انا بتهدد يا جدعااااااان



أنا عايزه الجماعه بتوع علم النفس يحضرونا حد يجى يقولى اسمه ايه اللى بيحصل ده .. اصله عدى الشيزوفرنيا بمراحل ..

الموضوع ده مش من الخيال ولا هو فيلم خالتى فرنسا بس برؤية مختلفة .. إنما ده حصل بجد وبحق وحقيقى .. لاء ده ولسه حتى الآن يعنى عرض مستمر ...

بداية الأحداث كان أول شهر 4 اللى فات يعنى من حوالى 4 شهور ... بما انى واحدة فاضية هو مش فاضية اوى يعنى لان عندنا سيبر والمفروض انى المسؤله عنه .. بس برضه فاضية .... لاقيت الشيطان عمال يوسوس لى ويقولى انتى مش ينفع كدا طول النهار قاعده على النت قومى شوفى لك حاجه اعمليها ... واستمعت لنزعات الشيطان ومخطرش فى بالى غير الجيم ... مع انى كلى على بعضى طول بعرض 60 كيلو ويمكن اقل شوية .. بس يلا مش مهم ما هى الرياضة للجميع والشيطان ده كان فى شهر 2 والغريب انى فى الجيم حتى الآن .. نخش فى الموضوع على طول .. بقا يا عمى . لا ده مش غبى منه فيه .. نكمل موضوعنا .. فى شهر 4 جت وجه جديد عندنا فى الجيم .. عاتشى مش غريبة يعنى .. بس الغريب ان الاخت الوجه الجديد عمال تبص لى طول الوقت بشكل ملفت جدا .. لدرجة انى شكيت انها فى شهور الوحم الأولى وبتتوحم عليا مع انى مش صوفيا ولا جوليا ... وسالتها .. انتى بتبصى لى كدا ليه .. قالت لى عادى اصلك لذيذة وشخصيتك لفتت نظرى .. قولت ( صلاة النبى ) وخلصنا فى اليوم ده على كدا .... فى المرة اللى بعدها أول ما شافتنى .. قالت لى اسمك أيه .. قولت لها نانا .. قالت لى وانا فلانة واسترسلت فى الكلام وعايشه فى الكويت ولسه جاية من اسبوع وحرجع تانى بعد 15 يوم وخطوبتى بعد اسبوع على رجل اعمال مليونير هو صديق جمال مبارك ... انا قولت جمال مبارك ابن ريسنا وريسنا يا حيلاوة .. انتى متاكدة من الاسم ده يا بنتى ولا واحد عادى اسمه جمال مبارك .. قالت لا جمال ابن ريسنا وريسنا ده مليونير وكل صحابه هاى كلاس .. ده حتى دافع مهرى 6 مليون جنيه ... انا قولت وبتتمرن معانا وفى الجيم ده ايه البونية المتواضعه دى .. اكيد البنت دى فى طيارة مستنياه بره اضعف الايمان يعنى توصلها بيتها .. المهم خلصنا من هنا ولاقيت واحدة متوشحة بالسواد ... لابسه عباية سودة وطرحة سودة ... قولت عادى ما هى كانت عايشه فى الكويت والكواتيه بيلبسوا عبايات سودة مش مهم المظهر بنت متواضعه بقا ... خرجنا من الجيم بقولها ايه ده انتى حتمشى على رجليكى .. قالت لى امال اعمل ايه .. قولت لها يعنى يكون عندك سواق ولا حاجه .. قالت لى لاء اصل انا لسه حشترى عربية .. قولت لها انتى ساكنة فين قالت لى هنا واختارات انضف شارع فى فاجوس انجلوس ... وقالت لى ساكنة فيه وسكنه فى عمارتهم .. قالت لى وانتى رايحه فين دلوقتى قولت لها حروح السيبر سالت فين مكانه قولت لها هناااااااااااك اهوه وشاورت لها عليه لانه خلف الجيم مباشرة ... وتبادلنا ارقام التليفونات ... وتانى يوم الساعه 12 لاقيتها بتتصل وبتقولى انها فى البنك وحتيجى لى السيبر .. قولت طيب تمام بس اوعى حد يسرقك دى انتى فى بنك يا حجه ... وجت لى .. ومش كانت اخر زيارة .. كانت يوميا تيجى لى السيبر وتقولى اصلى كنت فى البنك ... كل يوم فى البنك ده ايه الفشر ده .. وفى مرة من ذات المراير احنا قاعدين بندردش وفجاة دخلت بنت السيبر وسلمت عليها ودخلت قعدت على جهاز بعيد .. ما تقعد وانا مالى ... المهم كانت الدردشات اليومية بتاعتنا بتدور حوالين ان ابوها وكيل وزارة .. وامها دكتورة .. وان واحد كان حينتحر فى المقطم لما عرف انها اتخطبت لدرجة انه قالها حجيب لك عربية همر وشقه تمليك بس ده ماله الاخ ... هو جرى ايه فى الدنيا يا ناس ... طبعا كل يوم احس انى باخد على قفايا مش هاضمه الحوار كله على بعضه ... وبعد ما مشيت صديقة الجيم رحت سالت البنت اللى دخلت وسلمت عليها .. انتى تعرفيها منين ؟؟؟ قالت لى انها جارتها .. قولت لها وهى كانت عايشه فى الكويت قالت لى نعمممممممممم ... ده احنا عايشين فى قرية ........... وعمرى ما شوفتها خرجت منها بصراحة .. اننن ااااااااااااااه ... تشششششششششش .. قولت لها طيب مخطوبة لرجل اعمال وسديك ريسنا المستقبلى ... قالت لى ايييييييييه .. ده مشعارفه يبقا مين وابن مين فى البلد عندنا ... (اه يا قفايا ) ... قولت لها ابوها وكيل وزارة ... قالت لى نعمممممممممم طب مامتها دكتورة ... كل الكلام ده طلع كدببببببببببب ... كفايييييييييييية مش عايزه اسمع اى كلام تانى .... طبعا الشيطان اللى جوايا انتصر عليا وخلانى اتصل بيها واقولها انا عرفت عنك كذا وكذا .. ليه يا بنتى يا حبيبتى تكدبى .. ذنبهم ايه اهلك تتبرى منهم .. دول ناس شرفاء يعنى .. قالت لى انا عارفه مين اللى قالك والبت دى كدابة .. وهى حقودة وبتغير منى اصل مامتها الشغالة بتاعتنا ... قولت يبقا قفايا ملوش حق يوجعنى ... ورحت قايله للبونية جارتها الحوار كذا وكذا ... قالت لى ايييييييه .. طب انا بقا حروح اخلى امى الشغالة اللى عندها دى تعرفها مقامها .... بعد كدا انا من شدة الالم اللى فى قفايا روحت متصلة بيها وقولت لها بصى احنا حنبيع السيبر ومش حكون موجودة هناك ... ياريت مش تورينى طلتك البهيه تانى ... فات يومين ولاقيتها جاية ... ايه ده انتى هنا قولت لها اه وكلمتها بطريقة اقل ما يقال عنها قلة ذوق ... لاقيتها سابتنى وراحت قعدت على جهاز ... طنشتها ولا كانها موجودة .. خلصت وهى جاية تمشى بتقولى عايزه حاجه قولت لها لاء .. قالت بتكلمينى كدا ليه .. خدى فلوس النت بس اتعاملى كويس .. قولت لها انا كدا .. وبعدين خلى فلوسك ليكى تنفعك .. ومشيت على كدا ... ورجعت تانى يوم وبرضه دخلت قعدت على النت وانا زهقانه بشكل وحش جداااااااااا .... برضه طنشتها فى الاخر لاقيتها بتقولى فيكى حاجه غريبة .. وهنا انفجرت وقولت كل اللى فى نفسى .. وفجأة لاقيتها واقفه حاطه لى ايديها فى وسطها واشتغلت ردح .. حسيت وقتها انى واقفه جنب بكابورت مفتوح وعمال يطرطش ... او مقلب زبالة وقلبت فيه بايدى .... ملقتش حل غير انى اقولها بره ... انا افتكرت الموضوع انتهى على كدا ... لكن تقريبا كان كدا بدء .. فى نفس اليوم الساعه 12 بالليل ... لاقيت رسالة من رقمها كلها اهانة .. مش رديت .. بعدها بنص ساعه رسالة .. برضه مش رديت ... فى اليوم ده استلمت حوالى 5 رسائل .. خلصنا الشتيمة .. وتانى يوم بدأنا فى التهديد ... انا حروح أأجر لك واحده تيجى تعمل ( تيييييييييييييييييييت ) برضه مش رديت ... رسالة تانية حأجر لك واحدة تيجى ( تيييييييييت ) بس المرة دى كان التهديد صعب شوية ... مؤخرا وليس اخرا .. لاقيت رقم غريب بيرن رديت .. ولاقيته شخص بيقولى انتى فلانه ... قولت له مين حضرتك قالى مش مهم بس انا عايز اقولك ... نظام لو مش رجعتى حنحط السيخ المحمى فى صرصور ودنك ... طبعا رديت عليه باللى فيه النصيب .... وتتوالى الرسايل والمكالمات والتهديدات .. وشكلى اخرتى قربت ... ابقوا افكرونى بالخير واقروا لى الفاتحة ..

الدروس المستفادة :

لو كنت فى مكان وحد بصلك اوى مش تبص عليه ولا تعبره

لو حد جه يقولك انا البنت الوحيدة ونفسى تكونى اختى قولى لها معطلكيش امى قالت لى ما اصاحبش حد

لو حسيت انك بتاخد على قفاك ما تسكتش

توقيع

واحدة كل يوم تتهدد

تعليقات

‏قال bastokka طهقانة
يا نهار ابيض كل ده حصلك
طيب و حتعملي اية؟
لا انا لو منك ااجر واحدة ت(تييييت)اللي خلفوها
ربنا يكرمك يا اختي متروحيش لوحدك بالليل
اولاد اللي اسمهم اية دول مخلوش لولاد التانيين حاجة

اوروفوار
‏قال 3abdo me7tas
هههههههههههههههههه
هههههههههههههههه
ههههههههههههههههه
لا حول ولا قوة الا بالله
مع اول مرة ادخل المدونة دى ألاقى كل التهديدات دى
طيب انا فاضى انا كمان ما تيجى اشتغل عندك بودى جارد وارد على التليفونات وخلاص ومنها اهو اكل عيش ومساعده كمان
على العموم لينا مقابلة تانى فى المدونى دى عشان انا والله مستعجل وورايا ستين حاجه لما أخلصها باذن الله هاجى افر المدونه دى لان شكلها كمليانه بالقصص المرعبة بتاعتك دى
سلام مربع قصدى مؤقت
‏قال mohamed hassan
هو انا ليا رأي تاني إنك كنتي شفتي اية مشكلتها و لية بتكدب
حرام ممكن تكون عندها مشكلة في تربيتها و بعدين بهدوء تنسحبي
من حياتها و خلاص مش لازم الخناق
بس هي في حاجة يعني إية تيييييت? اللي انتي كاتباها دي?
انا عاوز بس اقول ان بلاش نستفز المريض النفسي عشان حرام
سيبك منها و كبري دماغك
و شكرا
و باشكرك كتير على زيارتك ليا في المدونة
‏قال warDaya
ههههههههههههههههههههههههههه
هههههههههههههههههههههههههههههههه
يانهاااااااااااااااااااااار
مسخرررررررررررره بجد بجد ضحكتينيييييي واذهلتيني
على فكره انا اخدت على قفايا كتير زي كده ...بس مش بنفس الفشر العلني ده
هههههههههههههههههههههههههه
المشكله انك وقعتي ف واحده
بجحه وقويه ومفتريه واعصابها تلفانه
ههههههههههه
يانهار ابيض بجد
انا لو منك اغير نمرة الموبايل او ماردش على اي نمرة غريبه

