عاد الشتاء ليجدد ذكرياتى



عاد الشتاء يطرق الابواب ... عاد الشتاء ويحمل لى بين يديه اجمل هدية .. احلى لحظات حياتى
أتمنى لو أعيش عمرى كله فى شتاء .... لذا أعشق لندن عاصمة الضباب ....
أسعد لحظات حياتى وانا ارى قطرات المطر من خلف زجاج نافذتى ....
البعض من أصدقائى يعلمون مدى سعادتى بهذه اللحظة ... واول ما الدنيا تمطر الاقى كام تليفون ورا بعضهم
شايفه الدنيا بتمطر ... اكيد انتى مبسوطة دلوقتى .... اه شايفه الحمد لله ومبسوطة جدا .... الطرف التانى : طيب بما انك مبسوطة بقا ... ممكن طلب .... ايون ... إبتدى الإستغلال ..... يضحك كلانا للأخر ضحكة صفاء وسعادة مبحسهاش كتير .... احياناً ببتسم ابتسامة باهته لتكملة المنظر العام ومن جوايا بيقولى انتى منافقه علشان انتى اصلا مش ليكى نفس تضحكى ... إنما فى الوقت ده بالذات .... الضحكة بتخرج من قلبى .....
وقت سقوط المطر ... اعود بذاكرتى لمدرستى الإبتدائية وافتكر لما السما فجأة أعلنت حرب برق ورعد وكأن القيامة حتقوم ... المدرسين خافوا احسن المدرسة تقع علينا قالوا لنا روحوا .... كنت شايفه الجميع عمال يجرى تحت المية ... ما عدا انا كانى كنت طفل يتعلم المشى وماشية بقمة الهدوء ومش بفكر فى حاجه غير انى مش عايزة اوصل البيت دلوقتى ... وبعد ما وصلت البيت كانت ماما وصلها قبلى خبر اننا خرجنا بدرى اول ما شافتنى لاقيتها بتصرخ فى وشى اتاخرتى ليه قلقيتنى عليكى وايه اللى انتى عاملاه ده ... كدا حتاخدى برد ... يرضيكى سهر ماما وزعلها عليكى لما تتعبى ... وقتها اعتذرت لها وقولت لها مش هعمل كدا تانى ..... لكنى للأسف بمنتهى السرعة نقضت معها عهدى لأن لحد دلوقتى دى عادتى ... اعشق المشى تحت المطر ....
أتى الشتاء ليذكرنى بأجمل ايام حياتى ..... ذلك اليوم الذى قضيناه على شاطئ النورس ببور سعيد ...الجو من الصبح ربيعى .... اخدنا جولتنا فى الميناء ... اتفقنا بالعبور إلى بور فؤاد .... لكن أمام سينما النورس نظرنا كلانا للاخر ..... وكان عيوننا تعتذر عن نقض الاتفاق .... كم من الوقت مر بالداخل ... لا اعلم .... خرجنا لنجلس على الشاطئ .... وما أن بدأ الحديث ... حتى اعلنت السماء عن سعادتى إنها قطرات المطر .... حينها نظر لى بابتسامته المعهوده وقال ... علشان تعرفى بس انى مش حارمك من حاجه ... وعلت ضحكاتنا المكان ...
وبالرغم من ان ذكرياتى مع الشتاء تسعدنى ألا أنها لا تخلو من بعض الآلام
فما زلت اذكر ذلك اليوم الذى شعرت فيه بان العالم كله ضدى منتصف ديسمبر ... احسست بقسوة وظلم لا يطيقها بشر .... وجدت نفسى اهرب إليه ...بالرغم من وعودى المغتصبة رغما عنى بعدم رؤيته ... لكنى وجدت نفسى اهرب منه إليه .... كنت اعرف كل مواعيد محاضراته ... وعارفه انى ممكن مش اقابله لكن احتياجى ليه دفعنى رغما عنى ... اثناء سيرى على كورنيش المعادى وقفت للنيل اشكو إليه وفجأة اختلطت دموعى بقطرات المطر ... وما أن وصلت كليته حتى رأيته أمامى ..... الحمد لله إنى لاقيتك .... قالى حاسس انى تايه مشتت علشان كدا كنت مستنيكى .... لكن بتبكى ليه ... قولت له ده مطر قالى وعنيكى حمرا كدا برضه من المطر ... ما تعرفيش ان دموعك دى بتقلتنى ..... أتذكر معى ذلك اليوم ... أتذكر معى مكتبة جامعة القاهره ... ومكاننا الذى شهد خنقاتنا اللى كانت مبتنتهيش ولحظات ضحكنا .... كوفى وسط البلد ..... يا إلهى كم افتقدك .....
أتى الشتاء ليذكرنى بتلك اللوحة الفنية التى لا يستطيع رسمها سوى خالق الكون وحده جل وعلا ... ذلك الطريق الطويل الذى تحيطة من الجانبين الاشجار العالية ..... روعة السماء رغم الغيوم .... سكون الليل ... صوت منير لما النسيم ... قطرت المطر تتساقط أمامى .... حينها فقط اشعر بأنى أملك العالم ... اريد الصراخ ليعلم الجميع مدى سعادتى ........ اتذكر منذ ايام قليلة اثناء عودتى من القاهرة شاء القدر ان اعود من ذلك الطريق وجدتنى انظر اليه بشده و اتسائل ......اه يا طريق الذكريات ... اما ذلت تذكرنى وتذكر تلك اللقاء .... ام انك نسيتنى لأنى الآن وحدى وبين اشخاص غرباء .....
أتى الشتاء ليجدنى ممسكة بعقارب الساعه منذ وداعى له مع اخر قطرة مطر .... والآن أقولها وانا فى قمة سعادتى .... اهلاً بك مجدداً ....و أهلاً بحقيبة ذكرياتى التى تعيدنى من جديد إلى الحياة

