ايدك على 110 جنيه رسوم نظافة

هو ايه حكاية النظافة اللى ماشية فى البلد دى
اصلى بسم الله ما شاء الله كدا اللهم ما لا حسد جالى موظف النهارده لاقيته بيقولى فين المسؤل عن المكان ده
انا الكلمة دى اصلا متعقدة منها هحكى اكيد تفاصيلها حاللا ...
خلينا فى الاخ اللى طب عليا النهارده زى القضا المستعجل ده الاول
قولت له اتفضل خير فى حاجه
الأخ : اه هاتى 110 جنيه
انا : ليه يعنى زكا رمضان
الا خ : لاء رسوم نظافة
أنا : رسوم مين طب ما انا بدفعها اصلا مع الايجار
لاقيته بيقولى ماليش دعوة باللى بتدفعيها مع الايجار
ده قرار اصلا نازل ان اى نشاط او مشروع شغال بيدفع كل شهر 10 جنيه نظافة يعنى فى السنة 110
قولت له يعنى ده غير اللى بدفعه مع الايجار غير اللى بيندفع كمان على فاتورة الكهربا
هى كل دى نظافة فى البلد
ده انا مش بشوف حد بيمد ايده فى الشارع ولو الراجل جه اللى مش يمد ايده فى جيبه ويديله حاجه اقسم بالله ما بيعبره ولا حتى بيفكر يشيل ورقه من قدامه ...
قالى انا ماليش دعوة يا استاذه .. انا عبد المأمور
قولت له طيب انا هوريلك حاجه ..
انت شايف الكنز الفاضية اللى فى الشارع هناك دى
قالى اه
قولت له انا اللى رمياه امبارح بالليل ولسه لحد دلوقى فى الشارع بتعمل ايه ... والله لسه فى الشارع قدامى لحد دلوقتى حتى وانا بكتب البوست ده ... قالى وانتى حد قالك ارميها . ما هو لو كل واحد فى ايده حاجه رماها البلد حتنضف امتا .. قولت له برمى بفلوسى والله بدفع رسوم نظافة مرتين فى الشهر ... مش ارمى براحتى ليه وكمان انت جاى دلوقتى تاخد 110 جنيه ده انا على كدا هقطع الورق اللى فى بيتنا كله وانزل ارميه فى الشارع ....
اخر ما زهق منى لاقيته بيقولى المهم دلوقتى انا عايز الفلوس ..
قولت له وماله اتاكد بس من هوية حضرتك واتاكد كمان من الناس اشوف مين دفع لك الـ 110 دول ومين مدفعهمش وفى النهاية ابقا افكر بقا ... قالى اتاكدى وماله بس هرجع تانى .. مش رديت عليه من فقعت مرارتى ... وبالفعل عملت التحريات اللازمة والاقى الموضوع بجد .. بس محدش دفع ولا بعبره برضه .. ...
الموقف ده فكرنى من فترة
كنت قاعدة نفس قعدتى دى والاقى واحد طول بعرض داخل يقولى فين المسؤل عن المكان ..
قولت له اتفضل
قالى جيبى 200 جنيه ..
قولت له نعممممممممممممم
ايه .. إيتاوة دول ولا ايه
قالى لاء دول حكم محكمة
يا نهارك اسووووووووود
محكمة
هو انا اعرفك ياراجل انت رافع عليا قضية وكسبتها كمان
حتى لو اعرفك ده فى الحالات اللى زى دى انا اللى بيتحكم لى بالنفقة
هو الزمن بقا ماشى بالمقلوب ولا ايه
قالى حيلك حيلك هو فى ايه
ده الاموال العامة كانت عامله لك قضيتين اه والله
الفقير لما يغتنى يتعمله قضيتين
قال ايييييييييييييييييييه ادارة سيبر بدون ترخيص
لو مش فى رمضان كنت قولت كلمة ابيحة ....
امال الملف اللى فى امن الدولة دة بيعمل ايه
ده غير كمان الاستاذ امين الشرطة بتاع الاموال العامة لما جه وكان يوم اسود على دماغه
الاوراق اللى طلبها شافها
قالى مش مشكلتى
انتى خلاص اتحكم عليكى ولازم تدفعى الفلوس
قولت له وماله هدفع هاتلى ارقام القضايا دى
قالى خدى اهم هاتى الفلوس بقا
قولت له لاء المحامى بقا يبقا يدفعهم
طيب انا عندى استعداد اقفل ام السيبر اللى جايب لى وجع القلب ومجرجرنى فى المحاكم
زى ميكون متجوزة اتنين فى وقت واحد ده
وكل شوية محاكم ووجع قلب
بس يشغلونى هما بقا ...
ورسوم نظافة ايه اللى 110 جنيه دى على اساس ان الناس بتشوف وشها فى الشوارع الصبح من كتر النظافة هيوفروا المرايات على الاقل ولا عايزين ينظفوا جيوبنا ولا نظامهم ايه
ده ايه الحجج اللى ملهاش اى لزوم دى
السيد المسؤل معهوش فلوس يجيب لبس العيد للاولاد
مش يفكر افكار جهنمية ويقول نظافة وبتاع
ما يتكلم بصراحة وممدوح اسماعيل يسلفه
او اى واحد من اللى اخدوا قروض وسابونا احنا ندفع هنا
يتبرع ويبعت له لبس للاولاد من البلد اللى طفش عليها
قال نظافة قال
امال مش نظافة
طب يقولوا حاجه تتصدق

تعليقات

اه يااااااني
كان الله في عونك وعوننا على اللي بيحصل ده

بس الغريب في الامر موضوع الاقضايا دي مافيش حد بلغك باي حاجه قبل صدور الحكم؟؟؟؟؟

لا حول ولا قوه الا بالله
‏قال son's egypt
السلام عليكم
الواحد بيحس ان البلد نظيفه اوي من كتر رسوم النظافه اللي الواحد بيدفعها
وفي الاخر نشوف الزباله في الشارع والكلاب والقطط بتلعب معاها
‏قال 3abdo me7tas
إس إس السلام عليكو

إزيك يا نانا انا قلت احود عليكي أشوف أخبارك ايه طالما انتى مش مبعبرانا
ماشى يا ستى براحتك خالص بس انا رخم بقى وهاجى فى اى وقت المدونة دى

ايه اللى انا قريته بره ده فلوس ايه وبتاع ايه
هو انتى لحقتى تتهنى بالقرشين اللى انتى كسبتيهم من السيبر لحقو شمو خبر قالو مش نخليها تتهنى بيهم
لا حول ولا قوة الا بالله
والله انا مش عارف اقول ايه
بس فيه حاجه مهمة لحظتها فى البوست ده يا نانا
بجد والله
بالنسبة لعلبة الكانز اللى انتى رمتيها فى الشارع
انتى جبتيها فى الموضوع ليه عشان تعرفينا انك بتشربى كانز يعنى والله تلاقيها كيس بست وبتضحكى علينا
:P
مش تزعلى يا بنتى انا بهزر
وبمناسبة ال200 جنيه اللى الأخ عايز ياخدهم يعنى الحكومة تجيب فلوس منين يعنى قالو هى نانا اللى معاها فلوس هاتوها
على العموم ربنا يستر علينا ويطلعك من المشاكل اللى بتنزل عليكي دى
بس معلش بعيد عن الموضوع معلش معلش معلش انا عايز مكان السيبر بتاعكم عشان عايز أقعد عندك ساعه ببلاش
انا من هنا من جنبكم من المنصورة يعنى ساعه مش هتفرق يعنى يا نانا
وعايز كمان كانز بيبسي دايت عشان انتى عارفه السكر وسنينه
يلا أسيبك بقى بعد ما وجعت دماغك
ويا ريت السيبر فى رسالة كده وبتاع
معلش طلب أخير
ازى البنت اللى كانت بتهددك يا رب تكون بخير
ولا الحرامى اللى داس عليكي وسرقه يا رب يكون اتمسك
يلا خير
مش عايزة حاجه اصل انا تعبت من الكتابة
انتى عارفه لو الصفحة هنجت والله ما انا كاتبها تانى
انا نسيت أصلا اول الرد كان ايه
طيب يلا خير
سلام بقى لانى تعبت بجد
طيب
ماشى
يلا
سلام
رمضان كريم
الله أكرم
ماشى
طيب
سلام بقى
ما تردى يا ستى
ســــــــــلام
‏قال غمض عينيك
ايه يعني يا نانا 110 جنيه نظافة ولا 200 جنيه حكم محكمة

نقطة في بحرك يا نانا وانتي الكلام دا يفرق معاكي؟؟
هو انتي مش فاتحه السيبر دا عشان تزكي ع الحكومة من حر مالك ولا ايه
وبعدين تعالي هنا انتي كمان بترمي الحجة في الشارع....لا لا مكانش العشم
طب ادفعي بقا عشان يشيلوا بقا الحاجة

يلا كان الله في عونك
بالموناسبة
ليكي عندي هدية جامده مووووت
روحي خديها من المدونة
سلام
‏قال Desert cat
اسكندراني اوي
ربنا يكون فى عونا جميعا
ويرحمنا منهم
بالنسبة للقضايا طبعا محدش بلغنى
لانى لما سالت انا معرفتش اصلا ان عندى قضية ولا حاجه زى كدا
كان الرد اصل دى قضية صغيرة وحاجه تافهه
طيب ما امين الشوربة على راى نوارة شاف الورق اللى كان عايزه يشوفه
قالوا اصله بيبقا مطلوب منه عدد قضايا ولازم يعمل شغل
مش مهم هو شاف ايه
المهم انه اخد بيناتك وخلاص
واتحكم من غير ما يعبرونى ويبعتوا لى حتى ورقة من غير طابع بوسطة
حكومة معفنة مستخسرة الورقة حتى تبعتها تقولى
‏قال Desert cat
son's egypt
عليكم السلام
انا من وقت ما سمعت بالقرار الهايل اللى هينضفنا قصدى ينضف البلد ده طول ما انا ماشية فى الشارع مش شيلت عينى من على الارض
وكل شوية اقول امال اللى فى الشارع ده ايه
مش زبالة برضه
منهم لله
‏قال Desert cat
3abdo me7tas
انا كل يوم عندك فى المدونة والله
حتى فى البوست اللى قبل الجديد ده قولت لك انت فين وسالت عليك حتى اسال عم عبده البواب هو مش قالك ولا ايه
الراجل ده انا لما اشوفه هبستفه قاعد هو على بوابة المدونة زى قلته كدا الواحد كل لما يساله عليك ينسى يقولك
هما مش لحقوا شموا القرشين ولا بتاع
مش موضوع شموا القرشين
يعنى مجرد ما تفكر انك تعمل مشروع والفكرة لسه فى دماغك ممكن قابلة للتنفيذ وممكن ترجع فى كلامك
تلاقيهم ناطين لك هات ضرايب وتامينات واموال عامة على اساس انى سارقه البلد ويخترعوا لك فى الهتهات ولما تيجى تسال يقولك لك مش انت بتفكر فى مشروع
حد قالك تفكر
بالنسبة لعلبة الكنز هى جت بظروفها والله
وكمان علشان تعرف برضه انى بشرب كنز امل ايه .. يكونشى البيه المسؤل خد باله انى بشرب كنز قال ندفعها على الفاضى والمليان .. خلاص مش شاربه حاجه تانى حبقا اشرب فى عشه الفراخ بعيد عن الانظار ...
طبعا الود ودى اكتب لك عنوان السيبر وعنوان بيتنا
مش تفهم غلط هو بس تبقا عارفه وخلاص يمكن تنزل بلدنا فجأة ولا حاجه
بس انا مش عارفه ابعتلك ميل ازاى بصراحة
معلش يابنى ينوبك ثواب لو تعرفنى
برضه العلم وحش والجهل نورن
‏قال Desert cat
غمض عينيك
اه على رايك يا محمد انا اللى هدفع مرتبات الموظفين فى الحكومة وانا اللى هنضف لهم الشوارع
وبعدين علبة الكنز مكنتش عامده متعمدة ارميها علشان اوريها للموظف اللى جاى ياخد ال110 جنيه ولا كنت اعرف انه جاى اصلا ده هو جه زى القضا المستعجل كدا
انا بس قبلها بالليل كنت واقفة مع بعبير .. بعبير دى تبقا صحبتى يعنى وعمال نرغى وكنا بنتكلم بره قدام السيبر علشان محدش من الناس اللى جوا يرمى ودانه معانا ويسمعنا اصلنا كنا وقتها بنقول اسرار حربية وانا بالصدفة كنت باشربه المنكر ده الا وهو البيبسى كنز والعلبة فضيت .. اعمل ايه انا يعنى افضل مساكها فى ايدى اذل نفسى بيها ما هى خلصت رحت رمياها بقا ..
وبالنوسبة بقا للهدية
فانا بصراحة مش عارفه اشكرك ازى ولا ازاى ولا ازاى ولا ازاى
ده اا قربت اعيط من الهدية
اصلى لسه جاية من هناك دلوقتى وشوفتها
‏قال 3abdo me7tas
والله انتى زى العسل يا نانا

ههههههههههههههههههه
هههههههههههههههه
ههههههههههههه

طيب يا ستى خلاص خبينا القرشين نخليها بعد الفطار بس قوليلى بقى انتى بتشربى كنز ليه ها
انتى مش سمعتى انها مضرة
والله مضرة
يا ريت تغيرى بقى اى عصاير وخلاص
بجد مضرة يا نانا خلى بالك بس من نفسك وبلاش تهور
أصل تلاقى وزارة الصحبة بعتالك محضر وعايز هو كمان فلوس

ههههههههههه
ههههههههههه
اما بالنسبة للايميل هتلاقيه فى البروفيل عندى ويا ريت لما تبعتى حاجه ابعتيلى 5 جنيه ولا أقولك حوليلى خمسه جنيه على التليفون

salam ya nana
ههههههههههه
هههههههههه
‏قال Desert cat
3abdo me7tas
ربنا يخليك يا عبووووود
وبعدين انا سمعت انه فعلا مضر
بس انا بشربه من زمان اوى ومحصليش حاجه
الله اكبر يعنى ربنا يدينى الصحة
يمكن علشان بحبه مش حاسه باضراره
ما هو الحب اعمى زى مبيقلوا وبيعمل اكتر من كدا

بالنسبة بقا للميل
انا مش لاقياه والله
ودورت عليه كتير ومش لاقيته
ما تكتبه هنا وخلاص
وانا هبقا احذفه بعد ما اشوفه وخلاص
جرب كدا
‏قال سلوى
السلام عليكم ورحمة الله وبركاته
أول زيارة لمدونتك
وبعدين أجد قضايا وفلوس نظافه وكانز
آدي أخرت المشاريع
طبعا الحكومة عرفت أنك من سيدات ( آنسات ) الأقتصاد في البلد
فقالت تدفع بقى
ربنا يعينك
ويجعله عامر وتصرفي ع الحكومه
‏قال حدوته مصرية
هههههههههههههه
اسلوب كتابة جميل ودمك خفيف

هما كده يجوا على الشعب الغلبان ويقعدوا يدفعوه و يا ريتهم قصاد خدمات فعلا

هما ياخدوا الفلوس و برضه مش هينضفوها

تحياتى
‏قال 3abdo me7tas
نانا
معلومة بسيطه ليكي
الحاجات دى أضرارها مش بتظهر فى ساعتها أضرارها بتظر تراكمى يعنى بعد فترة بتعمل حاجات وحشه بعد الشر عليكي يعنى

بجد والله مضرة
طيب حتى قللى منها جربى مش هتخسرى حاجه
بالعكس انت هتوفرى فلوسها للراجل بتاع 100 جنيه او للمحضر بتاع 200 جنيه

كده يعنى

ربنا يكرمك يا رب
‏قال 3abdo me7tas
أزال أحد مشرفي المدونة هذا التعليق.
‏قال Tamer Nabil Moussa
هيا كدة البلد تيجى على الغلبان وتسيب الحيتان

مش كل شوى نجد رسوم وحاجات غريبة وحاجات بتحصل مش نعرف ليها اسباب

لكن كل تشترك فى ادفع بقى وخلاص

تحياتى
‏قال Desert cat
Salwa
معلشى بقا يا سلوى
جاية على سيرة الحكومة
والقضايا بس ما تزعليش
على الاقل لاقيتى حتة نظيفة تقعدى فيها
اصل فى كمان رسوم نظافه
‏قال Desert cat
محمد ياسر
الله يخليك يا محمد ده من زوقك
هما مش بياخدوا الفلوس علشان ينضفوا البلد
هما قصدهم ينضفونا احنا
اصل الفلوس بتبقا تقيلة كدا على جيب الواحد
فقالوا يخففوا عنا
وينضفوا جيبونا خالص
كتر خيرهم بصراحة البلد محتارة تنضفنا ازاى ولا ازاى ولا ازاى على العموم يشكروا برضه
‏قال Desert cat
3abdo me7tas
يعنى من وجهة نظرك ابطل اكل واشرب
علشان اوفر وادفع للحكومة
حسبى الله فى دى حكومة ياراجل
ها احاول ابطل البيبسى يا عبده حاضر
من هنا ورايح حشرب ويسكى
‏قال Desert cat
3abdo me7tas
على الا انسى اللد بدفعه بسبب ومن غير سبب ده
بالمناسسبة انا بعت لك
الرساله
بس مش عارفه وصلت ولا لاء
‏قال Desert cat
Tamer Nabil
ما هو ياريت رسوم يا تامر وحاجه ليها سبب
الا لما بيلاقوا نفسهم فاضيين بيقعدوا يخترعوا ازاى يقلعونا هدومنا
سورى
قصدى يعنى ينضفوا جيوبنا
‏قال bastokka طهقانة
للاسف الشديد اللي زي دول كبيرهم عشرة جنية تحت الدفتر و يمسح اسمك من الكشف و لو عايزة يمسحة من سجل المواليد اصلا يعني هم بيسترزقوا من الرشوة مش من تحصيل المبلغ الاصلي
نظافة!!!!!دي كلمة قديمة اتمسحت من قاموس الشارع المصري برضه للاسف

مفروسة زيك بالظبط
اوروفوار
‏قال بهلوله
قطه صحراء مين ياختى ده انتى جوه الغابه
غابه الحكومه وشغل التلات ورقات وفتح عينك تاكل مهلبيه
اولا احييكى جدا جدا على اجتهادك ومشروعك وهو محل السييبر
وان كنت اعرف ان السييبر كله مشاكل حتى ان بعض الشباب لا يتحملون مشاكله
ثانيا اعتب عليكى جدا لانكى بترمى بالكانز فى الشارع وحتى لو بتدفعى رسوم نظافه لا يعطيكى الحق فى هذا العمل
ثالثا كل شهر 10 جنيه فى سنه ب 120 جنيه مش 110 ودى ثغره فى ملف القضيه ارجو ان تستغليها
رابعا احييكى جدا على مدونتك الممتازه دى وعلى اسلوبك الجميل
خامسا ارفع ايدى للسماء معاكى وادعى واقول يارب
ابعد شياطين المحافظه والنظافه والحى و.........وكل شياطين الحكومه عن شبابنا المكافح
‏قال Desert cat
bastokka طهقانة
بيحصل يا حبيبتى
بس بيفضل يتسنزفك بقا
اصل دول لما بتعوديهم نظام ابجنى تجدنى
بتلاقيهم لازقين لك
جربتها فى كذا حاجه
‏قال Desert cat
بهلوله
اولا انا متشكرة جدا لزيارتك الجميلة
ثانيا انا رميت الكنز الشارع اصلا كان فيه زباله
ثالثا كلامك صح هما فعلا يبقا 120 جنيه بس انتى عارفه موظفين الحكومة مخلصين محو امية
بس اكيد يعنى كان هيدفعهم لى
رابعا ربنا يتقبل دعائك
وانا بصراحة فى كل وقت بادعى عليهم
ربنا يحرمنا بقا من حكومتنا الموقرة دى
‏قال soka
السلام عليكم
ازيك
كل سنه وانتى طيبه
ماشاء الله الشوارع بتشف وترف من النظافه بقت بافته بصراحه
مش عارفه ازاى مش راضيه تدفعى
كل شوارع مصر نضيفه
ولا انتوا بتستغلوا الحكومه عشان هى طيبه حاجه تضحك والله
ههههههههههههههه
‏قال soka
نسيت اقول انى بتريق طبعا
لا يكون حد فاكرنى بتكلم جد ولا حاجه
‏قال مواطن زهقان
صح النظافة مالية الشوارع
ماتلقيش ورقة واحدة فى الشارع
وعمال النظامة قايمين بواجبهم على اكمل وجه
صح ولا انا غلطان
طبعا بقا لازم ندفع رسوم
عشان تطلع وتتنهب فوق
ولا انا غلطان
لا لا
انا كدا ب
لا ياهريدى
‏قال غير معرف…
بالنسبه لموضوع النظافه ورسومها الحمد لله الصعيد مش تبع الدوله علشان ينضفوه او يعملو رسوم نظافه بالنسبه لموضوع الغرامه مكنتيش دفعتى وكنتى عملتى معارضه
‏قال Desert cat
soka
اه تصدقى يا جميل انا اللى غلطانة فعلا
شعب حاقد الحكومة سهرانة على راحتنا وشقيانة بينضفوا الشوارع وكمان مش عايزينندفع
شعب نمرود
حبيبتى اان عارفه انك بتهزرى والله
ومين اصلا عاجبه اللى بيحصل ده
نورتى البلوج
‏قال Desert cat
مواطن زهقان
طبعا مش غلطان
واحنا اللى شعب عايز ياخد على قفاه علشان يعرف يمشى
‏قال Desert cat
رئيس جمهوريه نفسى
الصعيد مفيهاش دلوقتى
يمكن بياخدوها من بحرى لقبلى
بالنسبة للغرامة
انا عملت معارضة فى واحده منهم
والحكم اتايد تانى
يعنى لازم من الدفع
علشان كدا لازم ادفع الاتنين

المشاركات الشائعة