ليلـــــة قــلـــــــق


كمية زهق محصلتش ومش عارفه ليه ومن ايه ... عادى بتحصل كتير بس مش بتطول اوى كدا بشغل نفسى فى النت او ارغى مع حد على المازنجر امبارح طلبت معايا اعمل اوف لاين وماليش دماغ لاى حاجه ... حسيت انى عايزه اكل حاجه كويس اهى حاجه تطلعنى من الزهق .... جبت شيبسى ونسكافية ... بس خلصتهم وبرضه زهقانة ... طيب اعمل ايه ... الساعه لسه9انا اروح لعبير اخدها ونروح اى مكان نعمل اى حاجه مش ممكن استسلم كدا ... فعلا رحت لها
أنا : يلا نخرج ...
هى : حنخرج فين فى البلد دى يعنى
انا :امممم على رايك ده احنا لو مشينا من شارع ورجعنا منه تانى حنلاقيهم جابوا اسامينا وتاريخ ميلادنا ورقم تليفوناتنا وعدد اخواتنا
هى : انتى ما صدقتى يلا نروح ناكل ايس كريم
انا : لا انا لسه شاربة نسكافيه وبعدين انا حبدأ ريجيم من بكره مش عايزه اتخن
هى : يادى الستين كيلو اللى قارفانى بيهم كل لما اكلمك تقولى ريجم ومش عايزه اتخن .... المهم انتى عايزه ايه دلوقتى
انا : يلا نروح ناكل ايس كريم
هى : ايه الاخبار دلوقتى
انا : ابدا زهقانة ... اقولك انا هروح
هى : أحسن برضه فى حالتك دى مش ينفع غير انك تروحى ...
فى البيت
يادى الملل لسه الساعه 10ما باليد حيلة انا اقضيها قناة الحكايات بقا وخلاص ..... لاء بس انا عايزه اشرب حاجه ... اروح اعمل شاى ... ... اشوف التلاجة فيها ايه ..... واااااااو سمك .... طب والريجيم ... اه حيبدأ من بكره انا اكل سمك وشاى واعيش حياتى ... مسلسل ورا مسلسل يخربيت الزهق ... انا اروح اعمل شاى .... ايه ده فى ريحة غريبة بس بحبها .... وااااااو جبنة ومش .... اكيد مرات اخويا راحت بلدهم النهارده او مامتها جت .... مش مهم مين اللى راح ومين اللى جه المهم انى الجبنة والمش حبابيبى هنا جنبة وشاى .....واعيش حياتى
.... ما انا حبدأ ريجيم من بكره ... يخربيت الزهق الواحد قاعد لوحده بين4حيطان الله يرحمك يا زمان لما كان اخواتى كلهم لسه هنا وعاملين دوشة وقلق وحشونى والله .... لاء بس احسن برضه انهم اتجوزوا كان بيفرضوا عليا القناة اللى يحبوا يتفرجوا عليها وبحكم انى اخر العنقود مش اقدر اقولهم لاء يجوا يشوفوا اللى بيقولوا اخر العنقود متدلعين بلا ارف .... بس برضه كانوا مسليينى وبيعملوا لى كل حاجه وانا قاعده فى مكانى ... لاء بس دلوقتى مستفرضه بكل حاجه لوحدى وماما برضه بتعملى اللى انا عايزاه .....بس برضه وحشونى .... انا مش عايزه نكد كفاية كل دموعى خلصت على الملك فاروق وهما بيستبعدوه من مصر وعمر وهو بيعيط علشان شمس تسامحه فى مسلسل فريسكا والاتنين الحلقة الاخيرة النهارده طالبة نكد علشان اقعد اعيط واخلص الدمعتين اللى عندى ... انا اقوم اعمل شاى .... لاء مش فاتحه التلاجة ..... بس غصب عنى ... ايه ده موووووز على اساس اننا ساكنين فى جبلاية مش عارفين يجيبوا جوافة ... انا عايزه جوافة ..... هروح اصحى ماما اقولها تجيبى لى بكره جوافة ... بس ما هو ممكن اقولها الصبح يعنى ... بس الصبح ممكن انسى ... انا هروح اصحيها واقولها وخلاص امال هى ماماتى ازاى ما انا لازم اقلقها .... ماما .... نعم ... انا عايزه جوافة
ماما : طيب الصبح
ما هو انا بقولك علشان تجيبها لى الصبح
ماما : خلاص بقا ما انتى قولتى
طيب ولو نسيتى اعمل انا ايه يعنى
ماما : صبرنى يارب
انتى بتكلمينى كدا ليه هو انا مش بنتك برضه فى حد بيكلم بنته كدا
ماما : يلا يابت من هنا
انا عايزه ايه ياربى ..... لاء مش شاى اصلا الاكل اللى فى التلاجة خلص بقت فاضية .... انا اتصل بعبير .... ايوا يا بنتى انتى نايمة
هى : اه خير فى حاجه ولا ايه
لاء بس مش عارفه انام ....
هى :يعنى مصحيانى قرب الفجر علشانى تقولى لى مش عارفه تنامى طيب انا مطلوب منى ايه اعمله
ما تعمليش حاجه بس خليكى فاكراها ماشى ازاى انتى نايمة وانا مش عارفه انام
هى : لاء انا غلطانة تصدقى بقولك ايه اشوفك الصبح تصبحى على خير
اممممممممممممممممممممممم
وانا مش عايزه اشوفك سلام
ايه ده الفجر يعنى الناس كلها هتصحى بعد شوية وكلنا حنبقا زى بعض يا حلولى
ماما صاحيه تصلى الصالة مضلمة والتلفزيون مفتوح بدات تكلم نفسها عادتك ولا حتشتريها تدخلى تنامى وتسيبى التلفزيون مفتوح .... لاء انا هنا مش نايمة .... سلام قول من رب رحيم ... ايه يا ست ماما شوفتى عفريت
ماما : لاء بس انتى ايه اللى مصحيكى لدلوقتى كدا
انا : هو كدا مش عارفه انام وخلاص
هى : طيب قومى اتوضى وصلى وادخلى حاولى تنامى
رايحه اتوضا الاقى ابويا فى وشى .... طول الليل عامله قلق ورايحة جاية ترزعى فى ابواب والتلفزيون على الاخر اعوذ بالله .... ايه ياعم الحاج انت مش نايم فى اوضتك وبابك مقفول عليك هو حد جه جنيك ثم انت بتزعق لى ليه يعنى انتوا مخلفينى علشان تزعقوا لى هو فى حد بيزعق لبنته كدا الفجر كمان ..... والله بعد عم الحاج بقالك اكتر من شهر عمال تقوليها لى دى ما انا عارف انا ابوكى ولا ضيف عندكو ..... طب روق كدا وقولى اعملك شاى ولا هتعمل ريجيم من بكره ....
هو : حد يشيل البت دى من هنا
ماما : يلا ادخلى صلى ونامى حرام عليكى نفسك منمتيش خمس دقايق على بعض
لاء انا مش عايزه انام .... انا عايزه شاى

