بيرة ووسكى وموزز ... ولا ابو لهب يا جدعااااااااااااااااان

خارجة من بيتنا فى امان الله والجو حر نار اصل الساعه كانت داخله على 4 بعد الضهر ومضطرة بقا انى انزل فى الوقت ده وفى الحر ده مجبر اخاك لا بطل وتوجهت الى الميكروباااااااااااز وركبت بالفعل الميكروباااااااز ... وعاديكو على الشريط اللى كان السواق مشغله .... حاجه كدا بتقول انا شربت البيرة وظبطت التعميرة ... وانا شربت الويسكى ومش عارفه ايه اللى حصل بعد الويسكى اكيد اتسطل يعنى بس انا نسيت الكلام اللى اتقال بعدها ... وفجأة وانا عمال اتسلطن واسمع الكلام ده والاقى الناس اللى بترد وراه فجأة المزززززز المزززززز المزززززز ... انا اتحولت ... قعدت ابص حواليا اشوف نفسى بدل ما ركبت ميكروباص وقعت فى غرزة ولا خمارة .... ابداً يا جدعان ده ميكروباص محترم وحواليا ناس اهم ... وفى عز امتعاضى .. انا مش عارفه امتعاضى يعنى علشان محدش يسالنى والنبى حد يكون لغة عربية يفهمنا .... ابص الاقى السواق منسجم وفرحان وعمال يعلى ويتكلم هو والواد اللى جنبه ويقوله الشريط ده توحفه ده مش عارف مين اتخانق معاه فى الموقف علشان ياخده منه وهو مش رضى ... وانا خلاص نفسى ماعت وباقى لى ثانية وارجع بص بصراحة ولاول مرة فى حياتى انتصر على الشيطان اللى جوايا ومفتحتش بوقى ولا حتى قولت للسواق غير الشريط ده ولا اعمل اى حاجه .... كنت قاعدة زى اللمؤاخده يعنى وباسمع غصب عنى .... اصلى بصراحة السواق كان شكله يخوف ده اولا وثانيا خوفت احسن ينزلنى فى نص الطريق والجو النهارده حر بشكل صعب جداً وعمال اكلم فى نفسى واقول .... يعنى العنب واستحملنا الالوان اللى اخترعوها فيه .. والسمك واستحملنا زفارته .... انما بيرة ووسكى وموزز يا لهوتىىىىىىىىىى .... اهو ده اللى مش ممكن ابدا .... طيب مش المفروض يكون فى رقابة على الحاجات اللى بيسمعوها لنا دى ... ولا هى المصنفات الفنية بتتشطر علينا احنا بس وكل شوية قارفين بتوع النت فى عيشتهم لما قربنا نقفل سيبراتنا ... مسمعوش المزز والوسكى ولا سمعوا وطنشوا ولا ايه النظام بالظبط .... خلاص الازواق معدتش موجودة ... طب والحل .. حسمع انا كدا على مزاج السواق عنب ووسكى ومزز أأأأأأأأأأأأأأأاه .. رحمتك يارب

Comments

zenzana said…
يا شيخة حرااام عليكي

ما تسيبي الشعب يهيص

بطلي افترا علي شعبه المسطول

شكلك م القلة المندسة
ههههههههه
تحياتي دمك خفيف
لأ لأ لأ العنب ما ينفعش مع البيرة والويسكي... ما تلخبطيش الدنيا في بعضشيها بأى... العنب مع الحاجات دي ممكن يقلب معاكي جامد وتتسطلي سطلة ما تفوقيش منها... وإنتي مش ناقصة يا أوختشي... مع البيرة والويسكي ممكن حاجة حرشة... شوية ترمس أو مخلل أو فول سوداني... ما تعكيش الدنيا وترجعي تلومي ع السواق بأى


بس إنتي متأكدة إن الشريط كان فيه مززززز؟؟؟

طب سؤال بايخ... ما سألتيس فين ممكن نلاقي الشريط العظيم ده؟

ويا ترى الشريط دا بيبقى فيه كام قرص

هههههههههههههههه
Desert cat said…
زنزانة انا بحقد عليهم يا اوختشى
اصلى اول مرة كنت بسمع الويسكى والبيرة وبشوف الموزز
اتاريهم عايشين فى الحاجات دى من زمان اوى وانا اخر من يعلم
الكل معلى دماغه وانا اللى حاسه باكتئاب
دلوقتى خلاص عرفت السر وحعمل زيهم
نورتى البلودج يا جميل
Desert cat said…
يا مينا انا قولت العنب ولو العنب مش علا الدماغ يبقا عليك وعلى عصير التفاح بس كشل الليلة ايه كدا
بالنوسبة للشريط بقا فده والله ياباشا موزز انما ايييييييييييييه موزز يعنى و بالنسبة للاقراص بقا فدى برضه كانت كتير اوى
ماهو عنب على موزز على بيرة على ويسكى
احسبها يا باشا كام قرص بقا والدماغ تعلالالالالالالا
الشريط العظيم ده حتلاقيه عند سواقين الميكروااااز فى اى موقف بقا انت بس ظبط السواق وهو حيظبطك برضه من الشرايط دى محدش يفهم غلط
هو دا بقى بالظبط التلوث السمعي اللي بيقولو عليه
طب المزز احسن من الحمار اللي الناس كلها بتحبه دلوقتي