كمان بجد ممكن تسجلي المكالمات وتبلغي
عادي جدا
بس بردو بنت مش طبيعيه
ربنا يهديها يارب
ويحفظك ويبعدك عن الناس دي
‏قال Unknown
معقولة بجد د ة حصلك بس خلى بالك من نفسك
دة اكيد واحدة مريضة نفسيا وممكن تعمل ليكى حاجة
ربنا معاكى
‏قال Desert cat
طهقانة
وحشتينى
تصدقى والله كل ده حصلى
ده فى تفاصيل فى النص كمان بس كتبتها علشان البوست طويل
وربنا يستر يا اختى والله انا الايام دى مش بحاول اتاخر
خصوصا وانا تحت تهديد الرسايل دى
‏قال Desert cat
3abdo me7tas
يا فندم حضرتك شرفت المدونة
وانا لو حد عملى حاجه حقوله انى من طرفك وربنا يستر بعدها ويسيبنى على قيد الحياةالاقيش مع معاليك كارت
فى انتظار عودتك
‏قال Desert cat
كنوز
والله انا اساسا من كتر الكدب اللى كل يوم بيحصل ده مكنتش عارفه اعمل ايه
ولا اتصرف ازاى
ثم انا ماليش فى علاج الكدب والحاجات دى
انا قولت نخش فى الموضوع على طول واواجهها
متوقعتش رد الفعل بالشكل ده بصراحة
ابقا افتكرنى بالخير
اى خدمة الشرقية حتنقص نفر اهوه
‏قال Desert cat
warDaya
ده انا الفشر اللى كتبته ده كان حاجه من حاااااااااجات
دوا 4 شهور يا اختى لحد ما اتنفخت فيهم من الفشر
ربنا ما يوقعك فى الناس دى تانى ولا يوقعنى
‏قال Desert cat
ايوية
تسلمى لى يا حبيبتى
وربنا يسترها
انا مفوضه امرى لله
‏قال 3abdo me7tas
ما بلاش حكاية يا فندم دى انا بحس انها بتخلينى عندى 50 سنه
انا اسمى محمد وعندى 24 سنه
بلاش افندم دى بقى
‏قال غمض عينيك
ياطول بالك
استحملتي كل ده وانتي مش واخدة بالك انها بتشتغلك
حتى ياستي لو عندها حق..دي واحدة مريضة
المهم انتي بس خدي بالك من نفسك وماتقلقيش اوي مش هيحصل حاجة يعني

تحياتي ليكي
وطمنينا عليكي
محمد سمير
‏قال Desert cat
3abdo me7tas
تشرفنا يا محمد
بالمناسبة مدونتك جميلة جدا
وان شاء الله متابعها باستمرار
‏قال Desert cat
غمض عينيك
يا محمد انا حاولت اكرهها فيا وابعدها عنى بكل الطرق
ابداااااااااااا
وربنا يستر بقا
‏قال سجدة
يا نهار ابيض بلغى المباحث يرقبوا التليفون ويجبوسها
وسيبك من التهديد والكلام دا هى اصلا خوافة مش هتقدر تعملك حاجة
لو عملت بقه انا ماليش دعوة
‏قال Desert cat
سجدة
حبيبتى المباحث مش هتراقب تليفونى حتى لو قولت لهم اان بموت مش بتهدد
هما فاضيين لى
وعلى العموم يا جميل اطمنى
اختك جامدة جامدة يعنى
يعنى لو حد طلع قالى بخ فى الشارع هيغمن عليا وخلص الموضوع على كدا
ربنا يسترها معانا جميعا

المشاركات الشائعة