أشتاتاً ..... أشتوت

موبايلى بيرن الساعه السابعة صباحاً ده ايه القلق ده مش عايزه ارد كل شوية اكنسل ونفس الرقم بيرن رنات كتير ورا بعضها المهم قولت خير اشوف فى ايه ... لاقيت صديقتى الانتيخ اللى موديانى فى داهيه دايما انزلى لى حالا انا بتكلم من الشارع ... شارع ايه ده يابنتى والساعه اصلا لسه سبعه هو السيد الوالد طردك من البيت ولا حاجه ... لاقيتها بتقولى تعالى بس ولما تيجى حتفهمى فى ايه بس والنبى ما تتاخرى عليا انا بقولك فى الشارع ... قولت امرى الى الله ... هو اللى عنده اصحاب امثالكو بيعرف يستريح ... لبست ونزلت وصلت عندها لسه بقولها خير فى ايه ... توكتوك معدى لاقيتها بتشاور له ومدخلانى فيه بسرعه البرق ويلا بينا يا اسطى مش عارفه على مكان فين كدا .. ايه ده يا بنتى انتى خطفانى ولا ايه .. طيب فهمينى بس فى ايه ... لاقيتها بتقولى انها كانت فى زيارة لناس قرايبها بالليل ونسيت عندهم حاجات غالية فمن الاخر خافت تتقلب ولازم تروح بدرى قبل ما اولادهم يصحوا من النوم علشان مش حد ياخد حاجه وينزل ... قولت لها يا حلاوة ما زمانك اتقلبتى اصلا او افتكروكى واخدها لهم هدية ووزعوها على بعض .. قالت لى دى حاجه خاصة اصلا مش ينفع غير كدا دى حاجه بنتهم كانت عايزه تشوفها علشان تشترى زيها وهى اخدتها معاها علشان تشوفها ... المهم فضلنا ماشيين وبلاد تشيلنا وبلاد تحطنا وفجأة لاقيت نفسى ماشية وسط اراضى زراعية ... والتوكتوك قالنا انا مش اعرف امشى اكتر من كدا اخركو هنا .. امرنا لله ونزلنا ... ايه يا بنتى لسه البيت ده بعيد تقولى خمس دقايق بالظبط والخمس دقايق دخلوا فى نص ساعه كل ده وانا ماشية فى وسط اراضى واشجار عاليه جنب بعضها وكل شوية اتلفت حواليا خايفه بصراحة من هول المنظر شوية وظهرت بيوت ارتفعاها حوالى 50 سم المهم فى الاخر وصلنا وقعدنا نستريح شوية من المشوار والحمد لله لاقينا حاجتها قبل ما تتقلب واخدت الشنطة فى حضنها ولا الام اللى ابنها ضايع منها من عشرين سنة ... واحنا قاعدين بقا فجأة الباب بيخبط اصحاب البيت فتحوا واتفاجأ بدخول شابه بتلعب فى التسعين كدا محنية الظهر ووشها كله تجاعيد وحالتها اخر فبريكة ... من الاخر لو حد قالها بخ فى الضلمة يبقا عليه العوض ... لابسه جلابية بيضة بتاعه راجل وطاقية صوف برضه بيضه برضه بتاعه راجل احنا قعدنا متنحين فى وشها وهى تبص لنا اوى فى الاخر قالت انتوا مش من البلد صح .. قولنا باذبهلال هاه .. اه صح هو شكلنا غريب اوى كدا ولا ايه ... ردت بنت قريبة صحبتى قالت لاء علشان بس لبسكو مختلف ولهجة الكلام كمان مختلفة .. راحت الست الحيزبون قالت لها لالالالالا انا اصلا قبل ما ادخل كنت عارفه انى ها اجى هنا الاقى ناس اغراب ... ولما دخلت لاقيتهم اتسحبت من لسانى وبقولها هو حضرتك يا طنط لابسه كدا ليه ولا ده سلو بلدكو ... لاقيتها بتقولى لالالا ده اللبس ده انا مأمورة بيه والشيخ اللى عليا اسمه الشيخ حسن .. انا حسيت بالهطل مأمورة ايه ومين الشيخ حسن ده .. لاقيتها عملت لى شغل الهبل بتاع الافلام وسامحها والنبى يا شيخ حسن غلبانه متقصدش ... فبسال البنت قريبة صحبتى بقولها هو فى ايه .. قالت لى الست دى اصلا دجالة وامى راحت جابتها اصل انا وخطيبى على طول فى خلافات ومش طيقاه فالناس قالوا لها انى معمولى عمل والست دى هى اللى هتعرف مين اللى عمله وهتفكه .. بصيت لها باستغراب ده ايه شغل الافلام ده هو لسه فى ناس بالجهل ده ..