اه ياااااااااااااااني
Desert cat said…
ما هو يا اسكندرانى من الموزز للحمار يا قلبى لا تحزن
انا مش فاهمه اساسا ازاى الناس دى بتسمح لنفسها تسمعنا الكلام ده
بس برضه العيب من عليهم
العيب على الفئة اللى تشتريلهم وتسمع لهم
حاجه بصراحة تخلى الواحد يرجع اللى فى معدته
والله يا قطقوطة انا سمعت انيل من كده
وده ساعدتك لانى حريفة ركوب الميكروباصات وفى اعظم حتت فيكي يا مصر
لو عايزة تعرفى اكتر من كده عليكي وعلى ميكروباص مسطرد او امبابة وانتى تسمعى هناك العجب

مالكيش فى التقيل وعايزة خفيف خفيف خشى على رمسيس والعتبة

مالكيش خالص اركبي تاكسى وسيبى الشعب يهيص

الا هى المزز كانت قاعدة معاكوا فى الميكروباز ؟

:)
Desert cat said…
بنوتة اخبارك ايه
حمد الله ع السلامة يا جميل
بالنسبة للميكروبصات اللى عندكو فدى ليها وضع تانى خالص
على فكرة انا من الشرقية
بس كنت بركب على طول ميكروباصات الجيزة ايام دراستى
وكنت بسمع بانجو وحشيش
انما موزز وبيرة ويسكى دى جديدة الموزز بقا لو كانوا معانا فى الميكروباص مكنتش نزلت منه وكنت قعدت اتفرج عليهم
ايواااه زي مابنوتة من وسك البلد قالتلك
انتي وقوتك على الاحتمال
خليكي في ميكروبزات رمسيس والعتبة وبعد ماودانك تتظبط خشي على مسطرد وامبابه

ماهو انتي لازم بردو تتطوري وتتثقفي شوية

اصل انا بردو اتحطيط في موقف زي دا قبل كدا ولما الناس حسوا اني مستغرب الاغنية..اضايقوا اوي وقالولي انت ازاي ماتعرفهاش
الحقيقة كنت في ربع هدومي

يللا حصل خير

اول زيارة ومتاخرة شوية معليش

تحياتي ليكي
محمد سمير
Desert cat said…
ومالها ميكروبازات بلدنا يعنى يا محمد
اهو الواحد يتفرج على المزز ويملا عنيه قصدى يسمع المزز ويلوث ودانه مش مهم بقا ما احنا استحمنا الموز والعنب والبانجو اللى مش بتاعه
جت على المزز ومش نتحملهم دول موزز يا ناااااااااااااس احنا نقدر نقول لاء
والله نورت البلوج يا محمد ويارب ما تكونش اخر زيارة
كنوز said…
أنا قولت اسلم على بنت الشرقية
انا محمد من بلبيس اصلا بس دلوقتي بقيت
واحد تاني و كدة و بتاع
انما فين ادغال الشرقية دي?
انا دارس الشرقية يعني و جامعة الزعازييع
و كلية صيدلة و الرجالة و كدة
للأسف سافرت و سبت كل ده
بس معلش كتاباتك حلوة
ابقي لو ممكن نتكلم يبقى كويس يعني?
اخوكي محمد حسن
Desert cat said…
كنوز
يا الف اهلا وسهلا ببلبيس واهل بلبيس
انا مش من الزعازيع نفسها
وطالما دارس الشرقية ومش قابلت الادغال يبقا اكيد عارف بلد الالف قوس اهى دى بقا هى الادغال اللى انا عايشه فيها
طبعا يشرفنى اتكلم معاك
اختك
كنوز said…
ياه فاجوس دي فعلا ادغال
انا ليا اصحاب كتير هناك صيادلة من فاجوس
و لما كنت شغال في الدعاية لفيت في فاجوس
خصوصا مركز سرطان بتاع واحد اسمه شريف عمر باين
و الله ما فاكر انما صاحبي الانتيم هبقا اقولك على اسمه
في الخاص عشان الفضايح
بس فاقوس كانوا بناتها بصراحة ليهم استايل كويس
بس اللهجة اللي كانت عجيبة شوية
Desert cat said…
طيب الحمد لله انك عرفت فاجوس
وفعلا مستشفى الأورام اسمه مستشفى الدكتور شريف عمر وده عند الموقف
بالنسبة بقا للهجة بنات فاجوس فهى زى لهجة بنات بلبيس
مش انت بس اللى عندك صحاب من فاجوس انا كمان عندى صحاب من بولبييس اه يعنى حتسيح لى حسيحلك والبادى اظلم
كنوز said…
بصي من غير تسييح بتوع فاجوس اجدع ناس
خلاص يا ستي
بس برضو ليكو طريجة جميلة جوي جوي في الكلام
من غير تسييح يعني
عندكو حتة تكتك بجنية ونص عسول خالص
دا انا ما باسيحش اهو
بس الميكروباظات ظريفة دي احسن حاجة بجا هناك
بس كانت غالية ولاد الذين
و شكرا
مراسلكم من فاجوس
محمد
و ما تتريقيش عا بلبيس
ماشي
Desert cat said…
هو انت كنت بتنزل فاجوس نفسها متاكد مش كلهم كدا والله
شوهوا صورتنا
يا فضيحتنا قدام الامم المتحدة
فى ناس وناس قابلت قابلت ناس تالته خالص
بالنسبة للتكتك ابو جنيه ونص فده انت تركبه وتنزل تتمشى فى البلد اخر النهار تحس انك ماشى فى مدينة الملاهى

الا هى توربة الحشيش بكام الايام دى فى بلبيس
Islamist Bloke said…
هههههههههههههههههههههههههههههه


حلو اوى التعليق الاخير ده

انا متابع الحوار من أوله ومستنى اشوف اية النهاية..............بس التعليق الاخير ده جامد جدا
(:

والسلام
لا واضح فعلا ان انتوا الاتنين مش ناويين تسيحوا لبعض خالص
Desert cat said…
Islamist Bloke
اعمل ايه بس
محمد كان نازل فاقوس علشان يجى يشردنا هنا
بس على فكرة او متغاظ اصل بلدنا احسن من بلبيس
Desert cat said…
بنوتة من وسط البلد
هو انا لسه مش سيحت له ولا حاجه
ده انا كدا بكح لسه
كنوز said…
بصي بقى يا ستي فاجوس حلوة جدا
و بلبيس برضو حلوة اكتر هاهاها
بس ما تنكريش بقى ان فاجوس ليهم لهجة جميلة
كلهم انتو بس لما بتتكلموا مع الاغراب بتتكلموا عربي عادي
صح?????
و بعدين مين قال عندنا حشيش احنا اجدع ناس و تعالي يا حكومة
و فتشني فتش??
بس بذمتك مش بلبيس برضه ناسها اطيب ناس
غلابة قوي
انا باحب فاجوس و الله و مش باسيح
طب انا حتى كييف تكاتك جدا
و سلامي لكل مشجعين بلبيس
محمد مراسلكم من على اول طريق فاجوس الزراعي
S H A H said…
يعني حتى البيرة و الويسكي و الموزز عايزين تمنعوهم؟؟

متسيبو الكفار في حالهم بقى

والله ضحكتيني على اسلوبك

سلام مؤقت يا جميل
Desert cat said…
انت كدا ما بتيسيحش يا محمد
الله يسامحك
مش كل فاجوس والله بتتكلم اللغة الاجنبية
انت شكلك كنت واقع فى الكفور والنجوع ولا ايه
انت مش عارف انت بتتكلم على ايه بالظبط دى فاجوس انجلوس يا ضنايا
دى بلدنا دى باريس العرب
يععععععععععععععععع
بس انت مش خدت بالك
بالنسبة لناس بلبيس
ناس بلبيس طيبين اه
ده حتى عندهم كرم ضيافه محصلش
البانجوووووووو يا ريس
Desert cat said…
S H A H
انا مش قولت حاجه ياباشا
بس يقدروا مشاعر الناس
هما عندهم بيرة وويسكى وموزز
احنا معندناش
يعنى نتفرج احنا وخلاص
ينفع كدا
برضه سلام مؤقت
3abdo me7tas said…
هههههههههههه
فين الشريط ده ها هو فين
يا ريت تبقى تجيبى اسم المغنى اكيد اكيد هو اسماعيل جزر انا عارفه الواد ده مش بيبطل سطل طول حياته
المهم
والله موضوع لذيذ والألذ انك بتسرديه علينا مش كده صح بتسرديه ولا بتتكتب ازاى المهم بتسرديه علينا بطريقة بجد انا مش بعرف امسك نفسي من الضحك
ثانيا ايه حكاية سرد القصة بلغة المذكر مش انتى بنت برضه ولا انا مش واخد بالى
ثالثا انتى قلتى ان عندكم سيبر واحد مش سيبرات
رابعا
أنقل بقى على الموضوع اللى بعده عشان عايز أقرى المدونة دى كلها النهاردة
Desert cat said…
الشريط ده عند بتاع الميكروباز

وبعدين هو اللى حيتنا سيبر يتيم
انا كنت بقول سيبراتنا
على اساس الجمع يعنى كل اصحاب السيبرات
والله منور المدونة يا فندم

Popular posts from this blog

قميص دهشور

كل تحرش وانتوا طيبين