترخميش على مامتك ياما :)
‏قال Unknown
موقف غريب ومش غريب
بس بصراحة انا بحييكى على إسلوبك الساخر الجميل
وياستى لو عاوزة تتكلمى إتكلمى براحتك
(إشمعنى المخبر)
وبعدين بينى وبينك فعلا العملية زادت عن حدها ومش هتكلم فى الحكاية دى كتير
(كفاية أوى إللى سمعتيه فى المكروباص)
إمبارح واحد صاحبى كان بيكلمنى فى موضوع إننا بقينا مش بنستخدم فى الحياة إلا جسمنا وبنهمل تماما روحنامع إن كل إنسان فينا ممكن يستخدم الطاقة الروحية إللى جواه
أنا رديت عليه برد بسيط جدا وهو إن الحياه أصبحت أكتر مدنية بص حواليك هتلاقى كل الاشياء إللى بتقتل روحك من جوا
خدى عندك بقى غلاء ووسايط وبطالة ومشاكل إجتماعية وسياسية وإقتصادية وغيرها وغيرها
(أصل أنا لسا متخانق مع أبويا ومخنوق)
كل ده ويقوللى نستخدم روحنا
(روح إيه يا أبو روح؟)
بس كفاية كده عشان طولت عليكى
وأنا سعيد إن أول مشاركة تبقى فى الموضوع ده
(ألحق أمشى بسرعة قبل بتاع صلاة العيد ماييجى)


محمد شعبان
يا ستي اقلعي النظاره وريحيه
عالم دماغها فاضيه
معلش المره الجايه ما تتكلميش مع حد خااااالص دا احسنلك
عشان وجع القلب والصداع
و الله احنا شعب زي العسل
بس غريب اجتماع كل افراد المجتمع في باص واحد
يعني الظابط و المخبر بيمثلوا السلطة وفي المثقف و الي صوتة عالى و الطلبة و المتدين المتشدد
كان فاضل سواق الميكوباص يقوم بدور الريس و ساعتها مكنتوش حتوصلوا سلام

تحياتي
‏قال غير معرف…
الشقيه قطه الصحراء

بس ضحكني موت لما قالك حجتك باطله عشان النضاره لووووووووووووول
مالاقوش في الورد عيب قالوله يااحمر الخدين غريبه و الله الناس دي و مال النضاره و مال كلامك بس
و الله يابنتي احسن حاجه الواحد يسكت عشان فعلا مايدخلش نفسه في مشاكل الناس دي غاويه كلام و بس لكن فعلا مفيش يبقي بلاش وجع قلب معاهم
المهم رجعتي بالسلامه ياجميل و دي اهم حاجه عندنا و كويس ان كان معاكي شوكولاتايه تتسلي فيها افيد و الله
تحياتي ليكي ياقمرايه
‏قال ملك الكبدة
برضه اول تعليق

طبعا انتي كنتي لسة نايمة و انتي راكبة الميكروباص الغريب ده
لعدة دلائل

1 - وجود ضابط جيش
2-ظهور كلمة مفلس فكريا على لسان أحد الركاب

3 - المخبر الطيوب اللي كان سايب الناس تقول اللي هية عايزاه لا و ايه عارف مكان ناس منهم " فاقوس " "مشتول " و احد هؤلاء الناس "قطة الصحراء "حي يرزق لحد دلوقتي لا و كمان بيدون باللي حصل

الميكروباص ده هو مصر

و اللي مالوش مكان في الميكروباص
مالوش مكان في مصر

تحياتي
‏قال mohammed elzayat
قطة الصحراء
يشرفنى ان دى اول مرة امر فيها على مدونتك واكون اول تعليق على الموضوع الجميل دا وما يوضحة من معاناه الناس من قلة المال وغلاء الاسعار وقلة الفكر وزيادة الجهل وعلى العموم جميل قوى انى لاقيت حد بلدياتى شرقاوى مغرق الناس بكمة وتدوينة ونتقابل فى تعليق اخر
كل ده علشان مشوار واحد
طب اخدتي من والدتك كام
انا لو منك مش اقل من 20 جنيه
او 90 جنيه

