تشابه اسماء .. طيب مش تاخدوا بالكو

انتشرت فى الفترة الاخيرة موضوع تشابه الأسماء ده
يعنى فى يوم كنت خارجه مع صحباتى بقا ومقضينها اخر روقان ... وطول الوقت عمال نضحك وناكل ايس كريم ونهرج المهم انا قولت خير اللهم اجعله خير ما هو احنا كدا المصريين دايما مستكترين الفرحة على نفسنا ... المهم رجعت البيت بعد خروجه فله اوى ومش بتيجى غير كل سنتين مرة .. الاقى كل اللى فى البيت مبوزين ... فى ايه يا جماعه ..
اختى : مش وقت وجع الدماغ
طب فى ايه يا ماما : لا اصل ابوكى مطلوب فى القسم
والدى .. ابتااااااااااااااه ... قتلت ولا سرقت ولا نصبت ولا عملت ايه .. اعترف يا بابايا
هو اينعم عصبى اوى واقل حاجه بيعمل منها حكاية ورواية بس مش لدرجة القسم يعنى
بابا : امشى من وشى الساعه دى مش ناقصك
ماشى يا عم الحج ده جزائى يعنى اللى عايزه اساعد
طبعا فى اليوم ده طول الليل البيت كله صاحى والحبايب متجمعين .. وكله عمال يضرب أخماس فى اسداس .. ياترى فى ايه .. وايه اللى حصل .. صبح الصباح واللى جاى احسن من اللى راح .. وراح اخويا ووالدى العزيز القسم علشان يشوفوا ايه الموضوع .. ويكتشفوا هناك ان فى غلطة فى الاسم وسيادة المخبر بدل ما يدور على الاسم التانى استسهل وراح جاى على بيتنا اصل الشخص المطلوب اثباته فى نفس المنطقة بس مش شارعنا خاااااااالص ويتفق مع والدى فى الاسم الاول والتانى التالت ولا نعرفه ... وبعد ما كنا عمال نجهز فى العيش والحلاوة .. رجع اخويا ووالدى البيت وقضيناها عيش وجينة خزين .
موقف )2)
لما رجع ابن خالى من السعودية علشان حيدخل الجامعه خلاص لانه عايش حياته كلها فى السعودية وتعليم وكدا فلازم يدخل جامعه فى ام الدنيا بلده امال ايه واحنا لينا غيرها .. قدم كليه شرطة .. عملوا تحرياتهم اللى بيبقوا يعملوها دى قالوا ده العيله دى قتالين قتله هاتوهم .. واشتبهوا فى اسم ميييييييييين ... اختى الواسطانية .. نفس الاسم الثلاثى بالظبط وابن الست اللى فى تشابه اسماء بينهم قاتل واحد وهربان من 15 سنة .. يا جماعه مش هى دى البونية لسه عندها 32 سنة و ابنها فى كى جى ون حيتقل فين وازاى ... يقولك لاء هى .. المهم الواسطة لازم تلعب دورها وفين وفييييييين وحوارات لحد ما اثبتنا ان مش هى دى ام القاتل المجرم طريد العداله ... وصححوا التحريات ودخل الكلية وحالف انه بعد ما يتخرج يحبس العيله كلها علشان اللى حصل فى التحريات ده
موقف )3)
جارنا الاستاذ ابراهيم جا له جواب يروح القسم
مراته رقعت بالصوت الحيانى طبعا الشارع كله اتلم .. فى ايه يا ام حسن .. اصل سى الاستاذ حيشنقوووووه لالالا حيعدموووه .. ليه يا ست ام حسن .. هو قتل حد وسرق فلوسه .. لالا جاله جواب الاستدعاء ده من القسم وبيقولوا اننا سارقين نور السلم .. سلم مين اذا كان انتوا بيتكو دور واحد ومفيش عندكو سلم للسطوح حتى ...
ام حسن : مش عارفين بس ده اللى الاستاذ المخبر قاله ولازم سى الاستاذ ابراهيم يروح يسلم نفسه علشان يشنقووووه
راح الاستاذ ابراهيم القسم ملقاش اى شبه بين اسمه وبين اسم الراجل التانى غير فى الاسم الاول بس .. يعنى الاتنين اسمهم ابراهيم واما الاب والجد والعم والخال وباقى العيله مختلفني تمام الاختلاف .
طيب مش بدل ما يتلفوا اعصاب الناس واللى مش يجى لهم نوم زينا واللى كان مستقبله حيضيع زى ابن خالى ولا الست اللى توقعت ان جوزها زهق من المدير بتاعه بعد خصم يومين قام قتله وقتل كل الموظفين ونسى ينتحر وقفت ترقع بالصوت الحيانى وقعدت تعيط عياط يكفيها باقى حياتها ياخدوا بالهم ويتاكدوا من العنوان الصح .. ده الواحد لو رايح بنك ولا اى مكان حيسحب 2 جنيه بياخدوا رقم بطاقته واسمه ويتاكدوا مليون فى الميه ان هو ده الشخص المذكور ويمضى ويبصم على سبعتلاف ورقه اشمعنا فى الاقسام مفيش كدا ولا امن الدولة ولا الاماكن الحلوة دى اسحبه من قفاه الاول لما يبان له صحاب بعد كدا نقوله احنا اسفين ده ان قالوها اصلا ولا هو خلاص احاسيس الناس ومشاعرها شئ مالوش لازم
ربنا يصبرنا

