وهو احنا ذنبنا ايه ؟؟

الخميس8نوفمبر 2007يوم لن انساه
كلنا نازلين شغلنا فى أمان الله
اول ما وصلت السيبر لاقيت الى بيقولى خدى بالك كويس اصل مباحث التموين هنا
قولت وانا مالى بمباحث التموين انا سيبر
ساعه بالظبط ولاقيت الدنيا اتقلبت ناس عمال تجرى فى الشارع وناس بتقفل فى محلاتها وكأن احتلال انجليزى فى الشارع
انا لسه بسال فى ايه لاقيت جارى اللى بساله بينزلى الباب وبيقولى اجرى من هنا اصل امن الدولة فى الشارع
كل اجهزتى شغاله جوا والباب مقفول من غير قفل يعنى لو كان حد فيهم تكرم ورفع الباب كان دخل وقعد عادى جدا
دخلوا جوا عند الاخ بتاع المطبعة اللى جنبى طلعوا من عنده جهاز الكمبيوتر والطباعه وشنطة مليانه على اخرها ورق وكتب وهو مع الحاجات دى بس ده بعد ما قعدوا جوا اكتر من ساعه وانا كل اللى يشوفنى يقولى امشى من هنا خالص دلوقتى حاولى تختفى .... طيب اختفى ازاى وانا سيبرى يعتبر مفتوح ..... واحد واقف طمنى وقالى مش ينفع يرفع الباب من غير اذن نيابة
عربيتين بوكس واقفين على اول الشارع .... وابص الاقى فيهم كل زميالى اصحاب سيبرات النت كل واحد ومعاه جهاز كمبيوتر وبرنتر متشالين من عنده .... وافاجأ فى البوكس التانى ان فى بنت وجنبها جهازين بتشتغل فى سيبر على اول الشارع ..... طيب ودى واخدينها ليه دى مجرد واحدة بتشتغل فى سيبر قالوا لى هو كدا على ما يجى صاحب السيبر .... وعربيه نص نقل عادية فيها ولاد تانيين وبرضه اجهزة كمبيوتر .... طيب هو مش المفروض ان الناس دى بتشتغل فى سيبرات .... طيب هما مالهم ...... المهم مباحث القسم وظباط ومخبرين امن الدولة خلصوا مهتهم واخدوا الناس وطلعوا على القسم ...... بعد كدا جارى اللى قفلى الباب وجرانى فى ايده بعيدهم جه قالى تعالى اقفلى سيبرك كويس وروحى .....
بس اروح مين انا جيرانى وزمايلى فيهم انا رايحه وراهم القسم ..... يابنتى هيمسكوكى هناك .... لاء انا مش قاتله حد علشان اتمسك ..... دخلت أهخدت شنطتى من جوا وقفلت الاجهزة والسيبر كويس ومشيت ..... كانت هناك والدة البنت اللى اخدوها والست قاعدة تعيط ولا كان حد ميت لها واهالى الولاد التانيين واقفين كل واحد عمال يواسى فى التانى وكله يقولك شوية اجراءات وحيطلعوا اصلهم مش عاملين عملة .... وانا من بره عمال اتصل باى حد من معارفى وقرايبى ينفع انه يتدخل فى الموضوع .... واحد قريبى ظابط فى الجيش صاحبه يبقا لواء شرطة لما كلمته جالى قدام القسم واتصل بواحد صاحبه تانى علشان نعرف ابعاد الموضوع ده ايه .... لاقيناه بيقول دى توابع عمايل الاخوان اللى كانت فى الصالحية .......

واللى مش فاكر الموضوع دى لينكات
ممكن تفكره

http://www.almasry-alyoum.com/article.aspx?ArticleID=80564
http://masrawy.com/News/2007/Egypt/Politics/October/28/ikhwany.aspx

ولما سالناه عن اللى حيحصل للولاد اللى جوا والبنت اللى معاهم ... قالنا هما دلوقتى دخلوا الحجز وحيتعرضوا على النيابة فى الفترة المسائية والنيابة حتخلى سبيلهم .......
كل ما الوقت بيعدى كل ما العدد عمال يزيد واهالى الولاد بيتجمعوا اكتر ......وانا اعصابى بتبوظ اكتر ووترت الناس اللى جنبى
الساعه8لاقينا عربية نص نقل واقفه قدام القسم وعمال يطلعوا فيهم وفى ايديهم الكلابشات بصراحة منظرهم ولا المجرمين وهما مجرد ناس طالعه تشوف رزقها .... والبنت اللى معاهم محطوط فى ايديها كلابش مع ولد مش من اصحابنا خالص .... واحد شكله بلطجى بلطجى يعنى ... ولما الناس اتدخلوا وقالوا بلاش البنت دى تطلع فى ايديها كلابش الظابط قال دى اوامر ومينفعش حد يخرج من هنا من غير الكلابش ........
اخدنا العربية وطلعنا وراهم على النيابة العامة ..... واخدوا وقت جوا محصلش ..... وكلنا واقفين وكلنا امل انهم خارجين معانا ومروحين ..... الا نتفاجأ بيهم طالعين بعد الساعه 1بالليل وبرضه فى ايديهم الكلابشات ..... ايه يا جماعه فى ايه العساكر قالولنا دول حيتحجزوا تانى لما يتعرضوا بكره على نيابة امن الدولة وهى اللى حتخلى سبيلهم .... وقتها كنت حاسه بمرارة الدنيا طيب وامن الدولة ليه ... قالوا علشان الاخوان حسبى الله ونعم الوكيل عايزين نعرف بيطبعوا منشوراتهم فين وبيراسلوا مين بره مصر وده شغل امن الدولة ...... طيب والبنوتة دى وزمايلى حيبيتوا مع مجرمين جوا فى الحجز .... علشان ايه .... كله يقولك دى اوامر ..... وقفت زى المجنونة مش كنت عارفه بقول ايه .... ابو الاوامر على ابو الاخوان على ابو اللى عايز يشتغل فى البلد دى .... الكل اتجمع حواليا وحاولوا يهدونى ووقتها ناس تانيين زمايلى من اللى كانوا معايا بره اخدونى وودونى البيت ...... طول الليل قاعدة للصبح مقضياها تليفونات .... بكل معارفى والكل يقولى دى مجرد اجراءت وحيطلعوا على طول ..... النهارده بعد صلاة الجمعه مباشرة اتصلت بايهاب زميلى علشان اساله على الاخبار ... قالى انا دلوقتى قدام امن الدولة وهما خلاص حيتعرضوا دلوقتى ..... فى اقل من نص ساعه كنت عنده هناك ...... وفضلنا واقفين لحد ما زمايلنا طلعوا من نيابة امن الدولة برضه فى ايديهم الكلابشات ورايحين على القسم ...... ايه يا جماعه مش خير ولا ايه ..... قالوا لاء احنا رايحين القسم علشان هو اللى هيخلى سبيلنا .... وبالفعل اتعمل لهم اخلاء سبيل من القسم .......
لحد دلوقتى مش قادرة اوصف منظر والدة البنت اللى كانت معاهم .... ولحد دلوقتى اعصابى بايظة من الكلام اللى كانت بتردده طول اليل وهى قاعده قدام النيابة .....
وده اللى اخدناه من التكبر والغطرسة .....
اللى حيجى يقولى البوست ده متألف علشان نكره الاخوان
ردى الوحيد اخطف رجلك لحد فاقوس واسال على اللى حصل فيها امبارح واللى لسه بيحصل لحد دلوقتى ولو ليك معارف هنا او محامى معرفه .... يبقا وفرت على نفسك المشوار وهو حينقل لك الحدث صوت وصورة ......
بيوت اتحرقت وظباط تم الاعتداء عليهم وعربية شرطة اتدمرت
والدور علينا
وعايزينهم يحكمونا ..... هو احنا ناقصين دمار وخراب ....
حسبى الله ونعم الوكيل
وربنا معانا فى الكام يوم اللى جايين
اصل من العيد لحد النهارده اخوان الصالحية مش ساكتين ولحد النهارده الاعتقالات شغاله وشارع مجمع المحاكم كله متقفل
الارف ده حيخلص امتا وحننتهى منه امتا
لما ربنا يريحنا منهم ان شاء الله

تعليقات

لاحول ولا قوة الا بالله العلي العظيم

ربنا يسترها معانا بجد ف الايام الجاية
والله اللي بيحصل ده مريضيش ربنا فعلا
لا واللي يغيظك انهم بيدعو ف الأخر انه لخدمة دين

بس على فكرة برضدو مبدأ السيئة تعم ده مرفوض تماما
يعني الاخوان مثلا عملو مصيبة او اتسببو في مشكلة
طب الناس البريئة دي ذنبها ايه
هو مش المفروض بيتعمل تحريات الأول وبعدين ييجو يقبضو ع الناس اللي اتأكدو انهم متهمين
ولا الآية اتقلبت بقى ولا ايه
دي حاجة بجد تدايق

ربنا يصلح الأحوال
‏قال lastknight
أول زياره لمدونتك و أن شاء الله اتكونش الأخيره.. غباء الأمن فى التعامل مع المصريين أصبح جزء من الحياه اليوميه
بنت غلبانه نازله تشتغل بشرف بدل ما تمشى فى الشوارع بعد نص الليل يتقبض عليها و تبات فى الحجز .. لكن اللى غرق 1200 مصرى و اللى هربوا بملارات و اللى اغتصبوا أراضى الدوله .. مايتقربولهمش .. و حتى الآن ما قبضوش على اللى ارتكب مدبحة بنى مزار

...

الفوضى جايه جايه .. و يمكن يكون ده موضوعى الكئيب الجديد
و ساعتها هاهديه ليكى و استحملى بقى
معجب بتفاعلك مع الناس فعلا
‏قال Esmat
حبيبتى والله العظيم
أنا بترعش من مجرد قراءة الموضوع
يا عينى على البنت والبهدلة دى
ده حرام الناس تتبهدل كده
فين إحترام البنى أدمين
الواحد نفسه يسمع حاجات حلوة
على بلده ده منتهى الإفتراء
يخده المظلوم ويبهدلوه
ويقولوا الشباب بيموت نفسه ليه
ربنا يكون فى عونك عيشتى
الإفتراء ده
وجعتينى اوى يا قطة
ربنا يرحمنا برحمته
‏قال Soooo
لا حول ولا قوة الا بالله

ربنا ينصر كل المظلومين يارب
ويخرج الناس دي لبيوتها ويرجعو لأهلهم سالمين غانمين يارب




ربنا يخرجنا من دار البلا .. بلا بلا
سلاموووووووووووز
‏قال Desert cat
آلام وآمال
هو الدين قال علشان نخدمه نكسر وندمر وناس نازلة تشتغل فى امان الله يتقبض عليها وتتحط فى كلابشات زى المجرمين والحرامية
للاسف عملوها واحنا اللى وقعنا فيها
انا لما رحت المحكمة وقت ما كان زمايلى بيتعرضوا على النيابة العامة
المخبر ورا لنا كرتونتين ورق على اخرهم وقالنا دى منشورات الاخوان عاملينها علشان كدا اصحابكو هنا الراجل كان بيتكلم وصعبان عليه اللى بيحصل لشباب طالعين يشتغلوا ويدوروا على رزق حلال .... وكل كلامه هوجه وحتعدى ان شاء الله
ربنا يسترها بئه
‏قال Desert cat
lastknight
ما هو الوضع انقلب
ناس نازلة تشتغل فى امان الله يتقبض عليها وتتسجن ومجرمين ماليين الشوارع ولا حد بيقولهم انتوا فين
فى انتظار بوست حضرتك ان شاء الله
واهداء مقبلو مقدما
تحياتى
‏قال Desert cat
Esmat
حبيبتى انا مش قادرة اوصف لك رهبه الموقف وهجوم امن الدولة علي الشارع فى ثانية كانوا موزعين نفسهم فى كل الشوارع وكانهم بيطاردوا سفاحين مش ناس محترمة اصحاب محلات
اسفه لو وترتك بالموضوع بس صدقينى ده جزء من اللى حصل
لنا الله
‏قال Desert cat
Soooo
ما هم خرجوا بس بعد ما اعصابهم واعصابنا تعبت من هول اللى حصل
ربنا يستر على الباقى
تحياتى
‏قال فرنسا هانم
حبيبتى هى الحكومه كده
عايزانا يا ولداه نرجع لايام الحمام الزاجل والحصنه والسيوف
هجوم على سييبر وترك نوادى شارع الهرم فى حال سبيلهم
يمكن فكرتهم ان النوادى بتاعه الهرم دى
بتقدم خدمه الدروس الخصوصيه لاطفال المدارس بشرح جسم الانسان
والجهاز الهضمى وكيف يتغلب على الخمور
والجهاز التنفسى وحلاوه البودره والحشيش والبانجو
والجهاز الدورى
وسلم على الدورى العام
‏قال Ahmed Al-Sabbagh
صديقتى العزيزة والرائعة قطة الصحراء

اولا انا بشاركك الحزن على الموقف البايخ والصعب اللى اتعرض لهم شباب ملهومش زنب غير انهم بيسعو لأكل العيش