تعليقات

‏قال واحد مصرى
هكذا الشتاء...جميل ...وقور...وصارم....وتمطر السماء و تداعب رائحة المطر الحواس و يفوح عطر جميل هو خليط من رائحة الماء و التراب المغسول و أوراق الشجر.....الله

دمت بخير
‏قال mohamed hassan
طب دا شتا مصر تعملي اية في شتاء بيوصل -35 و تلج يموت العفريت
انا باكره الشتا
اسوأ فصل و باكره التلج و البرد
المطر وزي ما بنسميه عندنا الشتا
الله عليه وعلى كل كل الذكريات اللي بيجيبها معاه وهو راجع

على فكره بوست جميل اوي اوي اوي
رقيق وان لم يخلو من شويه مراره كده

الشتا كفيل بغسلها

ابتسمي فانها تمطر
‏قال Esmat
عزيزتى أحييكى على البوست
جميل اوى وفكرنى بالشتا وزكرياته الجميلة
عارفة انا كمان بحب أمشى تحت المطر
وعمرى ما مسكت شمسية ومشيت بيها
فليأتى الشتاء بزكرياته الرائعة
عليكى إنشاء الله
لكى تحياتى
‏قال غير معرف…
طبعا معروف ان نانا بتحب المطرة عشان
احم
كظم ظم

شايفة المطرة يا نانا
شايفاها يا كظومة
اتبليتي يا نانا

انا غرقت يا كظم ظم

و سوف لانشتري هذا العيد شجرة

و حبيبتي و المطر

والحاجات دي



المهم انا ولا بحب الصيف ولا الشتا الاتنين

بحب الخريف و الربيع اكتر

بس لو صيف و شتا اختار شتا

عشان الحر و العرق و السفر و العربيات


كل سنة و انتي طيبة يا نانا
‏قال bota
كل سنه وانتي طيبه
الموضوع اثر فيا اوي
وكل حاجه بتعدي علينا بتحفر فينا زكريات فيه منها الحلو وفي منها المؤلم
فعلشان كده ياريت نفتكر بس الحلو اللي يفرح قلوبنا ويسعدها
لازم نتعلم نستمتع بكل حاجه

وكل شتا وانتى طيبه
وكل مطر وانتي فرحانه وسعيده من غير اي حزن
‏قال Heart Beat
انا بحب الشتاء جدا

مع انه مرتبط عندي ببعض الذكريات السيئة لكني بحبه برضه

في استكانة و جنون في نفس الوقت
‏قال oceaneyes
الحمد لله انى لقيت اخيرا حد بيحب الشتاء زيى

انا عن نفسى بعشق حاجة اسمها شتاء ...بجد بحبه اوى ...وخصوصا موضع المطر ده ...كانت دايما ماما برده بتمنعنى من انى امشى فى المطر او اتعرضله اصلا ...وانا كنت دايما اقولها حاضر وهابعد عن المطر ...

