تفتكرينى أو تنسينى


عنوان البوست ده اغنية قديمة شوية لعمرو دياب .... اتسمعت لى النهارده قهرا
.... ايه السبب بئه ... من حوالى 3 شهور كنت محتاجه اطبع ورق الوان وانا البرنتر اللى عندى ليزر يعنى اسود بس .... واثناء وانا ماشية بالليل لاقيت سايبر فى طريقى هو مش بعيد عن السيبر بتاعى بس فى نفس الوقت كان اول مرة ادخله قولت اشوف السيبر ده يمكن فيه الوان ... وفعلا لاقيت فيه ... والشخص الموجود بدأ يطبع لى الورق ... دخلت بنت طلعنا معرفة وايه ده مش ممكن بتعملى ايه هنا يا نانا وسلامات وبوس واحضان وده العادى اصلا لان معظم اللى بيجوا عندى السيبر بتاعى بنات وبالتالى بقابل بنات كتير جدا فى اى مكان فى البلد طبعا كلهم عارفينى ... المهم قولت لها ابدا كنت عامله بحث وبالصدفة بسال هنا على برنتر الوان ولاقيت ... لاقيتها بتقول للى بيطبع لى انت تطبع لها الورق كويس دى تبقا فلانة صاحبة سيبر مش عارف ايه ... التانى بابتسامة عريضة والله هو انتى ازيك ... فرصة سعيدة جدا والله لازم تشربى حاجه ... انا متشكرة جدا يا فندم بس متاخره ومحتاجه اخلص .... البنت طلعت قريبته ولاقيتها بتقولى والله ما انتى ماشية غير لما تشربى حاجه ... وجابوا لى شاى ..... وقت الحساب اصر انه ما ياخدش الحساب قولت له لا يمكن ابدا ده شغل يا اما حسيب لك الورق وامشى .... المهم انى دفعت الفلوس اللى قال عليها واللى اقل من تكلفة الورق بكتير جدا ... ولما سالته بس كدا قليل اوى راح قالى ده احنا زمايل ومش ينفع اعاملك زى الغريب ... وبعدين حنردها فى اى شغل عندك والكلام ده كله .... تانى يوم لاقيته جاى عندى السيبر عازم نفسه على شاى واللى فهمته انه جاى يرد حق الشاى اللى شربته عندهم ..... وابدى اعجابه بالسيبر اللى هو فى الاساس مش عاجبنى انا شخصياً .... فات يومين ولاقيته برضه عازم نفسه على شاى ... ايه يا حج فرح هو ولا ايه ده مكانش بحث ده .... لاقيته بيقولى من غير لف ولا دوران انا معجب بشخصيتك وانتى بنت طموحة وفيكى مميزات كتير اى حد يتمناها وانا كلمت الوالد وعايزينك تحددى لنا معاد عندكو فى البيت ... قولت يا صلاة النبى احسن ..... قولت له طيب مش تاخد راى قبل ما تكلم والدك ... قالى ما انا مش ها اجى اتجوزك على طول ... ده مجرد تعارف يعنى وكدا ... قولت والله عين العقل واهوه الصيت ولا الغنى .... على الاقل الجيران يشوفوا عريس داخل ومامتى تقعد فى وسطهم وتقول بنتى كل يوم عندها عريس وهى ابدا ما اخدوش يا ماما ما اخدوش يا ماما لن احرمك يا امى من هذه الفشخرة الكدابة دى انتى ياما تعبتى علشانى ... قولت له وماله بيتنا اوبن اينى تايم .... راح قالى خلاص يبقا الجمعه بعد العصر ان شاء الله ... وجه يوم الجمعه هو والده فعلا ..... وقعدوا مع السيد الوالد واخويا .... وبابايا طول القعدة انت شوفتها فين.... ايه يا عم الحج الراجل عمال يقولك زومل يعنى هيكون شافنى فى سينما ريفولى والله انت راجل غريب ..... خلصت المقابلة بعد ما قعدوا يقولوا احنا مش عارف من عيلة مين ونسايبنا يبقوا مين وجيرانا مين وولاد عمة سوسو بنت الجيران اللى فى الدور الرابع اسمهم ايه ومش عارف ايه تانى ... وبعد ما مشيوا السؤال التقليدى للماما بتاع انا .... ها رايك ايه ... بصراحة ملقيتش حل غير انى اصارحها وانى خليتهم يجوا علشان تاخد راحتها مع الجيران ... قالت لى يعنى ايه ... قولت لها ده جزء من رد جمايلك عليا يا ماما ... بصت لى من فوق لتحت وكانها بتقولى كان يوم اسود يوم ما شوفتك وسابتنى ومشيت .... تانى يوم بئه فى السيبر جه يسالنى ... ايه يا جميل راى بابا واخوكى قولت له عادى بس فى النهاية دى حياتى انا مش هما ... قالى يعنى ... قولت له يعنى انت جيت وخلاص مش كنت عايز تتعرف واديك اتعرفت ... قالى برضه مش فاهم ... قلت له يعنى الموضوع ده قسمة ونصيب وانا بصراحة حاسة ان نصبى لسه شوية عليه ... قالى مش هعتبر ده رد نهائى وفكرى براحتك وبعدين نتكلم .... قولت عاتشى ولا بيهمنا الحاجات دى ... بعد كام يوم لاقيت البنوتة قريبته بتكلمنى ها يا نانا ايه الاخبار والاهرام والكلام بتاع الستات ده قولت لها يا حبيبتى انا قولت لقريبك كل شيق قسمة ونصيب بس هو اللى مش عايز يقتنع على العموم الموضوع بالنسبة لى منتهى بس وخلصت الحوار على كدا ... راح هو مكلمنى قالى انا الظاهر انى اتسرعت وانا اسف ... فات يجى شهر لاقيته جاى يسالنى على حاجات فى الشغل قولت عادى دى مش حجه ولا حاجه الراجل بيسال بس وبعدها عرض خدماته ولو احتجتى اى حاجه انا تحت امرك ... الامر لله يا هندز ... طبعا فاكرين الاسبوع الفات واليوم المشؤم اللى امن الدولة اخدت زمايلى فيه بسبب الاخوان مع انى مش كنت عايزه اذكرهم فى البوست ده بس افتكرت الناس الى بتقول انى بهاجمهم قولت مش هحرمكو من ذكر اسمهم .... المهم بئه ... زى ما زعلتكو هفرحكوا الناس دى بدأت تستلم اجهزتها تانى بس هو كان من ضمن الناس اللى اتاخد من عندها اجهزة بس لسه مش استلم جهازة .... لاقيته بيتصل بيا النهارده بيسألنى الناس اللى استلمت اجهزتها قدمت اوراق ايه ولا عملت ايه قال يعنى مش ممكن يسال حد منهم مباشرة .... بس انا طنشت وقولت دى مش حجه علشان يتصل ولا اى حاجه ... قولت له راحوا مجلس المدينة جابوا جواب ان مش فى حاجه اسمها ترخيص سيبر وبيقدموا كمان البطاقة الضريبية بتاعة السيبر ... قالى طيب انا جاى لك دلوقتى علشان اعرف بالظبط اعمل ايه ... وجه فعلا وقولت له على الحاجات اللى الناس اللى استلمت اجهزتها قدموها وفى اثناء الحوار موبايلى رن خرجت بره علشان ارد رجعت لاقيته مشغل اغنية عمرو دياب تفتكرينى او تنسينى وبيقولى حلوة صح ... لاقيت نفسى مسحوبة من لسانى وبقوله على فكرة انا لا افتكرتك ولا فاكراك اساسا ... انت اللى دايما بتحاول تكلمنى باى حجه ويوم ما زمايلنا كانوا بيتعرضوا على النيابة كانت الناس فى حال وانت فى حال تانى خالص ... بالرغم من ان الولد اللى بيشتغل عندك كان جوا معاهم وجهازك متاخد مع الولد وانت برضه شاغل نفسك بيا وباخبارى ... يا اعصابك ... وقف من مكانه وقالى برضه مفيش فايده فيكى فوقى وانزلى لارض الواقع مش حيوديكى فى داهيه غير غرورك واحساسك بانك احسن من الناس ..... قولت له مش غرور قد ما هى ثقة بالنفس .... واللى يوصله احساس بانى حاسه انى احسن من الناس يبقا هو حاسس انه اقل منى ودى مش مشكلتى ... لاقيته وقف من مكانه وكان هاين عليه يمسك حاجه يرميها في وشى بس الظروف مش ساعدته .... طبعا هو اللى جابه لنفسه .... ولو جاله ارتفاع فى ضغط الدم او سكر دلوقتى يبئه هو الجانى على نفسه

هو انا بحكى هنا ليه

اه بفضفض

تعليقات

و الله يا قطة الصحراء .. غالبية الرجالة كدة .. حاسين إنهم مركز الكرة الأرضية أو محور الكون

الواحد فيهم يبقى متوقع إن البنت من دول مستنياه يطرق بابها .. و هو خلاص جاى يخلصها من عذاب الانتظار



و أنا مش هاعتبر إن دة قرارك الأخير

:) :) :)
‏قال غير معرف…
عادى طبعا انتى بتبص للناس من فوق ليه ما هو الراجل الف فى امائه معاه سيبر وعنده طبعه الوان عايزه ايه تانى
بصى المشكله فى بعض الرجال انها لما بتتقدم لبنت مش بتحط احتمال الرفض رغم انه حقها
ولما تترفض تبتدى تطلع فى البنت القطط الفطسانه مغروره مش حلوه مش عارف ايه
كبرى الدى وروقى الجى
‏قال Esmat
دمك زى الشربات وانتى بتحكى
ضحكتينى بجد على فكرة لو مكنتيش عملتى كده معاه كان فاضل لازق لك وكان زهقك فى عيشتك بجد انا بقول لك كده عن تجربة سابقة
فيه بيدوا لنفسهم امل حتى لو رفضتيهم
و بيتهيء لهم إن ده نوع من الدلال
كده تحرمى تطبعى ورق الوان
ماله الابيض والاسود مش اريح
وتحية ليكى يا قمر
‏قال lastknight
ياعينى على والدتك اللى زمانها اتفرست منك ... عجبنى أنك واضحه مع نفسك .. و ده شىء نادر حاليا .. عموما تعيشى و تاخدى غيرها .. و ماتسيحيش لنفسك و تقولى مابيجيش عرسان .. هاهاهاه
مش انتي اللي جبتيه لنفسك
لو كنتي اشتريتي طابعه الان كنتي ريحتي نفسك
بس للاسف ما كنتيش طلعتيلنا بالبوست الجميل ده