Comments

bota said…
يارب اكون انا اول رد يارب

المهم بجد انا قعدت اضحك كتير اوي
وعامة حاله الزهق ده ميكروب في الجو

بس ربنا يسعدك ويفرح قلبك ويبعد عنك كل الهموم

هاتي جنيه بقى

هههههههههههههههه

يلا سلام يا قمر وخلي بالك من نفسك
3ala asm masr said…
ليله واحده بس
تعالى يختى والنبى شوفى اللى انا فيه
كل يوم على كده لحد الصبح والبس وانزل افضل ماشيه ماشيه ماشيه لحد ما يتقطع نفسى وابقى شبه العيش الفينو بتاع دلوقتى الرفيع ده واجيب الرجنال وافضل اقرا اقرا اقرا وبردو مش بنام
بقى شكلى مسخره والله
اما بقى الزهق فده انتيمى لما بضحك كده واتبسط والزهق يروح اعرف ان فى مصيبه مستنيانى

تحياتى يا قمر وسلاموز عشان انا رغيت كتير


خليك فاكره انا اول كومنت اهو
ايه يا بنتى الليله ؟
تصحى امك علشان الجوافه ؟
وتتطلبى عبير الفجر ؟
وتعترضى الحاج وهو رايح يتوضاء ؟
ده انتى بنوته شقيه خاااااااااالص
لكن يلا زمانك دلوقتى بداتى الرجيم
ولا يمكن لسه
يمكن بداتى ويمكن بكره الرجيم حلو بس برضه الاكل كويس وبيسند الواحده بس الرجيم يخلى الواحده سمباتيك خالص والاكل فوايده كتيره
ايه ده ؟
هو انا بقول ايه ؟
انا مش فاهمه حاجه
انا جانى قلق فى النهار ولا ايه ؟
فيييييييييييين الشاااااااااى ؟
The Queen said…
هههههههههههههههههه