بس مش عارفة ..ما اقدرش اعمل كدة ...انى ابعد عن المطر او اتجنبه كأنى بالظبط بتجنب حبيبى وببعد عنه ...على الرغم من ان الشتاء كله برد والمطر بيبرد الشخص اكتر بس وانا واقفة تحت المطر بحس بالدفء...ازاى مش عارفة

ومش قادرة حتى اوصف شعورى ناحية المطر ...بس بجد المطر هو الحاجة الوحيدة اللى لو بعدت عنها احس بالاختناق

....

وعشان كدة فى فصل الشتا بحس انى طايرة ومش من سكان الارض

:)
‏قال Desert cat
واحد مصرى
وصفت ما عجزت انا عن وصفه
لك تحياتى
‏قال Desert cat
mohamed h
يا عزيزى احنا بشر والاختلاف شئ طبيعى
ناس بتحب الشتا وناس بتحب الصيف
ناس بتحب الاسود وناس بتحب الابيض وهكذا
حاول تستمتع بوقتك
تحياتى
‏قال Desert cat
اسكندراني اوي
طبعا الاجمل من البوست تعليق حضرتك
وحبتسم حاضر للمطر واحاول اتغلب اى شئ فى غيابه ( المطر )
تحياتى
‏قال Desert cat
Esmat
متفقين فى صفة المشى تحت المطر
حقيقى مبسوطة
ربنا يسعدك
تحياتى
‏قال Desert cat
ketchup
هو انتوا بيجى عندكو صيف وشتا برضه يا كيشو
انا كنت فاكر ان السنة كلها عنكو خريف وربيع بس
لكن ايه موضوع كظومة ده هو انت كنت معانا وقت الحوار ده
مش حنشترى شجرة
ده احنا نشترى ترعه علشان نعوم فيها ولما الصيف يجى برضه نحس بالمطر
تحياتى
‏قال Desert cat
bota
ما هو لولا المؤلم مش منقدر نستمتع بالحلو
بس قدر الله وما شاء فعل
وربنا يجعلنا حياتنا جميعا فى سعادة
تحياتى
‏قال Desert cat
oceaneyes
الظاهر ان المطر ده الحبيب المجهول اللى كلنا بنحبه
تحياتى
‏قال Desert cat
Heart Beat
اغسلى الذكريات السيئة مع قطرات المطر
انا بعمل كدا
لكى تحياتى
‏قال Soooo
اه يا طريق الذكريات ... اما ذلت تذكرنى وتذكر تلك اللقاء .... ام انك نسيتنى لأنى الآن وحدى وبين اشخاص غرباء


يالهوي ياقطه
اتاريكي فنانه وبتقولي كلام كبير وانا اللي كنت فاكرك مؤدبه

سوري بس بجد والله انا يابنتي حسيت بكل التفاصيل اللي قلتيها وزي ما اكون شفتها قدام عيني بجد




بصراحه .. انا متنح حقيق
يلا سلامووووز بقى
‏قال Unknown
زى متكونى بتتكلمى عنى انا كمان اسعد لحظات حياتى وقت المطر بحس ان الدنيا صافية و مغسولة وجميلة
ووقت الشتاء اسعد ايامى واحلى فصول السنة عندى
ياريت يبقى كل السنة شتاء
‏قال غير معرف…
كنت واخد اجازه بس الاجازه فشلت اساسا ويمكن من حسن حظى علشان ااقرى البوست الى مليان مشاعر زى قطرات المطر فى نوه الشتاء
والله حاولت كتير الاقى كلام ااقوله وقريت وعدت فى البوست ومش لاقى تعليق
بس رنت فى ودانى اغانى كتير يمكن منهم عصفور وسط المطر حنان ماضى
يمكن فى قلب الليل على الحجار
ايه الرابط مش عارف وااقولك ايه مش عارف بس كل الى انا بقولوا ليكى شكرا بجد يا قطه علشان ادتينى مفتاح البوست الجديد رغم انى كنت مقرر مكتبش :S متخافيش حقك محفوظ والحساب لما انزل البوست يبقا نتحاسب
بس ممكن سوال كان اسم الفيلم ايه :D
‏قال altwati
نص رائع جدا
كالمطر في الطقس الدافئ
دائما هناك أشياء تهيج الذكرى
أما لو كانت هذه الأشياء هي المطر
فالحنين هنا يتضاعف
تحياتي
‏قال Layla
الشتاء جماله في تقلبه...ويمكن تفسيره على اكثر من وجه على حسب الحالة النفسية