عموما ربنا يكتب لك الخير والسعاده
قطة الصحراء

حقيقي اختيارك للإسم ده موفق جداا
انا كنت بحسبه مجرد اسم وبس
لكن واضح انها حقيقة عملية

واضح ان انتي حد مش سهل فعلا

بس ليه كل ده يعني
الدنيا ابسط من كده بكتير والله
‏قال Heart Beat
عزيزتي

فضفضي زي ما انتي عايزه و قولي ادينا بنحكي مع بعض و بناخد راي بعض

عشان قراء مجونتك كمان يستفيدوا سواء رجال او سيدات

يعني عشان الولد لما البنت تقوله انها مش موافقه عليه باسلوب مهذب يفهم ان خلاص مافيش داعي لانه يطول في كلامه معاها اكتر من كده و كمان اذا وافقت انه يجيب بابا و ماما و يجي يزورهم ده مش معناه انها موافقه عليه

اما بالنسبة للبنت فبرضه عشان تعرف انها مهما قالت للولد انه مش هلينفع يرتبطوا باي شكل من الاشكال هايفضل يلف و يدور حواليها لغاية لما يزهقها في عيشتها و لما يلاقيها مصممة على رايها يروح يقول للناس انه هو اللي مش عايز يرتبط بيها و انها حفيت وراه بس ماينفعش

و كما قال السيد رئيس جمهورية نفسه ان بعض الرجال مابتكنش حاطه في بالها احتمالية الرفض دي بسبب الاحصائيات اللي عماله تظهر في وسائل الاعلام اللي بتقول ان عدد النساء بقى اكتر من عدد الرجال بنسبة ملحوظة فكل رجل من دول يقول و هي هاتلاقي تتجوز ازاي المفروض توافق على طول من غير تفكير حتى و كان اللي بيتقدم لك ده براد بيت و لا مستر كلوني

ابقى اشتري بقى طابعة الوان احسن
‏قال sally
بصي يا قطقوطه
الشباب دول بقوا حاجه غريبة جدااااا
الواحد منهم لمجرد انه اتقدم حاسس انه عمل اللي ما حدش يعرف يعمله و انه عمل فيكي جميل همرك
و انك طبعا لازم تردي الجميل و تقبلي بما انه عرض عليكي انه ينتشلك من مستنفع العنوسه اللي في انتظارك عو فريب
بغض النظر عن رأيك فية او عن كونه مناسب او لا ده كله مالوش لازمه طالما جاب عليه الشيكولاته التمام و السيد الوالد و جه لحد عندكوا
هو انا مالي بقيت رغايه كده ليه
عموما اوعي تضايقي نفسك
انا راىى اننا اللى ادينا فى الرجاله المقلب الكبير دا
مش كلهم طبعا

بس عامل كبير اوى وشريحه كبيره من البنات هما اللى سلمو الرايه للرجاله

والظاهر ان القطط مش هتنفع الايام دى
هههههههه

وبوست لذيذ تحياتى
‏قال Soooo
ليه كده يابنتي تخسري شاب معاه .. معاه برنتر الوان
مسيرك تندمي لما يجيلك مدرس من بتوع الدروس الخصوصيه ويقولك انا عايز اطبع عشرتلاف ورقه من القطع المتوسطل
هتقولي ساعتها ياريتني


على فكره .. بالنسبه لغرور البنت او غرور الولد .. لو خدتي بالك هتلاقي ان معظم الشباب اللي بيعجبو بالبنات لو ما لقوش منهم استجابه .. بيقولو عليهم انهم مغرورين

اسأليني انا يابنتي
يوووووه .. تقريبا كده مافيش بنت اتعرفت عليها الا وقولت عليها انها مغروره


سلاموووووووووووووز
هههههههههههههههههههههه
انتى عسل
مش هعلق ع المدونة اصل لية حق عندك تمن المحشى والفراخ والمكرونة الباشمل والجاتوة واعتقد انك فاهمة
اما موضوع البوست فلما تدفعى اللى عليكى هعلق
لما باحس انى عاوزة اتكلم مع حد او حد يكلمنى.. ولان مش ليا أصحاب اوى يعنى.. بدخل اقرا فى مدونتك.. واتخيل انك جاية تزورينى وبتحكى لى

