وضاع اول يوم فى رمضان وصيامى مش نافع النهارده

بما انى كنت فرحانه اوى امبارح بقدوم رمضان
وعمال استعيد ذكرياتى
وطول الليل عمال استعد للشهر الكريم
وارتب اعمالى خلال الشهر ... واقسم وقتى ازاى ما بين الشغل والعبادة وقراءة القرآن تقريبا لحد آذان الفجر
وقمت صليت الفجر ونمت ولحد كدا تمام
وصحيت من النوم وانا عازمة النية ان كل افعالى ما تزعلش منى حد ولا اضايق حد
ولو حد شتمنى حتى لو مسح بيا الارض ابص له بكل براءه واقوله الله يسامحك
وخرجت من بيتنا ورحت اركب الميكروباز ... وتم العملية بنجاح والحمد لله ركبت فى مكان اوبهه كدا ولا حد بيضايقنى ولا اى حاجه
يا سلام بركاتك يا رمضان هى المواصلات سهله وحلوة النهارده كدا ليه ..
وفجأتاً وانا فى ربع الطريق وقف السواق وهووووب اركبى يا ست اركب يا عم الحج .. طيب حيركب فين عم الحاج ده اصلا ده هو يادوب الكرسى يعنى بالعافية
لاقيته بيقولى لو سمحتى يا استاذه
خدى عم الحاج جنبك .. جنبى فين .. ده جنبى ده مش ياخد ابن اخويا الصغير ...
لاقيته بيقولى لالالالالالالا .. الدنيا صيام ولازم نسيع بعض
.. قولت له سيعه انت .. انا اسيعه فين اخده على رجلى يعنى ...
وفجأة عمو الحاج اتدخل فى الحوار .. والله طول عمرنا بنركب المواصلات وهى زحمة وبيبقا كل واحد على رجل التانى انتى عمال تتأففى كدا روحى اشترى لك عربية وساعتها محدش يضايقك ..
وقتها مش قدرت امسك نفسى
قولت له لولا انك قد والدى انا كنت رديت رد تانى... الست اللى كانت جنبى .. تعالى يا حبيبتى على رجلى ..
الجشع ملا قلوب الناس بس الحق على اللى بياسعدوهم انهم يطمعوا فينا ...
قولت لها ولا يهمك يا طنط ... مالوش لازمه اتعب حضرتك
السواق بقا .. وانت استنى على جنب يا عم المقرف انت على الصبح
ونزلت من الميكروباز ... يلا غور بقا بلاش ارف
ونزلت تقريبا فى ربع الطريق كدا
بس اللى حارق دمى بقا انى سبت له اجرة الميكروباز وما اخدتهاش وانا نازلة
هو اصلا كان ينفع اتكلم بعد اسطوانة القرف اللى شغلتها له دى
ده كويس انه مجريش ورايا فى الشارع ..
وبعد دقيقة بالظبط جه ميكروباز تانى فاااااااضى ومفيهوش غير حوالى 4 اشخاص .. خوفت افرح بصراحة احسن يجرى نفس اللى حصل فى الميكروباص الاولانى واقضى اليوم كله مواصلات
وضاع العهد اللى بينى وبين نفسى انى مش ازعل حد
وضاعت اجرة الميكروباص
وضاع اول يوم صيام من اول نص ساعه نزلت فيه من البيت
انا بصراحة زعلانة .. متضايقة .. مأهورة

Comments

Marvel said…
جشع السواقين مالوش حل...عشان كده مش بركب غير على الكنبة اللي ورا او جوة جنب الازاز عشان لو حب يركب ناس زيادة ميبقوش قاعدين على حجري

معلش اول يوم...ربنا غفور رحيم...ربنا يستر على ال29 يوم اللي فاضلين...ورمضان كريم

:D
معلش مضايقيش نفسك بس انتى حاولى تمسكى نفسك بعد كدة وبعدين يا سيتى هوا انت مش عارفة ركوب المواصلات فى بلدنا شكله ايه وكويس انك مقولتوش هات الاجرة ممكن هتكون مجزرة يلا المسامح كريم ولا يهمك يا قمر. وربنا يكرمك ان شاء الله ويكرمنا وياكى يا رب ويكرمك كل المسلمين ان شاء الله ومتزعليش لسه فيه باقى الشهر اهو ولسه فيه فرص كتير جاية احنا ما علينا الا ان نخلص النيه لله ولو حد ضايقك وقلتى حاجة تضايق حد او انتى ضايقتى نفسك قولى استغفر الله العظيم واتوب اليك
معليشي يانانا
حصل خير
وربنا يعينك بجد
سواقين الميكروباس بيبقوا حاجة صعبه جدا...انا بيبقى نفيسي في رشاش او كلاشينكوف افرغه فيهم واخلص
ع العموم ربنا الهادي

تحياتي
محمد سمير
kafrawy said…
اول مرة ليا هنا


وان شاء اللة مش اخر مرة

انا بصراحة مش قادر امسك نفسى

من الضحك ع الكلام

اللى اتقال

عموما

كل سنة وسعادتك طيبة
ايوية said…
متزلعيش يا قطة ان شاء الله ربنا هيسامحك
وبعدين انتى كنتى بتاخدى حققك وبدافعى عنة
هههههههههههههههههه
معلش
الصبر
والله ما انا عارف الناس حصلها ايه
جشع وطمع
وقله دين
وقله حياء
معلش ما لا يدرك كله لا يترك كله

ربنا ان شاء الله يتقبل
Desert cat said…
Marvel
ما هو انا المكان الفاضى بقعد فيه وخلاص
مكنتش اعرف اللى هيجرى لى ولا كان على بالى
وربنا يستر فى باقى الشهر ان شاء الله
الله اكرم
Desert cat said…
رحيق الحب
استتغفر الله العظيم واتوب اليك
ربنا يغفر لنا جميعا
جزاكى الله كل خير اختى رحيق
وكل سنة وانتى طيبة
Desert cat said…
غمض عينيك
المشكلة يا محمد انى اقنع السواق انه مينفعش الراجل يقعد فى الربع سم اللى جنبى ده مش قادر يقتنع واللى ساعده اوى وقواه على موقف رد عمك الحاج .. يا سيدى اتقى الله هقعدك فين انا
اخر ما زقت سبت له الميكروباص كله ونزلت هعمل ايه
ربنا يهدى الجميع
Desert cat said…
kafrawy
طبعا انا سعيدة جدا بتشريفك البلوج
ويارب دايما مبسوط وبتضحك يا فندم
كل سنة وانت بالصحة والسعادة
Desert cat said…
ايوية
والله يا يويو انا لاقيت نفسى كدا شايله ذنوب وكدا شايله ذنوب
يعنى لو كنت لازقت فى عمى الحاج يعنى هو ده حلال حتى فى غير ايام رمضان
بس كان المفروض طالما نازله نازله يعنى ما انسحبش من لسانى
ربنا يهدى يارب
Desert cat said…
اسكندراني اوي
ربنا يسمع منك يارب
ربنا يتقبل صالح اعمالنا
اللهم اغفر لنا وارخمنا وتجاوز عن سئياتنا وتب علينا

سمعت مرة مقولة لاحد الشيوخ عجبتنى قال ضحى بالاجرة واركب مواصلة تكون مرتاح فيها وتكون نيتك ان تحافظ على نفسك

مثلا تركب فى الامام وتدفع أجرة الاثنين
واشياء من هذا القبيل

وفقك الله لما فيه طاعتك
لا تخافى ان ربك واسع المغفرة
السلام عليكم

لا ولا يهمك أن شاء الله ربنا يتقبل دى حاجه غصب عنك ساعات الناس بتضطر الواحد ان يرد رد مش كويس

وربنا أن شاء الله يتقبل منا ومنكم صالح الاعمال وكل سنه وانتى بألف خير ياااارب
تحياتى
تمر حنة said…
بعد السلام

رمضان كريم

بس انتى زى العسل

المفروض مش تبقى قطة الصحراء

المفروض تبقى

اى حاجة تانية .. من غير صحراء

ع العموم

انا سعيدة انى عرفت مدونتك الجميلة قوى زيك

و اتمنى نتبادل الزيارات كدة دايما

تحياتى

تمر حنة
اللهم ما تب علينا من المواصلات بقه
انا عندي اقتراح بسيط
مالها العجلة بس يا جدعان
3abdo me7tas said…
انا عارف والله يا نانا انك زعلانة اوى على أجرة الميكروباز بتاعك
بس انا عندى حل حلو اوى اوى اوى اوى اوى
بصى يا ستى
انتى كل يوم فى أيام رمضان تيجي تحاسبى نفسك على كل حاجه عملتيها فى اليوم ده
ولو لقيتى نفسك غلطانه فى حاجه عاقبى نفسك فى حاجه زى مثلا العقاب يكون
انك تقرى جزء قرآن زيادة او تسبحى 1000 مرة زيادة
حاجه تستفيدى منها وبرضه تقولى لنفسك انى لازم امسك نفسى شوية
يا رب تكونى فهمتينى
ربنا يهديكى يا بنتى يا رب

على فكرة إنتى باين عليكي صعبة اوى اوى اوى
Desert cat said…
الطائر الحزين
ماهو انا كان ممكن ادفع له تانى بس ده زى ميكون الحاج قريبة وموصر يلزقه جنبى
ربنا يهدينا ويهدى الجميع
Desert cat said…
حياه الأحلام
اللهم امين
وكل سنة وانتى بالف خير
Desert cat said…
تمر حنة
عليكم السلام ورحمة الله
وكل سنة وانتى بالف خير
وانا يشرفنى جدا ان يكون بينا زيارات متبادلة
Desert cat said…
أحمد عبد الفتاح
العجلة دى اختراع حلو اوى يا احمد
دى حتى رياضة
ومنها الواحد يوفر اجرة المواصلات
Desert cat said…
3abdo me7tas
انت بتقول فيها طبعا زعلانه على الاجرة برضه بس مش زى زعلى على اليوم اللى راح
وعلى فكرة انا مش صعبة انا عصبية جدا مش بقدر استحمل اى حاجه
علشان كدا بتلاقينى باقول اى كلام وفى اى وقت ولا اى حد
هو مودينى فى داهيه غير كدا
3abdo me7tas said…
ربنا يهديكى يا بنتى
Desert cat said…
اللهم آمين
Tamer Nabil said…
كل سنة وانتى طيبة

انتى مش ليكى زنب نهائى

تقبل الله منك

وما تشيلى جوة نفسك

ربنا يكرمك

تحياتى
Desert cat said…
Tamer Nabil
ربنا يطمنك يارب
وكل سنة وانت بالف خير
بصى بقا بصى
كل سنه وأنت طيبه
و ألف مبروك على المدونه أنا قريت بعض المواضيع جميله خالص
بالنسبه لسائقى الميكروباز
أعتقد أنهم أسؤ فئه فى المجتمع
أنا تجاربى مع الميكروباز كتير
وأعرف كل السواقين اللى فى مصر من أيام طفولتهم
تخيلى لما تقعدى فى ميكروباز ساعه لما يحمل الصبح بدرى وبعد مايطلع يبدأ يلف عشان يكمل عدد الركاب
و فى الأخر يرجع للبدايه ويقول انزلوا يا حضرات أنا مش طالع
ليه يا عمو ده فاضل أربعه بس
طيب خلاص أدفعى أجرتهم وأنا أطلع
يعنى كمان أخرتنى عن الشغل وأدفع أجرة أربعه ليه هى عافيــــه
أيوه عافيه يا ستى أيه مش عاجبك
و طبعآ أمين الشرطه عامل نفسه عبيط
بياخد فلوس من السواقين عينى عينك
والناس غلابه مكسورين الجناح
أتهزاء أنا وهم بيتفرجوا
المهم أنا نفسى أعرف الأجره اللى سيبتيها للسواق كانت كام
أمووووووووت وأعرف
أنت بتحبى القطط
أنا بحب القطط جدآآ
أنا عندى فيديو عن القطط بأنواعها
فى المدونه
ماو ماو
Desert cat said…
الأميره أوسه
وانتى طيبة يا جميل
بالنسبة للسواقين فهما زى غيرهم كتير من الناس اللى لما بتقدر ما بتعفيش
وعلشان هو يملك يوصلنا بيذلنا
مع اننا بنديله فلوس يعنى مش بيعمل حاجه ببلاش
سبحان الله
بالنسبة بقا للاجرة كانت كام فهى مبلغ وقدرررررره
ولا بلاش
خليها بينى وبين ربنا
اصلى فى الاخر قولت عدنها زكى عن صحتى
انا هروح حالا اشوف فيديو القطط اللى عندك
يختشى كميلة
طبعا نورتى البلوج
ويارب دايما منورانى
رمــضان كريــم
وكل عـام وأنتـم
بخيـر
..
رمــضان كريــم
وكل عـام وأنتـم
بخيـر
..
Desert cat said…
ibn nasser - ابن ناصر
الله اكرم
وكل عام وانت بالصحة والسلامة
لا لا مش تزعلى ان شاء الله الصيام مراحش
وان شاء الله تاخدى بالك بعد كده
bocycat said…
كل سنة وانت طيبة تتعوض فى الايام اللى جاية بس ده كان غصب عنك مش بخاطرك ولو انا مكانك كنت حعمل اكتر من كدة .. رمضان كريم
Desert cat said…
أميرة البلطجية
كل سنة وانتى طيبة يا جميل
وربنا يستر ان شاء الله
Desert cat said…
bocycat
بوسى كات عندنا يا مرحبا يا مرحبا
ربنا يتسر يا بوسى
وكل سنة وانتى بالف خير يا جميل
رمضان كريم
(green eyes) said…
كل سنه وانت طيبه وتعيشي ومتخديش غيرها خالص
اصلي انا عارفه ارف المواصلات عامل ازاي
وان شاء الله ربنا يسامحك
لكي تحياتي
Desert cat said…
(green eyes)
كل سنة وانتى بالف صحة وسلامة
ان الله عفو كريم

Popular posts from this blog

قميص دهشور

كل تحرش وانتوا طيبين