الشتاء مليء بالذكريات...احداث كثيرة تحدث في الشتاء...اعتبره من اكثر الفصول اثارة على الرغم من برودة الجو
‏قال غير معرف…
صديقتي العزيزه قطه الصحراء

انا كمان بحب اوي فصل الشتاء بفضله عن بقيه فصول السنه بحس انه رومانسي جدا و المطر نازل واو منظر يجنن
كمان ذكريات المدرسه الواحده ماتقدرش تنساها
مرسي علي البوست الجميل و استرجاع الذكريات شئ لطيف جدا
مرس يانك خالتينا نشاركك اللحظات الحلوه دي
:)
‏قال غمض عينيك
جميل اوي وصفك للشتا وربطه بذكرياتك عنه وفيه
فضفضة حلوة اوي جات منسجمه مع جو الشتا والمطر
حسيتها والدنيا بتمطر

تحياتي يا نانا
انا كمان بحب الشتاء
بس مش بمشي تحت المطر الصراحه
:)

محمد سمير
كل شتا وانتي طيبه وسعيده
ويا رب الدنيا نا تبطل تمطر السنادي عشان تفضلي مبسوطه علطول

رقيقه ذكرياتك وجميل احساسك وصادقه كلماتك

وعلى فكره أنا كمان كائن شتوي جدا وبموت في المطر
سلام يا قمر
‏قال Desert cat
Soooo
بما ان مصر كلها عندها ذكريات
يبقا مصر كلها قليلة الادب
المهم ياباشا انك تعيش اللحظة
وابعد عن الذكريات
تحياتى
‏قال Desert cat
ايوية
كل سنة وانتى طيبة يا جميل
وربنا يجعل كل ايامك سعادة
تحياتى
‏قال Desert cat
رئيس جمهوريه نفسى
المهم ياباشا اخبار الاجازة ايه
ان شاء الله تكون مستمتع فيها
وبالنسبة انى اوحيت لك البوست الجديد
يبقا ليا نسبة فى الموضوع ده ولا رايك ايه ؟
الفيلم ده كان اسمه اجمل ايام حياتى
ماخوذ عن احداث واقعيه بتحصل فى حياة كل واحد فينا بس بشكل مختلف شوية
‏قال Desert cat
altwati
فعلا كلامك صح
لو جاء المطر واثار بعض من الذكريات فالحنين يتضاعف وفعلا ده اللى بحس بيه
خالص تحياتى
‏قال Desert cat
Marvel
يمكن بالرغم من برودة الجو والاحساس بقسوته
الا انه بيكون له احساس مختلف
خالص مودتى
‏قال Desert cat
اجندا حمرا
حبيبتى الظاهر علينا متفقين فى حاجات كتير
اصل انا كمان بفضل اقول الشتاء ده رومانسى وكانى بوصف حبيبى
ما هو برضه حبيبى
يارب دايما سعيدة ومبوسطة فى الشتا والصيف
‏قال Desert cat
غمض عينيك
ليه يا محمد مش بتمشى تحت المطر ليه
الا لاتسمع كاظم وهو يشدو باجمل اغانية حبيبتى والمطر
كاظم ده عسل عسل بحبه يا ناس الاقيش معاك رقم تليفونه
على ما اعتقد هو فودافون
ينوبك ثواب وتبقا وفقت راسين فى الحلال
كل سنة وانت طيب يا فندم
وفرح بالف خير
‏قال Desert cat
أوشــــــه
الظاهر ان كل البنات بيحبوا الشتا
اصل الواضح هنا اوى ان الولاد نص الربع فى الموضوع ده
لكن البنات دول حبايب قلبى
ربنا دايما مبسوطين فى الشتا وفى كل الفصول
والولاد مبسوطين فى الشتا بس علشان يحبوه
تحياتى
‏قال غير معرف…
الظاهر انك فهمتيى غلط انا بتكلم عن اسم الفيلم الى انت شفتيه يومها مش بقصد انى البوست فيلم
بخصوص النسبه ححولها لحسابك فى البنك ان شاء الله اول مخلص مع مديرين الموقف
اما عن الاجازه فهى الحمد لله باظت بسبب مشكله مع قاضى فى المحكمه وربنا عالم امتى ممكن افكر اخد اجازه تانى بس غالبا مش قبل اول الشهر الجاى
السلام عليكم

