جالى عريس من جهة أمنية ..... زغروطة يا حبايب

بجد .... طبعاً بجد .... طبعاً انتوا أخواتى ولازم يا كتاكيت تتعرفوا برضه على العريس إشمعنا أنا يعنى ... ولو أنى انا شخصيا مش أتعرفت ... بصوا أنتوا حتعرفوا من خلال كلامى أنا مش أتعرفت ليه .... طبعاً كلنا سمعنا عن جواز الصالونات ... ( بالراحة بس محدش يزق ) من حوالى 4 ايام كدا اتصلت واحد قريبتنا بمامتى وقالت لها إن فى راجل كدا كوبارة وله هيبه وشنة ورنه وعنده شقه وعربية معدلللللللللله عايز عروسة وانا بصراحة قولت العروسة اللى تستاهله موجودة .... عروسة كومل وزى الفل ..... ماما قالت لها طيب هو مين ؟ منين ؟ ابن مين فى مصر ؟ وكل اللى على لسان الست قريبتنا دى ده راجل قيمة وسيمة ووظيفة ميرى ... ده هيبه ولما يجى حتعرفوا كل حاجه ... ماما .. طب يا ستى نعرف منك علشان لما أكلم ابوها و اخواتها ابقا اقولهم هو مين .... قالت لها قريبتنا .. هو بيشتغل ظابط فى الجيش ... ومش حقدر اقول حاجه تانية غير كدا لما يجى بقا ابقوا اعرفوا منه كل اللى انتوا عايزينه ..... طبعا انا رجعت البيت وماما بلغتنى الخبر ... وان الراجل الهيبة والقيمة والسيمة ده خلاص جاى لنا بعد بكره ... وانا بقا عريسسسسس ومن جهة أمنية وااااااو ولا وباضت لك فى القفص يا نانا وجه اليوم الموعود ... وكان حاضر والدى العزيز واخويا واختى الوحيدة اللى موجودة من الثلاثة الباقيين فى مصر وجوزها .... وانا بقا عمال اتعامل معاهم بمنتهى الاطة .... حناسب الحكومة بقا وانا حبقا مرات الحكومة ... إلى ان جاء العريس ... حاجه طويلللللللللله بطول السنة الكبيسة كدا وأختكوا اصلاً قزعههههههه ..... طبعا نيجى على الرأس ولا شعراية بحمد الله كدا غير داير من الودن للودن لازم اكون امينة فى الوصف يعنى علشان مش اظلمه ... ملامح الوجه ... يختشى كميلة ... برضه علشان مش اظلمه شكله طقم اسنان ومتكسر نصه ..... طبعا كل التفاصيل دى انا جبتها من بصة واحده وهو نازل من العربية اصل انا كنت واقفه ورا الشيش ... اختى جت ايه ده العريس عسسسسسل ...... قولت لها اللى عنده كلمه يلمها ... أول ما ماما دخلت قولت لها بصى انا مش خارجه يعنى مش خارجه ..... قالت لى وانا قولت لك اخرجى .... هو ياخد الواجب بتاعه ويتوكل على الله ..... قال هيبه قال .... والمفاجأة انه بعد ما مشى ... دخل الاستاذ اخويا يقولى ... متجوز مرتين ومطلق وابنه الكبير عندو ثانوية عامة السنة دى .... وانتى الزوجه التالته ... تعرفى يا نانا تنفع قصة فيلم ... قولت وماله برضه شوفلى حد يكتشفنى وانا حطق من الغيظ ...... وطار العريس وااااااا عريستااااااااااااه

تعليقات

‏قال elbostagy2
السلام عليكم ورحمة الله وبركاته

أختي العزيزة
رزقك الله زوجا صالحا وولدا مطيعا نافعا

كلمة كده على جنب
خليكي متفائلة يا أخت نانا
بصي للمميزات
ده راجل كباره برضه



طيب بس ما تزقيش
" إيموشن بيطلع لسانه"


دمتي بكل ود
أسألكم الدعاء .. البوسطجي 2
http://elbostagy2.blogspot.com/
‏قال tamer
اختنا الكريمة :

رفضتى؟؟؟؟؟؟؟؟؟
المثل بيقولك ان فاتك الميرى اتمرمغ بترابه.
وانتى جالك الميرى كله ؟؟؟؟
لا لازم تراجعى نفسك وتلحقى العريس ..


اى بنت كده بيتقدملها الكويس والوحش المهم تحسنى الاختيار ومتتسرعيش وتجددى نيتك وتطلبى من الله ان يرزقك الزوج الصالح والاسرة المسلمة .

الزواج فى حد ذاته ليس غاية وانما الغاية هى البيت المسلم .
صحيح فى القرن ال 21 محدش فكر يجيبلكم صورته مش هقول شريط فيديو للعريس ؟؟؟؟
تحياتى

tamer
‏قال Desert cat
اخويا الغالى البوسطجى
وعليكم السلام ورحمة الله وبركاته
ربنا يتقبل دعائك ياباشا
ومعلشى بقا انا اصلا لما بصيت من ورا الشيشي شوفت كل المميزات بصراحة قولت لالالالالا ما اخدوش يابابا ما اخدوش يابابا
بجد وجودك بيسعدنى جدا
ربنا يكرمك يارافع معنوياتى
‏قال Desert cat
تااااااااااااامر
حاسة انك تيمور ياباشا
ايه ده هو اان باتغابى ليه
ما هو تيمور يعنى تامر
وربنا يسامحنى لو كنت حد تانى بس معقول المدونة بقت مشهورة
لولولولولولىىىىىىى
الف مبروك على المدونة ياباشا
وانا اصلا فقرية
سبت الميرى والتراب وكل حاجه
ادينى قاعد باقىل اسبوع اهوه ولا عريس يا خويا عبرنى
ولا حتى حد قالى انتى عامله ايه
ما هو البطر وحش برضه
كان ماله الراجل الهيبه ده
بجد المدونة زادت شرف بحضورك
هههههههههههههههههه
ضحكتيني
يله
عريس يفوت ولا حد يموت
‏قال Desert cat
اميرة البلطجية عندنا
يا مرحبا يا مرحبا
والله سعيدة جدا بتشريفك
احتراماتى يا جميل
‏قال 3abdo me7tas
بجد انتى مشكلة
خير يا بنتى خير
كل شئ قسمة ونصيب
بس مع عريسك ده قسمة والشبراويشى
‏قال palm tree
بسم الله الرحمن الرحيم
السلام عليكم ورحمة الله وبركاته
والله ربنا انقذك وربنا يرزقك ويرزق كل البنات بالشباب الصالح اللى يحافظ علينا ويكون ربنا راضى عنهم
هى عموما حاجة تخوف اصلا بس كويس انكوا عرفته على حقيقته

المشاركات الشائعة