أسلوب جميل اوى .. قريب من القلب

تحياتى لاجمل قطة فيكى يامصر

كاميليا
‏قال Desert cat
ابن حـجـر الـعـسـقـلانـى

وشاهد شاهد
متخيل انها جاى يكسب فيها ثواب
دى خلاص بقت عانس مع سبق الاصرار
حتى لو عندها 20 سنة برضه عانس
الناس مش عارفه عقلها جرى له ايه
الا قولى اخبار النتيجة ايه ؟
‏قال Desert cat
رئيس جمهوريه نفسى
اه طبعا طبعا الراجل مش يتعيب ده كفاية البرنتر الالوان اللى عنده
دى فى حد ذاتها مكسب عظيم
ياباشا الناس اللى بتتقدم وفاكره نفسها مقبولة من قبل حتى ما تدخل البيت العيب مش عليهم العيب
على اللى مفهم الموضوع ده ان اى بنت دلوقتى بتدور على ظل حيطة والسلام
انا بئه مش عايزه ظل حيطة انا عايزه الحيطة ذات نفسها
‏قال Desert cat
Esmat
انا حسيت انه بيستفزنى قال وبيسمعنى اغنية حسيت انه بيشتمنى من خلالها
مكنش ينفع غير الوش البلاسيتك اللى شافه ده
بس اعمل ايه منها لله البرنتر الالوان الى حوجتنى ليه
يارب دايما منورانى
امواااااااااه
‏قال Desert cat
lastknight
هى ماما مش اتفرست وبس دى كانت حطق
ولما انتى اصلا مش حتوافقى خلتيه يجيى ليه
يا ستى انا بعمل كدا علشانك يقوم تزعقى لى انا غلطانه
بالنسبة للعرسان دول عاملين طابور بره والدم للركب
عاملين لنا بركة دم فى الشارع بس النفس ههههههه
مودتى يا فندم
‏قال Desert cat
اسكندراني اوي
هو انا اصلا بفكر ابيع الطباعه الاسود اللى عندى
يمكن اروح اطبع ورق اسود اطلع بالعريس اللى بدور عليه
الفارس المنتظر
وسعيدة بان البوست نال اعجاب حضرتك
تحياتى
‏قال Desert cat
آلام وآمال
هما مش بيقولوا ان لكل واحد نصيب من اسمه
يمكن علشان كدا
انا واخدة الحياة ببساطة بس هى اللى مش عايزه
تحياتى
‏قال Desert cat
Heart Beat
ما هى المشكلة يا حبيبتى
انه بيكون داخل البيت ومتخيل ان جاى ينتشل البنت دى من بعبع اسمه العنوسة علشان كدا حيتشال على العين والراس وكمان هى اللى هتجيب له الشقه وتدفع له المهر وتجيب له الشبكة مش كفاية انه حيتكرم ويتواضع ويتجوزها
ولا تلاقى الموضة الايام دى لو واحد وزوجته اتخانقوا مع بعض يقولها بوسى ايدك وش وضهر انى اتجوزتك لو مش انا كان زمانك لسه دلوقتى زى الكرسى فى بيت ابوكى .... يا سلام يا محرر الناسء من العنوسة انت يا متمكن

محبتى يا جميل
‏قال Desert cat
sally
صح انا من رأيك تقريبا كلنا فى الهوا سوا ... وبعدين ما هو جاب علبة الشكولاته واحنا اكلناه جاتوه وشربناهم حاجه ساقعه
يعنى محدش احسن من حد
ههههههههههههههه
ولو كان زود شوية كنت حقوله انا عايزه الحاجات اللى اكلناهالكوا فى بيتنا يلا رجع لى الجاتوه والحاجه الساقعه

محبتى
‏قال Desert cat
حبة حاجات (ايمان
منمون ... ما هو برضه احنا اللى غلطانين محسسينهم اننا ملهوفين على الجواز ومفيش عرسان مفيش عرسان علشان كدا بيدخل فاتح صدره ونافش ريشه .. ايه ده بقا دكر بط مش عريس ... المهم لما يترفض يقول البؤقين اللى فى الاخر دول وخلاص

تحياتى
‏قال Desert cat
Soooo
انا بندم من دلوقتى على البرنتر الالوان مش على العريس
معلشى بئه انا اللى ماليش مع البرنترات نصيب

طيب ليه يعنى مش يقول كل حاجه قسمة او خلاص اللى ربنا كاتبها له حتكون من نصيبه بدل ما هى مغرورة وانا رفضتها اصلها طلعت بنت ستين فى سبعين
عموما مش كل الناس بتعمل كدا
تحياتى
‏قال semsem
هههههههه
طريقتك حلوة جدا فى السرد فضفضى براحتك
انا عاداتنا مبقراش البوستات الطويله بس انت طرقتك حلوة جدا
‏قال Desert cat
كلاكيت تانى وتانى
حبيبتى والله العظيم انا محرجة منك جدا جدا
بس والله غصب عنى

وانا نزلت مخصوص دلوقتى علشان اكلمك ومش لاقياكى اون لاين
تعالى بئه بسرعه علشان عايزاكى
بوسى لى لينا
‏قال Desert cat
كاميليا
حبيبتى انتى تشرفى المدونة ويارب دايما عند حسن ظنك
المهم من دلوقتى احنا اصحاب واخوات علشان ما تقوليش تانى مش ليكى اصحاب
امواااااااه
لاحلى كامليا فى العالم كله
‏قال Desert cat
semsem
ههههههههه
هو كدا البوست طويل ده انا مختصرة
اشكرك جدا
تحياتى
‏قال ملك الكبدة
يا اختي العزيزة هو حد لاقي عرسان دلوقتي
طبعا ده موش الكومنت بتاعي
بس الكومنت بتاعي فيه شوية افيهات عليكي شخصيا في الموضوع ده و على الاخ الباكي على الاطلال بتاعك ده
و طبعا ماقدرش انشر الكومنت هنا لحسن تزعلى بس ممكن اذا كان عندك استعداد ابعتهولك عالميل
ايه ده ايه اللي انا بقوله ده
اه دانا بستظرف
‏قال Desert cat
ملك الكبدة
ياباشا ابعت اللى انت عايزه براحتك
الميل والمدونة تحت امرك
‏قال شباب روش طحن
بصراحه قصة جميله وأفضل جزء فيها هو الجزء بتاع الست الوالده والفشخره بس أعتقد ما كنش لازم تشعبطي الولد برضه كان ممكن تنفضي من الأول
‏قال Desert cat
شباب روش طحن
انا فكرت فعلا انى انفض من الاول بس هو كان كلم والده اساسا
فانا خلاص بئه مش احرجه
وفى الاخر كل يبقا كل حاجه قسمة ونصيب
تحياتى
‏قال oceaneyes
ههههههههههههههههههههههههههه

مش قادرة ابطل ضحك كل ما بتخيل شكله وهو مفقوع ...

ههههههههههههه

لا بجد انتى جريئة فى الحركة دى ...انا لو كانت الدنيا اتقلبت قدامى ما كنتش هاعرف اقول كدة خالص

....

بس ما تحطيش فى بالك ...هما الرجالة كدة لما يلاقوا البنت رفضاهم بيجرالهم حاجات مش حاجة واحدة ..لان كل واحد فيهم مقتنع انه ما يترفضش وان اللى ترفضه دى لسة ما اتخلقتش

....

وعموما انا بس عايزة افهم حاجة ...

انتى ليه رافضاه ؟؟؟

او بمعنى اصح

ليه ما ادتيش نفسك فرصة او مجال للتفكير ؟؟؟؟؟؟؟
‏قال اسامة يس
انا ضحكت على طريقة السرد ، واتفهم حقك في الرفض ... واستمتعت بالسرد ..
لكن عندي سؤال ...
هو وان كان لحوحا لهذه الدرجة .. درجة يصل فيها الامر ان يهين كرامته ذاتها ...
الا يعني ذلك انه صادق فعلاً في طلبه ..؟
قد تقولين وانا مالي .. انا لا اطالبك بالموافقة .. فقط اندهش من رد الفعل..

دمت بكل ود..
خالص تحياتي
‏قال AMRO .O. ABDELHALIM
هاااى
انا استمتعت جدا بالقراءة
وانا الحقيقة ضحكت من قلبى
يعنى انا انا شايف ان الراجل جد وداخل م الباب، وان مكانش يستاهل كل دا
لو معترضة على الطريقة بس فدى مشكلة بسيطة وممكن تتعالج، وهيكون عندك العمر كلو علشان تعاقبيه عليها
هههههههه
بشكرك لانك عرفتينى على المدونة بتاعتك
تحياتى
‏قال Ahmed Al-Sabbagh
والله دمك زى العسل
وكل ما ادخل مدونتك اخرج مزأطط
هههه


تحياتى
‏قال زُمُرده
السلام عليكم
والله هما اللي بيجبوه لنفسهم
نتعامل بالذوق ونقول مفيش نصيب
يلزقوا وكأن الرجاله في الدنيا خلصت
يعني مينفعش يفهموا ويحسوا

اي راجل بيحس لما بيتقدم لواحده
برفضها او قبولها
ولو محسش دي غلطته
ولو سمع الرفض بنفسه وفضل يلزق
يبقى يستحمل اللي يجراله

بس انت جدعه اتصرفت صح
ربنا يساعدك على الأختيار السليم
‏قال Soooo
بقولك ياقطه
انا احتمال قريب ان شاء الله اجيب برنتر وطابعه وسكانر .. تلاته في واحد يعني


اجيب عمتي الله يرحمها ونيجي نقابل اهلك امتى؟؟؟؟


سلاموووووز
‏قال أميرة
سيبك انتى كفاية طريقتك فى الحكى تجنن اساسا
‏قال Coca
والله انتي زي السكر يا قطه ههههههههههههههههههه
بجد بوست تحفه والحاجات دي بتحصل كتير
بس ردودك كلها صح اوي اوي اوي
‏قال فرنسا هانم
استعنا على الشقا بالله
فين الزلمه اللى معكر دمك ده ؟
فرنسا بتلعب كاراتيه
وحياه قصقوصى افرج عليه امه لا اله الا الله
هو فاكر نافسه ايه ؟
شوفى يا احلى قطه فى اجمل صحراء
نصيبك مستنيكى
ويروح بطابعته بالوانه
بس
بجد
امواااااااااه
‏قال Dr. Diaa Elnaggar
أولا شكرا على هذا الأسلوب الممتع في السرد،