تصدقي انتي زي العسل

ايه رايك في العسل ما اكلتيش عسل ليه ؟؟ اكيد نسيتي

المرة الجاية بقى

وهبقى اعزمك على الشاي

سلام
يا جدعان هاتولها شاي وخلصونا
الله يكون ف عون الناس اللي معاكي
معلش ربنا ان شاء الله يفرج همك قريب عادي ده احساس دلوقت عادي اليومين دول
الله يخرب بيت العولمه احنا ناقصين كمان ارق
يالا ربنا يتولاكي
Desert cat said…
انتى فعلا اول رد
يارب دايما فى المقدمة يا جميل
ربنا يسعدك يارب وتضحكى على طول
بس انا المكروب اللى وصلنى كان زيادة شوية لدرجة انى كنت هفرقع
بالنسبة للجنية مش عارفه ابعته لك ازاى
ينفع شيك
يارب دايما منورانى
Desert cat said…
3ala asm masr
انتى الاول مكرر
بس انتى ازاى مستحملة ومستسلمة للزهق كدا
بصى انتى حاولى تقتليه اصله زى العدو كدا
ربنا يبعده عنك يا حبيبتى وكل ايامك تبقا فرح وانبساط
Desert cat said…
فرنسا هانم
وانا مالى مش مهم اللى بيزعقوا لى يعنى يرضيكى كدا
انا الريجيم بفكر ابدأه بكره
بس دلوقتى فعلا فعلا محتاجه اشرب شاى
ما تيجى ربنا يخليكى تشربيه معايا
هو انا بالنسبة لك ساكنة فى الادغال
بس لو فكرتى بجد حتقلاى المسافة قصيرة
Desert cat said…
The Queen
لاء مش بحب الحاجات الحلوة يعنى العسل والمربى وكدا ماليش فيه
اى حاجه تانية بئه معاكى وانا جاية اشرب عندك الشاى
لا كفاية الشاى ده انا يشرفنى انى حشربه مع الملكة
Desert cat said…
ولــــــــــو
ربنا يتولانا جميعا
الناس اللى معايا فى البيت اتعودوا
علشان كدا لما تلاقينى بروح عند واحده من اخواتى واغيب عندها بيحسوا البيت مالوش حس من غيرى ويقعدوا يقولوا لى البيت من غيرك مش عارفين كان عامل ازاى وكلام الامهات اللى انت عارفه ده
oceaneyes said…
لالالالالالالالالالالالالالالالالالا

ايه ده يا بنتى

ده انتى حالتك صعبة اوى وتصعب على الكافر

وبعدين تصدقى بالله انا يوميها برده فضلت صاحية قاعدة على النت ...ماكنش جايلى نوم خالص ..مع ان تانى يوم كان عندى كلية من 8:30 الصبح ...بس فضلت صاحية لحد ما رحت الجامعة وجيت نمت

...

بجد ربنا يكون فى عوننا كلنا ...حالة الملل والزهق دى مش من فراغ بجد ...باين عليه فيروس وانتشر فى البلد باين ..الله اعلم

....

تحياتى ليكى يا قمر وكل ماتحسى بالزهق ادينى مكالمة بس وانا اكون عندك اسليكى وتسلينى

:D
متهيالى الحاله دى بتحصل لكل واحد فينا
وهو وحالته بقى

المهم الشااااااااى

تحياتى
Desert cat said…
oceaneyes
انتى كمان زى ده احنا حد داعى علينا فى ساعه استجابة
تصدقى لو قولت لك انى لسه لحد دلوقتى منمتش والغريب انى مش حاسة انى عايزة انام ربنا يسترها النهارده كمان اصل لو الموضوع زاد عن حدة مش بعيد ابويا يطردنى من البيت علشان يعرف ينام براحته ده ابويا وانا عارفاه
ابقى اطمنى عليا
مش حوصيكى موبيلات بئه
Desert cat said…
حبة حاجات (ايمان
انا حالتى صعبة صح
قولى بس مش هزعل المهم اطمن على نفسى
ولو عندك شاى خليه خفيف سكر اصلى بدأت الريجيم
ههههههههههه
تحياتى يا منمون
لحظة said…
الموضوع ده عمرة ما حصل لي
قصدي القلق
بس الاكل والتلاجة عادي
بانام واصحى افتح التلاجة
ويا سلام لو حاجة حلوة
ولما اصحى
افضل نعسانه
مانت قريتي البوست عندي
انتي تديني شوية صحيان
وانا اديكي شوية نوم
تحياتي
Desert cat said…
لحظة
اااااااااااااه
وانا موافقة
اصل الناس اللى بيت يا اما مش حيدخلونى البيت اساسا ويبقا كدا كرامتى اتبعزقت
يا اما حيتبروا منى ويرمونى بهدومى فى الشارع ويبقا كدا كرامتى اتبهدلت
يا حبيبتى قلة النوم دى حاجه وحشة والله
كفاية الواحد دماغه شغالة 24ساعه ومبتفصلش
ربنا يهيأ لك الخير
تحياتى
هههههههههههههههههههههههههه
انا مضحتكش كدا قبل كدا
انتى زمان الناس اللى ى البيت واخدين موق جامد
ولا موضوع الجوافيه دا
هههههههههههههههههههههههههههههههههه
ولا الشاى كنت ريحى دماغك واعمليه مبياثر متخيش
وانما لموضوع القلق دا متخيش عندنا كلنا وياسلام لو مطبقه لمدة يومين هتشوفى بقى سواد السواد
lastknight said…
ربنا يصبر بابكى و مامتك .. بصراحه .. انتى تقلقى بلد .. عموما .. فيه شوية وصفات لمسألة النوم دى .. ممكن راضه عنيفه شويه لو عندك عجله ثابته فى البيت يبقى كويس .. بعدها دوش سخن ملهلب بنفس طريقة سلق الفرخه .. و بعدين كباية لبن
ممكن كمان فيلم رعب محترم و الدنيا ضلمه .. على مايخلص الفيلم هاتكونى مكيته فى جلدك عاوزه تنزلى تحت الغطا و تغمضى عينيكى .. لو قلقتى ساعتها هايطلعلك العو .. يبقى تنامى أحسن

طبعا ممكن قصه تاريخيه أو خيال علمى .. تخرجى بدماغك من الواقع تماما

لو مانمتيش بعد كل ده بقى .. يبقى ابوكى عنده حق .. شيلوا البت دى من هنا
هاهاهاه
هههههههههههههه
ايه الازعاج بتاعك كده عاملة ازعاج لكل الناس كده
ربنا يكون فى عونهم
بس تحفة

تحياتى
oceaneyes said…
من عنيا يا قمر ...انتى بس تأمرى

وعموما لو لقدر الله ماعرفتيش تنامى وباباكى طردك ...انا بيتى مفتوحلك فى اى وقت ..بس نعمل ايه بقا لو اطردنا احنا الاتنين من عندى


....


ههههههههههههههههههههههههههه


...

انا بعتذرلك مخصوص عشان هاغيب الفترة الجاية عشان عندى امتحانات بعد عنك ...ولما اخلصها هاتكونى اول واحدة اشيك عليها واشوف اخبارها ان شاء الله


....


يالا سلاااااااااام


:)
DoMaLaYs said…
ربنا يسعدك على طول

و يبعد عنك الزهق

و عننا كمان
This comment has been removed by the author.
Desert cat said…
محمد صالح
ياباشا يارب دايما مبسوط
بس الشاى اريح دماغى واعمله ازاى ما انى شربت يجى خمسين شاى برضه مفيش نتيجة
تحياتى
Desert cat said…
lastknight
هو بالنسبة للرياضة فانا كنت لعيبة قديمة بس دلوقتى بقضيها سويدى مع نفسى فى البيت مش اقل من نص ساعه
بالنسبة لافلام الرعب ده انا لو شوفت فيلم مش حنام اسبوع وكدا حقلق محافظتنا كلها
بس انا بعد كدا ان شاء الله حبقا اجرب موضوع سلق الفرخة ده واللبن يمكن يجيب نتيجة
بس لو نتيجته مضمونة حضرتك تتحمل العواقب
وانا مالى مش حضرتك الدكتور المعالج برضه
رد حضرتك تشريف للبلوج
تحياتى وتقديرى
Desert cat said…
محمد ياسر
وهو يعنى ينفع الناس تنام وانا صاحية
هو اينعم انا احب الانفراد
بس مش للدرجة دى
تحياتى
Desert cat said…
oceaneyes
لالالالالالالالا
خلينى هنا احسن
اصل لما ننطرد احنا الاتنين حنروح فين
ربنا يوفقك فى امتحناتك
وابقى طمنينى عليكى
تحياتى
Desert cat said…
DoMaLaYs
اللهم امين
اجمل دعوة
تحياتى
Desert cat said…
القلم السكندري
هو اخويا بصراحة بيعملها بس مش قبل الفجر هو على طول القلق بتاع بعد الفجر
ابنه يصحى يروح جايبه سايبه لينا وماشى تانى من حظنا اللى مش عارفه حلو ولا وحش انه ساكن فى وشنا على طول
علشان كدا احنا مقسمينها انا قلق ما قبل الفجر وهو وابنه قلق ما بعد الفجر
مش حارمينهم من حاجه
ههههههههههه
اما بئه ازاى انا صاحية والناس دى كلها نايمة
تلاقينى قاعده عمال اكل فى نفسى
ربنا يجعله اخر القلق
احترامى وتقديرى
يالهوووووووووي اجي انا اعملك كوباية الشاي دي يعني انتي فضلتي صاحية للفجر وكل ده وبردو معملتش الشاي ههههههههههه
الله يكون في عون عم الحاج والله

تحياتي ونصيحة ابقى عدي من واحد لمليون وهتلاقي نفسك نمتي ورحتي في النوم خاااااااالص
اللي استرعى انتباهي في كل القصة اللي انت حكتيهيا هو شخصية والدتك ووالدك، لذاذ جدا، ربنا يخليهم ليكي ويديهم الصحة والعافية.

وبعدين لما تبقي زهقانة، ليه ما طلعتيش كتاب مسلي خفيف زي حاجات الاستاذ العقاد مثلا تقري فيها؟؟؟؟؟؟؟

عميق تحياتي

ضياء
Desert cat said…
أيامنا الحلوة
لا والله انا عملت شاى كتير جدا بس مفيش فايده
تحياتى يا قمر
هههههههههههههههههههههههههههههههههه

احنا كلنا على كده
ليله واحده وعملت كده فيكي
امال اللي لياليه كلها كده

معلش
Desert cat said…
د. ضياء النجار
ماما وبابا دول تربيتى مش المثل بيقول جوزك على ما تعوديه وماماتك وبابكى على ما تربيهم
انا عملت بالمثل ده
هههههههههههههه
انا فى الوقت ده مش كانت طالبة معايا قراءة ولا اى حاجه خالص
كانت طالة معايا عنف يعنى اكسر حاجه
ازعق مع حد
كدا يعنى
الحمد لله ما تقلقش دلوقتى على ما يرام
يعنى ممكن اتكلم مع حد اليفه خالص
احترامى وتقديرى
Desert cat said…
اسكندراني اوي
والله يا استاذ اسكندرانى اللى كل لياليه كدا ده معاه ربنا
انا لما بتنتابنى الحالة دى بكون لازم اخرج منها باى شكل لان تفكيرى كله بيكون عدوانى
مش عارفه مين شتمنى وانا عندنى 3 سنين وليه سكت له انا هروح اضرب عياله
واشياء من هذا القبيل
ويارب تعيش دايما فى سعادة
دمت بكل ود
Esmat said…
يا رب على طريقة كتابتك تجنن
سردك بسيط ولذيذ اوى
ربنا يخلى لك ماما وبابا وتفضلى تنكفى فيهم
معلش الزهق ده ملوش حل
رتابة - وربنا يبعده عنك يا رب
طيب كنتى جبتى قناة النيل الاخبارية
او القناة الاولى او التانية
كان الزهق حيروح على طول
واهو كنتى شوفتى كام مسؤل على كام وزير
وحسسوكى ان مصر دى فى العالى يعنى
الناس دى هى اللى بتدينا الامل فى الانتحار
و يا رب دينا بخير يا عسل
Desert cat said…
Esmat
حبيبتى تسلمى لى يارب
علشان انتى انسانة جميله شايفه كل حاجه جميلة
انا بقا مظبطة نفسى على الحكايات مع انها اللى بتقوله بتعيدة زى الست الرغاية بس احسن لى من الضغط العصبى والقلب وجميع الامراض المستوطنة والغير مستوطنة بسبب الكام وزير اللى بيحسسونا انهم بيتكلموا عن مصر تانية غير اللى احنا عايشين فيها
دمتى فى اسعد حال
لما تكونى زهقانة كدة يا قطقوطة ابقى تعالى عندى هتلاقينى صاحية بكون انا كمان زهقانة
ونحط زهق على زهقى ونفرقع فيهم ونقعد نشرب حاجة ساقعة فى صحتهم

نورتينى فى مدونتى
اختك خيخة
Desert cat said…
بت خيخة وأى كلام
طب تمام اوى
ده احنا حنعمل احلى كوكتيل زهق فى الدنيا
انتى اللى نورتينى يا جميل
Anonymous said…
هههههههههههه تصدقى انا قريت المووضع كله عشان اعرف الشاى راح فين
وفى الاخر الاقيكى معملتيسش شاى
طب ينفع كدة والراجل الى مستنى دة اقوله ايه مافيش شاى
طب خلاص اعملى قهوة بقى وامرنا لله
مع ان الدماغ مش مستحمله اساسا
اه صحيح نسيت انتوا جبته جوافه ولا لسه
اصلى متعشتش من الصبح واباليسو حالفلى لفطره ليقول لخالتى حنوئه
اتصرفى بقى بدل مروح ابلغ عليك
Desert cat said…
هههههههههههههههه
انا اصلا خلصت الشاى اللى فى البيت كله
وجبنا جوافه
واكلناها هممممممم
dr.nour said…
ايه ده يابنتى

اول مره اضحك كده من قلبى من فتره كبيره


ده فعلا الفراغ ده وحش اوى


تحياتى
هههههههههههههههههههه يخرب عقلك موتينى من الضحك

انتى عارفة وانتى رايحة جاية تتحنجلى كده فكرتينى بناردين لما تبقى زهقانة وتتصل بيا وانا مندمجة فى فيلم تقولى انا عايزة اكل حاجة غريبة اقول لها اتصلى شوفى انتى عايزة ايه تقولى طيب فكريلى كده .. اقعد ارص لها فى كل الاكلات اللى اعرفها واللى معرفهاش تقولى عايزة حاجة اغرب وطبعا فى الاخر بقول جملتى الشهيرة يا مصبر الوحش على الجهش تروح قايلالى بطفولة ايه دا انتى مالك مش طايقانى كده ليه ؟؟ انتى بتشخطى فيا ؟ انتى مش بتحبييييييييييبنى وطبعا انا قلبى رهيف قدامها اقعد ادلع واحايل فيها ونعيد الاصناف من الاول ( دى نونو حبيبة قلبى مقدرش على زعلها )

وبعد ساعتين مكالمة تليفون بنكون بقينا الفجر ومفيش دليفرى وغالبا بتقوم تنام خفيفة وانا الفيلم بيضيع عليا وافضل اقول فى سرى حسبى الله ونعم الوكيل يقطع الحب على اللى بيحبوه واقعد افكر واكتشف انى عايزة اكل حاجة غريبة : ))
Desert cat said…
dr.nour
انتى بتقولى فيها يا دوك
والله الفراغ بيعمل عمايل توصل الواحد للجنان
يارب دايما مبسوطة يا قمرنا
تحياتى
Desert cat said…
سمـــــــــــا
تعملها ناردين وتقع فيها سما
يعنى ناردين بعد ساعتين مكالمة تروح تنام
والله دماغ
انا بقا عبير مش اديتنى فرصه اكلمها 3 دقايق على بعض قالت لى
اشوفك الصبح ولو كنت زودت شوية كانت قفلت السكة فى وشى
بس انا عذرتها يعنى
انا لو فى مكانها كان من اول كلمتين قفلت فى وشها
ربنا يخليكو لبعض انتى وناردين
تحياتى

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز