تفتكرينى أو تنسينى


عنوان البوست ده اغنية قديمة شوية لعمرو دياب .... اتسمعت لى النهارده قهرا
.... ايه السبب بئه ... من حوالى 3 شهور كنت محتاجه اطبع ورق الوان وانا البرنتر اللى عندى ليزر يعنى اسود بس .... واثناء وانا ماشية بالليل لاقيت سايبر فى طريقى هو مش بعيد عن السيبر بتاعى بس فى نفس الوقت كان اول مرة ادخله قولت اشوف السيبر ده يمكن فيه الوان ... وفعلا لاقيت فيه ... والشخص الموجود بدأ يطبع لى الورق ... دخلت بنت طلعنا معرفة وايه ده مش ممكن بتعملى ايه هنا يا نانا وسلامات وبوس واحضان وده العادى اصلا لان معظم اللى بيجوا عندى السيبر بتاعى بنات وبالتالى بقابل بنات كتير جدا فى اى مكان فى البلد طبعا كلهم عارفينى ... المهم قولت لها ابدا كنت عامله بحث وبالصدفة بسال هنا على برنتر الوان ولاقيت ... لاقيتها بتقول للى بيطبع لى انت تطبع لها الورق كويس دى تبقا فلانة صاحبة سيبر مش عارف ايه ... التانى بابتسامة عريضة والله هو انتى ازيك ... فرصة سعيدة جدا والله لازم تشربى حاجه ... انا متشكرة جدا يا فندم بس متاخره ومحتاجه اخلص .... البنت طلعت قريبته ولاقيتها بتقولى والله ما انتى ماشية غير لما تشربى حاجه ... وجابوا لى شاى ..... وقت الحساب اصر انه ما ياخدش الحساب قولت له لا يمكن ابدا ده شغل يا اما حسيب لك الورق وامشى .... المهم انى دفعت الفلوس اللى قال عليها واللى اقل من تكلفة الورق بكتير جدا ... ولما سالته بس كدا قليل اوى راح قالى ده احنا زمايل ومش ينفع اعاملك زى الغريب ... وبعدين حنردها فى اى شغل عندك والكلام ده كله .... تانى يوم لاقيته جاى عندى السيبر عازم نفسه على شاى واللى فهمته انه جاى يرد حق الشاى اللى شربته عندهم ..... وابدى اعجابه بالسيبر اللى هو فى الاساس مش عاجبنى انا شخصياً .... فات يومين ولاقيته برضه عازم نفسه على شاى ... ايه يا حج فرح هو ولا ايه ده مكانش بحث ده .... لاقيته بيقولى من غير لف ولا دوران انا معجب بشخصيتك وانتى بنت طموحة وفيكى مميزات كتير اى حد يتمناها وانا كلمت الوالد وعايزينك تحددى لنا معاد عندكو فى البيت ... قولت يا صلاة النبى احسن ..... قولت له طيب مش تاخد راى قبل ما تكلم والدك ... قالى ما انا مش ها اجى اتجوزك على طول ... ده مجرد تعارف يعنى وكدا ... قولت والله عين العقل واهوه الصيت ولا الغنى .... على الاقل الجيران يشوفوا عريس داخل ومامتى تقعد فى وسطهم وتقول بنتى كل يوم عندها عريس وهى ابدا ما اخدوش يا ماما ما اخدوش يا ماما لن احرمك يا امى من هذه الفشخرة الكدابة دى انتى ياما تعبتى علشانى ... قولت له وماله بيتنا اوبن اينى تايم .... راح قالى خلاص يبقا الجمعه بعد العصر ان شاء الله ... وجه يوم الجمعه هو والده فعلا ..... وقعدوا مع السيد الوالد واخويا .... وبابايا طول القعدة انت شوفتها فين.... ايه يا عم الحج الراجل عمال يقولك زومل يعنى هيكون شافنى فى سينما ريفولى والله انت راجل غريب ..... خلصت المقابلة بعد ما قعدوا يقولوا احنا مش عارف من عيلة مين ونسايبنا يبقوا مين وجيرانا مين وولاد عمة سوسو بنت الجيران اللى فى الدور الرابع اسمهم ايه ومش عارف ايه تانى ... وبعد ما مشيوا السؤال التقليدى للماما بتاع انا .... ها رايك ايه ... بصراحة ملقيتش حل غير انى اصارحها وانى خليتهم يجوا علشان تاخد راحتها مع الجيران ... قالت لى يعنى ايه ... قولت لها ده جزء من رد جمايلك عليا يا ماما ... بصت لى من فوق لتحت وكانها بتقولى كان يوم اسود يوم ما شوفتك وسابتنى ومشيت .... تانى يوم بئه فى السيبر جه يسالنى ... ايه يا جميل راى بابا واخوكى قولت له عادى بس فى النهاية دى حياتى انا مش هما ... قالى يعنى ... قولت له يعنى انت جيت وخلاص مش كنت عايز تتعرف واديك اتعرفت ... قالى برضه مش فاهم ... قلت له يعنى الموضوع ده قسمة ونصيب وانا بصراحة حاسة ان نصبى لسه شوية عليه ... قالى مش هعتبر ده رد نهائى وفكرى براحتك وبعدين نتكلم .... قولت عاتشى ولا بيهمنا الحاجات دى ... بعد كام يوم لاقيت البنوتة قريبته بتكلمنى ها يا نانا ايه الاخبار والاهرام والكلام بتاع الستات ده قولت لها يا حبيبتى انا قولت لقريبك كل شيق قسمة ونصيب بس هو اللى مش عايز يقتنع على العموم الموضوع بالنسبة لى منتهى بس وخلصت الحوار على كدا ... راح هو مكلمنى قالى انا الظاهر انى اتسرعت وانا اسف ... فات يجى شهر لاقيته جاى يسالنى على حاجات فى الشغل قولت عادى دى مش حجه ولا حاجه الراجل بيسال بس وبعدها عرض خدماته ولو احتجتى اى حاجه انا تحت امرك ... الامر لله يا هندز ... طبعا فاكرين الاسبوع الفات واليوم المشؤم اللى امن الدولة اخدت زمايلى فيه بسبب الاخوان مع انى مش كنت عايزه اذكرهم فى البوست ده بس افتكرت الناس الى بتقول انى بهاجمهم قولت مش هحرمكو من ذكر اسمهم .... المهم بئه ... زى ما زعلتكو هفرحكوا الناس دى بدأت تستلم اجهزتها تانى بس هو كان من ضمن الناس اللى اتاخد من عندها اجهزة بس لسه مش استلم جهازة .... لاقيته بيتصل بيا النهارده بيسألنى الناس اللى استلمت اجهزتها قدمت اوراق ايه ولا عملت ايه قال يعنى مش ممكن يسال حد منهم مباشرة .... بس انا طنشت وقولت دى مش حجه علشان يتصل ولا اى حاجه ... قولت له راحوا مجلس المدينة جابوا جواب ان مش فى حاجه اسمها ترخيص سيبر وبيقدموا كمان البطاقة الضريبية بتاعة السيبر ... قالى طيب انا جاى لك دلوقتى علشان اعرف بالظبط اعمل ايه ... وجه فعلا وقولت له على الحاجات اللى الناس اللى استلمت اجهزتها قدموها وفى اثناء الحوار موبايلى رن خرجت بره علشان ارد رجعت لاقيته مشغل اغنية عمرو دياب تفتكرينى او تنسينى وبيقولى حلوة صح ... لاقيت نفسى مسحوبة من لسانى وبقوله على فكرة انا لا افتكرتك ولا فاكراك اساسا ... انت اللى دايما بتحاول تكلمنى باى حجه ويوم ما زمايلنا كانوا بيتعرضوا على النيابة كانت الناس فى حال وانت فى حال تانى خالص ... بالرغم من ان الولد اللى بيشتغل عندك كان جوا معاهم وجهازك متاخد مع الولد وانت برضه شاغل نفسك بيا وباخبارى ... يا اعصابك ... وقف من مكانه وقالى برضه مفيش فايده فيكى فوقى وانزلى لارض الواقع مش حيوديكى فى داهيه غير غرورك واحساسك بانك احسن من الناس ..... قولت له مش غرور قد ما هى ثقة بالنفس .... واللى يوصله احساس بانى حاسه انى احسن من الناس يبقا هو حاسس انه اقل منى ودى مش مشكلتى ... لاقيته وقف من مكانه وكان هاين عليه يمسك حاجه يرميها في وشى بس الظروف مش ساعدته .... طبعا هو اللى جابه لنفسه .... ولو جاله ارتفاع فى ضغط الدم او سكر دلوقتى يبئه هو الجانى على نفسه