ثانيا: هو فعلا لحوح جدا،

ثالثا: سؤال والدتك هي محقة فيه، وأنا برضه سألته لنفسي، طيب ليه سمحتي له بزيارتكم من أساسه؟

عميق تحياتي

ضياء
‏قال دكتور حر
الخيرة فيما اختاره الله

بس فعلا واضح انك مش سهله

عموما

ربنا يسهل لك طريقك
ويوفقك للخير والسعاده
السلام عليكم

فضفضه بس كأنك بتفضفضى عن كل البنات
انا نفسى افهم ليه اى حد مش بيقتنع من اول مره يعنى البنت طالما قالت لا يبقى بأقتناع ايه لازمت الحصار والتكرار مش عارفه
انا بحس ان كتر الزن والحصار بقلله من نظرها اكتر لان المفروض يحترم رأيها

ربنا يرزق الجميع الزوج الصالح

تحياتى ليك يا قمر
‏قال Desert cat
oceaneyes
فى ناس بتترفض وبيبقا عادى
اما السبب الرئيسى فى رفضى لازم يكون الشخص من اختيارى مش معنى انا اللى اروح اخطبه لاء خالص
يعنى اكون عرفته قبل كدا وحاسه انى متقبلاه وهو ده الشخص اللى فيه المواصفات اللى انا عايزاها
طبعا المواصفات دى مش حاجه جامدة
يعنى مش يكون عنده فيلا وعربية ورصيد فى البنك
انما حاجات تانية مفتقداها فى حياتى عمتا ... فببحث عنها فى زوج المستقبل ده ان وجد
‏قال Desert cat
osama
لاء هو مش وانا مالى ولا حاجه يا اسامه
بس المشكلة كلها انه اتسرع فى كذا حاجه
اولا انا ملحقتش اعرفه
مش معنى كدا انى اخرج معاه وعيش قصة حب ... انما مش خبط لزق يعنى يروح يكلم والده ويجى يقولى بعد ما ياخد القرا من نفسه
هو هيتجوز نفسه ولا ايه ؟؟؟
ثم من قبل ما يجى وهو عارف ان ممكن يتقبل او يترفض لانه لما قولت له انت بتكلم والدك من غير ما تاخد رائيى قالى ده هيكون مجرد تعارف مش جاى اتجوزك على طول .... يعنى كل واضحه من الاول

دمت بود
‏قال Desert cat
amro
يعنى يا عمرو من وجهة نظرك اتجوز واحد علشان اعاقبه بس
ده انا على كدا حربى من اول وجديد
هههههههههههههههه
نورت المدونة
تحياتى
‏قال Desert cat
Ahmed Al-Sabbagh
الله يخليك يا خالوا احمد
وربنا يديم عليك الزأططه
تحياتى ياباشا
‏قال Desert cat
زُمُرده
هو المشكلة انهم مبيحطوش حتمالية الرفض بيتقدم ولسان حاله بيقول هى لاقيه
ده انا حكسب فيها ثواب واتجوزها
ولما بيتفرض يقول ده دلع انا هحاول تانى
ربنا يهدى
تحياتى يا اميرة زمردة
‏قال Desert cat
Soooo
بجد والنبى
طيب حتصحى عمتك من التربة وتيجوا امتا
علشان البس الحتة اللى عل الحبل والحق اجيب الجاتوه
على العموم انا موافقه دول 3 ×1 برت بلاس التانى يعنى
‏قال Desert cat
أميرة ويلز
ويكفينى انك شرفتى المدونة بزيارتك الجميلة
تحياتى
‏قال Desert cat
coca
ربنا يخليكى يا كوكا
انتى اللى قمراية
واكيد طبعا الحاجات دى بتحصل لينا كلنا مش احنا بنات زى بعض
كل واحده بتتعرض لموقف من المواقف دى بس بطريقة مختلفة
تحياتى يا قمر
‏قال Desert cat
فرنسا هانم
ده انا كدا حشوط فى الدنيا كلها
معايا احلى بنوتة فى الدنيا
فرنسا هانم اللى منوره الدنيا
انا مقتنعه ان نصيبى مستنينى وان الزواج ده رزق والبنت بيكون متقدر لها حتتجوز مين وحتعيش ازاى ومن وهى لسه فى بطن مامتها ...بس الناس اللى مش مقتنعه
تحياتى ليك يا احلى فرنسا
اموااااااااااه
‏قال Desert cat
د. ضياء النجار
اولا انا سعيدة جدا بزيارة حضرتك
ثانيا هو اصلا راح كلم والده من قبل ما يقولى انا حاجه
وده مش السبب الرئيسى اللى خليته يجى علشان انه كلم والده
انما انا لما جيت اقوله مش تعرف راى الاول
قالى ده حيكون مجرد تعارف
وبعد كدا اللى انتى عايزاه
قولت ومالوا يتعرف
يعنى من الاساس انا مش قولت له موافقة

تحياتى يا فندم
‏قال Dr. Diaa Elnaggar
إذا كان قالك : وبعد كدا اللى انتى عايزاه

يبقى عداك العيب وأزح كما يقولون،

سعيد جدا بمدونتك

عميق تحياتي

ضياء
‏قال Desert cat
دكتور حر
يا دكتورنا ايه اللى صعبنى بس

انا بالنسبة لى كان الامر منتهى من الاول
اتمنى لك حياة اسعد
احترامى وتقديرى
‏قال Desert cat
حياة الأحلام
هما بيفهموا الرفض من اول مرة ده تقل وبتاع انا افضل وراها لحد ما تسلم
بس هيهات
ههههههه
تحياتى ليكى يا قمره
‏قال Desert cat
د. ضياء النجار
اللى فهمته انه ممكن يكون كان متيخل انه لما يجى البيت يبقا كدا خلاص
تمت الموافقة بصرف النظر بئه هو الشخص المطلوب ولا لاء
على العموم ربنا يوفقه ويوفق الجميع

دمت باسعد حال
‏قال Unknown
هههههههههه
يا خبر ابيض يا جدعان
بس ده انتى طلعتى اجدع منى انك جبتيه البيت
انا مش بخليهم يعتبوه اساسا
وبرضه بخلى ماما تحكى للجيران
مش بحرمها من حاجه
بس بتحكى من عمايلى السوده طبعا
الله يرحمه العريس يا قطه
‏قال real love
والله انتى بنت زي السكر
هو فعلاً اللى جابه لنفسه إيه الرخامة دى
كان في واحد زيه بس التاني ألعن شوية اتقدم ليا أكتر من ست مرات
وكل مرة أرفضة يستنى كام شهر ويرجع
وفيا لأخر اتخطبت لواحد تانى فضل يهري وينكت في نفسه
لحد ما همد
........................
ههههههههههه
الجديد نزل يا جميل
في انتظارك
ريال لف
‏قال Desert cat
لماضة
اه طبعا ما هو لازم يجى البيت امال نتفشخر ازاى
وبعدين ما هو خلاص
راااااخ يا خواتى رااااااااااخ
بس مش مهم برضه ربنا عوضنى ب سووووو
حيروح يصحى عمته من التربة ويجوا انتى معزومة مقدمة
ده انا حاسه ان و مامتك شافت مامتى حيطلعوا معارف قدام من عمايلنا فيهم
تحياتى يا دوك
‏قال Desert cat
real love
يعنى تتخطبى ومش تعزمينى بئه ده اسمه كلام
ربنا يتمم لك بخير يا جميل وعقبال الفرح بس المرة انا معزومة رخامة بئه
هههههههههه
هو زى ما انا قولت قبل كدا مش بيبقا حاطط احتمالية الرفض
وحاسس نفسه الفارس المنتظر
جاية لك على عونيا الابعه حالا
تحياتى يا قمر
طبعا ياقطتى اصحاب

اموووواتين

ليكى ياقمر
عادى يعنى
جت الرجالة خيبة
والله انتى دمك زي السكر ضحكتينى لما بيتحجج علشان يجيلك وانتى عاملة فيها عبده العبيط مشتى على مبدأ محمد صبحى 0 ( قلت يا واد طنش خاااالص وشوف الست دى عايزة ايه )

بس هما الرجالة كده عاملين زي طابع البوسطة تتفى عليهم يلزقوا اكتر .

تحياتى يا فندم
‏قال غير معرف…
ههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههه
هههههههههههههههههههههه
هههههههههههههههه
هههههههههههه
ليس فى الامكان اروع مما كان
قطة الصحراء

ولله هو في ناس كدة بيبقي عندهم كمية الرخامة والفضول زايدة عن حدها أوي

تحسي أنهم ملزوقين بصمغ

ودول فعلا مبينفعش معاهم غير أسلوب حضرتك

الا هو جي تاني امتي ان شاء الله؟؟

وأهو برده تكتبي لنا بوست ظريف

معلش أنتي دمك يتحرق شوية

بس مصائب قوم عند قوم فوائد

ونبقي نجيب لك بعد زيارته واحد لمون



بوست ظريف

تحياتي
‏قال أحمد المصري
ههههههههههه
لا الراجل ده رخم رخم رخم فعلا..فيه رجالة كده تصرفاتها تموت من الضحك..تصرفاته طفولية جدااا ,ربنا يعينه ويلاقي طفلة زيه ويريحك منه..لو جه تاني ماتوصيش نفسك بقى..ارمي الطابعة الليزر في وشه واخلصي..و ابقي اشتري ديسك جت واخلصي..لحسن تتدبسي في راجل تاني زيه كده0
‏قال Desert cat
كاميليا
تسلمى لى يا جميل
‏قال Desert cat
مصرى وبدرجة مواطن
حضرتك شايف كدا
طيب !
‏قال Desert cat
سمـــــــــــا
هههههههههههههههههههه
والله انتى اللى عسل
وحلوة طابع البوسطة دى
تشبيه فى محله
‏قال Desert cat
Anonymous said
ربنا يزيدك انبساط كمان وكمان
‏قال Desert cat
القلم السكندري
اعتبر ده وعد
يعنى حتجيبوا لى لمووووون
شكله كدا خلاص طفش
ورااااااااح يا خواتى رااااااح
على راى ستى اطاطا
‏قال Desert cat
أحمد المصري
تصدق فكرة
بس انا بفكر اشترى ايبسون بدل الديك جيت
‏قال The Queen
سيبك انتي