أزيك يا جميله
اولا تحياتى ليكى على نشاطك فى التدوين يارب دايما

وآسفه أوى على تأخيرى فى الرد بس سامحينى أنا فى حاله عدم توازن

أما عن البوست جميل جدا أنك بتحبى الشتا لآن فيه سبحان الله لوح فنيه جميله ربنا اللى رسمها لينا
بس فعلا سبحان الله لكل واحد وقت بيحبه أنا مثلا ما بحبش الشتا خالص بجد وبتقبض أوى أول ما الشتا يدخل مع أنى بحب المطر وجوه بس بتقبض اوى من الشتا علشان الشوارع فاضيه ومفيش حياة زى الصيف وكمان ما بستحملش السقه بتعب منها جدا

بس ناس كتير بتحب الشتا ويارب دايما يكون السنه دى ليه معاكى أجمل ذكريات

تحياتى
‏قال Desert cat
رئيس جمهوريه نفسى
رايح تتخانق مع القاضى
يا قلبك الجامد
طب اتخانق مع متهم
يابنى ابعد عن الشر وغنى له
‏قال Desert cat
حياة الأحلام
عليكم السلام ورحمة الله وبركاته
ازيك انتى يا جميل عاملة ايه
هو الشتاء بالرغم من غموضه لكنى بحس انه رومانسى
جربتى تشوفى المطر وانتى على البحر
لو حصل فعلا وقتها حتعشقى حاجه اسها شتا
طبعا انتى تشرفى المودنة فى اى وقت تحبيه دى مدونتك
خالص تحياتى
احلى احساس ف الدنيا المشي تحت المطر
تحسي بعدها براحه غريبه اينعم الراحه يتبعها قعده ايبوع ف السرير بس الشعور اللي بتحسيه يستاهل اي مقابل كنت الوحيد اللي يفضل شغال والدنيا بتمطر وباكون ف قمه النشاط
كلامك جميل قوي وحاسه من القلب قوي عشان كده وصل قوي
ربنا يحقق لك كل امنياتك
لما الدنيا تكون بتمطر ابقي ادعي ربنا يحقق لك اللي بتتمنيه
وان شاء الله يستجيب
احلى كلام عن احلى ايام
تحياتي
‏قال شقاوة شعب
انتى بتقولى فيها
اومال لو كنتى بتحضرى الشتا فى اسكندرية وجماله وسحره
وهمممممممممم

تتمشى كدة على البحر ساعة المغربية والدنيا بتشتى شتا خفيف والهوا بيخبط فى خدك يلسعه لسعة لذيذة ورقيقة

اسكندرية فى الشتا سحر وهم جمال رومانسية دفء خيال

دنيا تانية خاااالص
‏قال Ehab
هاعلق على البوست التحفه الأول مع اني كنت جاي اتخانق معاكي
بس بعد الذكريات الممتعه دي
سماح المره دي
ياه على الذكرى شعور غريب قوي ان يبقى عند الواحد ذكرى جواه
ممكن سعيده وممكن بريئه
وممكن حزينه
بس هي دي ذكرياته وميقدرش يعيش النهارده من غير امبارح

جميل قوي البوست اتمنى تكون قصتهم انتهت على خير وسعاده

ولو ان ابويا مبيحبش الشتا وعمال يزعق من امبارح علشان الصيف خلص والشتا بنت.... رجعت تاني وهيجيلوا برد وزكام
ما علينا ربنا يستر

انا بحب برده المطر والشتا قوي
سلاااااااااااااام
اه كنت هانسى ده ردي على الكومنت بتاعك
--------------------
Desert cat
انتي يا قطه
يعني ينفع كده اول تعارف تزعلي مني وتتخانقي
عموما يا ستي متزعليش
بس يعني اسمحيلي انتي اصلك متعرفنيش
انا مليون مره قلت اني مبحكمش على حد كل الناس حره لأن محدش هيتحاسب عن حد كل واحد شايل هم نفسه كفايه
لكن ساعات بحب اعرض اللي بشوفه قدامي

وانا لما شفت الناس دي مكنتش متضايق منهم ولا حاجه ولا حكمت عليهم بس جاتني فكرة لبوست اني اتخيل لو انا حكمت على الناس دي بصوره وحشه زي اي واحد تاني من الناس اللي حضرت الموقف يا ترى ايه الأسباب اللي هاستند عليها في حكمي ده
وعلشان كده انا ناقشت كل اللي ممكن الناس تتحجج بيه وهدمت الحجج دي من اساسها وبينت ان مفيش حاجه سليمه في الفكره المنحله دي عنهم

لكن انتي ظنيتي ان انا حكمت عليهم زي برده اكتر من كومنت بيعاتبني على حكمي على الناس وان مينفعش اتهمهم بكده بدون دليل
يا ناس انا مش بتهمهم انا بعمل قصه خياليه عن واحد دماغه مسوسه بأفكار قديمه ومتلخبطه وناقشتها وبينت الغلط فين

حتى اسم البوست ده فيلم بحبه جدا وفكرته برده بتدور عن الناس لما بتقرر تحكم على حد بدون وجه حق غير انهم كتير ومن حقهم يحكموا باللي يعجبهم
البطله في الفيلم كانت بريئه جدا وطيبه قوي
ومع ذلك اتعذبت جدا
بسبب احكام الناس الحاقده
بس واضح ان محدش فهم فكرتي
وكل الناس بتحسبني بحاكم البنات دي
يا ناس انا بحاكم الفكر المتحجر
بحاكم الشخص اللي حكم عليهم بدون دليل حقيقي

بصي مش هاطول عليكي
بكره لو بقينا اصحاب اكتر هتعرفيني اكتر وهتعرفي ان مش طبعي اني اكون عقلي متوسخ كده

عموما نورتيني
ولو انك خربشتيني قوي
سلاااااااااااااااااااااااااام
‏قال Desert cat
ولــــــــــو
بدعى والله وقت المطر
وربنا يحقق لنا جميعا كل امنياتنا
تحياتى
‏قال Desert cat
شقاوة شعب
همممممممم
لاء انا مش من اسكندرية
بس بقدر احس بيه فى مكان بروحه حتى لو جزر القمر
تحياتى
‏قال Desert cat
الشنكوتي الكبير
ياباشا شكرا على الحضور الجميل
واسفه على الخربشة اللى عندك
بس انا بتضايق جدا لما بشوف مواقف زى دى
على العموم وضحت وجهة نظرك
وها اجى اصلح غلطتى عندك
تشرفت جدا بمعرفتك
تحياتى
‏قال Ehab
خلاص يا باشا
كده صافي يا لبن
تحياتي وسعيد جدا بمعرفتك
سلاااااااااااااااام
‏قال Desert cat
الشنكوتي الكبير
حليب يا جهينة
‏قال EGYPT EYES
مجرد قراية البوست خلاني اشتاق جدا للشتا
وصفك رائع
أزال المؤلف هذا التعليق.
‏قال shreen
قطه الصحراء
عرفتك عن طريق
رئيس جمهوريهة نفسى

بسبب اهدائه بوسته الاخير للشتاء لك
لانك من الهمتيه هذا البوست

فذهبت لك فورا
لانى انا الاخرى اعشق الشتاء
بل ان اجمل ذكرياتى كانت شتاء

والامطار تثير بى ما تثيره بك
تثير دموعى
تثير ذكرياتى

ولكنى برغم الدموع
ساظل انا الاخرى اعشق الشتاء
‏قال Desert cat
EGYPT EYES
ومجرد رد حضرتك تشريف للبوست
تحياتى
‏قال Desert cat
مصرى وبدرجة مواطن
ما انا بقول كدا برضه
‏قال Desert cat
shreen
طبعا انا تشرفت جدا بمعرفتك
وسعيدة لحضورك الجميل
وان شاء الله كل ذكرياتك تكون كلها فرح وسعادة وربنا يبعد عنك الدموع
خالص تحياتى
‏قال shreen
الف شكر لك
يا قطه الصحراء
على ردك
وعلى تعليقك الرقيق على البوست يتاعى
انا مثلك ارى ان الحب هو