بس كويس انك ما نختيش في وسط الكلام
والارهابي ده انتي قولتليه في وشه انك ارهابي
يا خبر ابيض
100/100
ربنا يستر ومايكونش مش وراكي
ويفجر البلوج بتاااعك

بس كويس انك فضفضتي عن نفسك في الشكولاته
الا هيه كانت ايه ؟؟؟؟؟
‏قال Desert cat
Gloomy Day's
انا كنت بقول كدا برضه
الراجل ده مبيت لى النية او بيسجل لى
بس الحمد لله عدت على خير
بالنسبة للاسعار كلنا فى بلد واحده
واللى بيحصل هنا هو اللىب يحصل هناك
لنا الله
مودتى
‏قال Desert cat
ولــــــــــو
لاء مش تستقر فى الشرقية
وانت موقفك صح
مش علشان الناس اللى فيها داخلهم غير خارجهم
علشان الشرقية فيها اللى مكفيها
بالنسبة للموقف العدائى فانا بقولك بالفم المليان ااااااه
واتمنى من الصبح لو يجيى لهم وباء ونخلص منهم
اصل بصراحة كلهم جزء لا يتجزأ فى الافكار وفى كل حاجه
اصل كلهم تلامذه لشخص واحد
سواء بقا دكتور فى الجامعه او شخص جاهل
تحياتى
‏قال Desert cat
venella_lover
هى كانت لذيذه بعقل
ده انا لحد دلوقتى كل لما بيتنا يخبط بالليل اقوم اودع اهلى
غلاء الاسعار مشكلة الجميع
ما دام مصر بتتقدم بينا
قولى عليه العوض
مودتى يا جميله
‏قال Desert cat
ابن حـجـر الـعـسـقـلانـى
كلنا فاهمين وعارفين
بس للاسف برضه كلنا خايفين
بالنسبة للحج ابو دقن
لو كان لبس النضارة على عقله كان ممكن يتعمى اصلها كانت شمس
بالنسبة حتقول لمين
فانا مش بحرض يا بنى
انا لما عاصرت الحروب كلها الشعب كله قال لاء

تحياتى
‏قال Desert cat
مهندس مصري
المشكلة انى بمشى اتكعبل فيهم
فى المواصلات فى الشارع فى النت
ولما حد فيهم يتكلم بتبقا حجته ضعيفه وواهيه وبيقع من اول كلمة
بالنسبة لماما
مش هرخم عليها تانى
حاضر
احتراماتى
‏قال Desert cat
mycore
هههههههههههههههههههه
اهم حاجه فى الحياة انك تستخدم روحك مش جسمك
لكن هى الناس بتستخدم جسمها ازاى
فى الخنقات والضرب وبتاع
انا ماليش فيه
انا هعمل زى باباك ما قال واستخدم روحى
وكويس انى لاقيت حد من رائي
علشان لما المخبر يبلغ عنى اقول انت اللى كنت بتحرضنى

احترماتى
‏قال Desert cat
اسكندراني اوي
بعينه
هو شكله كان عايز يشوف عنيا لونها ايه
بس عمل دى حجته
طبعا هيهات

وبعدين بكون نازلة وفى امان اله وواخده على نفسى الف عهد ماليش دعوه بحد
ومش بقدر امسك نفسى خصوصا لو حد كان بيقول كلام ينرفز
الاقيش عندك علاج للموضوع ده

احترامى وتقديرى
‏قال Desert cat
اسكندراني في الغربة
لاء ما هما بيشموا ريحتى فى مكان بيتجمعوا كلهم
هو عموما الاماكن العامة بيتجمع فيها اكتر من شخص وفئات مختلفة
علشان كدا تلاقينى مثلا احب اركب قطر بس مش من اللى بيولعوا
وتلاقينى مدية نفسى الحق ارد وادخل نفسى فى الحوار
بحب اتعرف عقليات الناس وافكارها
فيه اللى بطلع منه بحصيلة من الاستفاده وفيه اللى بيكون نفسى ارمية من الشباك
احتراماتى
‏قال Desert cat
اجندا حمرا
نفس والله مش ادخ نفسى فى الحوارات بتاعة الناس
بس بيكون فى ناس استفزازية بتخرجنى عن شعورى
وبالنسبة للشكولاته مش بمشى من غيرها
انا ممكن مش اكل اى وجبات خالص ف خلال اليوم
انما الشكولاته نوووووو
علشان كدا مش عارفه احقق الوزن المثالى اللى مدربة الايروبك بتاعتى عايزاه
محبتى يا قمره
‏قال Desert cat
ملك الكبدة
لاء ما انا فوقت انت مش خدت بالك من الخناقة ولا ايه
بالنسبة للمخبر
فشكله هو كمان قرفان وطالع عينه من اللى بيحصل فى البلد والاسعار
علشان كدا ساب الكل يتكلم معدا سامح باشا
الظاهر خاف عليه احسن يقللوا رتبته ولا حاجه
فعلا انا بحب الاماكن العامة زى الميكرباصات والقطارات والحاجات دى لانها بتكون مجمعه من جميع فئات المجتمع
وبالتالى بتقدر تتعرف على العقليات وطريقة التفكير بكل سهولة ويسر
حتقولى وانتى مالك تتعرفى
حقولك حشرية فضولية
عندى هواية اعرف اللى قدامى بيفكر فى ايه وعقله عبارة عن ايه
ليه والله انا نفسى مش عارفه
احتراماتى
‏قال Desert cat
m.elzayat
يا قهلا يا قهلا بالشراقوة
احنا نعمل رابطة
ونسميها المدونيين الشراقويين
منور المدونة يا فندم
‏قال Desert cat
حواديت وحكاوي
انا من ناحية اخدت كام
فعيب انى اكون بشتغل واخد منها
المفروض اشوف انا احتياجتها ايه واعلمها لها
بالنسبة للراجل الارهابى مش كان يقدر يمشى ورايا
نسيت المخبر والظابط
كنت هجيبهم له
وبعدين انا مش بخاف الا من ربنا
يعنى اى كلام يخطر فى بالى بقوله والباقى ربنا يستر فيه
وبعدين انا كنت قاعده فى وسط ناس

الشكولاته بقا كانت كادبورى
شرفت البلوج يا فندم
‏قال Dr. Diaa Elnaggar
كوميديا سوداء من الدرجة الأولى، ما تعرفي تضحكي ولا تعيطي. والمشهد الرمزي الأخير بتاع أكل الشيكولاته مش عارف ليه فكرني بحال مصر كلها.

عميق تحياتي

ضياء
‏قال ronnata
بجد انتى جامدة
و حمد لله على السلامة انك و صلتى بيتكوا سالمة و كويسة
و باحييكى على عدم السلبية الى انتشرت اوى عند الشعب المصرى
و باحيكى انك عبرتى عن رايك من غير خوف او قلق
لكنى بتفق مع "لو"فى(انتي اتجاهك العام انك متخذه موقف من اي حد مطلق لحيته او بيلبس جلباب قصير
حاسس ان الموقف عدائي اكتر من اللازم)
يعنى مش كلهم ارهابيين يعنى متتفرجيش على افلام امريكية كتيرة لانها بتثبت الموضوع دة فى اذهاننا
لكن ع العموم هو الراجل دة شكله من كلامك انه فى طريقه للارهابية
بس انا بحسدك على ان عندكوا المخبرين و الظابط خلو اساسا فى حرية فى الكلام عن اى موضوع
احنا فى الهرم معتقدتش بعد الحوادث الى حصلت ان ممكن حد يفكر يركب مواصلة فيها عسكرى حتى مش ظابط ولا مخبر
بوست جميل
‏قال Esmat
قطة خلى بالك والله خايفة عليكى من جرأتك
ممكن صراحتك وكلامك الدوغرى يجيب لك مشاكل

ربنا يكرمك إنتى بتروحى وتيجى لوحدك
وإحنا خايفين عليكى
مواقف زى كده بلاش تشدى فى الكلام

كبرى دماغك ساعة الجد الكل بيجرى
ومحدش بيقف جنب حد
علشان ماما وبابا ربنا يطمنهم دايما عليكى

