تااااااااج بقمر الدين والمكسرات ..


التاج التانى واوعى اوعى تغمض عينيك
ده مش اعلان لروتانا
لاء خالص
اصل التاج ده من عند محمد سمير مدونة غمض عينيك
وندوس انتر
ونبتدى الاجابات
لو قالولك اختار عصر من عصور مصرعلشان تعيش فيه تختار اى ‏عصر و فى عهد اى حاكم .. واشمعنى؟
انا اختار عهد جمال عبدالناصر اصلى بحس ان العهد ده الناس عندها نخوة وشهامة وكرامتها بتنقح عليها اوى اوى كدا
اول ‏اولويه فى حياتك عيلتك ولا شغلك ولا اصحابك؟
وده سؤال برضه يمه طبعا رحاب
طبعا طبعا عيلتى
ايه اكتر ‏حاجه بتحبها فى رمضان؟
لمتنا كلنا فى وقت واحد وهو وقت الفطار اصلنا فى الايام العادية مش بنشوف بعض الا بالصدفة ولو حد فينا محتاج التانى اوى يبقا يحدد معاد سابق قبلها

اوصف ليا ‏اجمل فطار ممكن تفطره
وانا مع صحباتى .. الاربع جمعات فى ايام الشهر الكريم بيكون كل جمعه واحده عازمة الباقيين الحوار ده بنعمله من زمااااااااان بس بجد بتكون لحظات جميلة جدا ربنا يديم بينا الود ياااارب
لو انت ‏حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم ‏عادل؟
انا حسيب التقييم للشعب بقا اصل انا مش هعرف اقيم نفسى
واللى ممكن اعمله هغير فى الحاشية اللى حواليا باستمرار مش حسيبهم متبتين لتحقيق اغراضهم ومصالحهم الشخصية
وهحط فى كل ميدان عام وشارع لا للظلم لا للقهر لا للاستعباد انت فى ايدى امينة اتصل يصلك مندوبنا
اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
اولا لو الحاكم نفسه ضعيفه وموجود من اجل تحقيق اغراض وزيادة حساباته فى بنوك سويسرا وتحقيق مستقبل افضل لاحفاد احفاد احفاد احفاده يبقا هو نفسه محتاج تغيير ثانيا الحاشية ثالثا الشعب اللى بيتهان وينداس عليه وهو حاطط فى بؤه واللامؤاخذه
مين ‏أكتر اعلامي مصري بتحترمه؟
حمدى قنديل الراجل ده باحترمه من وانا فى 3 اعدادى لحد النهارده
قريت ديوان عمر مصطفى صاحب بلوج تجربه " اسباب وجيهه للفرح" ‏عن دار ملامح و لا لسه ؟؟
بصراحة لاء بس نقراه يعنى ورانا ايه
لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
مديرة شركة طيران
ايه تانى بلد تتمنى تعيش فيها بعد ‏مصر؟
لندن
اوصف ليا ‏ترتيبات اجمل فرح ممكن تحضره
اللى احس ان فى ناس فرحانه علشان حبابيهم بيتجوزوا مش اللى رايحة تبص على فستان العروسة ولا اللى رايحة تدور على عريس ولا اللى رايحة تقول فلانه اتجوزت والتانية اطلقت
نفسى يبقا الفرح كله حب وجو رومانسى وطول الفرح نرقص سلوووو
بتراعي ‏كلام الناس والقيل والقال؟ لو اه او لو لا قول لى ‏ليه؟
ردى يتلخص فى الآتى
يابن ادم لا تنظر لعورة امرئ فاللناس السن وعيون
واللى يدور على عيوبه ينشغل عن عيوب غيره
طالما مش بغضب ربنا وبينى وبينه عمار
الناس دى ولا مؤاخذه يعنى فى كعب الشوز بتاعى
صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
هكون عادى يعنى لو كل الناس بقت زى اصل لو هما معايا انا لوحدى هكلم مين ولا هيبقا فايدتهم ايه
انما اتسحبوا منى لوحدى ده انا اعمل جريمة واعمل محضر فى القسم واتهم البيت كله انهم سرقونى
السعاده ‏هى؟
رضا الله ثم رضا والدتى
عندك أمل ‏؟؟ أسبابك ؟
الحمد لله الامل موجود
واسبابى علشان احساسى ان الناس اللى بتحبنى اكتر كتييييير من اللى بتكرهنى
امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
لما تحمل مسؤلية اكبر منى بس بحاول على قد ما اقدر اكون قدها علشان ما اخذلش اللى حملها لى
لما ‏بتعمل عمل خيرى بيكون ايه هو دافعك الاول؟
طبعا رضا الله ثم احساسى باسعاد انسان
بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه
لاء مش بشرب بصراحة
ولو شوفت ست بتشرب سجاير
عادى دى حريتها الشخصية يعنى حاجه تخصها لوحدها تشرب سجاير تشرب ويسكى انا مالى

مفيش حد بيحاسب مكان حد تانى
بتعرف ‏ايدك اليمين من الشمال ازاي؟
بتخيل نفسى بكتب اى حاجه
ايه اكتر ‏اله موسيقيه بتحبها ؟ ؟
البيانو
فى رأيك ليه الذوق والنخوه ‏اتعدموا؟
علشان الضمير انعدم والادب والاخلاق انعدمو والتعليم فشل والصحة اتدمرت
اشمعنا الذوق والنخوة اللى حيفضلوا
ما كل حاجه راحت خلاص
ايه ‏الحاجه اللى لو حصلتلك تبقى سعيد قوى؟؟؟
احقق حلم حياتى
تختار ‏يبقى عندك...ارض زراعيه ولا اجنس عربيات و لا كام عماره و لا فلوس فى ‏البنك؟؟؟؟
اجنس عربيات
البحر و ‏لا النيل؟؟؟
النيل
مركب و ‏لا طياره؟؟
مركب
مجنون و لا ‏عاقل؟؟
حسب الحالة المزاجية
تقرأ ‏كتاب و لا تتفرج عليه فيلم؟
الكتاب طبعا
بتمرر ‏التاج لمين؟؟؟
رئيس جمهورية نفسه
e7na
اسكندرانى اوى
عبده محتاس

واى حد عايزه يتفضله

Comments

افشت اول تعليق الحمد لله
التاجات في رمضان بتفطر
هههههههههههههههههههههههههههههههه
سواء كان الصبح او باليل
كده برضه عاوزه تضيعي علينا الايام اللي فاضله
عموما حاضر اروق كده وافوق واشوف حعمل ايه في التاج بتاع سعادتك
روحي يا شيخه.....وتعالي بسرعه
اولا شكرا على سوالك عنى وغيابى كان بسبب انى النت قطع فى الصعيد يمكن اكتشفو انى النت حرام فى رمضان قطعوه
ثانيا : شكرا على تمريرك التاج ليه
ثالثا : روددك منطقيه واحلى ما فيها انك واثقه فى نفسك وانك طول منتى صح ميهمكيش الناس
truelove said…
تعرفي محمد ممرر ليا التاج ده بقاله كتير بس جزاكي الله خيرا هجوبه بقى بس اجباتك لذيذة ودمها خفيف وكل سنة وانتي طيبة ياقطة ويالا سلام اقصد ميوووووووووووووو
Desert cat said…
اسكندراني اوي
ياباشا التاجات فى رمضان فرض
والفرض لابد من ادائه
كل سنة وانت بالف خير ياباشا
Desert cat said…
رئيس جمهوريه نفسى
حمد الله على سلامة النت ياباشا
وبعدين سؤالى ده واجب ده احنا زمل يعنى
المهم انت بخير الحمد لله
واشكرك جدا على حسن ثنائك
تحياتى
Desert cat said…
truelove
خلاص انا جاية عندك دلوقتى
الاقيش كوبايه شاى ولا مج مسكوفيه
طبعا الجميل انك نورتى البلوج
وكل سنة وانتى بالف خير
زى الهوا said…
عندك ثقة فى النفس غريبة طول الردود , وحلوة اوى بتاعت هبلغ البوليس فى اللى سرقوها ههههههههه
زى الهوا said…
يعنى ايه قطة الصحراء؟؟؟
أمنيتك أجانس عربيات
طيب عظيم
أنا أمنيتى حتة عربيه أروح بيها الشغل
أنا أتبهدلت فى المواصلات
لو ربنا حقق حلمك
تقدرى تهدينى سياره صغيره بنفس راضيه
فكرى كويس
ولو وافقتى أنا ممكن أدعيلك دعوه جامده
بس الشرط نور
فى أنتظار رأيك
على فكره الردود حلوه قوي منطقيه وصريحه
ومش عارف ايه موضوع البيانو اليومين دول
امال انا مش باحبه ليه
تحياتي
معليشي بقا يا نانا اتاخرت عليكي
بس تسلم ايديك الاجابات جميلة

بس قوليلي ايه حكاية اتصل يصلك مندوبنا اينما كنت
انتي هتكوني رئيسة بالدليفري ولا ايه

دايما كده تاجات وتاجات يانانا
كل تاج وانتي طيبة

محمد سمير
Tamer Nabil said…
السلام عليكم

ازيك

كل سنة وانتى طيبة

تحياتى
Desert cat said…
زى الهوا
ميرسى اوى يا ميس سماح على حضورك المدونة
ثانيا بقا انا لو قومت من النوم مش لاقيت الحاجات بتاعتى هيبقا مين سرقها غير اللى معايا فى البيت مثلا
انا بقا اروح اعمل محضر واتهم فيه امى وابويا ويبقا كدا ضربت عصفورين بحجر
Desert cat said…
الأميره أوسه
بس هو يجى يا اوختشى وانا من عونيا الاربعه اديكى عربية BMW هدية ووعد منى كل سنة اغيرها لك
تعرفى انا اتمنيت اجانس عربيات ليه
اصلى زيك بالظبط
عينى بتطلع كل يوم فى المواصلات
على العموم انا عند وعدى
ما تخافيش هديكى عربيه عن ما حد حوش
Desert cat said…
ولــــــــــو
متشكرة جدا ياباشا
بالنسبة للبيانو
فانا بحبه علشان زمان كان نفسى اتعلمه
دلوقتى غيرت راى ونفسى اتعلم العود
Desert cat said…
غمض عينيك
ما هو ياباشا انا هعمل زى ظاظا كدا واخلى موبايلى مع الشعب كله
اللى بيتعذب فى قسم مثلا يرن بس وانا هبعت له حد يخلصه
واحد اتسرق مثلا يرن بس وانا ها اجى بنفسى ادور على الحرامى ونقسم بالنص
عادى يعنى
رئيس الجمهورية فى خدمة الشعب
وكل تاج وانت بالف الف خير يا فندم
Desert cat said…
Tamer Nabil
عليكم السلام ورحمة الله
انا الحمد لله كويسة
يارب انت كمان تكون بخير
وكل سنة وانت طيب
عيد سعيد يا فندم
قطه انتى فين ليكى يومين مش على البلوج يارب يكون المانع خير
Desert cat said…
رئيس جمهوريه نفسى
انا الحمد لله كويسة
الف الف شكر ياباشا على السؤال
بهلوله said…
ازاى عاوزه تبقى مديره شركه طيران ولما سألوكى طياره ولا مركب جاوبتى مركب
معلش دى حاجه لفتت نظرى
المهم
اجابتك عسوله يا قطقوطه
والتاج ده شكله جامد قوى
سلام مربع من اختك بهلوله الصحراء
veticohaya said…
salam alikom...
ردوود حلوة على التاااج...
:)
يلا مستنين بوست جديد
Desert cat said…
بهلوله
اللى مشرفانى ومنورانى
واحلى سلام للجميل
يافندم انا عايزه ابقا مديرة شركة طيران علشان الفالعالم وقت ما انا عايزه
وعايزه المركب علشان الف بيه فى البحر وقت ما انا عايزه
انا حبيت بس اكسب الاتنين طماعه طماعه يعنى
لما ابقا مديرة شركة طيران واختار طيارة .. ما هو كدا كدا الطيارة موجودة .. يبقا اختار مركب بقا لوقت الاستجمام بتاعى وخلاص
Desert cat said…
veticohaya
يادى النور يادى الهنا
ان شاء الله الجديد جاى من عند الترزى فى العيد
يا ستي احب اخبرك ان التاج جاهز على النشر
واي خدمه
Desert cat said…
شكرا ياباشا على الواجب
وكل تاج وانت طيب

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز