اللهم بلغنا رمضان

كل سنة وانتوا طيبين
كل سنة والجميع بألف صحة وخير وسعادة
كل سنة واحنا ذنوبنا مغفورة وتوبتنا مقبولة
باقى ساعات قليلة ونصوم ... حاسه بفرحة غير عادية
برجع من الشغل بيتى كل يوم قبل الفطار بدقايق قليلة جدا واحيانا المدفع بيضرب وانا لسه فى نص الطريق .. ما هو اصلى بمشى ويكون مش كل همى اروح والسلام .. لاء ده انا بمشى ابص على الناس وعلى كل مكان... حقيقى وانا ماشيه فى الشارع بحس بشعور مهما وصفته مش حقدر اعبر عنه
منظر الناس وهى بتجرى كل واحد عايز يلحق يرجع بيته قبل المدفع ...
بايعين العرقسوس والتمر هندى والمخلالات وهما قاعدين وعليهم تكدس كم هائل من البشر
فرن الكنافة والقطايف وعمو اللى موقف جنبه ابنه الصغير بيوزن للناس طلباتهم
صوت الشيخ الشعراوى خارج من القهاوى ...ومن كل شارع ومن شباك جيرانا
وعيال شارعنا وهما بيلعبوا الكورة وكل لما اجى امشى كدا الاقيهم جايبنها لى كدا
ما تستنى شوية يا بنى انت وهو ما تسكت بقا يا ابرهيم ... ويرد ابوهم اللى ماسك المصحف وقاعد قدام دكانته ...
كل سنة وانتى طيبة يانانا العيال فرحانه يا بنتى ده رمضان كريم
وابن اخويا اللى اول ما بيشوفنى يجرى عليا وفاتح درعاته ومن بعد البوسة الجامدة اوى يدور على حاجاته طبعا مش محتاجه مفهومية بيشوفنى جايبه له ايه معايا وانا جايه ما هو انا اصلا مقدرش ادخل البيت من غير الشكولاتيه بتاعته او الشيبسى او اى حاجه المهم يمد ايده
فى شطنتى يطلع اى حاجه وخلاص ... حمادة كان السنة اللى فاتت سنة ونص يعنى دلوقتى سنتين ونص .. ياترى هشوفك بتصوم معانا امتا يا حماده .. علشان ترحمنى بس من الاحراج لما ارجع وانا ناسيه اشترى لك حاجه .....
وبعد الفطار انزل تانى وتبدأ رحلتى من جديد وكل الناس خارجه من بيتها فى منظر عكس اللى كان من حوالى ساعه بالظبط .. الكل ماشى براحته .. اللى بياكل حتة قطايف واللى بيشرب سيجارته ... والمحلات المقفولة كلها بتفتح من اول وجديد .. وكان بعد الفطار ده يوم تانى ونهار جديد وطول ما انا ماشية كل سنة وانت طيب يا عمو محمد .. رمضان كريم يا عمو سعيد ... وفى اخر الشهر فى انتظار العيد .. يااااااااااااه بزعل اوى واقعد اكلم اخر ساعات فيه واقوله اوعى تنسانى ... انا مستنياك ان شاء الله فى نفس الميعاد من عام جديد ...
كل سنة وانتوا جميعا طيبين ورمضان كريم

تعليقات

‏قال غمض عينيك
كل سنة وانتي طيبة يا نانا ورمضان السنة دي يجي عليكي بالبركة والفرح

انا كمان اوي بحب الفترة اللي قبل الفطار علطول دي
بحب انزل الشارع واتفرج عالناس
نفس الحالة اللي بتبقي فيه
متعة اوي اوي

رمضان كريم وكل سنة وانتي طيبة
محمد سمير
جو رمضان لا يقارن
ملئ بالروحانيات والاحساس بالموده والالفه
اللهم اجعل كل ايامنا رمضان
كل عام وانتم الى الله اقرب
‏قال Desert cat
غمض عينيك
كل سنة وانت طيب وبالف خير وصحة وسعادة يا محمد
ربنا يعود عليك الايام بالخير والبركة
رمضان كريم
‏قال Desert cat
ولــــــــــو
فعلا جو رمضان لا يقارن
يكفى صوت الاذان وهو طالع من كل مكان
وصلاة التراويح
واللمة الحلوة اللى بنتجمع عليها ساعة الفطار
ياااااااااه وحشتنى اوى يا رمضان
كل سنة وانت طيب
‏قال 3abdo me7tas
وانتى طيبة يا نانا
اما الفترة بقى اللى قبل الفطار دى جااااااااامده اوى انا مش عشتها من زمان لان رمضان اللى فات كنت فى الكررعة واللى قبلها كنت فى الجيش واللى قبل قبلها هى دى آخر مرة أحس برمضان فيها
رمضان كريم
‏قال 3abdo me7tas
آه نست أقول
وحوى يا وحوى
اخر مرة شفت الي بتحكي علية دة كان من 4 سنين
كل دة مش موجود غير في مصر بس .ماهما لفيتي او شوفتي
كل سنة و انت طيبة
و رمضان كريم
السلام عليكم

هى دى مصر بفرحه رمضان فيها غير فرحه العباده

وكل سنه والكل بخير ورمضان كريم وربنا يتقبل منا ومنكم صالح الأعمال ويارب الى الله أقرب

ونقول كلنا سأعبدك يارب كما لم أعبدك من قبل

تحياتى ياقمر
‏قال رحيق الحب
كل سنة وانتى لربك طائعة وقريبه منه يا رب وكل المسلمين يا رب
انتى عارفة بجد شهر رمضان ده بجد بتلاقى فيه كل المعانى الحلوة
فكرتينى بموقف حصل رمضان اللى فات كنت انا واخويا فى مشوار وخلصنا على الساعة 3 كنا فى مدينه نصر طبعا قاعدية مستنين حاجة وقفنا يجى ساعة وبعدين ركبنا المكيف الطريق طبعا زحمه ومش عايزة اقولك المغرب أذن علينا واحنا لسه فى الطريق والسكة كلها واقفة والعربيات بجد كنت مبوسطة اووووووى ومستمتعة وانا بتفرج الناس ماشية والعربيات واقفة اللى جوه العربية مطلع زجاجة مية يديها للى ماشى عشان يروى عطش الصائم ويفطر واحنا فى الاتوبيس اللى معاه بيدى للى مش معاه واللى معاه عيش اهو اى حاجة الواحد يفطر عليها يقطع ويدى لغيره
والناس ماشية وشباب واقفين معاهم مشروب وتمر يدوى للى ماشى ملحقش الفطار بجد منظر تحوووووووووووووفة بجد
تحسى ان الناس كلها قلبها على بعضها يا ريت نفضل كدة طول السنه
ويارب يجمعنا كلنا يا رب فى الحرمين ونزور قبر الرسول عليه افضل الصلوات واتم السلام
وتفرحى بكل اللى تحبيهم وتشوفى حمادة كدة يكون كبر وبيصوم زينا وتفرحى بيه وهوا بيقولك يلا يا عمتو عشان ننزل نصلى فى الجامع ان شاء الله
ربنا يكرمك فى كل اللى تحبيهم يا رب
ورمضان كريم وكل سنة وانتى طيبة يا رب
‏قال عاشقة الوطن
السلام عليكم

القطة الجميلة

ازيك ياقمر

كل سنة وانتى طيبة ورمضان كريم
انتى بتوصفي الشارع والناس خلتينى اقول خلاص رمضان فعلا جه
واحنا لسه اول يوم اهوه بس بجد حسستينى برمضان وبفرحته وبمنظر الناس
انا فعلا مبحسش برمضان غير بالناس وبتاع العرقسوس وبتاع الكنافة والقطايف
بجد رمضان بيختلف عن اى حاجة تانية فى حياتنا
ومن اجمل الشهور فى حياتنا

وربنا يخلي حمادة ابن اخوكى
ويكبر كده ويصوم معانا ان شاء الله

كل سنة وانتى طيبة وجميلة زى ماانتى ياقمر
‏قال مواطن زهقان
كل سنة وانتى طيبة
وتحققى السنة دى
اللى عرفتيش تحققيه
السنة اللى فاتت
اللهم بلغنا رمضان
‏قال مواطن زهقان
كل سنة وانتى طيبة
وتحققى السنة دى
اللى عرفتيش تحققيه
السنة اللى فاتت
اللهم بلغنا رمضان
‏قال Desert cat
3abdo me7tas
المهم ياباشا السنة دى انت موجود وحتعيش ايام رمضان وتتمتع باحلى لحظاته
كل سنة وانت طيب
‏قال Desert cat
3abdo me7tas
ه نسيت اقولك
وحوى يا وحوى
‏قال Desert cat
اسكندراني في الغربة
مصر جميلة بشعبها وعاداته
ان شاء الله تشوف الحاجا دى فى السنة الجاية
وكل سنة وانت بخير وصحة وسعادة
‏قال Desert cat
حياه الأحلام
حبيبتى مصر حلوة بناسها وعاداتهم
باجدادنا اللى بثوا فينا الخير من جواهم
حبيبتى كل سنة وانتى بالف خير
ورمضان كريم
‏قال Desert cat
رحيق الحب
فعلا يا رحيق الصورة اللى بتوصيفيها دى موجودة فى كل الشوارع وفى كل مكان فى مصر
كل سنة وانتى طيبة يا حبيبتى
وربنا يعيد علي الجميع الايام بالخير والبركة
‏قال Desert cat
عاشقة الوطن
حبيبتى الله يسلمك وتسلمى لى يارب
لحظة قبل المغرب دى شكل تانى
انا بستنى اليوم كله علشانها
ربنا يبارك فيك يا حبيتى وكل سنة وانتى بالف خير
‏قال Desert cat
مواطن زهقان
وانت طيب يا فندم
وربنا يحقق امانينا جميعا
‏قال Unknown
كل سنة وانتى بالف خير
‏قال Desert cat
ايوية
كل سنة وانتى بالف صحة وسعادة
وربنا يعيد عليكى وعلى جميع المسلمين الايام بالخير

المشاركات الشائعة