مفيش احسن من قعدة البنات

ويروح بطبعاته بألوانه بسلطاته ببابا غنوجه

هو لازم اللي بيتقدم يتقبل فورا !! ليه آخر راجل في الكون؟

برافو عليكي

ربنا هيرزقك بواحد بطبعه ألوان ترضي عنه ووالدتك تفتخر بجد بعريس بنتها
بس ابقي اعزمينا

على فكرة أنا بمووووت في القطط عندي أربعة تاخدي واحدة؟
‏قال Desert cat
The Queen
انا برضه بقول كدا
يمكن ربنا يرزقنى بعريس عنده طابعه الوان وسكانر محدش عارف
بالنسبة للقطط انتى ساكنة فين ورقم تليفونك وايملك وكل بيناتك
ده انا بستناكى من زمان
‏قال غير معرف…
الولا دة اول مشوفته قولت انه عيل رغم وغلس غلاسه محصلتش
بس بصراحه صعبي عليه اوى
يعنى بعد متقوليله يروح يكلم اهلك تقوليله لا طب مكنتى تقوليلوه من الاول وتريحى نفسك بدل وجع الدماغ دة
ههههه احيه لو اباليسو عرف
حيشيله هو وقربته اللسعه دى بسيبرهم هيله بيله ويرميهم لكلاب خالتى حنوئه
بس الطيب احسن برده مع ان الكلاب مأكلتش بنى ادمين بقالها قرون
بس ساله مش اشكال كفايه الى جراله
ولا انتى تحبى اقول لخالتى تيجى تشرشحله شويه والله تيجى تفرج عليه فاقوس والقرى المجاورة

هههههههه بنى ادمين رخمه
ربنا يبعدهم عنا يارب
‏قال Desert cat
هههههههههههه
لا احنا هنا مش فى ايجى ميكس
علشان خالتك واباليسو يتجمعوا مع بعض
احسن وحياة المرسى ابو العباس اطربق لك سيدى جابر
والله منور ياباشا
إنت بتقولي
السبب الرئيسى فى رفضى لازم يكون الشخص من اختيارى مش معنى انا اللى اروح اخطبه لاء خالص
يعنى اكون عرفته قبل كدا وحاسه انى متقبلاه وهو ده الشخص اللى فيه المواصفات اللى انا عايزاها

ماهو الخطوبة بتبقى للتعارف و معرفة طبع و صفات كل واحد أمال الخطوبة اتعملت ليه ؟

بس صراحة هوا واد رخم و ما عندوش ذرة كرامة اللي يترفض صراحة و يفضل لازق للي رفضته و يلف و يدور عليها كل شوية يبقى نطع مفيش منه اتنين و يستاهل كل اللي عملتيه فيه
ربنا يكرمك باللي يناسبك و يسعدك
‏قال Desert cat
مهندس مصري
يا بشمهندس
انا من الاول اصلا كان بالنسبة لى شئ عادى تحصيل حاصل
يعنى مش اخوض التجربة وانا فى الاساس رافضه ويبقا اسمى اتخطبت وفكرشت واخد سمعه سيئة ان العرسان بيهربوا منى
ههههههههههههههه
لاء انا محسبتهاش كدا
انا قولت طالما مفيش استعداد نفسى من الاول يبقا حرام اصلا اعلقه اكتر من كدا
احترامى وتقديرى
‏قال غير معرف…
المشكله فى بعض الرجال انها لما بتتقدم لبنت مش بتحط احتمال الرفض رغم انه حقها
ولما تترفض تبتدى تطلع فى البنت كل العيوب مغروره مش حلوه
‏قال غير معرف…
المشكله فى بعض الرجال انها لما بتتقدم لبنت مش بتحط احتمال الرفض رغم انه حقها
ولما تترفض تبتدى تطلع فى البنت كل العيوب مغروره مش حلوه
‏قال Desert cat
love
صح كدا
لو رفضت يطلع فيها القطط الفطسانة
ربنا يهدى
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا مش قادره اكتب بس حلو اوى الواد الغتيت ده يالا ربنا معاكى

لولو
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا مش قادره اكتب حلوه حكايه الواد الغتيت ده يالا ربنا معاكى

لولو
‏قال Desert cat
البنت الشقيه
اه يا اوختى شوفتى اللى جرى لى ولا كان على بالى
يارب دايما مبسوطة يا جميل

المشاركات الشائعة