Desert Cat Search
قطه الصحراء: 2007

Monday, December 31, 2007

الـــــواوا مســــــألة مــبـــــــدأ

رحل عننا عام 2007 بكل ما يحمل من آلام ومعاناه ما أكثرها والقليل من الافراح التى لا اتذكرها
مضى وترك لنا بصمات غائرة بعضها نتاج هذا العام والآخر بصمات مؤجلة ...
كنت اتمنى نهايتها معه ولكن مازال نزف الواو مستمر فى قلوب الجميع
فغلاء الأسعار ... واوا
البطالة ... واوا
زيادة معدل الجريمة ... واوا
الهجرة الغير شرعية ... واوا
الاعتصامات العمالية .. واوا
حوادث التحرش والاغتصاب ...واوا
الصحفى الكويتى قليل الأدب اللى هزأنا ومسح بينا الارض وحدد لنا سعر الغساله الكورية ..واوا
انتشار القنوات الفضائية وما تقدمه لنا من هلاوس وهواجس جنسية ...واوا
كل هذه الواوات واكثر نتاج سنوات متراكمة وليست عام 2007
ولكنى كنت أأمل فى هذا العام مداواة البعض من الواوات ... ولكن للأسف الواوا حصل لها تلوث وتقيحت ووصلت لدرجة العفونة
حتى اصبح علاج الواوا امر صعب .. الجميع يتألم فى صمت يشجب ويستنكر فى السر وفى العلن يبتسم ابتسامة باهته مرسومة بدون روح تلخيص لحالة الشيزوفرنيا التى يعانيها المجتمع
فشكرا 2007 على اى لحظة سعادة او فرح حدثت لأحدنا خلالك

ووداعا بألامك ومعاناتك بأحلامك المؤجلة ووعودك المزيفه

مرحبا 2008 ... ولكنى أخشى ما أخشاه ... أن يدوم بنا الحال ونظل كسابق عهدنا
ولكنك ضيفنا القادم الذى ستدوم معنا 365 يوم ونكتبك فى تهانينا وفى تعازينا
ستدون فى كتاب تاريخنا لتتذكرتك الاجيال القادمة
فاتمنى ان تكون ضيف عزيز علينا وغالى
تنتهى فيه الآلام تتحقق فيه الطموح والاحلام
تأتى برسم خريطة جديدة لمجتمعنا مدلولها الامان
فاهلا ومرحبا بك بيننا
وعام جديد سعيد على الجميع

2008 سنة سعيدة عليكو جميعا

Saturday, December 29, 2007

فى فرق بين انك تبقى متهم ومجنى عليك

الموضوع اللى هتكلم فيه ده انا اتكلمت فه من زمان اوى اول ما حصل وهو حصلى تقريبا يوم 9/4/2007 التاريخ ده لن انساه طالما حييت .... مش علشان كان يوم شم النسيم ... لانى من الطبيعى اليوم ده بيكون يوم عادى جدا بالنسبة لى مش من هواه الاحتفال او الخروج فيه ... انما اتسرقت فيه وانا فى الشارع ...
اه والله الحرامى اللى معندوش دم سرقنى وانا واقفه فى وسط 10 اشخاص واكتر
كان بالليل وكنت راجعه بيتنا وواقفه بركب الميكروباص ولسه هدخل لاقيت توكتك جاى من وروانا كلنا داخل فينا زى الحيوان الضال بالظبط انا وقعتى جت تحت الميكروباص وكان جنبى راجل كبير التوكتوك عدى على رجله كسرها وده اللى عرفته فيما بعد ... وجرى ... انا لحد دلوقتى مش عارفه ان شنطتى اتسرقت لان الوقعه كانت جامده عليا وكنت حاسه فى ضهرى بالم رهيب ... لاقيت شاب جاى يقولى انا اسف ملحقتوش وبعدين هو دخل جنينة وانا خفت ادخل وراه لانه اكيد مسلح ... ولما سالته هو اصلا بيجرى وراه ليه لاقيته بيقولى ما هو سرق شنطتك ... الناس اللى كانت واقفه جنبى ونالهم ما نالهم كل واحد متلخبط فى نفسه والراجل اللى رجله اتكسرت مش قادر يقف من شدة الالم ... كام من الوقت عدى عليا بالشكل ده الله اعلم بس كنت حاسه انى عايشه فى عالم تانى بس اول ما استوعبت الموقف دخلت اقرب مكتب اتصالات واتصلت باخويا جالى هو وخالو ووقتها مش معايا ولا مليم لان كل فلوسى وحاجتى كانت فى الشنطة ... فضلت واقفه فى مكتب الاتصالات لما اخويا وخالو وصلوا وعلشان بطاقتى وكان فى اوراق خاصة بالسيبر بتاعى فى الشنطة فكان لازم اعمل محضر علشان اعرف اطلعها تانى ... رحنا القسم علشان نعمل محضر ... طلعنا مباشرة عند رئيس المباحث واللى سمع لى بكل هدوء واتكلم معايا بمنتهى البساطة ... فى نفس الوقت دخلت ست تانية علشان تعمل محضر لانها اتسرقت وبنفس الطريقة ... واحنا قاعدين هناك جه امين شرطة بيقول لرئيس المباحث ان فى بنت جايه تعمل محضر بخصوص سرقه شنطتها بتوكتوك ... كدا بقينا 3 فى وقت واحد ... وقتها راح منزل مخبرين فى كل المنطقة اللى احنا اتسرقنا فيها ... بعد يومين بالظبط مسكو الحرامى .... طبعا فلوس مفيش اوراق اترمت فى البحر بالشنطة .. بس القسم اتصل بيا فى البيت لانى كنت كاتبه رقم البيت فى المحضر علشان اروح اتعرف على موبايلى ... لان الحاجه الوحيدة اللى رجعت من شنطنا كلنا كانت الموبيلات بس لان الحرامى مكانش لحق يتصرف فيهم ... بالمناسبة نسيت اقول ان الحرامى بتاع التوكتوك ده من اول ما بدأ يسرق لحد يوم ما اتمسك كان سارق 25 شنطة ... واللى عرفته انهم كانوا اكتر من واحد .... طبعا لما رئيس المباحث سالنى انتى لو شوفتى الحرامى هتعرفيه قولت له لاء لانى مشفتوش انا كنت واقعه فى الارض ... فى ناس تانية اتعرفت عليه ... لما واحد زى ده يلف فى البلد يسرق بالاكراه ويكسر فى رجلين الناس و يكدر الامن العام ويرتكب كل البلاوى دى فى يومين المفروض يتقدم له عصير فريش فى القسم ولا يكافؤه ... انا دخلت القسم كنت باتعامل بمنتهى الذوق والاحترام بالمناسبة رئيس المباحث مش قريبى ولا من عيلتى ... ولا فى بينى وبينه سابق معرفه .... بس فى فرق بين انك تكون داخل القسم متهم وبين انك تكون مجنى عليك
المسروقات اتعرضت على النيابة واتصلوا بينا تانى علشان نروح نستلم موبيلاتنا ... وقتها كانت معانا بنت بتعيط كانها فى جنازة ... عارفين ليه لان شنطتها كان فيها الف وخمسمية جنيه ومرجعوش ... قالت انا مش عايزه الشنطة ومش عايزه الموبايل انما الفلوس دى ربنا وحده عالم انا جايباهم ازاى وهقعد كام سنة تانية لحد ما احوشهم ... لفيت السبع لفات على ما طلعت بطاقتى واوراقى من تانى مع ان كان معايا صورة المحضر .... بس كلنا عارفين الروتين ... كانت عندى مشكلة فى الضرايب بخصوص السيبر ومش عرفت اخلصها لان مكانش معايا بطاقة ودفعت 150 جنيه بدون وجه حق ... حاسه بألام محدش يقدر يتحملها فى ضهرى وطالعه نازلة القسم وكل شوية استدعاء شوية علشان اتعرف على موبايلى وشوية علشان اتعرف على الحرامى اللى مشفتوش وشوية علشان استلم الموبايل ... انا لو كانوا حكمونى على الحرامى ده كنت فجرته... لانى تعبى الجسمانى مكانش يجى صفر على الشمال قد تعبى النفسى ... 20 يوم اعمل علاج طبيعى اكتر من شهرين حاسه ان كل الناس اللى بتقابلنى حتأذينى اللى جاى من ورايا هيخبطنى بحاجه اللى جاى من قدامى اللى جاى من جنبى المهم ان كل الناس دى مؤذية
الراجل اللى رجله اتكسرت جنبى وقت حادثة السرقة طلع عامل بسيط فى جراج
وفضلت حاسه بذنبه وما استريحتش غير لما اخويا اخدنى ورحنا زورناه ...
احنا مش عايشين فى غابة ... انا معملتش للحرامى ده حاجه علشان اتأذى بالشكل ده ولا اى واحده من اللى سرقهم عملوا له حاجه الراجل البسيط اللى رجله اتكسرت مش عمله حاجه ... يبقى لازم يكون فى قانون ولازم يكون فى ظابط شرطه علشان يحميك ...
هنا احنا لما اتسرقنا روحنا فين ؟؟؟
مش روحنا لهم
مين اللى قبض على الحرامى ... اللى أذانى وأذاى غيرى ولو كان أستمر فى المجتمع أكتر من كدا يا ترى كان حيأذى كام واحد
الناس اللى بتشتم فيهم كل شوية والتانية وهاجمونى بشدة انا مش حشتم ظابط ولا امين شرطة ولا حتى مخبر لان محدش فيهم أذانى .. بالعكس دول رجعوا لى حقى وقبضوا على اللى أذانى ... يبقى اكرههم ليه ... انت بتكرههم حد فيهم أذاك .. والله شوف نفسك خالفت القانون فى أيه أو غلطت فى أيه ... او أذيت مين وراح عمل فيك محضر وبناء عليه جرى لك ما جرى لك ...
انا مش حالة شاذة فى المجتمع .. اتسرقت والحرامى اتقبض عليه ... لاء بتحصل كتير .... مش حاله شاذة إنى أتعامل فى القسم باحترام وبكل ذوق .. لاء كلنا كنا بنتعامل هناك معاملة واحده .. لاننا مش متهمين ..
لما اغلط فى حد يبقى اغلط فى حد غلط فيا مش عاملنى باحترام
لما اعادى حد يبقى اعادى اللى أذانى مش اللى رجع لى حقى
لما احب افضح .. يبقا افضح الحرامى اللى سرقنى .. مش اللى قبض عليه
زى ما المجتمع فيه حرامية وفيه مهندسين وفيه تجار مخدرات وفيه علماء ومثقفين
جهاز الشرطة كمان فيه ظباط كتير جدا محترمين ... مينفعش اساوى بين اسلام نبيه والمتناوىومينفعش اساوى بين الظابط اللى قتل المواطن وبين رئيس المباحث اللى قابلنى فى القسم
ومينفعش اساوى بين الحرامى اللى سرقنى وبين احمد زويل ...

Thursday, December 27, 2007

قتلوها ليييييييه ؟؟


هو امتا مسلسل القتل ده حينتهى
علشان ايه بينظير بوتو تتقتل علشان قالت انها حتحتارب الارهاب
لحد امتا التخلف والهمجية حتفضل متفشية فى العرب
لحد امتا حنفضل نقابل الرأى الآخر بالقتل وبرك الدم بدل من النقاشات المتحضرة
هو احنا ليه بنكره نفسنا اوى كدا
وليه بنكره اى حد عايز يعمل لنا حاجه كويسه
هى مقالتش حتنشر الرذيلة ولا حتساعد على انتشار المخدرات
علشان تتعرض قبل كدا لمحاولة اغتيال وفى المرة التانية تنجح المحاولة
طبعا اللى يفجر نفسه ويموت ناس ابرياء ملهمش اى ذنب غير تواجدهم فى المكان ده ميبقاش شهيد
الله يرحمها ويرحمنا من العقول الفاضية

Wednesday, December 26, 2007

ظابط يعتدى على مواطن حتى القتل

هو بالرغم من ان الحادثة حصلت فى بلدنا
والقتيل اتنقل مستشفى فاقوس العام اللى هو بينى وبينه اقل من 10 دقايق الا انى مش عرفت الخبر ده غير من على النت
وبما انى فضولية زيادة عن اللازم فحبيت اعرف ابعاد الموضوع
وبما ان المستشفى متلغم امن جوه وبره والمرور من قدامه صعب حتى مش الدخول اصل السيد مدير الامن مشرف البلد هنا فالدنيا متلخبطة
تضاربت الاقوال ان سواق النقل من المنصورة وناس تانية قالت لى لالالالالالالا
ده هو من الشرقية وكان فى طريقه للاسماعيليه
يا جماعه ارسو على بر احنا دلوقتى ميهمناش اسمه ولا لونه ولا جنسه احنا يهمنا الانسان قصدى القتيل .. ..
وخدت جنب و قعدت وربعت على الرصيف تحت السجر يا وهيبة لحد ما يتفاوضوا مع بعض ويرسوا على بر ويقولوا لى الراجل ده منين ولا هويته ايه بالظبط
لاقيت واحد اد والدى جاى هو انتى بتشتغلى فى الهدف ... قولت له يالهوى ده انا سمعت انها قفلت من زمان حتى لو مش قفلت انا ماليش علاقة نوهائى بشغل الصحافة ... قالى امال محامية ... قولت له اعتبر .. قالى وعايزه تعرفى ايه ... قولت مين الراجل اللى جوه ده وايه اللى حصل ... عمى الحاج استهبل وقالى ما جوا رجاله كتير انتى تقصدى انهى راجل جوا
قولت له بتاع الحادثة اللى الظابط قتله ... لاقيته بيقولى صلى ع النبى ونظام انه هيحكى لى حدوته ... انا قولت اخد لى تعسيلة على ما يخلص بس لاقيت ان عنده معلومات ... الراجل ده طالع رايح بورسعيد قوم الظابط موقفه فى الكمين وسحب رخصه وقاله اركن على جنب ... ده قعد يقاوح مع الظابط ومستعجل ومش عارفه وراه الديوان ومش ينفع يتاخر ... الظابط كبرت فى دماغه وقاله طب انت جاى معانا بقى .... القتيل اللى جوه كبرت فى دماغه اكتر وقاوح مع الظابط ... قوم الظابط اتهور عليه .. يعنى يابنتى لو كان سمع الكلام دلوقتى وركن له على جنب شوية مش كانت الامور هديت والموضوع اتلم .. طبعا الكلام ده على لسان الحاج اللى ادانى المعلومات الهى يكرمه ... قولت له اه والله بس الشيطان شاطر ولعب فى دماغهم هما الاتنين
معلشى يعنى الناس اللى عمال تدعى على الظباط والناس التانية اللى بتقول لاء الظباط دول محترمين وانا منهم بس مش كلهم لكل قاعده شواذ ... يعنى مش اجى على واحد زى اسلام واقول عليه محترم لانه مهما بلغت بيه قوته مش يحط العصاية يعنى فى الامؤخذه .... المفروض انه لكل فعل رد فعل يعنى ظابط المرور ما ارتكبش الحمق اللى عمله ده الا اذا كان فعل السواق قوى معاه مش معنى كلامى انى بدافع عن الظابط لاء هو غلطان وستين الف غلطان لان مهما وصل الامر مش يوصل للقتل يعنى لازم يتحاكم
بس انت كمواطن انت كمان ليك دور لازم تقوم بيه مش اطلع عينه فى حوارات ملهاش اى لزوم واقول اصل كل الظباط ولاد ستين فى سبعين .... ده ظابط بيحميك ... واقف فى الشارع فى الفجر فى عز الشتاء مش علشان يرخم عليك مش مزاج عنده يقوم من تحت البطانية فى التلج ده علشان يوقفك فى الشارع رخامة ... الظابط ده بتكون انت فى اى مناسبه فى وسط عيلتك وأهلك ولو مسافر آخر الدنيا بتكون حريص كل الحرص على حضور المناسبة دى فى وسط عيلتك هو معندوش حاجه اسمها كدا ... معندوش حاجه اسمها ان النهارده العيد لازم اكون فى وسط اهلى ... الظابط ده بيطلع مأمورية لمطارده تاجر مخدرات او قاتل او غيره بيبقى يا قاتل يا مقتول .. واحد خارج وعارف انه ممكن يرجع جثه يعنى ماشى وشايل حياته على كف ايده ما اظنش ان اى حد يقدر يستحمل كدا . ... مين يقدر يتحمل ضغط اعصاب ومعاملة مع عتاولة من المجرمين واشكال مختلفة من البشر اللى قاتل واللى سارق واللى نصاب واللى تاجر مخدرات ... ما هو من الطبيعى المجرم مش هيدخل القسم ينهار بقى ويعترف لوحده بمجرد ما يشوف الظابط قدامه ... دول اجابتهم بتكون جاهزة على اى سؤال او اتهام يتوجه له ... بيقولوا بيعلموهم فى الاكاديمية الظلم والبلطجة والاجرام وانا موافقة .... انهم بيعلموهم كدا بس برضه بيعلموهم ازاى يقوموا بواجبهم وازاى يبقى راجل ويواجه الموت ... وازاى لما يتكلف بمأمورية لمطاردة عصابة او قاتل او ايا كان يواجهه بشجاعه حتى لو كانت حياته حتبقى ثمن لأداء
. واجبه ... وبعد كل ده بيتقال عليهم بلطجية وظلمة انا موافقه ان فيهم بس مش كلهم لكن للاسف شعبنا الحنون بيطبق قانون الحسنة تخص والسيئة تعم ..... كام ظابط قاتل ومجرم فى كام قسم على مستوى الجمهورية ... 5 - 10 بس ده مش معناه انى اجمع معاهم المحترمين اللى واجبهم فوق كل اعتبار
ربنا يحفظهم جميعا
بالنسبة للى حصل بقى عندنا الموضوع متكتم عليه تكتيمة سودة ولا حد قادر يفتح بؤه والمستشفى ما زال تحت الحصار والقتيل داخل المستشفى

Tuesday, December 25, 2007

بلدنا غنية بس احنا اللى وش فقر

لما كل وزير يبقى عنده على الاقل 3 مكاتب وجيش من السكرتارية خريجين الجامعة الأمريكية علشان معاليه يقضى فى كل مكتب ساعتين او حسب مزاجه
او حسب المكتب اللى موجود فيه سكرتيره حسناء هيفاء شبه واسم وانتوا عارفين خريجين الجامعة الامريكية ولاد ناس وحاجه تفتح النفس علشان كدا مرتباتهم لازم تكون مرتبات صح الصح يعنى ... بس يا شعب يا فقير محدش يقر عليهم دى ناس بتتعب
وعلشان كدا لازم وزرائنا يعيشوا عيشه اخر روقان
.........................................................................
السيد وزير الاستثمار له 4 مكاتب اولهما فى جاردن سيتى والثانى فى المبنى الجديد لوزارة الاستثمار بشارع صلاح سالم والثالث فى هيئة التمويل العقارى ورابعهم فى المنطقة الصناعية بالتجمع الخامس
والسيد وزير المالية له ثلاثة مكاتب احداهم فى مقر وزارة المالية بلاظوغلى والثانى فى مقر الوزارة الجديد بمدينة نصر والثالث فى مصلحة الضرائب العقارية بمدينة نصر اى ان المقرين لايفصل بينهما سوى امتار قليلة
اما بقى السيد وزير التموين فله مكتب فى شارع القصر العينى واخر فى مقر هيئة المساعدات الاجنبية فى مدينة نصر
وزير النقل لم يكن اقل من الاخرين فخصص له مكتبا فى شارع القصر العينى واخرفى مدينة نصر.
ومثله وزير البيئة الذى اختار مكتبا وزاريا فى مصر القديمة بخلاف المكتب الموجود بالوزارة فى المعادى
وكذلك وزير الطيران المدنى فبخلاف مكتبه فى المطار خصص وزير الطيران لنفسه مكتبا اخر فى فى وزارة الطيران
......................................................
طبعا البهوات من حقهم يرفعوا فى زيادة السلع ومن حقهم يسحلوا المواطن اللى على اد حاله ومن حقهم يشردوا اهالى كفر العلو ويتناسوا سكان العشوائيات ياى ايه الناس البيئة دى دول حتى اسم العشوائيات يتعب الاعصاب فالبشوات رجال الاعمال الوزراء لازم تكون اعصابهم هادية ومرتاحين علشان يعرفوا يخترعوا لنا قرارات ويقلبونا براحتهم يبقى لازم السكرتارية بتاعتهم تكون من الجامعة الامريكية
الجامعات الحكومية مبقاش معترف بيها يبقى مسمعش حد يقول بطالة تانى
ومحدش يقول هى الفلوس اللى الدولة بتاخدها مننا بتروح فين
من ضرايب لالغاء الدعم لكل حاجه بتمص دمنا فيها
الوزراء دول بيتعبوا جدا ولازم يعيشوا فى بذخ وانتخه
وهتبطل تسال اكتر لما تعرف ان
البهوات بيصرفوا 8.4 مليار جنيه سنويا على التهانى والتعازى ومصاريف الضيافة وديكورات مكاتبهم
وبعد كل ده نقول احنا بلد فقيرة .. يبقا احنا اللى وش فقر

اذا كانت التهانى والتعازى بيتصرف عليها مليارات فما بالك باللى بيتحول على بنوك سويسرا
يبقى اى قرار جديد ننفذه من غير ما ننطق واللى السادة الوزراء يطلبوه مننا ندفعه واحنا ساكتين علشان الناس اللى بتتعب ومقطعه نفسها علشان تقلبنا دى تعيش كويس ... ويبقى عندهم بدل المكتب 4 و5 دول مش بيروحوا بيوتهم من التعب علشان كدا بيعملوا مكاتب بالزيادة وبيصرفوا عليها ديكورات بالمليارات
و سلامات يا شعب
الخبر اللى يحرق الدم ده
تبقى دى تفاصيله
تقرير: وزير له 4 مكاتب وآخر لديه 20 سكرتيرا من خريجي الجامعة الامريكية

Saturday, December 22, 2007

مين المسئول ؟؟؟

مين المسئول عن قتل الإنسان ده
ده شرطى بيأدى واجبه ... مع إننا مرفوضين ومتاهنين جوا وبره بس برضه بنحبها وفى ناس زى الشرطى ده وغيره كتيييييييير بتسهر على راحتها وحمايتها بس مش معنى اننا بنحبها وبنحميها يقوم نبتهدل فى الشوارع بسبب البطالة ولا الموظفين يترموا فى الشوارع اكتر من 10 ايام ستات ورجالة وكأنهم بيشحتوا مش بيطالبوا بحقوقهم
مين المسؤل عن كل المهازل اللى بتحصل دى
انهى ايدى خفية تعبث بمصائر العباد وتتحكم فى اكل عيشهم
مين المسؤل عن قتل الشرطى ده
وازاى شرطى واحد يقف على الحدود بين مصر واسرائيل
ازااااااااااااااااااااااااااااااااااى
بمنتهى السهولة قتلوه ودخلوا مصر ولا من شاف ولا من درى ليييييييييييه على اساس انهم داخلين حمام عمومى محدش حس بيهم يقتلوا ويدخلوا عادى جدا ....
ده بيان من رويترز
وقال مصدر لرويترز ان "الشرطي ويدعى محمد عبد المحسن الجندي-21 عاما- فوجيء اثناء نوبة حراسة له عند العلامة الدولية رقم 15 جنوبي معبر رفح على الحدود بين مصر واسرائيل بمجموعة من المهربين لا يقل عددهم عن اربعة قرب الاسلاك الشائكة التي تفصل بين مصر واسرائيل يرافقهم عدد من الافارقة يحاولون التسلل الى اسرائيل فتبادل معهم اطلاق النيران ولقي حتفه بعد اصابته بالرصاص."

............................................................

طبعا ده مش اول شاب يحصله كدا
والحوادث من النوع ده مكررة باستمرار
المثير للتساؤل هنا
ليه الحدود متكونش امان اكتر من كدا
ليه كل مرة شرطى بيتقتل والموضوع يروح طى النسيان
ما هو مات بقى وخلاص
هو بيحمى الحدود طيب فين اللى بيحميه .. هو مسؤل عن مصر ... طيب فين اللى مسؤل عنه
ده الجندى رقم كام لحد النهارده مات وبنفس الطريقة
يعنى هربانين من شبح البطالة ماتوا واتقال عليهم طماعين ... جايين يزوروا اهاليهم يا غرقانين يا محروقين واقفين يحرسوكى مقتلوين
طيب ولادك ينولوا رضاكى ازاى يا مصر

تفاصيل الخبر

Wednesday, December 19, 2007

مساء احلى عيد على احلى ناس


كل سنة وانتوا طيبين وإن شاء الله عيد سعيد على الجميع والعيد اللى جاى يكون كل واحد حقق ما يتمنى

كعادتى انا وصديقاتى العزيزات بنتجمع كلنا مع بعض وبنقضيها صاحيين للصبح ... نفضل نحكى ونعمل ازعاج للجيران لدرجة انهم فكروا يطلبوا لنا البوليس بس عملوا حساب ان الناس جيران وكدا يعنى كتر خيرهم .... الفجر قومنا كلنا صلينا والحمد لله ... وكل واحدة بدأت باقتراح ناكل ولا ننزل ... اقتراح تانى احنا نشرب نسكافية وبعدين ننزل طبعا ده كان اقتراحى انا واللى اترفض بشدة لان الجميع كان مهنج وفاصل باور وحسيت اننا هنام من بعض فكان لازم اننا ناكل علشان يفقوا شوية ... عدى الوقت سريعا سريعا ونزلنا علشان الصلاة

ونلاقى الشارع ما شاء الله ما شاء الله ربنا يزيد ويبارك فى المسلمين
وعلى مدخل الساحة لاقيت المنظر ده

طبعا طبعا الشرطة الساهرة على خوذئه الشعب .... سورى يا داخلية على خدمة الشعب



هنا حسيت انهم بيدوروا على مشتبه فيهم واقفين على المدخل بيبصوا فى وجوه الناس بطريقة فاحصه فاعصه متفحصة وانا وصحابى ولا همنا دخلنا وادينا فى جيوبنا ورافعين راسنا لفوق مش المفروض انهم واقفين لحمايتنا يبقا ده دورنا علشان نتعامل معاهم براحتنا .....

هنا خلاص دخلنا علشان نصلى والستات لسه بيسلموا على بعض واللى بتحضن واللى تبوس كعادة الشعب المصرى فى هذه المناسبات


اخيرا خرجنااااااااااااااااااااااااااااااااا

بس لسه مش هنروح اصل كان ورانا مشوار مهم جدا قبل ما نفكر نرجع بيوتنا بس مش رايحين لوحدنا ده احنا رايحين احنا وصحابنا وصحاب صحابنا ..... وقرايبنا ومعارفنا كنا كتيييييييييييييييييييييييييييييييييير جدا ..... كنا على معاد كلنا مع بعض نتجمع قدام دار رعاية الطفل فى مدينتنا العامرة وبالفعل خلصنا صلاة وعلشان الزحمة مش عرفنا نتقابل قدام الساحة وهنا كان دور التكنولوجيا ولازم نستفيد بفايدتها واجدع خدمة وفرتها فودافون كلمنى شكراً ودى كانت السيم يعنى احنا موجودين قدام دار الرعاية وتوجهنا كلنا على هناك قابلنا المدير بوجه بشوش والمسؤلين هناك سابونا على راحتنا خالص اصل هناك اكشتفنا كلنا اننا ما عشناش طفولتنا فكن لازم نعوض اللى اتحرمنا منه


مدير الدار واول ما دخلناا طبعا علشان نسلم عليه وما هو من الطبيعى يعنى اننا كنا نروح نسلم مش احنا ضيوف


القمرين دول بقى بسمة وايمان

ودى تبقى شرين ....

وكعادة الوقت الجميل بيعدى بسرعه وأنتهت صلاتنا وأنتهت زيارتنا وكان لازم نرجع بيوتنا ... الغريب انى طول الوقت حاسة برشاقة وحيوية اول ما دخلت البيت جريت على اقرب سرير ... لكن للأسف ليس كل ما يتمناه المرء يدركه ... كل اللى قدرت انامهم ساعتين وياريتهم كانوا كاملين .... القرود ولاد اخواتى كانوا عاملين عندنا مهرجان عالمى وبالتالى كان لازم اقوم اشارك فى المهرجان ده

خلص اليوم بسرعه زى ما اى حاجه حلوة فى حياتنا بتخلص بسرعة ...
كل سنة وانتوا جميعا طبيبن وبالف خير

عيد اضحى سعيد

Monday, December 17, 2007

عيد أضحى سعيد

كل سنة وانتوا طيبين ولفروضنا مأديين ومع اهاليكو بالعيد فرحانين
وبالخروف مضحيين ... عيد اضحى سعيد إن شاء الله على كل المسلمين
ولصلة الرحم كلنا واصلين وبالسؤال عن بعضنا وشئون المسلمين سألين
ياريت ما ننساش فى وسط عيدنا واهلنا والاضحية المحتاجين ... نسال عليهم ونودهم
وكمان فى ناس تانية خالص حاسين انهم منسيين وفى المناسبات دى دايما زعلانيين لانهم حاسين ان الناس ناسياهم ومش فاكرين


اللى جنبه دار ايتام او دار مسنين ممكن يجمع اصحابه وساعه من وقته فى وسطهم مش كتير عليهم حتى لو مش اخدت لهم حاجه معاك كفاية دخلتك عليهم بتحسسهم ان فى ناس فاكراهم وفى ناس بتسال عليهم ... بتحسسهم انهم مش لوحدهم فى الدنيا وفى حد بيودهم
فى عقولنا حاضرين




لو جربنا نعملها مرة والله هنرجع من هناك مبسوطين وحاسين براحة جوانا وفرحة وسعادة لاننا كنا سبب لرسم بسمة على وجوه ناس حاسين انهم من المجتمع منسيين ... ده دورنا اننا نقولهم احنا هنا وبوجودكو حاسين مش حنسيبكو لوحدكو وهنبص عليكوا من وقت للتانى دايما فاكرنكم وفى عقولنا انتوا حاضرين

ان شاء الله بكره يوم وقفة عرفات صيامها يغفر عامين عام مضى وعام آت ... ان شاء الله نغتنمها فرصة ونتقرب الى الله بالصوم والدعاء
ونحاول نكثر من دعائنا ونكبر مع الحجاج ربنا يكتبها لنا جميعا
ان شاء الله يرجعوا من ارض الحجاز حجهم مبرور وذنبهم مغفور
تقبل الله منهم جميعا
اختى حبيبتى واحب الناس لقلبى تقبل الله منك ومن اسرتك ومن كل المسلمين واعادكوا سالمين
هو اينعم هى مش هترجع مصر لانها اساسا مقيمة فى السعودية ... بس ان شاء الله ترجع هى وزوجها واولادها وكل الحجاج بالف خير
دعواتكو جميعا
وعيد سعيد ان شاء الله على كل المسلمين

Sunday, December 16, 2007

يموت الراجل المصرى وهو بيعاكس


من كام يوم كان فى اعلان لحملة على مصراوى بعنوان لما عاكست استفدت ايه منظمها المركز المصري لحقوق المرأة حملة لوقف التحرش الجنسي بالشارع المصري
ولاقيت الردود ما شاء الله تشرح القلب اللى داخل يقول البنات هى اللى بتلبس عريان
واللى داخل يقول هى البنت اصلاً بتنزل الشارع مخصوص علشان تتعاكس اصلها لو مش عايزه تتعاكس مش هتخرج من بيتها ... وانت تبقى مين ان شاء الله كدا بسلامتك علشان تحكم على البنت بالشكل ده الا اذا كنت واحد مش متربى اساسا وفاقد لكل معانى الاخلاق ... ومن كثرة الردود اللى عمال تقول اصل البنت بتمشى عريانه ومش لابسه قولت يمكن مصر اتحولت لوس انجلوس .. ولا تكساس ولا حاجه لما اقوم ابص فى الشارع كدا اشوف ... لاقيت والله الدنيا لسه بخير والبنات لابسين لبس كويس بل نسبة اللى لابسين اسدال ونقاب اكتر بكتير جدا من اللى لابسه جيبه او بنطلون يعنى رجعنا لورا 100 سنة ولله الحمد ... يعنى مش فى حد عريان ولا حاجه ... وكعادة الشباب المصرى لما يحب يبرر لنفسه عمل سئ يلقى اللوم على البنت اصلها وفصلها اصل ذكروته ما تسمحلوش يعترف انه شاب وقح وقليل الادب ... بالطبع باستثناءالشباب اللى بتعرف تحترم نفسها وتتقى الله فى محارم الناس ....
النهارده كان عندى تمرين ايروبك وكان ناقص واحده من صحابتنا مش جت ... اتصلت بيها اطمن عليها قالت ان حصلت ظروف ومش عرفت تيجى بس عايزه تقابلنى ... المهم قولت لها نتقابل فى النادى ... ورحت انا وعبير صحبتى فعلا علشان نقابلها هناك ... دخلنا وقعدنا نستناها اتصلت بيها اشوفها فين واعرفها اننا موجودين ... وانا بكلمها لاقيت عبير بفزع بتقول يا لهوووووووووى الواد خبط البنت فيييييييييييين ... ايه ده خبطها فين ... قالت لى فى مكان حساس وسكتت ... نهى معايا على التليفون ايه ده فى ايه .. ومين خبط فى مين .. قولت لها عبير بتقولى الواد خبط بنت فى مكان حساس بس انا مش خدت بالى ... قفلت مع نهى اللى قالت لى عشر دقايق بالكتير وهكون عندكو ..... بكلم عبير والاقيها مش معايا خالص وعينيها بتبص فى اتجاه تانى .. فى ايه يابنتى عبرينى ... قالت لى اصل الولد ده شكله مستقصد البنت اصله راح قعد على الترابيز اللى فى وشها على طول ... قولت لها يمكن يعرفها ولا حاجه ... قالت لى بكره الكلام اللى من النوع ده اصل مفيش واحد بيعرف واحده وبيعمل معاها كدا ده لو شاف حد بيرخم عليها هو اللى بيتعرض له .. قولت لها وجهة نظر برضه ... بصيت لاقيت البنت قاعدها لوحدها وشكلها كانت فى انتظار حد وشكلها محرج جداً .. قولت لعبير تعالى نروح لها .. قالت لى افرضى احرجتنا وهنروح نقولها ايه .. قولت لها نجيبها تقعد معانا لحد ما نهى تيجى او اللى هى مستنياهم يجوا ... روحنا لها فعلا .... وسلمنا عليها واحنا مش عاريفنها اصلا واستاذناها نقعد معاها وافقت على الفور .. سالتها انتى تعرفى الولد ده .. قالت والله ولا عمرى شوفته بس هو لازق لى اللزقة السودة دى ... عبير قالت لها وانا شوفته وهو بيخبطك لاقيت البنت اتحرجت وحطت وشها فى الارض وسكتت .. قولت لها بس انتى غلطانة وعليت صوتى لانه كان لازق فى قفانا بمعنى اصح حبيت اسمعه ... قولت لها كان المفروض تقلعى اللى فى رجلك وتظبطيه بيه ... امال انتى لابساه ليه مش علشان الاشكال دى .. قالت لى والله عندك حق ... وقتها شوفنا نهى واقفه بتدور علينا شاورلنا لها وجت وهى جاية علينا نفس الولد عاكسها بس بكلمة ابيحة .. ردت عليه نهى قالت له انت شكلك بتدور على اختك او مامتك اوصحبتك اصل انا مش ينطبق عليا الكلمة دى .. رد عليها ... قومنا له كلنا بما فينا البنت اللى هو كان بيعاكسها فى الاول .... كام واحد من اللى كانوا موجودين لاقيناهم جايين وبيطلعوه بره قال ايه اصلهم متابعين الموقف من الاول وشايفين انه واد قليل الادب ومينفعش يقعد فى وسط الناس المحترمة ... طيب كنتوا فين من الصبح لما انتوا شايفينه بيعمل كدا .... ولا كنتوا معجبين بذكورته اللى من فرط اعجابه بيها مش سايب ولا واحده فى حالها ..

على ما اظن برضه وقتها البنت كانت لابسه عريان .. الدكتورة نهى صحبتى كانت لابسه عريان .... ولا هى نازلة من بيتها علشان تتعاكس .... انت كبنى ادم فرحان بنفسه ازاى ترضى على نفسك وكرامتك بنت تهزأك ... للعلم الناس دى بتكون نازلة من بيتها اساسا مبيتة النية علشان تعاكس يعنى لا لبس البنت ولا مشية البنت ولا اى حاجه اساسا من الحجج الواهية دى ... بيكون نازل من بيته ومحدد لنفسه هو رايح يقف على انهى ناصية شارع وانهى منطقة اللى بيمشى فيها بنات اكتر .... بدليل ان المحجبات بتتعاكس واللى لابسه نقاب بتتعاكس واللى بتهزأة مش عايزه تتعاكس ولا طيقاه ... المشكلة انه بيبقى انسان جبان جدا .ومقرف جدا جدا .. لانى لما بشتم حد الصدفة ساقته فى طريقى بلاقيه عامل زى اللى اتدلق عليه جردل مليان من مخلفات الحمامات وبيدور له على مكان يستخبى فيه ...

دلوقتى الراجل المصرى بالرغم من طحنته فى الشغل ليل نهار الا انه اول ما بيشوف واحده فى الشارع بيحصله حالة هوس ولازم لسانه يتبرى منه ويعاكس ووالله الحاجات دى بتحصل ومن رجاله كبيرة ومتجوزة ومخلفة وولادهم مخلفين كمان مش هقول الشباب ..... حتى العيال الصغيرة بيشوفوا قدوتهم بيعملوا كدا .... الأدب والإحترام مالهومش علاقة لا بالبطالة ولا بعدم الزواج ولا بوقت الفراغ ....
غياب الوازع الدينى
وفرحة الام بابنها اللى بيعاكس والاب بابنه اللى مقطع السمكة وديلها
جعلت منه حيوان بيجرى ورا غريزته ونسته ادميته ... عايز قلة الادب روح اشتريها من مكان ما هى موجودة ... اصل اكيد انسان باخلاقك الزبالة دى عارف ممكن تلاقيها فين .....
بس خليك فاكر
كما تدين تدان والديان لا يموت

Wednesday, December 12, 2007

يسقط التعليم .... ومرحبا بالأمية

لما يتفضل ويتكرم علينا الإعلام بحل مشكلة البطالة بإعلان زى اللى بيبهرنا بيه من وقت للتانى دون حياء او حفظ لماء الوجه ...
لما الدولة تخلى مسؤليتها وتقول للطلبة سيبكو من التعليم والكتب والجامعات وكل واحد يتعلم له حرفة تنفعه واهو يجمع منها القرشينات اللى حيتجوز ويفتح بيت بيها بلا تعليم بلا ثقافة بلا ارف ....
لما أحلام الولاد والبنات المصريين تترسخ فى الفلوس والزواج معلشى يعنى يا حضرات المسؤلين على هذه المهزلة الإعلامية ده إسمه إلغاء لفكر الملايين من الشباب وتكسير لطموحات من لهم طموح فى تحقيق حلم انه يكون عالم او خبير فى مجال ما ...
ممكن اعرف مين اللى اداكو الحق تتكلموا بلسان كل الشباب وتحددوا لهم طموحاتهم اللى تتمثل فى حرفة وكام ملطوش وبنت يتجوزها
يا حضرات المسؤلين على هذا الإعلان اللى بيصور الشاب خريج الجامعة فاته القطر وأنه لا لاقى شغل ولا عارف يتجوز والولد الصنايعى الكسيب اتجوز ومعاه شوية قرشينات ... متناسين يعنى أيه طبقة علماء ومثقفين مع إحترامى طبعا للحرفيين وأكيد ان الثقافة مش بالتعليم الجامعى لكنه ضرورة لابد منها ...
لو تناسينا دور الجامعات المصرية فلو زال حتى يومنا هذا حيا الملك عبدالعزيز لكان ذكرنا
وعجبى على دى بلد ...
ولا يمكن علشان الحال أتبدل والسيدة وزيرة القوى العاملة تحمل الشهادة الإعدادية فأصبحت مقياس ومثال يحتذى به ... أليست الست الوزيرة المثقفه من تعاقدت لتسفير بنات مصر خريجين الجامعات للعمل كخادمات للسعودية وكانها تطلع لهم لسانها وتقول انا وزيرة بالاعدادية اما انتوا خدامين بمؤهل جامعى ....
لو كانت تحمل مؤهل كان اصبح ده تفكيرها ..... وخير دليل على ثقافتها وحسن إداراتها للوزارة مشاكل العمال اللى مبتنتهيش وعمال المحلة ليسوا ببعيد
بعد ما كنا بنسال الطفل الصغير نفسك تطلع ايه ياحبيبى لما تكبر ويقولك دكتور ولا مهندس
مش تتعجب ولا تندهش دلوقتى لما تسأله ويقولك نجار قد الدنيا ... مع احترامى
السيد المسئول عن هذا الإعلان المهزلة بكل ما يحمله من معانى بالله عليك كفى واحفظ لنا شئ من الكرامة مصر فيها شباب وعقليات مش كل همها تتجوز وتكسب فلوس ...
مصر فيها شباب مثلهم الاعلى زويل والباز
ولا مصر اللى خرجتهم مش هتخرج عقول غيرهم ؟؟
مصر فيها شباب مثلهم الاعلى نجيب محفوظ والمنفلوطى
ولا ده كان زمن وولى ؟؟
مصر اللى اى مطرب عربى او مطربة عرى بتحب تنشهر بتيجى مصر ترعاها
اولى بيها ترعى عقول ولادها وتنميها
مصر اللى بتصرف مليارات على لاعبى الكورة ومهرجانات لا تثمن ولا تغنى من جوع
اولى بيها تفيد شبابها .... كنت زمان بسمع ان التعليم هو سلاح المستقبل
دلوقتى الحرفة هى السيد السائد فى المجتمع
وليذهب العلم والعلماء الى الجحيم
فمرحبا بالحرف اليدوية والف اهلا وسهلا بالامية

Sunday, December 9, 2007

تااااااج ..والله المستعان


التاج ده جالى من عند مهندس مصرى ... حاسه انه عقاب منه بس يلا ما بين البلوجرية حساب ولا عقاب
نبتدى الاجابات والله المستعان
لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
كنت هقول ايه الناس الجبانة الذليلة اللى عاجبها انهم يتبهدلوا وكرامتهم تهان وهما برضه راضيين ساكتين ومطاططين بالرغم من ان فيهم علماء ومثقفين لكن الجميع راضى بالذل والهوان .. ليه الله وحده اعلى وأعلم .
لوكنت أوروبي أو غير مسلم هتبقي إيه نظرتك للعرب والمسلمين؟
كنت هبقا اجهلهم تمام الجهل لو مش قابلت حد فيهم ولو بالمصادفة ... اما لو اتقابلت مع شخص ملتزم ظاهره وباطنه يكمن الحقد والكراهيه كنت حكرههم واقول عليهم ارهابيين ومتطرفين ... لو ربنا كرمنى وقابلت شخص ملتزم خلقيا وروحانينا وبيطبق الدين الصحيح فى تعاملاته وفى كل أفعاله ... مش حتردد ثانية انى أعتنق الاسلام .
لو قالوا لك إنت بقيت رئيس جمهورية هتعمل إيه؟
لو كنت فعلا رئيس جمهورية يسمع من بؤك ربنا
ده انا حظبط الشعب اعلى تظبيط .. مش بانجو وحشيش وحريم لالالالا خاااااالص
وقتها مش هخلى الحاشية اللى حواليا هى عيونى .. هنزل واندمج مع الناس حتى لو فى زى تنكر ... واعرف مشاكلهم
هعمل زى الباحث اللى بيقابل عينات بحثه ... انا هعمل كدا هقابل فئات مختلفة من الشعب .. واشوفهم بيشتكوا من ايه وناقصهم ايه ... بمعنى اتقى الله فيهم .. لان كل راع مسئول عن رعيته .. علشان يوم لما أسأل عليهم قدام رب العباد اعرف اقول انا عملت كذا وكذا علشان شعبى مش علشان تأمين مستقبل أفضل لأحفاد أحفاد أحفاد أحفادى
انتخبونى بئه فى المرحلة الجاية
لوسمح لك برؤية الرسول عليه الصلاة والسلام وإنك تقوله كلمة واحدة ؟
اسالك الشفاعه
لو كنا في عصر ازدهار الأندلس كنت تتخيل نفسك إزاي؟
نابغه من نوابغ هذا العصر اما فى الادب او الفن او العمارة ... بس وقتها كنت هفضل اكون نابغه فى العمارة
لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟

وقتها هكمل حياتى معاه
وهجعل منه كل حياتى كزوج واخ وصديق واب وطفلى وهجعل الدنيا متمثلة فيه بدايتها من حروف كلامه ونهايتها تحت اقدامه .. ده مش كلام بس ده اللى جوايا بالفعل ... ومش حلم او مثالية منى ... لان الانجاب رزق من الله عزوجل ولو حدث لى شئ من هذا القبيل يبقا انا معترضة على ابتلاء من ابتلاءات ربنا والعياذ بالله
وهحط قدامى افتراضات كتير اولها لو انا اللى مكانه
ثانيها : لو احنا فعلا تزوجنا وربنا رزقنا بالذرية بس تعرضت لحادث تسبب فى عجز ما عندى
وبالتالى هرضى بقضاء الله
لو طلعت القمر هتكتب عليه ايه؟
Friends forever
اصله صاحبى اوى
لو مررت التاج لحد و ما جاوبش هتعمل ايه؟
مش هعمل حاجه هقول يمكن مش واخد باله
تمرر التاج لمين ؟
اللى حلمها تكون وزيرة عصمت
فرنسا هانم اللى عامله اقامة فى الجبس الايام دى ربنا يقومها بالسلامة
رئيس جمهورية نفسه
دكتور ضياء النجار
اسكندرانى اوى
بنت القمر
ملك الكبدة
واحد مصرى
الاجندة الحمرا
استاذى العزيز lastknight
واى حد عايزه يتفضله

Thursday, December 6, 2007

حديــــــث الســـــاعه

هو فى غيره الاسعار غالية والدنيا نار .. لاء الجو النهارده برد جداً
وفى عز الجو البرد ده .. ماما جت تصحينى الفجر ما هى الساعه 8 بالنسبة لى الفجر لانى مش بشوفها خالص فى الايام العادية ...
اصلى لازم اتكرم واتعطف واروح الزقازيق اخلص لها اوراق من هناك .. وشوية حنية ودلع منها على شوية رخامة منى ... المهم انتهت المداولات على انى صحيت غصبا واقتدارا علشان اروح اعمل لها اللى هيا عايزاه ... وقد كان
وصلت الموقف وكان ناقص شخص واحد بس الزقازيق ... والشخص ده كان انا على طول كدا بحل أزمات المفروض العالم كله يشكرنى .. قعدت فى الكرسى اللى فى النص ... اللى قدامى فيه جنب الشباك شاب فى اواخر العشرينات تقريبا وفى النص راجل تقريبا برضه فى الاربعينات لابس لبس ظابط فى الجيش اكيد دى شغلته يعنى وجنبه واحده ست عسولة شوية بس مش بطلت رغى من اول ماركبت .. فى الكرسى اللى وراهم كان انا جنبى واحد شكله مخبر لاء هو اكيد مخبر علشان عامل شنب كبير اوى ورجلية متبدلة مكان ايديه باين وكل حاجه فيه كبيرة ... جنبه واحد مش جبته اوى يعنى .. ورانا مش عارفه
بس انا سامعه الناس اللى بتتكلم ورا دى عامله ازعاج شديد وصوتهم عالى وفيهم واحد زى ميكون بيخطب الجمعه ده كله وانا حاسه انى نايمة اصلا ... المهم جه شوية برد من الشباك اللى جنبى فوقونى والاقى كل الميكروباص بيتكلم عن الاسعار الغالية الست اللى قدامى قاعده تقول للظابط انا سمعت إن أنبوبة البوتاجاز حتبقى بـ 30 جنيه رد عليها الظابط قالها بـ 45 جنيه - الراجل اللى بيخطب الجمعه اللى ورايا رد قال كله بايدينا احنا الشعب احنا اللى ساكتين ومطاطيين ليهم حق يعملوا اكتر من كدا الولد اللى جنبه قاله وإحنا هنعمل إيه .. الراجل رد اسمع من واحد عاصر كل الحروب وواصل كلامه قبل الحرب لما الأسعار غليت الشعب كله قال لاء كلنا اتحدنا وقولنا كلمة واحده فى وقت واحد والاسعار رجعت تانى مش زادت ولا ميلم .. الولد قاله واحنا نقول لاء لمين ... الراجل قاله انت بتوضح لى انك مفلس فكريا ولو كل الشباب زيك كدا يبقا عليه العوض .. انت بتشتغل ايه يابنى .. الولد قاله انا طالب .. الراجل قاله يبقا تخليك فى كتبك ودراستك وتسكت ... والولد موصر برضه هنروح نقول لاء لمين ... البعيد عنده غباء الخرفان ... اللهم طولك يا روح خلينى ساكته احسن .. وكل لما الواد يتكلم يعصبنى لانه بصراحة بيسال اسئله ميسالهاش عيل عنده شهرين .... الست والراجل اللى قدامى لسه بيتكلموا على الغلاء برضه ... والظابط يقولها كيلو العدس بقا بـ 6 جنيه وهى تقولوا بياكلوكوا ايه فى الجيش دلوقتى يقولها فوووووول ... والمخبر اللى جنبى يقوله اسكت يا سامح باشا مش تتكلم ... والست تبص له باذدراء ... شوية والولد الغبى اللى ورايا بيسال الراجل لما البلد مفيهاش فلوس امال الموظفين اللى فى الحكومة دول كلهم بيقبضوا مرتباتهم منين ... مش قدرت امسك نفسى المرة دى والتفت له ... بيقبضوا من جيبك وجيبى وجيب الحاج اللى جنبك ... قالى ازاى يعنى .. قولت له مش بتدفع ضرايب ومش بتدفع تامينات ومش كل يومين يخترعوا لك مصاريف شوية رسوم نظافه وشوية مصاريف مش عارفه ايه ... لاقيت الراجل بيقوله اهى الاستاذه قالت لك اهيه ... .. وفضل يجى 10 دقايق يقول الله ينور عليكى يا استاذه كانى عبرت القناة ... لاقيت المخبر اللى جنبى اللى كان بيسكت سامح باشا بيبص لى اوى قولت له بص انا ماليش دعوة انا سكت اهوه .. ضحك وقالى انتى تتكلمى براحتك .... بعدها واصل الراجل اللى ورايا مصر مليانه خير دى بتتسرق من سبعتلاف سنة بس رجاله الحكومة سرقوا البلد وهربوا .. واللى جايين جديد عايزين يسرقوا يعملوا ايه ... يرفعوا سعر الدولار وبعده اسعار السلع ... وفجأة سمعت صوت من ورا خالص بيقوله طيب ده بالنسبة للاسعار وقولنا بايدينا واحنا اللى راضيين كرامتنا تتهان وبيسرقونا بمزاجنا والمفروض نكون ايد واحده الراجل قاله انا مش بحرض اعملوا اللى انتوا عايزينه .. رد نفس الشخص اللى قاعد فى الكرسى الاخير ولما الحكومة تمنع اقامة صلاة العيد فى الخلاء يبقا ده ذنب مين ... ويعتقلونا ويعتقلوا أى حد لا ليه صلة بالموضوع لا من قريب ولا من بعيد .. ابص على المتكلم والاقيه واحد عامل دقن 3 متر ولابس طاقيه بيضا رد عليه الراجل المتحدث الرسمى وانا قاعدة اسكت يا لسانى لا ما اسكتش وبدن ما اشعر لاقيت نفسى بقوله ولما تضربوا المأمور ورئيس المباحث وتولعوا فى عربية البوكس وكل اللى ايدكوا تطوله من الشرطة .. ده هو اللى اسمه عدل ... قالى هو انا وجهت لك كلام .. وبعدين انتى ايه عرفك .. قولت له مش معنى ان الاحداث حصلت فى الصالحية وانا فى فاقوس ابقا مش عارفه بس للاسف انا متابعه الاحداث كلها وبعدين لما تتكلم تقول اللى ليك واللى عليك مش تقول نص الكلام وتنكر النص التانى والمخبر اللى جنبى عمال يقولى ما تخافيش من حاجه اتكلمى براحتك خالص .. قولت والله شكلك حتودينى فى داهيه .. ما علينا لاقيت الراجل اللى بيتكلم ورا بيقولى طيب لما تحبى تتكلمى مش تستخبى ورا نضارة ... قولت له هى دى حجتك يعنى ولا مش لاقى رد ترده عليا ... ثم ايه علاقة النضارة باللى بنتكلم فيه .. قالى لاء اصل الحجة القوية بتبان من تعبيرات وجه الانسان وانتى كدا بتثبتى انك على باطل ... هو الراجل ده اهبل ولا ايه .. رد عليه الظابط اللى قدامى وقاله طيب انت كدا تفرعت من الموضوع الاصلى الاستاذه بتتكلم فيه للنضارة اللى هى لابساها يبقا مين هنا اللى حجته قوية او ضعيفه ... هى كلامها صح .. لاقيته ساب الراجل وبيقولى انتى استفزازية انتى لو مش بنت انا كان بقالى رد عنيف معاكى ... قولت له ده العادى انتوا اصلا مش بتفرقوا بين بنت وولد ما هو معروف انكو ارهابيين .... وقتها رد عليا رد مش كويس بصراحة بس انا مش زعلت منه لانه اثبت لى مدى جهله وقلة زوقه وانه انسان منساق ومن بتوع سمعا وطاعه يعنى لا ليه راى ولا عمره هيكون له راى ... بس مين ده المخبر اللى جنبى رد عليه رد قاسى جدا .. ده غير الظابط قاله انت قليل الادب ولو مش احترمت نفسك انا ممكن اذيك .. والشاب اللى جنبه ولاول مرة من اول ما الميكروباص اتحرك ينطق وقاله انا ساكت من الصبح اللى شايفه ان الانسة مش غلطت وانت زى ما قال سامح باشا قليل الادب ... وممكن يبقا لنا تصرف تانى معاك .. لاقيت الست اللى قدامى بتضحك لى وبتقولى شوفتى الكل خايف عليكى ازاى .. هو انتى عندك كام سنة يا قمر .. قولت لها ليه فى حاجه ... قالت لاء بنتعرف ... امممممممممم 27 يا طنط .. قالت لى من فاقوس ... قولت لها آه.. رد الظابط قالى بس انت شكلك مش يدى فاقوس يعنى انتى كنتى ضيفه هناك مثلا ... قولت له والله منها لو تحب اطلع لك البطاقة عادى يعنى .. لاقيت الشاب اللى جنبه بيقولى وانا من مشتول ... أوكى وانا مالى يعنى ضحك وقالى عادى مفيش حاجه ... المخبر اللى جنبى حسيت انه بيبص قولت له فى حاجه ... قالى لالالالا اتكلمى وخدى راحتك خالص متخافيش من اى حاجه .. والله كل لما تقول كدا اعصابى تبوظ شكلك فى الاخر عاملى مفاجاة فى الموقف وداخله امن دولة ان شاء الله .. قالى الميكروباص كله ان شاء الله .. وصلنا بالسلامة وانا نزلت وجريت شاورت لاول تاكسى مش خوفت من امن الدولة بس خوفت من الراجل اللى كان بتاع صلاة العيد ده ... خلصت مشوارى فى ساعتين قولوا 3 .. وعدت ادراجى ... ركبت الميكروباص وكل واحد قاعدف ى حاله شوية و عينك ما تشوف الا النور الاسعار بتغلى وكله فتح فى النواح ... قولت وانا عليا بايه من ده انا عارفه انا لو اتكلمت هعمل مشاكل بس لازم اشغل نفسى فى حاجه .. افتكرت ان شنطتى فيها شكولاته قعدت اكل فيها واحسس نفسى انى مش فى وسط الناس اللى عمال تعيد وتزيد فى الاسعار دى لحد ماوصلت الحمد لله من غير اى اصابات ....

Tuesday, December 4, 2007

يوم سعيد جداً جداً ... علشان كدا خلص بسرعه

البداية ... لما إيمى وكوكا كلمونى علشان اقابل الاستاذ محمود سعد للتسجيل فى برنامج البيت بيتك ... بأمانة كنت رايحة بس لظروف خارجة عن إرادتى إضطريت أعتذر ...
فى نفس الوقت كنت خلاص وصلت لأخر مرحلة من مراحل الملل بسبب الروتين اليومى اللى مبيتغيرش فى حياتى ... ولأنى قبل كدا كان فى معاد بينى وبين الجميلة كلاكيت تانى وتانى بس يوم المعاد ده الندالة لعبت دورها معايا وأضطريت برضه اعتذر بس كان بعد ما الوقت فات ... الآن آن الآوان إنى أنفذ الزيارة فى الحال والتو ... وقد كان كلمت كلاكيت وقولت لها انى فى الطريق ... ووصلت بسهولة لأنها فى المعاد الأول كان وصفت لى العنوان وانا فضلت فاكراه .. ضربت الجرس لاقيت صوت رقيق بيقولى مين .. قولت ايه ده انا بقا اخض اللى ورا الباب ورحت قايله بوليس ... لاقيت حد قمر كدا فتح لى وهو بيضحك طبعا الأستاذ أمر واللى مستحيل اقدر انسى إبتسامته الرقيقه لحد أخر يوم فى حياتى بسم الله ما شاء الله ربنا يحفظه .... واثناء سلامى على أمر ظهر وجه القمر طبعاً الآنسة لينا حواديت بنات محتارة واللى مدونتها جزء لا يتجزأ منها مرحة وشقية وطيوبة وعسوله مزيج هائل .... وبعد لينا سلمت على كلاكيت واللى كنت تانى مرة أتشرف بمقابلتها وفى كل مرة متميزة وبكتشف فيها صفات رائعه ... بصراحة كانت زيارة جميلة لأجمل ناس أكلونى عندهم أكل حلو أوى والأجمل إنى مساعدتش فى إعداده أنا أكلت بس وكلاكيت طول الزيارة تلف ورايا بالبرتقال .. دوختها خرجنا البلكونة ماشاء الله الواحد يقدر يلعب فيها كورة ويحرز أهداف بكل جداره .... وكلاكيت عامله فيها ديكور رائع .. عايز تقعد قعده عربى مفيش مانع .. عايز تقعد رجل على رجل وتأنتخ برضه براحتك زى ما تحب ... بصراحة كلاكيت دى قمر مش حارمه ضيوفها من حاجه ... دايما الوقت الحلو بيجرى بسرعه ... فجأة سمعت المغرب ... ايه ده مش معقول اليوم خلص بسرعه كدا ... طيب بما اننا بقينا بعد المغرب لازم افتح ماسنجرى حالا استغليتهم ودخلت نت من هناك ... لكن الظاهر انى اتاخرت شوية لما فتحته اصلى مش لاقيت غير اوف لاين بس ... كلاكيت راحت تصلى وانا ولينا قعدنا نرغى اكلنا ودان بعض ... وآن الأوان إنى لازم اعود أدراجى ... طبعا مش حقول يالينا انك فضلتى تلبسى الطرحة بس ساعه إن الله حليم ستار .... وصلتنى لينا وعدت إلى أرض الوطن ولحد دلوقتى حاسه إنى كنت بحلم ... معقول انا قابلت الناس الحلوة دى وقعدنا واكلنا واتكلمنا والوقت كان بيجرى بالسرعه دى ... انا معظم ايامى بتعدى عليا بحس ان اليوم بيعدى بسنه .... سبحان الله على تجمع الاحبة ....
ايمى وكوكا والله كان نفسى اقابلكوا واسعد جدا بالقرب منكو ... بس ان شاء الله قريب جدا
كلاكيت وحودايت بنات محتارة و أمر تعرف لو انت كبير شوية كنت جبت والدى وجيت طلبت ايدك بس تتعوض هحجزك لبنتى ان شاء الله بس لما الاقى انا باباها
حقيقى سعدت جدا جدا بزيارتكو
ليكو منى جميعا كل حب ومودة

Thursday, November 29, 2007

شعب للتجربة ... اه زى فيران التجارب كدا بالظبط



انتوا فاكرين الراجل ده .... ايون بالظبط كدا

هو ده اللى كان مترشح فى الانتخابات الرئاسية اللى فاتت واللى زاد وغطى انه ناوى يترشح فى اللى جاية اللى فى 2011 يعنى

هو عمره اساسا دلوقتى 92 سنة كل واحد يجيب الكالكيتور ويحسب معايا فى 2011 حيبقا عنده كام سنة .... علشان يحكمنا اصل نفسه يحكمنا ولو سنة واحده ... بصراحة احنا نبقا شعب مفترى وظالم لو مش انتخبناه على الاقل نحقق له امنيته قبل ما يقابل وجه كريم ....

ياباشا من حقك تترشح مقولناش حاجه .... بس ازاى اصلا حتحكمنا بعد ما وصلت ارذل العمر هو حضرتك فاكر نفسك حتحكم عيلين تلاتة فى البيت وممكن يكونوا عيال مشاغبين يوجعوا قلبك ويعجلوا بحياتك ...

خايفين عليك يا حج ده معاليك من الناس القليلة اللى من زمن الماضى الجميل واللى مبقا موجود منهم كتير دلوقتى ... مش عايزين واحد بلطجى من العيال المشاغبة يفجر نفسه مثلا ولا عبارة تغرق ولا قطر يتحرق واول ما تسمع الخبر تروح مننا وتضيع من ايدينا

حسك فى الدنيا يا حج

امنية حياتك تحكم مصر مقولناش حاجه بس ده لو فى حالة ان معاليك شاب بتلعب فى الاربعنيات الخمسينات الستينات لكن فى التسعينات لييييييييييييييييييييييه

هى مصر عجزت اوى كدا علشان حكامها يبقوا اللى فى التمانين واللى فى التسعين

وبرضه لالالالالالالالالالالا للاخوان المستسلمين على جثتى ان شاء الله

تفاصيل الخبر

الصباحي: أتمنى أن أكون رئيساً لمصر ولو لعام واحد وسأخوض انتخابات 2011

على الهامش

زى ما بلدنا فيها حاجات وحشة ودى كتير ففيها برضه حاجات حلوة

فبدأ القضاء يأخذ مجراه .... وبدأ بالفعل القانون يبقا فوق الجميع

بدءاً بعماد الكبير ومرورا بقتيل تلبانة والبقية تأتى

مبروك لاهل قتيل تلبانه

«تلبانة» تتلقي العزاء في «قتيلها» بعد الحكم بالسجن المشدد ٧ سنوات للضابط والمخبرين

Monday, November 26, 2007

وتباعـــــد


وانا بتجول فى مدونة العزيز محمود رئيس جمهورية نفسه
شوفت له بوست بعنوان الصبار
رجعنى لابيات كنت كتبتها من كااااااااااااااااااااااااااام سنة كدا
عنوانه
وتباعـــــــــد
وكأن حبنا كله قد كان وهماً فى الخيال
وتهدمت أحلامنا مثل البيوت على الرمال
لكننى فضلت أن أفرد قلوع الكبرياء
أغلقت عينى وقتها كى لا يرى دمعى يسال
وجلست أطفئ فى بكائى عبثاً ألملم كبريائى
لكننى لم أستطع
وتجمعت من حولى كل المشاعر تحتضر
وأستحلفته بكل غال عنده أن ينتظر
لكنه لم ينتظر
واليوم جاء يعتذر ؟؟!
جاء وعيونه حمراء يبدو أنه لم ينم
ودموعه فوق خدوده تجوب انهار الندم
مثل دور طالما أستهلكوه المخرجون فوق خشبات المسارح
قال إرتاحى إنى ذاهب
أعلم بانكى تنتقمى
فجراحك لم تلتأم
ثم أستدار غاضباً
ناديتـــــه
يا نجمى
من قال أنى أجرحك
من قال أنى أنتظرك تدمع لأسامحك
يا نور شمسى
بالله لو تعلم كم كان دونك أمسى
بالله أنا لو أنتقم
هل أنتقم من نفسى ؟

Saturday, November 24, 2007

رايحين بينا على فين ؟؟؟؟!!

يعنى من كام يوم يغلوا سعر الكهربا فى السر ولولا العناية الالهية اللى ساقتنى لمصراوى علشان اتصنت عليهم واكشف سرهم واجى هنا واشرد لهم ... كنا اتفاجأنا بارتفاع سعر الكهربا وحتى لو اتفاجأنا هنعمل ايه يعنى .... سنشجب سنستنكر ده ان حصل بالفعل يعنى ومش كل واحد حط لسانه فى بؤه لا مؤاخذه وقالك عايز اربى عيالى
ولسه مش فوقت من الصدمة الاولى بتاعه ارتفاع سعر الكهربا ... وعمال احوش فى الفلوس اللى هدفعها لشركة الكهربا فى آخر الشهر
والاقى النهارده خبر تانى بيصدمنى اكتر واكتر وهو ارتفاع زيادة سعر الدواء والمضادات الحيوية .... الاقيش حد يجاملنى ويرقع لى صوتين اصل انا صوتى اتنبح من كتر المفاجعات اللى عمال تفجعنى طول الشهر ده ... ما هى البركة باينه من اوله ... كابسه من امن الدولة مش حد يقولى قرفتينا بيهم وفى كل بوست تقولى امن الدولة لما عملتى ليهم فضيحة عالمية وزهقتينا منهم لانى بصراحة مش قادرة انسى اليوم ده ولا حنساه ... والمفاجعة التانية ارتفاع سعر الكهربا والمفاجعة التالتة اللى فعلا جابت اجلى وقضت عليا ارتفاع سعر الدوا ... بما فيهم المضاد الحيوى
ابياموكس 500 وارتفع سعره من ستة جنيهات الي ثمانية جنيهات للعبوة 12 كبسولة
وده انا بستخدمه كتير جدا ومينفعش يخلص من عندى اصلا لان عندى واوا يح ... طيب افرض انا افتقرت فجأة ومش معايا الـ 8 جنيه دول اسيب الواو يح توجعنى كدا .... بقا يرضيك يا سيادة الزير سورى يعنى الوزير .... كل واحد من المتسكعين يووووووه الكيبورد اللى بتغلط مش انا المقصود منها المسئولين يجى يقولك الشوباب دول ولادنا ..... طيب ما احنا برضه من الشوباب ولا علشان الواوا يح خلاص مش مصنفه انا من ضمن الشوباب ...
طبعا مش ده لوحده اللى سعره ارتفع ده حاجات كتير بس انا ذكرت اللى يهمنى ( اهئ اهئ اعاااااااا واحد مبهدل نفسه من العياطط يبقا انا )
طيب الحاجة فاطمة جارتنا اللى لا تملك من الدنيا غير الـ 70 جنيه معاش السادات وعندها كوكتيل من الامراض وعايشه لوحدها لا عائل ولا نائل حتى يديها 2 جنيه فى الشهر علشان يبقا مجمل دخلها 72 جنيه ... حتجيب علاج منين لكوكتيل الامراض اللى عندها دول ولا مكفينها تشترى بيهم شوية لب يسلوها فى وحدتها لامؤاخذه .... رايحين بينا فين وعايزين مننا ايه وبتعملوا فينا كدا ليه ... الناس الغلابة اللى مش لاقيه عيش حاف وجسمها مهرى من الامراض .... من اكل مسرطن لمية مجارى بيبلعوها وهما ساكتين ده ان لقيوها اصلا لدم فاسد ومش بيشتكوا وعايشين كافيين خيرهم شرهم هيعملوا ايه
ست جارتنا تانية كانت بتتكلم مع ماما وانا كنت نايمة بس الصوت خرم ودنى لانها تقريبا كانت بتصوت مش بتتكلم بتقولها سمعت ان انبوبة البوتاجاز حتبقا بعشرين جنيه ... شوفتى الافترا ... ماما مصمصت شفايفها وقالت لها شوفت بس هنعمل ايه يمكن ربنا يحط الرحمة فى قلوبهم ويرجعوا فى كلامهم .... الست قالت لها ما هم لو عملوا كدا حد الله لارجع لبابور الجاز هو انا لاقيه ادى العيال مصروف المدرسة الصبح لما املا انبوبة بـ 20 جنيه ... ماما قالت لها اللى يخليهم يرفعوا سعر الانبوبة مش هيخليهم يرفعوا سعر الجاز ربنا يلطف بينا ...
... رايحين بينا لفين يا بشر ... شوية رحمه من فضلكوا ده ربنا اسمه الرحمن الرحيم ده لو كنتوا لسه فاكرينه
تفاصيل الخبر بقا علشان اللى عنده حد بياخد ادوية بعد الشر بعد الشر يعنى على البلوجرية وذويهم لما يروح يشترى دوا يبقا عامل حسابه فى السعر الجديد
وزارة الصحة رفعت اسعار 70 نوع دواء بينها 47 مضادا حيويا

Wednesday, November 21, 2007

تونى وراشيل و كريستى

من كام يوم قاعده فى السيبر اللى مش ورايا غيره ده وموجود عندى كام شخص قاعدين على النت وانا فاتحة المدونة وبرد على اللى عبرونى وشوية المازنجر وإذ بى وألاقى 3ماشاء الله ماشاء الله امريكان هو مش مكتوب على وشهم امريكان بس انا ناصحة من يومى يعنى وعرفت انهم امريكان .... داخلين عايزين نت ... هاه عايزين ايه ..... الناس دى بتستعبط سايبين امريكا وجايين يدخلوا نت من عندى ..... وليه ميكونش السيبر بتاعى سمعته سبقاه طبعا ووصل للعالمية لدرجة ان الامريكان سابوا امريكا واستراليا والنمسا وشبرا وجايين يدخلوا نت من عندى طبعا وهو انا شوية فى البلد دى ولا ايه ... يا ويلكم يا ويلكم بامريكا ورواد امريكا يلا ياض انت وهو بره
.... وطبعا قعد الضيوف الامريكان دى الناس جاية من امريكا مخصوص علشان تدخل نت من عندى
طول ما هما قاعدين رايحين جايين يوشوشوا فى بعض وكل واحد يروح يقعد على جهازة تانى ... ايه ده الناس دى مش على بعضها ليه يكونش امن الدولة باعتينهم علشان يجوا يقبضوا عليا بتهمة التجسس لصالح امريكا ..... لالالا دول شكلهم ولاد ناس وحاجه ابيض على بمبى كدا يعنى امريكانى على حق .. مش بتوع تجسس ولا غيره ...
كان ترتيبهم كالآتى تونى الجهاز اللى جنبه راشيل الجهاز الى فى وش راشيل كريستى ... وانا فى قفا تونى مباشرة ..... قصدى الجهاز اللى انا قاعده عليه يعنى ...
خلصوا وماشيين خلاص ..... طبعا تونى ديك البرابر جه يقولى
tony: how much :
me: 8 pounds
راح مدينى عشرين جنيه وماشى
me:Please wait - the rest is declared
tony: no this for you
طبعا هو قال الكلمتين دول من هنا وانا كنت على وشك انى اردح له بس افتكرت انه ضيف وميصحش

me: Please do not go ahead rest
وطبعا بلهجة نظام انك جاى تبقشقش عليا يا الدلعدى ده انا ابقشقش عليك وعلى امريكا كلها
خدهم وانسحب بدون اى رد فعل وجنبه الموزتين القمر عمال يبصوا نظام مجنونة دى ولا ايه .....
تانى يوم فى نفس الميعاد لاقيت التلاتة جايين ..... قولت المردة دى دول مزقوقين عليا من الانتربول الدولى وطالما انا وصلت للعالمية يبقا بقيت خطيرة على العالم كله يكونش الحاج جورج بوش قرا البلوج بتاعى بس انا مش جايبه سيرة امريكا فيه خالص دول حبايبنا واجدع ناس ولا ضحوا بصدام يوم العيد علشان يكون عبره لمن يعتبر ولا مبهدلين العراق والعراقيين ولا بيدعموا اللى ما يتسموا فى فلسطين ... دول ناس طيبين اوى ومش بياذوا حد خالص والحاج جورج ده حبيب الملايين يعنى .... وفى عز افكارى النور قطع ..... قولت احسن
لاقيت راشيل بعصبية بتقولى What happened
قولت لها عادى بيحصل فى احسن السيبرات

ابتسمت وقالت you speak english
قولت لها طبعا ده انا مواليد انجلترا بس حصلى كدا بفعل فاعل ... قصدى فعل الزمن
rashel : What's your name?
me: nana
بدأت تقدم نفسها Rachel -Tony - Cristie
welcome happy knowing ...
النور جه من غير ما يعبرونى ولا بعد اذنك ولا اى حاجه قعدوا تانى على النت
قولت ايه العيال اللى مش عندها دم دى ... طيب انا بقا مش هعبرهم ولا اكلمهم تانى ... خلصوا وجايين يدفعوا الحساب
نفس السيناريو اللى حصل فى اليوم اللى قبله ... الحساب والباقى لاء الباقى علشانك فى المرة دى بقا كنت حضربه ...
ابتسمت كريستى وتقريبا علشان اهدى بس قالت لى you very good
وقعدت تقولى شوية كلام خلاصتهم يعنى انهم مش بيدخلوا مكان فى مصر غير لما بيتقلبوا ومش بيزعلوا انهم بيدفعوا بالزيادة بس بيزعلوا انهم بيحسوا ان المصريين بيستغفلوهم ..... وهنا بقا هجمت عليها فورا ... نظام اقفى عند حدك مع انى عارفه فى قرارة نفسى ومتاكده ان كلامها صح وعارفه انى بدافع عن باطل .... بس مهما كان بتغلط فى المصريين ومصر تبقا الوطن ويعنى ايه كلمة وطن ( اللى عارف يقولى بينى وبينه اصلها ممكن تكون كلمة ابيحه )... دافعت وانا عارفه انهم بيتاخد منهم الضعف فى كل مكان فعلا .... سواق التاكسى بمجرد ما يلاقى واحد لهجته غريبه يرفع سعر التوصيله 3 اضعاف ... زى ما حصل مع ريلين صديقى الامريكى ايضا واللى نزل مصر مرة فى حياته وحلف ما هو نازلها تانى لانه حس انه بياخد على قفاه لامؤاخذه ... والى بيستغرب جدا اذاى انا مصرية ومش استغليته لحد النهارده مع انى اعرفه من 4 سنين ووقتها فهمته ان العيب بيكون منه هو مش المصريين مع انى عارفه برضه انى غلط يعنى هو هيروح يقولهم استغفلونى والنبى .... نفس الموضوع اللى كنت حخسر عليه صديقتى الكندية وكاننا واخدين شهرة عالمية .. دخول الاماكن السياحية 3 اضعاف ونفس كلمة كريستى مش عندهم مانع يدفعوا بس ميحسوش انهم بينضحك عليهم .... يعنى المعاملة تبقا بالمثل للجميع ... دافعت يا استاذ احمد ( يوميات عيل مصرى ) عن مصر والمصريين ... علشان انا عايشه فى البلد دى اللى باكون نازلة شغلى وفى اى وقت ممكن امن الدولة او مباحث المصنفات او مباحث الاموال العامة حتطب عليا فى اى لحظة وحياخدوا الجهاز اللى انا بشتغل عليه وياخدونى معاهم اصل فى مشاكل فى البلد ولما يتاكدوا ان جهازى فاضى مش فيه اللى بيدوروا عليه بس بعد ما اتبهدل واتعرض على النيابة العامة ونيابة امن الدولة ويضايفونى هناك فى وسط المجرمين والحرامية يوم كدا ولا حاجه وبرضه هيتعملى قضية ... علشان ايه مش عارفه بس مزاجهم يعملوا لى قضية يا مصنفات يا اموال عامة هما ومزاجهم بقا ... دافعت عن مصر والمصريين بالرغم من انى بروح اخلص ورقة من مصلحة حكومية يا اما ادفع دم قلبى علشان تخلص ابتداء من اكبر موظف لاصغر موظف وان مدفعتش حتترمى على جنب .... دافعت عن مصر وانا شايفه شباب بيرجع جوه صناديق هربان من كابوس اسمه البطالة وقعدة القهاوى .... دافعت وانا جوايا بيقولى انتى بتدافعى فى باطل واللى يدافع فى باطل يبقا ظالم وأفاق وحرامى ..... بس مش كان ينفع اسكت ....
راشيل طلبت ايملى لانها قالت لى انها حبتنى جدا من وقت ما رفضت اخد الفلوس الزيادة فى اول يوم ... ولو احب نبقا اصدقاء ... قولت لها طبعا يا قمر يا امريكانى انت احب جدا اوى خالص .... واتبادلنا الميلات وارقام التليفونات ... النهارده لاقيت راشيل جايبه لى شنطة شكلها ظريف وبتقولى ممكن تقبلى هديتى المتواضعه ... طبعا اتفاجأت وقولت لها ياعيب الشوم ده واجب عليا ده انتى فى بلدنا يعنى ضيفتنا ... قالت لى احنا خلاص اصدقاء وانهم مسافرين بكره الغردقه ... ولما سالتها هما اساسا ايه اللى جابهم هنا على اساس ان بلدنا مش سياحى يعنى ولا حاجه ... قالت لى ان تونى بيكون شركة مع شخص من هنا والاوراق قربت تخلص .... عايزين يستمتعوا كام يوم بالاجازة لانهم من اول ما ايجو وهما شغل شغل عايزين يلفوا شوية بقا ويمكن يسافروا من بره بره وطبعا على ميلات بقا ....

Monday, November 19, 2007

طفـــو النـــور

ايوا طفوا النور ومحدش يشغل حاجه بالكهربا
يعنى المكواة مثلا بتستهلك كهربا كتير
بلاها .... مالها يعنى المكوة الرجل حتى بتطلع الهدوم ملحوسة ومهببة وبرضه مكوية
وما تضربيش طماطم فى الخلاط انتى تقطعيها مع الخضار وهى حتتسبك لوحدها ولا لايه اساسا طماطم ملهاش لزوم واهوا برضه توفير والاكل من غير مسبك صحى دى الحكومة عايزه مصلحتنا
اى حاجه داخل فيها الكهرباء لازم نقتصدها ده ان مش بطلناها خالص
اصل حكومتنا النظيفة بقيادة الباشا احمد نظيف قصدى الرشيدة لا مؤاخذه ياباشا مخدتش بالى
رفعت امبارح اسعار الكهرباء
يعنى ياباشا هى الناس لاقيه تاكل لما حتدفع كهربا زيادة
ودى تفاصيل الخبر
الحكومة ترفع أسعار الكهرباء في سرية تامة

اللى غايظنى انهم بيرفعوا الاسعار فى سرية ولو رفعوها فى العلن حد يقدر يفتح بؤه اصلا
و يقولهم مينفعش
اكتر من نصنا امنية حياته يوصل لخط الفقر ومش طايل
ولا ولادنا عايزين يهربوا باى طريقه مع انهم بيرجعوا فى صناديق بس ارحم من الفقر والجوع
ولا الخبر اللى ينرفز على مصراوى ده
عصابة لتسفير الفتيات المصريات وإجبارهن علي ممارسة البغاء بالخارج
تفتكر ياباشا بيطفشوا من ايه دول كمان ... علشان يلاقوا رغيف العيش ويعرفوا يعيشوا ولا علشان يتبطروا على النعمة اللى هما فيها فى ام الدنيا .... ولا علشان طماعين يا سيادة المفتى
عادى ياباشا منك ليه ولا يهمكو
ارفعوا اسعار كمان وكمان وفى العلن مش فى السر
وجوعوا فى الغلابة كمان وكمان
دى بلدكوا واحنا رعايا عندكو
هو من امتا يعنى الرعايا ليهم حق يتكلموا
انتوا ذلوا فينا واحنا حنقول كوماااااان

Sunday, November 18, 2007

ليلـــــة قــلـــــــق


كمية زهق محصلتش ومش عارفه ليه ومن ايه ... عادى بتحصل كتير بس مش بتطول اوى كدا بشغل نفسى فى النت او ارغى مع حد على المازنجر امبارح طلبت معايا اعمل اوف لاين وماليش دماغ لاى حاجه ... حسيت انى عايزه اكل حاجه كويس اهى حاجه تطلعنى من الزهق .... جبت شيبسى ونسكافية ... بس خلصتهم وبرضه زهقانة ... طيب اعمل ايه ... الساعه لسه9انا اروح لعبير اخدها ونروح اى مكان نعمل اى حاجه مش ممكن استسلم كدا ... فعلا رحت لها
أنا : يلا نخرج ...
هى : حنخرج فين فى البلد دى يعنى
انا :امممم على رايك ده احنا لو مشينا من شارع ورجعنا منه تانى حنلاقيهم جابوا اسامينا وتاريخ ميلادنا ورقم تليفوناتنا وعدد اخواتنا
هى : انتى ما صدقتى يلا نروح ناكل ايس كريم
انا : لا انا لسه شاربة نسكافيه وبعدين انا حبدأ ريجيم من بكره مش عايزه اتخن
هى : يادى الستين كيلو اللى قارفانى بيهم كل لما اكلمك تقولى ريجم ومش عايزه اتخن .... المهم انتى عايزه ايه دلوقتى
انا : يلا نروح ناكل ايس كريم
هى : ايه الاخبار دلوقتى
انا : ابدا زهقانة ... اقولك انا هروح
هى : أحسن برضه فى حالتك دى مش ينفع غير انك تروحى ...
فى البيت
يادى الملل لسه الساعه 10ما باليد حيلة انا اقضيها قناة الحكايات بقا وخلاص ..... لاء بس انا عايزه اشرب حاجه ... اروح اعمل شاى ... ... اشوف التلاجة فيها ايه ..... واااااااو سمك .... طب والريجيم ... اه حيبدأ من بكره انا اكل سمك وشاى واعيش حياتى ... مسلسل ورا مسلسل يخربيت الزهق ... انا اروح اعمل شاى .... ايه ده فى ريحة غريبة بس بحبها .... وااااااو جبنة ومش .... اكيد مرات اخويا راحت بلدهم النهارده او مامتها جت .... مش مهم مين اللى راح ومين اللى جه المهم انى الجبنة والمش حبابيبى هنا جنبة وشاى .....واعيش حياتى
.... ما انا حبدأ ريجيم من بكره ... يخربيت الزهق الواحد قاعد لوحده بين4حيطان الله يرحمك يا زمان لما كان اخواتى كلهم لسه هنا وعاملين دوشة وقلق وحشونى والله .... لاء بس احسن برضه انهم اتجوزوا كان بيفرضوا عليا القناة اللى يحبوا يتفرجوا عليها وبحكم انى اخر العنقود مش اقدر اقولهم لاء يجوا يشوفوا اللى بيقولوا اخر العنقود متدلعين بلا ارف .... بس برضه كانوا مسليينى وبيعملوا لى كل حاجه وانا قاعده فى مكانى ... لاء بس دلوقتى مستفرضه بكل حاجه لوحدى وماما برضه بتعملى اللى انا عايزاه .....بس برضه وحشونى .... انا مش عايزه نكد كفاية كل دموعى خلصت على الملك فاروق وهما بيستبعدوه من مصر وعمر وهو بيعيط علشان شمس تسامحه فى مسلسل فريسكا والاتنين الحلقة الاخيرة النهارده طالبة نكد علشان اقعد اعيط واخلص الدمعتين اللى عندى ... انا اقوم اعمل شاى .... لاء مش فاتحه التلاجة ..... بس غصب عنى ... ايه ده موووووز على اساس اننا ساكنين فى جبلاية مش عارفين يجيبوا جوافة ... انا عايزه جوافة ..... هروح اصحى ماما اقولها تجيبى لى بكره جوافة ... بس ما هو ممكن اقولها الصبح يعنى ... بس الصبح ممكن انسى ... انا هروح اصحيها واقولها وخلاص امال هى ماماتى ازاى ما انا لازم اقلقها .... ماما .... نعم ... انا عايزه جوافة
ماما : طيب الصبح
ما هو انا بقولك علشان تجيبها لى الصبح
ماما : خلاص بقا ما انتى قولتى
طيب ولو نسيتى اعمل انا ايه يعنى
ماما : صبرنى يارب
انتى بتكلمينى كدا ليه هو انا مش بنتك برضه فى حد بيكلم بنته كدا
ماما : يلا يابت من هنا
انا عايزه ايه ياربى ..... لاء مش شاى اصلا الاكل اللى فى التلاجة خلص بقت فاضية .... انا اتصل بعبير .... ايوا يا بنتى انتى نايمة
هى : اه خير فى حاجه ولا ايه
لاء بس مش عارفه انام ....
هى :يعنى مصحيانى قرب الفجر علشانى تقولى لى مش عارفه تنامى طيب انا مطلوب منى ايه اعمله
ما تعمليش حاجه بس خليكى فاكراها ماشى ازاى انتى نايمة وانا مش عارفه انام
هى : لاء انا غلطانة تصدقى بقولك ايه اشوفك الصبح تصبحى على خير
اممممممممممممممممممممممم
وانا مش عايزه اشوفك سلام
ايه ده الفجر يعنى الناس كلها هتصحى بعد شوية وكلنا حنبقا زى بعض يا حلولى
ماما صاحيه تصلى الصالة مضلمة والتلفزيون مفتوح بدات تكلم نفسها عادتك ولا حتشتريها تدخلى تنامى وتسيبى التلفزيون مفتوح .... لاء انا هنا مش نايمة .... سلام قول من رب رحيم ... ايه يا ست ماما شوفتى عفريت
ماما : لاء بس انتى ايه اللى مصحيكى لدلوقتى كدا
انا : هو كدا مش عارفه انام وخلاص
هى : طيب قومى اتوضى وصلى وادخلى حاولى تنامى
رايحه اتوضا الاقى ابويا فى وشى .... طول الليل عامله قلق ورايحة جاية ترزعى فى ابواب والتلفزيون على الاخر اعوذ بالله .... ايه ياعم الحاج انت مش نايم فى اوضتك وبابك مقفول عليك هو حد جه جنيك ثم انت بتزعق لى ليه يعنى انتوا مخلفينى علشان تزعقوا لى هو فى حد بيزعق لبنته كدا الفجر كمان ..... والله بعد عم الحاج بقالك اكتر من شهر عمال تقوليها لى دى ما انا عارف انا ابوكى ولا ضيف عندكو ..... طب روق كدا وقولى اعملك شاى ولا هتعمل ريجيم من بكره ....
هو : حد يشيل البت دى من هنا
ماما : يلا ادخلى صلى ونامى حرام عليكى نفسك منمتيش خمس دقايق على بعض
لاء انا مش عايزه انام .... انا عايزه شاى

Thursday, November 15, 2007

تفتكرينى أو تنسينى


عنوان البوست ده اغنية قديمة شوية لعمرو دياب .... اتسمعت لى النهارده قهرا
.... ايه السبب بئه ... من حوالى 3 شهور كنت محتاجه اطبع ورق الوان وانا البرنتر اللى عندى ليزر يعنى اسود بس .... واثناء وانا ماشية بالليل لاقيت سايبر فى طريقى هو مش بعيد عن السيبر بتاعى بس فى نفس الوقت كان اول مرة ادخله قولت اشوف السيبر ده يمكن فيه الوان ... وفعلا لاقيت فيه ... والشخص الموجود بدأ يطبع لى الورق ... دخلت بنت طلعنا معرفة وايه ده مش ممكن بتعملى ايه هنا يا نانا وسلامات وبوس واحضان وده العادى اصلا لان معظم اللى بيجوا عندى السيبر بتاعى بنات وبالتالى بقابل بنات كتير جدا فى اى مكان فى البلد طبعا كلهم عارفينى ... المهم قولت لها ابدا كنت عامله بحث وبالصدفة بسال هنا على برنتر الوان ولاقيت ... لاقيتها بتقول للى بيطبع لى انت تطبع لها الورق كويس دى تبقا فلانة صاحبة سيبر مش عارف ايه ... التانى بابتسامة عريضة والله هو انتى ازيك ... فرصة سعيدة جدا والله لازم تشربى حاجه ... انا متشكرة جدا يا فندم بس متاخره ومحتاجه اخلص .... البنت طلعت قريبته ولاقيتها بتقولى والله ما انتى ماشية غير لما تشربى حاجه ... وجابوا لى شاى ..... وقت الحساب اصر انه ما ياخدش الحساب قولت له لا يمكن ابدا ده شغل يا اما حسيب لك الورق وامشى .... المهم انى دفعت الفلوس اللى قال عليها واللى اقل من تكلفة الورق بكتير جدا ... ولما سالته بس كدا قليل اوى راح قالى ده احنا زمايل ومش ينفع اعاملك زى الغريب ... وبعدين حنردها فى اى شغل عندك والكلام ده كله .... تانى يوم لاقيته جاى عندى السيبر عازم نفسه على شاى واللى فهمته انه جاى يرد حق الشاى اللى شربته عندهم ..... وابدى اعجابه بالسيبر اللى هو فى الاساس مش عاجبنى انا شخصياً .... فات يومين ولاقيته برضه عازم نفسه على شاى ... ايه يا حج فرح هو ولا ايه ده مكانش بحث ده .... لاقيته بيقولى من غير لف ولا دوران انا معجب بشخصيتك وانتى بنت طموحة وفيكى مميزات كتير اى حد يتمناها وانا كلمت الوالد وعايزينك تحددى لنا معاد عندكو فى البيت ... قولت يا صلاة النبى احسن ..... قولت له طيب مش تاخد راى قبل ما تكلم والدك ... قالى ما انا مش ها اجى اتجوزك على طول ... ده مجرد تعارف يعنى وكدا ... قولت والله عين العقل واهوه الصيت ولا الغنى .... على الاقل الجيران يشوفوا عريس داخل ومامتى تقعد فى وسطهم وتقول بنتى كل يوم عندها عريس وهى ابدا ما اخدوش يا ماما ما اخدوش يا ماما لن احرمك يا امى من هذه الفشخرة الكدابة دى انتى ياما تعبتى علشانى ... قولت له وماله بيتنا اوبن اينى تايم .... راح قالى خلاص يبقا الجمعه بعد العصر ان شاء الله ... وجه يوم الجمعه هو والده فعلا ..... وقعدوا مع السيد الوالد واخويا .... وبابايا طول القعدة انت شوفتها فين.... ايه يا عم الحج الراجل عمال يقولك زومل يعنى هيكون شافنى فى سينما ريفولى والله انت راجل غريب ..... خلصت المقابلة بعد ما قعدوا يقولوا احنا مش عارف من عيلة مين ونسايبنا يبقوا مين وجيرانا مين وولاد عمة سوسو بنت الجيران اللى فى الدور الرابع اسمهم ايه ومش عارف ايه تانى ... وبعد ما مشيوا السؤال التقليدى للماما بتاع انا .... ها رايك ايه ... بصراحة ملقيتش حل غير انى اصارحها وانى خليتهم يجوا علشان تاخد راحتها مع الجيران ... قالت لى يعنى ايه ... قولت لها ده جزء من رد جمايلك عليا يا ماما ... بصت لى من فوق لتحت وكانها بتقولى كان يوم اسود يوم ما شوفتك وسابتنى ومشيت .... تانى يوم بئه فى السيبر جه يسالنى ... ايه يا جميل راى بابا واخوكى قولت له عادى بس فى النهاية دى حياتى انا مش هما ... قالى يعنى ... قولت له يعنى انت جيت وخلاص مش كنت عايز تتعرف واديك اتعرفت ... قالى برضه مش فاهم ... قلت له يعنى الموضوع ده قسمة ونصيب وانا بصراحة حاسة ان نصبى لسه شوية عليه ... قالى مش هعتبر ده رد نهائى وفكرى براحتك وبعدين نتكلم .... قولت عاتشى ولا بيهمنا الحاجات دى ... بعد كام يوم لاقيت البنوتة قريبته بتكلمنى ها يا نانا ايه الاخبار والاهرام والكلام بتاع الستات ده قولت لها يا حبيبتى انا قولت لقريبك كل شيق قسمة ونصيب بس هو اللى مش عايز يقتنع على العموم الموضوع بالنسبة لى منتهى بس وخلصت الحوار على كدا ... راح هو مكلمنى قالى انا الظاهر انى اتسرعت وانا اسف ... فات يجى شهر لاقيته جاى يسالنى على حاجات فى الشغل قولت عادى دى مش حجه ولا حاجه الراجل بيسال بس وبعدها عرض خدماته ولو احتجتى اى حاجه انا تحت امرك ... الامر لله يا هندز ... طبعا فاكرين الاسبوع الفات واليوم المشؤم اللى امن الدولة اخدت زمايلى فيه بسبب الاخوان مع انى مش كنت عايزه اذكرهم فى البوست ده بس افتكرت الناس الى بتقول انى بهاجمهم قولت مش هحرمكو من ذكر اسمهم .... المهم بئه ... زى ما زعلتكو هفرحكوا الناس دى بدأت تستلم اجهزتها تانى بس هو كان من ضمن الناس اللى اتاخد من عندها اجهزة بس لسه مش استلم جهازة .... لاقيته بيتصل بيا النهارده بيسألنى الناس اللى استلمت اجهزتها قدمت اوراق ايه ولا عملت ايه قال يعنى مش ممكن يسال حد منهم مباشرة .... بس انا طنشت وقولت دى مش حجه علشان يتصل ولا اى حاجه ... قولت له راحوا مجلس المدينة جابوا جواب ان مش فى حاجه اسمها ترخيص سيبر وبيقدموا كمان البطاقة الضريبية بتاعة السيبر ... قالى طيب انا جاى لك دلوقتى علشان اعرف بالظبط اعمل ايه ... وجه فعلا وقولت له على الحاجات اللى الناس اللى استلمت اجهزتها قدموها وفى اثناء الحوار موبايلى رن خرجت بره علشان ارد رجعت لاقيته مشغل اغنية عمرو دياب تفتكرينى او تنسينى وبيقولى حلوة صح ... لاقيت نفسى مسحوبة من لسانى وبقوله على فكرة انا لا افتكرتك ولا فاكراك اساسا ... انت اللى دايما بتحاول تكلمنى باى حجه ويوم ما زمايلنا كانوا بيتعرضوا على النيابة كانت الناس فى حال وانت فى حال تانى خالص ... بالرغم من ان الولد اللى بيشتغل عندك كان جوا معاهم وجهازك متاخد مع الولد وانت برضه شاغل نفسك بيا وباخبارى ... يا اعصابك ... وقف من مكانه وقالى برضه مفيش فايده فيكى فوقى وانزلى لارض الواقع مش حيوديكى فى داهيه غير غرورك واحساسك بانك احسن من الناس ..... قولت له مش غرور قد ما هى ثقة بالنفس .... واللى يوصله احساس بانى حاسه انى احسن من الناس يبقا هو حاسس انه اقل منى ودى مش مشكلتى ... لاقيته وقف من مكانه وكان هاين عليه يمسك حاجه يرميها في وشى بس الظروف مش ساعدته .... طبعا هو اللى جابه لنفسه .... ولو جاله ارتفاع فى ضغط الدم او سكر دلوقتى يبئه هو الجانى على نفسه

هو انا بحكى هنا ليه

اه بفضفض

Tuesday, November 13, 2007

موت وخراب ديار

الأحزان تخيم علي الفيوم والدقهلية والشرقية بعد استقبال ٢٢ جثة من ضحايا «الهجرة»

مش قادرة اتخيل المنظر واب وام بيودعو ابنهم بعد ما استلف من طوب الأرض علشان يدور على لقمة عيش نضيفه
وبعد كام يوم يروحوا يستقبلوه
بدل ما يرجع وهو مسدد الديون
بدل ما يرجع ياخد اهله بالاحضان
راجع لهم فى صندوق
والغريب اللى اتقال عليهم بعد ما ماتوا الموتة المهينة دى
فى النهاية هما اللى طماعين
كان بالفلوس اللى استلفها علشان يهاجر بيها فتح مشروع فى بلده
قال يعنى اللى فاتح مشروع فى بلده عارف يستريح
واكبر دليل اللى بيجرى لنا .....
تبقا قاعد فى المشروع بتاعك ايا كان وتلاقى واحد موظف ضرايب داخل عليك ...
خرج موظف الضرايب من هنا تلاقى بعده موظف المجلس عايز العشرة جنية رسوم النظافة بتاعه كل شهر
خرج موظف المجلس تلاقى موظف التامينات ... ويادوب قاعد علشان تدفع للحكومة وزى ميكون مستنيين بعض على اول الشارع ..... واحد خارج والتانى داخل .... واول ما حاجه تحصل فى البلد تلاقى الامن طابب عليك زى ميكون مجرم ومطلوب حالا للعدالة
وفى النهاية اللى بيدور على تحسين مستواه ولقمة عيش نضيفه يتقال عليه طماع
قلبى وجعنى اكتر ما هو موجوع
ربنا يصبر أهاليهم

Sunday, November 11, 2007

شر البلية ما يضحك

داخله اشوف المصرى اليوم ومش فى دماغى اى حاجه اشاسا
والاقى الخبر ده فى وشى وفى الصفحة الرئيسية
شباب الإخوان يتمردون علي قيادات الجماعة..... ويتجهون لإنشاء «مكتب إرشاد مواز»
آل أيه شباب الإخوان انفصلوا عن القيادات العليا وبدأوا بالفعل نشاطهم المنفصل
وكمان ناويين ينتخبوا مرشد اخوانى شاب حليوة كدا روش طحن
يلبس احدث بدل مستورة .... ويسرح شعره هبابه يمين وهبابه شمال
اصل الكبار اتهموا الصغيرين بالتخلف و بالتفاهه
قام الصغيرين مسكتوش عملوا مكتب ارشاد لوحدهم وبيلفوا على القرى والنجوع يوووووووه قصدى يعنى على المحافظات وحيبقا مولد سيدى العريان
اخوان كبار واخوان صغار .... والكبار يكتبوا فى موقعهم اخوان اون لاين عن التخلف والتفاهه بتاعه الصغار
والصغار يكتبوا فى موقعهم اخوان اوف لاين عن الافعال الفاضحة للكبار
وناس تشتم وناس تفضح
وانقلب السحر على الساحر
وادينا بنتفرج