تونى وراشيل و كريستى

من كام يوم قاعده فى السيبر اللى مش ورايا غيره ده وموجود عندى كام شخص قاعدين على النت وانا فاتحة المدونة وبرد على اللى عبرونى وشوية المازنجر وإذ بى وألاقى 3ماشاء الله ماشاء الله امريكان هو مش مكتوب على وشهم امريكان بس انا ناصحة من يومى يعنى وعرفت انهم امريكان .... داخلين عايزين نت ... هاه عايزين ايه ..... الناس دى بتستعبط سايبين امريكا وجايين يدخلوا نت من عندى ..... وليه ميكونش السيبر بتاعى سمعته سبقاه طبعا ووصل للعالمية لدرجة ان الامريكان سابوا امريكا واستراليا والنمسا وشبرا وجايين يدخلوا نت من عندى طبعا وهو انا شوية فى البلد دى ولا ايه ... يا ويلكم يا ويلكم بامريكا ورواد امريكا يلا ياض انت وهو بره
.... وطبعا قعد الضيوف الامريكان دى الناس جاية من امريكا مخصوص علشان تدخل نت من عندى
طول ما هما قاعدين رايحين جايين يوشوشوا فى بعض وكل واحد يروح يقعد على جهازة تانى ... ايه ده الناس دى مش على بعضها ليه يكونش امن الدولة باعتينهم علشان يجوا يقبضوا عليا بتهمة التجسس لصالح امريكا ..... لالالا دول شكلهم ولاد ناس وحاجه ابيض على بمبى كدا يعنى امريكانى على حق .. مش بتوع تجسس ولا غيره ...
كان ترتيبهم كالآتى تونى الجهاز اللى جنبه راشيل الجهاز الى فى وش راشيل كريستى ... وانا فى قفا تونى مباشرة ..... قصدى الجهاز اللى انا قاعده عليه يعنى ...
خلصوا وماشيين خلاص ..... طبعا تونى ديك البرابر جه يقولى
tony: how much :
me: 8 pounds
راح مدينى عشرين جنيه وماشى
me:Please wait - the rest is declared
tony: no this for you
طبعا هو قال الكلمتين دول من هنا وانا كنت على وشك انى اردح له بس افتكرت انه ضيف وميصحش

me: Please do not go ahead rest
وطبعا بلهجة نظام انك جاى تبقشقش عليا يا الدلعدى ده انا ابقشقش عليك وعلى امريكا كلها
خدهم وانسحب بدون اى رد فعل وجنبه الموزتين القمر عمال يبصوا نظام مجنونة دى ولا ايه .....
تانى يوم فى نفس الميعاد لاقيت التلاتة جايين ..... قولت المردة دى دول مزقوقين عليا من الانتربول الدولى وطالما انا وصلت للعالمية يبقا بقيت خطيرة على العالم كله يكونش الحاج جورج بوش قرا البلوج بتاعى بس انا مش جايبه سيرة امريكا فيه خالص دول حبايبنا واجدع ناس ولا ضحوا بصدام يوم العيد علشان يكون عبره لمن يعتبر ولا مبهدلين العراق والعراقيين ولا بيدعموا اللى ما يتسموا فى فلسطين ... دول ناس طيبين اوى ومش بياذوا حد خالص والحاج جورج ده حبيب الملايين يعنى .... وفى عز افكارى النور قطع ..... قولت احسن
لاقيت راشيل بعصبية بتقولى What happened
قولت لها عادى بيحصل فى احسن السيبرات

ابتسمت وقالت you speak english
قولت لها طبعا ده انا مواليد انجلترا بس حصلى كدا بفعل فاعل ... قصدى فعل الزمن
rashel : What's your name?
me: nana
بدأت تقدم نفسها Rachel -Tony - Cristie
welcome happy knowing ...
النور جه من غير ما يعبرونى ولا بعد اذنك ولا اى حاجه قعدوا تانى على النت
قولت ايه العيال اللى مش عندها دم دى ... طيب انا بقا مش هعبرهم ولا اكلمهم تانى ... خلصوا وجايين يدفعوا الحساب
نفس السيناريو اللى حصل فى اليوم اللى قبله ... الحساب والباقى لاء الباقى علشانك فى المرة دى بقا كنت حضربه ...
ابتسمت كريستى وتقريبا علشان اهدى بس قالت لى you very good
وقعدت تقولى شوية كلام خلاصتهم يعنى انهم مش بيدخلوا مكان فى مصر غير لما بيتقلبوا ومش بيزعلوا انهم بيدفعوا بالزيادة بس بيزعلوا انهم بيحسوا ان المصريين بيستغفلوهم ..... وهنا بقا هجمت عليها فورا ... نظام اقفى عند حدك مع انى عارفه فى قرارة نفسى ومتاكده ان كلامها صح وعارفه انى بدافع عن باطل .... بس مهما كان بتغلط فى المصريين ومصر تبقا الوطن ويعنى ايه كلمة وطن ( اللى عارف يقولى بينى وبينه اصلها ممكن تكون كلمة ابيحه )... دافعت وانا عارفه انهم بيتاخد منهم الضعف فى كل مكان فعلا .... سواق التاكسى بمجرد ما يلاقى واحد لهجته غريبه يرفع سعر التوصيله 3 اضعاف ... زى ما حصل مع ريلين صديقى الامريكى ايضا واللى نزل مصر مرة فى حياته وحلف ما هو نازلها تانى لانه حس انه بياخد على قفاه لامؤاخذه ... والى بيستغرب جدا اذاى انا مصرية ومش استغليته لحد النهارده مع انى اعرفه من 4 سنين ووقتها فهمته ان العيب بيكون منه هو مش المصريين مع انى عارفه برضه انى غلط يعنى هو هيروح يقولهم استغفلونى والنبى .... نفس الموضوع اللى كنت حخسر عليه صديقتى الكندية وكاننا واخدين شهرة عالمية .. دخول الاماكن السياحية 3 اضعاف ونفس كلمة كريستى مش عندهم مانع يدفعوا بس ميحسوش انهم بينضحك عليهم .... يعنى المعاملة تبقا بالمثل للجميع ... دافعت يا استاذ احمد ( يوميات عيل مصرى ) عن مصر والمصريين ... علشان انا عايشه فى البلد دى اللى باكون نازلة شغلى وفى اى وقت ممكن امن الدولة او مباحث المصنفات او مباحث الاموال العامة حتطب عليا فى اى لحظة وحياخدوا الجهاز اللى انا بشتغل عليه وياخدونى معاهم اصل فى مشاكل فى البلد ولما يتاكدوا ان جهازى فاضى مش فيه اللى بيدوروا عليه بس بعد ما اتبهدل واتعرض على النيابة العامة ونيابة امن الدولة ويضايفونى هناك فى وسط المجرمين والحرامية يوم كدا ولا حاجه وبرضه هيتعملى قضية ... علشان ايه مش عارفه بس مزاجهم يعملوا لى قضية يا مصنفات يا اموال عامة هما ومزاجهم بقا ... دافعت عن مصر والمصريين بالرغم من انى بروح اخلص ورقة من مصلحة حكومية يا اما ادفع دم قلبى علشان تخلص ابتداء من اكبر موظف لاصغر موظف وان مدفعتش حتترمى على جنب .... دافعت عن مصر وانا شايفه شباب بيرجع جوه صناديق هربان من كابوس اسمه البطالة وقعدة القهاوى .... دافعت وانا جوايا بيقولى انتى بتدافعى فى باطل واللى يدافع فى باطل يبقا ظالم وأفاق وحرامى ..... بس مش كان ينفع اسكت ....
راشيل طلبت ايملى لانها قالت لى انها حبتنى جدا من وقت ما رفضت اخد الفلوس الزيادة فى اول يوم ... ولو احب نبقا اصدقاء ... قولت لها طبعا يا قمر يا امريكانى انت احب جدا اوى خالص .... واتبادلنا الميلات وارقام التليفونات ... النهارده لاقيت راشيل جايبه لى شنطة شكلها ظريف وبتقولى ممكن تقبلى هديتى المتواضعه ... طبعا اتفاجأت وقولت لها ياعيب الشوم ده واجب عليا ده انتى فى بلدنا يعنى ضيفتنا ... قالت لى احنا خلاص اصدقاء وانهم مسافرين بكره الغردقه ... ولما سالتها هما اساسا ايه اللى جابهم هنا على اساس ان بلدنا مش سياحى يعنى ولا حاجه ... قالت لى ان تونى بيكون شركة مع شخص من هنا والاوراق قربت تخلص .... عايزين يستمتعوا كام يوم بالاجازة لانهم من اول ما ايجو وهما شغل شغل عايزين يلفوا شوية بقا ويمكن يسافروا من بره بره وطبعا على ميلات بقا ....

تعليقات

‏قال غير معرف…
هههههههههههههههه
دى ايه الوطنيه دى
انتى كنتى بتحربى فى اكتوبر يابت ولا ايه
اه وعلى فكرة انتى نسيتى تقولى الشنطه فيها ايه
دة مش فضول على فكرة
بس اهو برده نعرف مش يمكن كان فيها حشيش وينوبنا من الحب جانب
ههههههههههههههههه
ونعم المصريين حقيقي
فعلا انتي مثال المصري اللي بيحترم نفسه
بس انا مش عجبني بصراحه انك عماله تقولي انا عملت كده مع ان البلد حالها ومالها وستاتها ورجالها
ده اللي المفروض الناس تعمله ومحدش شكك ف انك بتعملي كده لمصلحه لا سمح الله
انا باحييكي على سلوكك اللي المفروض مش تتشكري عليه لكن المفروض انه الواجب على كل المصريين بس بما ان ده مش بيحصل فلازم نشجعك
بس انا مش مقتنع ان الامريكان نازلين الشرقيه عشان بيزنس يعني
هما اكيد وراهم مصلحه بس انتي عارفه دي اسرار
وبعدين حسستيني بالحنين اني انزل الشرقيه
هو فيه حد غيرنا بيقول "ايجو" طمنيني
‏قال Unknown
اسلوبك جميل و ظريف يا قطة فى السرد بس الى انتهتله فى القصة دى كلها ان السايبر ده بتاعك طب ما تقو للنا هو فين عشان الويندوز عندى بتقع كتير و اهو برده مادام انتى بلوجرية زينا أكيد حتعمليلى خصم :)

أشكرك على زيارتك مدونتى و أرجوا انها تكون مستديمة أنا بجيب سمك كتير :)
المهم الشنطه كان فيها ايه ولا مؤاخذه
‏قال فرنسا هانم
جدعه يا منى
بقشيش فى عينهم
احنا عندنا عزه نفس
وبعدين هما مستغربين قوى كده ليه على قطع النور
ده مره انقطع عندهم فى لوس انجلوس كلها
وبعدين احنا راضيين
مالهمش دعوه
‏قال Esmat
بجد ده مش بس بيحصل مع الاجانب
عندنا فى اسكندرية لما بنزل فى الشتا
اجور التاكسيات غير الصيف
والاستقطاع بيكون وحش اوى فى الصيف
على اساس ان اهل اسكندرية بيتعملوا معاملة المصيفين فى بلدهم صيفا
والمشوار هوه هوه لكن تختلف الاجرة
الناس بقت بتطمع فى بعض
وكل واحد عايش وايده فى جيب اللى جنبه
سمعتنا بقت وحشة اوى
ربنا يعدل حالنا
وتحياتى يا امورى
اموواااااه
جدعة والله يا نانا وكلك ذوق وشهامة
ربنا يبارك لك يا شيخة روحي رفعتي راسنا ادام الأجانب