وبلاش تقلقينا عليكى يا جميلة
سلام يا قمر
‏قال Alexandrian far away
صباح الفل يا قطة الصحراء
أيه الثوريه دي كلها
رهيبه فعلا
ما شاء الله
ثم حضرتك من فاقوس؟
تشرفنا
أنا زرتها من كام سنه كده
بلد دمها خفيف جدا وأهلها ظراف خالص
لكن أكتشفت أنه مش فيها ولا بنت حلوه
كلهم حلوين قوي
زي القمر
أعتقد أن حلاوة الداخل لازم تنعكس على الخارج
عاشت الشرقيه

تحياتي
‏قال الربان
تحياتي

البوست جميل....من أدب الرحلات يعني..هههههه( طبعا انت عارفه انه يوجد نوع من الادب يسمي ادب الرحلات ..و ان الاستاذ أنيس منصور له كتب من هذا النوع ) .

انا كنت في مصر من ايام قليلة بعد سفر لمدة ثلاثة شهور...و لاحظت فعلا ارتفاع الاسعار...

بالفعل مصر بها من الخيرات الكثير...لكن سوء الادارة عامل أساسي لكل مشاكلنا.
لا يوجد توزيع عادل للثروة...بمعني ان كل التقدم الاقتصادي الحاصل تعود فائدته علي فئة محدوده جدا...هي تستأثر به...و تزداد غني و ثراءً ..
لا يوجد انسياب للثروة من أعلي الي الادني..

الحقيقة انتي تطرقتي الي موضوعات كثيرة في البوست...لكني سأعلق علي الشاب ذو اللحية و صلاة العيد...

انا مع الشرعية...يعني لازم نحترم قرارات
الامن و اولي الامر ...يعني الدولة...لان الخروج عن هذا الاحترام للقرارات سيولد فوضي...و سيولد كره و حقد متبادل...
و طالما هانصلي العيد...يبقي المكان غير ذو أهمية قصوي في رأيي...بعض البلاد العربية ذات الاغلبية المسلمة...المسلم له كارت امني يحصل عليه من الجهات الامنية ليصلي و عليه الالتزام بالمسجد المحدد له ...و الذي يقع الي جوار مسكنه
يعني لو صلي في مسجد أخر غير المخصص له يقبض عليه....

تحياتي و استمتعت بقرأة البوست الظريف.
‏قال واحد مصرى
خليكي كدة اتريقي عليهم...ابو دقن متر و نص و أبو جلابية بيضة و اللي لابس بنطلون ابيض تحت الجلابية القصيرة لحد ما حاتتجوزي واحد منهم و يزفوك شرعي يا جميل...الستات في ناحية و الرجالة في ناحية و يتعمل في جامع الأخوة و يقوم بعقد قرانكم الأخ ابو حمزة و يزفوكي زفة بالدفوف بفرقة ابو سيف الاسلامية..هع هع هع هع
‏قال غير معرف…
الى كل شعب مصر القاطن فى ارجاء جمهوريه مصر العربيه تمتعوا بالسى فا القادم اسوء
‏قال lastknight
أولا شجاعتك فى مواجهة الأفندى المتطرف هى اللى لفتت نظرى قوى .. أكتر من شجاعتك فى مواجهة ممثل الحكومه .. ببساطه مهما بلغ الغباء و البطش من الحكومه ففى النهايه يمكن الرجوع عليها بقانون ..بينما مواجهة المدعين بامتلاك الحق الألهى .. تستلزم شجاعه حقيقيه .. حيث أنهم فى الأساس لا يخضعون لقانون سوى مايرونه من تفسير للدين .. و مايعرفونه منه فقط
برافو عليكى بجد
ربنا يبارك فيكى .. و يارب مصر يبقى فيها كتير من أمثالك اللى يقدروا يواجهوا ممثلى البداوه ىبالوضوح و الصراحه دى .. و وشويه بشويه أن شاء الله الناس تفوق
‏قال شيرين
للاسف في ناس كتير بتختفي ورا التدين وبتسئ للناس المدتينة فعلا وبتدينا انطباع سئ عن التدين

هو الفجر بياذن عندكم الساعة 8 ههههههههههه ابقى اديني رنة عشان اقوم اصلي الله يكرمك


تحياتي ايامنا الحلوة
‏قال زعيم كمورا
أزال المؤلف هذا التعليق.
‏قال منى
ازيك يا قطه
يعنى مش مكفياكى المدونه راحه تتكلمى فى الميكروباص
يا ريت بعد كده تبقى تكترى من الشيكولاته
تحياتى يا قطقوطه
‏قال Unknown
حديث الساعة ده تناول مفردات الهم الأزلي اللي احنا عايشينه هنا ف مصر وللأسف يسمى حياة

وللأسف أأمن ما فيها عمل ما عملتيه وانتي مروحة

التجاهل ... وعدم المشاركة

روخر تلاقي الشعب بتاعنا بالفكاكة كده عمل زيك وبطل كلام
‏قال اسامة يس
هههههههههههههههه
يعني بين اسعار نار ومخبر وجيش ورجل دين وشباب وامرأة متطفلة...

بس ليه تقولي للراجل انت ارهابي .. مهما يكن دي فعلا استفزاز .. ثم هوه قال اللي ليه اينعم لأن اللي عليه كان رد فعل وليس فعل ...
بمعنى ان رد الفعل على المنع من الصلا كان ما كان ... وهذا لا يعني تأييد لما فعل بل توضيح .. بمعنى مش معقول مثلا حد يضربني على وجهي فأقوم انا نازل فيه ضرب اكسر ضلوعه حد يقولي ضربته ليه يقولي رد فعلك تجاوز الحد ولا تناسب فقط...

بس الجميع كان خايف يقول لا لمين ههههههههههههههه

دمت بكل ود...
خالص تحياتي
‏قال Desert cat
Dr. Diaa Elnaggar
ما ه يا فندم بيقولك هم يضحك وهم يبكى
احنا حالنا بقا كله بقا يبكى
بالنسبة لمشهد الشكولاته فانا حبيت اسكت نفسى واضيع وقت
لفت نظرى حضرتك
اننا لما نزهق بنضيع وقتنا باى حاجه وبنسكت على اى حاجه بتحصلنا
احترامى وتقديرى
‏قال Dr. Diaa Elnaggar
هذا ما يسمونه في علم النفس الحيل الدفاعية، وهي ما يميل إليه الإنسان من وسائل لتخطي موقف لحظي ضاغط عليه، وقد تكون الحيلة الدفاعية ممتدة الأثر لتخطي موقف ضاغط طويل المدى.

عميق تحياتي

ضياء
‏قال Desert cat
ronnata
السلبية بتريح صاحبها
لكن انا علشان جامدة بتلاقينى مدخلة نفسى فى مشاكل
بس نقول ايه
بالنسبة للكلام اللى بتاكد بيه على كلام ولو
فانا برضه هرد عليك نفس ردى على ولو
كلهم جزء لا يتجزأ
لان كلهم فكر واحد
لانهم تلامذه لشخص واحد
تحياتى
‏قال Desert cat
Esmat
حبيبتى والله انا لسانى بيطول كدا غصب عنى
وكل لما بحاول اقول ماليش دعوة بحد
بلاقى بنفسى برد على اى كلام ميعجبنيش حاجه لا ارادى
ماما وبابا اتعودوا خلاص على مشاكلى
انا لو دخلت البيت وحسوا انى هادية ومش بعمل دوشة
بيبقا حاجه من الاتنين
يا عيانة
يا عامله مشكلة وقلقانه من العواقب
ههههههه
الحمد لله على كل حاجه
اشكر لك شعورك الجميل يا جميلة
محبتى
‏قال Desert cat
Alexandrian far away
ميرسى جدا
بس الشرقية كل بناتها اوحش من بعض
ههههههههه
بسوء سمعتهم
اكيد فاقوس نورت يا فندم
وان شاء الله تشرفنا تانى
تحياتى
‏قال Desert cat
الربان
طبعا رأى حضرتك ونعم الرأى
بصراحة فخروة جدا بيه
وصدقنى لو موجود فى مجتمعنا من يحمل مثل عقلك
كان بقا حالنا افضل بكتير
احترامى وتقديرى
‏قال Desert cat
واحد مصرى
انا اتجوز منهم
فال الله ولا فالك
بس تصدق لو الواحد اتجوز منهم هيتسلى عليهم اعلى تسليه
والله وقتها همشية على العجين مش يلخبطة ولو فكر بس مجرد تفكير انه يضايقنى هبلغ عنه انه ارهابى وبيحرض الناس على الثورة ضد الحكم
ويبقا يقابلنى بقا لو عرف يخرج منها
ملاك انا
ملالالالالالالالاك
تحياتى
‏قال Desert cat
رئيس جمهوريه نفسى
طيب يا فندم
ربنا يبشرك بالخير
‏قال Desert cat
lastknight
اصلا انا عندى فوبيا من النماذج دى يا استاذ فارس
لما بشوفهم كانى شايفه عفاريت اللهم احفظنا
انا كذا مرة ادخل فى نقاش مع اى حد منهم
مش بيعرفوا يتناقشوا اصلا
بيبقا كل واحد حافظ كلمتين تلاقيهم بيسمعهم لك وخلاص
والكلام بيكون عكس الموضوع اللى بتتكلم فيه
الناس دى ساعات بتصعب عليا لانها بيكون معمول لها غسيل مخ
ربنا يهديهم او ياخدهم خلينا نستريح
احترامى وتقديرى
‏قال Desert cat
شيرين
ما هى المشكلة ان اللى بيتكلم منهم بتحسى انه مثل سئ
علشان كدا مش بحس اصلا ان فيهم حد معتدل
بالنسبة للفجر لساعه 8 هبقى اديكى رنة
بس على فكرة انا بصلى فجر 4.30 لو تحبى ابقا اصحيكى فعلا انا موافقه
مودتى
‏قال Desert cat
رئيس جمهورية كمورا مورا
ايه يابنى الكلام اللى يودى فى داهيه ده
شكلك راسم على اعتقالى
انا ماليش دعوة بيك
يا فندم ثورة مين والناس نايمين
الناس خلاص اتعودت تحط لسانها جوة بؤها وتسكت
اصل عندهم عيال عايزين يربوهم
مش مهم بقا يستحملوا الاسعار
‏قال Desert cat
منى
انا اتكلمت براحتى اوى فى الميكروباص افتكرت نفسى فى المدونة
بس حسيت انى فى الواقع افضل من المدونة لانى كنت بشوف انطباعات كل الناس وطريقة تعبيرهم فيس تو فيس
وده لوحده شئ جميل
تحياتى يا قمر
‏قال Desert cat
أنونيمس
اممممممم
يعنى انا كان رد فعلى سلبى فى الرجوع
انا عارفه
بس انا كنت لسه متخانقة وانا رايحة هتخانق تانى وانا راجعه
ده حتى يبقا حرااااااااااااام
بس انا موافقة عمو اللى كان بيخطب الجمعه ورايا
ان كلنا لازم نقول لاء
وكفاية نطاطى
بس للاسف ايد لوحدها مبتسقفش
تحياتى
‏قال Desert cat
osama
امممممممم
يعنى انت موافق انه يقابل الاساءة بالاساءة
طيب ما هو فعلا كدا ارهابى
هو مش المفروض ان الحكومة دول اولو الامر
والدين امرنا باطاعه اولو الامر
مش نضربهم ونولع فيهم
طيب فين الاسلام هو الحل اللى بينادوا بيه فى تطرفهم وردود افعالهم الارهابية
انا استفزيته بردى
وهما استفزوا مدينة بحالها بتصرفهم المتطرف
‏قال Desert cat
Dr. Diaa Elnaggar
اشكر حضرتك جدا على التوضيح
احترامى وتقديرى
‏قال The Queen
بأحييكي يا قطة على شجاعتك مع ان المخبر ده كان شكله مش مريح خالص
وبعدين هو نص الميكروباص كان جاي مع سامح بيه واللا ايه؟

انا مش بحب نظرة - كتير- من المدعين التدين للمراة وطريقة كلامه معاها بحس انها ابعد ما يكون عن اخلاق الاسلام وتكريمه للمراة منهم لله بقى بيشوهوا صورة ديننا في كل حاجة
ربنا يهدي

وابقي خدي شوكولاته معاكي في كل رحلة
خير صديق في الميكروباص حتة شوكولاته

اموااااااااااه
‏قال اسامة يس
اختي الكريمة/ قطة الصحراء
قط لم اقل ان ردة فعله صحيحة .. قلت تجاوزت الحد.. اي كما يسميها فقهاء القانون تجاوز حدود الدفاع الشرعي مع فارق التشبيه ...
ليس رد اساءة باساءة.. ...
انا معترض على ما فعله النظام ومعترض على ردة الفعل المتجاوزة من قبلهم...
هذا توضيح اولي

النقطة الثانية : طاعة ولي الأمر واجبة اذا لم تكن في معصية الخالق ... وطاعته مرفوضه اذا كانت في كبت الحريات وملئ المعتقلات كما هو حاصل الآن..

اعاني من طريقة تفكيرهم لدرجات تصل في بعض الاحيان لأن يكفروني ولكني فقط اتفهم ردة فعل انسان يعاني الفقر والجوع اضافة الى ما يظنه هو دين واجب التطبيق .. هذا كله واكرر اذا لم يتجاوز فعله حدود المواجهه..
دمت بكل ود.
سعيد بالتحاور معكم.
خالص تحياتي
‏قال truelove
انتي متاكدة انك لسة برة مش جوة بعد الي حكتيه ده كله والله انتي فقرية سلامي لاهل الشرقية كلهم ياقمر
‏قال Desert cat
The Queen
انا كنت زيك كدا فى الاول
كنت بقول الراجل ده عايزنى اتكلم براحتى علشان يبقا انا اللى جبته لنفسى
لكن شكله كان مخنوق وكان عايز يعبر عنه لانه خايف يتكلم
بالمناسبة
احنا واخدين راحتنا اكتر من الناس دى عارفه ليه
لاننا بنقدر نتكلم براحتنا ونعمل اللى احنا عايزينه
اما هما محكومين بوظيفتهم ومهما حصله ميقدرش يفته بؤه
مودتى
‏قال Desert cat
osama
كدا وصلنا لنقطة اتفاق
وهى اطاعة اولو الامر
بس فى نقطة عايزه اوضحها لحضرتك لانك قولت مش نطيعهم فى اللى يغضب ربنا
وانا متفقه معاك تمام الاتفاق برضه
طيب ما هو اللى حصل فى صلاة العيد انهم مش منعوهم من الصلاة
انما حددوا لهم مسجد للصلاة
والاخوان معترضين على اقامة الصلاة فى المسجد وعايزين يقيموها بمزاجهم هما
فمن الطبيعى يكون فى دافع قوى للشرطة علشان تتخذ موقف ضدهم
ومش معنى ان مثلا والدك ينهاك عن الخروج مع احد اخوتك لكن سايبك تخرج مع الاخ الاخر
يقوم انت تعاند وتقوله لاء انا مش هخرج غير مع اللى انا اختاره
طيب ما هو هنا مش نهاك من الخروج خالص
فمن الطبيعى ان يكون فى رد فعل
ده اللى حصل بالظبط
الشرطة حددت مكان الاخوة على حد قولهم مش عجبهم
طيب فى اخوان اعتقلوا
والناس دى كانت فى المعتقلات كان البلد برضه بيتوزع فيها منشورات يعنى اكيد الناس دى ليها فروح اخرى فى اماكن تانية هدفها لا اصلاح ولا التزام بدين
الناس دى هدفها التخريب وارهاب المواطنين
لان ده اللى الناس بتعانى منه حتى الآن
اشكر لحضرتك اسلوبك الهادى فى النقاش
تحياتى
‏قال Desert cat
truelove
تصدقى انك فكرتينى بالاخ اللى كان بيقول حجتك باطلة علشان النضارة
اصلى للاسف مش شايفه اى ربط فى كلامك بين الجمل وبعضها
تحياتى يا جميل
المهم في الآخر وصلتي الزقازيق ولا مصيف طرة؟؟


بس أكتر حاجة غاظتني الواد اللي عندنا منه كتير ده

والله هما دول اللي ودينا في داهية


تحياتي
‏قال Desert cat
القلم السكندري
وصلت والحمد لله
الولد ده كا كل ما ينطق احس ان ضغطى ارتفع
الحمد لله انها مرت بخير
تحياتى
‏قال غير معرف…
ya desert awel 7agah 7amdela 3al salam ya fandem 3awdaton ma7modaton.
bosy ya cat lazem netkalem o ne3abar 3an 2ara2na maho 7'alas maba2ash yenfa3 neskot aktar mn keda,bas ana bgad basta3'rab in feh shabab fe masr lesa belgahl dah o mesh ye3rafo ay 7agah keda,i like this subjust alot rabena ma3aky ya gamiel
kleep going ya fabndem
salaam
‏قال Desert cat
Sola
maho lazem ma3 elta3ber ykon fe fe3l ,la enty mesh m3ya
namozg elshab da ogood kteer
me7tagen skafa fekrya
nawrty el blog ya gamel
‏قال Soooo
والله انتي مششششششششششششكله

عارفه .. انا برضه زيك كده
لما تتفتح سيرة الغلاء والبهدله ما اسكتش
واوقع اخوانجيه في شيوعونجيه في كفاينجيه في وطنجيه


ربنا يسترها عليكي .. وعلينا



سلاموووووووووز
‏قال رحيق الحب
انتى باين عليكى جرئية اوى يا بنتى هاههههههههههههه بس الحمد لله انك مجراش ليكى حاجة من الكروبة العجيبة والناس اللى كانت وياكى
بس بجد فعلا مش عندكو انتو بس بتتكلموا عن غلاء الاسعار فى كل مكان فيكى يا مصر الناس خايفة متكونش اد الغلاء تبقى هتبقى الحياة شكلها ايه ويا ترى فيه اسوء من اللى احنا عايشينه بجد حسبى الله ونعم الوكيل فى دية حكومة بس بجد يسلم لسانك فى كل اللى قولتيه
ربنا يحميكى ويحفظك يا رب
‏قال Desert cat
Soooo
انا مشكلة
بالعكس ده انا هادية ووديعه واليفه جدا
بس الناس اللىب يستفزونى اسكت لهم يعنى
يرضيك اسكت لهم
ده انا كان جرى لى حاجه
ربنا يسترها علينا جميعا
تحياتى
‏قال Desert cat
رحيق الحب
حبيبتى والله انا مش من النوع الفضولى اللى بيحشر نفسه فى الكلام بين الناس
بس الولد هو اللى استفزنى
والراجل الاخير ده استفزنى اكتر
تعرفى لو كان عرف يتناقش ويرد عليا عادى من غير تهكم
على ما اعتقد ان الامور كانت بقت طبيعية
انما ده من اول كلمتين لاقيت رده من نوع انتى مالك وانتى ايه عرفك
لاء بقا ده انا هعرفك انا مالى ازاى
ناس مش بتيجى غير بالعين الحمرة
بالنسبة للغلاء فانا موافقه عمو اللى كان فى الكرسى اللى واريا ان احنا اللى نستاهل علان الحاجات دى بايدينا احنا
مودتى
‏قال oceaneyes
والله انتى عسل

حلوة اوى ردودك واللى حلو اكتر انك مش بتعرفى تسكتى كدة ولازم تتكلمى ...حتى لو هاتقلبى الدنيا فى بعض

:D


بس كدة تمام جداااااااااا...ما هو اصل اللى بيقول الحق اليومين دول يبقا كأنه كفر

ولا الشخص بتاع صلاه العيد ده ...عجبنى جدا جدا جدا جدا ردك عليه

بس هاتتوقعى ايه يعنى من ناس زى دى


وحمدلله على السلامة يا جميل

بس كان ايه نوع الشوكولاتة اللى كلتيها ؟؟؟؟؟


:p
‏قال Desert cat
oceaneyes
ثانكس يا جميل
نوع الكشولاته كان كادبورى
محبتى

المشاركات الشائعة