وعلشان انا كمان ليلى



كل سنة وكلنا ليلى فى تقدم


وكل سنة تتحقق احلام كل ليلى وتقدر تعيش مش تتعايش ..


تعيش فى مجتمع يحترمها ويحرمها من تفاهاته والتعامل على انها


علشان بنت يبقا مش من حقها ومش من حقها ومش من حقها وكانها مرتكبة اثم عظيم وليست رزق من عند الله

وعلشان انا كمان ليلى نبتدى الاجابات

ليلى ونقد/معرفة الذات
هل أنت سعيدة كفتاة في مناحي حياتك؟
ولله الحمد سعيده .. لانى بحس انى فى حالة رضا عن نفسى

هل تحبين نفسك أم تتظاهرين بالقوة؟
بحب نفسى وده شئ طبيعى لانه من الصعب ان الانسان يكره نفسه .. اما موضوع التظاهر بالقوة فده بيحصل فى بعض الاحيان لما بحس ان اللى قدامى بعاملنى على انى انثى ضعيفه مهما عمل ومهما قال مش هتقدرى تتكلمى او تعملى حاجه اصها طلعت نزلت بنت ... فى الحاله دى باثبت له انه خطأ وان البنت دى ممكن تعمل كتير واكتر مما يتخيل وبالفعل مش بالقول .

هل تعرفين دورك في الحياة أم تتسابقين وتلعبين أدوارا مرسومة وفقط؟
ما اتعودتش انى اكرر خطوات حد بحب دائما التميز بمعنى اصح بحب اكون صاحبة السبق يعنى ممكن حد يلعب دورى اما انا معملتهاش

هل مستعدة أن تدافعي عن وجهة نظرك عموما أم تجبنين عند المواجهة؟
مستعدة ادافع بقدر الامكان ...
وهل ترين جبنك سمة شخصية أم يغذيها من حولك؟
لو حصل ده لو يعنى وكنت جبانه بالفعل فى المواجههة وقتها مش حقول ان العامل الاساسى شخصيتى لانى موجودة فى مجتمع انتى بنت عيب تتكلمى كدا
انتى بنت عيب تقفى بالشكل ده .. انتى بنت عيب ترجعى فى الوقت ده حتى لو كان الساعه 5 بعد العصر
وبالتالى ممكن يحدث تراجع

ليلى ومكانها من الرجل :
هل ترى المرأة أقل من الرجل في أي مستوى من المستويات؟
نبيتدى بالمستوى الأسرى .. لو اتاخرت شوية بره البيت .. كنتى فين كل ده يا هانم وموبايلك مش بيرد انتى فاكره نفسك ايه الناس تقول علينا ايه .. ولما تسالى عن اخوكى الصغير مش الكبير كمان .. يكون الرد خرج مع صحابه .. ولما يرجع اجهز لك العشا يا حبيبى .. طيب اشمعنا هو .. لاء اصل ده ولد يعنى براحته .. انما انتى بنت واكسر للبنت ضلع يطلع لها 24 ..اه بس بيبقا فى بنت بـ 100 راجل يعنى معلشى .. بتعرف ازاى تتحمل مسؤلية وازاى تحكم عقلها وازى تتصرف فى اى موقف تتعرض له .. ..
على المستوى العملى .. انتى بتشتغلى ايه .. ااااه بس دى شغله ولاد مش بنات خالص .. هو يعنى مش ينفع غير انها تشتغل رقاصه علشان تبقا شغله بنات وبس
ده غير .. دائما الرجل لما بيتقلد منصب وظيفى ايا كان بيكون الوضع طبيعى
اما المرأة بيكثر الكلام من امثلة ازاى يعنى هى هتوفق ازاى بين بيتها وشغلها .. وبعدين دى ممكن تكون عاطفة زيادة عن الازم .. لاء دى مش بتكون قد المسؤلية وبتضيع وقت وخلاص .. زى ما حصل فى شغل وظيفة المرأة للقضاء .. وكان الرجل
ليلى والإعلام :
هل يساهم الإعلام في ترسيخ صورة نمطية عن المرأة؟
كان زمان الاعلام مركز على نمط الست امينة وسى السيد .. اصبح دلوقتى الاعلام مركز على ازاى تطلع المرأةوكأنها سلعه للعرض لدرجة ان الأغلبية فى المجتمع اصبحت تتعامل مع أى أنثى انها شئ حق مكتسب من حقه يقولها الفاظ قذرة ومن حقه يمد ايده عليها
فى الشارع فى المواصلات ده غير مديرها فى الشغل .. هى بس هتلاحق على مين ولا مين
وكيف ترى/ترين معالجات قضايا المرأة وتأثيرها في المجتمع؟
زيادة الوازع الدينى .. اختيار الاعلام للمادة الاعلامية المقدمة .. الحث على اهمية دور المرأة ووجودها الفعال فى المجتمع
التعامل معها بأخلاقيات عاليه فى جميع المناحى ...

تعليقات

امممممممممممممممممممممممم
طيب امشي انا بقى
‏قال غمض عينيك
كل سنة وانتي ليلي يا نانا
انا ماليش دعوة بقا بالموضوع ده

بس قوليلي ايه النشاط ده
بوستين في كام ساعة
انتي ماوركيش تحضير فطار ولا ايه يا ليليى
:P:P
‏قال Desert cat
اسكندراني اوي
وتمشى ليه بس ياباشا ما انت مشرفنا
‏قال Desert cat
غمض عينيك
وانت طيب يا محمد
هو مش موضوع نشاط اكتر ما هو احداث بتحصل ورا بعضها

بالنسبة لتحضر الفطار حبقا اخلى اخويا يحضره
مش كفاية راجل خلاص بقا يبقا يعمل كل حاجه
‏قال غير معرف…
روددك منطقيه وطبيعيه والحمد لله اختى مسمعتكيش كانت قالتى حضر انت الفطار اصلها معزومه عندنا النهارده
‏قال Desert cat
رئيس جمهوريه نفسى
انت بس عرفنى علي اختك
وهو يومين بالكتير وتخليك تجهز الفطار وتنضف الشقه كمان
بهزر طبعا ياباشا
هو احنا عارفين نتنفس
ده انتوا كابسين على نفسنا ياراجل فى كل حاجه
الشغل والبيت والمواصلات
ربنا يبارك لنا فيكو ياااااااااارب

المشاركات الشائعة