زيارة بعد منتصف الليل



قاعدة فى بيتنا كانت الساعه 1 بالليل وواخده راحتى اوى ما هو بيتنا بقا ان مش استريحت فيه هستريح فين .... وبتفرج على التلفزيون وفى نفس الوقت كنت لسه مجهزة لنفسى عشوة محصلتش وجنب الاكل طبق فاكهه محصلش هو كمان ...
وفجأة وانا عمال اكل فى العشوة اللى محصلتش وابص على الفاكهه اللى هلتهمها كلها بعد شوية ... والاقى رزع على الباب ...
ايه ده يا ددعان بوليس ولا ايه ... رحت وقفت ورا الباب وعمال ابص له حاسه انه هيقع عليا بعد ثوانى ... والمشكلة ان اللى على الباب مش بينطق والرزع شغال والجرس مع بعض ... انا قولت بس حد بلغ عننا بنبيع مخدرات ولا حاجه والشرطة جاية تقبض علينا .. وكل ده وانا واقفه مش برد اصلا ولا بقول مين ولا اى حاجه خالص ومتلخبطه .. ماما صحيت على الرزع اللى على الباب .. ايه مش بتردى ليه .. قولت لها خايفه وانا واقفه برتجف فى مكانى ... ايه يا بنتى مالك فى ايه ...

ماما من ورا الباب : مين ..
سمعنا ضحكة حريمى بس غريبه ... هى حريمى فى رجالى مثلا ...
ماما : فتحت وانا رحت وقفت ورا باب اوضتى اتابع الاحداث ..
واول ما الباب اتفتح لاقيت هجوووم 3 ستات ومعاهم حوالى 5 قرود قصدى اطفال ..
ايه ده يا ددعان ..واول واحدة دخلت فيهم لاقيناها داخله وبصوت عالى ايه ده انتوا نايمين والشارع كله صاحى
وزقوا ماما ودخلوا جرى على جوا .. ماما قالت لهم معلشى اصلنا بنحب نام بدرى .. هى الساعه 1 بعد منتصف الليل تبقا بدرى برضه يييييمه الله يسامحك ..
غيرت هدومى وخرجت سلمت وانا بسلم ابص الاقى الاكل بتاعى عمال يتلهف .. ايه الناس الجعانة دى .. ولا عزمنا ولا قولنا اتفضلوا ولا اى حاجه
ماما راحت تعمل لهم عصير لاقيت طبق الفاكهه بتاعى بقا انضف من الصينى بعد غسيله ..
الستات دول الست الكبيرة قريبة ماما والباقيين متجوزين ولادها وعيال ولادها . وعلاقتنا بيهم مش اوى اللى هى بنشوفهم فى المناسبات بس
كانوا قابلوها فى فرح ابن خالتى وقالوا لها هنبقا نزروك قالت لهم تشرفوا
بس مش الساعه واحده بالليل يعنى
ومش يقعدوا ياكلوا الاكل بتاعى والفاكهه بتاعتى
اعاااااااااااااااااااااااااااااا
انا شوفت المنظر ده من هنا وجريت على اوضتى ماما جت تقولى مش تقعدى مع الضيوف .. عيب اوى اللى بتعمليه ده
قولت لها ضيوف مين ياماما ده احنا اللى ضيوف عندهم انتى مشوفتيش اللى حصل
قالت لى معلشى وخرجت
بعد شوية لاقيت الست قريبة ماما الكبيرة عمال تنادينى بالصوت الحيانى حسستنى انى تايهه ولا حاجه وبيدوروا عليا .. عملت نفسى مش من هنا ومش رديت .. ماما دخلت قالت لى عيب كدا اخرجى ميصحش كدا وخرجت لاقيت الاوضة منظرها هباب الورد مرمى على الارض ... وعصير مدلوق وورق انا قاعده هتفرتك من الغيظ .. وكل لما حد يكلمنى .. اقوله هاه .. طيب
وانا اصلا مش مستوعبه ولا حرف من اللى اتقال .. مش معنى كدا انهم كانوا بيتكلموا هندى .. انما انا اصلا مش كنت مركزة .. وبعد ما زهقونا .. ايه ده انتوا عايزين تنامو .. طيب احنا ماشيين بقا
انا فى سرى .. ما بدرى ده انتوا قرفتونا قصدى شرفتونا ..
انا مش بخيله والله بس الموقف نفسه مش حلو يعنى
طيب مش قبل ما نزور الناس نختار الوقت
حتى لو الزيارة بالنهار المفروض اخد معاد واعرف هما مستعدين لزيارتى ولا لاء
يمكن عندهم ظروف او خارجين او اى حاجه تحسبا انى احط نفسى فى موقف مش كويس حتى مهما كانت درجة القرابة
هى مش بيوت الناس ليها حرمه ولا ايه

تعليقات

أول تعليق هيييه

معلش يا قاعدين يكفيكوا شر الجايين

فيه ناس كده بتجى زى القضا حاجه كده زى البارشوت

مع ان ده مش من الاسلام ولا أى حاجه
ومش وقت معلش بقى ضاعت عليكى العشوه والفاكهه يا خساره تتعوض انا برضه بتضايق زيك كده من الناس البارشوت
حصل خير

بجد طريقتك جميله طالعه من القلب
‏قال Unknown
والله بجد الله يكون فى عونك

انا جربت الموضوع دة برضة قبل كدة صحيح مكنشى نصف الليل بس الزيارة بدون موعد دة بتبقى مشكلة فعلا ياريت بجد نتعلم ناخد ميعاد مش عيب ولا غلط
ياريت
‏قال 3abdo me7tas
اولا سؤال صغي اوى اوى اوى اوى
انتى بنت ولا ولد افهم بقى كل موضوع الاقى فيه انك بتتكلمى على انك ولد يعنى فى البوست ده قلتى
وانا عمال آكل فى العشوة وكمان قلتى
وعمال ابص افهم بقى يا جدعان انا دماغى هتنفجر :P
المهم مكمل التعليق

انتى مش عارفه ان صله الرحم واجبه برضه الناس عايزين يكون صله الرحم بينكم وبينهم كويسه يا شيخة والساعه واحدة بليل زى واحده الصبح
صح ولا فيه غلط

وبعدين انتى مش كريمة بقى انتى بتقولى انك مش قلتى ليهم اتفضلو ولا حاجه كنتى تقولى بقى لو انتى جدعه أجبلكو تانى
وبعدين انا عايز اعرف ايه هى العشواية دى ها هى ايه ها
قولى قولى

ايه ده ورد مرمى على الأرض يااااه انتو عندكو ورد اصل انا مش عندى
:D

ربنا يكتر من القرايب انا بقول يا بنتى انهم شايفين ليكي عريس ولا حاجه ومعرفوش يفتحوكى فى الموضوع ساعتها
انا لو منك اتصل بيهم واعمل نفسي بحبهم بقى ومظام مش يمكن يطلع عريس احسن من العريس بتاع الجهه الأمنية بتاعك

على العموم انا بهزر معاك قصدى معاكى
:D
ربنا يكرمك يا رب
اللي مش مستوعبة بس هو تعامل مامتك مع الموضوع وكانه طبيعي
يعني ممكن يكون في حلقة مفقوده ولا حاجة
لو مكانك بصراحة مكنتش هرد ولا اقعد معاهم حتى لو الناس كلها هتزعل مني
‏قال Layla
هههه...موقف سخيف الحقيقة...فعلا مع المفروض الناس تتصل قبل ما تزور حد

انا لو مكانك ابقى اروح ازورهم في نفس الوقت تقريبا واعمل عندهم كل اللي عملوه عندي...واكتر شوية كمان

:DDD
‏قال Desert cat
حياه الأحلام
والله انا وقتها كنت هنفجر مش متضايقه بس
وربنا يحرمنى انا وانتى من زوار منتصف الليل
نورتى البلوج ياجميل
‏قال Desert cat
ايوية
اساسا عيب الزيارة من غير مواعيد
امال اخترعوا التليفونات ليه
فرضا ان اهل البيت فى حالة مش تسمح لهم يقابلوا حد
انا وانتى مقتنعين بالكلام ده
بس مين يقرا ومن يسمع
‏قال Desert cat
3abdo me7tas
انا بنت
والله العظيم بنت
والمصحف بنت
وبعدين الكلمات اللى انت مش فاهم من خلالها اذا كنت انا بنت ولا ولد دى مش تنفع تبقا مؤنث يا محمد
طيب اقعد مع نفسك كدا وجربها بصيغة المؤنث شوفها هتطلع ازاى
عايز تعرف العشوة كانت ايه
كانت عبارة عن شرائح من الكبده مع بعض السلطات والاكلة معمولة على مزاجى الخاص وبتقنية عاليه للغاية
ايييييييييه يلا ما اتهنيتش عليها

انت مش عندك ورد طب مش تقول كنت ابعتلك فى فرحك ياباشا هبعتلك فوكيه بحاله بس انت ابقى اعزمنى
‏قال Desert cat
أحمد سلامــه
انا امى دى يا احمد غيرى نماما يعنى انا ممكن حد يبص لى من غير ما يكون قاصد تلاقينى رايحه اساله بتبص لى كدا ليه بتشبه يعنى ولا هو فى ايه
بجر خناق يعنى
انما امى دى حونينة جدا وبتفهم فى الذوق
ده انا من كتر الذوق بتاعها كنت هقولها اطلعى بره انتى وقرايبك
بس خوفت احسن انا اللى اترمى فى الشارع
‏قال Desert cat
Marvel - واحد زهقان
تصدق فكرة
بس ده انا لو رايحه عند واحدة صحبتى والله لازم اتصل بيها الاول واعرف هى فين
مش يمكن راحت تلف من ورا اهلها ومفاهم انها عندى
يعنى اروح واحرجها
بالذمة ده كلام
‏قال غمض عينيك
ايه يانانا بس
انتي مش عايزة الناس تزوركوا ولا ايه...باين عليكي بخيلة اوي اوي
وبعدين ايه يعني جايين يزروكوا فجأه والساعة واحده بليل..عادي يعني الدنيا صيف
ومافيهاش حاجة حاجة لما تنامي خفيف يعني عشان الدايت

ياااه على كده انا مش هجيب فرح ونجيليك انا هخليها تدخل تغير هدومها تاني..يلا مع ان الدنيل بدري والفجر هيدن كمان شويه

سلام بقا
محمد سمير
‏قال Desert cat
غمض عينيك
تصدق يا محمد مخطرش فى بالى موضوع الدايت ده
اتارى الناس كان يهمهم مصلحتى وانا اللى فهتمتهم غلط
وياباشا انت وفرح توزورنا فى اى وقت البيت بتكو
انا مستنياكو الساعه 6 الصبح ان شاء الله
‏قال 3abdo me7tas
الا الا الا الا ايه يا ابو سمرة انت هتروح لوحدك ولا ايه طيب وانا هعمل ايه لوحدى خدنى معاك والنبى
نانا انا عايز فطار فى التمام بقى
ومش تبقى بخيلة معايا انا بقول اهو
وشوية ورد كده فى التمام
ابو سمرة انا مستنى تليفونك عشان نبقى نروح بدرى شوية عشان نعمل ليها مفاجئة
‏قال Desert cat
3abdo me7tas
يادى النور يادى الهنا انت ومحمد بيه سمير والآنسة فرح هتشرفونا
طب والله ياريت
ياباشا ده انا مش حفتكرك بشوية ورد ده انا هزرع لكو جونينة ورد
بس حاول تخلى الوقت متأخر شوية
يعنى قبل المغرب مثلا لان معندناش رجاله تخرج من بيتها بعد المغرب
الحريم بس ممنوع يرجعوا بيوتهم قبل الساعه 4 الفجر واللى مش تحترم مواعيدها وترجع بدرى نرجعها تانى مش ندخلها البيت علشان ترجع فى معادها وكمان تعرف ازاى تحترم المواعيد
من فضلك كان لازم يعرفوا انكم غير مرحبين
هناك اشياء لابد ان يوضع لها حد حاجة تفقع المرارة بجد
‏قال Desert cat
الطائر الحزين
ما هو انا اللى كنت غير مرحبه
وامى كانت متلخبطة بصراحة لا هى عارفه ترحب بيهم
ولا هى عارفه تقنعنى اتعامل معاهم بذوق
‏قال رحيق الحب
هاههههههههههههههههههههههههههه لأ بجد اما حتى موقف انا بجد عذراكى ده كله كوم وزوار نص الليل دول كوم تانى وبعدين انا بضايق جداااااااا من الاطفال اللى تقعد تبهدل الحاجة وتوقع وتعمل واهلهم جنبهم مفيش حتى كلمه عيب ولا اختشى بجد الله يكون فى عونك انا لو منك كنت مسكت العيال عجنتهم وشخطت فيهم يمكن اهلهم يختشوا على دمهم شوية وكمان يعلموا ولادهم الادب
بس الحمد لله انها زياردة عدت والسلام ومعلش يا بنتى واذا كان على طبق الفاكهة اللى اتنسف ولا يهمك تتعوض باحسن منه ان شاء الله

:)))))))))))
‏قال Desert cat
رحيق الحب
تصدقى انتى وصفتى اللى حصل بالظبط
واللى يا اختى العيال كانت عمال تبهدل وكان اهاليهم فرحانين
ومحدش حتى قالهم عيب ولا اى حاجه
العيال بتلعب فرحانه اصلهم جايين ملاهى مش بيت ناس
ربنا ما يوعدك بالزوار دول يا اختى

المشاركات الشائعة