راحت البنت زعلت منى ... بصيت لاقيت عبير صحبتى بتقولى عيب كدا وبعدين انتى مش شايفه احنا قاعدين فين كمان خديهم على قد عقلهم واسكتى ... المهم طلبت معايا اقعد للاخر واشوف ايه اللى حيحصل ... والاقى الست اللى راكبها عفريت الشيخ حسن دى .. شوية عمال تكلم فى نفسها وشوية تهزر مع نفسها وشوية تانية تزعق .. دى بدأت تزعق من هنا وانا قولت بس حيركبنى عفاريت ولاقيت نفسى واقفه اقولهم انا عايزه اروووووووووح ... حد يودينى عند ماما حااااااااالا ... عبير والبنت قريبتها قعدوا يقولوا لى مفيش حاجه يا بنتى اهدى بس المهم ببص لاقيت الست عمال تهزر برضه مع حد مجهول وتتكلم كلام مش مفهوم وفجأة قالت للبنت انتى حد قريبك عملك العمل هما كانوا عايزينك لابنهم واتقدموا لك وانتى رفضيته .. البنت قالت لها محصلش اصل محدش قريبنا اتقدم لى قالت لها .. يعنى حتكدبى الشيخ حسن طب استنى كدا ... راحت قعدت تكلم فى نفسها شوية وقالت لها بقا بصوت عالى نظام خدوهم بالصوت ليغلبوكو ... لاء انتى كان فى حد من قرايبك عايز يتجوزك ولما اتخطبتى عملك العمل علشان عايزين يفرقكوا بينك وبين خطيبك .. ومش شرط كان متقدم تلاقيه كان مستنى شوية لما يكون نفسه ولا حاجه .. انا فى سرى أه يا بنت الكدابة مش كان من شوية صغيرين قولتى اتقدم وانطرد طردة الكلاب ... المهم انا قولت مش افوت اللحظة التاريخية دى واصور بقا الست دى وانقل الاحداث صوت وصورة وطلعت فعلا الموبايل ولسه بصور والاقى الست الحيزبون انقلبت حد فاكر منظر جدة محمد هنيدى فى فيلم وش اجرام لما كانت بتقوله خالتك فوزية ماتت ... اهو المشهد ده نط فى بالى على طول اول ما الست الحيزبون دى لاقيتها بتقولى سايقه عليكى حبيبك النبى ما تصورى انتى عايزه تودينى فى داهيه ... قولت لها والله يا طنط ما حوديكى فى داهيه انا مجرد مواطنة عادية ماليش دعوة باخواتنا البعده بس انا عايزه الصور دى للذكرى مش اكتر طب والنبى ما تصورى حد يشيل الصور دى ... البت دى هاتسجنى النهادره يا ستى مش تخافى وبعدين عفاريتك ما هى تقدر تأذينى لو عملت حاجه زى كدا ده غير كمان انهم ممكن يقولوا لك انا هعمل ايه بالصور دى ... لاقيت ولد قريب عبير بيقولى طيب لو سمحتى بس احذفى الصور دى قولت له ماشى وحذفتها مش صدقونى .. اديت له الموبايل علشان يتاكد فضلوا يلفووا الموبايل على بعض وهما اساسا مش فاهمين فيه حاجه فكان اللى يحذف لى صور انا محتفظة بيها لحد من صحابى او قرايبى واللى يحذف لى اغانى المهم فى النهاية ببص فى الموبايل والاقى كارت الميمورى ابيض ...اخدت الموبايل وصحبتى من ايديها وكان لازم نخرج من هنا .. مش خايفة من الست لانى عارفه انه فى الاخر تخاريف ... بس ازاى لسه فى عقول اساسا بتفكر بالشكل ده وبعدين دى عمال بتاقض نفسها وهى قاعدة شوية كان واحد متقدم للبنت وشوية تانية كان لسه بيكون نفسه ... ووقت لما فكرت اصورها .. ايه خوفها اساسا من الصور حتى لو حبلغ عنها مش المفروض ان عفاريتها هتحميها ... وازاى الناس اللى بتروح تجيبها من بيتها دى بتصدق .... استغفر الله العظيم يارب
كانت معكم قطة الصحراء من قلب الحدث العفاريتى

تعليقات

دا فيه افظع وانيل من كده
دا لسه بقى لما تطلب رجل نمله عزباء
وضوفر صورصار هندي
وريش ديك اسود مخطط

ههههههههههههههههههههههه

الناس دي اللي بيدجل واللي بيدجل عليه موجودين وبكثره للاسف الشديد

ربنا يهدي العاصي ويعقل المجانين

حييييييييييييييييييييييي
‏قال shahy
يا قلبك كنتي عاوزة تصوريها
يابنتي في الظروف اللي زي دي تجري على طول

بس فعلا في حاجات افظع من كدة وللأسف الجهل بتاع الناس الغلابة هو اللي بيدي فرصة للدجالين

جهل اية دة في ناس متعلمة بتعتقد في الحاجات دي جامد قوي

ربنا يرحمنا
Dear ....R U from hehia Or Abu Kabeer...as U use ( mesh ) so much...any way ya baladyaty..
U remind my that I allwayes said...that Our big problem that ..we Follow our tradition ( including all social types..)and heratage more than Our religion...
so ...U have lived the Experience..
thx 4 ur nice Description...
جامده اوي الحكايه دي
حسسيتني اني باتفرج على فيلم من التمانينات
بس كويس انها قلبت فار لما جيتي تصوريها
كان ممكن تقلبك قرد او سحليه
الحمد لله ربنا ستر
وده كان درس يعلمنا اننا مانقبلش ا حد من اصحابنا على غيار الريق
سامحوها يا سيادنا
حيييييييييييييييييييي
‏قال زى الهوا
ههههههههههههههههههههههههه ايه اليوم الغريب دا , ربنا يهدى الجميع , بس يوم جامد اوى توكتوك وعفاريت واشجار
‏قال أميرة
ههههههههههه

والله بوست زى العسل

وصدفة احلى واحلى

اليوم بيبان من اوله بس روحتوا ازاى يابنتى

انا قلت هيجرالك حاجة فى رحلة العودة

ربنا يهدى الجميع التخلف لازال موجودا لا مفر
مأساة بمعنى الكلمة
----------

بس على فكرة انا كنت فاكر في اول الحكاية انكم هتلاقو شنطة صاحبتك فيها عفريت
أأأ
أصدي فيها فيل
ههههههههههه
والله ياخسارة صورك اللي ضاعت من ع الموبايل

يلا معلش بقي

منه لله اللي كان السبب

بس يلا .. أهو يوم ظريف

وأديكي شوفتي حاجة جديدة برضو

وربنا يشفي

تحياتي
‏قال غير معرف…
ياستى متظلميش الست فى التناقض اعتبريه امتحان واختيار من متعدد لو منفعش الاختيار الاول يبقى على الاختيار التاتنى عدل
على فكره حسن ابوعلى سرق المعزه ميكنش الشيخ حسن الى عليها حرامى معيز وخايفه يكون حد مبلغ القسم فخافت من الصور
نصيحه لوجه الله قبل متنامى ااقفلى الموبيل واشترى دماغك
‏قال خيرالدين
العوده للموضوع ده انتشرت اليومين دول

وزادت عن حدها

الناس بتتقدم واحنا بنتهطل
‏قال 3abdo me7tas
لا حول ولا قوة الا بالله
والله يا بنتى فى أول البوست انا مش عارف ايه خلاكى تروحى المشوار ده انا قلت والله ان صحبتك دى هتخطفك وتطلب فدية
معقولة انتو اتنين بنات تمشو فى أراضى زراعية لوحدكم انتو مش بتخافو ولا ايه ولا انتو مش بتشوفو كل يوم خبر أسوء من التانى
خلى بالك من نفسك شوية
اما بقى بالنسبة للشابة اللى عندها 90 سنه لان باين بعد ما انتى شوفتيها اتخيلتى ان سن الشباب بيتضارب من بين 70 الى 90 سنه يعنى فبقولك
انا ما عفريت الا الانسان اه فيه جن وكل حاجه بس الانسان اللى ايمانه بالله قوى صدقينى مش يخاف من اى حاجه
اتقربى من ربك
ومتخفيش
نصيحة منى
خلى بالك من نفسك وبلاش الأماكن البعيدة دى
أخوكى أبو المحاتيس
‏قال rainbow
انا مش صعبان عليا غير الصور اللى طارت من كارت الميمورى .. وبعدين مش كنتى تديها فرصة يا بنتى تعملهم عليكى اطول من كده ولو من باب الفضول ؟ احمدى ربنا انها جت لحد كده وما ترديش على تليفونات بدرى اوى ولا متأخر اوى اقولك اخلصى من العدة دى اساسا اكيد الشيخ حسن سابلك عليها هدية ! تحياتى لمغامراتك المجنونة
هدى
‏قال Desert cat
اسكندراني اوي
طيب الحمد لله اننا وقعنا فى عفريت على قد حاله مش بيطلب الحاجات دى
او يمكن كان لسه حيطلب بس انا اللى اتسرعت وصورت
تحياتى
‏قال Desert cat
shahy
اااااااااااه يا شاهى لو شوفتى اللى شوفته
ربنا ما يوريكى
الحمد لله انها جت على قد كدا
‏قال Desert cat
a Dreamer with feet on the Floor
يادى مش اللى فضحانى فى كل مكان
كل لما اخد قرار بينى وبين نفسى مش اقولها
مش اعرف اكتب الكلمة من غيرها او بتلخبط فى حروفها
على العموم انا مش من هيها او ابو كبير
انا من فاقوس انجلوس .. تسمع عنها ؟
‏قال Desert cat
ولــــــــــو
ههههههههههههه
تقلبنى ايه وهى كانت هتعيط لى لما جيت اصورها افتكرتنى هبلغ عنها
بالنسبة لصحبتى انا اصلا اتخضيت لما لاقيتها بتكلمنى بدرى كدا وبتقولى فى الشارع
افتكرت بيتهم وقع ولا حاجه قولت اروح انقذها من الضياع واجيبها بيتنا ساعتين على ما يتصرفوا فى حتة تأويهم
‏قال Desert cat
زى الهوا
تصدقينى يا حبيبتى لو قولت لك انى رجعت من المشوار ده مش مصدقة ان انا اللى شوفت الحاجات دى كلها والله كل لما اكلم حد احكى له الموضوع واقوله انا حاسه اصلا انى كنت بحلم لاء ده كان كابوس بس لحمد لله انزاااااااااااااح
‏قال Desert cat
أميرة ويلز
روحنا عادى
فضلنا ماشيين فى الاراضى الزرايعة من مكان ما جينا واول عربيه قابلتنا شاورت لها قولت لصحبتى هركب فى اى حاجه تودينى بيتنا حتى لو جمل
‏قال Desert cat
آلام وآمال
هههههههه
شنطة صحبتى كانت فيها حاجت والله بعد ما شوفتها لما رجعنا لاقيت نفسى بقولها احنا كدا عرفنا بعض بما فيه الكفاية
انا شايفه انه كفاية اوى كدا وكل واحد يروح لحاله
لاقيته بتقولى محسسانى اننا متجوزين وبتقولى لى انتى طالق ما تروحى يا حبيبتى ولا تيجى وانا مالى
مسكت اعصابى بالعافيه وسبتها ومشيت بدل ما كنت ارتكب جريمة
‏قال Desert cat
آلام وآمال
هههههههه
شنطة صحبتى كانت فيها حاجت والله بعد ما شوفتها لما رجعنا لاقيت نفسى بقولها احنا كدا عرفنا بعض بما فيه الكفاية
انا شايفه انه كفاية اوى كدا وكل واحد يروح لحاله
لاقيته بتقولى محسسانى اننا متجوزين وبتقولى لى انتى طالق ما تروحى يا حبيبتى ولا تيجى وانا مالى
مسكت اعصابى بالعافيه وسبتها ومشيت بدل ما كنت ارتكب جريمة
‏قال Desert cat
القلم السكندري
ده كان يوم متعفرت مش ظريف
بالنسبة للصور خلاص بقا هعمل ايه
امر ربنا عليه اعلوض ومنه العوض
اعااااااااااااا
‏قال Desert cat
رئيس جمهوريه نفسى
ممكن تكون هى نفسها حرامية والله اعلم
امال خافت ليه يعنى
بالنسبة للموبايل انا حبيعه واريح نفسى
‏قال Desert cat
e7na
تعرف الغريب ايه انى مرة قريت فى اخبار الحوادث عن بنات فى مراحل جامعية بيعتمدوا فى امتحانتهم على الهبل ده وقال ايه الدجال هو اللى حيجيب لها الامتحان وهو اللى حيخلى زميلها اللى بتحبه يروح يتجوزها لو عرفى حتى مش مهم المهم انها تجيب رجليه وخلاص
حاجه تقرف
ربنا يهديهم
‏قال Desert cat
3abdo me7tas
اساسا انا حكيت الاحداث بالظبط
صحبتى بتصحينى بدرى وبتقولى فى اشلارع انا قلقلت احسن يكون فى حاجه لاقدر الله
ومش عرفتنى احنا رايحين فين الا فى نص الطريق
ولما شوفت المكان مش معقول حسيبها لوحدها الحمد لله على كل حال ربنا ستر
‏قال Desert cat
rainbow
اااااااه مش تفكرينى بالصور يا هدى
طبعا فيهم صور علشان اجيبها تانى مش قدامى غير انى استنى للصيف الجاى ربنا يحيينا وييحيكى
وبالنسبة للموبايل انا قررت اتنازل عنه خالص
طيب تعرفى أن الست البركه دى سرها باتع
أنا من كام سنه كده أتسرق منى عقد
أيوه عقد فل كنت شارياه فى أشارة مرور المهم دورت يمين وشمال
فص ملح وداب
المهم حالتى أنشراح قالتلى بصى يا أوسه
الحل أننا ننزل حالآ الشرقيه
فى واحده هناك بتعرف
روحنا قابلناها
كانت لابسه نفس اللبس
المهم بصتلى كده وقالتلى
العقد بتاعك ده دهب
بصراحه من الخوف قولتلها أيون دهب
قالتلى خلاص مش تخافى
روحى والعقد هايرجعلك
بعد خمس أيام
أو خمس شهور
أو خمس سنين
المهم فات من الخمس سنين
كااام
أيوه سنتين ونص
اول ما الخمس سنين يكملوا
هاجى أقولك أيه اللى حصل
أنبى لو شفتيها
تسأليها هو فاضل كتير
بركه الست دى
‏قال محمد مارو
اختى قطه الصحراء
بلدنا مش نافعه غير فى ده التخاريف والدجل و الشعوزه لسه بيفكروا بطريقه حجر الفلاسفه
اللى ممكن يحولوا التراب دهب و اللى ممكن يلبسوا طاقيه الاخفاء
قشطه
احنا طلعنا بلديات
احنا اصلنا من قريه بين ابو كبير وفاقوس اسمها الغابه
تعرفيها
على فكره كل الشرقاويه عندهم مش دي يعني عادي انا تأقلمت عليها
‏قال الأستاذ
بسم الله
البوست طويل آه لكن الواحد مكانش يقدر يسيبه ويقوم لازم يعرف أيه اللي هيحصل في الأخر
وأصلاً البداية كانت بسبب خطيب صاحبتك اللي هي مخنوقة منه باين؟
طب م تسيبه إيه المشكلة؟
فكرة إنتي بقى مسرحية عفروتو لما كان بيقول يروحوا للدجالين ويقولوله مش طايقة جوزي .. طب م تطلقيه
م أكيد طالما لجأوا للناس دي هيقولولهم ده عمل والكلام ده
السحر موجود آه بس مش أي حد يقدر يعمله ومش أي حد يقدر يفكه
المواضيع دي كلها فيها كلام

وكمان ممكن يكون لما الواد ده خد منك الموبايل تكون العفاريت هي اللي فضت الميموري أو نقلوا حاجة على بلوتوثهم مثلاً !!؟؟؟
تحياتي لعفاريتك
‏قال Desert cat
الأميره أوسه
اممممممممم
بقا انتى جيتى الشرقية
لو كنتى جيتى كانت الست دى قالت لى وانا هناك
اصلها البوى فريند بتاعتى
وكمان قولتى لها عقد دهب انتى قولتى العافريت هتحوولك الفل لدهب بس العفاريت اصلا مش بيحولا بسرعه كدا
ده انتى قدامك ولا خمستلاف سنة
‏قال Desert cat
محمد مارو
الغريب اصلا يا محمد ان الناس بتصدق وممكن تلاقى ناس متعلمة بتعمل كدا
ربنا الهادى
‏قال Desert cat
ولــــــــــو
قشطات ياباشا
طبعا عارفه الغابة والعرين
الا شومعنا معملتوش بلد وسمييتوها اسد
وعارفه الفدادنة كمان شوفت بقا انا شطورة ازاى حافظة الطريق كله
ده ان يا ما اطلعت عينى يابنى فى الطرق دى لما حفظت البيوت من البلاد اللى على الطرق بس اصلى كنت مقضياها القاهره رايح جاى
‏قال Desert cat
الأستاذ
يعنى تفتكر ان موبايلى دلوقتى متعرفت
يعنى انتظر المارد يطلع يقولى شوبيك لوبيك
ولا الاقى حد بيتصل بالليل يقولى معاكى عفريت من عاصمة جهنم
ربنا يستر
‏قال truelove
ضعف الايمان وقلة الثقة بالله تعمل اكتر من كده يابنتي ربنا يهدي ويقوي الايمان ويعنا يارب
‏قال Desert cat
truelove
اللهم امين
ربنا يهدى الناس دى ويثبتها على الطريق المستقيم ويهدينا
موضوع هايل هايل هايل
ايه ده؟
مكنتش اعرف ان عندك الموهبة العالية دى فى الكتابة انتى بجد طريقتك دى تجنن شبه الافلام البوليسية
بصراحة ده موقف نكته ..وبجد هتبقى عندك ذكريات جميلة
بس انا لفت نظرى حاجة
انك صحيتى الساعة 7 ونزلتى على طول
انا لو ابويا صحانى 7 ..ده لو هو نفسه صحى 7 وقلى انزل هقول لأمى وتخلى نهاره مش هيعدى
بالنسبة للخرافات والدجل
دى ارزاق يا بنتى ورزق الهبل على المجانين
ده التعليق الوحيد اللى يليق بالموقف العظيم ده
‏قال Desert cat
الباحث عن الحقيقة
اشكرك جدا
وهى من ناحية ذكرى فهى هتكون ذكرى زى ذكرى ابو رجل مسلوخة كدا وبعدين انا اللى نزلنى من البيت الساعه 7 انا قلقت اصلا عليها خوفت احسن يكون فى حاجه لا قدر الله
فمكانش ينفع خالص اعمل حاجه غير انى اروح اشوف فى ايه
تحياتى
‏قال Soooo
واحد صاحبي من الارياف بيحكيلي ان في قطعة ارض قد نص فدان مثلا اتحرق المحصول بالزريبه بالبهايم اللي فيها
والبوليس والحكومه ماعرفوش ايه السبب
قام صاحب الارض دي جاب واحد من العالم بتوع الاشتات والشلاتيت دي
اول حاجه قالهالهم

الارض دي بتاعة ملك الجان
وعايزها في التو والزمان

ولو ماحصلش المراد
هيسخطكو حالا جراد

وبيؤمرني اني اقول
وافقو وخليكو كووول


اللهم احفظنا ..
بركاتك يا شيخ حسن زعبله ..
ماشي بيتسلى ..
محندق الزاكته ..
منتعايق بالفله
‏قال Desert cat
Soooo
زى بنت برضه باباها كان مقاول واتسرق الخشب اللى عاملينه حوالين العمارة وهى لسه بتتبنى المهم محدش عرف مين اللى سرقه راحوا لواحد من الاشخاص دى وقالهم اللى سرقوا حد من وسطكو وواكل وشارب عندكو قوم فضلوا يفكروا مين مين راحوا قالوا مرات ابنهم وخلوا ابنهم يطلقها ناس اذكياء اذكياء يعنى والدجال ابن العبيطة عرف يضحك عليهم ويخرب بيت الواد ابنهم
‏قال Desert cat
العيب مش على الدجالين العيب على العالم اللى بيصدقوهم
‏قال Lapa
قمة عالمية البرتغا الكاتب cristovao دي اغيار.

وهو ، أيضا ، وترجمت الى اللغة البرتغاليه ثروه الامم من آدم سميث.

وقد منح العديد من الجوائز.

لا تنسوا اسم هذا الكاتب العظيم ، يمكنك الاستماع اليه قريبا.

اشكركم على انفاق الوقت في الثقافة العالمية.

شكرا للزيارة
‏قال أجزاخانجيه
يااه دانا بحب الجو ده قوى
والجن والعفاريت موجودين فعلاً
وفى ناس معينه هيا اللى بس تعرف تتواصل معاهم
بصراحه انا اهم حاجه عندى دلوقتى
اعرف الشنطه دى كان فيها ايه
علشان انا كنت عاوزه اشترى نفس الحاجه باردو
ايه الرعب ده
منى منك كنت هخدها جرى لحد البيت مش مجرد منظرها ده

المشكله ان فيه ناس لحد دالوقتى بتصدق

يلا ربنا يهدي ويحمى الجميع

حمد الله على السلامه
‏قال Desert cat
Lapa
اوكى حنبقا نشوف الموضوع حاضر ومبرك على الجوايز
‏قال Desert cat
أجزاخانجيه
جو ايه يا دكترة اللى بتحبيه العفاريت يا ماااااااااااااامى كنتى تعالى شوفى وانتى تكرهيه واحده قاعده بتكلم فى نفسها وبتضحك وبتزعق وحوارات غريبة ما علينا الشنطة كان فيها
اممممممم
حبقا اقولك بينى وبينك فى السكرتة اصل لما تعرفى حتتعاطفى معايا وتيجى انتى تقتلى لى عبير
‏قال Desert cat
حياة الأحلام
ما هو بالرغم من انى كنت مرعوبة من الجو ده بس الفضول قتل القطة تعملى ايه بس
ربنا يهدى الجميع
قطه الصحراء انتى من الشرقيه؟ دا احنا جيران انا من ابو حماد فى الشرقيه
كويس اوووى بس البلوج بتاعك جميل جدا جدا جدا بجت وبزات البوست ده بجد ممكن يكون فى ناس بالجهل ده يصدقوا خرافات زى دى وميكنش عندهم عقل انهم يميزوا الكداب من الى مش كداب؟ وتلاقى الواحد او الواحد منهم عمله نفسها معلمه وهيه بتتسك على افاها من وراها
ههههههههههههه والله عجب
‏قال Desert cat
البنت الشقيه
لينا طبعا انا اتعرفت عليكى بس انتى مش عارفه
طيب ابقى حتى اسالى نرمو كدا
الشراقوة منورين النت والبلوج سبوت
ودايما منورين فى كل مكان وخصوصا لينا
المهم حمد الله على سلامتك يا جميل يارب تكونى استمتعتى بالعيد وبالاجازة السعيدة
بالنسبة بقا للدجالين دول فالحق مش عليهم
الحق على الجهله اللى بيصدقوهم وبيثقوا فيهم
‏قال david santos
Good posting, thank you.

North-American terrorism killed yesterday more 19 innocent Iraqis. 8 children, 7 women and 4 men. They all were at its house to be dedormir. North-American terrorism continues to kill out of the innocent ones. The honest world and exempted EC what will finish with North-American terrorism. David Santos
‏قال (green eyes)
ولسه ياما هنشوف
اسلوبك في وصف اللي حصلك حلو اوي .. وعلى فكره انا عارفة هي ليه خافت انك تصوريها
هتقوليلي ليه؟؟
هقولك طبعا هي خافت ان اللي يشوف الصورة يحسدها ....هتقوليلي على ايه ؟؟؟ هقولك من جمالها طبعا
مش شابة وفي عز شبابها
هههههههههه
‏قال Desert cat
david santos
Thank you very David
God have mercy on the martyrs and innocent
‏قال Desert cat
(green eyes) said
ههههههههههه
عندك حق تصدقى
او ممكن تكون خافت احسن الستات والبنات يقلدوها فى اللبس وهى اصلا عندها انفراد فى الموضة
‏قال bastokka طهقانة
تعرفي عنوان الست دي؟
هههههههه
تعرفي الناس في مصر بتصرف ملايين على الدجل و الشعوذة

يا ساتر يا رب

اوروفوار
‏قال Desert cat
bastokka طهقانة
عايزه العنوان
حااااااااااااالا اجيبه لك
اعلان مجلة روتانا عامل لنا فضايح على الفضائيات
المصريين مش عارفه بيصرفوا عشر الاف دولار على الشعوذة
وبيقولوا الناس مش لاقيه تاكل
امال لاقيين يشعوذوا
اورفوار برضه

المشاركات الشائعة