هو انا بحكى هنا ليه

اه بفضفض

Comments

و الله يا قطة الصحراء .. غالبية الرجالة كدة .. حاسين إنهم مركز الكرة الأرضية أو محور الكون

الواحد فيهم يبقى متوقع إن البنت من دول مستنياه يطرق بابها .. و هو خلاص جاى يخلصها من عذاب الانتظار



و أنا مش هاعتبر إن دة قرارك الأخير

:) :) :)
عادى طبعا انتى بتبص للناس من فوق ليه ما هو الراجل الف فى امائه معاه سيبر وعنده طبعه الوان عايزه ايه تانى
بصى المشكله فى بعض الرجال انها لما بتتقدم لبنت مش بتحط احتمال الرفض رغم انه حقها
ولما تترفض تبتدى تطلع فى البنت القطط الفطسانه مغروره مش حلوه مش عارف ايه
كبرى الدى وروقى الجى
Esmat said…
دمك زى الشربات وانتى بتحكى
ضحكتينى بجد على فكرة لو مكنتيش عملتى كده معاه كان فاضل لازق لك وكان زهقك فى عيشتك بجد انا بقول لك كده عن تجربة سابقة
فيه بيدوا لنفسهم امل حتى لو رفضتيهم
و بيتهيء لهم إن ده نوع من الدلال
كده تحرمى تطبعى ورق الوان
ماله الابيض والاسود مش اريح
وتحية ليكى يا قمر
lastknight said…
ياعينى على والدتك اللى زمانها اتفرست منك ... عجبنى أنك واضحه مع نفسك .. و ده شىء نادر حاليا .. عموما تعيشى و تاخدى غيرها .. و ماتسيحيش لنفسك و تقولى مابيجيش عرسان .. هاهاهاه
مش انتي اللي جبتيه لنفسك
لو كنتي اشتريتي طابعه الان كنتي ريحتي نفسك
بس للاسف ما كنتيش طلعتيلنا بالبوست الجميل ده


عموما ربنا يكتب لك الخير والسعاده
قطة الصحراء

حقيقي اختيارك للإسم ده موفق جداا
انا كنت بحسبه مجرد اسم وبس
لكن واضح انها حقيقة عملية

واضح ان انتي حد مش سهل فعلا

بس ليه كل ده يعني
الدنيا ابسط من كده بكتير والله
Heart Beat said…
عزيزتي

فضفضي زي ما انتي عايزه و قولي ادينا بنحكي مع بعض و بناخد راي بعض

عشان قراء مجونتك كمان يستفيدوا سواء رجال او سيدات

يعني عشان الولد لما البنت تقوله انها مش موافقه عليه باسلوب مهذب يفهم ان خلاص مافيش داعي لانه يطول في كلامه معاها اكتر من كده و كمان اذا وافقت انه يجيب بابا و ماما و يجي يزورهم ده مش معناه انها موافقه عليه

اما بالنسبة للبنت فبرضه عشان تعرف انها مهما قالت للولد انه مش هلينفع يرتبطوا باي شكل من الاشكال هايفضل يلف و يدور حواليها لغاية لما يزهقها في عيشتها و لما يلاقيها مصممة على رايها يروح يقول للناس انه هو اللي مش عايز يرتبط بيها و انها حفيت وراه بس ماينفعش

و كما قال السيد رئيس جمهورية نفسه ان بعض الرجال مابتكنش حاطه في بالها احتمالية الرفض دي بسبب الاحصائيات اللي عماله تظهر في وسائل الاعلام اللي بتقول ان عدد النساء بقى اكتر من عدد الرجال بنسبة ملحوظة فكل رجل من دول يقول و هي هاتلاقي تتجوز ازاي المفروض توافق على طول من غير تفكير حتى و كان اللي بيتقدم لك ده براد بيت و لا مستر كلوني

ابقى اشتري بقى طابعة الوان احسن
sally said…
بصي يا قطقوطه
الشباب دول بقوا حاجه غريبة جدااااا
الواحد منهم لمجرد انه اتقدم حاسس انه عمل اللي ما حدش يعرف يعمله و انه عمل فيكي جميل همرك
و انك طبعا لازم تردي الجميل و تقبلي بما انه عرض عليكي انه ينتشلك من مستنفع العنوسه اللي في انتظارك عو فريب
بغض النظر عن رأيك فية او عن كونه مناسب او لا ده كله مالوش لازمه طالما جاب عليه الشيكولاته التمام و السيد الوالد و جه لحد عندكوا
هو انا مالي بقيت رغايه كده ليه
عموما اوعي تضايقي نفسك
انا راىى اننا اللى ادينا فى الرجاله المقلب الكبير دا
مش كلهم طبعا

بس عامل كبير اوى وشريحه كبيره من البنات هما اللى سلمو الرايه للرجاله

والظاهر ان القطط مش هتنفع الايام دى
هههههههه

وبوست لذيذ تحياتى
Soooo said…
ليه كده يابنتي تخسري شاب معاه .. معاه برنتر الوان
مسيرك تندمي لما يجيلك مدرس من بتوع الدروس الخصوصيه ويقولك انا عايز اطبع عشرتلاف ورقه من القطع المتوسطل
هتقولي ساعتها ياريتني


على فكره .. بالنسبه لغرور البنت او غرور الولد .. لو خدتي بالك هتلاقي ان معظم الشباب اللي بيعجبو بالبنات لو ما لقوش منهم استجابه .. بيقولو عليهم انهم مغرورين

اسأليني انا يابنتي
يوووووه .. تقريبا كده مافيش بنت اتعرفت عليها الا وقولت عليها انها مغروره


سلاموووووووووووووز
هههههههههههههههههههههه
انتى عسل
مش هعلق ع المدونة اصل لية حق عندك تمن المحشى والفراخ والمكرونة الباشمل والجاتوة واعتقد انك فاهمة
اما موضوع البوست فلما تدفعى اللى عليكى هعلق
كاميليا said…
لما باحس انى عاوزة اتكلم مع حد او حد يكلمنى.. ولان مش ليا أصحاب اوى يعنى.. بدخل اقرا فى مدونتك.. واتخيل انك جاية تزورينى وبتحكى لى

أسلوب جميل اوى .. قريب من القلب

تحياتى لاجمل قطة فيكى يامصر

كاميليا
Desert cat said…
ابن حـجـر الـعـسـقـلانـى

وشاهد شاهد
متخيل انها جاى يكسب فيها ثواب
دى خلاص بقت عانس مع سبق الاصرار
حتى لو عندها 20 سنة برضه عانس
الناس مش عارفه عقلها جرى له ايه
الا قولى اخبار النتيجة ايه ؟
Desert cat said…
رئيس جمهوريه نفسى
اه طبعا طبعا الراجل مش يتعيب ده كفاية البرنتر الالوان اللى عنده
دى فى حد ذاتها مكسب عظيم
ياباشا الناس اللى بتتقدم وفاكره نفسها مقبولة من قبل حتى ما تدخل البيت العيب مش عليهم العيب
على اللى مفهم الموضوع ده ان اى بنت دلوقتى بتدور على ظل حيطة والسلام
انا بئه مش عايزه ظل حيطة انا عايزه الحيطة ذات نفسها
Desert cat said…
Esmat
انا حسيت انه بيستفزنى قال وبيسمعنى اغنية حسيت انه بيشتمنى من خلالها
مكنش ينفع غير الوش البلاسيتك اللى شافه ده
بس اعمل ايه منها لله البرنتر الالوان الى حوجتنى ليه
يارب دايما منورانى
امواااااااااه
Desert cat said…
lastknight
هى ماما مش اتفرست وبس دى كانت حطق
ولما انتى اصلا مش حتوافقى خلتيه يجيى ليه
يا ستى انا بعمل كدا علشانك يقوم تزعقى لى انا غلطانه
بالنسبة للعرسان دول عاملين طابور بره والدم للركب
عاملين لنا بركة دم فى الشارع بس النفس ههههههه
مودتى يا فندم
Desert cat said…
اسكندراني اوي
هو انا اصلا بفكر ابيع الطباعه الاسود اللى عندى
يمكن اروح اطبع ورق اسود اطلع بالعريس اللى بدور عليه
الفارس المنتظر
وسعيدة بان البوست نال اعجاب حضرتك
تحياتى
Desert cat said…
آلام وآمال
هما مش بيقولوا ان لكل واحد نصيب من اسمه
يمكن علشان كدا
انا واخدة الحياة ببساطة بس هى اللى مش عايزه
تحياتى
Desert cat said…
Heart Beat
ما هى المشكلة يا حبيبتى
انه بيكون داخل البيت ومتخيل ان جاى ينتشل البنت دى من بعبع اسمه العنوسة علشان كدا حيتشال على العين والراس وكمان هى اللى هتجيب له الشقه وتدفع له المهر وتجيب له الشبكة مش كفاية انه حيتكرم ويتواضع ويتجوزها
ولا تلاقى الموضة الايام دى لو واحد وزوجته اتخانقوا مع بعض يقولها بوسى ايدك وش وضهر انى اتجوزتك لو مش انا كان زمانك لسه دلوقتى زى الكرسى فى بيت ابوكى .... يا سلام يا محرر الناسء من العنوسة انت يا متمكن

محبتى يا جميل
Desert cat said…
sally
صح انا من رأيك تقريبا كلنا فى الهوا سوا ... وبعدين ما هو جاب علبة الشكولاته واحنا اكلناه جاتوه وشربناهم حاجه ساقعه
يعنى محدش احسن من حد
ههههههههههههههه
ولو كان زود شوية كنت حقوله انا عايزه الحاجات اللى اكلناهالكوا فى بيتنا يلا رجع لى الجاتوه والحاجه الساقعه

محبتى
Desert cat said…
حبة حاجات (ايمان
منمون ... ما هو برضه احنا اللى غلطانين محسسينهم اننا ملهوفين على الجواز ومفيش عرسان مفيش عرسان علشان كدا بيدخل فاتح صدره ونافش ريشه .. ايه ده بقا دكر بط مش عريس ... المهم لما يترفض يقول البؤقين اللى فى الاخر دول وخلاص

تحياتى
Desert cat said…
Soooo
انا بندم من دلوقتى على البرنتر الالوان مش على العريس
معلشى بئه انا اللى ماليش مع البرنترات نصيب

طيب ليه يعنى مش يقول كل حاجه قسمة او خلاص اللى ربنا كاتبها له حتكون من نصيبه بدل ما هى مغرورة وانا رفضتها اصلها طلعت بنت ستين فى سبعين
عموما مش كل الناس بتعمل كدا
تحياتى
semsem said…
هههههههه
طريقتك حلوة جدا فى السرد فضفضى براحتك
انا عاداتنا مبقراش البوستات الطويله بس انت طرقتك حلوة جدا
Desert cat said…
كلاكيت تانى وتانى
حبيبتى والله العظيم انا محرجة منك جدا جدا
بس والله غصب عنى

وانا نزلت مخصوص دلوقتى علشان اكلمك ومش لاقياكى اون لاين
تعالى بئه بسرعه علشان عايزاكى
بوسى لى لينا
Desert cat said…
كاميليا
حبيبتى انتى تشرفى المدونة ويارب دايما عند حسن ظنك
المهم من دلوقتى احنا اصحاب واخوات علشان ما تقوليش تانى مش ليكى اصحاب
امواااااااه
لاحلى كامليا فى العالم كله
Desert cat said…
semsem
ههههههههه
هو كدا البوست طويل ده انا مختصرة
اشكرك جدا
تحياتى
يا اختي العزيزة هو حد لاقي عرسان دلوقتي
طبعا ده موش الكومنت بتاعي
بس الكومنت بتاعي فيه شوية افيهات عليكي شخصيا في الموضوع ده و على الاخ الباكي على الاطلال بتاعك ده
و طبعا ماقدرش انشر الكومنت هنا لحسن تزعلى بس ممكن اذا كان عندك استعداد ابعتهولك عالميل
ايه ده ايه اللي انا بقوله ده
اه دانا بستظرف
Desert cat said…
ملك الكبدة
ياباشا ابعت اللى انت عايزه براحتك
الميل والمدونة تحت امرك
بصراحه قصة جميله وأفضل جزء فيها هو الجزء بتاع الست الوالده والفشخره بس أعتقد ما كنش لازم تشعبطي الولد برضه كان ممكن تنفضي من الأول
Desert cat said…
شباب روش طحن
انا فكرت فعلا انى انفض من الاول بس هو كان كلم والده اساسا
فانا خلاص بئه مش احرجه
وفى الاخر كل يبقا كل حاجه قسمة ونصيب
تحياتى
oceaneyes said…
ههههههههههههههههههههههههههه

مش قادرة ابطل ضحك كل ما بتخيل شكله وهو مفقوع ...

ههههههههههههه

لا بجد انتى جريئة فى الحركة دى ...انا لو كانت الدنيا اتقلبت قدامى ما كنتش هاعرف اقول كدة خالص

....

بس ما تحطيش فى بالك ...هما الرجالة كدة لما يلاقوا البنت رفضاهم بيجرالهم حاجات مش حاجة واحدة ..لان كل واحد فيهم مقتنع انه ما يترفضش وان اللى ترفضه دى لسة ما اتخلقتش

....

وعموما انا بس عايزة افهم حاجة ...

انتى ليه رافضاه ؟؟؟

او بمعنى اصح

ليه ما ادتيش نفسك فرصة او مجال للتفكير ؟؟؟؟؟؟؟
osama said…
انا ضحكت على طريقة السرد ، واتفهم حقك في الرفض ... واستمتعت بالسرد ..
لكن عندي سؤال ...
هو وان كان لحوحا لهذه الدرجة .. درجة يصل فيها الامر ان يهين كرامته ذاتها ...
الا يعني ذلك انه صادق فعلاً في طلبه ..؟
قد تقولين وانا مالي .. انا لا اطالبك بالموافقة .. فقط اندهش من رد الفعل..

دمت بكل ود..
خالص تحياتي
amro said…
هاااى
انا استمتعت جدا بالقراءة
وانا الحقيقة ضحكت من قلبى
يعنى انا انا شايف ان الراجل جد وداخل م الباب، وان مكانش يستاهل كل دا
لو معترضة على الطريقة بس فدى مشكلة بسيطة وممكن تتعالج، وهيكون عندك العمر كلو علشان تعاقبيه عليها
هههههههه
بشكرك لانك عرفتينى على المدونة بتاعتك
تحياتى
والله دمك زى العسل
وكل ما ادخل مدونتك اخرج مزأطط
هههه


تحياتى
زُمُرده said…
السلام عليكم
والله هما اللي بيجبوه لنفسهم
نتعامل بالذوق ونقول مفيش نصيب
يلزقوا وكأن الرجاله في الدنيا خلصت
يعني مينفعش يفهموا ويحسوا

اي راجل بيحس لما بيتقدم لواحده
برفضها او قبولها
ولو محسش دي غلطته
ولو سمع الرفض بنفسه وفضل يلزق
يبقى يستحمل اللي يجراله

بس انت جدعه اتصرفت صح
ربنا يساعدك على الأختيار السليم
Soooo said…
بقولك ياقطه
انا احتمال قريب ان شاء الله اجيب برنتر وطابعه وسكانر .. تلاته في واحد يعني


اجيب عمتي الله يرحمها ونيجي نقابل اهلك امتى؟؟؟؟


سلاموووووز
سيبك انتى كفاية طريقتك فى الحكى تجنن اساسا
coca said…
والله انتي زي السكر يا قطه ههههههههههههههههههه
بجد بوست تحفه والحاجات دي بتحصل كتير
بس ردودك كلها صح اوي اوي اوي
استعنا على الشقا بالله
فين الزلمه اللى معكر دمك ده ؟
فرنسا بتلعب كاراتيه
وحياه قصقوصى افرج عليه امه لا اله الا الله
هو فاكر نافسه ايه ؟
شوفى يا احلى قطه فى اجمل صحراء
نصيبك مستنيكى
ويروح بطابعته بالوانه
بس
بجد
امواااااااااه
أولا شكرا على هذا الأسلوب الممتع في السرد،

ثانيا: هو فعلا لحوح جدا،

ثالثا: سؤال والدتك هي محقة فيه، وأنا برضه سألته لنفسي، طيب ليه سمحتي له بزيارتكم من أساسه؟

عميق تحياتي

ضياء
دكتور حر said…
الخيرة فيما اختاره الله

بس فعلا واضح انك مش سهله

عموما

ربنا يسهل لك طريقك
ويوفقك للخير والسعاده
السلام عليكم

فضفضه بس كأنك بتفضفضى عن كل البنات
انا نفسى افهم ليه اى حد مش بيقتنع من اول مره يعنى البنت طالما قالت لا يبقى بأقتناع ايه لازمت الحصار والتكرار مش عارفه
انا بحس ان كتر الزن والحصار بقلله من نظرها اكتر لان المفروض يحترم رأيها

ربنا يرزق الجميع الزوج الصالح

تحياتى ليك يا قمر
Desert cat said…
oceaneyes
فى ناس بتترفض وبيبقا عادى
اما السبب الرئيسى فى رفضى لازم يكون الشخص من اختيارى مش معنى انا اللى اروح اخطبه لاء خالص
يعنى اكون عرفته قبل كدا وحاسه انى متقبلاه وهو ده الشخص اللى فيه المواصفات اللى انا عايزاها
طبعا المواصفات دى مش حاجه جامدة
يعنى مش يكون عنده فيلا وعربية ورصيد فى البنك
انما حاجات تانية مفتقداها فى حياتى عمتا ... فببحث عنها فى زوج المستقبل ده ان وجد
Desert cat said…
osama
لاء هو مش وانا مالى ولا حاجه يا اسامه
بس المشكلة كلها انه اتسرع فى كذا حاجه
اولا انا ملحقتش اعرفه
مش معنى كدا انى اخرج معاه وعيش قصة حب ... انما مش خبط لزق يعنى يروح يكلم والده ويجى يقولى بعد ما ياخد القرا من نفسه
هو هيتجوز نفسه ولا ايه ؟؟؟
ثم من قبل ما يجى وهو عارف ان ممكن يتقبل او يترفض لانه لما قولت له انت بتكلم والدك من غير ما تاخد رائيى قالى ده هيكون مجرد تعارف مش جاى اتجوزك على طول .... يعنى كل واضحه من الاول

دمت بود
Desert cat said…
amro
يعنى يا عمرو من وجهة نظرك اتجوز واحد علشان اعاقبه بس
ده انا على كدا حربى من اول وجديد
هههههههههههههههه
نورت المدونة
تحياتى
Desert cat said…
Ahmed Al-Sabbagh
الله يخليك يا خالوا احمد
وربنا يديم عليك الزأططه
تحياتى ياباشا
Desert cat said…
زُمُرده
هو المشكلة انهم مبيحطوش حتمالية الرفض بيتقدم ولسان حاله بيقول هى لاقيه
ده انا حكسب فيها ثواب واتجوزها
ولما بيتفرض يقول ده دلع انا هحاول تانى
ربنا يهدى
تحياتى يا اميرة زمردة
Desert cat said…
Soooo
بجد والنبى
طيب حتصحى عمتك من التربة وتيجوا امتا
علشان البس الحتة اللى عل الحبل والحق اجيب الجاتوه
على العموم انا موافقه دول 3 ×1 برت بلاس التانى يعنى
Desert cat said…
أميرة ويلز
ويكفينى انك شرفتى المدونة بزيارتك الجميلة
تحياتى
Desert cat said…
coca
ربنا يخليكى يا كوكا
انتى اللى قمراية
واكيد طبعا الحاجات دى بتحصل لينا كلنا مش احنا بنات زى بعض
كل واحده بتتعرض لموقف من المواقف دى بس بطريقة مختلفة
تحياتى يا قمر
Desert cat said…
فرنسا هانم
ده انا كدا حشوط فى الدنيا كلها
معايا احلى بنوتة فى الدنيا
فرنسا هانم اللى منوره الدنيا
انا مقتنعه ان نصيبى مستنينى وان الزواج ده رزق والبنت بيكون متقدر لها حتتجوز مين وحتعيش ازاى ومن وهى لسه فى بطن مامتها ...بس الناس اللى مش مقتنعه
تحياتى ليك يا احلى فرنسا
اموااااااااااه
Desert cat said…
د. ضياء النجار
اولا انا سعيدة جدا بزيارة حضرتك
ثانيا هو اصلا راح كلم والده من قبل ما يقولى انا حاجه
وده مش السبب الرئيسى اللى خليته يجى علشان انه كلم والده
انما انا لما جيت اقوله مش تعرف راى الاول
قالى ده حيكون مجرد تعارف
وبعد كدا اللى انتى عايزاه
قولت ومالوا يتعرف
يعنى من الاساس انا مش قولت له موافقة