لكن عشان ما اكون مجامل وبسير مع الركب وانا عارف ان صدرك رحب وهيتقبل تحفظاتى

بس الاول اكيد انتى عارفة من شكل ومضمون مدونتى انى مش اخوان


اولاد بلدنا وحكومتنا مش محتاجة حادثة او غير عشان تدخل تجيب الناس من بيوتها وشغلها يبقى فى المقام الاول لازم تبقى مضايقتك من جهاز الشرطة من مش ان اى جهه


واسلام نبيه اللى أخد المواطن عماد وانتهك عرضة فى القسم ما كنش محتاج اخوان ولا غير

والاخوان نفسهم لو ليكى جار او قريب منهم هتلاقيهم اكتر ناس بتتاخد فى عز الفجر

ثانيا بصراحة انا موضوع الصلاحية ده ما كنتش اعرف تفاصيلة اوى فحبيت اقرا اللينكات بتاعتك لقيت مجرد خبر بدون تفاصيل

"كما قررت النيابة بسرعة ضبط وإحضار 11 أخرين من اعضاء الجماعة لثبوت إشتراكهم فى أحداث الشغب التي صاحب صلاة عيد الفطر المبارك فى الساحة المقامة بالجلاء"

طبعا الكلام ده ما ياكلش معانا احنا عايزين كلام فى الصميم عملو كذا عشان كذا وكان الشغب مع فولان.. كلام كدة يملا الدماغ مش كلام مالوش ملامح وانتى عارفة الحكومة لو عايزة تقول اى حاجة بتقولها


ثانيا
ماهم الاخوان دول بردو اللى صفوا رجال اعمالهم واخدوهم بتهم غسيل الاموال والفساد وغيرة .. بقى بزمتك الاخوان بيعملوا غسيل اموال وفساد ..امال الوزرا ورجال الحكومة بيعملوا ايه ..شرفاء لا سمح الله ؟

طبعا الكلام ده ما بياكلش معانا

صحيح الاخوان عندهم عيوب كتير
لكن مش لدرجة ابدا انك تقولى ان كل سبب حزننا فى الدنيا هما الاخوان
لا
بصراحة دى كانت اوفر شوية

لازم تدى كل حاجة حقها ده اللى اتعودنا منك عليه

وعموما شكرا على البوست الجميل

تحياتى
أحمد الصباغ
‏قال Ahmed Al-Sabbagh
تعالى كدة نشوف الاخوان بيقولو ايه عن الموضوع ده

http://www.ikhwanonline.com/Article.asp?ArtID=31480&SecID=420
أزال أحد مشرفي المدونة هذا التعليق.
‏قال Desert cat
فرنسا هانم
والله عندك حق يا قمر فى كل كلامك
اساسا احنا عايشين فى زمن العجايب
وكل حاجه ماشية بالمقلوب
ناس نازلة تشتغل تتبهدل زى الحرامية والمجرمين
وناس تعثوا فى الارض فسادا
واخدين راحتهم ومبرطعين فيها
ربنا يستر
‏قال Desert cat
Ahmed Al-Sabbagh
بص يا خالوا احمد
انا اقرب واحده لمكان الحدث
ومن الطبيعى ان الاخوان ينزلوا عندهم موضوع طويل عريض ومن طبيعتهم اساسا بيعيشوا دور الاضطاد
ما علينا
اللى حصل ان فى صلاة العيد امن منعهم من الاقامة فى الساحة وقالهم يقيموها فى المسجد
كان رد فعل الاخوان انهم اعتدوا عليهم ومأمور المركز ورئيس المباحث وكام امين شرطة انضربوا هناك وتحرقت عربية البوكس فمن الطبيعى الامن مش حيسكت
راح مولع فيهم وموجة الاعتقالات شغالة لحد النهارده
تعرف يا احمد لما كنا فى النيابة
المخبر ورا لنا كرتونتين منشورات على اخرهم
تفتكر الدين قال كدا
وهو فى الاساس يعنى ايه دولة دينية
ايام الرسول ما كانش فى حاجه اصلا اسمها دولة دينية
ويعنى ايه الاخوان المسلمين
بالعمايل دى لا اخوان ولا مسلمين
‏قال Desert cat
مصرى وبدرجة مواطن
ردى مش حيختلف عن الرد الاولانى
محدش عارف مين اللى بيصفى حسابات
وكعادتك تبويظ اى مكان تدخله
الله يرحم ايجى ميكس وحلم مصرى
متدخلش مكان الا لما تبوظه وتتسبب فى مشاكله تولع فى المكان
بخلاف المشاكل الشخصة لصاحبة
لكن هنا مش هسمح لك
وحقيقى لو عندك شئ اسمه دم ما تدخلش هنا تانى
من الاخر وجودك غير مرغوب فيه
‏قال أحمد المصري
ناس عمي مش فاهمة بتخرب وناس عمي تانيين بتقبض عالعمي الأولانيين..و الكرامة والمشاعر مدهوسة في النص..عشان ناس فاكرين نفسهم حيعملو حاجة0
‏قال Desert cat
أحمد المصري
وهو اساسا يا احمد فى حد بيعمل حاجه
كانوا عملوا فى الجزائر
ولا فى فلسطين
ربنا يستر وميجيش الدور علينا
‏قال oceaneyes
لا حول ولا قوة الا بالله

ايه ده ؟؟؟

عشان ايه كل اللى بيحصل ده ؟؟؟

لو هما فاهمين ان باللى بيعملوه ده بيبقوا بيطبقوا السنة ولا الشرع ولا اى مبدأ هما مؤمنين بيه ...
يبقا فكرهم خاطىء تماما
...

ماعلينا


....

وعموما فى الاول ولا فى الاخر ....الجهة الاولى بتهبل والسلام والتانية بتهبل اكتر منها ...وشاكلنا كدة هانفضل محتارين بينهم وهانفضل تعبانين وفينا العبر بسببهم

.....

حسبى الله وهو نعم الوكيل على كل ظالم بجد

....
‏قال Desert cat
ما هو المشكلة الشعب هو اللى بيدفع تمن غطرسة الاتنين
يعنى احنا لا لينا لا فى ده ولا ده
ولا عايزين الاولانيين
وفى نفس الوقت متبهدلين مع التانيين
ربنا يسترها مع الجميع
دمتى بود
‏قال islam
السلام عليكم ورحمة الله وبركاته

مكنتش مصدق إن الكلام ده عن مصر
عشان كده كنت عايز أسأل ده فين ؟

على الرغم من أنى أعرف أن ذلك يحدث فى مصر ، لكن حتى الأن لا أصدق ولا أريد أن أصدق ؟

بصراحة أنا شايف حتى لو الإخوان غلط ، بس دى مش طريقة حوار

هما بطبعوا تحت السلم ، ده لأنهم مش عارفين يطبعوا فى العلانية

أه أنا مش مع إنهم يكونوا السبب فى الأذى لمئات ولألاف من الناس

لكن تفتكرى إن ده مش إيجابى اللى هما بيعملوه؟

عارفه ... أنا مش إخوان
لكن اللى الحكومة بتعمله بتخلينا كلنا نشوف فى الإخوان صوتالنقد الوحيد

على كل
أكره كل التصنيفات

السلام عليكم ورحمة الله وبركاته
‏قال Desert cat
islam
الكلام ده بيحصل عندى وعندك وفى كل مكان فيه همجية
ناس بتضرب وتحرق وتخرب
وناس تانية ملاش علاقة باى حاجه بتدفع التمن
بيطبعوا منشوراتهم فى بير السلم
او تحت السرير حتى بس كل واحد عايز يثبت انه بيعمل شغل
يقوم نتاخد احنا فى رجليهم
‏قال Layla
الحمد لله انك ما اتاخديش معاهم في الموضوع ده

ومازلت عند رأيي ان الاخوان والنظام الحاكم وجهان لنفس العملة...والناس اللي بتقول ان حال البلد هتغير على ايديهم واهمون

وايه الغباء بتاع الشرطة ده...ليه يقبض على كل الناس بالصورة الهمجية دي...كان كفاية قوي انه ياخد عينة من الحبر والورق او على الاقل يصادر الطباعات الموجودة لحد ما يعرف المصدر...مش يقبض على اصحاب السيبرات اللي في المنطقة كلها
‏قال Desert cat
Marvel
هو انا مش عارفه ده طبع فينا كمصريين لما حد بيمسك سلطة فى ايده بيفترى على خلق الله وكأنها دايمه ليه
لا عمر استغلال السلطة بيدوم ولا التعامل بهمجية بينفع
بالنسبة للى حصل لنا يوم الخميس فانا لحد دلوقتى حتى كتابة هذه السطور مش قادر المنظر يروح من بالى
والمخبرين والظباط محاوطين المنطقة كلها وبيهجموا على الناس يجرجروهم هما واجهزتهم والطباعات
وكانهم حرامية
وهجامين مش ناس محترمة نازلة تشتغل وتسعى فى سبيل الله
على رزقها
انا الحمد لله مكنتش فى اللى فات
بس ربنا يستر فى اللى جاى
لان الوضع ما زال متوتر

المشاركات الشائعة