الهي ما يهنجلك جهاز ابدا ولا تنقطعلك كهربا
والله بدعي بجد ومش بهزر
انتي جدعة وبنت بلد
واعتقد كمان ان اي حد مكانك كان لازم هيدافع عن مصر لأن مهما هيحصلنا من حكوماتها هتفضل مصر هي مصر اللي حبها بيجري ف عروقنا
تيرراراراااااا

:D

تحيتي ليكي
‏قال بنت القمر
اصيله يا قوطا يا اختي بس الفار بيلعب في عبي والرصاصه ما توال في جيبي هما جم عندكم ليه بيقولو عندكوا كابلات وكهربا مضروبه مش فاقوس شرقيه ولا يكونوش استر وراشيل ومتخفيين خلي بالك من اعذر قد انذر ومن خاف سلم والشنطه امسحيها بميه وديتول
الاول
واما بخصوص كرامتك في مصر
عيب يا قطه
منقولش ايه اديتان مصر
نقول ها ندي ايه لمصر
تحياتي
الا اخبار العريس بتاع البوست اللي فات ايه جاله هارت اتاك ولا ايه السيستم
تحياتي
واعتذر عن تاخير الكومنت بس متابعه كويس
‏قال Desert cat
Anonymous
اه طبعا وطنية وطنية يعنى عندك شك ولا ايه
انا كنت بحارب فى الامريكان يابنى مش فى اكتوبر
والشنطة كان فيها بافان
اى خدمة
وبعدين حشيش ايه اللى انت جاى تقول عليه ده
احنا بتوع حشيش برضه
‏قال أحمد المصري
الشنطة كان فيها الطابعة الإبسون صح؟..هههههه
لا بجد يقى اللي انتي عملتيه ده حركة جامدة جدا جدا ..أنا استغربت رد فعلك جدا خاصة لما اعترفتي إنك بتدافعي عن باطل..بس بعد كده اعتقد إنك فعلا كان عندك حق..كده بقيتي مثال مخالف للناس اللي الأمريكان خدو علة قفاهم منهم00شكرا0
‏قال Desert cat
ولــــــــــو
لاء هما فعلا نازليين علشان بزنس والشخص اللى هما نازلين له ده كان فى امريكا اصلا وهما نازلين علشان يكونوا معاه شركة هنااستيراد وتصدير وتوكيلات تجارية بالمناسبة انا شوفت الشخص ده وبما انك شرقاوى بقا يعنى قريب من بدلنا لما الشركة تتعمل انت معزوم مع انى مش عارفه انا بعزمك ليه ... اه علشان بقيت صديقة راشيل خلاص
هههههههههههههه
تحياتى
‏قال Desert cat
عاليا حليم
يا لهوى ده انا عنيه ليكى
انا بنزله لاى حد من صحابى ومش بيدونى فلوس بيعزمونى على الغدا يعنى مثلا سندوتش مسقعه حاجه من هذا القبيل وطالما انتى هتدجفعى بقا ده انا اجى لك لحد عندك
انا فى الشرقية اوعى تطلعى من القاهره وقتها هتتحملى مصاريف السفر
انا يشرفنى ارد فى بلوجك
وسعيدة بتواجدك
تحياتى
‏قال Desert cat
اسكندراني اوي
هو انا فضلت بعد ما مشيوا متردده افتحها ولا لاء
مش يمكن يكون فيها الجمرة الخبيثة
لو اى حاجه تنفجر فى وشى وده مقلب
بس استعذت بالله وتوكلت عليه وتجرأت وجمدت قلبى وفتحتها
والاقيها اااااااااااايه
لاء مش فيل
بارفان
‏قال Desert cat
فرنسا هانم
منى مين
وبعدين مش تقولى لى من بدرى على معلومة قطع النور فى لوس انجلوس
كنت عرفتهم مقامهم عندنا
يارب دايما منورانى
‏قال Desert cat
Esmat
ارتفاع الاسعار الفاحش خلى الناس ماشيه باصة فى جيب التانى وازاى يستنزفه ولما تيجى تتكلمى يقولك ما انتى شايفه يا استاذه الاسعار مولعه نار وعندنا مصاريف ... يعنى انت بس اللى عندك مصاريف واحنا لاء وما هو زى ما هى مولعه عليك مولعه علينا احنا كمان ... انا لما احس ان بيعمل معايا كدا اطلع له اللى انا متعودة ادفعه ولو فتح بؤه اقوله مش عاجبك طيب يلا على القسم بقا
بس بصراحة مش كلهم فى ناس بيكون شكلها متشرد ده لو طلب 5 اضعاف مش حتكلم مش عايزه اخد ضربة مطوة فى وشى ولا حاجه
دمتى بكل حب يا حبيبتى
امواااااااه
‏قال Desert cat
آلام وآمال
ميرسى جدا يا محمود
وربنا يستجيب دعواتك بس انت نسيت اهم دعوة
ربنا يبعد عننا البعده ايوان اللى فى بالك دول
احتراماتى ياباشا
‏قال Desert cat
بنت القمر
ما هو الشنطة قبل ما افتحها قريت عليها المعوذتين
وبسم الله الله اكبر بسم الله على اساس انى هفتح عكا مش شنطة
هو العنوان فعلا اللى قولتيه بالظبط هو انتى جيتى هنا قبل كدا ولا ايه
بالنسبة للعريس شكله باع البرنتر الالوان اصلى من يومها شوفته
شكله بح خلاص
رااااااخ
ومفيش اعتذار عن تاخير الكومنت ولا حاجه
مجرد انك تتصفحى البلوج ده شرف ليا
تحياتى يا احلى بنوته للقمر
‏قال Desert cat
أحمد المصري
طباعه ايبسون على اساس ان الريس راح اشتكا لهم منى
راحوا حبوا يعملوا خير جابوا لى الطباعه
ههههههههههه
وبعدين بالنسبة لانى كنت بدافع وحاسه انى على باطل
فده مش يديهم الحق يشتموا مصر انا بس اللى اشتمها
تحياتى
‏قال غير معرف…
عزيزتى قطه الصحراء
اولا بتاسف على التاخير رغم انى البلوج بتاعك من البلوجات الى بحب اتابعها دائما بس كانت غضب عنى
ثانيا: بالنسبه لموضوع استغلال الاجانب فى مصر معلش هما معاهم حق لانى بشوف ده بعينى بشكل دام فى الاقصر السائح ينزل الشارع من هنا وتلاقى الناس اتلمت عليه من اول الشارع لاخر الشارع عايزين بقشيش على ايه متعرفيش
مره كنت فى الغردقه وقابلت اتنين اجانب من بولندا فى نفس القريه اتعرفنا على بعض وجه الولد بيقولى ياريت لو تسمح عايز اللعب بلياردو قلت ليه فى صاله فى القريه قالى عارف بس الشاعه ب 50 جنيه اه واللهى والطربيزه اساسا ممكن تكون مخلفات الملك فاروق فقلى لو تعرف نروح بره ورحنا بره والله اول مدخلت الى ماسك المكان قلى بص يا بيه نسبتك محفوظه انا قلت مش فاهم اتارى يا قطه كل ما واحد مصرى ياخد اجنبى يدخل معاه مكان بيعمل مصلحه بنسبه من المشتريات او الى بيدفع انا بمنتهى البساطه قلت ليه نسبتى كام قلى 10% اصريت على 25% وافق على 20% خصمتهم من الفاتوره
بعد ده كله الاجانب ليهم حق انهم يروحو مش يرجعو وتحيا قوانين تشجيع الاستسمار الاجنبى فى مصر
دفاعك عن مصر لازم تدافعى لانى فرق كامل بين ارض حدود مكان ولا حاله من الشجن شاى بالحليب على قهوه فى الظاهر هناك نسمه عصارى السيده ودير الملاك هو ده معنى الوطن
وبين ممارسات حكوميه من حكومه الله يلا ربنا المستعان
الله ينور عليكى يا هرة الصحراء .. آدى المعدن المصرى الأصيل (بافتراض إن الناس معادن) .. و بمناسبة المصنفات و الليلة بتاعة السجن

واحد صاحبى كان واقف فى السيبر بتاع خاله .. فالمصنفات جات و شدته على القسم و بيت فى السجن لتانى يوم

و هو فى السجن جاله واحد عليه سيماء الذوق و الرقى و الوجاهة و قال له: قدر تتقدر .. و اللى يقدر يتقدر

فطبعا صاحبى طلع المعلوم عشان يقدر الراجل لأنه لو ما قدرهوش .. الأقدار كانت هاتقدره تقدير لا يقدر

و ربنا يعينك يا بنتى على مصايب الدنيا
‏قال 3ala asm masr
المصؤيين اهما حيويه وعزم وهمه
بس بجد حركه جامده جدا
وهو ده اللى المفروض كلنا نكون عليه
واحنا فعلا كده السايح بيجيلنا عايزين نقلبه
يبقى عمره ما هيرجع تانى
ربنا يعينك ويحميكى
‏قال Nani
السلام عليكم
الفضايح دي مش بتحصل بس في مصر
انا نفسي افهم عم لما يغلو السعر شوية مش خايفين من ربنا
السرقة حرام
بس امتعني اسلوبك
:)
‏قال Desert cat
رئيس جمهوريه نفسى
مش فى الاقصر ولا الشرقية بس ده مصر كلها بيحصل فيها كدا يا محمود لما كل دول العالم تقولك المصريين استغلاليين واللى يقولك دول بياخدوا مننا صدقه
صدقة يا ولاد المتضايقه
احنا اللى عملنا فى نفسنا كدا وخلينا كل من هب ودب من ولاد العم سام يجيب فى سيرتنا جتهم البلاوى ملوا العالم

اشكرك جدا ياباشا
اروح بقا اشوف الطحن اللى فى البوست الاخير بتاعك اصله مش دخلت بلوجك من يجى ساعتين كدا
‏قال Desert cat
ابن حـجـر الـعـسـقـلانـى
تصدق لو قولت لى حاجه تانى غير هرة الصحراء لازعل منك وانا زعلى وحش بيودى امن الدولة على طول
حتى اسال صاحبك اللى مباحث المصنفات اخدته ضايفته مع المقدر والمتقدر
والله ما انا عارفه الناس دى جرى لها ايه يعنى عواطليه مش عاجبهم ويوقولا بيشربوا بانجو ما هو فاضى والفاضى يشرب بانجو ولو اشتغلنا برضه ياخدونا الاقسام ويوقولا اصله بيشتغل
الحل اننا نروح نغرق بقا ونريحهم مننا
ابقا قول لصاحبك ياخد باله لو سمع ان فى مصنفات يقفل ويورح وبلاها شغل
تحياتى ياباشا
‏قال Desert cat
3ala asm masr
ماهو انا وانتى وصحابنا وقرايبنا بنعمل كدا
غيرنا مبيصدق ويشفط اللى فى جيب الاجنبى علشان كدا سمعتنا بره ازفت من الزفت بشوية قطران
لكى كل تحياتى يا جميل
‏قال Desert cat
Nani
حبيبتى احنا اللى عاملين ليهم قيمة
يعنى لو اتعاملنا بعزة نفس وكرامة مفيش حد حيتجرأ يجيب سيرة المصريين ولا غيرهم على لسانه
دمتى بكل ود
مش عارفة آقول ايه؟
كل ما آكتب حاجه امسحها
صعبان عليا السمعة اللى مش قد كده دى
لانى بسمع منها كتير اوى

اى آجنبى بدون ذكر جنسيات.. بيتندر على مصر والمصريين بحاجات من نفس النوعية.. قلبى مش مطاوعنى ادى امثله علشان مش اعيد كلامهم

ياترى مين اللى عمل فينا كده؟
وخلانا نبقى كده؟

كاميليا
‏قال Desert cat
كاميليا
اللى بيخلينا نعمل كدا اللى بيعمل لهم قيمة ويحسسهم انهم جايين ينتشلوه من الفقر وتناسى كرامته وعزة نفسه وداس عليهم تحت رجليه
ما تزعليش نفسك كلنا فى الهوا سوا
دمتى بود
‏قال فرنسا هانم
معلش خالتك امبارح كانت منعنسه حبتين
يظهر الصنف كان مضروب
قريت بدل نانا
منى

مع تحياتى
‏قال Desert cat
فرنسا هانم
ولا يهمك اى حاجه
انتى تقرى اللى انتى عايزاه حتى لو قريتيها ماهيتاب
المهم انك منورانى
اموااااااااااه
هههههههههههه البوست بتاعك رائع بجد مش الامريكان ولا الوطنية ولا الموقف نفسة افضل مافى الموضوع أنة بيتطرق لمواضيع كتير من خلال فكرة بسيطة دون ان يشعر من يقرألك بأى ملل بجد طريقة جميلة للكتابة والتعبير برافو ياقمر
‏قال son's egypt
السلام عليكم
الموضوع فكرني بمثل معروف جدا انا واخويا علي ابن عمي وانا وابن عمي علي الغريب
مش عارف المثل يمشي مع البوست ولا الا
االمهم
البوست وانا بقراه فكرني بموضوع لسه واحد زميلنا قلنا عليه
يعني خلاصة الكلام انه الاجانب بيضحك عليهم بالتاكيد سواء من التاكسي او غيره
لانه في ناس بتفكر ان ديه فرصة ومش ممكن تعوض تاني الاكل فين وفين
‏قال Unknown
طب الحمدلله
يعني لما اتزنقتي يا قطة .. قعدتي تنونوي وتحي العلم وتدافعي عن البلد
انا اصلا شلت البوست .. قلت مش عاوز أعملها مدونة اختلاف
وكنت زعلت شوية، لما انت دخلتيها في الناحية الشخصي، وكان نفسي تكوني فهمتي اللي اقصده
من إني زي زيك بالضبط
بيطلع عيني في حاجات كتير
واتبهدل في حاجات كتير
بس بحب أقول لأ
الحاجة التانية
إني زي ما قلتلك إذا كانت طبيعة عملي بتتطلب اني اكون لفترة محددة برة البلد أبقى مش حاسس بيها؟
معلش باعاتبك عشان انا بحب الشراقوة
عارفة ليه
لأني لما تذكر الشرقية عندي
تبقى عندي ادهم الشرقاوي حتى لو كان قطاع طرق على الاقل كان بيأذي امحتل
الشرقية عندي يعني هرية رزنة واحمد عرابي
الشرقية يعني بلبيس وعمرو بن العاص .ز مش بلبيس المخدرات
زي الناس ما بتقول
الشرقية .. يعني حصان عربي اصيل
يعني فريق الهوكي
يعني عبد الحليم
واحمد فؤاد نجم
ومرسي جميل عزيز
وسليمان خاطر
لما بتقولي الشرقية كل دول بييجوا في دماغي ثابتين زي الجبال .. والباقي اللي بيحاولو ينكدوا علينا العيشة، دول مؤقتين
عارفة يا قطة
لو وصلنا لمرحلة اننا نقول على الوطن زفت، يبقى نجحو وفشلنا
وانا الحقيقة مش بحب حد يوجهني للي هو عاوزه
الوطن عندي ثابت من الثوابت اللي في حياتي زي أمي ، وأمك وابويا وأبوكي
الباقيين دول .. ناس طارئة في حياتنا مش هيخلوني نغير حاجة
عارفة ليه دمك فار لما حسيت أن حد هيتكلم على مصر .. عشان هي في جيناتك والتانيين دول ما تعرفهمش
لما قلت في نفسي على اللي قال مصر زفت قلت عليه حمار
لأنه بالفعل لخبط بين أكتر من حاجة
لخبط بين انه يفهم انه بكده بيفرح الناس الغرب اللي واقفين يتريأوا على مصر برة
ولخبط بين مصر الوطن ومصر النظام
اصدي الفوضى
لما قلتله يا حمار .. ودمي فار
كان ردفعل طبيعي لواحد بعيد عن بلده، بس مش مستعد يسمع عنها حاجة، لأنه لو سمح لنفسه انه يسمع عنها حاجة وحشة يبقى كل حاجة فيها هتبقى وحشة
كان هيكون انت عندي وحشة
وهفتكر لأبويا انه ضربني
بس انا افتكرت لبويا كل حاجة حلوة، وكلكم دعيته له
لومصر وحشة مكنتيش انت لسة فاكرة شوارع القاهرة اللي بتحبيها
وكنت انا مشفتش في الشرقية حاجة كويس
ونسيت انها بلد ادهم وعرابي وحليم ومرسي وخاطر
تعرفي يا قطة
احنا محتاجين، نشوف مصر بطريقة تانية، والا هنصحى الصبح في يوم، نلاقي أجيال طالعة بترمينا بالرصاص لأننا خلناهم مصريين
أنا جيت زرتك .. فكينا بقى من الموضوع ده
وخلينا في مواضيع العيال احسن
عشان انت يوم فرحك هتقولي لعريسك عاوزة اطلع عيال بيحبوا البلد
واحنا بنموت فيها
وانت أولنا يا قطة
‏قال Ahmed Al-Sabbagh
هههههههههههههههههه

جميل اوى اوى

بس ايه خفة الدم دى

انا بحب اوى الكتابات دى

وخاصة لما تبقى حاجات حصلت فعلا

انا هروح اسيح واقول لاحمد - يوميات عيل مصرى

عشان يجى يعرف انك بتنمى عليه وبتجيبى سيرته
هههههههههه


تحياتى
ياعم يا عم يا بتاع التفاح الامريكانى انت طيب مش كنتى تنداينى اجى اتصور جنبهم والنبى ؟؟

بصى يمكن علشان انا وسواس فانا مناخيرى مش عاجبها الموضوع يعنى 3 امريكان وبعدين يجوا يومين ورا بعض علشان يقعدوا على النت وبعدين وهما ماشين هدية وبعدين ايميلات شىء مريييييييييب ومناخيرى وقرون استشعارى مش مرتاحين :)))

تانى حاجة طبعا كونك مأخدتيش باقى الفلوس دا انا ارفع لك فيه القبعة لكن انك تدافعى عن منطق انتى عارفة انه غلط دا بقى هو الغلط بعينه انا لو منك مكنتش اعترضت لكن كنت هحاول اوصل لهم انه فى كل فئة فى كل بلد فيه ناس كويسين زي ما انتى عملتى وفيه ناس تانية زي بتوع التاكسى وعليهم هما انهم يركزو فى تعاملاتهم وميبقوش مغفلين

عموما بقى خدى بالك ومتفتحيهاش فى الرغى مع الاخوة الامريكان انتى متعرفيش ايه ظروفهم ولا كانو بيقعدو على الجهاز ينيلوا ايه . وعلى فكرة معظم اللى بيبقوا وراهم مصايب بيكونو شكلهم حلو وولاد ناس بطلوا يبقوا شبه فريد شوقى بحاجب فوق وحاجب تحت :)))
‏قال غير معرف…
وحشتيني ياقطه

مرسي علي سؤالك الغالي عني معلش كنت واخده بريك كده من النت و لما رجعت قلت اطمن عليكي

بس ايه الوطنيه دي ياباشا؟و الله جدعه و فعلا الواحد بيتكسف من استغلال بعض الأشخاص للسياح و تيجي تتكلمي يقولولك ماهو لو احنا روحنا بلادهم حيعملوا نفس الشئ معانا كسياح و لو اني ماعتقدتش بس برافو عليكي انك مااخدتيش البقشيش ده و مسكت نفسك و مازعتقيش فيهم يابنتي دول و الله عادي اتعود ماكانوش يقصدوا يجرحوا احساساتك طب تقولي ايه مره في مستشفي حكومه كنت بشتغل فيها و مريض طلعلي جنيه و قاللي خوديه عشان تعبك كنت حنط في كرشه طبعا لول

تحياتي ليكي ياقمرايه و مرسي علي سؤالك و اوعدك مش حختفي تاني
‏قال m_elsewedy
تحيا مصر يا عم
:D

عجبنى اوى بوست تفتكرينى او تنسينى
:D
مشكلة انتى والله
:D
‏قال خمسة فضفضة
السلام عليكم ورحمة الله وبركاته

ايوه كده يا قطه ، اهي دي القطط ولا بلاش

وعلي راي المثل :

ادعي علي ول.....قصدي .. بلدي واكره اللي يقول آمين
‏قال Desert cat
كلاكيت تانى وتانى
تسلمى لى يا نرمو
اهم ما فى الموضوع انه نال اعجابك
محبتى يا جميل
‏قال Desert cat
son's egypt
ياباشا حتى لو المثل مش ينطبق نخليه ينطبق
موضوع السائح ده فرصه ومش بتتكرر غير كل فين وفين بتحصل كتير هما اصلا مش عارفين السائح مش بيتكرر ليه
اصلهم لو مش اتعاملوا معاه على انهم شحاتين وانه جاى يحسن عليهم اكيد هيحترمهم ويرجع تانى
تحياتى
‏قال Desert cat
يوميات عيل مصري
ازيك يا استاذ احمد
بالنسبة لموضوع حضرتك انا تفهمت وجهة نظرك ولو انا كنت السبب فى ان حضرتك تحذفه فكان ممكن ردى بس اللى يتحذف وصدقنى وقتها مكنتش هزعل مكنتش برضه حبطل زيارة لمدونتك رخامة بئه ....
بالنسبة لبلدنا واللى بيجرى فيها احنا محتاجين صحوة ... محتاجين نقول للفساد لاء ... محتاجين قول للى بيطلب رشوة مش حديك وحتخلص لى ورقتى غصب عنك لان ده شغلك .... محتاجين قانون يحمينا كمواطنين مش يهينا ويبهدلنا علشان لما يجى امين شرطة ولا حتى ظابط ياخدنى من مكان شغلى وياخد جهازى اللى بشتغل عليه اقوله حاسب عندك واخدنى بتهمة ايه ولا انا اصلا عملت لك ايه فى قانون بيحمينى ... يفكر الف مرة قبل ما يمد ايده على متهم ويعذبه ويكهربه .... تعرف الفرق بينى وبينك ايه ... حضرتك متفائل وبتبص للامور من منظورك الخاص ... وانا متشائمة ومش شايفه قدامى غير السئ لانى للاسف مش شايفه غيره .... عيالى مش هيجوا يحبوا مصر الا اذا كان فعلا فيها حاجه تتحب موجودة قدامه فى واقع هو عاشه
عرابى والشرقاوى وحليم ووعمرو بين العاص دى كلها ناس هو مشفهاش ولما كل يوم يحكى لى عن مشكلة واجهته من موظف او حتى من عسكرى المرور واقوله استحمل اصل زمان كا عندنا عرابى وكان عندنا مش حيدصقنى وملا حيصدق التاريخ .. اصلنا مش عملنا حاجه من بعد الناس دى ... قاعدين الاسعار بتعلى والدخل ثابت ونقول اشمعنا انا اللى حتكلم ... اهانة وقلة ادب من امين شرطة لشخص محترم وبرضه يقوله اسف ياباشا اصل عنده عيال عايز يربيها .. انا لو اتكلمت لبكره مش حتكفينى المدونة مش بقولك متشائمة
المهم انا سعيدة جدا بزيارتك
احترامى وتقديرى
‏قال Desert cat
Ahmed Al-Sabbagh
المهم ان البوست عجبك يا خالو احمد
والاستاذ احمد فى الرد اللى قبلك يعنى عرف لوحده انى نميت عليه وجبت سيرته
معلشى بقا هما الستات وراهم ايه غير النميمة
ههههههههه
تحياتى يا احمد
‏قال Desert cat
سمـــــــــــا
بصى يا سمسمة
هما ايجو 4 ايام ورا بعض مش يومين بس
فى اليوم التالت فعلا جه معاهم الشخص اللى هما نازلين عنده وبيعملوا معاه الشركة وبالفعل من نفس المنطقة اللى انا فيها ..
ولو حبوا يعملوا حاجه هيعملوها من سيبر ... نفس الكلمة اللى بقولها لما حد يقول الاخوان بيطبعوا منشورات وبنلاقى امن الدولة جاى ياخد كل اصحاب السيبرا باجهزتهم علشان يعلموا لها فحص ... هما الاخوان فقرا علشان ينزلوا يطبعوا فى سيبر... ولا اغبيا علشان يتعرف ويتقبض عليه ... اللى بيحب يعمل حاجه فيها اذية مش بيعملها فى مكان عام ... فى اليوم الرابع بقا راشيل جابت لى الهدية لانى يعنى اول يومين كنت بتكلم معاهم عل اساس انى واحده موفرة لهم الخدمة اللى هما عايزينها عادى فى اليوم الثالث اتعرفنا اوى وبما فيهم الشريك الفاقوسى اللى من بلدنا يعنى الرابع والاخير كانت بقت انتيمتى ههههههههه
اشكرك جدا يا حبيبتى
وربنا ما يجيب حاجه وحشه
اموااااااااااه
‏قال Desert cat
اجندا حمرا
هههههههههههههه
موتينى من الضحك على الجنيه ده
هما اصلا حاسين اننا شحاتين ونصابين واستغلاليين وفينا البدع
حقهم
وهما بيشوفوا شوية
منهم لله اللى كانوا السبب واللى وصولا الشعب لكدا
والف حمد الله على سلامتك
محبتى
‏قال Desert cat
m_elsewedy
ميرسى جدا
شرفت البلوج
تحياتى
‏قال Desert cat
خمسة فضفضة
ههههههههههههه
ايوا صح كدا
انا بس اللى اشتم البلد واللى مكرهينا فى البلد
هما لاء
بس خافوا من الخربشة
اصلى عامله ضوافر تجيب من على بعد
تحياتى يا احلى دكتورة
‏قال منى
على كده بقى يا قطه انتى من لجنه تحسين العلاقات المصريه-الخارجيه
بس ايه خفه الدم دى يا بنتى
تحياااااااااااااتى
أنا متفق مع سما في إنك ما تدافعيش عن الباطل و تحاولي تفهميهم إن التعميم غلط و كل بلد و كل حتة و كل تجمع بشري على وجه الأرض فيه الكويس و فيه الوحش و مش المفروض إنه يعمم و يأخد واحد بذنب التاني
حتى لو كنت متأكدة بينك و بين نفسك إن نسبة الوحش عندنا أكتر من الحلو
ربنا يبارك لك في الصحاب الأمريكاني و يكرمك بكارت أخضر
green card
علشان تستريحي من مشاكل البلد العجيبة دي نهائياً
:)
مدونتك جميلة إسمحي لي أضيفك عندي
‏قال The Queen
برافو عليكي يا قطة
بس الاهم من اننا ندافع عن بلدنا اننا نحاول بكل الطرق نخليها زي ما بندافع عنها وزي ما بنحلم
احنا بندافع وبنحكي عن حلم مش واقع بس لانها بلدنا منقدرش نقول انها وحشة غير بينا وبين نفسنا بس
ربنا يصلح الحال
ومبروك عليكي اصحابك الجداد

مش لاقيه لك ايميل عشان ابعتلك عليه ونتكلم بس ممكن تبعتيلي ايميلك على ايميلي اللي في البلوج عندي

تحياتي
‏قال Desert cat
منى
والله يا حبيبتى هى جت بالصدفة
تسلمى لى يا منمون
‏قال Desert cat
مهندس مصري
انا لاقيت نفسى تلقائى برد وبالرغم من انى عارفه انى غلط بس مش برضه مش قدرت اسكت
انا يشرفنى طبعا تضيف مدونتى
احترامى وتقديرى
‏قال Desert cat
The Queen
ما انا قولت زيك كدا بالظبط
احنا نشتم فى بلدنا براحتنا هما يجيبوا سيرتها ده لا عاش ولا كان يا اوختشى
على العموم انا ضفت ايملك عندى
اخدته من المدونة عندك
وطبعا انتى تنورى الماسنجر
امواااااااه
‏قال اسامة يس
انت دافعتي عن مصر عن الوطن ... لكن الوطن اصبح يساوي النظام
واصبحت التفرقه بينهما جد صعبه للغاية لدرجة جعلت الجميع يشعر ان مصر هي مبارك ومبارك هو مصر .. ويتعامل مع الوطن على هذا الاساس ... انت دافعتي عن الحلم والامنيات الصادقة التي تمنيتي ان تكون موجوده في وطنك في بلدك.. وهم تكلموا عن مصر مبارك .. وانت عطفت في سياق حديثك عن مصر مبارك مصر امن الدولة....

لك اسلوب خاص ساخر في الكتابه...
دمت بكل ود..
خالص تحياتي
‏قال Desert cat
osama
يا اسامه مش معنى ان دافعت يعنى انا مش متضايقة من حاجه
بالعكس ده انا قرفان من كل حاجه بتحصل حواليا كل يوم
ما هو النظام اللى بيكرهنا برضه فى الوطن
لو واحد والده شديد شوية فى البيت وكل شوية يضربه ويقطع عنه المصروف ما هو بيكره البيت باللى فيه وبيطفش ويسيبه وده اللى بيحصل لنا دلوقتى
ربنا كبير ويرحمنا برحمته
دمت بود
‏قال Soooo
مره واحد ومراته انجليز من ويلز جم مصر وانا خدتهم راوند كده في الازهر والحسين وزينهم ودخلو كام مدبغة جلد وكان نفسهم مووووز يشوفو عملية السلخ دي بتتم ازاي .. وطول اللف والليله دي كنت انا اللي بحاسب .. وكان الناس يبقو عايزنني اسرقهم ولا بتاع ويحاسبوني الحاجه بالضعف لكن انا كنت بادفع الحساب بالظبط واللي يتكلم ابقى هاكله بسناني واليوم كان ماشي فل الفل لغاية مالقيت واحد كده لابس عادي مش ميري وبيقوللي فين الكارنيه بتاعك؟؟
قلتله كارنيه ايه .. وانت مين اصلا ؟؟
قاللي انا مباحث سياحه وفين كارنية مزاولة المهنه بتاعك؟؟
قلتله ياعم دول صحابي .. جايين ضيوف .. وانا اللي بحاسب اصلا ومش مخليهم يمدو ايدهم في جيوبهم
المهم من هنا لهنا كان عايزني اطلع عالقسم وانا طبعا ولا فارق معايا قسم ولا مديريه انشالله لو عايز نروح جهنم الحمرا وفارس لفارس تعالالى .. اللي غاظني انه طول المده دي الراجل الانجليزي اللي معايا كان عايز يلطف الموقف وبيقوللو
what r u doing .. he is my friend !!!
وطبعا التاني ولا فاهم اصلا اي حاجه وعايز اي فلوس وخلاص
لما لقاني مقاوح قام سكت ومشي وقاللي خللي بالك اللي انت بتعملو غلط وماينفعش انك تمشي باجانب في الشارع .. كأني مثلا ماشي بطلقة بانجو ولا حرز حشيش

وطبعا الاتنين اللي معايا استغربو قوي وحلفو انهم مش جايين مصر تاني من اللي شافوه من الاهبل ابن الهبله ده

مش عيب ياقطة انك تدافعي عن مصر كدوله .. انما العيب انك تتحمقي للشعب المصري اللي زيه زي اي شعب فيه الكويس وفيه الوحش
والعيب الاكبر بقى .. انك تتحمقي لحكومة الدولة دي

حد سامعني ولا حاجه؟؟؟


سلامووووووووووز
جميل ان الاقي حد بيعمل مش بيكلم بس
‏قال Desert cat
Soooo
ما هما لما ميلاقوش حاجه يعملوها
تلاقيه بيقولك كارنيهك يمكن تشوفه بـ 2 جنيه فى جيبك ولا حاجه
وشاطرين بس يقولوا لك مصر بتتقدم بينا
خلاص زهقنا من التقدم
معلشى بقا يا سو
احنا نعرف صحابك على صحابى ونعمل حملة قومية
بس على ما اعتقد مش حتاثر اصلنا حنبقا اتنين بس بنحسن فى الصورة
والباقيين بيقرفوا فيهم علشان يروحوا ميرجعوش تانى
تحياتى
‏قال Desert cat
اسكندراني في الغربة
مع مفروسة من اللى بيحصل بس كان لازم اعمل
مودتى
‏قال oceaneyes
انا جيييييييييييييييييت
:D

وحشتينى بجد يا قطة ووحشنى كلامك وبوستاتك الروعة

بس ايه يا بنتى الكلام الكبير اوى ده
...

بس بصراحة عجبتينى لما رفضتى تاخدى البقشيش...مافيش حد بيعمل كدة فى الزمن الاغبر ده

بس كويس والله انكم اتصاحبتوا واخدتوا ايميلات بعض

بس قوليلى الامريكان دول زوقهم حلو فى الشنط ولا ايه ؟؟؟؟؟؟؟؟

:)
‏قال Desert cat
oceaneyes
يا الف اهلا وسهلا بيكى وبعودتك
انا اصلا مش بتاعه بقشيش يا اما يكتب لى شيك على ابيض يا بلاش
انما باقى عشرين جنيه ايه اللى حبص عليهم
زوقهم فى الشنط حلو وفى البرفان احلى
محبتى يا قمر
‏قال A long distance
هههههههههههههههه
ههههههههههههههه
والله يا قطه
انتي عسل اوي
بس اخدتي الشنطه ولا لا
ولسه بيجوا عندك ولا بطلوا
‏قال غير معرف…
Wow, awesome blog structure! How long have you been blogging for?
you make running a blog look easy. The total look of
your site is great, let alone the content material!


My weblog weight loss with garcinia cambogia

المشاركات الشائعة