Comments

koukawy said…
اي هبل في الجبل
فكرتيني بفيلم معالي الوزير
وزير تشابه الأسماء بالظبط كده
نوع من الاهمال المتفشي في كل الجهات
Desert cat said…
للاسف يا كوكو الاهمال فى كل حاجه مش بس فى تشابه الاسماء ... بس حلوة اوى اى هبل فى الجبل ههههههههه
كلمات موزونة
هم خسرانين حاجة يا حبيبتي الناس هي اللي بتتشحطط و يقع قلبها في رجليها
الحمد لله ان ربنا ستر
كنتي اديتيلهم اسم طهقان
هههههه
متحرمش منك ابدا
Desert cat said…
طقانه عندنا يا مرحبا يا مرحبا
بجد المدونة نورت
بالنسبة للشحططة يا حبيبيتى مش اوصف لك ولا تعب الاعصاب والمعاناه ياترى مطلوب ليه ياترى فى ايه وتلاقى الناس دماغها اتشتت .... ولا يبقا رايح يسلم نفسه بقا وخلاص امره لله حيعمل ايه كانه رايح عدل على حبل المشنقة
بالنسبة لطهقان انا ما اقدرش احسن يفقعنى بلوج زى ميمى الحلاق كدا
خليها مستورة يا اوختشى
انا بقول بقي تغيري اسمك وعنوانك عشان واضح ان المنتشأة عندكو كلها اساميها واحدة
حترتاحي كتير والله وبعدين حل اسهل من انك تستني الحكومة تتحرى كويس
تحياتشي
Desert cat said…
يا الف اهلا وسهلا باميرتنا نورتى البلوج والله
بالنسبة لتغيير الاسم فانا نويت اهاجر
بس ربنا يستر ومش يطلع فى البلد اللى حا اهاجر فيها كلمة اسمها تشابه اسماء
محبتى يا جميله
الربان said…
تحياتي

تشابه الاسماء مشكلة ...حدثت لي هذه المشكلة مرات عدة في المطار.... أكون واصل الي قاهرة المعزة بلهفتي لوطني...بحبي لمصر... و بعد الوقوف في طابور الجوازات... يقولوا ..معلهش ماتنتظر معانا شويه... تشابه اسماء..

وفي مرة من المرات سمح لي ظابط الجوازات بأن القي نظرة علي شاشة الكومبيوتر
فوجدت ان الاسم متشابة في الاسماء الثلاثة
وتاريخ الميلاد بل وجهة الميلاد أيضا...

نصحني ان أضيف الاسم الرابع الي جواز سفري لفض الاشتباك....و قد حدث ...

تحياتي
Desert cat said…
الربان
صدفة عجيبة ان صاحب الاسم المتشابه من نفس الجهه ونفس تاريخ الميلاد
اكيد الاسم محمد احمد محمد الاسم ده ممكن تلاقى 4 ساكنين فى عمارة واحده نفس الاسم ... لاء وكمان ممكن يكونوا مولودين فى ساعه واحده
الحمد لله انها عدت مع حضرتك بخير يا فندم
احترماى وتقديرى لشخصك الكريم
انا برده اتمسكت اشتباه قبل كده ولقيت ظابط المباحث بيقولي عملت ايه في قضية شبرا ياض
....فين وفين على مافتنع اني مش نفس الشخص اللي بيدور عليه


ربنا يستر علينا
محمد سمير
3abdo me7tas said…
لا حول ولا قوة الا بالله
لا تعليق
نيجي للى بعده
بس يا ريت سندوتش جبنه خزين وكارت من ابن خالك عشان يبقى لينا ضهر

Popular posts from this blog

مـصـــــر هـبـــة النيـــل

الدنيا مش بتدى محتاج .. بتدى عايز