تحياتى يا فندم
إذا كان قالك : وبعد كدا اللى انتى عايزاه

يبقى عداك العيب وأزح كما يقولون،

سعيد جدا بمدونتك

عميق تحياتي

ضياء
Desert cat said…
دكتور حر
يا دكتورنا ايه اللى صعبنى بس

انا بالنسبة لى كان الامر منتهى من الاول
اتمنى لك حياة اسعد
احترامى وتقديرى
Desert cat said…
حياة الأحلام
هما بيفهموا الرفض من اول مرة ده تقل وبتاع انا افضل وراها لحد ما تسلم
بس هيهات
ههههههه
تحياتى ليكى يا قمره
Desert cat said…
د. ضياء النجار
اللى فهمته انه ممكن يكون كان متيخل انه لما يجى البيت يبقا كدا خلاص
تمت الموافقة بصرف النظر بئه هو الشخص المطلوب ولا لاء
على العموم ربنا يوفقه ويوفق الجميع

دمت باسعد حال
لماضة said…
هههههههههه
يا خبر ابيض يا جدعان
بس ده انتى طلعتى اجدع منى انك جبتيه البيت
انا مش بخليهم يعتبوه اساسا
وبرضه بخلى ماما تحكى للجيران
مش بحرمها من حاجه
بس بتحكى من عمايلى السوده طبعا
الله يرحمه العريس يا قطه
real love said…
والله انتى بنت زي السكر
هو فعلاً اللى جابه لنفسه إيه الرخامة دى
كان في واحد زيه بس التاني ألعن شوية اتقدم ليا أكتر من ست مرات
وكل مرة أرفضة يستنى كام شهر ويرجع
وفيا لأخر اتخطبت لواحد تانى فضل يهري وينكت في نفسه
لحد ما همد
........................
ههههههههههه
الجديد نزل يا جميل
في انتظارك
ريال لف
Desert cat said…
لماضة
اه طبعا ما هو لازم يجى البيت امال نتفشخر ازاى
وبعدين ما هو خلاص
راااااخ يا خواتى رااااااااااخ
بس مش مهم برضه ربنا عوضنى ب سووووو
حيروح يصحى عمته من التربة ويجوا انتى معزومة مقدمة
ده انا حاسه ان و مامتك شافت مامتى حيطلعوا معارف قدام من عمايلنا فيهم
تحياتى يا دوك
Desert cat said…
real love
يعنى تتخطبى ومش تعزمينى بئه ده اسمه كلام
ربنا يتمم لك بخير يا جميل وعقبال الفرح بس المرة انا معزومة رخامة بئه
هههههههههه
هو زى ما انا قولت قبل كدا مش بيبقا حاطط احتمالية الرفض
وحاسس نفسه الفارس المنتظر
جاية لك على عونيا الابعه حالا
تحياتى يا قمر
كاميليا said…
طبعا ياقطتى اصحاب

اموووواتين

ليكى ياقمر
عادى يعنى
جت الرجالة خيبة
والله انتى دمك زي السكر ضحكتينى لما بيتحجج علشان يجيلك وانتى عاملة فيها عبده العبيط مشتى على مبدأ محمد صبحى 0 ( قلت يا واد طنش خاااالص وشوف الست دى عايزة ايه )

بس هما الرجالة كده عاملين زي طابع البوسطة تتفى عليهم يلزقوا اكتر .

تحياتى يا فندم
Anonymous said…
ههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههه
هههههههههههههههههههههه
هههههههههههههههه
هههههههههههه
ليس فى الامكان اروع مما كان
قطة الصحراء

ولله هو في ناس كدة بيبقي عندهم كمية الرخامة والفضول زايدة عن حدها أوي

تحسي أنهم ملزوقين بصمغ

ودول فعلا مبينفعش معاهم غير أسلوب حضرتك

الا هو جي تاني امتي ان شاء الله؟؟

وأهو برده تكتبي لنا بوست ظريف

معلش أنتي دمك يتحرق شوية

بس مصائب قوم عند قوم فوائد

ونبقي نجيب لك بعد زيارته واحد لمون



بوست ظريف

تحياتي
ههههههههههه
لا الراجل ده رخم رخم رخم فعلا..فيه رجالة كده تصرفاتها تموت من الضحك..تصرفاته طفولية جدااا ,ربنا يعينه ويلاقي طفلة زيه ويريحك منه..لو جه تاني ماتوصيش نفسك بقى..ارمي الطابعة الليزر في وشه واخلصي..و ابقي اشتري ديسك جت واخلصي..لحسن تتدبسي في راجل تاني زيه كده0
Desert cat said…
كاميليا
تسلمى لى يا جميل
Desert cat said…
مصرى وبدرجة مواطن
حضرتك شايف كدا
طيب !
Desert cat said…
سمـــــــــــا
هههههههههههههههههههه
والله انتى اللى عسل
وحلوة طابع البوسطة دى
تشبيه فى محله
Desert cat said…
Anonymous said
ربنا يزيدك انبساط كمان وكمان
Desert cat said…
القلم السكندري
اعتبر ده وعد
يعنى حتجيبوا لى لمووووون
شكله كدا خلاص طفش
ورااااااااح يا خواتى رااااااح
على راى ستى اطاطا
Desert cat said…
أحمد المصري
تصدق فكرة
بس انا بفكر اشترى ايبسون بدل الديك جيت
The Queen said…
سيبك انتي

