شعب للتجربة ... اه زى فيران التجارب كدا بالظبط



انتوا فاكرين الراجل ده .... ايون بالظبط كدا

هو ده اللى كان مترشح فى الانتخابات الرئاسية اللى فاتت واللى زاد وغطى انه ناوى يترشح فى اللى جاية اللى فى 2011 يعنى

هو عمره اساسا دلوقتى 92 سنة كل واحد يجيب الكالكيتور ويحسب معايا فى 2011 حيبقا عنده كام سنة .... علشان يحكمنا اصل نفسه يحكمنا ولو سنة واحده ... بصراحة احنا نبقا شعب مفترى وظالم لو مش انتخبناه على الاقل نحقق له امنيته قبل ما يقابل وجه كريم ....

ياباشا من حقك تترشح مقولناش حاجه .... بس ازاى اصلا حتحكمنا بعد ما وصلت ارذل العمر هو حضرتك فاكر نفسك حتحكم عيلين تلاتة فى البيت وممكن يكونوا عيال مشاغبين يوجعوا قلبك ويعجلوا بحياتك ...

خايفين عليك يا حج ده معاليك من الناس القليلة اللى من زمن الماضى الجميل واللى مبقا موجود منهم كتير دلوقتى ... مش عايزين واحد بلطجى من العيال المشاغبة يفجر نفسه مثلا ولا عبارة تغرق ولا قطر يتحرق واول ما تسمع الخبر تروح مننا وتضيع من ايدينا

حسك فى الدنيا يا حج

امنية حياتك تحكم مصر مقولناش حاجه بس ده لو فى حالة ان معاليك شاب بتلعب فى الاربعنيات الخمسينات الستينات لكن فى التسعينات لييييييييييييييييييييييه

هى مصر عجزت اوى كدا علشان حكامها يبقوا اللى فى التمانين واللى فى التسعين

وبرضه لالالالالالالالالالالا للاخوان المستسلمين على جثتى ان شاء الله

تفاصيل الخبر

الصباحي: أتمنى أن أكون رئيساً لمصر ولو لعام واحد وسأخوض انتخابات 2011

على الهامش

زى ما بلدنا فيها حاجات وحشة ودى كتير ففيها برضه حاجات حلوة

فبدأ القضاء يأخذ مجراه .... وبدأ بالفعل القانون يبقا فوق الجميع

بدءاً بعماد الكبير ومرورا بقتيل تلبانة والبقية تأتى

مبروك لاهل قتيل تلبانه

«تلبانة» تتلقي العزاء في «قتيلها» بعد الحكم بالسجن المشدد ٧ سنوات للضابط والمخبرين

Comments

وا اللهي هزلت لما الصباحي أبو طربوش عايز يعيش لحد 2011 و يحكمنا
و مش بعيد يدي صوته في الإنتخابات المزورة الجاية لجمال مبارك أو حسني مبارك أو مرشح الحزب الوطني أيً كان
يروح يشوف له تربة معتبرة خمس نجوم أحسن له و لنا
يابنتى ما هما دول الى عندهم الخبرة كلها
يعنى شوفى دة
بقاله عايش اد ايه
وتلاقيه شاف سعد زغلول
والملك فاروق وعرابى
وسعد متولى بتاع الفول ابو دقه حمرا
يعنى الراجل عنده خبرة وشاف المصرين فى كل الوقات
ايام الحرب وايام السلم
وشاف المصرين ايام ما كان الربع جنيه دةو
ياكل عيله وكام شحات فوقيهم
وشافهم ايام ما الربع جنيه دة ميجبش باكو لبان
يعنى هو دة الى يعرف تعامل معانا
وهو دة الى يعرف يجيب الحرميه ولاد ..... الارض ويعرف يلاعبهم ازاى
خبرة بقى خبرة

اترشح يعم الحج ولا يهمك
اترشح وكلنا وراك
لحسن توقع ولا حاجه
يقولوا علينا ايه شعب خيخه
عيب يابا دحنا شعب وشك والقبر على طول والله الراجل دة
مية مية
شوفى اديه داخل على تقفيل القرن اهو
ولسه عنده امل
انا بقى اعرف واحد
عنده 20 سنةوتخنق من حياته ونفسه يولعها
الله ينور عليك يعم الحجج والله
وربنا يخليك لينا
مصر محتاجلك

وشكرا يانانا
نجمه والله نجمه
Desert cat said…
مهندس مصري
هو تلاقيه كان قاعد فاضى فى ساعه عصارى بيشرب كوباية الشاى قام طقت فى مخه يحكم مصر
معلشى يا بشمهندس ده اد جدنا ولا زم نستحمله ربنا يقويه ويكمله بعقله
تحياتى
Desert cat said…
رئيس جمهورية كمورا مورا
يعنى تفتكر ياباشا يحكمنا ويلبسنا كلنا الطرابيش
يوووووووووه
الراجاله الطرابيش واحنا نرجع لايام سى السيد
والجنية الجبس
دى حتبقا عيشه فله
فاكر ايام ما كان الجنية يشترى قصر
واللى عنده فدانين طين يبقا من الاعيان
والله وحيرجع بينا الزمان تانى
وشاطرين بس واجعين دماغنا فى التلفاز طول النهار مصر بتتقدم بينا
مصر بتتقدم بينا
ده التقدم وضح فى اعلى درجاته وحنرجع لعصر الطرابيش
بس دعواتنا جميعا كدا بطولة العمر للحاج ربنا يطول فى عمره لحد 2011 ويحكمنا السنة اللى هو عايزها من نفسه يا جدعان احسن لما يموت نندم ونقول كان نفسه يحمنا سنة واحدة بس
عليه العوض
تحياتى
كان نفسي اكون صاحب اول تعليق بس نصيبنا كدة موش مهم
بالنسبة لمسألة الاستاذ الصباحي انا المرة دي هعلق تعليق جد شوية
يا حاج احمد روح احكم ابنك اللي بينك و بينه قضايا على رئاسة الحزب العائلي بتاعك الاول و بعدين فكر تحكمنا
و باتلنسبة لموضوع صوتك في الانتخابات تديه لمين انت حر انشالله تروحترشح مصطفى النحاس و هو ميت ماهي موش هتفرق كتير مانت برضه كنت عايز تدي صوتك لواحد ميت الاحساس
ووالله يا اختي العزيزة قطة الصحراء و يا احبائي المدونين مثل هؤلاء هم عائق حقيقي عن تقدم المجتمع
لكي الله يا مصر و يا شعب مصر
no chance said…
السسلام عليكم اسمحيلى اعللق فى مدونتك لتانى مرة اصلى استحليت الموضوع بعد اذنك موافقة ؟اوك مدام موافقة اتكلم بقى.............اولا لو كان عمر الراجل دة 92 سنة بجد زى مبتقولى يبقى على 2011 هيعمله اممممممممم 96 مش كتير يعنى زى مبتتكلمى مهو رئيسنا الحبيب هيكملهم بعد 15 سنة يعنى كمان تلت فترات بس تخيلى انتى بقى لما يحكمنا واحد عنده 96 سنة ههههههههههههههههههههه دى هتبقى حاجة تضحك والله ويقولنا انا هحكمكم مدامم قلبى ينبض هههههههههههههه طب بالذمة هيوافق على المدونات والغلاسة بتاعت العيال اللى بيكتبو فيها ولا هيكون راجل كبير مفيهوش دماغ لوجع القلب دة انا ممكن اوافق شرط يكون بيعرف يلعب اسكواش هههههه مهو دة هيكون بند اساسى بعد كدة وشرط انه يقلع الطربوش اللى هو لابسه دة بس انا ممكن اوافق عليه ببساطة لسبب منطقى وهو انه مش هيلحق يحكمنا 20
قصدى 25 سنة دى اول نقطة خلصنا منها.............. تانى نقطة وهو انك قولتى فى وسط كلامك انك مش عاوزة الاخوان يحكمو طب لى؟بجد انا مش لاقى سبب واحد مقنع لكل واحد مش عاوز الاخوان يحكمو طبعا حاجة زى دى مش هينفع اقنعك بيها من خلال تعليق لانك هتردى وانا مش هعرف اكلمك تانى بس بجد يا ريت تراجعى رايك فى الاخوان بعقلانية من غير سورى جهل او خوف وعاوز اسالك سؤال يا ريت ترددى عليه ومتقوليلش السئ فالاسؤ والكلام دة السؤال هو لو خيرتك بين الاخوان والحزب الوطنى هتختارى مين معلش رخخمت عليك بس استحملينى انا بقرا مدونتك طوالى ومتعشم فيكى اوعى تزعلى مننى .......................................خالص تحياتى
3ala asm masr said…
هى مصر ناقصه؟؟
لا حول ولا قوة الا بالله
3ala asm masr said…
هى مصر ناقصه ؟؟
لا حول ولا قوة الا بالله
Desert cat said…
ملك الكبدة
مش مهم ياباشا المدونة مدونتك واعتبر نفسك صاحب كل التعليقات
بالنسبة للحاج الصباحى فهو بيتمنى يا جماعه قولوا حاضر احنا معاك ياريس
اللهم اعلم بيه سنة 2011 هيكون فين
ربنا يديه الصحة بس ويكمل لسنة 2011 ووعد منى لو اترشح ونجح اجيب له كل صحابى ونعمله حفله للصباح الباكر وابقا قابلنى لو استحمل سهر للساعه 9 بالليل ويبقا هو اللى جابه لنفسه
تحياتى
Desert cat said…
no chance
بالنسبة للرد فى المدونة رد براحتك لانى شايفه انك بتتكلم فى حدود الادب والذوق ولو رايك مخالف لكدا انا مش حنشره اصلا
بالنسبة للحاج الصباحى فهو اساسا ميعرفش يعنى ايه اسكواش ده راجل من قبل حفر قناة السويس يمكن لو قولت له اسكواش يقولك هات بوء
بالنسبة للاخوان انت اتكلمت واصدرت قرارات من غير اصلا ما تعرف ردى ايه
واللى هو اساسا الاخوان مش سيئين ده الاخوان اسوأ من السوء نفسه
انت عايزنى اراجع فكرى فيهم من غير جهل او خوف
تعرف الجاهل مين اللى مش عارف حاجه عن تاريخهم واللى بينساق خلف شعارات وبيسقف لهم وهو اساسا مش عارف مين الناس دى ولا هدفها .. عرفت دولقتى مين الجاهل
بالنسبة للخوف
فانا مش خايفه منهم يكفى انهم محذورين عارف محذورين ليه لانك لو قريت تاريخهم الدموى وتعمقت فى مصدر اموالهم منين واتاكدت انهم لا يمهم سوى مصالحهم الشخصية وواخدين من اسلام شعارات يخفوا وراها الوجه الاخر لحقيقتهم المزيفة كنت عرفت انهم اجبن من انى اخاف منهم سواء انا او اى شخص عارف تاريخهم كويس
فى بعض الموضوعات عن الاخوان عندى فى المدونة تقدر تعرف تاريخهم من خلالها بس خلى عندك الشجاعه انك تشوف بدون جهل او خوف
بالنسبة للحزب الوطنى ام الاخوان
اشمعنا دول تحديدا اللى اخترتهم ... علشان هما اللى ظاهرين على الساحة طيب ما فى ناس تانية كتير محترمة لم تواتيها الفرصة
ولكن فى حاله انعدام الناس المحترمة يبقا نار الحزب الوطنى ولا جنة الاخوان المستسلمون
لانهم للاسف الشديد لا اخوان ولا مسلمين
تصدق الاخوان المسلمين دى كمان طلعت شعار
للضحك على الغلابة علشان يصدقوهم وينساقوا وراه معذورين اللى بيصدقوا الشعارات دى محتاجين التعاطف معاهم

تحياتى
Desert cat said…
3ala asm masr
ما هو كل واحد عايز ينهب فى البلد شوية يجى يقولك انا عايز احكم مصر
ربنا يستر علينا
مودتى يا جميل
Desert cat said…
3ala asm masr
هند اان بقالى فترة مش عارفه ادخل مدونتك
ليه ؟
Gloomy Day's said…
شئ مضحك بجد
عايز يحكم للحكم نفسه ويتسمى حاكم ولو لعام

ربنا يصبركم على البلاوي دي

تحياتي ياجميلة
Desert cat said…
Gloomy Day's
اه عايز يجرب فينا
لو كنا مسالمين وحلوين ومطيعين وبنسمع الكلام حيكم بقا بعد كدا
اتشقينا عليه حيسيب لنا البلد كلها
ربنا معانا
محبتى يا قمرى
بوست عسل

ادي نتيجه الديموقراطيه
بلا وجع قلب
venella_lover said…
ازيك ياقمر
انا شبهت علي الصورة مش ده الي عاوز يرجع ارتداء الطربوش؟

هقولك ايه بس؟ فعلا لا تعليق

ميرسي علي موضوعاتك الممتعة
سلامي ليكي
son's egypt said…
السلام عليكم
هم يضحك وهم يبكي ده اللي ي
ممكن اقوله
oceaneyes said…
ايه الاخبار المفرحة دى
اهى هى دى الاخبار ولا بلاش وخصوصا بعد البوست اللى كان قبل البوست اللى قبل ده ...

وضحكتينى والله

هى جت على العجوز ده يعنى يا قطقوطة
ماهى خربااااااااانة خرباااااااانة ان شاء الله

...

ما تدوقيش يا بنتى

...


:)
Fantasia said…
elblog bta3ek ekteshaf.. begad damek zy el3asal. w elmawdoo3 aslan mas7'ara ya3ni.. ma3lina.
shoofy ana ra2y elragel dah yeb2a ra2ees fa7'ry (zy elli bya7'od doktorah fa7'ryah kedda).. k noo3 mn eltakreem ya3ni w mokafa2tan leeh 3ala esraroh w tamasokoh b el7ayah 7ata a7'er nafas..
elragel dah elmafrood yeb2a ra2ees maragee7 muled elnabi.. aw kbeeroh awi yeb2a ra2ees mat7af tarabeesh mn 3'eer zer. laken el7a2 mesh 3aleeh.. el7a2 3ally 3amleeno 2aragooz yeda7ako beeh elnas 3alashan, 3alashan elsha3b ygeelo e7bat w yay2as.. y2oom ma7adesh yroo7 yeddy sotoh, 3alashan shayef en elmawdoo3 le3b 3yal.. la2 3yal eih, da elragel mn ayam el7'edewy ya3ni.. elmohen enhom mesh hysharko f el2ente7'bat, 2oom eih, nas tanya tsawat b elnyaba 3anhom. w elli 2alef elmara7ya elhazlya di yenga7.
bas ya reet geddoh my7'asta3sh menhom 2abl m3ad elserk da. w ya reet elnas tefham enha law ra7et mafeesh ay 7ad hye2dar yzawar wala yefred 3aleehom 7ad.
t7yaty leeki w 7'ales e3gaby b ketabatek.
Desert cat said…
اسكندراني اوي
اه طبعا ياباشا ده كدا منتهى الديمقرواطية
ربنا يشفيه ويزيح عنه قادر يا كريم
دمت يود استاذ اسكندرانى
Desert cat said…
venella_lover
الله يسلمك يا حبيبتى
ما و فعلا الواحد من شدة الاحباط اللى بينتابنا يبقا مفيش اى كلام غير لا تعليق
دمتى بكل حب
Desert cat said…
son's egypt
اه والله صدقت
الواحد اعصابة تعبت من اللى كل يوم بنسمعه ونشوفه
وده اخرة صبرنا
عجبى
تحياتى
Desert cat said…
oceaneyes
على فكرة انتى واحشااااااااانى جدا
اخبار الامتحانات ايه طمنينى
بالنسبة لعمى الحج ده فهو بيحلم
او سيبيه يا قلبى يتمنى ربنا يديله الصحة ويديله امل ده ان عاش فعلا لسنة 2011
الاعمار بيد الله طبعا
المهم انا فرحانه برجعوك
ومش تنسى تطمنينى على اخبار امتحناتك
امواااااااه
والله انا حاسس انك حاطه الموضوع دا علشان الناس تفول على الراجل دا علشان يموت ويريح دماغنا من انتخابه فى 2011 بس دل غيب ولا احد يعلم الغيب واذ كان حسنى مبارك هيموت ولا لا واذ كان جمال هيدخل الانتخابات ولا لا بس نرجع فى الاخر ونقول دا لو شاف كونداليس رايز متحكمه فيه هيموت من السيطره اللى هتفرضها عليه ولا الاتفاقات الدوليه المزعومه يعنى مقفوله من كل الاتجاهات وسكن الكلام
Desert cat said…
Fantasia

The viewpoint fully in place that actually end in Bihrk this person to become a joke for all
God Ihdi and improves conclusion all
I am very happy because tribute blog and happy harm that blog gained liked
love
ياسلالالالالالالالالالالالالالالالالالالام
حسبنا الله ونعم الوكيل

ربنا يديك طوله العمر ياحاج
والله يا جدعان انا موافق
اهو حتى يبقى تغيير
ع الاقل ده لو عاش ل 2011 مش هيعيش لمدة 25 سنه يحكمنا فيها
مش تابيده يعنى
انا نفسى فى تغيير


تحياتى
علاء
يا ست القطه والله اهو تغيير بردو
حتى لو عنده 100 سنه اهو حتى ع الاقل مش هيقدر يكمل 25 سنه فى الحكم زى الريس كده
عموما ربنا يحيينا ويحييه
تحياتى
علاء
Desert cat said…
عاشقه الفردوس
ههههههههههههه
انا شايفه انه محتاج دعواتنا فعلا
ربنا يهديه
محبتى
Desert cat said…
عايش ولكن
ما هو كلنا نفسنا فى التغيير
بس مش للدرجة دى يعنى يا استاذ علاء
تقريبا محتاجين حد يفهمنا وينفذ طلبتنا مش يلبسنا الطرابيش لامؤاخذه
احترامى وتقديرى
يابنتى متسبيه يترشح
وفيها ايه
هو يوصل بس الاول للمكان دة الى بيترشحه فيه وبعد كدةنتكلم
هو اخره يوصل لحد نمص المسافه وبعد كدة حيقولك قلبى وكليتى وودانى كبرت وهبا واحد اتين والتلاتنه حتلاقيه قايم واقع على ومحطش منطق
ولو ربنا كرمه حيوصل لحد الباب
و الخطة التانيه حتبقى فى عربيه الاسعاف زوحتى لو اترشح ونجح
هما يومين يقضيهم معنا
وتالت يوم حيجيلى ادفنه حى
مش حيستنى حتى الكام ساعه الى فضلله
عادى يعنى كأنه مترشحش
اساسا
بس نعمل ايه بقى واحد مصرى نفسهخ فى حاجه ادوهاله
مش يمكن دة الى يطلع فيه البروتين الى حيغذينا بيه

وعلى رئ المثل
يوضع سره فى اضعف خلقه
قصدى اعجز خلقه
Desert cat said…
ماشى ياباشا حنعمله اللى هو عايزه
مش بقول شعب للتجربة
تحياتى
oceaneyes said…
ربنا يخليكى ليا يا رب يا قطقوطة

انا الحمد لله تمام والامتحانات بتاعتى كانت 100 100 وكويسة

ماعدا مادة واحدة كدة بس ده راجع لغباء الدكتور ورغبته فى الانتقام مننا ...فاهمانى انتى اكيد


غير كدة الحمد لله على كل حال


واحشانى كتييييييييييييييييييير بجد


(K)

امواااااااااااه
lastknight said…
بصى بقى .. أنتى بتحقدى على الراجل .. أنتى كنتى بتشاغليه و شايفه أنه عريس لقطه لكن هو طنشك عشان كده أنتى متغاظه منه .. صح ؟ عموما ماتزعليش .. هاشوف تليفونه و اقوله فيه واحده معجبه بيك اسمها قطة الصحراء .. و مقطعه شراشيب قلبها من الهوى .. و ربنا يسهل يحن عليكى .. هاهاه
____

تجرة مين يا قطه .. المسأله مش فى أداء هذا الشعب و لا قياداته الملعونه .. المسأله فى مساحة التهاون التى يقدمها هذا الشعب فى حقوقه .. حتى تجترىء عليهم الكلاب الضاله .. و لا يجد أى مهووس أو متخلف أو مدعى تخلف أى غضاضه من شر فكره الشاذ فى صورة دعوه عامه .. سيدتى .. ما الفارق بين طربوش الصباحى ؟ و طرحة بن لادن ؟ سيدتى كلاهمات غطاء للرأس جسدا و أفكارا .. كلاهما تغييب .. المصيبه أن هذا الشعب المتهاون ألى أقصى دريجه يسمح لكلاهما بالتفاهه .. الصباحى أو بن لادن
تحياتى
fanan fa2eer said…
والله يابنتي أصل البلد بقت ملطشة بقي كل من هب ودب يقول أجرب

مش ده الراجل بتاع الطرابيش؟

ربنا يكرمه ويبطل يحلم كتير

قال 2011 قال

ومايحلمش كدة ليه صحيح ماهو شايف غيره مبلط وشكله كدة هيحكمنا للقرن القادم ربنا يستر
كفاية عليكي تعليق واحد جاد
ملك الكبدة رجع يهيس من تاني


والله لو قارنا فضيلة التغيير بغض النظر عن الشخص
فإن اي صفيحة زبالة افضل مليون مرة من عبده كفتة )على راي واحد مصري)
عموما اقصد اقول ان الاثر الايجابي للتغيير افضل ميتين مرة من سلبية استمرارية هذا البتاع

كان هذا تهييسا خالصا من ملك الكبدة
الكاستن said…
يا جماحه الراجل ده نفسه يدخل جون فى الوقت الاحتياتى او بعد مالمتش خلص

نفسه يرجع التربوش اسمى طموحاطه

ربنا يعينه
Esmat said…
قططنا الرائعة
الف تحية ليكى يا قمر، هى حصلت أصلها ناقصة يعيدوا المسرحية اللى فاتت تانى ، رحمتك بينا يا رب بقينا لعبة فى إيديهم
ومش بعيد ربنا يطول فى عمره ويعمل نيو لوك
و نراه فى 2011 ، طالما الحكومة بتدى فلوس لمن يشترك فى المسرحية والظاهر إنه طمع والفلوس خلصت بتاعة المسرحية اللى فاتت

احلى خبر فعلا الحكم ضد بلطجية النظام بالإدانة والله ده اللى يفرح القلب فعلا
يا رب ينصر ديما المظاليم
أحييكى يا غالية وديما فرحانيين بإدانتهم
عقبال البلطجية الكبار
تحية وتقدير يا احلى قطة
لا يا قطه لا ملكيشى حق حرام عليى ده الى قاتل وحيتعدم بيسالوه رغبتك الاخيره ايه والراجل ملتزم وعايز يلبس الشعب المصرى الطربوش قال يعنى لسه ملبسهوش من 26 سنه
جرام عليكى سيبيه يحكم مصر ما هى بقيت حقل تجارب للفكر الجديد وكل من هب ودب عايز يمسك الحكم
وحسبى الله ونعمه الوكيل
Desert cat said…
oceaneyes
الحمد لله يا قمر
يارب دايما من المتفوقين
وان شاء الله المادة اللى راجعه لغباء الدكتور تجيبى فيها تقدير عالى
محبتى
Desert cat said…
lastknight
استاذى الغالى
فهمت قصدى من ورا تشريد هذا الصباحى وليس بهدف الحكم انما بهدف انه منفض لى منذ قديم الازل
القاسى
م عايز يحن عليا حتى بنظرة من تحت النظاره

للاسف يا استاذى توعدنا على الاذلال
فلا يستطيع احد ركوب ظهرك الا اذا كنت منحنيا
واحنا على طول منحنى لكل من هب ودب
احترامى وتقديرى لشخصك الكريم
Desert cat said…
fanan fa2eer
اهو كله عمال يحلم
اللى بيحلم بالتغيير
واللى بيحلم بالحكم
بس يارى مين اللى حلمه حيتحقق فى الاخر
اللى بيحلم بالتغيير
ام
اللى بيتحلم بالحكم
الاجابة
الله اعلم
تحياتى
Desert cat said…
ملك الكبدة
اذا كان التهييس بيطلع آراء زى الفل كدا
يبقا خليك مهيس على طول
ههههههه
تحياتى
Desert cat said…
الكاستن
ومالوا لما يرجع الطربوش ما احنا كدا كدا متربشين على الاخر
ربنا يهديه
Desert cat said…
Esmat
حبيبتى منورانى دايما ياااارب
كنت قلقانه عليكى لما قريت عندك البوست الاخير
طمنينى على احوالك يارب تكونى بخير
بالنسبة للحاج اللى عايز يحكمنا فده اخر امنيه من الدنيا
الواحد مثلا فى ايامه الاخيرة بيطلب منجاية جوفاية موزاية كوبايه مية من البحر الاحمر
مش يحكم جمهورية بحالها
ربنا يهديه
بالنسبة للحكم على بلطجية النظام
فدائما ما ضاع حق ورائه مطالب
وربنا يصبر اهل القتيل
دمتى بكل حب
Desert cat said…
رئيس جمهوريه نفسى
ياباشا انا مش معارضه الراجل يطلب اللى نفسه فيه
انما مش يحكم البلد ونقول نحقق له اللى نفسه فيه
على اساس انه بيتوحم ولا ايه
ههههههههههه
والله هم يضحك
ربنا يكمله بعقله
على رايك ما احنا كدا كدا لابسين طرابيش
تحياتى
سها said…
ربنا يديله الصحة
يعني هيا جت عليه
مش معقول .. أنا ضحكت ضحك .. بصراحة موضوع جامد

و خلاص يامصر .. مابقاش فيكى إلا فاصلى الشحن يترشحوا رؤساء جمهورية

و الله الراجل دة عبقرى و فلتة من فلتات الزمن .. و رمز من الرموز اللى بتجسد مقولة "لا يأس مع الحياة و لا حياة مع اليأس" .. دة بافتراض إن الحالة اللى هو عليها دى اسمها "حياة"ا

و الله ضحكتينى كتير
معلش الراجل نفسه فى حاجة نحقهاله قبل ما ما .... ربنا يديله الصحة يعنى ريحوه يا جماعة حرام عليكوا

ع الهامش مبروك عن مضض لعماد الكبير و قتيل التلبانة لان المجرمين كانوا المفروض يتعدموا انما باه نص العمى و لا العملى كله
agamoooo said…
غريب أمرنا
اليس من حق كل انسان ان يكون له رأى
هذا هو رأى احمد الصباحى
وهو حر فيه
كما ان رايى ان ان اختار غيره فهو ايضا حق لى

فديموقراطيا من حقى وحقك ان تقول رأيك ولكن بلا اسفاف وبلا خطأ
وليس معنى هذا اننا فئران تجارب ما شرعه لى الدستور والديموقراطية التى تناشدون بها هو ماجعل الرجل يضع تصوره
ومن حقى ان ارفض او اقبل
ممارسة الديموقراطية التى تبغونها لابد ان تبدأ بأنفسنا
تقبل الرأى الاخر او عدمه هذا شأنك وشأنى ولكن الشو الذى يحدثه البعض ليعلن رأيه ففيه كثير من الديكتاتورية
Desert cat said…
سها
اللهم امين
على رايك ما هو كل اللى عايز يعمل حاجه بيجى يعملها فى مصر
مودتى
Desert cat said…
ابن حـجـر الـعـسـقـلانـى
يا محمد الراجل عنده امل فى الحياة
ده حتى لثه ثوغير
خليه يفرح بشبابه حبتين
بالنسبة لقتيل تلبانه فاهله اخيرا تقبلوا فيه العزاء مع انى اتفق معاك الحكم مخفف
الا اخبار احمد ايه
لسه بيخدم الوطن
تحياتى
Desert cat said…
عاليا حليم
حبيبتى منوردة البلوج
الراجل ده المفروض نشجعه اصله لو بقا رئيس فعلا حيرجعنا لايام الجنية الجبس وحتبقا العيشة هنية
هههههههههههه
بالنسبة لقتيل تلبانة
فما ضاع حق ورائه مطالب
لو فعلا كل واحد طالب بحق ابنه او اخوه اللى اتقتل فى قسم شرطة مش حنسمع ابدا عن الحالات دى لانهم هيكونوا عارفين ان الشخص اللى بيعذبه ده لو مات اهله مش حيسكتوا
محبتى يا قمراية
Desert cat said…
agamoooo
استاذى
اتفق معاك
لكن الا تلاحظ معى انه يجب ان يكون هناك حدود للديموقراطية
والحرية فحريتى تنتهى عند حرية الاخرين فما بالك من شعب باكمله يعنى المفروض كل واحد يفكر شوية قبل ما يمارس ديموقراطيته اللى ممكن يأذى بيها الناس
تحياتى
انتوا مدايقيين ليه واحد لسه فى ريعان شبابه حلوه ريعان دى وعايز يحكم بلده انتوا نسيتوا ولا ايه احنا فى بلد ديموقراطيه اى حد عايز يحكم مايحكم هيه هتخرب اكتر من كدا ايه


مشكوووووووووره جدا يا قطه

لولو
Desert cat said…
البنت الشقيه
اه طبعا يا لولو
حرية الترشيح مكفولة للجميع
ةمن حق الكبير يترشح
منورة البلوج يا لينوو
المشكلة إن الراجل دة فى الانتخابات الرئاسية اللى فاتت أعلن و قال إنه بيدى صوته للرئيس مبارك .. لأنه أحق بالرئاسة من غيره .. و هو شارك فى الانتخابات من أجل "تفعيل المشاركة السياسية" ليس إلا (و طبعا ضرب طبنجة على النص مليون اللى أخدهم من الحكومة على حس تدعيم حملته الانتخابية) .. الراجل دة (أقصد الصباحى طبعا(-: ) أفكاره كلها تأتى من وحى اللحظة .. يعنى معاهم معاهم .. عليهم عليهم .. لكن دة ما يمنعش إنه بجد راجل ظريف و بن نكتة

و ربنا يديله طولة العمر

------------

المعلم أحمد الباحث لسة بيخدم الوطن .. و أخباره مقطوعة عننا تماما .. أنا مش عارف هو طول ليه ؟؟ ربنا يرجعهولنا بالسلامة
منى said…
شفتى بقى يا قطه اهو ده واحد وصل من العمر ارذله لسه بيحلم وعنده امل
يا ريت كل الشباب يبقوا عندهم امل
بس مش فى الرئاسه طبعا
ههههههه
OverForty said…
يا جماعه لسه بدرى على الراجل ده فى عز شبابه فى نكته اتقالت على واحد قاعد على قلب شعبه من سنين و سيظل الى ان يقضى الله امر كان مفعولا
النكته ايه بقى
فى عيد ميلاد الراجل ده واحد من الحاشيه جاب له هديه زحلفه فساله هى الزحلفة دى بتعيش كام سنه
قام رد عليه و قاله قول متين تلتميت سنه كده يا ريس
فقاله طيب يا سيدى ادينا قاعدين و حنشوف الميه تكدب الغطاس
:)
Esmat said…
قطقوطة تحياتى لكى يا قمورتنا

يا رب ديما تكون بخير
حبيبتى أنا قلقانه اوى على فرنسا
متعرفيش حد يكون من المقربين ليها
بجد غيبتها طولت يا رب تكون بخير

واحلى مساء عليكى
tazart said…
سعيدة بالتعرف إليك
و لأكمل الستين تعليق
Desert cat said…
Esmat
حبيبتى انا والله ما اعرف عنها حاجهولا عارفه حد من صحابها
انا كمان قلقانة عليها جدا
ياريت لو حد يعرف يوصلها لها يبلغنا
او يطمنا عليها
تحياتى ليكى يا احلى عصمت
فعلا زى ما تخيلتك انسانة رقيقه
يكفى اوى اهتمامك بينا وسؤالك من غير ما تعرفينا شخصيا
امواااااااااااه
Desert cat said…
tazart
انا اسعد
ويارب دايما منورانى
Marvel said…
قريتي بقيت الخبر..بيقول انه اتخانق مع ابنه وعزله من منصبه..وعين مكانه زوجته

واضح ان مفيش غيرهم هما التلاتة في الحزب
أنونيمس said…
يا ستي بجملة الأنتيكات الموجوده
وبعدين احنا بلد الآثار والأهرامات
يعني جت ع الراجل ده
ده حتى لسه شباب وعريس جديد بجد والله لسه كان ف المستشفي من قيمة شهرين وكان لسه متجوز طازة زي ماواحد صحبي شافه وقالي

يعني الراجل لسه شباااااااب

بس امسكي انتي الخشب بس
:))
____
دكتور حر said…
يعني انت مسكتي الراجل عملتي فيه كده

طب ماهو التاني زيو

ولا ابو تمانين اللي حلو


ربنا ليكي يامصر

نورتي مدونتى ويا ريت تشرفينا دايما
مش ده عم الظريف أبو طربوش ؟..عمك ده طلع في المصري اليوم و قالك أنا حنتخب جمال مبارك لو رشح نفسه للرئاسة وإنه ينفع رئيس تخيلي ليه؟
عشان وسيييييييييييم الرئاسة بقت بالوسامة يا جماعة..غطوني و صوتوووووووووووووو..و ألف مبروك لأهالي تلبانه..مش كان لازم نوزع شوكولاته برضه؟
Desert cat said…
Marvel
طيب كويس والله الحزب التلاتاوى ده
الراجل ده ليه الجنة
ربنا يهديه
تحياتى
Desert cat said…
أنونيمس
والله يا دكتور احنا تعبنا بقا من الانتيكات
يعنى نخلص من انيكات عمرها 80 سنة يجى لنا انتيكه 92 سنة
ده احنا على كدا بلد الصبار مش قاهره المعز
تحياتى
Desert cat said…
دكتور حر
طيب ما هو مش معنى كلامى انى موافقه على ابو تمانين يا دكتور
انا بقول نخرج من التمانين نقع فى التسعين
يعنى مينفعش حاجه فى الخمسين حتى
تحياتى
Desert cat said…
أحمد المصري
يا احمد انت فى بلد العجايب
يعنى شوية 80
شوية 90 وبعد شوية حنلاقى 100
تحياتى يا احمد
ياسلام على زعيم الترابيش
ادوله فرصته وكله هيلبس تربوش مجانا
ايه ده
دا أنونيمس بيقول لك انه الصباحي لسه متجوز من شهرين
ليييييييييييييييييه
خدته على ماله و لا على جماله
يا واخد الصباحي على ماله يروح المال و يبقى الطربوش على حاله
حسرة علينا اللي مش لاقيين نتجوز
Desert cat said…
محمد السلامونى
زعيم الطرابيش عايز يلبسنا الطرابيش طب ما احنا لابسينها
اصلا
تحياتى
انا عن نفسى بقول الراجل الصباحى ده لازم نحاكمه لانه بدد اموال الدوله
اخد مليون جنيه ع الفاضى و قال انا لو كسبت هتنازل لمبارك
انتى عارفة بقى حكم السن الراجل خرف من زمان اوى يعنى
مش كفاية اللى حاكمنا دلوقتى بسنه ده

و بعدين ده مطلوب جدا يا بنتى امال هيبقى فين المنافسة فى 2011 مهو لازم تكون من العينة دى و ابقى قابلينى لو اخترتى بقى

تحياتى
Desert cat said…
مهندس مصري
قول انك بتحقد عليه يابشمهندس
الراجل معاه فلوس وعنده 92 سنة
من حقه يتجوز واحده عندها 18 سنة
Desert cat said…
محمد مارو
اه يعنى احنا ندفع ضرايب وتاينات ومخالفات
علشان الصباحى يقبض
منه لله
Desert cat said…
محمد ياسر
اممممممممممممم
يعنى تفتكر ان دى لعبة ذكية علشان المنافسه تبقا نار نار على الريس الجديد
ومش يبقا قدامنا حل غير لاختياااااااااار
تصدق افكارهم ذكية
Desert cat said…
OverForty
هههههههههههههههه
هى دى الناس اللى عندها امل فى الحياة العمر كله
شكله ناوى ينافس ابو الهول والاهرامات

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز