ما ترحمونا بقا

كل يوم الصبح افتح التلفزيون .. عادى يعنى مش حدث ما كل الناس فى بيوتها تلفزيونات وبتفتحها .. بس انا فى حاجه غريبة اوى
كل لما يجى المؤشر على قناة الناس وخصوصا الصبح الاقي اتنين لابسين بدل شيك كدا فاردين لحاف فى النص بينهم وواحد واقف يشرح والتانى اما بيستفسر منه على حاجه او بياكد على كلامه .... عادى يعنى بطنش واقلب على قناة تانية النهارده سمعت كلمة اللحاف الاسلامى .. ومن كام يوم على نفس القناة اعلان عن الموبايل الاسلامى
بس الشهادة لله اعلان الموبايل الاسلامى ده كان بالليل مش بالنهار يعنى اوقات مختلفة
علشان يجى لنا ضغط عصبى وسكر وحرقة دم خلال اليوم بالتدريج
اصل انا بتغطى ببطانية سنتامورا يعنى كافرة
وكمان موبايلى لما بيرن بسمع فيروز بكتب اسمك
برضه موبايل كافر
المفروض ان القناة دى دينية يعنى بتقدم مادة دينية
لكن تجارة باسم الدين ... لحاف اسلامى وموبايل اسلامى
اللى مش قادرة افهمه ليه كل واحد عايز يعمل حاجه لازم يدخل الاسلام فيها
اللى بيعتدى على واحد يقولك اصله كافر ... طيب ما هو الاسلام مش قالك اعتدى على الكافر ولا استحل حرمته وماله
واللى بيتاجر بيتاجر برضه باسم الاسلام
بنوشهه بايدينا ونلوم على الغرب
طيب

Comments

اضحكتني حتى كاد الدمع يطفر من عيني

طبعا شر البلية ما يضحك

--------------

احيلك على هذا الرابط

لتكتشفي ما خفي عنك في قناة الناس

http://elbawaba.blogspot.com/2007/06/blog-post_22.html

تحياتي
بصى يا قطه احنا شعب الروحنيات عندو عاليه قوى عايز تمشى اى حاجه اربطيها بالدين اى سلعه اى كلمه
قناه الناس فيها افتاء كتير وبتجن فعلا على الى بيحصل فيها حاجه ده حتى الرنات بقيت ليه متحطش رنه تكون بابا دخولك للجنه وكسب الحسنات ( المفتى قال استخدام رنات اسلاميه او ايات قرانيه لعى الموبيل حرام )
يعنى انا احط رنه دينيه او دعاء على الموبيل وبقى بكسب حسنات حتى لو مصلتش ولا زكتش ولا صمتش وبسهوله ادى لواحد كارت ميناتل او رينجو وااقضيها مسدادت وعداد الحسنات بيعد
الحاجه التانيه قناه الناس طريقك للجنه انا حفتكر بس مره كنت قاعده بالصدفه وبعتت سائله لقناه الناس انى جوزها مش بينفق عليها هى واولاده وبتسال هل يجوز انها تاخد من مال جوزها من غير علمه
الشيخ افتى وقال حرام حرام حرام رغم انى قريتها انى الرسول عليه الصلاه والسلام اباح لاحد المسلمات انها تاخد ما يكفيها من وراء جوزها
حاجه اخيره صاحب قناه الناس فتره منزل قناه الناس وهو سعودى الجنسيه هو هو صاحب قناه الخليجيه المرتبطه باذاعه الاغانى
قمه التناقض وقمه التجاره بالدين
على فكره انا مش بتغطى يبقا انا ايه:D
الموبيل بتاعك رنته بصوت فيروز
حرام عليكى أنا بكيت عشانك
أهىء أهىء
ربنا يهديكى ويفك أسرك
أنا رنة موبيلى شعبان عبد الرحيم
أسلامى يعنى
son's egypt said…
اسلام عليكم
المصريين طيبين بحالهم
وشعب متدين بكبيعته
علشان كده ممكن نلاقي ناس بتلعب باسم الدين
انا زيك مستغرب يعني اهي موبايل اسلامي
وحاجات تانيه غير ديه كتير
انتي على طول متنرفزة كده
:D

لابجد لازم تهدي شوية ومش كل حاجة تاخديها على أعصابك كده لأنك بالطريقة دي مش هتقدري تواصلي
المشكله مش مشكله قنوات
المشكله مشكله عقول بتحاول تضحك على البسطاء وتاخد فلوسهم
بحجه الموبايل الاسلامي واللحاف الاسلامي والتليفون الاسلامي

ربنا يرحمنا
الحمد لله فيه لحاف اسلامى بس ياترى ثمنه اسلامى ولا
.........
اهم من اللحاف مايلتحف به
بس خلاص
يا بنتى هفضل لحد امتى اقولك
فكك من التلفزيون والجرايد
انا بعد شويه هاجى اعالجك
ابقى هاتيلى لحاف من دول طيب
انتى عارفه
الشتا داخل
متخافيش هبقى ادفعلك فلوسه دوا
للضغط والاعصاب
بس بلاش تجيبى لحاف من بتوع زووم
ولا مزيكا عشان هيكون خليع
وانتى عارفه اخلاقى متسمحليش

سلام مربع
am i kind said…
هههههههههههههههههههههه
طاب انتي دمك اتحرق لما شوفتي الاعلان لازم تحرقي دم اللي ماشافوهوش
بجد انا مش فاهمة ايه اللي بيحصل ده بس يمكن لان كتير اوي مش عندهم وعي ديني ده بيخلي اي حد يستغل كلمة الدين علشان يوصلهم مش عارفة
يللا ربنا يستر
coca said…
القناه دي مستفززززززززززززززه جدا
جدا وللاسف هي بتستغل الناس الغلابه
اللي هما بيمشوا ورا اي حد يقول الدين الدين اخوتي ومفيش اعمال للعقل نهاءي
فكرتيني بنكته خدي اقريها
http://nokatnokat.blogspot.com/2007/09/blog-post_16.html
أسهل حاجة دلوقتي انك تعمل قناة وتجيب ناس افقها لسة موصلسش لباب بيتهم يتكلمو..و يعملو دعاية كمان ودعاية ايه بقى من نوع الموبايل ابو امكانيات رهيبة اللي اهم مميزاته إنه بياصل ويستقبل..استحملي استحملي ماحنا لو ماستحملناش حنموت0
Desert cat said…
صاحب البوابــة
انا قرأت الموضوع فى بلوج حضرتك
للأسف ده استهتار بعقول الناس ليس اكثر
تحياتى
Desert cat said…
رئيس جمهوريه نفسى
ههههههههههههههههههههه
ده انا لو ها اخد حسنات من الرنات هعمل بنصيحتك
اى كارت وافضل ارن ليل نهار
وعادى بقا اسرق وانصب واعمل اللى فى نفسى
ما انا برن وباخد حسنات والحسنات يذهبن السيئات
تحياتى ياباشا
Desert cat said…
الأميره أوسه
اه يا اوختشى دعواتك لاختك ربنا يهيدها وتعمل زيك نغمة موبايلها شعبولا علشان تاخدى بايدها معاكى للطريق الصح
تحياتشى
Desert cat said…
son's egypt
عليكم السلام ورحمة الله وبركاته
اللى بيحصل ده ما اسموش طيبة يا اباشا
ده اسمه اسفاف
استعباط
ضحك على عقول الناس
ورزق الهبل على المجانين زى مبيقولوا
ما هو صاحب العقل يميز
يعنى ايه اصلا لحاف اسلامى دى
يكونش القماش بتاعه من برد الرسول ( ص)
ولا موبايل اسلامى
يكونش اللى بياذن فيه بلال بن رباح
لا حول ولا قوة الا بالله
Desert cat said…
آلام وآمال
حاولت
بس مقدرتش
الاقيش عندك حاجه مهدئة تكسب ثواب
اجلى خلاص قرب
قرب ايه ده انتهى اساسا
منهم لله الناس دى كلها متفقه عليا
Desert cat said…
اسكندراني اوي
ربنا يرحمنا
ويهدى العقول اللى بينضحك عليها
الا هو المال اللى بياخدوه من الناس ده مش مال مسلم برضه
ههههههههههههههههه
Desert cat said…
???? ........??????
اه فعلا افرض اللى اتغطى باللحاف ده واحد مسيحى او يهودى
يبقا حكمه ايه
Desert cat said…
أجزاخانجيه
المشكلة انى مش بقدر امسك نفسى
حتى جربت طريقة انى اعد من 1 - 100 منفعتش
اوصل عند ال99 وتلاقينى خلاص مش قادرة يا ناس
لازم انفجر اعمل اى حاجه
حباية صفا مود ينوبك ثواب ولا ده مش حيجيب نتيجة واحدة ترمادول كدا ومش حقول لحد
Desert cat said…
am i kind
اه واشمعنا انا دمى يتحرق لوحدى يعنى
مش انتوا اخواتى برضه ولازم تساندونى
يا حبيبتى موضوع اللحاف الاسلامى ومش عارف ايه الاسلامى ده امر هين
ده ياما بتحصل مصايب ويقولوا لك اسلامى
منهم لله
Desert cat said…
coca
المشايخ بتوعها بيفكرونى بمشايخ المكروباصات
يفضلوا يصرخوا ويصوتوا
وكل حاجه بنعملها كفر وفسق وفجوووووووور
والله الاسلام عمره ما قال كدا
اشكرك جدا على الضحكة الحلوة
تحياتى
Desert cat said…
أحمد المصري
اه طبعا امكانيات الموبايل رهيبة انت مش واخد بالك ولا ايه
بيرسل ويستقبل نغمات اسلامية قصدهم
لكن الموبيلات التانية بترسل وتستقبل هيفا ونانسى والكلام الفاضى ده
ربنا يرحمنا
تحياتى
اولا انا بشكر زيارتك ليا جدا وانتي نورتيني

