طفـــو النـــور

ايوا طفوا النور ومحدش يشغل حاجه بالكهربا
يعنى المكواة مثلا بتستهلك كهربا كتير
بلاها .... مالها يعنى المكوة الرجل حتى بتطلع الهدوم ملحوسة ومهببة وبرضه مكوية
وما تضربيش طماطم فى الخلاط انتى تقطعيها مع الخضار وهى حتتسبك لوحدها ولا لايه اساسا طماطم ملهاش لزوم واهوا برضه توفير والاكل من غير مسبك صحى دى الحكومة عايزه مصلحتنا
اى حاجه داخل فيها الكهرباء لازم نقتصدها ده ان مش بطلناها خالص
اصل حكومتنا النظيفة بقيادة الباشا احمد نظيف قصدى الرشيدة لا مؤاخذه ياباشا مخدتش بالى
رفعت امبارح اسعار الكهرباء
يعنى ياباشا هى الناس لاقيه تاكل لما حتدفع كهربا زيادة
ودى تفاصيل الخبر
الحكومة ترفع أسعار الكهرباء في سرية تامة

اللى غايظنى انهم بيرفعوا الاسعار فى سرية ولو رفعوها فى العلن حد يقدر يفتح بؤه اصلا
و يقولهم مينفعش
اكتر من نصنا امنية حياته يوصل لخط الفقر ومش طايل
ولا ولادنا عايزين يهربوا باى طريقه مع انهم بيرجعوا فى صناديق بس ارحم من الفقر والجوع
ولا الخبر اللى ينرفز على مصراوى ده
عصابة لتسفير الفتيات المصريات وإجبارهن علي ممارسة البغاء بالخارج
تفتكر ياباشا بيطفشوا من ايه دول كمان ... علشان يلاقوا رغيف العيش ويعرفوا يعيشوا ولا علشان يتبطروا على النعمة اللى هما فيها فى ام الدنيا .... ولا علشان طماعين يا سيادة المفتى
عادى ياباشا منك ليه ولا يهمكو
ارفعوا اسعار كمان وكمان وفى العلن مش فى السر
وجوعوا فى الغلابة كمان وكمان
دى بلدكوا واحنا رعايا عندكو
هو من امتا يعنى الرعايا ليهم حق يتكلموا
انتوا ذلوا فينا واحنا حنقول كوماااااان

تعليقات

‏قال محمد صالح
بسم الله
احب اقول زاى ما حضرتك قولتى ان يرفعوها فى العلن او فى السر مش هتفرق كتير غير اننا هنعمل واقفات احتجاجيه وخلاص ولا حاجه هتم ولموضوع هيمشى وهيبقى فى زياده مستمر وهندفع
وانا عندى مبدأ ماشى عليه الحكومه غلت رخصت انا عايش وطالما عايش احمد ربى واشكر فاضله والاكل ناكل خفيف وننام والاكل الصحى بيوفر ويديك طاقه اكبر بس مبيشبعاشى اااااااااه يا بطنى
هههههههههههههههههههههه
متخفيش حكومتنا الفقدة الاهليه سورى قثدى الرشيده ليها يوم تقع فيه ومصر فى تطور دائم حسب اكاذيب التلفاز المصرى اللى واخدينه مقوله لصالحهم واستثمار انا هقولك مقوله واحد البلد نازله لتحت مش طالعه لفوق
وياريت تبقى تراسلنى على ايميلى
nile.boy@hotmail.com
‏قال فرنسا هانم
يا فتاح يا عليم يا رزاق يا كريم
اصتبحنا واصتبح الملك لله
جردل ميه صغير ياله علشان توفير الميه ورش قدام باب المدونه
غلوا الكهرباء ؟
مانا كنت حاسه
مانا كنت عارفه
مانا كان قلبى دلييييييييييييلى ؟
الواد بتاع النور وهو بيدينا الوصل من كام شهر قالى
انتم لسه شفتم حاجه ؟
وادينا شفنا يا روح مامتك
كان ناقص الكهرباء كمان
سك يا بنى على جردل الميه
وبلاها رش
علشان هيغلوا الميه كمان
‏قال 3ala asm masr
سيادته قال أن فى أصلاح والشعب مش حاسس بيه
والنبى حد يقوله كفايه أصلاح
وربنا خلاص حسينا
والله العظيم حسينا
‏قال Coca
يارب احمنا
يعني تقريبا انتي بتكتبي البوست وامي بتزعق علي النور والكمبيوتر والتليفزيون اللي والع
والكهربا جاتلنا كتير الشهر دا
تقوليش كانت قاريه كلامك
والله انا ماعارفه الناس علي راء الاخ بوحه محطوطين في خلاط والحكومه مشغله الخلا طعلي اخر سرعه الناس اتفرمت
يعني هما لو يبطلوا رشاوي
اوي ما يسمي بالرشاوي السياسيه اللي حرقت دمي من شويه
لو اخدوا الفوس اللي بتروح في كورووش الاخوه الوطنين
اهو يرحموا الناس شويه
ياقمر انتى مش فاهمة نظرية الحكومة دى بتحبنا وبتفهم اكتر مننا وعايزانا نحب بعض ولما الدنيا تسود والنور ينقطع ترد علينا بحب وعيون مسبلة وتقولنا نوركم يا شعب كفاية
يا جماعة كل حاجة الحكومة .. الحكومة

لأ .. لازم نعتمد على نفسنا شوية .. يعنى بدل ما نستهلك الكهربا فى التدفئة و الشتا اهى داخلة علينا .. نستخدم الحطب أو الفحم

و لو بقينا ننام بدرى من الساعة 7 مساءا مثلا .. هانوفر كهربا الإضاءة بالليل

ثم إن الحكومة مالية الشوارع نور .. يعنى اللى عايز يقعد شوية فى النور ينزل يقعد فى الشارع و يسيب بيتهم مضلم

و مش عيب لو كل خمسة آلاف فرد اشتركوا فى تليفزيون واحد

أو كل عشرة آلاف فرد اشتركوا فى راديو

يعنى لو شغلنا مخنا شوية هانحل مشكلة الطاقة العالمية من غير ما نحمل الحكومة حاجة .. عشان هم عندهم حاجات أهم يتشغلوا بيها عن إنهم يتشغلوا بمصالح الناس
‏قال واحد مصرى
طفي النور يا بهية.......كل العسكر حرامية....
‏قال agamoooo
قالوها زمان فى الاغانى
طفى النور يابهية
كل العسكر حرامية
‏قال Esmat
قطقوطة الجميلة لا على راسنا الباشا
الصغنن وباقى البشوات كلهم يرفعوا الكهربا
يرفعوا الضغط والسكر مبسطين منهم اوى
مش كده اختى
عارفة احنا هنا بندفع متوسط 200 ريال كهربا شهرى
اما البنات اللى بتهرب بره
ده بقى المرار كله يا قطة
الشباب ماشى الحال لكن وصلت للبنات يطلعوا يشتغلوا فى الدعارة ربنا يستر
الناس طهقت ومستعدين يعملوا اى حاجة علشان
يخرجوا بره مصر
شوفتى بلدنا قصدى اللى مسكين بلدنا وصلزا الناس لايه
ربنا يسترها مع الجميع يا رب
واحلى تحية لكى يا قطقوطتنا الجميلة
‏قال hamsaa
عارفة خالتي عندهاعقدةالكهرباء دي كل حاجة تقول انهابتستهلك كهربا بس انامبتفرقش كتير
افكارك جميلة بجدبجد
وكالعادةيعني الحكومةتفعل ماتريدةولا صوت يعلوصوتها
‏قال غير معرف…
ههههههههههههه
هى جت على الكهربه
لسه التقيل ورا ياحاجه لسه لسه انتى مستعجله على ايه
بكرهنقف عهلى شط اسكندريه ونصطاد سمك ونملى جرادل ميه نشرب الميه وناخد الملح نرشه على السمكك وهو بيتشوى على اشاعه الشمس اهى برده حاجحه نحافظ بيها على البيئه
بس تبقوا تلحقوا قبل ميخلوا الصيد بفلوس
خخخخخخخ
وعجيبا يامصر
‏قال Desert cat
محمد صالح
حتى الوقفات الاحتجاجية بيستفيدوا منها
ايوا بيستفيدوا فى ضرب وسحل الشباب فى الشوارع
ما هو ده عمل والعمل عباده
تحياتى ياباشا
‏قال Desert cat
فرنسا هانم
والله لو رشيتى مية النيل كلها فى الشارع
برضه حيغلوا الاسعار
يا حبيبتى خلاص مبقاش ينفع لا رش مية ولا توليع بخور
احنا نولع فى نفسنا ونريحهم مننا
تحياتى يا منورانى
اموااااااااه
‏قال Desert cat
3ala asm masr
وانتى عايزه اصلاح ايه اكتر من كدا
ده اصلاح وفايزه وماهيتاب كمان
تحياتى
‏قال Desert cat
coca
بالنسبة للرشاوى احب اعرفك انى لسه دافعه الصبح 100 جنيه غرامة
والموظف بعضمة لسانه لاقيته بيقولى هاتى 5 جنيه مصاريف
قولت له الغرامة مش عليها مصاريف
جايه لى 100 جنيه ماسكة بعضها
وقالى واحنا مش لازم حاجه كدا يا استاذه
قولت له انا مش الشئون الاجتماعية
هات الايصال
اقسم بالله بصلى بصة كان حياكلنى فيها
ولو مش غرامة ما كان خلص لى اللى انا عايزاه
وادى موظفين البلد
تحياتى
‏قال Desert cat
coca
نسيت اقولك ابقى اقفلى التلفزيون والكمبيوتر مش تستخدميه اكتر من 10 دقايق فى اليوم يا دوب يحمل تروح قفلاه تانى
دى الكهربا غليت يا بنتى والعيشة بقت نار
‏قال Desert cat
كلاكيت تانى وتانى
ههههههههههه
عسل يا نرمو
بيعيشونا الجو الرومانسى
شافوا الناس مطحونة فى الشغل ليل نهار
قالوا نعلمهم الرومانسية
‏قال AMRO .O. ABDELHALIM
عندك حق
كل يوم الاسعار بتزيد، الحياة بقت نار
الحياة بقت صعبة اوى فى مصر
ومحدش بيعمل حاجة
تحياتى
‏قال محمد صالح
هههههههههههههههههه
حلوه اوى بتاعت الغرامه دى
هههههههههههههههههههههه
حاجه لينا دا لو يجمع من كل واحد يروح له 5 جنيه هيروح فى جيبه ولا 500جنيه فى اليوم يعنى شغال شغلانه ميه ميه
احسن من اى حد فى مصر
زاى عسكرى المرور عمال يلم من بتوع الميكروباز زاى المنشار رايحين واكل راجعين واكل
انا راكب فى عربيه مره 3 عساكر اخدوم من صاحب العربيه اللى انا راكب فيها 3 جنيه فى 3 محطات مختلفه سعنى بتوع الميكروباز شغالين لبتوع المرور
‏قال Desert cat
ابن حـجـر الـعـسـقـلانـى
اصلا هما اللى دلعونا ياباشا
عودونا على الترفيه منذ نعومة اظافرنا
من تعذيب فى السجون لرشاوى لتعدى من اى نوع يحبوه
هما اللى دلعونا وجايين دلوقتى نقول الحكومة
بصراحة شعب طماااااااع

تحياتى
‏قال Desert cat
واحد مصرى
دلوقتى طفى النور يا بهيه كل الكبار حرامية
‏قال Desert cat
agamoooo
ما هو الاغانى بتعبر عن واقعنا دلوقتى
‏قال Desert cat
اسكندراني اوي
امين يارب
ربنا يسترها معانا جميعا
‏قال Desert cat
Esmat
ما هو انا برضه بقول زيك كدا يا قلبى احنا عمايلهم على راسنا من فوق
يعنى يرفعوا اسعار براحتهم يطفشونا من البلد براحتهم مفيش اى مشاكل

بالنسبة للنبات مبقتش فارقه بنات ولا ولاد المهم الناس تطفش من هنا وخلاص
والله ما عارفه اخرتها ايه ولا المسلسل البايخ ده حينتهى امتا
والله العظيم انا تعبت جدا
من اللى بيحصل ده
ربنا يتولانا
تحياتى ليكى يا حبيبتى
‏قال Desert cat
hamsaa
ما هو بعد كدا لازم تفرق
اصلك حتشتغلى علشان تدفعى فلوس كهربا
نورتى البلوج ويارب دايما مشرفانى
‏قال Desert cat
Anonymous
اتقل من كدا ايه بس
خلاص تعبنا مبقناش قادرين نشيل
‏قال Desert cat
amro
ولا حد هيعمل حاجه
لسبب بسيط جدا
ان اللى بيفكر بس يعنى مش بيعمل ده مجرد لسه بيفكر
على المعتقل
الناس عندها تجوع وتسكت
لما خلاص
ربنا يتولانا
‏قال Desert cat
محمد صالح
للاسف الحاجات دى منتشرة وفى كل مكان
مودتى
ربنا على الظالم والمفترى وابن الحرام
‏قال Desert cat
بت خيخة وأى كلام
اللهم امين
ماطفتيش النور ليه لغاية دلوقتى
‏قال Unknown
تعليقك على التدوينة الأخيرة له قيمته واحترامه .. وعمري ما أرد أقولك زي ما قلت للتاني عارفة ليه يا قطة الصحرا
لأن التاني بكل بساطة كان بيقول كده عشان يرضي اللي حواليه
بقيت الرد هتلاقيه عندي على التدوينة
شرفيني
‏قال Desert cat
يوميات عيل مصري
اه شوفته
بس لما السيئ بيكون طاغى على الحلو
بالتالى بيداريه عن العيون
خصوصا اذا كان الحلو ده حاجات نادرة مش موجودة فى كل الاماكن
الا ما رحم ربى
‏قال Unknown
أشكرك .. بس ده مش هيمنعك من زيارة المدونة
‏قال Desert cat
يوميات عيل مصري
اه طبعا يا فندم
اصلا انا مش مختلفة مع حضرتك كتير بس كان مجرد حروف وبحط عليها نقط
لقيت حضتك كملت اللى انا نسيته
احترامى وتقديرى لشخصك الكريم
نحن ولسوء حظنا نعيش في فتره تهوى فيها مصر الى هاويه سحيقة بفضل المماليك الجدد ولا امل فى شىء اذاظل هؤلاء رابضين على مقدرات هذا الشعب .فولاء هؤلاء المماليك هو فقط للمنفعة ولو على أجساد العباد.
U C ,,, I payed a lot of effort 2 write that In arabic .....2 B good Understood..
best regardes
‏قال Desert cat
مصرى وبدرجة مواطن
اصل فلوسى كتير وعايزه ابقشقش على الحكومة
يعني هما يغلوها في السر وانت تفضحي الدنيا كدة
فين الوطنية
فين الانتماء
فين الي يقدر ياخد الحكومة على جوانتينامو
‏قال Desert cat
a Dreamer with feet on the Floor
طيب والحل ايه ؟
كله بيقولك مصر فى فترة انتقالية ومصر بتسقط للهاوية
ومصر اتحولت من الجمهورية للملكية بس ياترى حنفضل نقول كدا لحد ما نموت وندفن تحت الانقاض
‏قال son's egypt
السلام عليكم
كل يوم الاسعار بتزيد ومحدش بيتكلم علي اي حاجة
زمان ايام السادات لما لاغي الدعم البلد كلها قامت
دول لا محدش حيقوم
وبعدين مش فرقة سر ولا علن
واللي بيرفعوا الاسعار مش عارف ليه انهم مش حاسين انهم عايشين في بلد اكتر من 45 % منها عايشين تحت خط الفقر
‏قال Unknown
يا شيخه خضتينى
فكرت ماما طلعت عندك فى المدونه
اصلها كل ما تشوفنا تقول كده لا الفاتوره بتجيلنا عاليه قوى صراحه بشكل مبالغ فيه ممكن تتعدى 200 جنيه ليه معرفش عندنا مكن فى البيت باين ولا ايه
فى حاجه واحده بس نسيوا انهم رفعوها
نسيوا انهم رفعوا ضغط 20 او 30 مليون
استر علينا يارب
السلام عليكم

صحيح ليه يرفعوها في السر
دا ولا كأن الشعب هايعترض ولا حاجه لا سمح الله


ربنا يحلها من عنده

انا و انتى القدر جمعنا على غير ميعاد فى المكان ده و باللون الاحمر اللى بيعبر عن مكنون حبى و هكذا من الكلام اللى
بيثبتوا بيه البنات...

خلينا مع الصور اللى كشفته و و هو لا يعلم ان هناك كاميرا تراقبه و تراقب تصرفاته

تابع

قصة حب

عمر افندى على موقعه


www.omarafandy.com

‏قال Desert cat
son's egypt
علشان كان زمان ايام السادات فى بنى ادمين عندهم كرامة وعزة نفس بجد
انما دلوقتى الذل بقا السمه السائده
الناس اللى بترفع الاسعار مش حاسين بالفقرا لان ميهمش الفقرا همهم يبقا رصيدهم كام فى بنوك سويسرا
تحياتى
‏قال Desert cat
لماضة
ده 200 جنيه كدا رحمة يا دوك
جارنا بقاله شهرين بتيجى له 600 جنيه برضه مش عارفه ليه
فى مرة صاحية سمعت ان الراجل حينتحر علشان 600 جنيه الشهريا بتوع الكهربا دول
تقوليش بيقبضوا الموظفين من فاتورته
وده كان قبل ما يرفعوا سعرها
دلوقتى بقا ممكن تيجى له الف جنيه
ربنا يبعدهم عننا انا بدفع 150 جنيه
بس عايشه وسعيده وراضية ولا اقدر افتح بؤى اهلى عايزنى
‏قال Desert cat
alaa salim
معلشى ميعرفوش ان الشعب بيحبهم
وحيدعى لهم ربنا يوطى مراتبهم ويخسف بيهم الارض
‏قال Desert cat
عمر افندى و ابوه
من العنوان شكلها متميزة
انا حدخل حالا الموقع علشان اقراها
تحياتى
‏قال غير معرف…
يعنى من جمله المصائب الى بتحل فى بلادنا


المهم فى ده كله ان محدش بيعترض محدش بيتكلم واخرنا ان احنا نكتم فى قلبنا ونحرق دمنا


ربنا يرحمنا برحمته


مدونتك جميله

تقبلى تحياتى
‏قال Desert cat
اسكندراني في الغربة
لاء ما هو ده برضه سر بينا
ما احنا صحاب ومش حنقول لحد
ده مهما كان حكومة بلدنا اللى كل يوم والتانى يرفعوا الاسعار
واللى بيزعلهم بياخدوا اقرب قسم يخلصوا عليه
ومظبطينا اعلى تظبيط
لازم نستر عليهم ونحفظ اسرارهم برضه

تحياتى
‏قال Desert cat
dr.nour
ما هو انا اللى مضايقنى يا حبيبتى مش انهم رفعوا الاسعار
الل مضايقانى انهم رفعوها فى السر
طيب وفى السر ليه هو احنا حنتكلم ولا حنقول حاجه
طبعا الاجمل من المدونة انك نورتيها
احترامى وتقديرى
‏قال اسامة يس
يمكن بيرفع سرا عشان يهدي الجو وسيناريو التوريث يعرف يمر ... اصل لو علناً والشعب قال ايه دا في سره طبعا مش في العلن هيسبب قلق ودا مش لصالح جيمي ولا الملكة الجديدة ولا الملكة الام ....

واهم شيء متنسيش محدودي الخل .. دا اهم شيء عندهم اقصد معدومي الدخل...

دمت بكل ود..
خالص تحياتي
‏قال Desert cat
osama
ياباشا فى السر ولا فى العلن محصر بعضه
ما احنا عرفنا اهوه عملنا ايه يعنى
ولا حاجه
ده حتى الشعب بقا اليس ومستأنس خالص
تحياتى

المشاركات الشائعة