احساس وشعور بين قلبين شخصين مش بين جسدين
لكن فى يوما ما لابد ان تكون هناك علاقه جسديه لانك تريدى ان تفنى تماما فى الطرف الاخر
لكن لابد ان تكون العلاقه بين القلبين موجوده اولا
وان يكون كلا الطرفان مستعدان لبدء هذه العلاقه
لكن عندما تكونى غارقه فى الحب
لا يمكنك ان ترفضى للطرف الاخر طلبا
وحتى ان كان معنى هذا
ان تفعلى شئ انت غير مستعده نفسيا له
فقط تفعليه لترضى الطرف الاخر
لانك اضعف من ان ترفضى له طلبا
‏قال Desert cat
shreen
حبيبتى انا بنوتة زيك واقدر افهم مشاعرك واقدرها
لان كلنا بتعدى علينا الظروف دى
بس انا كان قصدى من ردى عندك ان الحاحه كان دليل على انه عايز الهدية بس ومش مشكلة فيما بعد
يعنى كان اللى يهمه فى الاول والاخر الجسد لا القلب
والبنت اساسا تقدر تفهم كدا وتميز هو عايز منها ايه
بس احنا اللى بنغمض عنينا عن اللى شايفه العقل وبنجرى ورا القلب
مش انت لوحدك اللى بتفكرى بالشكل ده ولا انا لوحدى ولا هى لوحدها كلنا هذه الانثى ....
لسبب بسيط ان البنت عاطفه اقوى من عقلها علشان كدا بتسيرها
خالص تحياتى
الشتاء ذلك الزائر الذى قد نرى منة الطين والوحل والبرد وقد نرى منة قطرات المطر الصافية والعيون اللامعة والقلوب التى تتمنى الحصول ع بعض دفء وحنين الحياة
بوست رائع تحياتى
‏قال Desert cat
كلاكيت تانى وتانى
هكذا هو زائر غامض ولكنه خفيف الظل
الاروع حضورك
‏قال Kontiki
عيطينى وارتحتى
حب وفراق و شتا
وكمان طلعتى من حزب المشى تحت المطر
اوعى تكونى بتحبى العياط تحت المطر برضة
بوست جميل قوى يا قطة
فكرنى بحاجات كتيررر
كلها دلوقت مش موجودة
:(
مشكوووووووووووووور
‏قال غير معرف…
Grеetings from Niederglatt, Switzeгland.
Does youг blоg get a bunch of junk pоsts?
I'm a blogger too and I'm thinking abοut hοw mаny рeoрle haѵe the exaсt same dilemma.
A number of us have crеateԁ ѕomе benеficіal pгoceѕѕes
and we аre seeκing to eхchange iԁeas with othеrѕ.
Іf yοu'd be intrigued, kindly get in touch with me via email.

Also visit my web site - know-it-all
‏قال غير معرف…
Mіght Ι just say thаt after finding Blogger:
قطه الصحراء on Dгupal, what a comfоrt to find someboԁy who baѕіcally unԁerstands what theу're talking about when it comes to this. You seriously understand how to bring a problem to light and make it important. A lot more people should really look at this and understand this side of the story. It's surpriѕing уou're not more well-known, because you most really have the gift.

Here is my webpage :: http://wiki.strategy-a.com/
‏قال غير معرف…
Great work, hаpρy tо haνe
come acroѕs thiѕ blog on blogs list.
This іs thе kind of cоntеnt thаt ѕhould be distгibuteԁ агound the іntегnet.
It'd be great to see stuff like this on web 2.0 site list. Shame on the search engines for not positioning this blog higher. If you'rе interеѕted, please come anԁ paу a viѕіt to my ωeb ѕite.
Thank you

Mу weblоg pizza oven outdoor

المشاركات الشائعة