رايحين بينا على فين ؟؟؟؟!!

يعنى من كام يوم يغلوا سعر الكهربا فى السر ولولا العناية الالهية اللى ساقتنى لمصراوى علشان اتصنت عليهم واكشف سرهم واجى هنا واشرد لهم ... كنا اتفاجأنا بارتفاع سعر الكهربا وحتى لو اتفاجأنا هنعمل ايه يعنى .... سنشجب سنستنكر ده ان حصل بالفعل يعنى ومش كل واحد حط لسانه فى بؤه لا مؤاخذه وقالك عايز اربى عيالى
ولسه مش فوقت من الصدمة الاولى بتاعه ارتفاع سعر الكهربا ... وعمال احوش فى الفلوس اللى هدفعها لشركة الكهربا فى آخر الشهر
والاقى النهارده خبر تانى بيصدمنى اكتر واكتر وهو ارتفاع زيادة سعر الدواء والمضادات الحيوية .... الاقيش حد يجاملنى ويرقع لى صوتين اصل انا صوتى اتنبح من كتر المفاجعات اللى عمال تفجعنى طول الشهر ده ... ما هى البركة باينه من اوله ... كابسه من امن الدولة مش حد يقولى قرفتينا بيهم وفى كل بوست تقولى امن الدولة لما عملتى ليهم فضيحة عالمية وزهقتينا منهم لانى بصراحة مش قادرة انسى اليوم ده ولا حنساه ... والمفاجعة التانية ارتفاع سعر الكهربا والمفاجعة التالتة اللى فعلا جابت اجلى وقضت عليا ارتفاع سعر الدوا ... بما فيهم المضاد الحيوى
ابياموكس 500 وارتفع سعره من ستة جنيهات الي ثمانية جنيهات للعبوة 12 كبسولة
وده انا بستخدمه كتير جدا ومينفعش يخلص من عندى اصلا لان عندى واوا يح ... طيب افرض انا افتقرت فجأة ومش معايا الـ 8 جنيه دول اسيب الواو يح توجعنى كدا .... بقا يرضيك يا سيادة الزير سورى يعنى الوزير .... كل واحد من المتسكعين يووووووه الكيبورد اللى بتغلط مش انا المقصود منها المسئولين يجى يقولك الشوباب دول ولادنا ..... طيب ما احنا برضه من الشوباب ولا علشان الواوا يح خلاص مش مصنفه انا من ضمن الشوباب ...
طبعا مش ده لوحده اللى سعره ارتفع ده حاجات كتير بس انا ذكرت اللى يهمنى ( اهئ اهئ اعاااااااا واحد مبهدل نفسه من العياطط يبقا انا )
طيب الحاجة فاطمة جارتنا اللى لا تملك من الدنيا غير الـ 70 جنيه معاش السادات وعندها كوكتيل من الامراض وعايشه لوحدها لا عائل ولا نائل حتى يديها 2 جنيه فى الشهر علشان يبقا مجمل دخلها 72 جنيه ... حتجيب علاج منين لكوكتيل الامراض اللى عندها دول ولا مكفينها تشترى بيهم شوية لب يسلوها فى وحدتها لامؤاخذه .... رايحين بينا فين وعايزين مننا ايه وبتعملوا فينا كدا ليه ... الناس الغلابة اللى مش لاقيه عيش حاف وجسمها مهرى من الامراض .... من اكل مسرطن لمية مجارى بيبلعوها وهما ساكتين ده ان لقيوها اصلا لدم فاسد ومش بيشتكوا وعايشين كافيين خيرهم شرهم هيعملوا ايه
ست جارتنا تانية كانت بتتكلم مع ماما وانا كنت نايمة بس الصوت خرم ودنى لانها تقريبا كانت بتصوت مش بتتكلم بتقولها سمعت ان انبوبة البوتاجاز حتبقا بعشرين جنيه ... شوفتى الافترا ... ماما مصمصت شفايفها وقالت لها شوفت بس هنعمل ايه يمكن ربنا يحط الرحمة فى قلوبهم ويرجعوا فى كلامهم .... الست قالت لها ما هم لو عملوا كدا حد الله لارجع لبابور الجاز هو انا لاقيه ادى العيال مصروف المدرسة الصبح لما املا انبوبة بـ 20 جنيه ... ماما قالت لها اللى يخليهم يرفعوا سعر الانبوبة مش هيخليهم يرفعوا سعر الجاز ربنا يلطف بينا ...
... رايحين بينا لفين يا بشر ... شوية رحمه من فضلكوا ده ربنا اسمه الرحمن الرحيم ده لو كنتوا لسه فاكرينه
تفاصيل الخبر بقا علشان اللى عنده حد بياخد ادوية بعد الشر بعد الشر يعنى على البلوجرية وذويهم لما يروح يشترى دوا يبقا عامل حسابه فى السعر الجديد
وزارة الصحة رفعت اسعار 70 نوع دواء بينها 47 مضادا حيويا

Comments

Tamr7na said…
ايه دة اول تعليق

يلا

رايحين بينا على فين ؟؟؟؟؟
على الجنة و نعيمها ان شاء الله

سبيها لله و ووكيل امرك لربنا و قولى يارب

تحياتى
(green eyes) said…
مش ممكن انا اول تعليق
هيييييييييييييييه
الف سلامة عليكي يا حبيبتي وربنا يشفيكي ومتحتاجيش ابياموكس دا والواوا اللي عندك تخف
بس معتقدش انها هتخف لما تسمعي الخبر الجديد اللي انا سمعته كمان وبيقول الخبر انهم هيشيلوا الدعم بجانب انبوبة الغاز على رغيف العيش
شوفتي مصر بتعمل ايه في الناس !!!
هي اكيد بتعمل كدا علشان تحاول تخفف من الازمة السكانيه
يعني بالبلدي بتقول للناس روحوا موتوا أوفر
ولسه ياما هنشوف
سلام
coca said…
عيل اد المفاجعات اللي بتزليه كل شويه بش انتي عسسسسسسسسسسسسسل بجد

اما رايحين بينا علي فيين راحين بينا في داهيه اكيد واحنا شعب غلبان وساكت
عارفه انتي النكته بتاعه حسني مبارك
حب يقرف الشعب ام حاطط اتنين ضباط علي الكوبري واي عربيه تعدي ينزلوا اللي راكبين ويضربوهم علي قفاهم علشان حد ينطق ومبارك يبهدلوا
الناس بقت تتضرب وساكته وشويه والضباط سمعوا واحد بيزعق قالوا هو دا المشاغب
راحوا سالوه بتزعق ليه
قالهم
ياباشا بس وقفوا ضباط كتير علشان نضرب بسرعه ونلحق نروح اشغالنا
هي دي مصر يا عبله
اول تعليق اهو اول جميله يعني
Esmat said…
ولاد الإيه وإختاروا موسم بداية الشتا
و ده اللى أدوار الأنفلونزا فيه بتبقى
وراء بعضها عند الناس
خلاص بقى نرجع للمضادات الحيوية الطبيعية
يعنى ياختى يا قطقوتى كل واحد يقوم الصبح
يأكله رأس توم وبصلاية
ونرجع للمبة الجاز والسبرتاية ووابور الجاز على رأى
جارتك اعانها الله واعان كل الشعب
المصرى
ربنا يرحمنا برحمته
تحياتى يا عسل
العزيزة قطة الصحراء

حاسبي على نفسك، لحسن انت كمان تلاقي حد رفع عليك قضية بتهمة إثارة الشائعات والاضرار باقتصاد البلد.

احنا محتاجينك

عميق تحياتي

ضياء
Anonymous said…
مع انى زعلان منك بس متضامن معاكي
(green eyes) said…
انا اول تعليق
هيييييييييه
الف سلامة عليكي يا نونو من الواوا يح اللي عندك ان شاء الله متحتاجيش للدوا بتاعك دا تاني
بس عاوزه اضيفلك حاجه كمان سمعتها هو ان الحكومة المصرية هتشيل الدعم من رغيف العيش كمان يعني مش الانابيب وبس
طبعا انتي عارفة ليه علشان تخلي الناس تروح تموت احسن ةبكدا تكون حلت مشكلة الازمة السكانيه في مصر
امال انتي فاكرة ايه سياسه بتحل سياسه تانية
هههههه
ولسه ياما هنشوف
Desert cat said…
ياااااااااارب
منورة اول تعليق
Desert cat said…
(green eyes)
انا سمعت فعلا ان رغيف الفينو بقا بـربع جنيه والحسابه بتحسب
انا مش فاهمه الناس دى مش عايشه فى البلد وشايفين حالة الناس الاقتصادية عاملة ازاى
لا حول ولا قوة الا بالله
محبتى يا جميله
Desert cat said…
coca
تصدقى ان النكتة دى بقا واقع احنا عايشينه فعلا
انا مش قادرة افهم ايه الذل اللى الناس مستلذه بيه ده
ربنا قادر على كل قادر
مودتى
Desert cat said…
Esmat
دى المشكلة كمان بقت فى كل السلع الغذائية مش فى الادوية بس
آل ايه مصر بتسترود 60% من السلع الغذائية
والله الناس شكلها حتموت من الجوع
وشكل مصر حتبقا صومال تانية
ربنا يستر
محبتى
Desert cat said…
د. ضياء النجار
ااااااااااه
ربنا يستر يا دكتور
مش حوصيكو لو غبت يومين تيجوا لى عيش وحلاوة وتسالوا عنى
دمت بود
Desert cat said…
Anonymous
ولا اعرفك
Desert cat said…
(green eyes)
الله يخليكى يا حبيبتى ومنجلكيش فى واوا يح ابد
بالنسبة للزيادة فهى شملت كل حاجه
والرغيف الفينو بقا بربع جنيه
لوووول
مش حقول غير
يااااااااارب
انت عارف بقا
محبتى
اموااااااااه
no chance said…
تعرفى انا بقيت افرح لما حاجة تغلى الشعب دة مش هيقوم ويتكلم غير لما ميلاقيش ميا يشربها بجد والله احسن خليهم يغللو براحتهم بس بكرة لما الناس تخرج تقول عاوزيين نشرب وناكل يبقو يشوفو هيعملو اى .......واحد قاللى مرة ان الصين زماااااااااان وصل بيها الحال ان من كتر الفقر الواحد كان بيبيع ابنه علشان ياكل شوفتى احناا بقى هنبقى زى الصين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لماضة said…
الحمد لله انى مش صيدله ولا كان زمان الدعوة وصلتنى
ههههه
والله يا قطتى عندك حق ماساه ما بعدها ماساه وما خفى كان ا عظم
الخيبه ان الادويه كمان مش متوافره لا فى تامين صحى ولا مستشفيات اميريه
ولو توافر البديل بتاعها يبقى الله يرحمه كان راجل طيب
kmora said…
الحمد الله
انا كنت فاكرك حتقولى غلوا العيش
بس الحمد الله طلع الدوا
ياله المهم
يابنتى اساسا
الحكومه من شهر كدة فى المؤتمر بتاع الحزب الوطنى
قالوا انهم حيلغوا الدعم عن كل حاجه
يعنى مش فى السر ولا حاجه
ومحدش ساعتها اتكلمولا حد اعترض
وكله كان موافق والكل فرح لما قالوا انهم حيدوا الشعب فلوس

نيجوا دلوقتى بعد مبدئت الحكومه تنفذ تقولوا لا
لا دحنا لسه كمان فى الاول امال لما يغلوا الدقيق حنعمل اليه
لاحول ولا قوة الا بالله
دحنا حنشوف ايام اسود من قرن الحروب
ربنا يستر
kmora said…
الحمد الله
انا كنت فاكرك حتقولى غلوا العيش
بس الحمد الله طلع الدوا
ياله المهم
يابنتى اساسا
الحكومه من شهر كدة فى المؤتمر بتاع الحزب الوطنى
قالوا انهم حيلغوا الدعم عن كل حاجه
يعنى مش فى السر ولا حاجه
ومحدش ساعتها اتكلمولا حد اعترض
وكله كان موافق والكل فرح لما قالوا انهم حيدوا الشعب فلوس

نيجوا دلوقتى بعد مبدئت الحكومه تنفذ تقولوا لا
لا دحنا لسه كمان فى الاول امال لما يغلوا الدقيق حنعمل اليه
لاحول ولا قوة الا بالله
دحنا حنشوف ايام اسود من قرن الحروب
ربنا يستر
يا هريرة الصحراء دى خطة محكمة عشان يحدوا من الزيادة السكانية .. إزاى ؟؟

إنهم لما يغلوا سعر الكهربا الناس هايصيبها المرض .. فلما يروحوا يتعالجوا .. يلاقوا العلاج غلى .. يا إما هايموتوا من الصدمة .. أو هايموتوا من عدم تعاطى العلاج .. و طبعا اللى مات دة هاتكون الحكومة كفرت سيئاته قبل كدة .. فربنا يسهل و يدخل الجنة بإذن الله

بسيطة أهى يا جماعة.. شوفتوا بقى الحكومة عايزة مصلحتنا ازاى ؟؟
منى said…
ايه يا قطه هى دى غريبه عليهم؟
مهما لازم يعملوا اللى عليهم وينعشوا الخزانه اصل فلوس الخصخصه والقناه و و مش عامله حاجه اصل هما بيبصوا لبعيد يعنى احنا الناس اللى تحت لزمتنا ايه لا بنطلع فى التليفزيون ولا عندنا عربيات وقصور قد كده يعنى زاحمين البلد على الفاضى انما الاولى بالرعايه الناس الطيبه اللى اسمهم مستثمرين يعنى يخفضولهم اسعار الخدمات يدولهم قروض من غير ضمان يدولهم على كل شركه يشتروها واحده هديه امال ايه فاكرهم بيلعبوا؟
والنتيجه المؤسسات العالميه تعلن كل يوم تقدم الاقتصاد المصرى
هنعوز ايه اكتر من كده؟ وربنا يجعله عامر
Desert cat said…
لماضة
يا حبيبتى الدكاترة مالهم
ما لهم مواطنين زينا
احنا كلامنا على اللى بيتحكم فى صحة الناس ويغلى فى اكلهم علشان هو بيفرح بمنظر الموت قدام عنيه
محبتى يا دوك
Desert cat said…
kmora
ما هى دى المصيبة
انك تلاقى الناس بتثقف على اى كلام وخلاص
بس دى مش الناس اللى زينا اللى بيثثقفوا دول ناس تانيين معاهم فلوس لو رغيف العيش وصل جنيه حيشتروه ومش حيتكلموا لانهم ببساطة مستفيدين وبيمصوا برضه فى دم الغلابة
وبعدين فلوس ايه يا باشا اللى الناس تاخدها
هى الحكومة بتحدف كتاكيت
مبروك البلوج الجديد
تحياتى
Desert cat said…
ابن حـجـر الـعـسـقـلانـى
اه طبعا طبعا هى الحكومة يهمها غير مصلحتنا
لدرجة انهم بيستلذوا بموتنا قدام عينيهم
ياااااااااارب
انت عارف بقا
بلاش اقول
اعمل واحد شاى مظبوط يا احمد فى الاستراحة عندك ومعاه واحد نسكافيه اصلى جايبه لك الغالية فرنسا وجايين
تحياتشى
Desert cat said…
منى
انا عن نفسى مش عايزه يا منمون
انا عايزاهم يسيبونا فى حالنا ويسيبوا كل حاجه ببركتها
يعنى الدوا يرفعوه ليه
والله بشوف ناس عايشه على المسكنات ومش لاقيه تعمل عمليات يقوم كمان يحرموهم من المسكنات
والمضادات الحيوية
رغيف العيش بقدرة قادر يوصل ربع جنيه على اساس ان الاسر المصرية كلها غنية
ولا والواد اللى رايح الحضانة ولا المدرسة حياكل العيش حاف يعنى مظنش انى ممكن اعمل لابن اختى وهو رايح الحضانة الصبح سندوتشات عيش بلدى
انا حاسه ان السادة اللى بيصدروا الاوامر وبيرفعوا الاسعار فوق حاسين انهم عايشين فى دوله متقدمة والفلوس متلتلة فيها
بس بصراحة برضه احنا اللى نستاهل
محبتى يا منمون
يا سلام .. شاى و نسكافيه بس ..... دة إحنا ننزل طقم المشاريب الاسبيشيال بتاع المعلم... من عنيا الجوز قبل ايديا اللوز .. انتم تأمروا انت و فرانسواز هانم

لكن أنا محمد "بن حجر العسقلانى" القهوجى ..أما صاحبى أحمد "الباحث عن الحقيقة" المعلم الكبير فراح يخدم الوطن على الجبهة..أصله جاله استدعاء فى الجيش و قرب يرجع
Desert cat said…
ما انا خلاص جيت ومش حد عبرنى ولا شربنى حاجه
الزيارة الجاية بقا يا محمد
المهم انت بتقولى احمد راح يخدم مين
طب والنبى بلاش يخدم بذمة اصل الوطن مبقاش عايزنا زى زمان
و الله يا اختي العزيزة موش مشكلة
الشعب طول عمره طافح الكوتة موش هتيجي يعني على الزيادة دي
بس في سؤال محير
هل الكهربا هتغلى في امن الدولة زي ما هتغلى على ابناء الدولة
و هل مقدار الزيادة سيكون رادعا عن استخدام الكهربا في تعذيب المواطنين
و الاله لو الحكومة هتغليها و تستخسرها في تعذيب جتتنا يبقى قرار نرفعله القبعة
زُمُرده said…
السلام عليكم

حسبنا الله ونعم الوكيل

ارحموا من في الأرض يرحمكم من في السماء

بص الشعب شويه يومتوا من الصدمات واللي ميمتش من الأولى لسه في التانيه والتالته وهلم جرا
وشويه هيسافروا ويتغربوا
وشويه هيرموا نفسهم ف المحيط املا في الوصول للبر التاني
وشويه يكتئبوا ويموتوا
وشويه ميلاقوش فلوس العلاج
ولو لاقوها ميلقوش الدوا
ولو لقوه يبقى منتهي الصلاحيه
وقضيها كده
لحد ما التعداد يبقى مليون
بيحكوموا نفسهم والخير ليهم

ربنا يجعل كلامنا خفيفي عليهم
بصى يا قطه
انتى مش فاهمه الحكومه رفعت اسعار الادويه ليه لانها كمان حتلغى الدعم فا الناس مش حتلاقى تاكل وحتموت من الجوع يعنى مش معقوله حتعالج الناس الى حتموت من الجوع
يبقا بلاش افتراء على الحكومه وهى رفع الادويه قصدها بيه ايه ايوه كده بالضبط ضرب شركات الادويه
والف سلامه يا نانا عليكى من الواو يح
اولا الف سلامه عليكى يا نانا من الواو يح ده
ثانيا انتى شغاله تقطيع فى فروه الحكومه ليه انتى مش فاهمه الفكر بتاع الحكومه
بصى يا ستى الحكومه حتلغى الدعم يعنى الناس مش حتلاقى تاكل يعنى حتموت من الجوع وطبعا مش معقوله نعالج ميتين ولا نولع ليهم كهرباء يبقى هى قصدها ايه تخسر شركات الكهرباء والادويه بطلى ظلم بقاء
لا يا ستى .. إحنا مايرضيناش إنك تمشى زعلانة .. عندنا شاى "إيرل جراى" من بتاع المعلم .. إيه رأيك ؟؟ و على حسابنا المرة دى .. و كمان عندنا قهوة سكر برة زى اللى طالبها الأستاذ عصفور المدينة عندنا

أحمد الباحث راح يخدم الوطن .. بس مش عارف هو ها يخدم الوطن المتمثل فى مين بصراحة .. احتمال لما يرجع يكتب يوميات مراسل حربى
هو انا كل ما أدخل المدونة الاقي في حاجة ذادت
يمكن الشكلة فيا
حجرب مجيش شوية يمكن حال مصر كلها يتعدل
:)
تحياتي
Gloomy Day's said…
Desert cat

انا قريت معظم البوستات بجد انتي جريئة ومواضيعك متميزة وبتمس كل واحد في مصر

تحياتي
Gloomy Day's said…
desert cat

انا قريت معظم بوستاتك
بجد انتي انسانة جريئة
ومواضيعك متميزة وبتمس كل واحد في مصر

تحياتي
Desert cat said…
ملك الكبدة
هو انت ضيف دائم عندهم ولا ايه
هههههههههههههههههه
ياباشا هما رفعوا الكهربا علشان الناس توفرها ليهم ويكهربوا براحتهم فى الخلق اصل فى ناس اشتكت بعد ما خرجت انهم مش اتكهربوا كويس
تحياتى
Desert cat said…
زُمُرده
يا حبيبتى مصر فيها خير كتير بس للاسف مش لشعبها لحكام شعبها
واللى عمال يعصروا عصر فى المواطن الغلبان لحد ما بدأ يفرفر هو وعيلته كلها
ربنا يسترها مع الجميع
محبتى
Desert cat said…
رئيس جمهوريه نفسى
ايوااااااا الله ينور عليك هما بيعلموا لمصلحتنا
بس احنا اللى مش بيتمر فينا
الله يسلمك يا سيادة الريس
دمت بود
Desert cat said…
ابن حـجـر الـعـسـقـلانـى
خلاص يا محمد طالما حشرب شاى على حسابك انا مش زعلانه خالص
ولو لسه موصر تصالحنى ممكن سندوتش كبدة من اللى فى القايمة عندك وبرضه على حسابك
بالنسبة لاحمد اللى بيخدم الوطن
ربنا يقويه
بس لو كلمك قوله يسلم لى على الوطن
ويبوسه لى من هنا ومن هناك
بصي يا ستي
الحكومة قالت إنها حتلغي الدعم السلعي و حتحوله لدعم نقدي
يعني حتشيل الدعم عن كل السلع و تغلي كل حاجة بجنون
و بتقول انها حتدي الفلوس الفرق لكل واحد فقير في إيده
وهو ده الدعم النقدي اللي إتطبق بنجاح في البرازيل
الكلام نظرياً حلو بس فيه مشكلة كبيرة مين يضمن إن فلوس الدعم النقدي حتوصل للفقراء و مش حتتنهب في السكة
بل و مين حيحدد الفقير أساساً
الكلام ده حسب كلام نظيف باشا حيبدأ في بداية السنة المالية الجاية يعني 1/7/2008 يعني فيه أيام أسود من السواد جاية
إلا لو الشعب عمل انتفاضة زي انتفاضة يناير 1977 بعد ما الدعم يترفع
بس تعتقدي ده ممكن يحصل
يا جماعه كله هيبقى فى التمام انشاء الله
بس انتوا اصبروا عليه شويه يعنى لغايه سنه 3000 مثلا متستعجلوش

فى العجله الندامه
Esmat said…
قططت الجميلة
بما أنك يا عسل عندك الاخبار اول باول
ممكن لو تعرفى تقولى لنا
هى الحكومة بتودى الفلوس اللى بتلمها دى كلها فين؟
تكونش بتصرف على شعب تانى يتيم ومش عايزة تقول لنا علشان الثواب ما يرحش
وألف سلامة عليك يا جميل من أى الم او وجع
او اى واوا
وتحياتى يا قمورة
و هو بس سعر المضادات الحيويه هو اللي زاد يابنتي ده العيش الفينو و السمنه و المكرونه زادوا زياده رهيبه و كل شويه عمالين يزيدوا مش فاهمه هما عايزين ايه يجوعوا الشعب؟و يقول من ساعه ماجيت و انا متحيز لمحودي الدخل الصراحه واضح اوي لول
سلامتك ياباشا من الوجع و يارب ماتحتاجي لأي ادويه
Desert cat said…
مهندس مصري
لاء انا مظنش انه هيحصل
وما اظنش اصلا ان الشعب ممكن يتحرك حتى لو مات من الجوع
لسبب بسيط يابشمهندس كل واحد عايز قائد
ومحدش اتعود يكون قائد نفسه
لانه الكل خايف ويقولك اشمعنا ان اللى هتحرك
وانا اللى هتكلم
انا عندى عيال عايز اربيها
Desert cat said…
محمد السلامونى
ده انت متفائل اوى يا محمد
ولا مكفينا صبر لغاية سنة 300000
ربنا يدى الاجيال اللى جاية الصحة
Desert cat said…
Esmat
هو وانا برمى ودانى وبتصنت سمعتهم بيقولوا انهم بيودوها على بنوك سويسرا اصل الموظفين هناك غلابة وحالتهم تصعب على الكافر
يقوم حكومتنا المحسنة بطبعها بتاخد دم قلبنا وتوديها على هناك
ذكا عن صحتنا يعنى
محبتى يا جيمله
Desert cat said…
اجندا حمرا
الله يسلمك يا حبيبتى
وفعلا من الواضح جدا انه متحيز لمحدودى الدخل لدرجة ان محدودى الدخل بقا بيشحت من اللى كانوا مستواهم كويس واصبحوا دلوقتى محدودى دخل
محبتى يا قمر
3ala asm masr said…
عايزه اقولك انى بجد ببكى من جوه اوى
ونفسى الدموع تنزل بقا من عنيا وتريحنى قبل ما يشيلوا الدعم من عليها
خطيبى لسه الصبح بيحكيلى عن البواب بتاع العماره اللى جمبهم
اللى بيجيب خمس ترغفه عيش وبنص جنيه طعميه عشان ياكل هو ومراته والاكل ده مبيكفهوش وبيقولى الراجل ده هيعمل ايه فى الاسعار الجديده والدنيا اللى احنا فيها
دلوقتى بس هقدر ارد عليه واقوله الراجل ده هيعمل ايه
الراجل ده هيموت مع بقيت الشعب اللى هيموت من الجوع وساعتها نترحم عليه ده لو مكناش موتنا احنا كمان ومستنين حد يترحم علينا
Desert cat said…
3ala asm masr
البواب ده مش حاله فريدة من نوعها
ده فى ناس كتير جدا زيه
واخرهم اللى بيحصل فى كفر العلو انا بشوف اخبرهم بحس انى بقيت فى الصومال
حسبنا الله ونعم الوكيل
قولى لخطيبك ميزعلش على البواب
على رايك بقينا محتاجين اللى يزعل علينا
دمتى بود
oceaneyes said…
حسبى الله وهو نعم الوكيل فيهم كلهم ..

ما طبيعى يعملوا كدة واكتر من كدة ما هو الطمع والجشع عامى قلوبهم وضمايرهم وهما يعنى مش عايشين عيشة الناس الغلابة دول

....

كلهم قعدين فى قصور وفلل وسط الخدم والحشم

...

مش هانقدر نقول غير ربنا على الظالم والمفترى
Desert cat said…
oceaneyes
ما هما علشان قاعيدن وسط الخدم والحشم بيزيدوا اذلال فى الغلابه علشان يفضلوا مميزين بالخدم والحشم اللى عندهم للاسف الدنيا لهياهم ومتناسين الاخرة
حسبنا الله ونعم الوكيل

Popular posts from this blog

قميص دهشور

كل تحرش وانتوا طيبين