تجربة ومش هتعووووووود


صحيت من النوم بدرى على غير عادتى تماما كانت الساعه تقريبا 7 مع انى نايمة الساعه 3 وطول الساعات دى كان نوم قلق ... المهم الساعه وصلت 7 قولت مبدهاش قومت وعملت لنفسى مج الشاى الصباحى اليومى ... قعدت اقلب فى التلفزيون شوية ... زهقت جبت كتاب اقرا فيه شوية ... برضه حاسه بملل .. يالهوى كل ده ولسه الساعه 8 الا ربع ... اتصلت على بنت عمتى ... اتخضت بصراحةها يا نانا خير فى حاجه ...
انا : لاء زهقانة
طيب .. البسى وتعالى انا بعد شوية هنزل السوق وها اخدك معايا يمكن الزهق اللى عندك ده يروحان
انا : سووووووووووق لالالالالالالالالالالالاانا مبرحش اسواق
بنت عمتى : يا بنتى تعالى اهى حاجه جديدة تعمليها بدل ما انتى قرفانا جنبك على الصبح
انا : ومالك بتقوليها وانتى سعيدة كدا محسسانى انك هتاخدينى شرم .. لا يا ستى يعنى علشان اجدد انزل سوق روحى انتى انا مش بروح اسواق ... وبعد ما قفلت معاها الفكرة زنهرت فى دماغى .. ( محدش يقولى يعنى ايه زنهرت بس انا ببقا اسمعها كدا ) اتصلت بيها تانى :::
رحاب : يا فتاح يا عليم هو انا مش ورايا غيرك النهارده عايزه ايه تانى انتى مش رزعتى السماعه فى وشى اولانى ... عايزه ايه تانى
انا : قولت لها اسمعى بس مش تبقى رغاية كدا انا باتاكد انك لسه فى البيت انا جاية لك وهنزل معاكى السوق ولبست ورحت عند بنت عمتى ... وتوجهت معاها الى السوق وعلى مدخل السوق واحنا ماشيين فجأة سمعت الصوت ده ...
مسكت رحاب بنت عمتى من ايديها ووقفت .. مش كنت بتصنت .. لان الصوت كان عالى اصلا
ايه ده يا ست هو انا بشحت منك بين البايع والشارى يفتح الله
الست : وانا مش شاحتاه يا عين امك ده انا مشترياه وتعبانة فيه
وفجأة ترااااااااااااااااااااااااخ قلم محترم على وش البنت اللى بتشترى ويلا من هنا يا بنت الـ ( تييييييييييت ) والبنت واقفه ايديها على وشها ومذبهله لا هى عارفه تعيط ولا هى مستوعبة اصلا ايه اللى بيحصل ده كل اللى بتعمله واقفه حاطه ايدها على وشها مكان القلم واتمسمرت فى مكانها عمال تبص للست اللى ضربتها بس .. والست اصلا مش مبطلة شغالة كلام كله زبالة زبالة زبالة
الناس عمال تتلم ويتفرجوا كالعادة وبس وانا عمال كل شوية اضغط على ايد رحاب لما فعصتها لها ...
انا نفسى مش كنت مصدقه اللى بيحصل كنت حاسه انى جوا فيلم ...
وفجأة رحاب .. انا همشى ...
رحاب : تمشى فين ؟؟؟
.. لا يا ستى ده احنا لسه مدخلناش وحصل كدا امال لما ادخل هيحصل ايييه وما استنيتش لما ترد عليا وسبتها وجريييييييييت
هو احنا بنعمل فى بعض كدا ليه مش مستحملين بعض ليه والناس بتشتكى وبتقول تعذيب فى السجون طب ما اللى حصل ده مكانش فى سجون ده كان فى الشارع ومن مواطنة لمواطنة تانية ومن غير اى حاجه غير انها كانت بتطلب منها تتكلم بطريقة زوق طيب بنعمل فى بعض كدا ليه مع اننا ولاد بلد واحدة ولو فى قانون يحترم كانت الست دى قدرت تعمل كدا فى البنت الضعيفه اللى كانت واقفه قدامها ايه اللى بيجرى لنا .. وبنعمل فى بعض كدا ليه ؟؟؟ بندوس على بعض ليه ... بنهين كرامتنا بادينا علشان ايه ؟؟؟ انا بدل ما كنت زهقانة بس .. دلوقتى جالى اكتئاب ...

Comments

التراحم راح من بين الناس
ارحمو من في الارض يرحمكم من في السماء

وبما اننا ما بنرحمش بعض فربنا مش حيرحمنا

لازم نرجع لتقاليد زمان
زي ما كنا بنشوفها في الافلام القديمه
نهارك سعيد
ممنون ليك اوي
اشكرك من كل قلبي

لازم المفردات دي معانيها ترجع تتغرز تاني داخل نفوس الناس
والا نقول على الشعب كله يا رحمن يا رحيم

تحياتي على نقلك لاحد صور ظلم النسان لاخيه الانسان
للاسف غياب رجال الشرطة عن الشارع المصري وصلنا للنتيجة دي

اللي عايز يضرب حد يضربه واللي عايز يشتم حد بيشتمه...بقينا عايشين في غابة للاسف
ايوية said…
ان الله لا يغير ما بقوم حتى يغيروا ما بانفسهم

فعلا احنا مش راحجمين بعض ولا طايقين بعض وبنستغرب اية الى بيحصلنا
Desert cat said…
اسكندراني اوي
حضرتك منظر الست وهى بتشتم فى البنت مقزز بشكل صعب جدا
وكان البنت ملك يمينها فكرتنى بمرات ابوسندريلا
ياريت لو ترجع للشارع المصرى ربع اخلاق زمان
للاسف ضاعت كل المعانى
تحياتى
Desert cat said…
Marvel - واحد زهقان
يا فندم اذا كان راجل الشرطة دلوقتى بيشوف اللى بيشتمو بعض وبيضربوا بعض وبيمشى ولا كانه شايف حاجه
غياب الضمير وانعدام القيم
خلى الاشكال دى تنتشر بشكل مزرى
احترماتى
Desert cat said…
ايوية
ونشتغرب ليه اللى بيحصلنا واحنا مش راحمين بعض
قانون الغاب
القوى بياكل الضعيف
3abdo me7tas said…
اولا مبروك والف مبروك على الاكتئاب

اكتئاب ايه يا بنتى هو انتى شوفتى حاجه عشان تقولى اكتئاب
وبعدين الحاجات دى كل يوم بنشوفها بس انا مستغرب على حاجه هى البنت اللى اتضربت متكلمتش ليه ده اللى عايز اعرفه
المهم
مش عارف
يلا كويس انى كتبت الكلمتين دول
ربنا يهدينا جميعا
عادي عادي
هما نزلتين تلاته من دول وكله هيبقى عادي
مش في السوق بس..لا في السوق والمواصلات والشغل وكل مكان
انا اعرف دكتور ضرب طالب في امتحان عشان جاوب غلط
الناس مبقتش طايقة وبقت روحها ع الاخر ومستعده تعمل اي حاجة
وزي ماعبده محتاس قالك البنت بردو غلطانه انها ماردتش وقالبتلها الحاجة على دماغها
اص مبقاش ينفع الا كده
بقت غابه وكلها ديابه

تحياتي ليكي
محمد سمير
Desert cat said…
3abdo me7tas
الله يابرك فيك يا محمد
شكلك فرحان فيا
البنت متكلمتش ليه انا بصراحة مش عارفه
بس هى شكلها اتفاجأت بالقلم اللى اكلته على وشها
علشان كدا وقفت حاطه ايديها مكانه فرحانة بيه باين اصل محدش اتضرب الا هى
علشان كدا مكنتش عايزاه يهرب من على وشها
والله حاجه تفقع يا بنى
Desert cat said…
غمض عينيك
موضوع المواصلات والاسواق ده هنقول ناس عقلها على ادها
انما الدكتور اللى ذرب الطالب ده كان ماله وقتها يعنى
ربنا يشفى الناس
انا عن نفسى اى حد بيعملى حاجه بردها لها مرتين
نظام اللى يبص لى بعين ببص له باتنين
لانى جربت ابقا هادية وبنت ناس لاقيتهم بيفتكروه ضعف وبيزيدوا اكتر
ربنا يهدى الجميع
سجدة said…
مش عارفة بجد الناس مش طايقة بعضها من الغلاء ولا إنحدار الأخلاق
ولا ايه بالضبط
لازم الواحد يحاول يوصل للرحمة ومجاهدة النفس للوصل إليها
ربنا يرحمنا يارب
Desert cat said…
غمض عينيك
يا سجدة الاخلاق واحترام الذات مالوش علاقة لا بغلاء الاسعار ولا حتى بالحرب العالمية
المشكلة ان الانحدار الاخلاقى بقا هو السمة السائدة فى المجتمع
ولا حول ولا قوة الا بالله
3abdo me7tas said…
استنى تعالى تعالى
انت بتقولى لابو سمرة ان لو حد عملك حاجه بترديها اتنين
طيب امال البنت اللى بتهددك انت مش عملتى معاها حاجه ليه وقفلتى على الموضوع يعنى من زمان
هى ايه اخبارها صحيح
انا ممكن أساعدك واخليها تكره اليوم اللى هى عرفتك فيه والله
يلا خير
انا مش بحب انرفزك او احرق دمك بس بفكرك بالحرامى اللى داس عليكي بالمرة
:P
أخف دم said…
يعنى اللى يحب يغير جو يروح السوق طيب ؟؟
ده حتى الرسول وصانا اننا نقول أول ما ندخلها الشهادة عشان دى أماكن الشيطان وأحلى اماكن بيحبها الله يحرقه ..
وبعدين كويس انك روحتى بدرى عشان الموضوع مش موضوع قلم عادى على وش بنت .. وما خفى كان أعظم ..
ربنا يلطف بينا ونصلح نفسنا الأول
Desert cat said…
3abdo me7tas
يادى الفضايح
انت ايه يا محمد ما بتسترش ابدا
يا سيدى الحرامى فاجأنى
اصله ناوى يسرقنى يعنى مش هيقولى بعد اذنك ممكن اسرقك
وعملت عملته وهرب بس اتمسك ياباشا
ورجع لى الموبايل بسسسسسسسسسسسس
الفلوس نو
الاوراق والبطاقة والكارنيهات والذى منه اترمى فى اقرب بحر قابله
وبالنوسبة بقا للبنت
فدى انا معبرتهاش اصلا
وفضلت تبعت رسايل وتاكل فى نفسها لحد ما زهقت او تقريبا سكوتها ده الهدوء الذى يسبق العاصفة
والله ما انا عارفه الظبط
ربنا يستر بقا ودعواتك يا محمد
Desert cat said…
أخف دم
اعمل ايه بس يا اشرف
انضحك عليا
افتركت السوق ده هيبقا فيه مصاصة
طلع فيه ضرب بالاقلام
3abdo me7tas said…
يا بنتى انتى فين والله انا خايف ان البت رجعت ليكي تانى
ربنا يستر ابقى طمنينا بس لا أكتر
غريبة
انتى ما بتركبيش ميكروباصات يا قطقوطة ولا ايه ؟