مفيش احسن من قعدة البنات

ويروح بطبعاته بألوانه بسلطاته ببابا غنوجه

هو لازم اللي بيتقدم يتقبل فورا !! ليه آخر راجل في الكون؟

برافو عليكي

ربنا هيرزقك بواحد بطبعه ألوان ترضي عنه ووالدتك تفتخر بجد بعريس بنتها
بس ابقي اعزمينا

على فكرة أنا بمووووت في القطط عندي أربعة تاخدي واحدة؟
Desert cat said…
The Queen
انا برضه بقول كدا
يمكن ربنا يرزقنى بعريس عنده طابعه الوان وسكانر محدش عارف
بالنسبة للقطط انتى ساكنة فين ورقم تليفونك وايملك وكل بيناتك
ده انا بستناكى من زمان
Anonymous said…
الولا دة اول مشوفته قولت انه عيل رغم وغلس غلاسه محصلتش
بس بصراحه صعبي عليه اوى
يعنى بعد متقوليله يروح يكلم اهلك تقوليله لا طب مكنتى تقوليلوه من الاول وتريحى نفسك بدل وجع الدماغ دة
ههههه احيه لو اباليسو عرف
حيشيله هو وقربته اللسعه دى بسيبرهم هيله بيله ويرميهم لكلاب خالتى حنوئه
بس الطيب احسن برده مع ان الكلاب مأكلتش بنى ادمين بقالها قرون
بس ساله مش اشكال كفايه الى جراله
ولا انتى تحبى اقول لخالتى تيجى تشرشحله شويه والله تيجى تفرج عليه فاقوس والقرى المجاورة

هههههههه بنى ادمين رخمه
ربنا يبعدهم عنا يارب
Desert cat said…
هههههههههههه
لا احنا هنا مش فى ايجى ميكس
علشان خالتك واباليسو يتجمعوا مع بعض
احسن وحياة المرسى ابو العباس اطربق لك سيدى جابر
والله منور ياباشا
إنت بتقولي
السبب الرئيسى فى رفضى لازم يكون الشخص من اختيارى مش معنى انا اللى اروح اخطبه لاء خالص
يعنى اكون عرفته قبل كدا وحاسه انى متقبلاه وهو ده الشخص اللى فيه المواصفات اللى انا عايزاها

ماهو الخطوبة بتبقى للتعارف و معرفة طبع و صفات كل واحد أمال الخطوبة اتعملت ليه ؟

بس صراحة هوا واد رخم و ما عندوش ذرة كرامة اللي يترفض صراحة و يفضل لازق للي رفضته و يلف و يدور عليها كل شوية يبقى نطع مفيش منه اتنين و يستاهل كل اللي عملتيه فيه
ربنا يكرمك باللي يناسبك و يسعدك
Desert cat said…
مهندس مصري
يا بشمهندس
انا من الاول اصلا كان بالنسبة لى شئ عادى تحصيل حاصل
يعنى مش اخوض التجربة وانا فى الاساس رافضه ويبقا اسمى اتخطبت وفكرشت واخد سمعه سيئة ان العرسان بيهربوا منى
ههههههههههههههه
لاء انا محسبتهاش كدا
انا قولت طالما مفيش استعداد نفسى من الاول يبقا حرام اصلا اعلقه اكتر من كدا
احترامى وتقديرى
love said…
المشكله فى بعض الرجال انها لما بتتقدم لبنت مش بتحط احتمال الرفض رغم انه حقها
ولما تترفض تبتدى تطلع فى البنت كل العيوب مغروره مش حلوه
love said…
المشكله فى بعض الرجال انها لما بتتقدم لبنت مش بتحط احتمال الرفض رغم انه حقها
ولما تترفض تبتدى تطلع فى البنت كل العيوب مغروره مش حلوه
Desert cat said…
love
صح كدا
لو رفضت يطلع فيها القطط الفطسانة
ربنا يهدى
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا مش قادره اكتب بس حلو اوى الواد الغتيت ده يالا ربنا معاكى

لولو
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا مش قادره اكتب حلوه حكايه الواد الغتيت ده يالا ربنا معاكى

لولو
Desert cat said…
البنت الشقيه
اه يا اوختى شوفتى اللى جرى لى ولا كان على بالى
يارب دايما مبسوطة يا جميل

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز