واللى مرتبه 150 جنيه يعمل ايه


دراسة حكومية: متوسط إنفاق الأسرة المصرية الواحدة 926 جنيه شهرياً
اه فعلا ممكن اسرة صغيرة تعيش بالمبلغ ده وهيكون مكفيهم بالعافية
صديقتى بتشتغل مدرسة متعينه مش نظام تعاقد من عام 1999 يعنى من 8 سنوات ومرتبها + الحوافز = 300 جنيه
.. ولما سالتها بتعملى بيهم ايه دول قالت لى بركب بيهم مواصلات واشرب شاى بين الحصص وباقى الشهر بتاخد مصروفها من جوزها لاء ده واحيانا جوزها بيوصلها الشغل بالعربية يعنى مش طول الشهر مواصلات كمان
الصبح بقا اتفاجأ على مصراوى بالدراسة دى مع انى اصلا شاكه فى مدى صحتها
يعنى اسرة هتاكل وتشرب فى الشهر كله بـ 416.4 جنيه على اساس رغيف العيش من اسهل وارخص ما يكون ولا كيلو اللحمة مش بـ 30 جنيه ولا حاجه خالص
بلاش ده لوهيعيشوا على الفول والطعمية كيلو البصل وصل فى مرحلة 6 جنية ... اه فعلا المبلغ ده هيكفى لاسرة تاكل وتشرب بيه فى الشهر وممكن الاسرة دى يقل عددها أو يزيد عن 3 افراد ..
وهيسكنوا 149.5 جنيه دى بقا نفسى افهمها .. ده فى المنطقة اللى انا عايشه فيها شقة حجرتين وصالة عبارة عن طرقة يعنى تحط فيها كرسى واحد فقط وانت تضغط نفسك علشان تعرف تعدى من جنبه وحمام لازم تعمل ريجيم قبل ما تدخله علشان المساحة بس .. وصاحبها قاعد رجل على رجل والسجارة فى بؤه ويقولك 350 جنيه فى الشهر ما ينقصوش جنيه .. ليه يعنى يقولك هو كدا عاجبك نكتب العقد مش عاجبك يفتح الله
ياعم يهديك يرضيك ابداً .. لاء يبقا يفتح الله ..
والمواصلات كمان بقا 54 جنيه للاسرة مش للفرد .. حنكدب على نفسنا ونصدق انما بقا اللى مش ممكن يتصدق ان الاسرة تلبس بـ 72.4 جنيه ..
هما مش حيلبسوا الاشرابات بس ولا ايه
و كمان 16.1 للثقافة والترفيه .. ده الواحد لو ركب تاكسى هيدفعهم فيه ما هو لازم تاكسى بقا نظام الترفيه وكدا يعنى
وبجملة الترفيه وبما اننا اهم حاجه عندنا مزاجنا فالاسرة بتصرف على الحكوليات والمشروبات فى الشهر 27.4
اللى انا عايزه افهمه بقا
هى الدراسة دى فعلا معمولة هنا على الاسر المصرية
فعلا
طيب واللى عمل الدراسة دى مش واجهته مشكلة غلاء الاسعار خالص
ولا قابل رب اسرة بيشتغل فى الحكومة بقاله 30 سنة ومرتبه + الحوافز + البدلات = 500 جنيه
ولما السيد الباحث اللى عامل الدراسة قايل ان التعليم 48.3 جنيه فى الشهر
هو كان بيتكلم عن تعليم انهى بلد .. اذا كان الدروس الخصوصية كسرت ظهور اولياء الامور
الناس اللى يادوب بتوفر قوت يومها راحت فين من الدراسة دى
وسكان العشوائيات محذوفين ليه
ولا دول مش تبع الاسر المصرية
ده اذا كان اساسا الدراسة دى تنطبق على الاسرة المصرية والمبالغ المذكورة اللى ملهاش اى وجود على ارض الواقع
ليه تزييف الحقائق وقلب الموازين .. اه نسيت
اصل الدراسة حكومية

تعليقات

‏قال غير معرف…
موعود معاكى باول تعليق محظوظ بقاء
هو صحيح انا قريت الدراسه دى فى الجمهوريه النهارده الصبح بس تقريبا الراجل نسى يكمل الخبر ويقول متوسط انفاق الاسره المصريه فوق القمر
لنا ولكم الله
‏قال mostafa
للاسف احنا مش فاهمين وظالمين الراجل اللي عمل الميزانيه الراجل كان بيتكلم بالدولار مش بالجنيه لما نحسبها دولار هتتعدل ان شاء الله
يا سلاااااااااااااام
اكيد الناس دي مش عايشه معانا في مصر
او جايبين الكلام ده عن سكان بلد تانيه
‏قال Muhammad Mammdouh
ياجماعة انتو فهمتو غلط الدراسة دى على السودان مش علينا والله شكلها متنفع كمان اه انتى ختينا فى دوكة ونسينا نقولك كل سنة وانتى طيبة
الله يفتح علييييييييييييكي
ماانتي رديتي اهو بنفسك
أصلها دراسة حكومية

وعجبي
‏قال غمض عينيك
يانانا
الناس بس هي اللي شايفة نص الكباية المكسور
محدش بيبص لنص الكباية الفاضي خالص

احمدوا ربنا بقا
300 جنيه مش عاجبينيك...ليه انتي عايزة تاكلي وتشربي طول الشهر
لا لا الصحة مهمة بردو
مش كده ولا ايه
‏قال Desert cat
رئيس جمهوريه نفسى
ياباشا حضرتك منور اول رد
هى اى حاجه تبع حكومتنا الموقرة دايما منسية
حتى الشعب نفسه
‏قال Desert cat
mostafa
اه فعلا تصدق يا مصطفى كلامك صح
انا جبت الكالكلويتور وحسبتها طلعت الميزانية متخرش المية
المهم ياباشا حضرتك نورت المدونة
‏قال Desert cat
sahr
عمار على ايد حكومتنا ان شاء الله
‏قال Desert cat
اسكندراني اوي
ما انا برضه قولت كدا
اذن متفقين فى الراى
بس لما هى دراسة بلد تانية جايبنها لنا ليه يغيظونا بيها
‏قال Desert cat
mo7amed mamdo7
يا باشا دى لو حتى على عيل عمره سنتين برضه مش حتنفع
هما اصلا عاملين الدراسة دى وناشرينها فى الجرايد علشان المواطن اللى لسه مش جاله لا ضغط ولا سكر ولا قلب امل وا يقراها يحس بالقهر يقوم يتوكل على الله فى الحال وبالشكل ده الكثافة السكانية تقل
كل سنة وانت طيب وبالف خير
‏قال Desert cat
آلام وآمال
الله يخليك يافندم
المهم حضرتك منور المدونة
كل سنة وانت طيب
عيد سعيد ان شاء الله
‏قال Desert cat
غمض عينيك
تصدق احنا اصلا مش مقدرين جهود الناس العظيمة دى
توفير فى الاكل وفى الشرب وفى المواصلات
وفى السكن وفى الاخر نقول الدراسة غلط
لالالالالالالالالا
الحكومة بتاعتنا مش بتغلط ابدا
احنا اللى غلطانين باستمرار
المهم ياباشا
اخبار فودافون ايه
كل سنة وانت طيب
عيد سعيد ان شاء الله
أنا شايف بصراحة كده إن بلاش نتلكك للحكومة بتاعتنا
يعنى شايف إن الدراسة دى مظبوطة جدا وبالمللى بس حضرتك جايز مأخدتيش بالك من تاريخ الدراسة
أنابرضه كنت عملت دراسة كده عل قدى فى الناس اللى أعرفهم من يجى 15 سنة وطلعت نفس الأرقام دى

خلاص ياجماعة بلاش تجيبولنا دراسات قديمة عشان مش ناقصة تأليب مواجع

معلش أعمل إيه بس حاجة توجع بجد
بئر معطلة وقصر مشيد
وكمان اللى مرتبه 150 جنيه دة لازم يقعد يدعى للحكومة لحد ما يموت من الجوع عشان كده هو السبب هيعملولوا إيه لو كانت الحكومة تعرف تريحه كانت ريحته زى بتوع العبارة والطيارة وغيرهم شوف ريحتهم عالأخر مفيش قدامه غير انه يموت من الجوع
HELP YOUR SELF
أسف للإطالة
‏قال حواء
لا حول ولا قوة الا بالله ده اللى بيقبض 150 جنيه بيقول ربنا يخللى لنا لحكومة .. ده فى ناس غلابة اوى ربنا يرحمنا برحمته
‏قال Desert cat
طال الليل
هو فعلا وجهة نظر حضرتك صحيحة
يا اما الراجل بيتكلم عن مصر من اكتر من 15 سنة فاتوا يا اما مش بيتكلم عن بلدنا اساسا
والى مرتبه 150 جنيه ده تلاقيه عايش بيهم ملك
بيشرب ميه الصبح
وميه بالليل وينام وخلاص على كدا
ما هو اكيد عايش لوحده يعنى
هو مش عايز يتجوز اصلا مش قلة فلوس ولا حاجه انما علشان مبيحبش وجع الدماغ
ده الخير كتير ومرتبه 150 جنيه بحالهم
نورت البلوج يا فندم ومفيش اطالة ولا حاجه
اتمنى زيارتك دائما
دمت بكل ود
وكل عام وحضرتك بخير
‏قال Desert cat
david santos
how are you
Sir worthy everywhere when you McVey even found the identity of this person Hnbulg Interpol at above
many thanks
And I hope to repeat your visit
Affection
‏قال Desert cat
bocycat
ده بيدعى للحكومة طول الوقت يا بوسى
ده حتى مش بينام علشان مش يبطل دعاء
ولا بياكل علشان مش يبطل دعاء برضه
هو اصلا لاقى ياكل
ربنا يتقبل دعوتك فى الايام المفترجة دى
تحياتى
شوفى
اللى انتى زكرتيه دة يمكن يكون مش جديد
و كمان يمكن شعب مصر مش محتاج خالص انو يشوف حتى الدراسة دى ولا حتى يسمع عنها
تعرفي لية
علشان زى ما بيقولوا العينة بينة
و اللى ميشوفش من الغربال يبقى اعمى
دا بالبلدي خالص
بس ايه الحل
اكيد فى ايد كل واحد مننا
يعنى
نسعى فى حاجة كدة اللى هي اية ؟؟؟ معرفش
بس المهم نطلع بقى من اللى احنا فيه دة

تحياتى
تمر حنة
اه
ابقى مرى علينا كدة و لو حتى ذى مورو ر الكرام
‏قال Desert cat
تمر حنة
حبيبتى للاسف الحل فى ايدينا لكن كل واحد مش عايز يكون هو البادئ
يعنى اعمل انت حاجه وانا معاك
يعنى كل واحد محتاج قدوة
غلاء اسعار مش مشكلة
بطالة ميهمش
ذل واهانة وانا هعمل ايه اللى حيمشى على الناس حيمشى عليا
علشان كدا الحال من سئ لاسوء
" ان الله لا يغير ما بقوم حتى يغيروا ما بانفسهم "

طبعا انا يشرفنى زيارة مدونتك حتلاقينى فيها باستمرار لحد ما تزهقى ..
كل سنة وانتى طيبة وبالف خير
‏قال Hook
و اللي مرتبه 60 جنيه؟
‏قال Desert cat
Hook
ياكل وزيشرب منهم والباقى يبعته على بنوك سويسرا

المشاركات الشائعة