ده السواق طول ما هو ماشى .. يا ابن التييت واصل انت تراباتيت واديها
ودقى يا مزيكا

انا مرة شفت خناقة بين واحدة استغفر الله العظيم وسواق ميكروباص ... مش عايزة اقولك ان السواق صعب عليا من زفارة لسان المخفية

استغفر الله العظيم
اهوا كل الاشكال دى هتتعلق من لسانها يوم القيامة ان شاء الله

انا بقيت عايزة اعمل غسيل لودانى بالكيماوي من القرف الى بنسمعه طول النهار

ربنا يرحمنا من عنده

سيبك مافيش احلى من الطريق الصحراوي :)
Desert cat said…
3abdo me7tas
ما تخافش يا محمد
انا حى ارزق
بس كنت مشغولة شوية
ميرسى اوى على سؤالك
ربنا ما يحرمنا منك يا باشا
Desert cat said…
بنوتة من وسط البلد
لاء بركب يا حبيبتى ميكرؤوباصات
وبشوف
بس حتى سواثقين الميكروباص مش بيبقثا رد فعلهم سريع زى اللى حصل من الست اللى فى السوقث دى
دى انفجرؤت فى اثقل من ثانية
زى ميكون كانت متحفزة لاى حد يتكلم معاها حتى لو كان ثقالها صباح الخير
اللهم احفظنا
دي حاجه عاديه يعني بتحصل كل يوم
عشان انتي أكيد أكيد في مصر
ياحلاوتك يامصر

ياني ياني

مهبول
Desert cat said…
مهبول ومهبوله
ما هو للاسف اهانة الناس لبعضها بقت هى الشئ السائد فى كل مكان
لا حول ولا قوة الا بالله
ؤربنا يهدى الجميع
شرفت ياباشا
3abdo me7tas said…
ابقى تعالى يا بنتى زورينا فى البلوج انا كاتب موضوع جديد جامد وعايز اعرف رأيك فيه ايه يلا تعالى بقى بسرعه
Desert cat said…
3abdo me7tas
من عونيا ياباشا
هركب الناقة الفور باى فور واجى لك حالالالالالالالالا
ايه ده ايه الوحشية دية
بتقولى الناس جرى ليها ايه
جرى ليها حاجات كتير غيرتها واتغيرت مبقاش حد طايق حد مبقتش الناس تحب بعضها زى الاول وكمان كل واحد بيقول يلا نفسى ودلوقت الزمن بيحكمه الاقوى والضعيف بقى ليه ر بنا
احنا فى زمن الكبير مش بيرحم الصغير والقوى بيستغل الضعيف
بس ربنا موجود برضو

من الحمق ان القوى يغفل ان هناك من هو اقوى منه فهو كل الكل موجود
الله

Popular posts from this blog

قميص دهشور

كل تحرش وانتوا طيبين