وكده اول زيارة ليا الاقي موضوع حلو اوي بس احنا بنعمل كده عشان لو فتحتي بوقك واعرتضتي حتبقى كافرة وبصراحة انا امتنع اني اتكلم فى الموضوع ده لاني لو اتفتحت فيه مش حتقفل وتقريبا ممكن البلوج بتاعك يتقفل مني وانا كمان اعتقل وماااظهرش تاني فخليني مؤدبة ياستي وخلينا كويسين احسن بس اقولك ايه هيا دي مصر ياعبلة

تحياتي ليكي وعلى دماغك الحلوة اوي
oceaneyes said…
الكل دلوقتى بيحاول يكسب بأى طريقة ...سواء عن طريق الدين او غيره

....

مش عارفة اقول ايه بصراحة لان انا نفسى بتضايق من اللى بيتصرفوا بالشكل ده ...بس ربنا يهدى الجميع ...

....
Desert cat said…
كلام من القلب
ميرسى يا قمر على حضورك
واتكلمى مش مهم البلوج تتقفل هعمل غيرها
ولو اعتقلوكى ما تخافيش هبقا ارن لك علشان اطمن عليكى
Desert cat said…
oceaneyes
انا مش معارضة ان الناس تكسب
بس تكسب بطريقة مشروعه
مش يتاجروا باسم الدين
تحياتى
بقى ترنيلي عشان تطمني عليا ؟؟

طيب تصدقي بقى حبلغ عنك من اول قلم وحقولهم اللى بترن عليا دي ياباشا كانت بتحرضني افجر المكان والرنة دي كلمة السر

لا اوعي انا ندلة جدا جربيني ومبدأي فى الحياة عيش ندل تموت مستور هههههههههههه
عزيزتى
شوفى اكيد فى قنوات كتيرة فيها كلام غلط بس ليه بتلومى على القناه وتنسى الناس اللى مش بتشغل عقلها
وكمان يمكن القناه فيها برامج كويسه برضوا ولازم الناس تشغل عقلها
واكيد لو هبوس على كل قناه فى الدنيا هنلاقى فيها اخطاء كتيره
المشكله يا جميل اننا بنتعامل مع كل شئ اسلامى عاوزينه يبقا متكامل لو شيخ قال كلمه غلط نمسكها عليه حتى لو اعتذر لو واحد مربى ذقنه عمل زى الناس غلطات نقول ده مربى ذقنه لو واحده منقبه مشيه مع حد نقول اهوم المنقبات يا جماعه كلنا لينا اخطاءنا وصاحب اللحيه زى اللى من غيرها والمنقبه برضوا بتغلط زى غيرها
بس اكيد النسبة بتختلف من فئه لاخرى
لان فى مهن فيها تنازلات او بغعض التنازلات ومش معقول اخلاق واحد بيصلى كل يوم جماعه زى واحد كل يوم فى خمارة بيسكر اه كلنا بنغلط بس لبسنا وتمسكنا بالدين بيهذب اخلاقنا بعض الشئ
تحياتى موضعاتك جميله قريت بعضها
سلااااااااااام
Desert cat said…
كلام من القلب
اااااااااه
الناس اللى مبدأها كدا دى بتبقا جدعان اوى
وبيبعوا فى اول طريق
وقتها انا برضه مش هسكت يا مرمر
الا قولى لى اخبار ملك ايه
Desert cat said…
احساس لسه حى
هو مش المفروض ان رجل الدين او المنتقبة بيكونوا قدوة لغيرهم
يعنى لو مثلا مديرك فى الشغل ارسلك بلد تانية تمثل فيها الشركة مش وقتها حتتفانى ان شركتك تظهر باحسن مظهر وتتلاشى اى اخطاء وتتغاضى عن اى تصرفات تسيئ ليها
طيب ليها مش بنتعامل كدا مع رب العزة وبعدين ضربت لى نموذج لا يستوى اللى بيصلى باستمرار فى جماعه وشارب الخمر
شارب الخمر لو طلع منه اى تصرف خطأ مهما كان بيبقا عادى ما هو ان طلع العيب من اهل العيب مبيبقاش عيب
انما واحد قدوة يتظاهر بالحياء والورع وتصرفاته تدل على انه انسان منحل ده يبقا اسمه ايه
قناة زى ميلودى ولا الخليجية ولا غيرها لما تعرض حاجات خليعه اسمها قناة اغانى او افلام .. انما قناة دينية تشوه صورة الدين ليه .. بهدف التربح ! ... يبقا تخلع ثياب الدين خالص وميدخلوش الاسلام فى تعاملاتهم .. كذلك المنتقبة او الملتحى اللى بيستخبى ورا دقنه او ورا نقابها لما تلبس نقاب وتلاقيها كل ليلة مع واحد ... ولا عامل دقن ما شاء الله وعلامة صلاة محفورة قد كدا وهو مقضيها نصب ونسوان يبقا دول حكمهم ايه .. يتمحكوا فى الدين ليه ..
تحياتى
osama said…
هههههههههههههههههههههههههه
معاك الف حق وحق...
في كلمة اسمها سبوبة دي بقى تعالى نعمل سبوبه دينية ... نضحك على العالم دي باسم الدين... وبصدق انا الاشياء دي بتستفزني لدرجة ان الواحد بيخاف يتلفظ بالسوء من القول .. لكن اذا حدث فلأني اعد نفسي مظلوما يحق لي ذلك...

استخفاف بالعقول وسذاجة تجد من يصدقها ...
دمت بكل ود...
خالص تحياتي
صديقتي العزيزه قطه الصحراء

ماهو امثال قناه الناس و أقرأ و كل القنوات الدينيه بقت بتتاخذ الدين سبوبه عشان يقبضوا الموظفين بتوعهم فبقم ماشيين علي الموضه القنوات العاديه بتعلن عن اغاني المطربين زي عمروا دياب و محمد فؤاد و حماقي و هما بيعلنوا عن سامي يوسف و المطربين الأسلاميين و اهو كلو بحسابه و حيطلعلنا طبعا لحاف اسلامي و موبيل اسلامي و طلعلنا عروسه اسلاميه
لسه واحده زميلتي كانت رايحه تجيب لبنت قريبتهم عندها 6 سنين هديه بمناسبه عيد ميلادها راحت محل هدايا اطفال عشان تجيبلها عروسه لاقيت فله العروسه الاسلاميه اوكي بيعلموا الاطفال الصغيرين التدين منذ الصغر ال يعني هما فاهمين ماعلينا مش بتكلم عن كده تصدقي حاطين لها من ضمن الحاجات في العلبه عبايه سودا
عبايه سودا يامؤمنه لبنت عندها 6 سنين تلبسها للعروسه
يالا كئابه طب ماتحطوا الوان مفرفشه شويه

شكرا علي الموضوع المميز ياقمر
ههههههههههه
حلوة حكاية لحاف اسلامي دي

بجد جديدة
ههه
صباح الفل
Desert cat said…
osama
ما هو للاسف فى ناس بتصدقها
ما هى بقا قناة تاخذك الى الجنة
والناس ذنوبها كتير ونفسها تدخل الجنة
علشان كدا مقيمين قدام القناة ولازم يصدقوا اى حاجه
تحياتى
Desert cat said…
اجندا حمرا
اه طبعا طبعا يا حبيبتى
علشان البنت تتمسك بالزى الاسلامى وبالعروسة الاسلامية منذ الصغر
طيب سمعتى عن المانيكير الاسلامى
اه والله فى مانيكير اسلامى
بتحطية واول ما تيجى تصلى ولا تعملى حاجه بتضغطى عليه يطلع على طول
بس انا كنت عايزه اسال عن روج اسلامى بس قولت خليها بعدين
اصل وقتى مكانش كفاية
تحياتى يا كميلة
Desert cat said…
غمض عينيك
يا صباح الشكولاته كادبورى
معلشى اصلى بعزها اوووووووى
شوفت ياباشا القنوات دى عملت فينا ايه
ربنا يرحمنا
مانيكيير اسلامي معقوله يااخوتشي؟
و الله اول مره اسمع عنه
و ياما في الجراب ياحاوي
بس ضحكتيني موت علي طريقه شايلانه

اكيد طبعا فيه روج اسلامي بس يكرم ربنا ابقي اسأليلنا عليه
تسلمي ياقمر و الله انتي دماغ
Desert cat said…
اجندا حمرا
ايوال طبعا لازم يكون المانيكير اسلامى امال هيتباع ازاى
ما هو اى حاجه بيضاف ليها كلمة اسلامى بتلاقيها بتتباع بسرعه الريح
ده هيدخلنا الجنة
المرة اللى جاية من عونيا الاتنين
اسالى انا وانتى على الروج الاسلامى
بس بتفضلى انهى درجة ؟
ههههههههههههههههههههه
معقوله هما فاهمين ان ببيع تجارتهم و اضافه كلمه اسلامي عليها و اللي بيشتروها فاكرين انهم حيدخلوا بيها الجنه؟

بصي يااخوتشي اي حاجه تليق علي بشره خمري و انا واثقه في ذوقك بس حاجه ماتتطلعض و لا تكون مضروبه جربيها و النبي يااوختي قبل ماتدفعي اي معامله
هاهاهاهاهاههاها
Desert cat said…
اجندا حمرا
الله اعلم بالنوايا الواحد برضه مش عايز يظلمهم يمكن المانيكير والروج كانوا بيستخدوه زمان
عادى يعنى مش تدققى على كل حاجه
تقريبا احنا لون بشترنا زى بعض
حشوف الدرجة المناسبة واصورها لك على الموبايل الاسلامى
وابعتها لك تقررى ونشترى بقا
تصدقى يا بنتى انتى تتحبى و تدخلى القلب بسرعه
طب مش تستاذنى الاول
Soooo said…
اول ما اتخرجت من الكليه وقبل ماعرف موقفي من التجنيد وكده رحت اتمرن تبع شركة بيع اجهزة كهربائيه .. بس مش خلاطات وتلاجات
لا .. فلاشات ميموري .. الات حاسبه .. والحوار اللي اسمه المصحف الناطق
كان لسه جديد قوي
المهم بعد التمرين والحوارات دي .. لقيت مدير المجموعه بيقوللي انت هتنزل توزع المصحف الناطق
ليه ياعم الحاج؟؟
قاللي عشان انت ملتحي
!!!
مع اني ولا مربي دقني تدين ولا بتاع ومربيها خنفسه خالص .. بالعكس بقى .. ساعتها استغفر الله العظيم ماكنتش باصلي من اصله ولما يدونا راحة للصلاه كنت اقعد في الكافتيريا اديها شاي في قهوة وهكذا والكل كان عارف كده لاني كنت الوحيد اللي مابيصليش ساعتها .. ومدير المجموعه عارف كده كويس

طبعا اخوكي ولا عرف يعمل حاجه بالجهاز ده لان اصلا سعره كان نازل غالي قوي .. وبتمنه كان الواحد ممكن يجبله مقرئ من بتوع الترب يقعد معاه لغاية مايحفظه المصحف كامل
وكمان بعدها بكام يوم رحت كشف الجيش ونفضت لليله كلها

فهمتي حاجه من اللي قلته؟؟؟؟
Desert cat said…
Soooo
مش مهم انك بتصلى مش مهم انك بتصوم مش مهم انك متمسك بتعاليم الاسلام وبطبقها .. المهم المنظر عامل دقن حتى لو خنفسه بس الناس البسيطة حتفتكرها لحيسة وبمجرد وتروح لهم فى ايدك المصحف القيم حيقتنعوا حتى من غير ما تتكلم
مش قالك البس جلابية مينى وتحتها منطلون
البلد دي شخصيتها اقوى من فرض اي
اتجاه عليها حتى و لو كان اتجاها دينيا

و لسة يا ما نشوف

ممكن لو عايزة تتجنني اكتر تقري عندي
عن حاجة تجنن خالص
في تدوينة بعنوان اخبار خفيفة
على فكرة انا عرفت البلوج بتاعك عن طريق واحد مصري هو اللي نصحني اقراه و ماندمتش على قرايته
حظ سعيد و بانتظار تدوينات اخرى مدوية
Desert cat said…
ملك الكبدة
هو لسه ايه فى البلد ميجننش
بيضحكوا على عقول الغلابة
والغريب انك تلاقى ناس بتصدق اساسا
تحياتى لحضرتك ولواحد مصرى
اشكركوا جدا
وحدخل حاضر اشوف التدوينة

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز