كان مالها يعنى القعدة مع العيال



يوم اجازة هو المفروض انه عيد الربيع لكن عليا كان غير كدا بالمرة
صحيت من النوم الفجر على ظيطة وزملبيطه ... والاهل والقرايب وكلللللللله ... خير يا ناس فى أيه .... اصل بنت عمى الكبيرة ماتت
إنا لله وإنا إليه راجعون طيب اكمل نوم بقا
ماما : اييييييه عايزه تعملى ايه قومى خلى اطفال العيلة معاكى وخدى بالك منهم وأكليهم يا قطة وشربيهم واللى عايز يروح الـ W.C وأى حاجه يطلبوها تتنفذ دول أطفال والاطفال أحباب الله وأحنا حنروح بيت بنت عمك نفتحه ونضفه على ما لما يجيبوها من المستشفى ويجوا ... أمرى إلى الله ... حاضر يا ست ماما
الساعه 12 وصلاة الظهر ثم الصلاة على المتوفية ثم تشييع الجنازة كان ماما واختى فى البيت سبت لهم العيال ولبست ونزلت السيبر بتاعى طبعا ماهو مش معقول انا حقضى اليوم كله مع العيال ... ما صدقت اهرب ... بس اخدت جزائى .... عارفين إزاى الساعه 8 باليل زهقت قولت اروح بقا .... وانا راجعه البيت رايحة اركب الميكروباص جه بالفعل وداخله عارفين طبعا المنظر بتاع اول ما يوصل ميكروباص يجرى عليه 7 أو 8 اشخاص علشان كل واحد يلحق مكان .. بالفعل حصل وأنا كنت من الـ 7 أو الـ 8 دول وأفاجأ بتوتكتوك وجاى جرى من ورا ضهرنا مكومنا كلنا على الارض ويخطف الشنطة بتاعتى ويجرى ... طبعا على ما قومت ما شاء الله كدا كان الواد اختفى شخص واحد من اللى واقفين جرى وراه لكن للاسف مش حصله ... لاقيت الناس اتلمت حواليا قولت مبدهاش جمعت اشلائى بصعوبة ودخلت مكتب اتصالات وانا مش معايا ولا مليم لان كل فلوسى كانت فى الشنطة اتصلت بخالى جه طبعا وداخل يدفع للراجل فلوس المكالمة كتر خيره حلف ميت يمين ما هو واخد حاجه ده كفاية أوى جرى لى ولا كان على بالى ورحنا القسم وبنعمل المحضر دخلت واحده ست منهارة يا عينى ... خير ياست فى ايه ... عايزه أعمل محضر ... بخصوص أيه .. اصل توكتوك عدى من جنبى خطف شنطتى وجرى .... يا حلولى ... التوكتوك ده عمال يخطف شنط السيدات ... لا تخصص حلو برضه ... يعنى المعادى فيها سفاح للسيدات ... والشرقية فيها
حرامى للسيدات ... هما مالهم بالسيدات بالظبط يعنى ... كل ده حقد علينا ... حسبى الله ونعم الوكيل

تعليقات

‏قال سيدوفسكي
سلام عليكم .. كيفك يا نانا

شوفي .. بمناسبة حادث السرقة ده أحب أقترح عليكي اقتراح .. إما تشتري كلب حراسة تحطيه جوة الشنطة لتلافي حدوث وقائع زي دي .. أو تجيبي قنبلة من أي فيلم أمريكي بيصوروه حديثا من اللي بيظبطوها لما الشنطة تتفتح تقوم منفجرة

بكده تضمني أن شنطتك مش هاتتسرق ..ده بالنسبة للحل الأول .. وبالنسبة للتاني فانتي هاتضمني أن اللي أخد الشنطة مش هايعرف يتهنى بيها

حل تالت .. ماتشيليش شنطة خالص !!

حلوة المدونة بالمناسبة .. بس التصميم ده مش حلو أوي على فكرة .. كنت اخترته أنا كمان لما عملت المدونة الأول كنت معتبره أفضل الموجودين .. بس رجعت غيرته

صحيح ملحوظة أخيرة .. انا مهاب من كتكوت إذا كنتي مالحظتيش لسة
‏قال Desert cat
يا اقتراحاتك يا مهاب
ويا سلالالالالالالام على فكرة الكلب ده فكرة روعة
بس على فكرة انا بشيل شنطة يد مش شنطة عربية ... وبعدين معلومة مهمة جدا انا عندى اتسرق ولا يعديش من جنبى كلب ... يبقا تفتكر حشيله ؟

وبالنسبة لموضوع القنبلة دة ينظر فيه
وبالنسبة للتصميم انا اخترته بالبركة
اما بالنسبة لانك مهاب بصراحة لو مش كنت قولت مش كنت حعرف ... نورت والله يا مهاب
‏قال elbostagy2
السلام عليكم ورحمة الله وبركاته

أختي العزيزة Nana0

أولا البقاء لله

ثانيا بالنسبة للسرقه
عوضك الله خيرا مما سرق

ثالثا ياريت تنزلي موضوعات كتير وما تحرميناش من إبداعاتك الجميله

دمتي بكل ود مبدعة

اسالكم الدعاء ..(إيموشن شايل وردة)...البوسطجي 2
‏قال Desert cat
البوسطجى
ياالف اهلا وسهلا بيك
وانا بقول المدونة منورة ليه
اتارى اخواتى الكتاكيت مشرفينى
الحمد لله با بوسطجى
قدر الله وما شاء فعل
وانا بصراحة كنت مكسلة عن المدونة علشان قولت مفيش حد بيدخلها
لكن انتوا اديتونى دافع جميل
وان شاء الله حنزل مواضيع
طالما الكتاكيت بيشجعونى
جزاك اللع كل خير
‏قال ياسمين حميد
هم مالهم بينا ياليل

المشاركات الشائعة