يوم سعيد جداً جداً ... علشان كدا خلص بسرعه

البداية ... لما إيمى وكوكا كلمونى علشان اقابل الاستاذ محمود سعد للتسجيل فى برنامج البيت بيتك ... بأمانة كنت رايحة بس لظروف خارجة عن إرادتى إضطريت أعتذر ...
فى نفس الوقت كنت خلاص وصلت لأخر مرحلة من مراحل الملل بسبب الروتين اليومى اللى مبيتغيرش فى حياتى ... ولأنى قبل كدا كان فى معاد بينى وبين الجميلة كلاكيت تانى وتانى بس يوم المعاد ده الندالة لعبت دورها معايا وأضطريت برضه اعتذر بس كان بعد ما الوقت فات ... الآن آن الآوان إنى أنفذ الزيارة فى الحال والتو ... وقد كان كلمت كلاكيت وقولت لها انى فى الطريق ... ووصلت بسهولة لأنها فى المعاد الأول كان وصفت لى العنوان وانا فضلت فاكراه .. ضربت الجرس لاقيت صوت رقيق بيقولى مين .. قولت ايه ده انا بقا اخض اللى ورا الباب ورحت قايله بوليس ... لاقيت حد قمر كدا فتح لى وهو بيضحك طبعا الأستاذ أمر واللى مستحيل اقدر انسى إبتسامته الرقيقه لحد أخر يوم فى حياتى بسم الله ما شاء الله ربنا يحفظه .... واثناء سلامى على أمر ظهر وجه القمر طبعاً الآنسة لينا حواديت بنات محتارة واللى مدونتها جزء لا يتجزأ منها مرحة وشقية وطيوبة وعسوله مزيج هائل .... وبعد لينا سلمت على كلاكيت واللى كنت تانى مرة أتشرف بمقابلتها وفى كل مرة متميزة وبكتشف فيها صفات رائعه ... بصراحة كانت زيارة جميلة لأجمل ناس أكلونى عندهم أكل حلو أوى والأجمل إنى مساعدتش فى إعداده أنا أكلت بس وكلاكيت طول الزيارة تلف ورايا بالبرتقال .. دوختها خرجنا البلكونة ماشاء الله الواحد يقدر يلعب فيها كورة ويحرز أهداف بكل جداره .... وكلاكيت عامله فيها ديكور رائع .. عايز تقعد قعده عربى مفيش مانع .. عايز تقعد رجل على رجل وتأنتخ برضه براحتك زى ما تحب ... بصراحة كلاكيت دى قمر مش حارمه ضيوفها من حاجه ... دايما الوقت الحلو بيجرى بسرعه ... فجأة سمعت المغرب ... ايه ده مش معقول اليوم خلص بسرعه كدا ... طيب بما اننا بقينا بعد المغرب لازم افتح ماسنجرى حالا استغليتهم ودخلت نت من هناك ... لكن الظاهر انى اتاخرت شوية لما فتحته اصلى مش لاقيت غير اوف لاين بس ... كلاكيت راحت تصلى وانا ولينا قعدنا نرغى اكلنا ودان بعض ... وآن الأوان إنى لازم اعود أدراجى ... طبعا مش حقول يالينا انك فضلتى تلبسى الطرحة بس ساعه إن الله حليم ستار .... وصلتنى لينا وعدت إلى أرض الوطن ولحد دلوقتى حاسه إنى كنت بحلم ... معقول انا قابلت الناس الحلوة دى وقعدنا واكلنا واتكلمنا والوقت كان بيجرى بالسرعه دى ... انا معظم ايامى بتعدى عليا بحس ان اليوم بيعدى بسنه .... سبحان الله على تجمع الاحبة ....
ايمى وكوكا والله كان نفسى اقابلكوا واسعد جدا بالقرب منكو ... بس ان شاء الله قريب جدا
كلاكيت وحودايت بنات محتارة و أمر تعرف لو انت كبير شوية كنت جبت والدى وجيت طلبت ايدك بس تتعوض هحجزك لبنتى ان شاء الله بس لما الاقى انا باباها
حقيقى سعدت جدا جدا بزيارتكو
ليكو منى جميعا كل حب ومودة

تعليقات

‏قال ملك الكبدة
يا رب اكسب جايزة اول تعليق

طبعا انا بتغاظ من اي حد يحظى بقدر من الانتخة و المعاملة الملوكية

و يسعدني اني اعلن على الملا حقدي المتطفل
على كم السعادة و الانتخة اللي جنيتيها في هذا اليوم المشهود

و لا زم بقى طالما حقدت عليكي اكدرك

رايحة برنامج البيت بيتك ليه
مله عمرو اديب
ولا حتى وائل الابراشي
ولا انتي بتتمحكي في الحكومة خايفة يقفشوكي

على فكرة الحكومة عاملالك كمين
بيقولو دلوقتي بدال احترس من السلعوة

ابحث معانا عن قطة الصحراء

يعني ساعة الجد لا محمود سعد و لا محود تعس حتى
انا بقولك

و قد بندر من شمبر
‏قال خيرالدين
اللقاءات دى بجد حاجه جميله
بتعرفى الناس عن قرب
‏قال 3ala asm masr
ربنا يجمعكم على خير ديما
تحياتى يا قمر
و الله يا هريرة انتى تستاهلى كل خير
‏قال The Queen
اهئ اهئ اهئ

يا بختك

وانا كمان عايزة من البرتقال ده

يوووووه قصدي من الزيارات والانتخه والرغي ده

اشمعني انتوا بقىىىىىى

بس انتي قطتي مقدرش اقولك غير ربنا يسعدك وتكون كل أيامك زي اليوم ده
‏قال غير معرف…
طبعا يا بختكم بجد وبحكم انى ماسك الحدود من تحت فا فرص انى ااقابل اى بلوجر منعدمه اساسا انا بنق عليكى يا قطه الصحراء نق نق نق نق نق بس
‏قال دكتور حر
قطة الصحراء

هكذا حقا ودائما ما تمر اللحظات الجميله بسرعه

لذا فعلى أحدنا أن يحسن استثمارها واغتنامها والتمتع بها دوما

*********
. كلاكيت راحت تصلى وانا ولينا قعدنا نرغى اكلنا ودان بعض
؟؟؟؟؟؟؟؟؟؟؟؟؟؟؟
***********
لك كل الود
الله بجد حاجه جميله أوى وجميل أنك تقابلى ناس جواهم حلو أوى كده
وأكيد انت شوفتى الجميل اللى جواهم قبل ما تقابليهم

ربنا يسعد كل أيامك يارب

وآسفه على تأخيرى فى الزياره
وأنا بقى بنق عليكى فى نشاطك فى البلوج ما شاء الله
يارب دايما منوره عالم التدوين
‏قال Esmat
حبيبتى الحلوة قطة
يا رب ديما مبسوطة وفرحانة
وأبعد الله عنكى ملل الروتين
و ديما تلاقى جنبك من تسعدى بصحبتهم
البوست إحساسه حلو اوى اوى يفرح وإنتى بتقرأيه

الشكر الجزيل إلى
كلاكيت تانى وتانى و حواديت بنات محتارة
اللى جعلوا يومك سعيد

وأسعدكى الله دوما أيتها الصافية القلب
دمتى طيبة ومحبة
ما شاء الله والله حاجةجميلة جدا
يا بختك
:)
‏قال رحيق الحب
ما شاء الله ربنا يجعل ايامك كلها سعادة وهنا يا رب ويدوم بينكو المودة والحب والرحمه دايما يا رب اللهم آمين
وبعدين ايه يا بنتى ده حد يعتذر عن البيت بيتك طب انا لو حد دعانى لاروحلهم من الفجر يا بنتى هاهههههههههههههههههههههههههه
ربنا يحميكى ويحفظك يا رب ويخيلكى اصحابك واخواتك فى الله وان شاء الله ربنا يرزقكك بالزوج الصالح اللى تجيبى منه ابن زى العسل عشان تجوزية كلاكيت
:)))))))
‏قال Desert cat
ملك الكبدة
فعلا انت الفائز الاول معانا فى جايزة اول تعليق
مصاصه لومبو
بس مش هتاخدها علشان الحقد اللى بتحقده عليا ده
ده يييييييييييييييوم
حتة يوم انتخه وقعدة ملوكى
واكل وبرتقال
يقوم تقولى بحقد
كنت رايحه برنامج البيت بيتكو علشان ابقا فى امان
لو رحت برنامج عمرو اديب مش بعيد اتاخد من الحلقة
ويبقا العالم كله افترج عليا
شكلك فرحان فيا

منور اول رد ياباشا
‏قال Desert cat
e7na
فعلا زى ما بتقول كدا
وبتحس ان فى ناس بتحبك من غير اهداف ولا هى عارفاك اصلا
ودى اجمل حاجه
تحياتى
‏قال Desert cat
3ala asm masr
اللهم أمين يا هنود
تسلمى لى يا قمرى
‏قال Desert cat
ابن حـجـر الـعـسـقـلانـى
الله يخليك ياباشا
ده من زوقك
بموت فى كلمة هريره
هههههههههه
‏قال Desert cat
The Queen
معلشى بقا يا جلالة الملكة
ده من سوء حظنا يا قمر انك مش من محافظتنا
وان كان على البرتقال اجيب لك شجرة بس انتى نورينا
‏قال Desert cat
رئيس جمهوريه نفسى
هو صباحو نق ولا ايه
عندى حل لمشكلتك انت تهرب من البيت
وتسافر على كولامبور
ممكن تقابل هناك المدونين
على فكرة دى مش مشكلتك لوحدك ياباشا
ساعات كتير بيكون عندى صحاب ومحتاجه اقابلهم بس للاسف المسافه برضه بتكون قاسيه علينا حبتين
تحياتى
‏قال Desert cat
دكتور حر
فعلا يا دوكتر كلامك صح
بس هو ايه وجه استغرابك ان انا ولينا قعدنا نرغى
يعنى علشان مش قومنا نصلى ولا علشان الرغى
عادى يعنى دى مشكلة منذ قديم الازل
تموت حواء وهى بترغى
تحياتى
‏قال Desert cat
حياة الأحلام
حبيبتى معرفة الناس كنوز وخصوصا لو كانوا ناس من جواهم نضيف
بالنسبة لزيارتك فالبلوج بلوجك تشرفيه فى اى وقت
تحياتى
‏قال Desert cat
Esmat
تسلمى لى يا احلى عصمت فى الدنيا
بتسعدنى جدا جدا كل ردودك
لانى بحس فيها بطيبة قلب ورقة انسانة مستحيل تتكرر فى الحياة
حبيبتى عصمت
اشهد الله انى احبك جدا جدا فى الله
‏قال Desert cat
آلام وآمال
هو كان فعلا يوم جميل جدا
عقبال ما تقابل صحابك يا محمود
علشان انا كمان اقر عليك واقولك يا بختك
منور ياباشا
‏قال منى
فعلا الصحبه الحلوه والقعده الحلوه متتعوضش
ربنا يكرمك دايما بناس حلوه
تحياتى يا قطه
‏قال lastknight
انتى بتغيظينا ؟ يعنى أيه أكلتى أكل بيتى حلو ؟ و حليتى برتقال ؟ و لعبتى مع أمر ..؟ و قعدتى فى البلكونه ؟ ايه يعنى مش فاهم ؟ هو عشان الناس التانيه الشقيانه اللى زيى بياكلوا من الشارع .. و مافيش وقت يحلوا بعد الأكل .. و نسيت فين البلكونه أساسا مع أن متأكد ان الشقه كان فها بلكونه زمان .. تبقى تغيظينى كده ؟ عموما بالهنا و الشفا .. و ربنا يديم الموده و المعروف
‏قال إسلام
قطه الصحراء
رنا يجعل ايامك كلها سعاده وفرفشه
وياريت كل الناس تكون بتحب بعضها وتخاف علي بعضها
عشان ساعتها كل واحد ها يبقي عايش في سعاده ورفهيه
ويارب يجمع الحباب دائما وما يفرقهمش
تحياتي
‏قال son's egypt
السلام عليكم
جميل ان الواحد يحب يقعد مه ناس هو بيحبهم ويحبوه من غي مصالح ولا ايحاجة تانية
تحياتي
‏قال Coca
كااااااااات يا قمر

هي دايما الايام الحلوه بتعدي بسرعه

وبتفضل ذكري حلوه طول العمر

وان شاء الله هنشوفك يابنتي انتي نسيتي ولا ايه انا مربطه معاكي هتعزمينا علي حسابك اسبوع شكلك بتخلعي هههههه

ان شاء الله نتقابل يا قمر
وخيرها في غيرها
‏قال فرنسا هانم
انا زعلانه منك ومخصماكى
ومش
اموااااااااااه

لا

وحشانى جدا بس اسألى على خالتك فرنسا وشوفى جرالها ايه
‏قال Desert cat
دكتور حر
التانية
ما انا وضحتها ان هو ده طبع حواء
تحب الرغى
تحياتى
‏قال Desert cat
فرنسا هانم
حبيبتى
اخيرا ظهرتى
والله كنت قلقانة عليكى جدا
ومش عارفه اعمل ايه علشان اطمن عليكى
هو انا اقدر على زعلك يا حبيبى قلبى
تعالى هنا احكى لى كنتى فين وكان فى ايه
والله وحشانى موووووووووووت
اوعى تعمليها تانى وتقلقينى عليكى كدا
‏قال Desert cat
رحيق الحب
معلشى بقا يا قمرى
المرة الجاية مش هعتذر
بالنسبة للزوج الصالح فانا هجيب منه بنوتة علشان اجوزها أمر مش كلاكيت
منورانى يا جميل
‏قال oceaneyes
بحب انا اوى اللحظات الحلوة جدا واللقاءات اللى زى دى بتكون جميلة جدا

بس اللى مش حلو فيها انها بتمر بسرعة ..نفسى اعرف لله اللحظات الحلوة بتمر بسرعة

؟؟؟؟؟؟؟؟

بس نصيحة منى حاولى تعيدى اليوم ده تانى كمان ...وخصوصا لو عندك اكتئاب ...هاتلاقى نفسك طلعتى منه على طول


بعد الشر عليكى طبعا من الاكتئابات يعنى يا اختى


تحياتى يا جميل


:)
أنا بقى مهتم بالأولانية ؟
انتي مش مظبطة مواعيد الصلاة و لا ايه ؟
أزعل منك لو كنتي مش بتصلي الفرض بفرضه و بتكركبيهم على بعض
اكيد حلو القاء بين الاصدقاء
مدونين نعرفهمم باسم مدوناتهم ومره واحده نشوفهم قدامنا

بيكون شعور حلو ولو ان لسه ما جربتهوش

تحياتي على الوصف التفصيلي للقاء ده وربنا يجمعكم دايما على خير
‏قال Desert cat
منى
فعلا يا منى
الوقت الحلو بيعدى بسرعه
ميرسى يا جميل على روحك الجميلة
‏قال Desert cat
lastknight
يا فندم ده كان يوم محصلش
والزيارة خلصت بسرعه
والاكل كان فوق الوصف ( وش بيطلع لسانه )
وكمان قدعه البلكونة بتاعتهم ترد الروح
ولا أمر اساسا عسول
ها اتغظت اكتر ولا لسه ؟

جميل انك تترجم الخيال بالواقع
وتقابل ناس بيحبوك وتحبهم من غير ما تعرفوا بعض
ربنا يرزقك الصحبة الطيبة
تحياتى
‏قال Desert cat
إسلام
اللهم آمين
فعلا لو كل الناس عاشت فى حب كان زمان الدنيا حلوة
بس تقول ايه بقى
تحياتى
‏قال Desert cat
son's egypt
رائع انك تقابل ناس لاول مرة وتشعر ان فى تآلف بينكو وكانكو تعرفوا بعض من زمان
تحياتى
‏قال Desert cat
son's egypt
رائع انك تقابل ناس لاول مرة وتشعر ان فى تآلف بينكو وكانكو تعرفوا بعض من زمان
تحياتى
‏قال Desert cat
coca
اسبوووووووووع ولا اعرفك
انتى بتتكلمى فى ايه يا بنتى
طبعا احنا بينا معاد
بس انا مش فاكره بصراحة كان امتا
معلشى الزهايمر بقا
يا جميل انا اللى ماليش نصيب اقابل الناس الحلوة دى
بس قريب جدا جدا
ان شاء الله
فى اول فرصه هتلاقينى بقولك نحن هنا
قبلاتى يا حبيبى
‏قال Desert cat
oceaneyes
ان شاء الله
نكرر الزيارات
تانى وتالت كمان واحنا ورانا حاجه
انما ليه بتمر بسرعه دى حاجه يعلمها ربنا
المهم اخبار الامتحانات ايه
تحياتى يا قمر
‏قال Desert cat
مهندس مصري
بكركبهم على بعض ازاى يعنى يا بشمهندس
طب ده ينفع
الحمد لله بصلى
وربنا يتقبل منا جميعا
تحياتى
‏قال Desert cat
اسكندراني اوي
كلامك حضرتك صحيح
وان شاء الله تتلقى قريبا بمن تحب وتسعد بقائهم
تحياتى
أيوه كده ريحتي قلبي إلاهي يريح قلبك قادر يا كريم
وان شاء الله اللقاءات الحلوة دي تتكرر تاني بس على كبير
بس نبقى نلم فلوس من بعض علشان محدش حيقدر يقوم بالليلة لو كان عددنا كتير
يعني تخيلي مثلاً لو كل اللي بيعلقوا في مدونتك جم عندك السايبر مرة واحدة
حيقضوا على الأخضر و اليابس زي الجراد
:)
سلام يا قطة الصحراء و ياريت تديني رأيك في البوست الأخير عندي خصوصاً الفيديوهات اللي فيه
:)
‏قال Desert cat
مهندس مصري
ههههههههههه
طيب المهم قلب حضرتك دلوقتى مستريح
دايما ان شاء الله
بالنسبة للموضوع فتم التعليق يا فندم
تحياتى
‏قال Desert cat
مهندس مصري
ههههههههههه
طيب المهم قلب حضرتك دلوقتى مستريح
دايما ان شاء الله
بالنسبة للموضوع فتم التعليق يا فندم
تحياتى

المشاركات الشائعة